1-2. Kotea te ʼu faigataʼa ia ʼe feala ke tau mo te ʼu kaugana ʼa Sehova?

 KA TOU tau mo ni aluʼaga faigataʼa ʼaupito ʼe feala ke fetogi fakafokifa ai totatou maʼuli. Ohage la neʼe fakaha age e te toketa ki te tehina ko Luis a ʼe kau ʼi te kosea pea ʼe kei toe pe ni taʼu pea mate. Ko Monika mo tona ʼohoana neʼe nā maʼumaʼua ʼi te ʼu gaue fakalaumalie. Kae ʼi te tahi ʼaho neʼe iloʼi e Monika te agahala fakafufu ʼo tona ʼohoana ʼae ko te tagata ʼafea. Pea ko te tuagaʼane selipatea ko Olivia neʼe maua ke mavae ʼi tona ʼapi ʼuhi ko he afā malohi. Kae ʼi tana toe liliu atu neʼe kua maumau ʼosi tona ʼapi. Neʼe fetogi fakafokifa ai te maʼuli ʼo te tehina mo te ʼu tuagaʼane ʼaia. Neʼe kua ke tau koa mo he aluʼaga faigataʼa ʼo fetogi ai tou maʼuli?

² ʼE tou tau fuli mo te ʼu faigataʼaʼia pea mo te ʼu mahaki. Pea tahi ʼe fakafeagai mo fakatagaʼi tatou ʼe te hahaʼi ʼae ʼe natou fehihiʼa ki te kau fakamoʼoni ʼa Sehova. ʼE mole taʼofi ʼe Sehova te ʼu faigataʼa ʼaia kae ʼe ina fakapapau ʼe tokoni mai anai. (Esa. 41:10) Pea ʼaki tana tokoni ʼe tou taupau te fiafia, mo fai ni tonu ʼe lelei pea mo nonofo agatonu maʼia te ʼu faigataʼa ʼaupito. ʼE tou vakaʼi anai ʼi te alatike ʼaeni ia faʼahiga tokoni ʼe fa ʼe foaki ʼe Sehova ʼi te ʼu temi faigataʼa. Pea kotea ʼae ʼe tonu ke tou fai ke tou maʼu ai tana tokoni.

 ʼE TAUPAU ANAI KOE E SEHOVA

3. Ka tou tau mo ni aluʼaga faigataʼa kotea ʼae ʼe mole kei tou lava fai?

³ Te fihifihia. Ka tou tau mo he aluʼaga faigataʼa ʼe mole kei lelei te fakakaukau pea mo fai ni tonu. Kotea tona tupuʼaga? ʼUhi ko te lahi ʼo te lotomamahi peʼe ko te hoha tuʼumaʼu ʼe hage kua fakapoʼuli takita fakakaukau pea ʼe mole kei kita iloʼi he meʼa ke fai. Tou vakaʼi peʼe kotea ʼae neʼe logoʼi ʼe te ʼu tuagaʼane ʼae neʼe kua tou ʼosi palalau ki ai ʼi tanatou tau mo te ʼu fihifihia. ʼE fakamatala fenei ʼe Olivia: “ ʼI taku sio ki te kua maumau fuli ʼo toku ʼapi ʼi te afā neʼe au lotomamahi ʼosi pea neʼe mole kei au iloʼi pe kotea ʼae ʼe tonu ke au fai.” ʼE ui e Monika ʼo ʼuhiga mo te agahala fakafufu ʼo tona ʼohoana: “Neʼe au lotovaivai ʼosi pea mo lotomamahi ʼaupito. Maʼia mo ʼaku gaue ʼae ʼi te ʼaho fuli neʼe mole kei feala kau fai.” Neʼe mole au ʼamanaki ʼe hoko anai he aluʼaga feia kia au. Ka tou lotomamahi kotea te tokoni ʼae ʼe fakapapauʼi mai e Sehova?

4. ʼO mulimuli kia Filipe 4:6, 7 kotea ʼae neʼe fakapapauʼi mai e Sehova?

⁴ ʼE tokoni feafeaʼi mai anai ia Sehova? ʼE ina fakapapau ʼe ina foaki mai “te tokalelei ʼo te ʼAtua” ʼae ʼe ui ʼi te Tohi-Tapu. (Lau ia Filipe 4:6, 7.) ʼE fakaʼuhiga te kupu ʼaia ki te tokalelei ʼae ʼe tou logoʼi moka tou felogoi lelei mo Sehova. Ko te tokalelei ʼaia “ ʼe maʼoluga age ʼi te ʼu ʼatamai fuli,” pea e taulekaleka age ʼi te ʼu meʼa fuli ʼae ʼe tou fakakaukauʼi. Neʼe ke logoʼi koa te tokalelei ʼi tau ʼosi faikole fakamalotoloto ʼae kia Sehova? Kote tokalelei ʼaia ʼo te ʼAtua.

5. ʼE taupau feafeaʼi ʼe te tokalelei ʼo te ʼAtua totatou loto pea mo totatou fealagia fakakaukau?

⁵ ʼE ui ʼi te vaega pe ʼaia ko te tokalelei ʼo te ʼAtua ʼe ina taupau totatou loto mo totatou fealagia fakakaukau. ʼI te Fakakeleka ko te kupu “taupau” ʼe fakaʼuhiga ki he kau solia ʼe natou puipui he kolo mai te ʼu tuʼutamaki. Pea ʼe momoe fimalie te hahaʼi ʼo te kolo ʼi tanatou iloʼi ʼae ʼe taupau natou ʼe te kau solia. ʼO toe feia pe ka taupau ʼe te tokalelei ʼo te ʼAtua totatou loto mo totatou fealagia fakakaukau ʼe tou logoʼi ai te tokalelei he tou iloʼi ʼe puipui tatou (Pes. 4:8). Ohage pe ko Ana maʼia peʼe mole fetogi vave totatou aluʼaga kae ʼe tou logoʼi pe he tokalelei. (1 Sam. 1:16-18) Pea ka tou fimalie ʼi te agamahani ʼe tokalelei tatatou fakakaukau pea ʼe faigafua ai te fai ʼo he tonu.

6. Ke tou maʼu te tokalelei ʼo te ʼAtua kotea ʼae ʼe tonu ke tou fai? (Vakaʼi te pāki.)

⁶ Kotea ʼae ʼe tonu ke tou fai? Ka ke  tuʼania kole kia Sehova ke ina puipui koe. ʼO feafeaʼi? Faikole kia Sehova ʼo kaku ki tau logoʼi tou tokalelei. (Luka 11:9; 1 Tes. 5:17) ʼE fakamahino e Luis ʼae kua tou ʼosi palalau ki ai peʼe kotea ʼae neʼe ina fai mo tona ʼohoana ko Ana ʼi tanā iloʼi ʼae neʼe kei toe pe ni kiʼi mahina pea mate. ʼE ina ui fenei: “ ʼI te taʼi aluʼaga ʼaia ʼe faigataʼa ʼosi te fai ʼo ni tonu ʼo ʼuhiga mo te ʼu faitoʼo peʼe ko he tahi ʼu aluʼaga. Kae neʼe mā maʼu te tokalelei ʼuhi ko tamā faikole.” ʼE fakamahino ʼe Luis mo Ana neʼe nā faikole fakamalotoloto tuʼumaʼu kia Sehova ke ina foaki age te tokalelei ʼo te fealagia fakakaukau, mo te loto pea mo te poto ke feala ai ke nā fai ni tonu ʼe lelei. Neʼe nā logoʼi moʼoni te tokoni ʼa Sehova. Ka ke tau mo he aluʼaga faigataʼa kataki ʼo faikole he ʼe ke logoʼi ai te puipui ʼo tou loto mo tou fealagia fakakaukau ʼe te tokalelei ʼo Sehova.​—Loma 12:12.

ʼE FOAKI ATU ANAI E SEHOVA TE FIMALIE

7. Kotea ʼae ʼe feala ke tou logoʼi moka tou tau mo he fihifihia?

⁷ Te fihifihia. Ka tou tau mo he faigataʼa ia ʼe mole kei tokalelei te loto, mo te ʼu manatu, pea mo te ʼu gaue ʼae ʼe tou fai mahani. Ohage pe ko he vaka ʼe alu ʼi he tai ʼe hou, ʼe feala ke mole kei tou iloʼi peʼe kotea ʼae ka fai ʼi te lahi ʼo tatatou tuʼania. Neʼe ui e Ana neʼe lahi te ʼu meʼa ʼae neʼe ina logoʼi ʼi te ʼosi mate ʼa Luis. E ina ui fenei: “ ʼI ʼihi temi neʼe au lotovaivai ʼosi pea neʼe mole kei au lava fai haku gaue. Pea neʼe au tau ita ʼi tana kua puli.” ʼI ʼihi temi neʼe logoʼi ʼe Ana tana nofo tokotahi pea neʼe mole fiafia ʼi tana fai te ʼu tonu ʼae neʼe fai e Luis ʼi tana kei maʼuli. ʼI ʼihi ʼaho neʼe hage kia ia ʼe tōlotōa ʼi he afā lahi. ʼE tokoni feafeaʼi mai ia Sehova moka lahi fau tatatou hoha?

8. Kotea ʼae ʼe fakapapauʼi mai e Sehova ia Esaia 33:6?

⁸ ʼE tokoni feafeaʼi mai anai ia Sehova? ʼE ina foaki te fimalie. (Lau ia Esaia 33:6.) Ka afāsia he vaka ʼi te tai ʼe fakatupu tuʼutamaki tana fefalele ʼaki. Ke mole toe hoko te faʼahi ʼaia ʼe lahi te ʼu vaka kua fakapipiki he ʼu ʼama ki te ʼu fahaʼi takitahi ʼo te sinoʼi vaka. ʼAki te puleʼaki ʼaia ʼe lelei age pea mo fimalie te fefolauʼaki. Pea ke lelei te puleʼaki ʼaia ʼe tonu ke hoko atu te alu ki muʼa ʼo te vaka. ʼO toe feia pe kapau ʼe tou haga tauhi agatonu kia Sehova logo la te ʼu fihifihia pea ʼe ina foaki mai anai te fimalie.

9. ʼE tokoni feafeaʼi atu te ʼu meʼa gaue moʼo fai te ʼu fekumi ke ke taupau te fimalie ? (Vakaʼi te pāki.)

⁹ Kotea ʼae ʼe tonu ke tou fai? Kapau ʼe  ke logoʼi ʼe lahi fau tau hoha faiga malohi ke ke taupau tau aga mahani fakalaumalie. ʼE lagi mole kei ke gaue ohage ko tau fai mahani kae ke ke manatuʼi ʼe loto mahino ia Sehova. (Luka 21:1-4) ʼI tau ʼu agamahani fakalaumalie ʼaua naʼa ke meʼa noaʼi tau ako tokotahi pea mo tau metitasio. Koia ʼe foaki atu e Sehova he ʼu alatike mo he ʼu ʼata viteo moʼo tokoni atu ke feala tau taupau te tokalelei. Ke ke maʼu te meʼa ʼae ʼe ʼaoga atu ʼe feala ke ke fakaʼaogaʼi te ʼu meʼa gaue moʼo fai ni fekumi ʼi tau lea. Ohage la ko te JW Library^® peʼe ko te Kumi Aga Tohi ʼa Te Kau Fakamoʼoni ʼa Sehova. Pea ko te fahaʼi ʼaia neʼe fai e Monika ʼae neʼe kua tou ʼosi palalau ki ai. Ka ina logoʼi te lotohoha ʼe ina fakaʼaogaʼi te ʼu meʼa gaue ʼaia ke ina maʼu ai he ʼu tokoni. Ohage la neʼe ina kumi te ʼu kupu “ita,” “aga fakakaka” peʼe “agatonu.” Pea neʼe ina lau te ʼu alatike ʼo kaku ki tana logoʼi te fimalie. ʼE ina fakamatala fenei: “Neʼe au hoha ʼosi ʼi taku kamata fai taku ʼu fekumi. Kae ʼi taku lolotoga lautohi neʼe hage neʼe fakapelepeleʼi au e Sehova. ʼI taku lau tohi, neʼe au tokagaʼi neʼe mahino ia Sehova ki te ʼu meʼa fuli ʼae neʼe au logoʼi. Pea neʼe nofo mo au.” Koia ʼe feala ke tokoni atu ia Sehova ke ke toe maʼu te fimalie.​—Pes. 119:143, 144

ʼE TOKONI ATU IA SEHOVA

10. Kotea ʼae ʼe feala ke tou logoʼi hili he aluʼaga fakamataku?

¹⁰ Te fihifihia. Hili he aluʼaga fakamataku ʼe feala pe ʼi ʼihi ʼaho ke tou gaʼegaʼe ʼi te faʼahi fakasino pea mo te fakakaukau. ʼE tou hage pe ko he tagata fai gaoʼi ʼi te aga mahani ʼe lele gaholo. Kae neʼe haʼele ketu leva heʼe neʼe lavea. Koia ko te ʼu meʼa ʼaia neʼe faigafua tona fai kua faigataʼa leva kia tatou ʼi te temi nei. Peʼe mole kei tou fia fai te ʼu meʼa ʼae neʼe tou fiafia ai ʼi muʼa atu. Ohage ko Elia ʼe hage kia tatou ʼe faigataʼa tatatou tutuʼu ake ʼi te uhu. Kei tou fia momoe pe tatou. (1 Hau 19:5-7) Ka tou gaʼegaʼe kotea te tokoni ʼe fakapapauʼi mai e Sehova ʼe ina foaki mai anai?

11. Kotea te tahi faʼahiga tokoni ʼe foaki mai e Sehova? (Pesalemo 94:18)

¹¹ ʼE tokoni feafeaʼi mai anai ia Sehova? ʼE ina fakapapauʼi ʼe tokoni mai. (Lau ia Pesalemo 94:18.) Ohage pe ka lavea he tagata fai gaoʼi ke feala tana fealuʼaki, ʼe tonu ke tapiki ki he meʼa peʼe ki he tahi. ʼE toe feia pe ke feala ke ʼaoga mai he tokoni ke tou faʼafai ʼi tatatou tauhi ʼae kia  Sehova. Kapau koia ʼe ui mai ʼe Sehova “Ko au, ia Sehova tou ʼAtua, ʼe au toʼo tou nima mataʼu, Ko au ʼae ʼe au ui atu: ‘ ʼAua naʼa ke mataku. ʼE au tokoni atu anai.’ ” (Isa. 41:13) Neʼe hoko te faʼahi ʼaia ki te hau ko Tavite. ʼI te lahi ʼo ʼona fihifihia peʼe ko tona tauʼi ʼe ʼona fili neʼe ina ui kia Sehova “ ʼE lagolago tou nima mataʼu kia au.” (Pes. 18:35) Kae ʼe tokoni feafeaʼi mai ia Sehova kia tatou?

12. Ka tou lotovaivai ko ai ʼae ʼe fakaʼaogaʼi e Sehova ke tokoni mai kia tatou?

¹² ʼE fakaʼaogaʼi tuʼumaʼu e Sehova ʼihi hahaʼi moʼo tokoni kia tatou. Ohage la, ʼi te lotovaivai ʼa Tavite neʼe alu ia Sonatane ʼo fakalotomalohiʼi ia ia. (1 Sam. 23:16, 17) ʼO toe feia pe neʼe fakaʼaogaʼi e Sehova ia Eliseo ke alu ʼo tokoni kia Elia. (1 Hau 19:16, 21; 2 Hau 2:2) ʼI te temi nei ʼe toe fakaʼaogaʼi e Sehova totatou famili, ʼotatou kaumeʼa mo te ʼu tagata ʼafea moʼo tokoni kia tatou. Kae ka tou lotomamahi ʼe mahino ia ʼe feala pe ke tou fia nofo tokotahi. Kae kotea ʼae ʼe tonu ke tou fai ke tou maʼu te tokoni ʼa Sehova?

13. Kotea ʼae ʼe tonu ke tou fai ke tou maʼu te tokoni ʼa Sehova? (Vakaʼi te pāki.)

¹³ Kotea ʼae ʼe tonu ke tou fai? Faiga ke mole ke nofo tokotahi. Ka nofo tokotahi he tahi ʼe mole kei manatu ki he tahi age meʼa kae kua manatu pe ia kia ia totonu pea mo ʼona fihifihia. ʼUhi ko te faʼahi ʼaia ʼe feala ke mole kei tou fai ni tonu ʼe lelei. (Taag. 18:1) ʼE mahino ia ʼi ʼihi temi ʼe ʼaoga ai leva he kiʼi temi ke tou nonofo tokotahi moka tou tau mo he aluʼaga faigataʼa. Kae kapau ʼe fualoa tatatou nofo tokotahi ʼe feala ke tou fakafisi ki te ʼu hahaʼi ʼae ʼe fakaʼaogaʼi e Sehova moʼo tokoni kia tatou. Maʼia peʼe faigataʼa, ʼofa ʼo tali te tokoni ʼo tou famili mo ʼou kaumeʼa pea mo te ʼu tagata ʼafea. Fakaʼuhigaʼi natou ohage ko he tokoni ʼe foaki atu ʼe Sehova.​—Taag. 17:17; Esa. 32:1, 2.

ʼE FAKAPELEPELEʼI ANAI KOE E SEHOVA

14. Kotea te ʼu aluʼaga fakamataku ʼe feala ke tau mo tatou?

¹⁴ Te fihifihia. ʼE feala pe ke tou matataku moka hoko ni ʼihi faigataʼa. Neʼe toe matataku ʼihi kaugana ʼo te temi muʼa ʼuhi ko ʼonatou fili pea mo he ʼu aluʼaga neʼe tau mo natou. (Pes. 18:4; 55:1, 5) ʼI te temi nei ʼe feala ke tou tau mo te fakafeagai ʼi te fale ako peʼe ʼi te fale gaue. ʼE toe feala pe ke fakaneke tatou ʼe ʼotatou  famili peʼe ko te ʼu pule taki. Peʼe tou matataku naʼa tou mamate ʼuhi ko he mahaki ʼe tou tau mo ia. Ka tou tau mo te ʼu aluʼaga fuli ʼaia ʼe hage ia kua tou vaivai age tatou ʼi he kiʼi toe. ʼE tokoni feafeaʼi mai ia Sehova moka hoko mai te taʼi ʼu aluʼaga ʼaia?

15. Kotea te fakalotomalohi ʼe tou maʼu ia Pesalemo 94:19?

¹⁵ ʼE tokoni feafeaʼi mai anai ia Sehova? ʼE ina fakapelepeleʼi mo fakafimalieʼi tatou. (Lau ia Pesalemo 94:19.) ʼI te Pesalemo ʼaeni ʼe feala ke tou manatuʼi ai he kiʼi taʼahine ʼe mole mamoe ʼi tona mataku ʼuhi ko te to ʼo he afā lahi. Tou fakakaukauʼi age muʼa ʼe fakapelepeleʼi ʼe tana matuā pea mo fua ʼo kaku ki tana moe. Logo la te haga to ʼo te afā neʼe logoʼi ai ʼe te kiʼi taʼahine ia tona puipui ʼe tana matuā. Ka tou tau mo he aluʼaga fakamataku ʼe toe ʼaoga ke fakapelepeleʼi tatou ʼe tatatou Tamai ʼae ʼi selo ʼo kaku ki tatatou fimalie. Kotea ʼae ʼe tonu ke tou fai ke fakapelepeleʼi tatou e Sehova?

16. Kotea ʼae ʼe tonu ke tou fai ke fakapelepeleʼi tatou e Sehova? (Vakaʼi te pāki.)

¹⁶ Kotea ʼae ʼe tonu ke tou fai? Faikole tuʼumaʼu kia Sehova mo lau tana Folafola. (Pes. 77:1, 12-14) Ka ʼe ke fai te ʼu faʼahi ʼaia, ko te ʼuluaki meʼa pe ʼaia ʼe ke fai anai moka ke tau mo he aluʼaga faigataʼa, ko tau kole te tokoni ʼo tau tamai ʼae ʼe ʼi selo. Fakaha kia Sehova tau mataku mo te ʼu meʼa ʼae ʼe ke tuʼania ki ai. Pea ke fakalogo kia te ia ʼi tau lau tana Folafola pea ʼe ke sio peʼe feafeaʼi tana fakafimalieʼi koe. (Pes. 119:28) ʼI tau lau ʼihi tohi ʼo te Tohi-Tapu ohage la ko te ʼu tohi ʼo Sopo, Pesalemo, te ʼu Taʼaga Lea peʼe ko te ʼu palalau ʼa Sesu ʼae ʼe tou maʼu ia Mateo 6. Ka tou faikole pea mo lau te Tohi-Tapu ʼe tou tuku ke fakapelepeleʼi tatou e Sehova.

17. Kotea ʼae ʼe feala ke tou tui papau ki ai?

¹⁷ ʼE feala ke tou tui papau ʼe tokoni tuʼumaʼu mai anai ia Sehova moka tou tau mo ni aluʼaga faigataʼa ʼi totatou maʼuli. ʼE nofo anai mo tatou. (Pes. 23:4; 94:14) ʼE fakapapauʼi mai e Sehova ʼe ina taupau mo fakafimalieʼi mo puipui pea mo fakapelepeleʼi tatou. ʼE fakaha mai ia Esaia 26:3: “ ʼE ke foaki anai kia natou he tokalelei ʼo talu ai, Koteʼuhi ʼe natou falala kia te koe.” Koia falala kia Sehova pea ke fai ia meʼa fuli ke feala ai ke ke maʼu tana tokoni. Ka ke fai te faʼahi ʼaia ʼe ke maʼu pe anai te malohi logo la te ʼu ʼahiʼahi.