ALATIKE AKO 31
Ke Ke Fakamaʼuhigaʼi Ia Te Faikole
“Ke hage taku faikole ko te iseso ʼae ʼe teuteuʼi ʼi ʼou muʼa.”—PES. 141:2.
KATIKO 47 Faikole Kia Sehova ’i Te ʼAho Fuli Pe
TE ʼU MANATU FAKANOUNOU *
1. Kotea te manatu ʼae ʼe tonu ke tou maʼu ʼo ʼuhiga mo te faikole?
ʼE TOU maʼu ia te toe pilivilesio ʼaeni ke tou faikole kia ia ʼae neʼe Ina fakatupu te lagi mo te kele. Fakafuafua age muʼa koe ʼe feala ke tou fakaha kia Sehova te ʼu meʼa ʼae ʼi ʼotatou loto ʼi he lea pe pea ʼi he temi pe. ʼE feala ke tou faikole kia te ia moka tou takokoto ʼi te lopitali peʼe ʼi te pilisoni he ʼe fagono mai ia. Koia, ʼe mole tonu ke tou meʼa noaʼi ia te faikole. ʼE ko he pilivilesio ia ʼae ʼe tou maʼu.
2. Neʼe fakaha feafeaʼi e Tavite ʼe maʼuhiga ʼaupito kia ia te faikole?
2 Neʼe maʼuhiga ʼaupito ki te Hau ko Tavite ia te faikole. Neʼe hiva fenei kia Sehova: “Ke hage taku faikole ko te iseso ʼae ʼe teuteuʼi ʼi ʼou muʼa.” (Pes. 141:1, 2) ʼI te temi ʼo Tavite, neʼe taputapu mo teuteuʼi lelei ia te iseso ʼae neʼe tutu e te kau Pelepitelo. (Eke. 30:34, 35) Neʼe fakatatau e Tavite ʼana faikole ki te iseso ʼaia. Koia, neʼe ina fia fakakaukauʼi lelei ai te ʼu meʼa ka ina ui ki tana Tamai ʼae ʼe ʼi selo. Pea ko te aluʼaga ʼaia ʼe tou fia fai he ʼe tou loto ke leleiʼia e Sehova ʼatatou faikole.
3. ʼE tonu ke feafeaʼi tatatou aga moka tou faikole kia Sehova? Pea kotea tona tupuʼaga?
3 Ka tou faikole kia Sehova, ʼe tonu ke tou tokakaga ki ʼatatou palalau, ʼe tonu ke tou fai ʼaki he fakaʼapaʼapa lahi. Fakakaukauʼi age muʼa ia te ʼu meʼa fakaofoofo ʼae neʼe ha kia Esaia, mo Esekiele, mo Taniela pea mo Soane. Neʼe kehekehe te ʼu meʼa ʼaia neʼe ha kia natou kae ʼe ʼi ai te aluʼaga ʼe natou tatau ai. Neʼe ha ai ko Sehova ʼe ko he Hau maʼoluga. Neʼe sio ia Esaia ‘ ʼe heka ia Sehova ʼi tona hekaʼaga fakahau ʼe maʼoluga ʼaupito.’ (Esa. 6:1-3) Neʼe sio ia Esekiele ʼe heka ia Sehova ʼi tana saliote ʼae ʼi selo, “neʼe takatakai ia ia e he malama neʼe hage ko he nuanua.” (Esk. 1:26-28) Neʼe sio ia Taniela ki “te Matuʼa ʼo Te ʼu ʼAho” ʼe ina tui he ʼu mutuʼi meʼa hina pea ʼe heka ʼi he hekaʼaga fakahau ʼe haʼu mai ai he ʼu uloʼi afi. (Tan. 7:9, 10) Pea neʼe sio ia Soane ʼe heka ia Sehova ʼi he hekaʼaga fakahau neʼe takatakai e “he nuanua neʼe hage ko te emelote.” (Apk. 4:2-4) ʼE mole he fakatatau ʼo tona kololia. Koia, ʼe ha mai ai ʼe tou maʼu te toe pilivilesio ʼae ko te faikole pea ʼe maʼuhiga ke tou fakaovi kia te ia ʼaki he fakaʼapaʼapa. Kae tou vakaʼi leva pe kotea ʼae ʼe tonu ke tou kole.
“KOIA, ʼE TONU KE KOTOU FAIKOLE FENEI”
4. Ka tou lau ia Mateo 6:9, 10, kotea ʼe tou ako ai ʼo ʼuhiga mo te ʼu ʼuluaki palalau ʼo te faikole ʼae neʼe akoʼi mai e Sesu?
4 Lau ia Mateo 6:9, 10. ʼI te Akonaki ʼa Sesu ʼi Te Moʼuga, neʼe ina akoʼi ki ʼana tisipulo pe ʼe feafeaʼi hanatou faikole ke fiafia ai te ʼAtua. ʼI tana ʼosi fai te ʼu palalau ʼaeni “koia, ʼe tonu ke kotou faikole fenei,” neʼe talanoa leva ki he ʼu manatu maʼuhiga ʼo ʼuhiga mo te fakatuʼutuʼu ʼa Sehova. Neʼe talanoa ki te fakatapuha ʼo tona huafa, mo te hoko mai ʼo tona Puleʼaga, ʼae ka ina pulihi te ʼu fili ʼo te ʼAtua ʼo feia mo te ʼu tapuakina neʼe ina fakatuʼutuʼu ki te kele pea mo te tagata. Ka tou palalau ki te ʼu manatu ʼaia ʼi ʼatatou faikole, ʼe tou fakaha ai ʼe maʼuhiga kia tatou ia te finegalo ʼo te ʼAtua.
5. ʼE lelei koa ke tou faikole ki te ʼu meʼa ʼae ʼe ʼaoga kia tatou?
5 ʼI te hoko atu ʼo te faikole ʼa Sesu, neʼe ina fakaha ai ʼe feala ke tou faikole ki te ʼu meʼa ʼae ʼe ʼaoga kia tatou. ʼE feala ke tou kole kia Sehova ke ina foaki mai hatatou meʼa kai ʼi te ʼaho fuli, mo fakamolemole mai ki ʼatatou agahala, mo ina puipui tatou mai te ʼu fakahala pea mo haofaki tatou mai te agakovi. (Mat. 6:11-13) Ka tou kole te ʼu faʼahi ʼaia kia Sehova, ʼe tou iloʼi ai ʼe fakalogo totatou maʼuli kia te ia pea ʼe tou fia fakaha ai kia te ia ʼe tou fia maʼu tona ʼofa.
6. ʼE ʼi ai koa he tahi ʼu aluʼaga ʼe feala ke tou faikole ki ai? Fakamahino.
6 Neʼe mole loto e Sesu ke lau liuliuga e ʼana tisipulo ia te faikole. ʼI tana tahi ʼu faikole neʼe ina fai, neʼe palalau kia Sehova ki he ʼu manatu kehekehe neʼe tuʼania ki ai. (Mat. 26:39, 42; Soa. 17:1-26) ʼO toe feia pe, ʼe feala ke tou faikole ki he ʼu aluʼaga ʼe tou hoha ki ai. Ka tou toʼo he tonu, ʼe feala ke tou kole kia Sehova ke ina foaki mai te poto. (Pes. 119:33, 34) Ka tuku mai he gaue faigataʼa ke tou fai, ʼe feala ke tou kole kia te ia ke ina foaki mai te fakasiosio poto. (Taag. 2:6) ʼE feala ke hufakiʼi e te ʼu matuʼā te ʼu fanau, ʼo feia pe mo te ʼu fanau ʼe feala hanatou hufakiʼi ʼanatou matuʼā. Pea ʼe feala ke tou faikole fuli ki ʼatatou ako mo natou ʼae ʼe tou faifakamafola ki ai. Kae ka tou faikole, ʼe mole tonu pe ke tou kole kia Sehova ke ina foaki mai ni meʼa.
7. He koʼe ʼe tonu ke tou fakavikiviki kia Sehova ʼi ʼatatou faikole?
7 ʼE tonu ke tou manatuʼi ʼo fakavikiviki kia Sehova ʼi ʼatatou faikole. ʼE ko Sehova pe ʼae ʼe tuha ke tou fakavikiviki ki ai. ʼE “agalelei pea mo lotofakamolemole” ia ia. Pea ʼe toe “manavaʼofa, tuai ʼi te ita pea mo fonu ʼi te ʼofa agatonu pea mo te moʼoni.” (Pes. 86:5, 15) Koia, ʼe lahi te ʼu tupuʼaga ke tou fakavikiviki ai kia Sehova ki tona ʼuhiga pea mo te ʼu gaue ʼe ina fai.
8. Ka tou lau ia Pesalemo 104:12-15, 24, kotea ia te ʼu aluʼaga ʼe feala ke tou fakamalo ai kia Sehova?
8 ʼI tatatou fakavikiviki ʼaia kia te ia ʼi te faikole, ʼe tou toe fia fakamalo kia te ia ki te ʼu lelei fuli ʼe ina foaki mai. Ohage la, ʼe feala ke tou fakamalo kia te ia ki te ʼu fisiʼi teu matalelei kehekehe, mo te ʼu meʼa kai kano lelei kehekehe ʼo feia mo te ʼu kiʼi temi fakafiafia ʼe tou fakatahi ai mo ʼotatou kaumeʼa. ʼE foaki mai e Sehova te ʼu meʼa lelei fuli ʼaia ke tou fiafia ai. (Lau ia Pesalemo 104:12-15, 24.) Kae ʼe tou fia fakamalo tafito ki te meʼa kai fakalaumalie ʼae ʼe ina foaki mai pea mo te ʼamanaki taulekaleka ʼe ina fakapapauʼi mai.
9. Ka tou lau ia 1 Tesalonika 5:17, 18, kotea ʼae ʼe tokoni mai anai ke tou manatuʼi ʼo fakamalo kia Sehova?
9 ʼE feala pe ʼi ʼihi temi ke galo ia tatou ke tou fakamalo kia Sehova ki te ʼu meʼa fuli ʼe ina fai maʼa tatou. Kotea ʼe feala ke tokoni mai ke mole hoko te faʼahi ʼaia? Ohage la, ʼe feala ke tou tohi te ʼu kole ʼae neʼe tou fai kia te ia pea mo vakaʼi tuʼumaʼu tatatou lisi ʼaia pe neʼe ina tali feafeaʼi mai. Pea tou fakamalo kia te ia ki tana tokoni mai. (Lau ia 1 Tesalonika 5:17, 18.) Ka faifakamalo mai he tahi ʼe tou logoʼi ʼe ʼofainaʼi tatou pea mo tou fiafia ai. ʼO toe feia pe, ka tou manatuʼi ʼo fakamalo kia Sehova ki tana tali mai ki ʼatatou faikole, ʼe fiafia ia. (Kol. 3:15) Kae tou talanoa leva ki he tahi tupuʼaga ke tou fakamalo ai ki totatou ʼAtua.
FAKAMALO KIA SEHOVA KI TANA FEKAUʼI IFO IA SESU KI TE KELE
10. Ka tou lau ia 1 Petelo 2:21, he koʼe ʼe tou lotofakafetaʼi kia Sehova ʼi tana fekauʼi ifo ia Sesu ki te kele?
10 Lau ia 1 Petelo 2:21. ʼE tonu ke tou fakamalo kia Sehova ʼi tana fekauʼi ifo tona ʼAlo ki te kele ke tou faʼifaʼitakiʼi ia ia. Koia, ka tou ako te ʼu akonaki mo te maʼuli ʼo Sesu, ʼe lahi te ʼu faʼahi ʼe tou ako ʼo ʼuhiga mo Sehova mo te ʼu aluʼaga ʼe tonu ke tou fai moʼo fakafiafiaʼi tona loto. Kapau ʼe tou tui ki tona sakilifisio, ʼe tou maʼu ai he ʼu felogoi lelei mo te ʼAtua pea mo tokalelei mo ia.—Loma 5:1.
11. He koʼe ʼe tou faikole ʼi te huafa ʼo Sesu?
11 ʼE tou lotofakafetaʼi kia Sehova ʼi tatatou lava faikole kia te ia ʼi te huafa ʼo Sesu. ʼE fakaʼaogaʼi e Sehova ia Sesu ke tou maʼu te ʼu meʼa ʼae ʼe tou kole age. ʼE fagono ia ki te ʼu faikole ʼae ʼe tou fai age ʼi te huafa ʼo Sesu pea ʼe tali mai ki ai. Neʼe ui fenei e Sesu:“Ko te ’u meʼa fuli ʼae ka kotou kole anai ʼi toku huafa, ʼe au fakahoko anai, ke feala ke fakakololiaʼi te Tamai ʼaki te ʼAlo.”—Soa. 14:13, 14.
12. Kotea te tahi tupuʼaga ke tou fakamalo ai kia Sehova?
12 ʼE fakamolemole e Sehova ʼatatou agahala ʼaki te sakilifisio ʼo Sesu. ʼE ui ʼi te Tohi-Tapu ko Sesu ʼe ko totatou ‘pelepitelo lahi’ pea ʼe “heka ʼi te toʼomataʼu ʼo te ʼafioʼaga ʼo te ʼAtua ʼi selo.” (Hep. 8:1) ʼE toe ui foki ʼe ko totatou “tokoni ia muʼa ʼo te Tamai.” (1 Soa. 2:1) Koia, ʼe tou lotofakafetaʼi kia Sehova ʼi tana foaki mai he Pelepitelo Lahi ʼe “lotomahino ki ʼotatou vaivaiʼaga” pea “ ʼe ina hufakiʼi tuʼumaʼu ia tatou.” (Loma 8:34; Hep. 4:15) ʼE fakafealagia e te sakilifisio ʼo Sesu ke tou faikole kia Sehova logo la totatou ʼuhiga agahala. ʼE mahino ia, ʼe mole tou maʼu feʼauga he kupu moʼo fakaha tatatou lotofakafetaʼi ki te meʼa ʼofa maʼuhiga neʼe foaki mai e Sehova ʼi tana fekauʼi ifo tona ʼAlo ʼofaina ki te kele.
KE KE HUFAKIʼI ʼOU TEHINA MO TUAGAʼANE
13. ʼI te po ʼi muʼa ʼo te mate ʼo Sesu, neʼe ina fakaha feafeaʼi tona ʼofa ki ʼana tisipulo?
13 ʼI te po ʼi muʼa ʼo te mate ʼa Sesu, neʼe faikole fualoa ʼo ʼuhiga mo ʼana tisipulo. Neʼe ina kole ki tana Tamai ke ina “puipui natou ʼuhi ko te Agakovi.” (Soa. 17:15) ʼE ha mai ai te ʼofa ʼo Sesu ʼi ʼana tisipulo. Neʼe tuʼania ki te maʼuli ʼo ʼana tisipulo logo foki la ʼi te temi ʼaia ʼe tau anai mo he ʼahiʼahi fakamataku.
14. ʼE tou fakaha feafeaʼi ʼe tou ʼoʼofa ʼi ʼotatou tehina mo tuagaʼane?
14 ʼE tou fia faʼifaʼitakiʼi ia Sesu, koia ʼe mole tou tuʼania pe anai ki te ʼu meʼa ʼae ʼe ʼaoga kia tatou moka tou faikole. Kae ʼe tou hufakiʼi tuʼumaʼu pe anai ʼotatou tehina mo tuagaʼane. Ka tou fai feia, pea ʼe tou fakalogo ai kia Sesu ʼae ʼe ina kole mai ke tou feʼofaʼofani. Pea ʼe tou fakaha ai kia Sehova ʼe tou ʼoʼofa ʼi ʼotatou tehina mo tuagaʼane. (Soa. 13:34) ʼE mole ko he puli temi ia moka tou hufakiʼi ʼotatou tehina mo tuagaʼane. ʼE ui mai ʼi te Tohi-Tapu “ko te kole mamahi ʼa he tagata faitotonu ʼe malohi pea ʼe feala ke tokoni moʼoni ki te hahaʼi.”—Sakp. 5:16.
15. He koʼe ʼe ʼaoga ke tou hufakiʼi ʼotatou tehina mo tuagaʼane?
15 ʼE ʼaoga ke tou hufakiʼi ʼotatou tehina mo tuagaʼane he ʼe lahi te ʼu ʼahiʼahi ʼe tau mo natou. Ohage la, ʼe feala ke tou kole kia Sehova ke tokoni kia natou ʼae ʼe mahahaki, mo natou ʼae ʼe tau mo ni tuʼutamaki fakanatula peʼe ko te tau, pea mo natou ʼae ʼe fakatagaʼi. ʼE tou toe hufakiʼi ʼotatou tehina mo tuagaʼane ʼae ʼe tokoni ki te ʼu gaue haofaki maʼuli. ʼE lagi ke iloʼi he ʼu tehina mo tuagaʼane ʼe tau mo he ʼu fihifihia ʼi te temi nei. ʼE feala ke ke toʼo ʼonatou higoa ʼi ʼau faikole. Ka ke kole kia Sehova ke ina foaki age te malohi ke natou faʼa kataki, pea ʼe ke fakaha ai ia te ʼofa moʼoni.
16. He koʼe ʼe tonu ke tou hufakiʼi ʼotatou tehina ʼae ʼe natou takitaki te kokelekasio?
16 ʼE fiafia ʼotatou tehina ʼae ʼe natou takitaki te kokelekasio moka tou hufakiʼi natou. Pea ʼe toe tokoni ʼatatou faikole kia natou. Neʼe iloʼi e te apositolo ko Paulo ia te ʼaoga ʼae ke hufakiʼi ia ia e ʼihi. Neʼe ina tohi fenei: “Kotou toe faikole foki maʼaku, ke au maʼu te poto palalau, ke feala haku palalau ʼaki he lototoʼa moʼo fakaha te meʼa fakalilo tapu ʼo te logo lelei.” (Efe. 6:19) Pea ia ʼaho nei, ʼe lahi te ʼu tehina ʼe gaue lahi maʼa te kokelekasio. Koia, ʼe tou fakaha ʼe tou ʼoʼofa ia natou ʼaia ʼo tou kole kia Sehova ke ina tapuakiʼi ʼanatou faiga.
ʼE KE FAKAFOFOGA ʼIHI ʼI TE FAIKOLE
17-18. Kotea te ʼu aluʼaga ʼae ʼe feala ai ʼi ʼihi temi ke kole mai ke tou fakafofoga ʼihi ʼi te faikole? Pea kotea ʼae ʼe tonu ke tou manatuʼi?
17 ʼE feala ʼi ʼihi temi ke kole mai ke tou fakafofoga ʼihi ʼi te faikole. Ohage la, ʼe feala ke kole e he tuagaʼane ʼe ina fai he ako ki te tuagaʼane ʼae neʼe kauga alu mo ia ke ina fai he kole. Kapau ʼe mole iloʼi lelei e te tuagaʼane ʼaia ia ia ʼae ʼe ako, ʼe ina fia fai anai te kole ʼi te ʼosi ʼo te ako. ʼE faigafua anai kia ia tana fai tana kole ʼo mulimuli ki te ʼu meʼa ʼae ʼe ʼaoga kia ia ʼae ʼe ako.
18 ʼE feala ke kole ki he tehina ke ina fai he kole ʼi he fono peʼe ʼi he vahe gaue. ʼE tonu anai ke ina manatuʼi pe kotea ʼae ka talanoa tafito ki ai ʼi te fono. Ka tou faikole, ʼe mole tonu ke tou fakatonutonuʼi ai te kokelekasio peʼe tala ai he ʼu logo. ʼI te polokalama ʼo te ʼu fono, neʼe fakatuʼutuʼu ai ʼe minuta 5 moka ko te katiko mo te faikole. Koia, ʼe mole tonu ke ‘lahi te palalau’ ʼa te ʼu tehina ʼae ʼe faikole, tafito la moka ko te kamata ʼo he fono.—Mat. 6:7.
ʼE TONU KE MAʼUHIGA KIA KOE TE FAIKOLE
19. Kotea ʼae ʼe tokoni mai ke tou nofo teuteu ki te ʼaho fakamau ʼo Sehova?
19 ʼE kua ovi mai te ʼaho fakamau ʼo Sehova, koia ʼe tonu ke maʼuhiga tuʼumaʼu kia tatou te faikole. Koia ʼae neʼe ui fenei mai ai e Sesu: “Koia, kotou nonofo ʼalaʼala mo kolekole tuʼumaʼu, ke feala ke kotou hao ʼi te ʼu meʼa fuli ʼaia ʼe tonu ke hoko mai.” (Luka 21:36) Kapau ʼe tou faikole tuʼumaʼu, ʼe tou taupau maʼu anai he tui ʼe malohi pea mo nofo teuteu anai ki te ʼaho fakamau ʼo Sehova.
20. Kotea ʼe tonu ke tou fai ke hage ai ʼatatou faikole kia Sehova ko te iseso?
20 Kotea ʼae neʼe tou vakaʼi ʼi te alatike ʼaeni? Neʼe tou vakaʼi ko te faikole ʼe ko he toe pilivilesio ʼe tou maʼu. ʼE tonu ke tou faikole muʼa ki te ʼu aluʼaga fuli ʼo ʼuhiga mo te fakatuʼutuʼu ʼa Sehova. ʼE tonu ke tou toe fakamalo ki te ʼAtua ʼi tana fekauʼi ifo tona ʼAlo ki te kele pea mo te ʼu tapuakina ka foaki mai e tona Puleʼaga. Pea tou toe hufakiʼi ʼotatou tehina mo tuagaʼane. ʼE feala ke tou kole ki te ʼAtua ke ina foaki mai te ʼu meʼa ʼae ʼe ʼaoga kia tatou ʼi te faʼahi fakasino mo fakalaumalie. Ka tou fakakaukauʼi lelei te ʼu palalau ka tou fai ʼi ʼatatou faikole, pea ʼe tou fakaha ai ʼe maʼuhiga kia tatou te faikole. Koia, ʼe hage anai kia Sehova ʼatatou faikole ko te iseso pea ʼe ‘fiafia ai.’—Taag. 15:8.
KATIKO 45 ʼE Au Metitasio ’i Toku Loto
^ ʼE tou lotofakafetaʼi lahi kia Sehova ʼi tana fakafealagia ke tou faikole age kia te ia. Pea ʼe tou loto ke hage ʼatatou faikole ko te iseso. ʼI te alatike ʼaeni, ʼe tou vakaʼi anai pe kotea ʼae ʼe feala ke tou kole. ʼE tou toe vakaʼi anai he ʼu manatu ʼe tonu ke tou manatuʼi moka kole mai ke tou fakafofoga ʼihi ʼi te faikole.
^ FAKAMATALA ʼO TE ʼU PĀKI: Ko he taumatuʼa ʼe nā faikole fakatahi. ʼE faikole te tamai kia Sehova ke ina puipui tanā taʼahine ʼi te fale ako, mo tokoni ki he tahi ʼo ʼanā matuʼā ʼae ʼe mahaki pea mo toe tokoni ki te ʼu faiga ʼe fai e hanā ako.
^ FAKAMATALA ʼO TE ʼU PĀKI: Ko he tehina tupulaga ʼe fakamalo kia Sehova ki te sakilifisio ʼo Sesu, mo totatou kele matalelei pea mo te ʼu fuaʼi ʼakau kehekehe neʼe ina fakatupu.
^ FAKAMATALA ʼO TE ʼU PĀKI: Ko he tuagaʼane ʼe faikole kia Sehova ke ina foaki tona laumalie maʼoniʼoni ki te Kolesi Pule, pea mo tokoni kia natou ʼae ʼe tau mo ni tuʼutamaki fakanatula pea mo natou ʼae ʼe fakatagaʼi.