Neʼe ui fenei e Paulo ia 1 Kolonito 15:8: “Neʼe toe ha fakamuli mai kia au, ʼo au hage ai ko he tamasiʼi neʼe fanau’i tautonu.” ʼI te temi muʼa, neʼe tou fakamahino ai neʼe fakaʼuhiga pe e Paulo ki tona aluʼaga ʼo ia totonu ʼi tana sio kia Sesu ʼi he meʼa neʼe ha ʼi tona kololia ʼi selo. Neʼe hage pe neʼe ina maʼu ia te pilivilesio ʼae ke tupu, peʼe ke fakatuʼuake fakatomuʼa ki he maʼuli fakalaumalie, ko tona fakaʼuhiga ʼi ni sekulo ʼi muʼa ʼo te hoko ʼo te fakatuʼuake ʼaia. Kae hili te fai ʼo he ʼu fekumi ki te vaega ʼaia, neʼe ʼaoga ai ke fai he ʼu fetogi ki te fakamahino ʼo te vaega ʼaia.

ʼE moʼoni neʼe palalau ʼi heni ia Paulo ki te aluʼaga ʼae neʼe hoko ʼi tana liliu leva ko te tisipulo ʼa Kilisito. Kae kotea ʼae neʼe manatu ki ai ʼi tana ui ʼae neʼe “fanau’i tautonu”? ʼE lahi te ʼu manatu ki te faʼahi ʼaia.

Neʼe fakapunamaʼuli mo fakaofoofo tana liliu ʼae ko te tisipulo ʼa Kilisito. Ka fanauʼi fakatomuʼa he tamasiʼi, pea ʼe hoko ia ʼi he temi ʼe mole tou ʼamanaki ki ai. Ko Saulo, (ʼae ki muli age neʼe higoa ko Paulo) neʼe alu leva ki Tamaso ʼo fakatagaʼi ʼi ai te kau Kilisitiano. Kae neʼe mole ʼamanaki ia ʼe sio anai ki he meʼa neʼe ha ʼo ʼuhiga mo Sesu ʼae kua fakatuʼuake. Neʼe mole fakapunamaʼuli pe kia Paulo ia tana liliu ʼaia ko te tisipulo ʼa Kilisito kae neʼe toe punamaʼuli foki mo te kau Kilisitiano ʼae neʼe meʼa ke ina fakatagaʼi ʼi te kolo ʼaia. Pea tahi, neʼe fakaofoofo ʼosi te aluʼaga ʼaia neʼe hoko, he neʼe mole kei lava sio ai.​—Gaue 9:1-9, 17-19.

Neʼe tafoki kae neʼe “mole ko tona temi lelei ʼaia.” Ko te kupu Fakakeleka ʼae neʼe fakaliliu ʼaki te kupu “he tamasiʼi neʼe fanau’i tautonu” ʼe feala pe ke toe fakaliliu fenei “he tamasiʼi neʼe fanau’i kae neʼe mole ko tona temi lelei ʼaia.” Neʼe fakaliliu fenei ʼi te Tohi-Tapu Fakapilitania: “Neʼe hage pe neʼe au tupu kae neʼe mole ʼamanaki ki ai he tahi.” ʼI te temi leva ʼae neʼe liliu ai ia Paulo ko te tisipulo ʼa Kilisito, neʼe kua ʼosi toe liliu ia Sesu ki selo. Neʼe mole sio ia Paulo ki te fakatuʼuake ʼo Sesu ʼi muʼa ʼo tana hake ki selo, ʼo mole hage ko natou ʼae neʼe talanoa ki ai ʼi te ʼu vaega ki muʼa atu. (1 Ko. 15:4-8) ʼI te ha fakapunamaʼuli ʼa Sesu kia Paulo, neʼe ko he faigamalie ʼaia ki ai ke sio kia Sesu kua fakatuʼuake, logo la neʼe hoko te aluʼaga ʼaia kae “neʼe mole ko tona temi lelei ʼaia.”

Neʼe agavaivai ʼi tana palalau ʼo ʼuhiga mo ia totonu. Neʼe ui e ʼihi hahaʼi sivi Tohi-Tapu, ko te kupusiga palalau ʼae ʼe fakaʼaogaʼi ʼi heni e Paulo ʼe hage mai ko hana valoki. Kapau la neʼe maʼu e Paulo ia te manatu ʼaia, pea neʼe mahino kia ia ʼe mole tuha mo te pilivilesio ʼae neʼe foaki age. Neʼe ina hoko atu fenei: “ ʼE ko au ʼae ʼe veliveli ʼosi ʼi te kau apositolo, pea ʼe mole tuha mo au ke fakahigoaʼi au ko he apositolo, he neʼe au fakatagaʼi te kokelekasio ʼa te ʼAtua. Kaʼe ʼaki te ʼofa makehe ʼo te ʼAtua, ko au ko he apositolo.”​—1 Ko. 15:9, 10.

Koia, neʼe feala pe ke palalau ia Paulo ki te faʼahiga ha fakapunamaʼuli age ʼa Sesu ki ai peʼe ki tana liliu ko te tisipulo ʼa Kilisito kae neʼe mole ʼamanaki ai peʼe ki tana mole tuha ʼae ke ha age he meʼa fakaofoofo. Kotea pe te aluʼaga ʼae neʼe hoko, kae neʼe maʼuhiga ʼaupito kia Paulo ia te aluʼaga ʼae neʼe hoko kia ia. Neʼe ko he fakamoʼoni ʼaia kia ia neʼe kua fakatuʼuake ia Sesu. Koia, ʼe mole tou punamaʼuli ai moka talanoa ki te aluʼaga fakapunamaʼuli ʼaia ʼi tana faifakamafola ki ʼihi ʼo ʼuhiga mo te fakatuʼuake ʼo Sesu.​—Gaue 22:6-11; 26:13-18.