1. Ka tou metitasio ki te maʼuli heʼe gata ʼae ʼe fakapapau mai e Sehova, kotea ʼae ʼe tou logoʼi?

 ʼE FAKAPAPAU mai e Sehova “te maʼuli heʼe gata.” (Loma 6:23) Ka tou metitasio ki tana fakapapau ʼaia, ʼe ʼasili ai totatou ʼofa kia te ia. Fakakaukau age muʼa ki te ʼofa mamahi ʼo tatatou Tamai ʼae ʼi selo kia tatou. Koia ʼe ina foaki mai te meʼa ʼofa ʼaia ke mole he meʼa ʼe ina veteki ai tatou mai ia te ia.

2. ʼE tokoni feafeaʼi mai te fakapapau ʼa te ʼAtua huʼu mo te maʼuli heʼe gata?

² ʼE tokoni mai te fakapapau huʼu mo te maʼuli heʼe gata ke tou tauʼi ʼotatou faigataʼaʼia. Tatau aipe pe ʼe fia matehi tatou e ʼotatou fili, kae ʼe hoko atu pe tatatou tauhi kia Sehova. Kotea tona tupuʼaga. Heʼe tou iloʼi, kapau ʼe tou mamate kae neʼe tou nonofo agatonu kia Sehova, ʼe ina fakatuʼuake anai tatou pea mo foaki mai te fealagia ʼae ke tou maʼuʼuli ʼo heʼe gata. (Soa. 5:28, 29; 1 Ko. 15:55-58; Hep. 2:15) He koʼe ʼe tou tui papau ʼe feala anai ke tou maʼuʼuli ʼo heʼe gata? Tou vakaʼi te ʼu manatu ʼaeni ʼe hoa mai.

3. He koʼe ʼe tou iloʼi ʼe feala ke taupau e Sehova ʼotatou maʼuli ʼo talu ai? (Pesalemo 102:13, 25, 28)

³ ʼE tou iloʼi ʼe feala ke taupau e Sehova ʼotatou maʼuli ʼo talu ai heʼe ko ia te Matapuna ʼo te maʼuli, pea ʼe maʼuli ʼo talu ai. (Pes. 36:9) Tokagaʼi te ʼu vaega ʼaeni ʼi te Tohi-Tapu ʼe fakamoʼoni ai ko Sehova ʼe mole hona kamataʼaga mo hona fakaʼosiʼaga. ʼE ui ia Pesalemo 90:2 ko Sehova ʼe maʼuli “mai te heegata ki te heegata.” ʼE toe tatau mo te manatu ʼae ia Pesalemo 102. (Lau ia Pesalemo 102:13, 25, 28.) Pea neʼe tohi e te polofeta ko Hapakuke ʼo ʼuhiga mo tatatou Tamai  ʼae ʼi selo: “ ʼE mole ke maʼuli koa la talu mai te heʼe gata, e Sehova? E toku ʼAtua, toku Maʼoniʼoni, pea ʼe mole ke mate.”​—Hap. 1:12, NWT.

4. He koʼe ʼe mole tonu ke tou tuʼania moka faigataʼa hatatou mahino ki te ʼuhiga heʼe gata ʼo Sehova? Fakamahino.

⁴ ʼE faigataʼa koa tau mahino ki te ʼuhiga heʼe gata ʼo Sehova? (Esa. 40:28) Neʼe toe faigataʼa pe la ki ʼihi. Neʼe ui e Eliu ʼo ʼuhiga mo te ʼAtua: “ ʼE mole malau te lahi ʼo ʼona taʼu.” (Sopo 36:26) Kae ka ʼe mole tou mahino ki he faʼahi, ʼe mole fakaʼuhiga leva ʼe hala. Ohage la, tatau aipe pe ʼe mole tou mahino katoa ki te fakaalualu ʼo te hila, ʼe mole fakaʼuhiga leva ʼe mole he hila. ʼO toe feia aipe, ʼe mole tou mahino katoa anai ki te mole he kamataʼaga ʼo Sehova pea ʼe maʼuli ʼo talu ai. Kae ʼe mole fakaʼuhiga leva ʼe mole maʼuli ʼo heʼe gata ia te ʼAtua. Ko te moʼoni ʼo ʼuhiga mo te tupuʼaga ʼe mole fakalogo ia ki te meʼa ʼae ʼe tou mahino peʼe mole tou mahino ki ai. (Loma 11:33-36) Neʼe maʼuli ia ʼi muʼa ʼo te fakatupu ʼo te ʼatulaulau, ʼae ʼe kau ai te laʼa mo te ʼu fetuʼu. ʼE ui mai e Sehova ko ia ʼae neʼe ina “fakatupu te kele i tona mafimafi.” ʼEi, neʼe kua maʼuli ia ʼi muʼa ʼo tana “folahi te atu lagi.” (Sel. 51:15; Gaue 17:24) Kotea te tahi tupuʼaga ʼe tou tui ai ʼe feala ke tou maʼuʼuli ʼo heʼe gata?

5. Kotea te fealagia ʼae neʼe maʼu e te ʼuluaki taumatuʼa?

⁵ Neʼe fakatupu e Sehova te tagata mo te fealagia ʼae ke maʼuli ʼo heʼe gata. Kae ko te ʼu meʼa maʼuli fuli ake ʼae neʼe tonu ia ke mate. Kae neʼe fai e Sehova te fakatokaga ʼaeni kia Atama: “ ʼE mole tonu ke ke kai ki te fuʼu ʼakau ʼo te iloʼi ʼo te meʼa ʼae ʼe lelei pea mo te meʼa ʼae ʼe kovi, koteʼuhi, ko te ʼaho pe ʼae ka ke kai anai ki ai ʼe ke mate moʼoni anai.” (Sen. 2:17) Ka na neʼe fakalogo la ia Atama mo Eva kia Sehova, ka na ʼaua la neʼe mole nā mamate. ʼE tou mahino ai, neʼe ʼi ai pe he temi, neʼe feala ke fakagafua age e Sehova ke nā kai ki “te fuʼu ʼakau ʼo te maʼuli.” Ko tona fakaʼuhiga, neʼe feala pe ke nā “maʼuli ʼo heʼe gata.” b​—Sen. 3:22.

6-7. (1) Kotea ʼae ʼe fakaha mai ai neʼe mole fakatupu te tagata ke mate? (2) Kotea ʼae ka ke fia fai anai ʼi te malama foʼou? (Vakaʼi te ʼu pāki.)

⁶ Neʼe maʼu e ʼihi kau popoto he ʼu fakamoʼoni ʼe feala ki totatou ʼuto ke ina tanaki he ʼu manatu ʼe laka maumau age ia ʼi te ʼu manatu ʼe feala ke tou tanaki ʼi totatou temi maʼuli. ʼI te 2010, neʼe ta he alatike ʼi  te nusipepa (Scientific American Mind), neʼe ui ai ʼe feala ke tanaki e totatou ʼuto he ʼu manatu ʼe tatau mo hola ʼe tolu miliona (peʼe ko taʼu ʼe 300 tupu) polokalama televisio neʼe puke. Pea ʼe toe feala pe la ke laka age. ʼE fakamoʼoni ai neʼe faʼu e Sehova totatou ʼuto ke feala hana tanaki he ʼu manatu ʼe laka age ia taʼu ʼe 70 peʼe 80.​—Pes. 90:10.

⁷ Neʼe toe fakatupu tatou e Sehova mo te loto ʼae ke tou maʼuʼuli ʼo heʼe gata. ʼE ui ʼi te Tohi-Tapu neʼe tuku e te ʼAtua ki te loto ʼo te tagata “te manatu o te mauli heegata.” (Ekl. 3:11) Koia la ʼae maʼa tatou, ko te mate ʼe ko hotatou fili. (1 Ko. 15:26) Ka tou mahahaki kovi, ʼe tou nonofo feia pe koa ʼo atali ke tou mamate? Kailoa, ʼe tou olo ki te toketa pea tou kumi ni faitoʼo moʼo tauʼi ʼaki te mahaki. ʼE tou fai ia meʼa fuli ʼe tou lavaʼi ke mole tou mamate. Pea ka mate he tahi neʼe tou ʼoʼofa ai, peʼe kei tamasiʼi peʼe kua vaivai matuʼa, ʼe mole tou logoʼi koa la he toe mamahi? (Soa. 11:32, 33) Koia, neʼe fakatupu tatou e totatou ʼAtua ʼofa ke tou haga ako ʼo heʼe gata pea ke tou fia maʼuʼuli ʼo heʼe gata. Koia neʼe ko tana fakatuʼutuʼu ke maʼuli te tagata ʼo heʼe gata. Kae ʼe ʼi ai te tahi ʼu tupuʼaga ke tou tui ai ʼe feala ke tou maʼuʼuli ʼo heʼe gata. Tou vakaʼi he ʼu gaue ʼa Sehova ʼi te temi muʼa pea mo te temi nei ʼe fakamoʼoni ai heʼeki fetogi tana fakatuʼutuʼu ʼae ʼi te kamata.

8. Kotea ʼae ʼe tou ako mai ia Esaia 55:11 ʼo ʼuhiga mo te fakatuʼutuʼu ʼa Sehova?

⁸ Tatau aipe pe neʼe agahala ia Atama mo Eva ʼo mamate ai ʼanā fanau, kae heʼeki  fetogi te fakatuʼutuʼu ʼa Sehova. (Lau ia Esaia 55:11.) ʼE kei ina loto pe ke tou maʼuʼuli ʼo heʼe gata. ʼE iloga lelei te faʼahi ʼaia ʼi te ʼu meʼa ʼae neʼe ina ui mo fai moʼo fakahoko tana fakatuʼutuʼu.

9. Kotea te fakapapau ʼae neʼe fai e te ʼAtua? (Taniela 12:2, 13)

⁹ Neʼe fai e Sehova te fakapapau ʼae ʼe ina fakatuʼuake anai te kau mate pea mo foaki age te maʼuli heʼe gata. (Gaue 24:15; Tito 1:1, 2) Neʼe tui papau te agatonu ko Sopo ʼe fakaʼamu lahi ia Sehova ke ina fakatuʼuake te kau mate. (Sopo 14:14, 15) Neʼe iloʼi e te polofeta ko Taniela ʼe fakatuʼuake anai te kau mate pea ʼe feala anai ke natou maʼuʼuli ʼo heʼe gata. (Pes. 37:29; lau ia Taniela 12:2, 13.) ʼI te temi ʼo Sesu, neʼe toe iloʼi foki e te kau Sutea ʼe feala ke foaki e Sehova ki ʼana kaugana agatonu “te maʼuli heʼe gata.” (Luka 10:25; 18:18) Neʼe tuʼa lahi te palalau ʼa Sesu ki te fakapapau ʼaia, pea neʼe toe fakatuʼuake ia ia totonu e tana Tamai.​—Mat. 19:29; 22:31, 32; Luka 18:30; Soa. 11:25.

10. Kotea ʼae ʼe fakamoʼoni e te ʼu fakatuʼuake neʼe hoko ʼi te temi muʼa? (Vakaʼi te pāki.)

¹⁰ ʼE foaki e Sehova te maʼuli pea ʼe ina maʼu te malohi ke ina fakatuʼuake te hahaʼi. Neʼe ina foaki ki te polofeta ko Elia te malohi ʼae ke ina fakatuʼuake te kiʼi tama ʼa te fafine vitua mai Salepate. (1 Hau 17:21-23) Ki muli age, ʼaki te tokoni ʼa te ʼAtua, neʼe fakatuʼuake e te polofeta ko Eliseo te kiʼi tama ʼa te fafine Sunemi. (2 Hau 4:18-20, 34-37) ʼE fakamoʼoni e te ʼu fakatuʼuake ʼaia pea mo ʼihi atu ʼe maʼu e Sehova te malohi ke ina fakatuʼuake te kau mate. ʼI tana maʼuli ʼi te kele, neʼe fakaha lelei e Sesu neʼe foaki age e tana Tamai te malohi ʼaia. (Soa. 11:23-25, 43, 44) ʼI te temi nei, kua nofo Sesu ʼi selo pea kua tuku age kia te ia “te pule katoa ʼi te lagi pea mo te kele.” Kua feala ke ina fakahoko te fakapapau ʼae ko natou fuli ʼi “te ʼu fale maka fakamanatu” ʼe fakatuʼuake anai mo te fealagia ʼae ke natou maʼuʼuli ʼo talu ai.​—Mat. 28:18; Soa. 5:25-29.

11. ʼE fakafealagia feafeaʼi e te totogi ke tou maʼu te maʼuli heʼe gata?

¹¹ He koʼe neʼe tuku e Sehova ke matehi tona ʼAlo ʼofaina? Neʼe fakaha e Sesu tona tupuʼaga ʼi tana ui fenei: “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.” (Soa. 3:16) ʼI tana foaki tona ʼAlo ko he totogi moʼo ʼuʼufi ʼo ʼatatou agahala, neʼe fakafealagia ai e te ʼAtua ke tou maʼu te maʼuli heʼe gata. (Mat. 20:28) Neʼe palalau ia te apositolo ko Paulo ki te faʼahi maʼuhiga ʼaia ʼi te fakatuʼutuʼu ʼa te ʼAtua, ʼi tana ui fenei: “Mai tona aluʼaga ʼae neʼe haʼu te mate ʼaki he tagata, ʼo toe feia aipe, ʼaki he tagata ʼe feala ke fakatuʼuake te kau mate. Koteʼuhi ohage pe ko te mamate ʼa te hahaʼi fuli ʼuhi ko Atama, ʼo toe feia aipe ʼe toe maʼuʼuli ake anai te hahaʼi fuli ʼaki ia Kilisito.”​—1 Ko. 15:21, 22.

12. Kotea ʼae ka fai e te Puleʼaga moʼo fakahoko ʼo te fakatuʼutuʼu ʼa Sehova ʼo ʼuhiga mo te hahaʼi?

¹² Neʼe akoʼi e Sesu ki ʼana tisipulo ke natou faikole ke hoko mai te Puleʼaga ʼo te ʼAtua pea ke fai te finegalo ʼo te ʼAtua ʼi te kele. (Mat. 6:9, 10) ʼE kau ki te fakatuʼutuʼu ʼa te ʼAtua ia te maʼuli heʼe gata ʼa te hahaʼi ʼi te kele. Moʼo fakahoko te faʼahi ʼaia, neʼe fakanofo e Sehova tona ʼAlo ko te Hau ʼo te Puleʼaga Fakamesianike. Pea ʼe fakatahiʼi e te ʼAtua te toko 144 000 hahaʼi mai te kele ke natou kauga gaue mo Sesu ʼi selo moʼo fakahoko ʼo tona finegalo.​—Fkha. 5:9, 10.

13. Kotea ʼae ʼe lolotoga fakahoko e Sehova, pea kotea ʼae ʼe feala ke ke fai?

 ¹³ ʼE lolotoga fakatahiʼi e Sehova he “toe hahaʼi tokolahi” pea ʼe ina teuteuʼi natou ke natou maʼuʼuli ʼi te pule ʼo tona Puleʼaga. (Fkha. 7:9, 10; Sakp. 2:8) Logo la tanatou maʼuʼuli ʼi he malama ʼe maveuveu ʼuhi ko te mataku mo te tau, kae ʼe natou faiga ke natou tekeʼi te lotofehiʼa, te fehiʼa ki te tahi ʼu fenua, peʼe lanu, peʼe telepi. ʼI hona aluʼaga fakata, kua natou tuki ʼanatou heleta ko he ʼu huo fuli kele. (Mik. 4:3) ʼE mole natou kau ki te tau ʼae ʼe mamate ai te hahaʼi, kae ʼe natou tokoni ki te hahaʼi ke natou maʼu ia “te maʼuli moʼoni.” ʼE natou akoʼi age kia natou pe ko ai te ʼAtua moʼoni pea kotea ʼana fakatuʼutuʼu. (1 Tim. 6:19) ʼUhi ko tanatou lagolago ki te Puleʼaga ʼo te ʼAtua, ʼe feala ke natou tau mo te fakafeagai ʼo ʼonatou famili, peʼe ko ni fihifihia fakaekonomika. Kae ʼe tokaga ia Sehova ke natou maʼu te ʼu meʼa ʼae ʼe ʼaoga kia natou. (Mat. 6:25, 30-33; Luka 18:29, 30) ʼE tou tui papau ai ki te moʼoni ʼo te Puleʼaga ʼo te ʼAtua pea ʼe ina haga fakahoko atu pe anai te fakatuʼutuʼu ʼa Sehova.

14-15. ʼE fakahoko feafeaʼi anai te fakapapau ʼa te ʼAtua ke ina pulihi te mate ʼo talu ai?

¹⁴ Kua hau nei Sesu ʼi te Puleʼaga ʼo te ʼAtua ʼi selo. ʼE ina fakahoko anai te ʼu fakapapau  fuli ʼa Sehova. (2 Ko. 1:20) Talu mai te 1914, kua pule Sesu ki ʼona fili. (Pes. 110:1, 2) Ko ia mo ʼona kauga hau ʼe natou fakaʼosi anai tanatou malo pea ʼe natou pulihi anai te kau agakovi ʼi te kele katoa.​—Fkha. 6:2.

¹⁵ Lolotoga te ʼAfio ʼa Sesu ia Taʼu ʼe Afe, ʼe fakatuʼuake anai te kau mate, pea ʼe liliu anai te hahaʼi fakalogo ʼo haohaoa. Hili te ʼahiʼahi fakaʼosi, ko natou ʼae ʼe faitotonu kia mata ʼo Sehova ʼe natou “mau anai . . . te fenua, pea e natou nonofo anai i ai o heegata.” (Pes. 37:10, 11, 29) Pea ʼe ko he logo fakafiafia, heʼe “ko te fili fakamuli, ia te mate ʼe pulihi anai ia.”​—1 Ko. 15:26.

16. Kotea te tupuʼaga tafito ʼo tatatou tauhi kia Sehova?

¹⁶ Neʼe tou vakaʼi ko tatatou ʼamanaki ki te maʼuli heʼe gata ʼe fakatafito ki te Folafola ʼa te ʼAtua. ʼE tokoni mai te ʼamanaki ʼaia ke tou nonofo agatonu ʼi te ʼu ʼaho fakamuli mo faigataʼa ʼaeni. Kae ʼe mole tou fakafiafiaʼi te loto ʼo Sehova ʼuhi pe he ʼe tou fia maʼuʼuli. Ko te tupuʼaga tafito ʼo tatatou nonofo agatonu kia Sehova mo Sesu ʼe ko totatou ʼoʼofa mamahi kia naua. (2 Ko. 5:14, 15) ʼE uga ai tatou ke tou faʼifaʼitakiʼi ia naua pea mo fakamafola ʼaki he faʼafai tatatou ʼamanaki. (Loma 10:13-15) Kapau ʼe mole tou manatu pe kia tatou totonu kae tou lotofoaki, ʼe fia kaumeʼa anai ia Sehova mo tatou ʼo talu ai.​—Hep. 13:16.

17. Kotea ʼae ʼe tonu ke tou fai takitokotahi? (Mateo 7:13, 14)

¹⁷ ʼE tou kau anai koa kia natou ʼae ka maʼuʼuli ʼo heʼe gata? Neʼe fai e Sehova ia meʼa fuli ke feala hatatou maʼuʼuli ʼo heʼe gata. ʼE ʼa tatou leva takitokotahi te nofo ʼi te ala ʼae ʼe ina taki ki te maʼuli. (Lau ia Mateo 7:13, 14.) Kae ʼe feafeaʼi anai koa moka tou maʼuʼuli ʼo heʼe gata? ʼE tou tali anai ki ai ʼi te alatike ʼae ka hoa mai.