1. Ka tou lau ia Ekelesiasi 7:20, kotea ia te ʼu palalau moʼoni neʼe fakaha e te Hau ko Salomone?

 NEʼE tohi fenei e te Hau ko Salomone: “ ʼE mole maʼu ʼi te kele he tagata faitotonu ʼe ina fai tuʼumaʼu te meʼa ʼae ʼe lelei pea ʼe mole agahala ʼi he temi.” (Ekl. 7:20) ʼE moʼoni ʼosi te ʼu palalau ʼaia he ʼe tou agahala fuli. (1 Soa. 1:8) Koia, ʼe ʼaoga kia tatou fuli ia te fakamolemole ʼa te ʼAtua mo ʼotatou tatau.

2. Kotea ʼae ʼe ke logoʼi moka ʼe fakamolemole atu hou kaumeʼa lelei?

² ʼE lagi ke manatuʼi te temi neʼe ke fakamamahiʼi ai hou kaumeʼa lelei. Neʼe ke fia fakatokatoka te fihifihia pea mo toe felogoi lelei mo ia, koia neʼe ke fai ai hau fakalelei ki ai. Kotea neʼe ke logoʼi ʼi te fakamolemole atu ʼo tou kaumeʼa? Neʼe ke logoʼi koa hou fimalie? ʼE mahino ia, pea lagi neʼe ke toe fiafia ai.

3. Kotea ʼae ka tou talanoa ki ai ʼi te alatike ʼaeni?

³ ʼE tou loto ke tou kaumeʼa lelei mo Sehova, kae ʼi ʼihi temi ʼe tou fai ni palalau peʼe ko ni aga ʼe mamahi ai. Kae he koʼe ʼe tou tui papau ʼe fia fakamolemole mai ia Sehova? He koʼe ʼe kehekehe ia te lotofakamolemole ʼa Sehova ki he tahi pea mo tatatou lotofakamolemole ʼae ki he tahi? Pea ko ai leva ʼae ʼe feala ke ina maʼu ia te lotofakamolemole ʼa te ʼAtua?

4. He koʼe ʼe tou tui papau ʼe lotolelei ia Sehova ke fakamolemole mai?

⁴ ʼE ui mai ʼi te Tohi-Tapu ʼe lotolelei ia Sehova ke fakamolemole  mai. ʼI te fakaha e Sehova pe ko ai ia ia kia Moisese ʼi te Moʼuga ʼo Sinai neʼe ina fekauʼi he ʼaselo ke ina ui fenei: “Sehova, Sehova, ʼAtua manavaʼofa, tuai ʼi te ita pea mo fonu ʼi te ʼofa agatonu mo te moʼoni, ʼe ina fakaha tona ʼofa agatonu ki te toko lauʼi afe, pea mo fakamolemole te hala mo te talagataʼa pea mo te agahala.” (Eke. 34:6, 7) Ko Sehova ʼe ko te Atua ʼe agalelei mo manavaʼofa, pea ʼe lotolelei tuʼumaʼu ke fakamolemole kia natou ʼae neʼe agahala mo fakahemala.​—Nee. 9:17; Pes. 86:15.

5. Ka tou lau ia Pesalemo 103:13, 14, kotea ʼae ʼe fai e Sehova ʼuhi ko tana iloʼi te ʼuhiga ʼo te tagata?

⁵ Ko Sehova ʼae neʼe ina fakatupu tatou, koia ʼe ina iloʼi ia meʼa fuli ʼo ʼuhiga mo tatou. ʼE fakaofoofo ia tatatou fakakaukauʼi ʼae ʼe iloʼi e Sehova te ʼu aluʼaga fuli ʼo te tagata takitokotahi ʼi te kele. (Pes. 139:15-17) Koia ʼe sio ki totatou ʼuhiga agahala fuli ʼae neʼe tuku mai e ʼatatou matuʼā. ʼE ina toe iloʼi te ʼu aluʼaga neʼe hoko ʼi totatou maʼuli ʼae tupu ai hatatou liliu ko he faʼahiga tagata fenei. Kotea ʼae ʼe fai e Sehova ʼuhi ko tana iloʼi lelei ʼae ia tatou? ʼE ina fakaha mai ia tona manavaʼofa kia tatou.​—Pes. 78:39; lau ia Pesalemo 103:13, 14.

6. Neʼe fakaha feafeaʼi e Sehova ia tana fia fakamolemole mai?

⁶ Neʼe fakaha e Sehova ʼe fia fakamolemole mai kia tatou. ʼE mahino ia ia ʼe tou agahala fuli pea ʼe tou mamate anai ʼuhi ko te agahala ʼa te ʼuluaki tagata ia Atama. (Loma 5:12) Neʼe mole feala ke tou fai he meʼa ke tuku tatatou agahala pea mo mamate. (Pes. 49:7-9) Kae neʼe fakaha mai e totatou ʼAtua ʼofa ia tona manavaʼofa pea mo tana fai he meʼa moʼo fakaʼateainaʼi ai tatou. Kotea ʼae neʼe ina fai? Ohage ko tona fakaha ia Soane 3:16, neʼe fekauʼi mai e Sehova tona ʼAlo ʼulu tokotahi ke haʼu ʼo mate maʼa tatou. (Mat. 20:28; Loma 5:19) Neʼe mate ia Sesu maʼa tatou moʼo haofaki ia natou ʼae ʼe tui kia te ia. (Hep. 2:9) ʼE mahino ia ko he aluʼaga fakalotomamahi kia Sehova ʼi tana sio ki te mate ʼo tona ʼAlo ʼofaina. Neʼe ko he mate fakamataku mo fakaufiufi. ʼE mahino ia, kapau la neʼe mole fia fakamolemole mai ia Sehova kia tatou pea neʼe mole feala ke Ina tuku tona ʼAlo ke mate.

7. Kotea ia te ʼu faʼifaʼitaki Fakatohi-tapu neʼe fakaha ai e Sehova ia tana lotolelei ke fakamolemole kia natou?

⁷ ʼE lahi te ʼu faʼifaʼitaki ʼo ni hahaʼi ʼi te Tohi-Tapu neʼe fakaha ai e Sehova tana  lotolelei ʼae ke fakamolemole kia natou. (Efe. 4:32) Ko ai la ʼae ʼe ke manatu ki ai? ʼE lagi ke manatu ki te Hau ko Manase. Neʼe agakovi te tagata ʼaia pea neʼe agahala kia Sehova. Neʼe tauhi ki te ʼu ʼAtua hala pea mo uga ʼihi ke natou toe fai feia. Neʼe ina matehi ʼana fanau totonu, ʼo ina momoli ohage ko he sakilifisio ki te ʼu ʼatua pagani. Neʼe ina toe fakatuʼu he fakatata neʼe togi ko he ʼatua hala ʼi te fale lotu ʼo Sehova. ʼE ui fenei ʼi te Tohi-Tapu ʼo ʼuhiga mo ia: “Neʼe lahi ʼaupito te ʼu meʼa kovi ʼae neʼe ina fai kia mata ʼo Sehova, moʼo fakatupu ai tona hauhau.” (2 Klk. 33:2-7) Kae neʼe fakahemala moʼoni leva ia Manase, pea neʼe lotolelei ia Sehova ke fakamolemole age ki ai. Neʼe toe fakanofo ia ia e te ʼAtua ki tona tuʼulaga hau. (2 Klk. 33:12, 13) ʼE lagi ke toe manatu ki te Hau ko Tavite ʼae neʼe ina fai he ʼu agahala mamafa kia Sehova. Neʼe tono pea neʼe ina fai he fakapo. Kae neʼe fakahemala moʼoni ia Tavite pea mo ina iloʼi tana hala, koia neʼe toe fakamolemole ia Sehova ki ai. (2 Sam. 12:9, 10, 13, 14) ʼEi, ʼe tou tui papau ʼe loto moʼoni ia Sehova ke fakamolemole mai. Pea ka fakamolemole ia Sehova ʼe mole hage ia ko te tagata moka fakamolemole. Ko te aluʼaga ʼaia ka tou vakaʼi anai.

8. He koʼe ko Sehova ʼe ko he Tuʼi Fakamau lelei?

⁸ Ko Sehova ʼe ko te “Tuʼi Fakamau ʼo te kele katoa.” (Sen. 18:25) ʼE tonu ki he tuʼi fakamau lelei ke mahino lelei ki te lao. Pea ʼe feia ia Sehova he ʼe mole ko ia pe ia totatou Tuʼi Fakamau kae ʼe ko ia foki totatou Tagata Failao. (Esa. 33:22) ʼE gata pe kia Sehova ke ina iloʼi ia te meʼa ʼae ʼe lelei mo ʼae ʼe kovi. Kotea te tahi aluʼaga ʼe ʼaoga ki he tuʼi fakamau lelei? ʼE tonu ke ina iloʼi ia te ʼu ogaoga fuli ʼo he fihifihia ʼi muʼa ʼo te toʼo ʼo tana tonu. Koia, ʼe ko Sehova ia te Tuʼi Fakamau ʼae ʼe lelei age he ʼe ina iloʼi tuʼumaʼu ia te ʼu ogaoga fuli.

9. Kotea te ʼu faʼahi ʼe maʼu e Sehova ke lotofakamolemole mai?

⁹ ʼE mole hage ia Sehova ko te ʼu tuʼi fakamau fakatagata. ʼE ina iloʼi tuʼumaʼu ia te ʼu ogaoga fuli ʼo he fihifihia. (Sen. 18:20, 21; Pes. 90:8) ʼE mole gata pe te ʼu meʼa fuli ʼaia ʼi te ʼu meʼa ʼae ʼe sio mo logo ki ai ia te tagata. ʼE mahino lelei ki te aga ʼa he tahi ʼuhi ko te ʼu kalitate mo te ʼu agaaga ʼae neʼe ina maʼu mai ʼana matuʼā, mo tona faʼahiga akoʼi, mo te koga meʼa ʼae ʼe maʼuli ai, ʼo toe feia mo te ʼu meʼa ʼae ʼi tona loto mo tana fakakaukau. ʼE toe iloʼi e Sehova ia te ʼu meʼa ʼae ʼi ʼotatou loto. ʼE ina iloʼi lelei pe koʼe ʼe fai e he tahi ia he aluʼaga. ʼE mole he meʼa ʼe ugia kia Sehova. (Hep. 4:13) Koia, ka fakamolemole ia Sehova ki he tahi he ʼe ina iloʼi ia ogaoga fuli ʼo he aluʼaga.

10. Ka tou lau ia Tetelonome 32:4, he koʼe ʼe feala ke tou ui ʼe faitotonu tuʼumaʼu ia te ʼu fakamau ʼa Sehova?

¹⁰ ʼE faitotonu tuʼumaʼu pe ia te ʼu fakamau ʼa Sehova. ʼE mole fakapalatahi ia. ʼE mole fakamolemole ia Sehova ki he tahi ʼuhi he ʼe matalelei, peʼe koloaʼia, peʼe maʼu tuʼulaga, peʼe lahi ʼona fealagia. (1 Sam. 16:7; Sakp. 2:1-4) ʼE mole feala ki he tahi ke ina fakakinauʼi ia Sehova ke ina fai he meʼa peʼe ke ina kakaʼi ia ia. (2 Klk. 19:7) ʼE mole ina fai ʼana tonu ʼuhi he ʼe ita peʼe ko te ʼu meʼa ʼae ʼe ina logoʼi ʼi tona loto. (Eke. 34:7) Ko Sehova ʼe ko te Tuʼi Fakamau ʼae ʼe lelei age koteʼuhi ʼe mahino kia aluʼaga fuli ʼo ʼuhiga mo tatou.​—Lau ia Tetelonome 32:4.

11. He koʼe ʼe makehe ia te lotofakamolemole ʼa Sehova?

¹¹ Neʼe iloʼi e te kau tagata faitohi ʼo te Koga Tohi-Tapu Fakahepelo ia te makehe ʼo te lotofakamolemole ʼa Sehova. ʼI ʼihi aluʼaga, neʼe natou fakaʼaogaʼi ia he kupu Fakahepeleo  ʼe ui ʼi he tohi, “ ʼe fakaʼaogaʼi pe moʼo fakaha ʼo te faʼahiga fakamolemole ʼa te ʼAtua kia natou ʼae ʼe agahala. Neʼe mole feala ia ke fakaʼuhiga ki te fakamolemole ʼa he tagata ki he tahi tagata he ʼe ʼi ai pe ʼona ia tuʼakoi.” Koia, ʼe gata pe kia Sehova ke ina fakamolemole fuli te ʼu hala ʼa he tahi neʼe agahala mo fakahemala. Kotea ʼae ka hoko moka ʼe fakamolemole mai ia Sehova?

12-13. (1) Kotea te ʼu fua lelei ʼe maʼu e he tahi moka ʼe fakamolemole age ia Sehova? (2) ʼE feafeaʼi ia te lotofakamolemole ʼa Sehova?

¹² Ka tou tali ia te lotofakamolemole mai ʼa Sehova, pea ʼe tou logoʼi ai “he fimalie,” mo te tokalelei ʼo te fakakaukau pea mo he leʼo ʼo loto ʼe maʼa. ʼE hoki tou logoʼi pe ia te ʼu faʼahi ʼaia mo kapau ko “Sehova” ʼae ʼe fakamolemole mai. (Gaue 3:19) Ka fakamolemole mai ia Sehova, pea ʼe ina fakafealagia ke tou toe maʼu he ʼu felogoi lelei mo ia ohage neʼe heʼeki tou agahala.

¹³ Ka ʼosi fakamolemole mai pe ia Sehova, ʼe mole ina toe tukugakoviʼi anai tatou pea mo fakatuʼā tatou ʼuhi ko te agahala ʼae neʼe tou fai. (Esa. 43:25; Sel. 31:34) ʼE tuku e Sehova ʼatatou agahala “ohage pe ko te mamaʼo ʼo te hopoʼaga ʼo te laʼa mai tona toʼaga.” * (Pes. 103:12) Ka tou fakakaukauʼi ia te maʼuhiga ʼo te lotofakamolemole ʼa Sehova, pea ʼe tou lotofakafetaʼi lahi mo manavasiʼi anai kia te ia. (Pes. 130:4) Kae ko ai ʼae ka lotofakamolemole anai ki ai ia Sehova?

14. Kotea ʼae neʼe tou ako ʼo ʼuhiga mo te ʼu tupuʼaga ʼae pe ʼe fakamolemole peʼe kailoa ia Sehova ki he tahi?

¹⁴ Neʼe tou ako ka lotofakamolemole ia Sehova ki he tahi, pea ʼe mole ina fai ia ʼo mulimuli ki te mamafa ʼo tana agahala. Neʼe tou toe ako ʼe fakaʼaogaʼi e Sehova ia te ʼu aluʼaga fuli ʼae ʼe ina iloʼi ʼi tona ʼuhiga Tupuʼaga, mo Tagata Failao, pea mo Tuʼi Fakamau pe ʼe fakamolemole anai ki he tahi. Kae kotea ia te ʼu aluʼaga ʼae ʼe tokagaʼi e Sehova?

15. Ka tou lau ia Luka 12:47, 48, kotea te tahi aluʼaga ʼe tokagaʼi e Sehova?

¹⁵ Ko te tahi aluʼaga ʼae ʼe tokagaʼi e Sehova ʼe ko tana iloʼi ʼae pe neʼe iloʼi e ia ʼae neʼe agahala te kovi ʼo te meʼa ʼae neʼe ina fai.  Neʼe fakaha lelei e Sesu ia te faʼahi ʼaia ia Luka 12:47, 48. (Lau.) Ka fakatuʼutuʼu e he tahi ke ina fai he meʼa ʼe kovi ʼi tona loto faʼitaliha ʼo ina iloʼi lelei pe ʼe mamahi ai ia Sehova, ʼe ko he agalaha mamafa ia ʼae ʼe ina fai. ʼE feala pe ke mole fakamolemole ia Sehova ki te kilisitiano ʼaia. (Mko. 3:29; Soa. 9:41) Kae ʼi ʼihi temi, ʼe tonu ke tou fakamoʼoni ʼe tou iloʼi lelei pe ʼe kovi te meʼa ʼae ʼe tou fai. ʼE feala koa ke fakamolemole mai te ʼAtua? ʼEi, he ʼe ʼi ai te tahi aluʼaga ʼe toe tokagaʼi e Sehova moka tonu ke fakamolemole mai peʼe kailoa.

16. Kotea ia te fakaʼuhiga ʼo te fakahemala? Pea he koʼe ʼe maʼuhiga te faʼahi ʼaia moka ʼe tou loto ke fakamolemole mai ia Sehova?

¹⁶ Ko te tahi aluʼaga ʼe tokagaʼi e Sehova ʼe ko tana iloʼi ʼae pe ʼe fakahemala moʼoni ia ia ʼae neʼe agahala. Kotea ia te fakaʼuhiga ʼo te fakahemala? Ko tona fakaʼuhiga ke tou “fetogi tatatou faʼahiga manatu, mo tatatou aga peʼe ko ʼatatou fakatuʼutuʼu.” ʼE maʼu ai te manatu ʼae ʼe fakahemala he tahi mo lotomamahi ʼuhi ko te ʼu aga ʼe kovi neʼe ina fai peʼe ko tana mole fai te meʼa ʼae ʼe lelei. Ko he tahi ʼe fakahemala ʼe lotomamahi ʼuhi ko te ʼu aga ʼe kovi neʼe ina fai pea mo tana tuku ʼae ke vaivai ʼi te faʼahi fakalaumalie ʼo tupu ai tana fai te ʼu aga ʼaia ʼe kovi. Ke ke manatuʼi ia te ʼu hau ʼe lua ko Manase mo Tavite ʼae neʼe nā fai he ʼu agahala mamafa. Kae neʼe fakamolemole ia Sehova kia naua he neʼe nā fakahemala moʼoni. (1 Hau 14:8) ʼEi, ʼe fakamolemole mai pe ia Sehova mo kapau ʼe sio ʼe tou fakahemala. Kae ʼe mole gata pe ki tatatou fakahemala ki te ʼu agahala ʼae neʼe tou fai. ʼE tonu foki ke tou fakaha ʼaki he ʼu gaue. * Koia, ʼe tou toe vakaʼi he tahi aluʼaga ʼe toe tokagaʼi e Sehova.

17. Ka tou lau ia Esaia 55:7, kotea ia te fakaʼuhiga ʼo te ui ʼae tafoki? Pea he koʼe ʼe maʼuhiga moka ʼe mole tou loto ke tou toe fai te ʼu agahala ʼae neʼe tou fai ʼi muʼa atu?

¹⁷ Ka tafoki he tahi, ʼe ko he tahi aluʼaga maʼuhiga ʼe tokagaʼi e Sehova. Ko te kupu tafoki ʼe ko tona fakaʼuhiga “maliu.” ʼE tonu ke liʼaki e he tahi te ʼu aga ʼae ʼe kovi kae haʼele ʼi te ala ʼo Sehova. (Lau ia Esaia 55:7.) ʼE tonu ke ina fetogi tana faʼahiga manatu  ke feala hana maʼu te manatu ʼa Sehova. (Loma 12:2; Efe. 4:23) ʼE tonu ke ina fakatotonu ke ina liʼaki ʼana manatu mo ʼana aga ʼae ʼe kovi. (Kol. 3:7-10) ʼE mahino ia, ka tou tui ki te sakilifisio ʼo Kilisito pea ʼe fakamolemole mai ia Sehova pea mo ina fakamaʼa tatou mai ʼatatou agahala. ʼEi, ka sio ia Sehova ʼe tou faiga fakamalotoloto ke tou fetogi tatatou aga, ʼe fakamolemole mai anai ʼo fakatafito ki te sakilifisio ʼaia.​—1 Soa. 1:7.

18. Kotea tatatou manatu ki te lotofakamolemole ʼa Sehova?

¹⁸ Tou toe vakaʼi te ʼu manatu maʼuhiga ʼae neʼe tou talanoa ki ai. Ko Sehova ʼe ko ia moʼoni ʼae ʼe Lotofakamolemole lahi ʼi te ʼatulaulau. He koʼe ʼe feala ke tou ui te faʼahi ʼaia? ʼUluaki, he ʼe lotolelei tuʼumaʼu ke fakamolemole mai. Lua, he ʼe ina iloʼi ia meʼa fuli ʼo ʼuhiga mo tatou. ʼE ina iloʼi lelei totatou ʼuluagaaga pea ʼe tuha pe mo ia ke ina vakaʼi pe ʼe tou fakahemala moʼoni. Pea tolu leva, he ʼe ina fakamolemole katoa ʼatatou agahala, ʼe hage pe neʼe mole tou fai he agahala. ʼE feala ai ke tou maʼu he leʼo ʼo loto ʼe maʼa pea mo maʼu tona ʼofa.

19. Logo la totatou ʼuhiga agahala pea mo tatatou haga fai pe ni agahala, kae he koʼe ʼe tou fiafia?

¹⁹ ʼE mahino ia, ʼe tou haga fai pe ni agahala ʼuhi pe ko totatou ʼuhiga heʼe haohaoa. Kae ʼe feala ke tou maʼu he fakalotofimalie ʼi te ʼu palalau ʼaeni ʼi te tohi Étude perspicace des Écritures, volume 2, pasina 771: “ ʼE manavaʼofa ia Sehova pea ʼe ina iloʼi ʼe ʼi ai te ʼu vaivaiʼaga ʼo tana ʼu kaugana. Koia, ʼe mole ʼaoga ke natou lotomamahi tuʼumaʼu koteʼuhi ʼe natou agahala pea mo fai ni lakahala. (Pes 103:8-14; 130:3) Kapau ʼe natou fai ia meʼa fuli ke natou haʼele ʼi te ʼu ala ʼo Sehova, ʼe natou fiafia anai. (Flp. 4:4-6; 1 Soa. 3:19-22).” ʼE mole koa la ko he manatu fakalotomalohi ʼaeni? ʼE mahino ia.

20. Kotea ʼae ka tou vakaʼi ʼi te alatike ka hoa mai?

²⁰ ʼE tou lotofakafetaʼi kia Sehova ʼi tana lotolelei ʼo fakamolemole mai moka tou fakahemala moʼoni ki ʼatatou agahala. Kae, ʼe feafeaʼi hatatou faʼifaʼitakiʼi te lotofakamolemole ʼa Sehova? Kotea ʼae ʼe tatau ai tatatou lotofakamolemole mo ʼae ʼa Sehova kae kotea ʼae ʼe kehekehe ai? He koʼe ʼe maʼuhiga ke tou mahino ki tona kehekehe? ʼE tou maʼu anai te tali ki te ʼu fehuʼi ʼaia ʼi te alatike ka hoa mai.