Fakalogo Ki Tou Akonakiʼi Ke Ke Liliu ʼo Poto
“Nai oku foha, . . . koutou fakalogo ki te akonaki ke koutou liliu o popoto.”—TAAGA LEA 8:32, 33.
1. ʼE tou lava maʼu feafeaʼi ia te poto, pea ʼe tokoni feafeaʼi mai anai?
KO SEHOVA ʼe ko te Matapuna ʼo te poto, pea ʼe ina foaki lahi ki te hahaʼi. ʼE tou lau fenei ia Sakopo 1:5: “Kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua, pea ʼe foaki age anai ki ai, koteʼuhi ʼe foaki lahi e te ʼAtua ki te hahaʼi fuli ʼaki tona loto katoa pea ʼe mole ina fai he valoki.” Pea ʼe tou maʼu ia te poto moka ʼe tou tali totatou akonakiʼi e te ʼAtua. Ka tou fai te faʼahi ʼaia, ʼe puipui ai tatou mai te ʼu aga ʼae ʼe kovi pea ʼe tokoni mai ke tou nonofo ovi kia Sehova. (Taaga Lea 2:10-12) Pea ʼe tou maʼu anai te ʼamanaki taulekaleka ʼae ko te maʼuli heʼe gata.—Suta 21.
2. ʼE feafeaʼi hatatou ako ke tou leleiʼia totatou akonakiʼi e te ʼAtua?
2 ʼI ʼihi temi, ʼe faigataʼa hakita tali tokita akonakiʼi peʼe mole kita leleiʼia, ʼuhi he ʼe tou agahala peʼe ʼuhi ko totatou faʼahiga akoʼi ʼi tatatou kei veliveli. Kae, ka tou sio ki te ʼu fua lelei ʼo totatou akonakiʼi e te ʼAtua ʼi totatou maʼuli, ʼe tou mahino ai ki te lahi ʼo tona ʼofa ʼae ia tatou. ʼE ui fenei ia Taaga Lea 3:11, 12, MN: “Toku foha, ʼaua naʼa ke fakafisi ki tou akonakiʼi e Sehova . . . koteʼuhi ko ia ʼae ʼe ʼofa ai Sehova, ʼe ina fakatonutonuʼi.” ʼE feala hatatou tui papau ʼe loto e Sehova ke tou maʼuli fiafia. (Lau ia Hepeleo 12:5-11.) ʼE iloʼi lelei tatou e te ʼAtua, koia ʼae ʼe ina iloʼi lelei tuʼumaʼu ai pe ʼe feafeaʼi totatou akonakiʼi. ʼI te alatike ʼaeni, ʼe tou vakaʼi anai te ʼu faʼahi ʼaeni ʼe fa: (1) te akonakiʼi ʼo kita totonu, (2) te faʼahiga akonakiʼi e te ʼu matuʼā ʼanatou fanau, (3) totatou akonakiʼi ʼi te kokelekasio, pea (4) te aluʼaga ʼae ʼe kovi age ʼi te mamahi ʼae ʼe tou logoʼi moka akonakiʼi tatou.
HE KOʼE ʼE TOU POPOTO MOKA ʼE TOU AKONAKIʼI IA TATOU TOTONU?
3. ʼE poto feafeaʼi anai he fanau ʼi te akonakiʼi ʼo ia totonu? Tuku mai he faʼifaʼitaki.
3 ʼE tou lolomi tatatou aga mo tatatou faʼahiga manatu mo kapau ʼe tou akonakiʼi ia tatou totonu. Neʼe tonu ke tou ako ke tou akonakiʼi ia tatou totonu he neʼe mole tou tutupu mo te agaaga ʼaia. Tou toʼo he faʼifaʼitaki. Ka akoako e he kiʼi tamasiʼi te aka lelue, ʼi te kamata, ʼe puke e ʼana matuʼā ia te lelue naʼa toka. Kae ʼaki te temi, ʼi te kua fakahaʼuhaʼu leva ke poto ia te kiʼi tamasiʼi, ʼe feala pe ʼi ni kiʼi minuta ke tuku age ʼe ʼana matuʼā ke alu tokotahi. Pea ka iloʼi papau e te ʼu matuʼā kua poto lelei tanā tamasiʼi ʼi te aka lelue, kua alu tokotahi pe leva ia. ʼO toe feia pe, ka kataki fualoa te ʼu matuʼā ʼo ‘akonakiʼi mo akoʼi ʼanatou fanau ʼo mulimuli ki te meʼa ʼae ʼe ui e Sehova,’ ʼe natou tokoni kia natou ke natou popoto ʼi te akonakiʼi ʼo natou totonu.—Efeso 6:4.
4, 5. (1) He koʼe ko te akonakiʼi ʼo kita totonu ʼe ko he faʼahi maʼuhiga ʼo “te ʼulugaaga foʼou”? (2) He koʼe ʼe mole tonu ke tou lotovaivai moka ʼe tou fai he ʼu lakahala?
4 ʼE toe feia pe ki te hahaʼi ʼae ʼe natou ako ke natou iloʼi ia Sehova kae kua natou lalahi. Logo la kua lagi natou akonakiʼi pe ia natou totonu, kae ʼe mole heʼeki natou fotufotuʼa ʼi te faʼahi fakalaumalie. Kae ka natou kamata kofuʼi ia “te ʼulugaaga foʼou,” pea mo faigaʼi ke natou faʼifaʼitakiʼi ia Kilisito, ʼe natou tuputupu anai ʼi te faʼahi fakalaumalie. (Efeso 4:23, 24) ʼAki tatatou akonakiʼi ia tatou totonu, ʼe tou ako ai “ke tou liakī te aga heʼe lotu, mo te ʼu holi ʼo te malama, kaʼe ke tou maʼuʼuli fakapotopoto, mo faitotonu, mo pipiki ki te ʼAtua ʼi te lotolotoiga ʼo te tuʼu ʼo te ʼu faʼahiga meʼa ʼaeni.”—Tito 2:12.
5 Kae, ʼe tou agahala fuli. (Ekelesiasi 7:20) Koia kapau ʼe tou fai he lakahala, ko tona fakaʼuhiga koa ʼe mole feʼauga tatatou akonakiʼi ia tatou totonu peʼe mole pe la tou fai tatou? Kailoa ia. ʼE ui fenei ia Taaga Lea 24:16: “E higa tua fitu te tagata agatonu, pea e toe tuu ake ia ki oluga.” Kotea anai ka tokoni mai ke tou “toe tuu ake”? Ko te laumalie ʼo te ʼAtua kae ʼe mole ko totatou malohi. (Lau ia Filipe 4:13.) Pea ʼe kau ki te ʼu agaaga ʼo te fua ʼo te laumalie ia te lotololomi, ʼae ʼe hage pe ko takita akonakiʼi ia kita totonu.
6. ʼE feala ke lelei feafeaʼi tatatou ako te Folafola ʼa te ʼAtua? (Vakaʼi te ʼuluaki pāki.)
6 Ko te faikole, mo te ako ʼo te Tohi-Tapu, pea mo te metitasio ʼe tokoni mai anai ke tou popoto ʼi te akonakiʼi ʼo tatou totonu. Kae ʼe feafeaʼi moka ʼe faigataʼa tau ako te Tohi-Tapu peʼe mole ke fia ako te Tohi-Tapu? Tuku tau lotovaivai. Kae ʼe tonu ke ke manatuʼi ʼe tokoni atu anai ia Sehova moka ʼe ke tuku ke tokoni atu. ʼE feala ke tokoni atu ke ke “holi” ki tana Folafola. (1 Petelo 2:2) Kole kia Sehova ke tokoni atu ki tau akonakiʼi ia koe totonu ke feala ke maʼu hou temi ki tau ako te Tohi-Tapu. ʼI te kamata ʼe feala pe ke lauʼi minuta tau ako. ʼAki te temi, ʼe feala pe leva ke faigafua pea mo ke maʼu ai te fiafia. ʼE ke leleiʼia anai te ʼu kiʼi lakaga ʼae ʼe ke metitasio ai ki te ʼu manatu maʼuhiga ʼa Sehova.—1 Timoteo 4:15.
7. ʼE tokoni feafeaʼi mai te akonakiʼi ʼo kita totonu ke kita fakahoko ʼakita fakatuʼutuʼu ʼi takita tauhi ʼae kia Sehova?
7 ʼE tokoni mai te akonakiʼi ʼo kita totonu ke kita fakahoko ʼakita fakatuʼutuʼu ʼi takita tauhi ʼae kia Sehova. Ohage la, neʼe logoʼi e he tamai neʼe mole kei faʼa fai, koia ʼae neʼe ina fai ai tana fakatuʼutuʼu ke liliu ʼo pionie katoa. Neʼe fua lelei feafeaʼi kia ia tana akonakiʼi ia ia totonu? Neʼe ina lau te ʼu alatike ʼi ʼatatou nusipepa ʼo ʼuhiga mo te pionie pea neʼe faikole ki te faʼahi ʼaia. Neʼe ina fakamalohiʼi ai ʼana felogoi mo Sehova. Pea kapau neʼe fealagia, neʼe pionie vaeluaʼi temi. Neʼe mole ina fakagafua ki he meʼa, ke ina taʼofi tana fakatuʼutuʼu. ʼI he kiʼi temi ki muli age, neʼe pionie katoa ai leva.
AKOʼI TAU FANAU ʼO MULIMULI KI TE MEʼA ʼAE ʼE UI E SEHOVA
8-10. Kotea ʼe tokoni ki te ʼu matuʼā ʼi tanatou akoʼi ʼanatou fanau ke natou tauhi kia Sehova? Tuku mai he faʼifaʼitaki.
8 Neʼe foaki e Sehova te maʼua ʼae ki te ʼu matuʼā ke natou “akonakiʼi pea mo akoʼi [ʼanatou fanau] ʼo mulimuli ki te meʼa ʼae ʼe ui e Sehova.” (Efeso 6:4) Kae ʼe faigataʼa ʼaupito te fai ʼo te faʼahi ʼaia ʼi te malama ʼaeni. (2 Timoteo 3:1-5) ʼE mole tupu mai he fanau kua ina iloʼi te meʼa ʼae ʼe lelei peʼe ko te meʼa ʼae ʼe kovi, pea heʼeki akoako tona leʼo ʼo loto. Koia ʼae ʼe tonu ai ke akonakiʼi peʼe akoʼi tona leʼo ʼo loto. (Loma 2:14, 15) ʼE fakamahino e te tagata sivi Tohi-Tapu, ko te kupu Fakakeleka ʼae neʼe fakaliliu ʼaki te kupu “akonakiʼi” ʼe feala ke toe fakaʼuhiga ki te “tuputupu ʼa he kiʼi fanau,” peʼe akoʼi ke liliu ko he tahi ʼe fotufotuʼa.
9 Moka akonakiʼi te ʼu fanau e ʼanatou matuʼā ʼaki te ʼofa, ʼe natou maʼuli fimalie ai. Pea ʼe natou ako ai ʼe fakatuʼakoi te loto faʼitaliha pea ko te ʼu faʼahi fuli ʼe natou fai ʼe ʼi ai ʼona fua lelei peʼe kovi. Koia ʼae ʼe maʼuhiga ai ke falala te ʼu matuʼā Kilisitiano ki te poto ʼo Sehova moʼo akoʼi ʼanatou fanau. ʼE kehekehe te ʼu faʼahiga manatu ʼa te hahaʼi ʼo ʼuhiga mo te akoʼi ʼo te ʼu fanau ʼo tahi mulimuli pe ki tana agaʼi fenua, pea ʼe fetogi tuʼumaʼu pe te ʼu manatu ʼaia. Kae, ko te ʼu matuʼā ʼae ʼe natou fakalogo ki te ʼAtua, ʼe natou iloʼi pe ʼe kotea ʼe tonu ke natou fai pea ʼe mole natou falala ki te poto mo te ʼu manatu fakatagata.
10 ʼE feala ke tou toʼo he ako mai te faʼifaʼitaki ʼo Noe. ʼI te fakatotonu age ʼae e Sehova ke ina faʼu he aleka, neʼe mole iloʼi e Noe pe ʼe ina faʼu feafeaʼi anai. Neʼe tonu ke falala kia Sehova, pea ʼe tou lau ʼi te Tohi-Tapu “nee ina fai leva te u mea fuli ae nee fakatotonu e te Atua kia ia.” (Senesi 6:22) Kotea ʼona fua? Neʼe haofaki e te aleka te maʼuli ʼo Noe mo tona famili. Pea neʼe fakahoko lelei e Noe ʼona maʼua fakafamili ʼi tona ʼuhiga tamai. Kotea tona tupuʼaga? Koteʼuhi neʼe falala ki te poto ʼo te ʼAtua. Neʼe lelei te akoʼi e Noe ʼana fanau pea neʼe ko he faʼifaʼitaki kia natou, tafito la neʼe mole faigafua ʼi te temi ʼae neʼe lahi ai te agakovi ʼi muʼa ʼo te to ʼo te Tulivio.—Senesi 6:5.
11. He koʼe ʼe tonu ki te ʼu matuʼā ke natou faiga malohi ʼo akoʼi ʼanatou fanau?
11 Kapau ko koe ko he tamai peʼe ko he faʼe, ʼe feafeaʼi tau ‘fai ia meʼa fuli’ neʼe fakatotonu atu e te ʼAtua? Fakalogo kia Sehova. Tuku ke tokoni atu moka ʼe ke akoʼi ʼau fanau. Fakaʼaogaʼi te ʼu tokoni ʼae ʼo tana Folafola pea mo tana kautahi. Ki muli age, ʼe fakamalo atu anai ʼau fanau ki te faʼahi ʼae neʼe ke fai. Neʼe tohi fenei e te tehina: “ ʼE au lotofakafetaʼi ki toku faʼahiga akoʼi e ʼaku matuʼā. Neʼe nā faiga malohi ke malave ki toku loto.” Neʼe ina ui neʼe tokoni age ʼana matuʼā ke fakaovi kia Sehova. ʼE moʼoni, kae logo la te faiga ʼa ʼihi matuʼā ke malave ki te loto ʼo ʼanatou fanau, ʼe feala pe ia ki ʼihi fanau ke natou mavae ia Sehova. Kae ko te ʼu matuʼā ʼae neʼe faiga, ʼe feala ke fimalie ʼonatou leʼo ʼo loto pea mo fakaʼamu ʼe toe liliu mai anai ʼanatou fanau kia Sehova.
12, 13. (1) Ka fakamavae he fanau, ʼe fakaha feafeaʼi e te ʼu matuʼā ʼe natou fakalogo ki te ʼAtua? (2) ʼE fua lelei feafeaʼi ki he famili moka fakalogo te ʼu matuʼā kia Sehova?
12 Ko te ʼahiʼahi ʼae ʼe faigataʼa ai te fakalogo ʼa ʼihi matuʼā, ko te fakamavae ʼo he fanau ʼi te moʼoni. ʼE ui fenei e te tuagaʼane neʼe fakamavae tana taʼahine pea neʼe toe mavae ʼi tonatou ʼapi: “Neʼe au kumi he ʼu kiʼi takuʼaki ʼi ʼatatou tohi ke feala ai haku fakatahi mo taku taʼahine pea mo toku kiʼi mokopuna.” Kae neʼe tokoni lelei age tona ʼohoana ke mahino, ʼe mole kei nā puleʼi te maʼuli ʼo tanā taʼahine pea ʼe tonu ke nā nonofo agatonu kia Sehova.
13 ʼI he ʼu kiʼi taʼu ki muli age, neʼe toe fakahu tanā taʼahine ki te kokelekasio. ʼE ui fenei e tana faʼe: “ ʼI te temi nei kua pauʼi peʼe faitohi mai ʼi te telefoni teitei pe ʼi te ʼaho fuli. Pea ʼe fakaʼapaʼapa lahi mai kia maua taumatuʼa ʼi tana iloʼi ʼae neʼe ma fakalogo ki te ʼAtua. Pea ʼe kua matou felogoi lelei.” Koia kapau neʼe fakamavae hau fanau, ʼe ke ‘falala anai koa kia Sehova ʼi tou loto katoa’? ʼE ke fakaha anai koa ʼe mole ke “falala ki tou poto”? (Taaga Lea 3:5, 6) Pea moka akonakiʼi tatou e Sehova, manatuʼi ʼe ina fakaha mai te poto mo tona ʼofa ʼae kia tatou. ʼAua naʼa ke galoʼi neʼe foaki mai e te ʼAtua tona ʼAlo maʼa te tagata fuape, pea ʼe toe kau ki ai tau fanau. ʼE loto e te ʼAtua ke tou maʼu fuli te maʼuli heʼe gata. (Lau ia 2 Petelo 3:9.) Koia ʼu matuʼā, kotou hoko atu takotou falala ki te faʼahiga akonakiʼi mo te takitaki ʼa Sehova ʼae ʼe lelei, tatau aipe pe ʼe faigataʼa te fakalogo. Kotou fakalogo ki tokotou akonakiʼi e te ʼAtua, pea ʼaua naʼa kotou fakafeagai ki ai.
ʼI TE LOTO KOKELEKASIO
14. ʼE fua lelei feafeaʼi kia tatou te ako ʼae ʼe foaki mai e Sehova ʼaki te “tagata tauhi ʼapi agatonu”?
14 Neʼe fakapapau mai e Sehova ʼe tokaga anai, mo puipui, pea mo akoʼi te kokelekasio Fakakilisitiano. ʼE ina fai te faʼahi ʼaia ʼi he ʼu aluʼaga kehekehe. Ohage la, neʼe ina fakanofo tona ʼAlo ke tokaga ki te kokelekasio, pea neʼe toe fakanofo e Sesu te “tagata tauhi ʼapi agatonu” ke ina foaki te meʼa kai fakalaumalie ʼae ʼe tokoni mai ke tou nofo agatonu ai. (Luka 12:42) ʼE foaki mai e te “tagata tauhi ʼapi” ʼaia he ʼu ako maʼuhiga, peʼe ina akonakiʼi tatou. ʼE lagi ke fakakaukau ki he akonaki peʼe ki he alatike ʼi ʼatatou nusipepa neʼe tokoni atu ai ke fetogi tau faʼahiga manatu peʼe ko tau aga. ʼE feala ke ke fakafiafia ʼi tau fai te ʼu fetogi ʼaia, koteʼuhi neʼe ke fakafealagia kia Sehova ke ina akonakiʼi koe.—Taaga Lea 2:1-5.
15, 16. (1) ʼE fua lelei feafeaʼi kia tatou te gaue ʼa te kau tagata ʼafeā? (2) Kotea ʼe feala ke tou fai ke fiafia ai te kau tagata ʼafeā ʼi tanatou gaue?
15 Neʼe toe fakatuʼutuʼu e Kilisito he kau tagata ʼafeā ke natou ʼoʼofa mo tokaga ki te kokelekasio. ʼE fakahigoaʼi ʼi te Tohi-Tapu te ʼu tehina ʼaia ko “he ʼu tagata ohage ko ni meʼa ʼofa.” (Efeso 4:8, 11-13) ʼE fua lelei feafeaʼi kia tatou te gaue ʼa te kau tagata ʼafeā? ʼE feala ke tou faʼifaʼitakiʼi tanatou tui mo ʼanatou faʼifaʼitaki, pea ʼe feala ke tou mulimuli ki te ʼu tokoni Fakatohi-tapu ʼae ʼe natou foaki mai. (Lau ia Hepeleo 13:7, 17.) ʼE ʼoʼofa te kau tagata ʼafeā ia tatou pea ʼe natou loto ke tou fakaovi ki te ʼAtua. Moka natou fakatokagaʼi ʼe tou to fono peʼe mole kei tou faʼa fai, ʼe natou foimo faiga atu aipe ke natou tokoni mai. ʼE natou fagono mai anai pea ʼe natou foaki mai he fakalotomalohi ʼaki te ʼofa pea mo he ʼu tokoni fakapotopoto mai te Tohi-Tapu. ʼAki te ʼu tokoni ʼaia, ʼe ke sio koa ki te ʼofa ʼo Sehova kia koe?
16 Manatuʼi e koe, ko te foaki ʼo he tokoni e te kau tagata ʼafeā ʼe mole faigafua. ʼI tau manatu, kotea neʼe logoʼi e Natane ʼi te temi ʼae neʼe tonu ai ke palalau ki te Hau ko Tavite ʼi tana fia fufu tana agahala mamafa? (2 Samuele 12:1-14) Kotea neʼe logoʼi e te apositolo ko Paulo ʼi te temi ʼae neʼe ina fakatonutonuʼi ai ia Petelo, ʼae ʼe kau ki te kau apositolo ʼe 12, ʼi tana gaohi leleiʼi age te kau Kilisitiano Sutea ia natou ʼae ʼe mole ko he kau Sutea? Neʼe tonu ke lotomalohi ia Paulo ʼi tana fai te faʼahi ʼaia. (Kalate 2:11-14) Koia kotea ʼe tonu ke ke fai ke faigafua ai te foaki atu ʼo he tokoni e te kau tagata ʼafeā? Ke ke agavaivai, lotofakafetaʼi, mo ke agalelei. Fakatokagaʼi te ʼofa ʼo te ʼAtua ʼi te ʼu tokoni ʼaia. ʼE fua lelei atu anai, pea ʼe toe fiafia ai anai te kau tagata ʼafeā ʼi te fakahoko ʼo tanatou gaue.
17. Neʼe tokoni feafeaʼi te kau tagata ʼafeā ki he tuagaʼane?
17 ʼE ui e te tuagaʼane neʼe faigataʼa tana ʼofa kia Sehova ʼuhi ʼae ko te ʼu meʼa neʼe hoko kia ia ʼi muʼa atu, pea neʼe lotomamahi ʼaupito ai. ʼE ina ui fenei: “Neʼe au iloʼi neʼe tonu ke au palalau mo te kau tagata ʼafeā. Neʼe mole natou valokiʼi au peʼe natou fatufatuʼi au, kae neʼe natou fakalotomalohiʼi mo fakamalohiʼi au. ʼI te ʼu ʼosi fono fuli, tatau aipe pe ʼe natou
maʼumaʼua, kae ʼe haʼu aipe he tahi ia natou ʼo fehuʼi mai pe ʼe au lelei pe. Pea ʼuhi ko te ʼu meʼa neʼe hoko kia au ʼi muʼa atu, neʼe faigataʼa ai taku logoʼi ifo ʼe au tuha mo te ʼofa ʼo te ʼAtua. Kae neʼe fakaʼaogaʼi liuliuga e Sehova te kokelekasio mo te kau tagata ʼafeā ke ina fakaha mai ʼe ʼofa ia au. ʼE au faikole ai ke mole toe mamaʼo ia au ʼi he temi.”KOTEA ʼAE ʼE KOVI AGE ʼI TE LOTOMAMAHI ʼAE MOKA AKONAKIʼI KITA?
18, 19. Kotea ʼae ʼe kovi age ʼi te lotomamahi ʼae moka akonakiʼi kita? Tuku mai he faʼifaʼitaki.
18 ʼE feala ke kita lotomamahi moka akonakiʼi kita, kae ʼe toe ʼasili kovi age moka ʼe mole kita tali ke akonakiʼi kita e te ʼAtua. (Hepeleo 12:11) ʼE feala ke tou toʼo he ʼu ako mai te ʼu faʼifaʼitaki kovi ʼo Kaino pea mo te Hau ko Setesiasi. ʼI te sio ʼae ʼa te ʼAtua neʼe fehiʼa ia Kaino ki tona tehina pea neʼe ina fia matehi, neʼe ina fakatokaga fenei age ki ai: “He koʼe koa ʼe hake te ita ia koe pea he koʼe ʼe ke mata mamahi? Kapau ʼe ke fai te meʼa ʼae ʼe lelei, ʼe mole hoko anai koa he hikihiki? Kae kapau ʼe mole ke fai te meʼa ʼae ʼe lelei, ʼe nono te agahala ʼi te huʼaga, pea ʼe haga atu tona holi kia koe; pea ko koe, ʼe ke pule anai koa ki ai?” (Senesi 4:6, 7, MN) Neʼe mole tali e Kaino ke akonakiʼi e te ʼAtua, ʼo ina matehi ai tona tehina, pea neʼe lotomamahi ai lolotoga tona maʼuli katoa. (Senesi 4:11, 12) ʼE mahino ia kapau neʼe fakalogo ia Kaino ki te ʼAtua, neʼe mole feala ia ke lotomamahi feia.
19 Ko Setesiasi neʼe mole ko he hau lototoʼa pea neʼe agakovi. ʼI te temi ʼae neʼe ʼafio hau ai, neʼe ko he ʼu ʼaho fakamataku maʼa te hahaʼi ʼo Selusalemi. Neʼe fakatokaga liuliuga e te polofeta ko Selemia ia Setesiasi ke ina liʼaki tana aga ʼae ʼe kovi. Kae neʼe liʼaki e te hau tona akonakiʼi e Sehova, pea ko ʼona nunuʼa neʼe kovi age. (Selemia 52:8-11) Koia ʼe mole loto e Sehova ke tou hoʼi mamahi noa feia pe.—Lau ia Esaia 48:17, 18.
20. Kotea anai ka hoko kia natou ʼae ʼe natou tali pea mo natou ʼae ʼe natou liʼaki tonatou akonakiʼi e te ʼAtua?
20 Ia ʼaho nei, tokolahi ʼi te malama ʼe natou vaʼi te faʼahiga akonakiʼi ʼa te ʼAtua pea mo natou meʼa noaʼi. Kae ko natou fuli ʼae ʼe mole natou tali tonatou akonakiʼi e te ʼAtua, kua tau ovi mai pe tonatou maʼuli mamahi. (Taaga Lea 1:24-31) Koia tou “fakalogo ki te akonaki ke [tou] liliu o popoto.” Pea ohage pe ko tona ui ia Taaga Lea 4:13, MN, “puke te akonaki; ʼaua naʼa ke tuku age. Taupau maʼu, he ʼe ko tou maʼuli.”