Ko He Tahi ʼe Fia Liliu Ko He Tisipulo ʼa Kilisito ʼe Tonu Ke Papitema
“Te papitema . . . ʼe ina toe haofaki mo koutou ʼi te temi nei.”—1 PETELO 3:21.
1, 2. (1) Kotea ʼae ʼe logoʼi e te ʼu matuʼā moka fia papitema hanatou fanau? (2) He koʼe ʼe tonu kia ia ʼae ʼe fia papitema ke ina fakakaukau’i pe neʼe kua ina foaki koa tona maʼuli kia Sehova? (Vakaʼi te ʼuluaki pāki.)
’E TUTU’U fakatahi ia Malia mo natou ʼae ka ʼamanaki papitema, kae sio’i e ʼana matuʼā. ʼE fai e te tehina faiakonaki ia te ʼu fehuʼi ʼe lua. ʼE tali leʼo lahi ia Malia ki te ʼu fehuʼi. ʼOsi ʼaia pea papitemaʼi leva ia ia.
2 Neʼe fiafia lahi ʼosi te ʼu matuʼā ʼa Malia ʼi tana foaki tona maʼuli kia Sehova pea mo papitema. Kae ’i mu’a atu mole faʼa fualoa ki ai, neʼe hoha te faʼe ʼa Malia. Neʼe feʼekeʼaki pe ʼe kua lahi feʼauga ia Malia ke papitema. Pe neʼe kua mahino lelei koa, ko te foaki ʼo tokita maʼuli kia Sehova ʼe tonu ke fakakaukauʼi lelei, kae mole hoko fai feia? Tokolahi te ʼu matuʼā ʼe natou fai te ʼu fehuʼi ʼaia moka ui age e ʼanatou fanau kua natou fia papitema. (Ekelesiasi 5:4) ʼE tou iloʼi fuli pe, ko te foaki ʼo tokita maʼuli kia Sehova pea mo te papitema, ʼe ko he tonu ʼe maʼuhiga ʼaupito.—Vakaʼi te fakamatala ʼae ʼi te ʼa takai “ Neʼe ” Kua Kotou Foaki Koa ʼOkotou Maʼuli Kia Sehova?
3, 4. (1) ʼE akoʼi feafeaʼi mai e te apositolo ko Petelo ia te maʼuhiga ʼo te papitema? (2) He koʼe neʼe fakata te papitema e Petelo ki te faʼu e Noe te aleka?
3 Neʼe fakata te papitema e te apositolo ko Petelo ki te faʼu e Noe te aleka. Neʼe ina ui fenei: “Ko te faʼahi ʼaia ʼe ko he fakata ʼo te papitema, ʼae ʼe ina toe haofaki mo koutou ʼi te temi nei.” (Lau ia 1 Petelo 3:20, 21.) ʼI tana faʼu te aleka, neʼe fakamoʼoni ai e Noe ki te hahaʼi fuli tana loto moʼoni ʼae ke ina fai ia te finegalo ʼo te ʼAtua. Neʼe fakahoko lelei e Noe ia te gaue ʼae neʼe fakatotonu age e Sehova ke ina fai. Neʼe haofaki e Sehova ia Noe mo tona famili ʼi te Tulivio, koteʼuhi neʼe tui ia Noe kia Sehova. He koʼe neʼe fai e Petelo ia te fakata ʼaia? Kotea ʼae neʼe ina fia akoʼi mai kia tatou?
4 ʼI te sio ʼa te hahaʼi ki te aleka, neʼe natou mahino ai neʼe tui ia Noe ki te ʼAtua. Koia ka sisio te hahaʼi ki he tahi ʼe papitema, ʼe natou iloʼi ai kua ina foaki tona maʼuli ki te ʼAtua, pea ʼe tui ia kia Kilisito. Ohage pe ko Noe, ko natou ʼae ʼe papitema ʼe natou fakalogo ki te ʼAtua pea mo natou fakahoko ia te gaue ʼae neʼe ina foaki age kia natou. Ohage ko tana haofaki ia Noe ʼi te Tulivio, ʼe haofaki anai e Sehova ʼana kaugana agatonu ʼae kua papitema moka ina fakaʼauha anai ia te malama agakovi ʼaeni. (Maleko 13:10; Fakaha 7:9, 10) Koia ʼe tou mahino ai ki te maʼuhiga ʼae ke tou foaki ʼotatou maʼuli kia Sehova pea mo papitema. ʼI tona fakahagatonu, kapau ʼe kumi takuʼaki e he tahi ke ʼaua naʼa papitema, ʼe feala pe ke mole ina maʼu ia te maʼuli heʼe gata.
5. Kotea ʼae ka tou vakaʼi anai ʼi te alatike ʼaeni?
5 Kua tou mahino leva ki te maʼuhiga ʼo te papitema. Kae ʼe tonu ke tou tali ki te ʼu fehuʼi ʼaeni ʼe tolu: Kotea ʼae ʼe ui ʼi te Tohi-Tapu
ʼo ʼuhiga mo te papitema? Kotea ʼae ʼe tonu ke fai e he tahi ʼi muʼa ʼo tana papitema? He koʼe ʼe tonu ke tou manatuʼi tuʼumaʼu ia te maʼuhiga ʼo te papitema moka tou akoʼi te Tohi-Tapu ki ʼatatou fanau peʼe ko he tahi pe?KOTEA ʼAE ʼE UI ʼI TE TOHI-TAPU ʼO UHIGA MO TE PAPITEMA?
6, 7. (1) Kotea te fakaʼuhiga ʼo te papitema ʼae neʼe fai e Soane? (2) Ko ai ʼae neʼe makehe tona papitema ia natou fuli ʼae pea kotea tona tupuʼaga?
6 Ko te ʼuluaki tagata ʼae ʼe ui ʼi te Tohi-Tapu neʼe ina papitemaʼi te hahaʼi ko Soane Patita. (Mateo 3:1-6) He koʼe neʼe ʼomai te hahaʼi kia ia ke ina papitemaʼi natou? Neʼe natou fia fakaha tanatou fakahemala ki ʼanatou agahala, koteʼuhi neʼe natou talagataʼa ki te Lao ʼa Moisese. Kae neʼe papitemaʼi e Soane Patita he tahi, neʼe makehe pea mo maʼuhiga ʼaupito tona papitema. Neʼe maʼu e Soane ia te pilivilesio ʼae ke ina papitemaʼi ia Sesu, te ʼAlo haohaoa ʼo te ʼAtua. (Mateo 3:13-17) Neʼe mole he agahala ʼa Sesu, koia neʼe mole ʼaoga ai ke fakahemala. (1 Petelo 2:22) Kae he koʼe koa neʼe papitema ia Sesu? Neʼe ina fakaha ai kua tokalelei ke ina foaki tona maʼuli moʼo fakahoko te finegalo ʼo te ʼAtua.—Hepeleo 10:7.
7 Hili te kamata fakamafola e Sesu ia te logo lelei, neʼe kamata papitemaʼi e ʼana tisipulo te hahaʼi. (Soane 3:22; 4:1, 2) Neʼe fia papitema te hahaʼi koteʼuhi neʼe natou fakahemala ʼi tanatou talagataʼa ki te Lao ʼa Moisese. Kae ’i te ʼosi mate pea mo te fakatuʼuake ʼo Sesu ki te maʼuli, ko natou ʼae neʼe fia liliu ko he ʼu tisipulo ʼa Sesu, neʼe ʼi ai te tahi tupuʼaga ʼo te papitemaʼi ʼo natou.
8. (1) ʼI te fakatuʼuake ʼa Sesu ki te maʼuli, kotea ʼae neʼe ina fakatotonu ki ʼana tisipulo ke natou fai? (2) He koʼe ʼe tonu ke papitema te kau Kilisitiano?
8 ’I te ta’u 33 hili te temi ʼo Sesu, neʼe palalau ia Sesu ki te toko 500 tupu hahaʼi, tagata, mo fafine pea mo fanau ʼi te hili pe ʼo tona fakatuʼuake ki te maʼuli. Neʼe lagi ko te temi ʼaia ʼae neʼe ina ui ai: “Kotou olo ʼo fai ni tisipulo ʼi te hahaʼi ʼo te ʼu fenua fuli pe, ʼo kotou papitemaʼi natou ʼi te huafa ʼo te Tamai mo te ʼAlo pea mo te laumalie maʼoniʼoni, ʼo akoʼi natou ke natou mulimuli ki te ʼu meʼa fuli ʼae neʼe au fakatotonu atu kia koutou.” (Mateo 28:19, 20; 1 Kolonito 15:6) Neʼe fakatotonu e Sesu ki ʼana tisipulo ke natou olo ʼo fai ni tisipulo. Ko ʼae ʼe fia liliu ko hana tisipulo, peʼe ina fia toʼo tana “ ʼakau ʼamo,” ʼe tonu ke papitema. (Mateo 11:29, 30) Kapau ʼe loto e he tahi ke leleiʼia e te ʼAtua tana tauhi, ʼe tonu ke mahino ʼe fakaʼaogaʼi e te ʼAtua ia Sesu moʼo fakahoko Tona finegalo. ʼOsi ʼaia pea ʼe feala ke papitema pea ʼe hoki tali e te ʼAtua. Ka tou lau ia te Tohi-Tapu, ʼe fakamoʼoni ai neʼe maʼuhiga ʼaupito ki te ʼu ʼuluaki tisipulo ʼa Sesu ia te papitema. Neʼe mole natou manatu ke natou fakatuatuai, ke hoki natou papitema ʼi he tagi age temi.—Gaue 2:41; 9:18; 16:14, 15, 32, 33.
ʼAUA NAʼA KOTOU FAKATUATUAI ʼI TE PAPITEMA
9, 10. Kotea te ako ʼe feala ke tou maʼu mai te papitema ʼa te tagata Etiopea pea mo Saulo?
9 Lau ia Gaue 8:35, 36. Neʼe ʼi ai te tagata Etiopea neʼe ina tali te lotu Fakasutea, pea neʼe alu ʼo tauhi ʼi te Fale lotu ʼi Selusalemi. Pea ʼi tana toe liliu ki tona fenua, neʼe felaveʼi mo Filipo. Neʼe fekauʼi e te ʼaselo ʼa Sehova ia Filipo ke alu ʼo fakaha ki te tagata Etiopea “te logo lelei ʼo ʼuhiga mo Sesu.” Kotea ʼae neʼe logoʼi e te tagata Etiopea? Neʼe mahino ai ʼe tonu ke ina tali ia Sesu ko te ʼAliki, pea neʼe ina fia fai te faʼahi ʼae ʼe fakamaʼua e Sehova kia natou fuli ʼae ʼe fia liliu ko he tisipulo ʼa Kilisito. Neʼe mole fakatuatuai, neʼe papitema atu aipe.
10 Tou palalau leva ʼo ʼuhiga mo te tagata Sutea neʼe higoa ko Saulo. Kua tou iloʼi ko te puleʼaga katoa ʼo Iselaele neʼe ko te hahaʼi ʼa te ʼAtua. Pea neʼe liʼaki leva e Sehova te kau Sutea koteʼuhi neʼe natou talagataʼa kia te ia. Ki te manatu ʼa Saulo ʼe kei tali pe e te ʼAtua ia te tauhi ʼae ʼe fai e te kau Sutea, koia neʼe ina fakataga ai te ʼu tisipulo ʼa Sesu. Kae ʼi te tahi ʼaho, neʼe palalau tonu ia Sesu kia Saulo mai te lagi. Neʼe ui e Saulo kua mate ia Sesu, kae neʼe kua fakatuʼuake ia ki te maʼuli. Kotea ʼae neʼe fai e Saulo? Neʼe ina tali fakafiafia ia te tokoni ʼa Ananiasi te tisipulo ʼa Sesu. ʼE ui fenei ʼi te Tohi-Tapu: “Neʼe tuʼu ake leva pea neʼe papitema.” (Gaue 9:17, 18; Kalate 1:14) Ki muli age, ko te tagata ʼaia neʼe iloa leva ko te apositolo ko Paulo. Kotou tokagaʼi, ʼi te temi pe ʼae neʼe mahino ai ia Saulo ʼe fakaʼaogaʼi e te ʼAtua ia Sesu moʼo fakahoko Tona finegalo, neʼe mole fakatuatuai, neʼe papitema atu aipe.—Lau ia Gaue 22:12-16.
ʼE lotofakafetaʼi te kau ako ʼi tanatou mahino ki te moʼoni pea ʼe natou fia papitema
11. (1) Kotea ʼae ʼe ina uga te kau ako ke natou papitema? (2) Kotea ʼae ʼe kotou logoʼi moka papitema he tahi?
11 ʼE toe feia pe ia ʼaho nei, tokolahi ia natou ʼae ʼe natou ako ia te Tohi-Tapu, tupulaga peʼe matuʼa, ʼe natou ʼoʼofa mo falala ki te Tohi-Tapu, ʼo tupu ai tanatou fia foaki ʼonatou maʼuli kia te ia pea mo papitema. Ko te akonaki ʼo te papitema ʼae ʼe fai ʼi te ʼu fakatahi lalahi, ʼe ko he akonaki ʼe maʼuhiga. ʼE fiafia ia te kau Fakamoʼoni ʼa Sehova moka natou sisio ki te kau ako ʼe natou tali ia te moʼoni pea mo papitema. ʼE fiafia ʼaupito ia te ʼu matuʼā moka papitema hanatou fanau. ʼI te taʼu gaue 2017, ko te toko 284 000 tupu hahaʼi neʼe papitema, ʼo natou fakaha ai kua natou foaki ʼonatou maʼuli kia Sehova. (Gaue 13:48) Neʼe natou mahino ai, kapau ʼe fia liliu he tahi ko he tisipulo ʼa Kilisito ʼe maʼua ia ke papitema. Kae kotea ʼae neʼe natou fai ʼi muʼa ʼo tanatou papitema?
12. Kotea ʼae ʼe tonu ke fai e te kau ako ʼi muʼa ʼo tanatou papitema?
12 ʼI mu’a ’o te papitema’i ’o he tahi, ’e tonu mu’a ke ina ako te moʼoni ʼo ʼuhiga mo te ʼAtua, ke ina iloʼi pe kotea te fakatuʼutuʼu ʼa te ʼAtua ʼo ʼuhiga mo te tagata pea mo te kele, pea mo te fakatuʼutuʼu ʼae neʼe fai e te ʼAtua moʼo haofaki ia te malamanei. (1 Timoteo 2:3-6) ʼE tonu ke tuputupu tanatou tui ke malohi, ke feala ai ke natou fakalogo ki te ʼu lao ʼa te ʼAtua pea mo fakagata te ʼu aga ʼae ʼe fehiʼa ki ai te ʼAtua. (Gaue 3:19) ʼE maʼuhiga te faʼahi ʼaia koteʼuhi ʼe mole feala ke tali e te ʼAtua ke foaki age e he tahi tona maʼuli kae ʼe kei hoko atu pe tana fai te ʼu aga ʼae ʼe fehiʼa ki ai. (1 Kolonito 6:9, 10) Kae ʼe mole gata ai. ʼE tonu kia natou ʼae ʼe natou fia foaki ʼonatou maʼuli kia Sehova ke natou kau tuʼumaʼu ki te ʼu fono, mo faifakamafola tuʼumaʼu pea mo fai ni ako Tohi-Tapu. Ko te ʼu gaue ʼaia ʼe fakamaʼua kia natou fuli ʼae ʼe fia liliu ko he ʼu tisipulo ʼa Kilisito. (Gaue 1:8) ʼE tonu muʼa kia ia ʼae ʼe ako, ke ina fai te ʼu meʼa fuli ʼaia pea hoki feala leva ke ina foaki tona maʼuli kia Sehova ʼi te faikole pea mo papitema.
KOTOU FAIGA KE PAPITEMA ʼAKOTOU KAU AKO
13. Ka tou fai te ʼu ako, kotea ʼae ʼe tonu ke tou manatuʼi?
13 Ka tou fai te ’u ako ’o ʼatatou fanau peʼe ko he tahi pe, ʼe lelei ke tou manatuʼi ko natou fuli ʼae ʼe fia liliu ko he ʼu tisipulo moʼoni ʼa Sesu, ʼe tonu ke natou papitema. Koia ʼe mole tou tuʼania anai ʼi te fakamahino age kia natou, ʼi tona temi totonu, te maʼuhiga ʼae ke natou foaki ʼonatou maʼuli kia Sehova pea mo papitema. ʼE tou loto ke tuputupu tuʼumaʼu ʼatatou fanau ʼi te faʼahi fakalaumalie peʼe ko ʼatatou kau ako, ke feala ai hanatou papitema.
14. He koʼe ʼe mole tonu ke tou fakakinauʼi he tahi ke papitema?
14 ’E moʼoni ʼe mole tonu anai ke tou fakakinauʼi he tahi ke papitema. ʼE mole fakamalohiʼi e Sehova he tahi ke tauhi age kia te ia. (1 Soane 4:8) Ka tou fai he ʼu ako ʼe tonu ke tou manatuʼi, ʼe maʼuhiga kia natou ke natou tahi maʼu he ʼu felogoi lelei mo Sehova ʼi te faikole. Pea kapau leva ʼe malave ki ʼonatou loto te ’u moʼoni ʼae neʼe natou ako ʼo ʼuhiga mo te ʼAtua, mo natou fia faifakamalotoloto te ʼu meʼa fuli ʼae ʼe fakamaʼua kia natou ʼae ʼe fia liliu ko he ʼu tisipulo ʼa Kilisito, ʼe natou fia papitema anai.—2 Kolonito 5:14, 15.
15, 16. (1) ʼE fakamaʼua mai koa he taʼu ke hoki papitema ai he tahi? Fakamahino. (2) He koʼe ʼe tonu ke papitemaʼi he tahi ʼi te lotu ʼa te kau Fakamoʼoni ʼa Sehova tatau aipe pe neʼe kua papitema ʼi he tahi lotu?
15 ’E mole fakamaʼua mai he taʼu ke hoki papitema ai he tahi. ʼE tahi alu kehekehe pe te ʼu aluʼaga ʼo te kau ako. ʼE ʼi ai ʼihi ʼe tuputupu vave ʼi te faʼahi fakalaumalie kae ʼihi ʼe tuputupu mamalie. Tokolahi neʼe natou papitema ʼi tanatou kei tupulaga, pea ʼe kei natou nonofo agatonu pe kia Sehova ʼi tanatou kua
lalahi. Ko ʼihi, neʼe kua natou lalahi ʼi te temi ʼae neʼe natou ako ai te moʼoni ʼi te Tohi-Tapu pea mo papitema. Pea ʼe kua ʼi ai pe la ʼihi kua taʼu 100 tupu.16 Neʼe ʼi ai te fafine neʼe ina ako te Tohi-Tapu kae neʼe kua papitema ʼi te ʼu lotu kehekehe. Koia neʼe ina fehuʼi ai kia ia ʼae neʼe ina fai tana ako, pe ʼe kei ʼaoga koa ke toe papitemaʼi ia ia. Neʼe fakaha age e te tuagaʼane he ʼu vaega Tohi-Tapu moʼo tali ki tana fehuʼi. ʼI te mahino leva ʼa te fafine ki te ʼu fakamaʼua ʼae ʼe tuʼu ʼi te Tohi-Tapu, neʼe papitema leva logo la kua teitei taʼu 80. Kotea te ako ʼe tou taʼofi mai te faʼifaʼitaki ʼaeni? ʼE tali pe e Sehova ke tou papitema mo kapau ʼe tou mahino ki te moʼoni ʼo ʼuhiga mo tona finegalo. Koia tatau aipe pe neʼe kua tou papitema ʼi he tahi age lotu, ʼe tonu ke papitemaʼi tatou ʼi te lotu ʼa te kau Fakamoʼoni ʼa Sehova.—Lau ia Gaue 19:3-5.
17. Kotea ʼae ʼe tonu ke fakakaukau ki ai ia ia ʼae ka papitema?
17 Ko te ʼaho ʼae ʼe papitema’i ai he tahi ʼe ko he ʼaho fakafiafia. ʼE ko he faigamalie ʼaia ke ina fakakaukauʼi lelei te fakaʼuhiga ʼo te foaki ʼo tona maʼuli kia Sehova pea mo te papitema. ʼE mole faigafua te fakahoko ’o te ʼu gaue fuli ʼae ʼe fakamaʼua ki he tisipulo moʼoni ʼa Kilisito. Ko te ʼu tisipulo ʼa Sesu ʼe “mole natou maʼuʼuli pe maʼa natou totonu, kae maʼa ia ʼae neʼe mate maʼa natou pea kua fakatuʼuake.”—2 Kolonito 5:15; Mateo 16:24.
18. Kotea la te ʼu fehuʼi ʼae ka tou tali anai ki ai ʼi te alatike ʼae ka hoa mai?
18 Ohage pe ko tatatou vakaʼi ʼi te alatike ʼaeni, ko te tonu ʼae ke tou liliu ko he tisipulo ʼa Sesu ʼe maʼuhiga ʼaupito. Ko te tupuʼaga la ʼaia ʼo te hoha ʼa te faʼe ʼa Malia, ʼae neʼe tou palalau ki ai ʼi te kamata ʼo te alatike ʼaeni. Kapau ko koe ko he tamai peʼe ko he faʼe, ke ke fai te ʼu fehuʼi ʼaeni: ‘Kua tokalelei moʼoni koa taku fanau ki te papitema? Kua mahino feʼauga koa ki te moʼoni ke feala ai hana foaki tona maʼuli ki te ʼAtua? ʼE tonu koa ke alu muʼa ʼo ako ke ina maʼu hona ʼu pepa maʼuhiga pea ke ina maʼu hana gaue pea hoki feala leva ke papitema? Pea ʼe feafeaʼi leva mo kapau ʼe fai e taku fanau he agahala mamafa kae kua papitema?’ ʼE tou tali anai ki te ʼu fehuʼi ʼaia ʼi te alatike ʼae ka hoa mai. ʼE tou vakaʼi anai pe ʼe lava maʼu feafeaʼi e te ʼu matuʼā ia te manatu ʼae ʼe lelei ʼo ʼuhiga mo te papitema.