Tou vakaʼi te tali ʼa te Tohi-Tapu ki te ʼu fehuʼi ʼaia.

ʼE ui mai ia Gaue 24:15 ʼe ʼi ai anai “he fakatuʼuake ʼo te kau faitotonu pea mo te kau heʼe faitotonu.” Ko te kau faitotonu ʼe ko natou ʼae neʼe tauhi agatonu ki te ʼAtua ʼi muʼa ʼo tanatou mamate. Koia ʼe tohi ʼonatou higoa ʼi te tohi ʼo te maʼuli. (Mala. 3:16) Ko te kau heʼe faitotonu ʼe ko natou ʼae neʼe mamate kae heʼeki natou ako ke natou iloʼi feafeaʼi ia Sehova. Koia ʼe mole tuʼu ʼonatou higoa ʼi te tohi ʼo te maʼuli.

ʼE toe talanoa ia Soane 5:28, 29 ki te ʼu kutuga ʼaia ʼe lua ʼae ʼe palalau ki ai ia Gaue 24:15. Neʼe ui e Sesu ko “natou ʼae neʼe natou fai te ʼu meʼa ʼae ʼe lelei” ʼe natou hu mai anai ki tuʼa “ki te fakatuʼuake ki te maʼuli.” Pea “ko natou ʼae neʼe natou fai te ʼu meʼa ʼae ʼe kovi ki te fakatuʼuake ki te fakamau.” Ko te kau faitotonu ʼe ko natou ʼae neʼe natou fai te ʼu meʼa ʼae ʼe lelei ʼi muʼa ʼo tanatou mamate. ʼE fakatuʼuake anai natou ki te maʼuli koteʼuhi ʼe kei tohi pe ʼonatou higoa ʼi te tohi ʼo te maʼuli. Kae ko te kau heʼe faitotonu ʼe ko natou ʼae neʼe natou fai te ʼu meʼa ʼe kovi ʼi muʼa ʼo tanatou mamate. ʼE fakatuʼuake anai natou ki te fakamau. ʼE mole heʼeki tohi ʼonatou higoa ʼi te tohi ʼo te maʼuli pea ʼe sivisivi anai natou lolotoga te temi fakamau. Lolotoga te temi ʼaia, ʼe natou maʼu anai te fealagia ʼae ke natou ako ke natou iloʼi ia Sehova pea ʼe feala anai ke tohi ʼonatou higoa ʼi te tohi ʼo te maʼuli.

ʼE ui ia Apokalipesi 20:12, 13 ʼe tonu anai ke fakalogo ia te kau fakatuʼuake fuli ki ‘te ʼu meʼa ʼae ʼe tohi anai ʼi te ʼu takaiga tohi.’ Ko tona fakaʼuhiga ki te ʼu lao foʼou ʼae ka foaki anai e te ʼAtua ʼi te malama foʼou. Ko natou ʼae ʼe mole fakalogo ki ai, ʼe pulihi anai.​—Esa. 65:20.

Neʼe fakakikite ia Taniela 12:2 ko natou ʼae neʼe mamate ʼe tutuʼu ake anai, ‘ ʼe maʼuli anai ʼihi ʼo heʼe gata kae ko ʼihi ki te ufiufi ʼo talu ai.’ ʼE fakamahino ʼi te vaega ʼaeni ia te fakaʼuhiga ʼo te fakamau fakaʼosi ki te kau fakatuʼuake. Ko ʼihi ʼe natou ‘maʼuli anai heʼe gata’ pea ko ʼihi ‘ki te ufiufi ʼo talu ai.’ Koia ʼi te fakaʼosi ʼo te ʼu taʼu ʼe afe, ʼe maʼu anai e ʼihi ia te maʼuli heʼe gata pea ko ʼihi leva ia ʼe pulihi anai ʼo talu ai.​—Apk. 20:15; 21:3, 4.

Tou toʼo he faʼifaʼitaki. ʼE feala ke tou fakatatau te aluʼaga ʼo te ʼu kutuga ʼe lua ʼae ka fakatuʼuake ki ni hahaʼi ʼe fia olo ʼo maʼuʼuli ʼi he tahi fenua. ʼE hage ia te kau faitotonu ko natou ʼae ʼe natou maʼu honatou pepa fakagafua ke natou gaue peʼe maʼuʼuli faʼitaliha ʼi te fenua. Kae ʼe hage te kau heʼe faitotonu ko he kau matapule ʼe feala ke natou maʼu honatou pepa fakagafua ke natou nonofo fakatemi ʼi te fenua peʼe ohage ko he kau tulisi. ʼE tonu ki te ʼu matapule ʼaia ke natou fakalogo ki te ʼu lao ʼo te fenua mo kapau ʼe natou fia hoko atu pe tanatou maʼuʼuli ai. ʼO toe feia pe, hili te fakatuʼuake ʼo te kau heʼe faitotonu, ʼe tonu anai ke natou fakalogo ki te ʼu lao ʼa Sehova pea mo fai te meʼa ʼae ʼe totonu ia muʼa ʼo te ʼAtua mo kapau ʼe natou fia haga nonofo ʼi te Palatiso. Pea kotea pe te pepa fakagafua ka maʼu e te kau matapule ʼi te kamata, ʼe feala pe ki ʼihi ke natou maʼuʼuli fualoa ʼi te fenua ʼaia kae kapu leva ʼihi ia. ʼE fakalogo anai ia te aluʼaga ʼaia ki tanatou aga ʼi te fenua. ʼO toe feia pe, ʼe fakalogo anai ia te fakamau fakaʼosi ʼo te kau fakatuʼuake ki tanatou agatonu mo tanatou aga ʼi te malama foʼou.

Ko Sehova ʼe mole ko te ʼAtua pe ʼo te manavaʼofa kae ʼe toe faitotonu foki. (Tet. 32:4; Pes. 33:5) ʼE ina fakaha anai tona ʼofa ʼaki tana fakatuʼuake te kau faitotonu pea mo te kau heʼe faitotonu. Kae ʼe ina loto anai ke tou fakalogo ki ʼana lekula ʼo ʼuhiga mo te meʼa ʼae ʼe lelei mo ʼae ʼe kovi. ʼE ko natou pe anai ʼae ʼe ʼoʼofa anai kia te ia pea mo fakalogo ki ʼana lekula ka tali anai ke natou haga maʼuʼuli ʼi te malama foʼou.