ʼI te ui age e Sehova ki te ʼuluaki taumatuʼa ke nā “fakahahaʼi mo puleʼi te kele,” ʼe ha mai ai neʼe tonu ke liliu te kele katoa ko he Palatiso. (Sen. 1:28) Pea ʼe ko te gaue ʼaia ka fai anai e natou ka maʼuʼuli ʼi te kele. Kae ʼi te temi ʼaia, ʼe mole he ʼoloto ke fakalahi heʼe kua puli te ʼoloto ʼo Eteni. Koia, ka natou ulu anai ki te malama foʼou ʼe lahi anai te ʼu gaue ka natou fai. ʼE natou fakamaʼa anai te ʼu koga meʼa fuli ʼo te kele ʼae kua maumau ʼi te temi nei. Mole ko he kihiʼi gaue anai!

ʼE tou manatu ai ki te gaue ʼae neʼe fai e te kau Iselaele ʼi tanatou toe liliu mai Papiloni. Neʼe mole kei nofoʼi tonatou fenua lolotoga taʼu ʼe 70. Kae neʼe fakakikite e Esaia, ʼaki te tapuakina ʼa Sehova, ʼe natou toe fakamataleleiʼi anai te fenua. Neʼe ui fenei ʼi te lea fakapolofeta ʼaia: “E ina fakaliliu anai tona toafa o hage ko he Eteni, pea mo tona kele moamoa o hage ko he oloto a [“Sehova,” NWT].”  (Esa. 51:3) Neʼe lava fakahoko e te kau Iselaele. ʼO toe feia pe, ʼaki te tapuakina ʼa Sehova, ko natou ʼae ka natou maʼu anai te kele ʼe natou fakaliliu anai ko he Palatiso taulekaleka. ʼE feala ke ke fakaha ʼi te temi nei ʼe ke fia kau ki te gaue ʼaia.

Ohage la, faiga ʼo fakamaʼa tou ʼapi mo fakatokatoka leleiʼi, tatau aipe pe mole fia fakamaʼa tou vahaʼa fale. ʼE feala pe tau kau ki te fakamaʼa ʼo te Fale Fono pea mo te Fale ʼo Te Fakatahi. Ka ke fealagia, ʼe toe feala hau tokoni ki te ʼu gaue haofaki maʼuli. ʼE fakaha ai ʼe ke fia tokoni ki ʼou tehina mo tuagaʼane moka ʼe ʼaoga. Pea ʼe toe feala pe hau ako he tahi ʼu gaue, ke ke fakaʼaogaʼi mo kapau ʼe fakafealagia e Sehova ke ke maʼuli ʼo heʼe gata ʼi te kele.

ʼI te ʼosi fakatuʼuake e Sesu te kiʼi taʼahine ʼa Sailusi, neʼe ina fakatotonu atu aipe ke foaki age hana meʼa kai. (Mko. 5:42, 43) Ko te foaki ʼo te ʼu meʼa ʼae ʼe ʼaoga ki te kiʼi taʼahine ʼaia ʼe taʼu 12 neʼe mole faigataʼa. Kae fakakaukauʼi age muʼa te lahi ʼo te gaue moka fakahoko e Sesu tana fakapapau ʼae ʼe “logo . . . anai ia natou fuli ʼi te ʼu fale maka fakamanatu ki tona leʼo, pea mo natou hu mai ki tuʼa.” (Soa. 5:28, 29) Logo la mole lahi te palalau ʼi te Tohi-Tapu ki te faʼahi ʼaia, kae ʼe feala ke tou manatu ʼe ʼaoga anai ki te kau fakatuʼuake hanatou meʼa kai, meʼa laofi, mo he nofoʼaga. ʼE feala koa hau fakaha ʼi te temi nei ʼe ke fia tokoni? Koʼeni ni fehuʼi ʼe feala ke ke fai.

Ka tala ifo ʼe ʼaʼahi anai tau kokelekasio e te tehina taupau ʼo te siliko, ʼe ke fakaafe anai koa ke kolua kakai? Ka mavae he kaugana makehe ʼe kau ki te selevisi temi katoa ʼi te Petele ʼo alu atu ki tau kokelekasio, peʼe fakagata te gaue fealuʼaki ʼa he taupau fakasiliko, ʼe feala koa hau tokoni ke natou maʼu honatou nofoʼaga? Ka hoko he fakatahi fakafenua peʼe makehe, ʼe ke fia tokoni koa ʼi muʼa peʼe ʼi te fakaʼosi ʼo te fakatahi, peʼe ke toʼo hou temi ke ke fakatalitali te kau teleke?

ʼO mulimuli kia Gaue 24:15, ʼe fakatuʼuake anai te toko lauʼi miliale hahaʼi. Tokolahi ia natou ʼaia neʼe mole natou maʼu te fealagia ʼae ke natou iloʼi ia Sehova ʼi muʼa ʼo tonatou mamate. Koia, ka fakatuʼuake natou ʼe foaki age anai kia natou te fealagia ʼaia. a ʼE tonu anai ke akoʼi natou. Pea ko te gaue ʼaia ka fai anai e te ʼu kaugana agatonu ʼa te ʼAtua. (Esa. 11:9) Kua nofo teuteu ki ai ia Charlotte, ʼae neʼe faifakamafola ʼi Eulopa, mo Amelika Saute, pea mo Afelika. ʼE ina ui mo he lotofiafia: “Kua au loto la ke au akoʼi te kau fakatuʼuake. Ka au lau he fakamatala ʼo he tahi neʼe maʼuli ʼi muʼa atu, ʼe au ui fenei ‘ka na neʼe ina iloʼi la ia Sehova, ka na ʼaua la ʼe kehe age tona maʼuli.’ Kua au ʼamusia age la ke au palalau ki te kau fakatuʼuake ʼo ʼuhiga mo Sehova pea mo te lelei ʼo ʼonatou maʼuli moka natou tauhi kia te ia.”

Maʼia mo te ʼu kaugana agatonu ʼa Sehova ʼae neʼe maʼuʼuli ʼi muʼa ʼo te temi ʼo Sesu, ʼe lahi te ʼu faʼahi ʼe tonu anai ke natou ako. Fakakaukauʼi age muʼa totatou fiafia ʼi tatatou fakamahino kia Taniela ia te fakahoko ʼo te ʼu lea fakapolofeta ʼae neʼe ina tohi kae neʼe mole mahino ki ai. (Tan. 12:8) Pea ʼe feafeaʼi age la totatou fiafia moka tou fakamahino kia Lute mo Naomi neʼe hifo te Mesia mai tonā hakoga. ʼI te kua puli leva ʼo te ʼu faigataʼaʼia mo te ʼu fakahala ʼo te malama ʼaeni, ko he fiafia lahi anai moka tou kau ki te gaue faiako ʼaia ʼi te malamanei katoa.

ʼE feafeaʼi tau fakaha ʼi te temi nei tau ʼamusia age ʼae ke ke kau la ki te gaue ʼaia? ʼAki tau hikihiki tau faʼahiga faiako pea mo tau kau ki te faifakamafola ʼae ʼe fai ʼi te malamanei katoa ia ʼaho nei. (Mat. 24:14) Logo la tou vaivai matuʼa peʼe ko ʼihi atu aluʼaga ʼe feala ke talolo ai tau faifakamafola, kae ko tau faiga ʼae ke ke kau ki ai ʼe fakaha ai tau kua tokalelei ke ke akoʼi te kau fakatuʼuake.

Koia, kua ke loto la ke ke maʼu te kele? Kua ke loto la ke ke kau ki te fakaliliu ʼo te kele ko he Palatiso, mo tokoni pea mo akoʼi te kau fakatuʼuake? Ko he ʼu fehuʼi maʼuhiga. Fakaha kua ke teuteu, ʼo ke toʼo te ʼu faigamalie fuli ke ke fakahoko te ʼu gaue ʼae ka ke fai anai moka ke maʼu te kele.