1. Kotea ia te ʼu aluʼaga fakafiafia ʼe tou fakatalitali ki ai lolotoga te ʼAfio ʼa Kilisito Ia Taʼu ʼe Afe?

 ʼE KO he ʼaho fakafiafia moka kamata ia te fakatuʼuake ʼi te kele lolotoga te ʼAfio ʼa Kilisito Ia Taʼu ʼe Afe. ʼE mahino ia, ʼe fakaʼamu ia natou fuli ʼae kua mate he tahi neʼe natou ʼofa mamahi ai ke natou toe felaveʼi. Pea ko te aluʼaga ʼaia ʼe toe logoʼi e Sehova. (Sopo 14:15) Kotou fakakaukauʼi age muʼa ia te toe fiafia ʼe logoʼi e te hahaʼi fuli ʼi tanatou toe felaveʼi mo natou ʼae ʼe natou ʼofa mamahi ai. Neʼe tou vakaʼi ʼi te alatike ʼaeni kua ʼosi ko te “kau faitotonu,” ʼae ʼe tohi ʼonatou higoa ʼi te tohi ʼo te maʼuli ʼe ‘fakatuʼuake anai ki te maʼuli.’ (Gaue 24:15; Soa. 5:29) ʼE lagi kaugamalie anai ia natou ʼae ʼe tou ʼofa mamahi ai ʼe kau ia natou ka fakatuʼuake ʼi te fakatuʼuake ka kamata fai ʼi te kele. * Kae ʼe ‘fakatuʼuake anai ki te fakamau’ ia te “kau heʼe faitotonu.” Ko natou ʼaia neʼe mole natou maʼu te fealagia ʼae ke natou iloʼi ia Sehova pe neʼe mole natou tauhi agatonu kia Sehova ʼi muʼa ʼo tanatou mamate.

2-3. (1) Ka tou lau ia Esaia 11:9, 10, kotea anai ia te toe gaue faiako ʼae neʼe heʼeki fai ʼi muʼa atu? (2) Kotea ʼae ka tou vakaʼi ʼi te alatike ʼaeni?

² ʼE ʼaoga anai kia natou fuli ʼaia ka fakatuʼuake ke akoʼi natou. (Esa. 26:9; 61:11) Koia, ʼe tonu anai ke fai ia te toe gaue faiako ʼaia neʼe heʼeki fai ʼi muʼa atu. (Lau ia Esaia 11:9, 10.) Kotea tona tupuʼaga? ʼUluaki, ʼe tonu anai ki te kau  heʼe faitotonu ʼae ka fakatuʼuake ke natou ako ke natou iloʼi ia Sesu Kilisito, mo te ʼu fakatuʼutuʼu ʼo te Puleʼaga, mo te sakilifisio faitotogi ʼa Sesu pea mo te maʼuhiga ʼo te huafa ʼo Sehova mo tana pule faʼitaliha. Pea lua, maʼia mo te kau faitotonu ʼe tonu anai ke natou iloʼi ia te ʼu aluʼaga neʼe fakaha mamalie e Sehova ʼo ʼuhiga mo tana fakatuʼutuʼu ki te kele. Neʼe mamate ʼihi ia natou ʼaia kae neʼe heʼeki ʼosi katoa ia te Tohi-Tapu. Koia, ʼe lahi anai te ʼu faʼahi ka ako anai e te kau heʼe faitotonu pea mo te kau faitotonu.

³ ʼI te alatike ʼaeni, ʼe tou tali anai ki te ʼu fehuʼi ʼaeni: ʼE fakahoko feafeaʼi anai ia te toe gaue faiako ʼaia? Kotea ia te pikipikiga ʼo te toe gaue faiako ʼaia mo te tohi ʼo te ʼu higoa ʼo talu ai ʼi te tohi ʼo te maʼuli? ʼE maʼuhiga kia tatou ia te tali ki te ʼu fehuʼi ʼaia ia ʼaho nei. ʼE tou vakaʼi anai ʼihi lea fakapolofeta ʼi te tohi ʼo Taniela mo Apokalipesi. Pea ʼe tokoni mai anai ia te ʼu lea fakapolofeta ʼaia ke tou mahino lelei age ki te aluʼaga ka hoko moka fakatuʼuake te kau mate. Kae tou vakaʼi muʼa ia te ʼu aluʼaga fakafiafia neʼe tala ʼi te lea fakapolofeta ʼa Taniela 12:1, 2.

4-5. Kotea ʼae ʼe ui ia Taniela 12.1 ʼo ʼuhiga mo te ʼu temi fakaʼosi?

⁴ Lau ia Taniela 12:1. ʼE fakaha ʼi te tohi ʼo Taniela ia te fakahoahoa ʼo te ʼu aluʼaga fakafiafia ka hoko anai ʼi te ʼu temi fakaʼosi. Ohage la, ʼe fakaha ia Taniela 12:1 ko Mikaele, ʼae ko Sesu Kilisito ‘ ʼe tuʼu ake anai ʼo tokoni ki te hahaʼi ʼa te ʼAtua.’ Neʼe kamata hoko ia te koga ʼaia ʼo te lea fakapolofeta ʼi te 1914 ʼi te temi ʼae neʼe fakanofo Hau ai ia Sesu ʼi te Puleʼaga ʼo te ʼAtua.

⁵ Kae neʼe toe ui e Taniela “ ʼe tuʼu ake anai” ia Sesu lolotoga ‘he temi mamahi neʼe heʼeki hoko talu mai te tuʼu ʼo he puleʼaga ʼo kaku ki te temi ʼaia.’ Ko te “temi mamahi” ʼaia ʼe ko te “toe mamahi lahi” ʼae ʼe talanoa ki ai ia Mateo 24:21. ʼE tuʼu ake anai ia Sesu ʼo haofaki te hahaʼi ʼa te ʼAtua ʼi te fakaʼosi ʼo te temi mamahi ʼaia, ko tona fakaʼuhiga ʼi Alamaketone. ʼI te tohi ʼo Apokalipesi, ʼe ui ko te hahaʼi ʼaia ʼe ko he toe hahaʼi tokolahi pea ‘ ʼe ʼomai mai te toe mamahi lahi.’​—Apk. 7:9, 14.

6. Kotea anai ka hoko ki te toe hahaʼi tokolahi ʼi tanatou ʼosi hao mai te mamahi lahi? Kotou fakamahino. (Vakaʼi mo te alatike “Te ’u Fehuʼi ’a Te Kau Lautohi” ʼo ʼuhiga mo te fakatuʼuake ʼi te kele.)

⁶ Lau ia Taniela 12:2. Kotea anai ka hoko ki te toe hahaʼi tokolahi ʼi tanatou ʼosi hao mai te mamahi lahi? ʼE mole talanoa ia te lea fakapolofeta ʼaia ki he fakatuʼuake fakata peʼe ki he fakatuʼuake fakalaumalie ʼa he ʼu kaugana ʼa te ʼAtua ʼe hoko anai ʼi te ʼu ʼaho fakamuli, ohage ko tatatou mahino ki ai ʼi muʼa atu. * Kae ʼe fakaʼuhiga ia ki te fakatuʼuake ʼo te kau mate ʼae ka hoko anai ʼi te ka haʼu ʼi te malama foʼou. He koʼe ʼe feala ke tou ui te faʼahi ʼaia? ʼE toe fakaʼaogaʼi te kupu “efu” ia Sopo 17:16 pea ʼe toe fakaʼuhiga pe ki te kupu “Faitoka.” Koia, ʼe ha mai ai ʼe talanoa ia Taniela 12:2 ki he fakatuʼuake moʼoni ka hoko anai hili te fakaʼosi ʼo te ʼu ʼaho fakamuli pea mo te tau ʼo Alamaketone.

7. (1) Kotea te fakaʼuhiga ʼo te ui ʼae ʼe fakatuʼuake anai ʼihi ki te “maʼuli heʼe gata”? (2) He koʼe ʼe ko he “fakatuʼuake ʼe lelei age”?

⁷ Kae kotea te fakaʼuhiga ʼo te ui ʼae ia Taniela 12:2 ʼe fakatuʼuake anai ʼihi ki te “maʼuli heʼe gata”? Ko tona fakaʼuhiga ʼe  maʼu leva anai e te kau fakatuʼuake ia te maʼuli heʼe gata. Ko te kau fakatuʼuake ʼaia ʼe natou ako anai ke natou iloʼi peʼe hoko atu anai tanatou ako ke natou iloʼi ia Sehova mo Sesu pea mo tanatou fakalogo kia naua, ʼi te ʼu taʼu ʼe afe. (Soa. 17:3) ʼE ko he “fakatuʼuake ʼe lelei age” anai ʼi te fakatuʼuake ʼae neʼe fai ki ʼihi ʼi te temi muʼa. (Hep. 11:35) Kotea tona tupuʼaga? He ʼe ko te hahaʼi heʼe haohaoa ʼaia neʼe natou toe mamate foki.

8. Kotea te fakaʼuhiga ʼo te ui ʼae ʼe fakatuʼuake anai ʼihi ki he ‘maʼuli ufiufi ʼo talu ai’?

⁸ ʼE mole tali anai e te kau fakatuʼuake fuli ke akoʼi natou e Sehova. ʼE ui ʼi te lea fakapolofeta ʼa Taniela ʼe fakatuʼuake anai ʼihi ki he ‘maʼuli ufiufi ʼo talu ai.’ ʼE mole tohi anai ʼonatou higoa ʼi te tohi ʼo te maʼuli pea ʼe mole natou maʼu anai ia te maʼuli heʼe gata koteʼuhi ʼe natou agatuʼu anai. Kae ʼe natou ‘maʼuli ufiufi ʼo talu ai’ peʼe pulihi anai natou. Koia, ʼe talanoa ia Taniela 12:2 ki te ikuʼaga fakaʼosi ʼo te kau fakatuʼuake fuli ʼo mulimuli ki te ʼu gaue ʼe natou fai hili tonatou fakatuʼuake. * (Apk. 20:12) Ko ʼihi ʼe natou maʼu anai te maʼuli heʼe gata kae ʼe mole maʼu anai e ʼihi.

9-10. Kotea ʼae ka toe hoko hili te mamahi lahi? Pea ko ai ʼae ʼe “gigila anai . .  ohage ko te malamagia ʼo te lagi”?

⁹ Lau ia Taniela 12:3. Kotea ʼae ka toe hoko hili te “temi mamahi”? Ohage pe ko Taniela 12:2, ʼe talanoa te vahe 3 ki he aluʼaga ka hoko anai hili te mamahi lahi.

¹⁰ Ko ai ʼae ʼe “gigila anai . . . ohage ko te malamagia ʼo te lagi”? ʼE tokoni mai ia te ʼu palalau ʼaeni ʼa Sesu ia Mateo 13:43 ke tou iloʼi pe ko ai. ʼE ui fenei ai: “ ʼI te temi ʼaia, ʼe gigila anai te kau faitotonu ohage ko te laʼa ʼi te Puleʼaga ʼo tanatou Tamai.” Ka tou lau fuli ia te kapite 13, neʼe palalau ai ia Sesu ki “te ʼu foha ʼo te Puleʼaga,” ia tona ʼu tehina fakanofo ʼae ka kaugā hau anai mo ia ʼi te Puleʼaga ʼo selo. (Mat. 13:38) Koia ʼe talanoa ia Taniela 12:3 ki te kau fakanofo pea mo te gaue ka natou fakahoko anai lolotoga te ʼAfio ʼa Kilisito Ia Taʼu ʼe Afe.

11-12. Kotea te gaue ka fai anai e te toko 144 000 ʼi te ʼu taʼu ʼe 1 000?

¹¹ ʼE tokoni feafeaʼi anai te kau fakanofo ki “te tokolahi ke natou faitotonu”? ʼE gaue fakatahi anai te kau fakanofo mo Sesu Kilisito ki te takitaki ʼo te toe gaue faiako ka fakahoko anai ʼi te kele ʼi te ʼu taʼu ʼe 1 000. ʼE mole fakanofo pe anai te toko 144 000 ko he ʼu hau kae ʼe natou toe liliu anai ko he ʼu pelepitelo. (Apk. 1:6; 5:10; 20:6) Koia, ʼi tonatou ʼuhiga pelepitelo ʼe natou kau anai ki te ‘fakamalolo ʼo te ʼu puleʼaga’ pea mo tokoni anai ki te hahaʼi ke natou liliu mamalie ʼo haohaoa. (Apk. 22:1, 2; Esk. 47:12) ʼE mahino ia, ʼe ko he aluʼaga fakafiafia anai ki te kau fakanofo.

¹² ʼE tokoniʼi te tokolahi ke natou faitotonu. Ko ai ʼae ka kau anai ki “te tokolahi” ʼaia? ʼE ko natou anai ʼae ka fakatuʼuake pea mo natou ʼae ka hao anai ʼi Alamaketone, ʼo feia mo te ʼu fanau fuli ka tutupu ʼi te malama foʼou. ʼI te fakaʼosi ʼo te ʼu taʼu ʼe afe, ʼe haohaoa anai ia te hahaʼi fuli ʼo te kele. ʼE ko te temi fea ʼae ʼe tohi ai anai ʼonatou higoa ʼo talu ai ʼi te tohi ʼo te maʼuli ʼaki he peni ʼe mole feala tona molehi?

13-14. Kotea ʼae ʼe tonu ke fakaha e te hahaʼi haohaoa fuli ʼi muʼa ʼo tanatou maʼu ia te maʼuli heʼe gata?

¹³ ʼE tonu ke tou manatuʼi ka haohaoa he tahi ʼe mole fakaʼuhiga leva ʼe ina maʼu atu aipe ia te maʼuli heʼe gata. Kotou manatuʼi ia Atama mo Eva. Neʼe nā haohaoa kae neʼe tonu ke nā fakaha ia tanā fakalogo kia Sehova ʼAtua ʼi muʼa ʼo tanā maʼu ia te maʼuli heʼe gata. Kae neʼe mole nā fakalogo kia te ia.​—Loma 5:12.

¹⁴  ʼE feafeaʼi anai ia te aluʼaga ʼo te hahaʼi ʼi te ʼosi ʼo te ʼu taʼu ʼe 1 000? ʼE natou haohaoa fuli anai. ʼE lagolago anai koa ia te hahaʼi fuli ʼaia kua haohaoa ki te pule ʼa Sehova ʼo talu ai? Peʼe hage anai koa ʼihi ia ko Atama mo Eva, ʼae neʼe haohaoa kae neʼe mole nā nonofo agatonu? ʼE tonu anai ke tou tali ki te ʼu fehuʼi ʼaia. ʼO feafeaʼi?

15-16. (1) Ko te temi fea ka fakaha anai e te hahaʼi fuli tanatou nofo agatonu kia Sehova? (2) Kotea anai ia te ikuʼaga fakaʼosi ʼo te ʼahiʼahi ʼaia?

¹⁵ ʼE pilisoniʼi anai ia Satana lolotoga te ʼu taʼu ʼe 1 000. ʼI te temi ʼaia, ʼe mole feala anai ke ina fakahalaʼi he tahi. Kae ʼi te fakaʼosi ʼo te ʼu taʼu ʼe 1 000, ʼe tuku age anai ia Satana. ʼE faiga anai ke ina fakahalaʼi ia te hahaʼi haohaoa. ʼI te ʼahiʼahi ʼaia, ʼe fakaha lelei anai e te hahaʼi haohaoa pe ʼe natou fakamaʼuhigaʼi ia te huafa ʼo te ʼAtua  pea mo lagolago ki tana pule faʼitaliha. (Apk. 20:7-10) Ko te aluʼaga ka natou fai ʼi te temi ʼaia, ʼe feala ai ke iloʼi pe ʼe tonu ke tohi ʼonatou higoa ʼo talu ai ʼi te tohi ʼo te maʼuli.

¹⁶ ʼE ui mai ʼi te Tohi-Tapu ʼe mole nofo agatonu anai ʼihi hahaʼi ohage ko Atama mo Eva pea ʼe mole natou tali anai ia te pule ʼa Sehova. Kotea anai ka hoko kia natou ʼaia? ʼE ui fenei ia Apokalipesi 20:15: “Ko ia ʼae neʼe mole tuʼu tona higoa ʼi te tohi ʼo te maʼuli neʼe li ki te vai ʼae ʼe vela ai te afi kakaha.” ʼEi, ʼe pulihi anai ia te kau agatuʼu ʼaia ʼo talu ai. Kae tokolahi te hahaʼi haohaoa ʼe natou nofo agatonu anai ʼi te ʼahiʼahi fakaʼosi ʼaia. ʼE tohi anai ʼonatou higoa ʼo talu ai ʼi te tohi ʼo te maʼuli.

17. Ka tou lau ia Taniela 12:4, 8-10, kotea ʼae neʼe ui e te ʼaselo kia Taniela ʼo ʼuhiga mo te aluʼaga ka hoko ʼi totatou temi?

¹⁷ ʼI fakafiafia leva tatatou fakakaukauʼi ia te ʼu aluʼaga ʼae ʼi te ka haʼu. Kae neʼe toe maʼu e Taniela he ʼu logo maʼuhiga mai he ʼaselo ʼo ʼuhiga mo totatou temi, ia “te temi fakaʼosi.” (Lau ia Taniela 12:4, 8-10; 2 Tim. 3:1-5) Neʼe ui fenei e te ʼaselo kia Taniela: “ ʼE mahu anai te ʼatamai malama moʼoni.” Ko tona fakaʼuhiga ʼe mahino  lelei age anai te hahaʼi ʼa te ʼAtua ki te ʼu lea fakapolofeta ʼo tana tohi. Kae neʼe toe ui e te ʼaselo, ʼi te temi ʼaia “ ʼe agakovi pe anai te kau agakovi, pea ʼe mole mahino anai he agakovi.”

18. Kotea ʼae kua vave hoko ki te kau agakovi?

¹⁸ Ia ʼaho nei, ʼe hage pe kia tatou ʼe maʼuli lelei pe ia te kau agakovi ia. (Mala. 3:14, 15) Kae kua vave fakamauʼi e Sesu ia natou ʼae ʼe hage ko ni tao pea ʼe ina vaheʼi anai natou mai ia natou ʼae ʼe hage ko ni ovi. (Mat. 25:31-33) ʼE mole hao anai te kau agakovi ʼaia mai te toe mamahi lahi pea ʼe mole fakatuʼuake anai natou ʼi te malama foʼou. ʼE mole tohi anai ʼonatou higoa ʼi te “tohi fakamanatu” ʼae ʼe talanoa ki ai ia Malakia 3:16.

19. Ka tou lau ia Malakia 3:16-18, kotea ʼae ʼe tonu ke tou fai ia ʼaho nei? Pea kotea tona tupuʼaga?

¹⁹ ʼI te temi nei, ʼe tonu ke tou fakaha ʼi ʼatatou aga ʼe mole tou kau ia natou ʼae ʼe agakovi. (Lau ia Malakia 3:16-18.) ʼE fakatahiʼi e Sehova ia natou ʼae ʼe hage kia ia ko “he koloa makehe,” ko tona fakaʼuhiga ia natou ʼae ʼe maʼuhiga kia te ia. ʼE mahino ia, ʼe tou fia kau ia natou ʼaia.

20. Kotea ia te fakapapau fakaʼosi neʼe fai kia Taniela? Pea he koʼe ʼe tou fakatalitali ʼaki he fakaʼamu lahi ki te hoko ʼo te fakapapau ʼaia?

²⁰ ʼE moʼoni ʼe tou maʼuʼuli ʼi he temi maʼuhiga. Kae ʼe ʼi ai te ʼu aluʼaga fakaofoofo ʼe ʼamanaki hoko anai. Kua tou vave sisio pe ki te pulihi ʼo te ʼu agakovi fuli pe. Pea ʼe tou sio leva anai ki te hoko ʼo te fakapapau ʼaeni neʼe fai e Sehova kia Taniela: “ ʼE ke tuʼu ake anai ke ke maʼu tou fakapale ʼi te fakaʼosi ʼo te ʼu ʼaho.” (Tan. 12:13) ʼE kotou fakaʼamu koa ki te ʼaho ʼae ʼe tutuʼu ake ai anai ia Taniela, ʼo feia mo natou ʼae neʼe kotou ʼofa mamahi ai? Kapau koia, kotou fai ia meʼa fuli ke kotou nonofo agatonu. Pea ʼe mahino ia, ʼe tohi anai tokotou higoa ʼi te tohi ʼo te maʼuli ʼa Sehova.