Kei Ke Manatuʼi Koa?
Neʼe kua ke lau fakalelei koa te ʼu Tule Leʼo ʼo te taʼu ʼaeni? Kapau koia, ʼahiʼahi tali ki te ʼu fehuʼi ʼaeni:
Kotea te ʼu lelei ka tou maʼu moka tou toʼo he temi ke tou palalau ai kia Sehova, mo fakalogo pea mo metitasio kia te ia?
ʼE tou fai anai ni tonu ʼe lelei age, ʼe tou liliu ko he kau faiako faiva, mo toe malohi age ai tatatou tui pea mo totatou ʼofa kia Sehova.—w22.01, pp. 30-31.
He koʼe ʼe ʼaoga anai kia tatou moka tou ako ke tou falala kia Sehova pea mo ʼana tagata fakafofoga?
ʼE ko te temi ʼaeni ke tou ako ke tou falala ki te ʼu gaue ʼa Sehova, ʼo mole tou lotolotolua ʼo ʼuhiga mo te takitaki pea mo te ʼu tonu ʼae ʼe fai e te ʼu tagata ʼafea. Ka hoko mai te mamahi lahi, ʼe kua tou teuteu ke tou fakalogo maʼia pe ʼe mole tou faʼa mahino ki te ʼu tuʼutuʼuni ʼae ʼe foaki mai.—w22.02, pp. 4-6.
He koʼe neʼe palalau age te ʼaselo kia Sakalia ʼo ʼuhiga mo te filo ʼe tautau ai he foʼi pulu ʼi te nima ʼo [te kovana] ko Solopapele? (Sakl. 4:8-10)
Neʼe fakaha age e te ʼaselo ki te hahaʼi ʼa te ʼAtua tatau aipe pe ʼe mole matalelei ia te fale lotu ki ʼihi, kae ʼe fakaʼosi anai pea ʼe alu tahi anai mo te loto ʼo Sehova.—w22.03, pp. 16-17.
ʼE feafeaʼi hatatou liliu “ko he faʼifaʼitakiʼaga . . . ʼi te palalau”? (1 Tim. 4:12)
ʼE tou palalau ʼaki he agalelei mo he fakaʼapaʼapa ʼi te faifakamafola, mo hiva fakamalotoloto, mo fai tuʼumaʼu ni tali ʼi te ʼu fono, mo fai ni palalau ʼe moʼoni mo fakalotomalohi, pea mo liʼaki ia te laukovi.—w22.04, pp. 6-9.
He koʼe ko te agaaga ʼo te ʼu manu (puleʼaga) ʼe fa ʼae ia Taniela kapite 7 ʼe maʼu fuli ʼi te manu ʼae ia Apokalipesi 13:1, 2?
Ko te manu ia Apokalipesi 13 ʼe mole fakata he puleʼaga pe ʼe tahi, ohage ko Loma. Kae ʼe ina fakata te ʼu malohi fakapolitike fuli ʼae neʼe natou puleʼi te tagata.—w22.05, p. 9.
ʼE tou fakaha feafeaʼi ʼe tou falala ki te faitotonu ʼa te ʼAtua?
Kapau neʼe laukovi mai he tahi, pe neʼe ina fai peʼe ui mai he meʼa neʼe tou mamahi ai, pe neʼe agahala mai, ʼe tou faiga anai ke mole tou iita peʼe tou nofo mo hotatou ita, kae ʼe tou tuku ia meʼa fuli kia Sehova. ʼE ina fakatokatoka anai ia mamahi fuli ʼuhi ko te agahala.—w22.06, pp. 10-11.
Kotea ʼae ʼe tonu ke manatuʼi e he tehina moka kole age ke faikole ʼi he fono?
Ka faikole, ʼe mole tonu ke ina fakatonutonuʼi te kokelekasio peʼe tala he ʼu logo. ʼE mole tonu ke ‘lahi ʼana palalau,’ tafito la moka ko te faikole ʼi te kamata ʼo te fono. (Mat. 6:7)—w22.07, pp. 24-25.
Kotea te fakaʼuhiga ʼo “te fakatuʼuake ki te fakamau” ʼo natou ʼae “neʼe natou fai te ʼu meʼa ʼae ʼe kovi”? (Soa. 5:29)
ʼE mole fakamauʼi anai ʼo mulimuli ko tonatou maʼuli ʼi muʼa atu. ʼE sivisivi lelei anai natou ʼo mulimuli ki tanatou aga hili tanatou fakatuʼuake.—w22.09, p. 18.
Kotea te fakalotomalohi neʼe fai e J. F. Rutherford ʼi te fakatahi ʼi Sepetepeli 1922?
ʼI te fakatahi ʼi Cedar Point, Ohio, U.S.A neʼe ina ui fenei: “Koʼeni kua ʼafio te Hau. Kua tuku atu te gaue ʼaia ke kotou fakaha ki te hahaʼi fuli. Koia ʼae kotou tala, kotou tala, kotou tala te Hau pea mo tona Puleʼaga.”—w22.10, pp. 3-5.
ʼO mulimuli kia Esaia kapite 30, kotea faʼahi ʼe tolu ʼe tokoni mai ai Sehova ke tou faʼa kataki?
ʼE fakaha ʼi te kapite ʼaia (1) ʼe fakalogo pea mo tali ki ʼatatou faikole, (2) ʼe ina takitaki tatou, pea (3) ʼe ina tapuakinaʼi nei tatou pea ʼi te ka haʼu.—w22.11, p. 9.
He koʼe ʼe feala ke tou ui neʼe fakahoko ia Pesalemo 37:10, 11, 29 ʼi te temi muʼa pea ʼe fakahoko anai ʼi te ka haʼu?
Neʼe palalau Tavite ki he ʼu aluʼaga neʼe maʼu ʼi Iselaele, ʼi te pule ʼo Salomone. Pea neʼe fakaʼaogaʼi e Sesu te vaega 11 moʼo palalau ki he palatiso ʼi te ka haʼu. (Mat. 5:5; Luka 23:43)—w22.12, pp. 8-10, 14.