1. Kotea te ʼu meʼa ʼe feala ke tou matataku ai?

 ʼE MAʼU ia tatou fuli te mataku. ʼE moʼoni, ʼi tatatou ako te Tohi-Tapu, neʼe fakaʼateainaʼi ai tatou mai te mataku ʼae ki te kau mate, mo te kau temonio pea mo te tuʼania ʼae ki te ka haʼu. Kae ʼi te temi ʼaeni ʼe tou maʼuʼuli ai, ʼe hoko te ʼu “meʼa fakamataku,” ohage la ko te tau, mo te faifakapo pea mo te mahaki. (Luka 21:11) Pea ʼe toe feala ke tou matataku ʼi te tagata, tafito moka fakafeagai mai te ʼu puleʼaga, peʼe ko totatou famili ki te moʼoni. Pea ko ʼihi leva, ʼe natou matataku naʼa mole natou lava ʼutakiʼi te ʼu ʼahiʼahi ʼae ʼe felaveʼi mo natou ʼi te temi nei, pea mo ʼae ʼi te ka haʼu.

2. Kotea ʼae neʼe hoko kia Tavite ʼi tana nofo ʼi Kiete?

² ʼI ʼihi temi, neʼe logoʼi ai e Tavite te mataku. Ohage la, ʼi te tuli ʼo ia e te Hau ko Saulo ke ina matehi, neʼe hola ia Tavite ki te kolo Filisitini ko Kiete. Kae neʼe mole faʼa fualoa, pea neʼe iloʼi e te Hau ʼo Kiete, ʼae ko Akise, ko Tavite neʼe ko te tagata tau malohi, neʼe iloa ʼi tana matehi te “toko lauʼi hogofulu afe” kau Filisitini pea neʼe hivaʼi ʼana malo. Neʼe mataku ʼosi ia Tavite. (1 Sam. 21:10-12) Neʼe tuʼania ki te meʼa ʼae ka fai e Akise kia ia. Kotea ʼae neʼe ina lava tauʼi ai tona mataku?

3. Ia Pesalemo 56:1-3, 11, neʼe lava tauʼi feafeaʼi e Tavite tana mataku?

³ ʼI te Pesalemo 56, ʼe fakaha ai e Tavite te meʼa ʼae neʼe ina logo ʼi tana ʼi Kiete. ʼE fakaha lelei ʼi te pesalemo ʼaia, te ʼu mataku ʼae neʼe maʼu e Tavite, pea neʼe feafeaʼi tana lava tauʼi. Moka mataku ia Tavite pea neʼe ina tuku tana falala kia Sehova. (Lau ia Pesalemo 56:1-3, 11.) Pea neʼe tonu pe tana falala ʼaia kia Sehova. Kote ʼuhi ʼaki te tokoni ʼo tona ʼAtua, neʼe fakakaukau ai ia Tavite ki he puleʼaki ʼe fakaofoofo mo lelei: Neʼe faiga ke ui kua ulu vale. Pea ʼi te sio ʼa Akise ki te aluʼaga ʼo  Tavite, neʼe mole ina fia matehi, kae neʼe loto ia ke fakamavae ia ia. Koia ʼae neʼe hoko atu ai e Tavite tana hola.​—1 Sam. 21:13–22:1.

4. ʼE feafeaʼi hatatou fakamalohiʼi tatatou falala ʼae kia Sehova? Tuku mai he faʼifaʼitaki.

⁴ ʼE feala mo tatou ke tou lava tauʼi tatatou mataku, ʼaki tatatou tuku tatatou falala kia Sehova. Kae feafeaʼi hatatou fakamalohiʼi tatatou falala ʼae kia Sehova, tafito la moka tou matataku? Tou toʼo he faʼifaʼitaki. Fakakaukauʼi age muʼa moka ʼe fakaha atu kua ke tau mo he mahaki. ʼE mahino ia, ʼi te kamata ʼe ke mataku anai. Kae ʼe siʼisiʼi anai tau tuʼania, mo kapau ʼe ke falala ki tau toketa, he kua ke iloʼi neʼe lahi te ʼu hahaʼi neʼe tau mo te mahaki ʼaia, pea kua ina faitoʼo ʼo lelei. Ko he toketa ʼe fagono lelei atu pea ʼe lotomahino ki te ʼu meʼa ʼae ʼe ke logoʼi. Pea ʼe ina fakaha atu he faitoʼo neʼe kua ina foaki ki ʼihi, ʼo maʼu ai tonatou malolo. ʼO toe feia aipe, ʼe tou fakamalohiʼi anai tatatou falala ʼae kia Sehova, ʼaki tatatou metitasio ki te ʼu meʼa ʼae neʼe ina fai ʼi muʼa atu, mo ʼae ʼe ina fai ʼi te temi nei, pea mo ʼae ka ina fai ʼi te ka haʼu. Pea ko te meʼa ʼaia ʼae neʼe fakakaukau ki ai ia Tavite. Koia, ʼi tatatou vakavakaʼi te ʼu palalau ʼae ia Pesalemo 56, ʼe lelei ke ke fakakaukauʼi pe ʼe feafeaʼi hau fakamalohiʼi tau falala ʼae kia Sehova ke ke tauʼi ai tou mataku.

TE ʼU MEʼA ʼAE NEʼE FAI ʼE SEHOVA ʼI MUʼA ATU

5. Kotea ʼae neʼe metitasio ki ai e Tavite moʼo tauʼi tona mataku? (Pesalemo 56:12, 13)

⁵ Logo la te tuʼutamakiʼia ʼo tona maʼuli mai ʼona fili, kae neʼe haga metitasio ia Tavite ki te ʼu meʼa ʼae neʼe kua fai e Sehova ʼi muʼa atu. (Lau ia Pesalemo 56:12, 13.) ʼI tona maʼuli katoa, neʼe ko tana agamahani ʼaia ko te metitasio. Ohage la ʼi ʼihi temi, neʼe metitasio ia Tavite ki te ʼu meʼa ʼae neʼe fakatupu e Sehova ʼo ina manatuʼi ai tona mafimafi mo tona ʼofa lahi ʼae ki te hahaʼi. (Pes. 65:6-9) Neʼe toe metitasio ki te ʼu meʼa ʼae neʼe fai e Sehova maʼa ʼihi. (Pes. 31:19; 37:25, 26) Pea neʼe toe metitasio ia Tavite ki te ʼu meʼa ʼae neʼe fai e Sehova maʼa ia totonu ki muʼa atu. Talu mai tana tupu, neʼe tokoni mo puipui ia ia e Sehova. (Pes. 22:9, 10) Koia, ʼi tana metitasio ki te ʼu aluʼaga ʼaia, neʼe tokoni lahi ai kia Tavite ke ina fakamalohiʼi tana falala ki tana Tamai ʼae ʼi selo.

6. Ka tou matataku, kotea ʼae ka tokoni mai ke tou falala kia Sehova?

 ⁶ Ka ke mataku, ʼe lelei ke ke fai te fehuʼi ʼaeni: ‘Kotea ʼae neʼe kua fai e Sehova ʼi muʼa atu?’ Metitasio ki te fakatupu. Ohage la, ka ke sio ki tana tokaga lelei ki te ʼu manu lele mo te ʼu fisiʼi teu ʼae neʼe mole fakatupu ki tona pāki pea ʼe mole feala hanatou atolasio kia te ia, ʼe mole fakamalohiʼi ai koa koe ke ke tui papau, ʼe toe tokaga feia anai kia koe? (Mat. 6:25-32) ʼE lelei ke ke toe metitasio ki te ʼu meʼa ʼae neʼe fai e Sehova maʼa ʼana kaugana. Koia, ʼe feala ke ke taʼofi he ako mai te faʼifaʼitaki ʼa he kaugana ʼa Sehova ʼi te Tohi-Tapu neʼe malohi tana tui, peʼe ko he kaugana ʼi totatou temi. a Pea tahi, metitasio ki te tokaga ʼa Sehova kia koe talu mai tau iloʼi ia ia. Neʼe feafeaʼi tana taki koe ki te moʼoni? (Soa. 6:44) Neʼe ina tali feafeaʼi atu ki ʼau faikole? (1 Soa. 5:14) Kotea te ʼu fua lelei ʼe ke maʼu ʼi te ʼaho fuli mai te sakilifisio faitotogi ʼo tona ʼAlo ʼofaina?​—Efe. 1:7; Hep. 4:14-16.

7. Neʼe tokoni feafeaʼi te faʼifaʼitaki ʼo te polofeta ko Taniela kia Vanessa ke puli ai tona mataku?

⁷ Neʼe tau ia Vanessa b te tuagaʼane mai Haïti mo he aluʼaga fakamataku. Neʼe ʼi ai te tagata ʼi tona vahaʼa fale, neʼe faipauʼi mo faitohi tuʼumaʼu age he neʼe manako ia ia. Neʼe ina fakakinauʼi ke nā fakatahi. Kae neʼe fakafisi ia Vanessa. Neʼe ʼaʼasili kovi ai te ita ʼo te tagata ʼo ina ui age, ʼe ina fai anai ki ai he meʼa ʼe kovi. ʼE ui e Vanessa: “Neʼe au mataku ʼosi.” Kotea ʼae neʼe ina fai ke ina tauʼi ai tona mataku? Neʼe ina fai he ʼu puleʼaki ke ina puipui ai tona maʼuli. Pea neʼe alu mo he tagata ʼafea ki te kau polisi moʼo fakaha te aluʼaga. Kae neʼe mole gata ai, neʼe toe metitasioʼi e Vanessa ki te puipui e Sehova ʼana kaugana ʼi te temi muʼa. ʼE ina fakamahino fenei: “Ko te ʼuluaki kaugana ʼo te Tohi-Tapu ʼae neʼe au manatu ki ai, neʼe ko te polofeta ko Taniela. Logo la neʼe mole ina fai he meʼa ʼe kovi, kae neʼe li ia ia ki he luo laione pakupaku. Kae neʼe haofaki ia ia e Sehova. Koia, neʼe au tuku ai ia meʼa fuli kia nima ʼa Sehova ʼo ʼuhiga mo toku aluʼaga. ʼI taku fai ʼaia, neʼe puli ai toku mataku.”​—Tan. 6:12-22.

TE ʼU MEʼA ʼAE ʼE FAI E SEHOVA ʼI TE TEMI NEI

8. Kotea ʼae neʼe tui papau ki ai ia Tavite? (Pesalemo 56:8)

⁸ Logo la neʼe tuʼutamakiʼia tona maʼuli ʼi Kiete, kae neʼe mole tuku e Tavite te aluʼaga ʼaia ke ina fakamatakuʼi ia ia. Kae, neʼe ina fakatotonu ia ke hagahaga ki te meʼa ʼae neʼe fai e Sehova maʼa ia. Neʼe sio ki tana takitaki mo tona puipui ʼo ia pea neʼe ina iloʼi ʼe mahino ia Sehova ki te ʼu meʼa ʼae ʼe ina logoʼi. (Lau ia Pesalemo 56:8.) Pea neʼe toe feala ke falala ki ʼona kaumeʼa agatonu, ko Sonatane mo te pelepitelo lahi ko Asimeleke ʼae neʼe nā tokoni mo fakalotomalohiʼi ia ia. (1 Sam. 20:41, 42; 21:6, 8, 9) Logo ai pe la te fia matehi ia ia e te Hau ko Saulo, kae neʼe lava hola ia Tavite ʼo haofaki ai tona maʼuli. Neʼe tui papau ia Tavite, neʼe iloʼi lelei e Sehova te aluʼaga ʼae neʼe tau mo ia pea mo te mataku ʼae neʼe ina logoʼi.

9. Kotea ʼe iloʼi e Sehova ʼo ʼuhiga mo tatou takitokotahi?

⁹ Ka ke tau mo he fihifihia ʼe ke mataku ai, manatuʼi ʼe iloʼi e Sehova te aluʼaga ʼae ʼe ke fakalaka ai pea mo te ʼu meʼa ʼae ʼe ke logoʼi. Ohage la, neʼe mole sio pe Sehova ki te gaohi koviʼi ʼo te kau Iselaele ʼi Esipito, kae neʼe toe sio ki “ ʼonatou mamahi.” (Eke. 3:7) ʼI te pesalemo ʼae neʼe ina hivaʼi, neʼe ui ai e Tavite ʼe sio Sehova ki ʼona “tuʼania” mo te ‘lahi ʼo tona mamahi.’ (Pes. 31:7) Maʼia moka mamahi tana hahaʼi ʼuhi ko te ʼu tonu ʼe mole  fakapotopoto ʼae neʼe natou fai, neʼe ‘toe mamahi ai mo ia.’ (Esa. 63:9) Ka ke mataku, ʼe mahino ia Sehova ki te meʼa ʼae ʼe ke logoʼi pea ʼe fia tokoni atu ke puli ai tou mataku.

10. He koʼe ʼe ke tui papau ʼe tokaga Sehova kia koe pea ʼe tokoni atu anai ke ke tauʼi he fihifihia pe ʼe ke tau mo ia?

¹⁰ Kae kotea ʼe feala ke ke fai mo kapau ʼe mole ke sio ki te tokoni atu ʼa Sehova ʼi te aluʼaga fakamataku ʼae ʼe ke tau mo ia? Kole kia Sehova ke ke sio ki te ʼu meʼa ʼae ʼe ina fai moʼo tokoni atu. (2 Hau 6:15-17) Pea ke fakakaukauʼi te ʼu fehuʼi ʼaeni: Neʼe ʼi ai koa he akonaki peʼe ko he tali ʼi te fono neʼe ke lotomalohi ai? Peʼe neʼe ʼi ai koa he tohi peʼe ko he ʼata viteo, peʼe ko he hiva neʼe ina fakalotomalohiʼi koe? Neʼe ʼi ai koa he tahi neʼe ina fakalotofimalieʼi koe ʼaki he vaega, peʼe ko he manatu Fakatohi-tapu? ʼAua naʼa tou meʼa noaʼi te ʼofa lahi ʼo ʼotatou tehina mo tuagaʼane mo te ʼu fakalotomalohi ʼae ʼe tou maʼu ʼi te Folafola ʼa te ʼAtua, he ʼe ko he ʼu tokoni taulekaleka ʼaia mai ia Sehova. (Esa. 65:13; Mko. 10:29, 30) Ko te ʼu meʼa ʼofa ʼaia ʼe natou fakamoʼoni ai ʼe tokaga Sehova kia koe pea ʼe tuha ke ke falala kia te ia.​—Esa. 49:14-16.

11. Kotea ʼae neʼe tokoni kia Aïda ke ina tauʼi ai ʼona tuʼania?

¹¹ Neʼe sio ia Aïda ʼae ʼe maʼuli ʼi Sénégal ki te tokoni ʼa Sehova ʼi te ʼahiʼahi ʼae neʼe tau mo ia. Ko ia ʼae neʼe muʼa ʼi te ʼu te fanau, pea neʼe loto ʼana matuʼā ke gaue ke ina maʼu ai hana foʼi falā moʼo taupau tona maʼuli mo ʼae ʼo naua. Kae ʼi tana fakafaigafua tona maʼuli ke liliu ʼo pionie, neʼe tau leva ia Aïda mo he fihifihia fakapaʼaga. Neʼe iita ai tona famili ʼo natou valokiʼi. Neʼe ui fenei e Aïda: “Neʼe au tuʼania naʼa mole au lava taupau ʼaku matuʼā pea mo nā liʼaki ai au. Maʼia neʼe au tukugakoviʼi ia Sehova ʼi tana tuku ke kovi toku aluʼaga.“ Pea neʼe logo leva ia Aïda ki he akonaki ʼi te fono neʼe malave ai kia ia. ʼE ina ui fenei: “Neʼe fakamanatuʼi mai e te tuagaʼane ʼe iloʼi e Sehova te ʼu lavea fuli ʼo ʼotatou loto. ʼAki te temi, ko te tokoni ʼae neʼe foaki mai e te ʼu tagata ʼafea pea mo ʼihi, neʼe au lotofimalie ai. Neʼe au tui papau ai ʼe ʼofa Sehova ia au. Pea moka au faikole, neʼe au logoʼi ai kua toe malohi age taku falala ʼae ʼe tokoni mai anai ia Sehova kia au. Neʼe au sio ki tana tali mai ki ʼaku faikole ʼo au logoʼi ai te tokalelei ʼo toku loto.“ Ki muli age, neʼe  maʼu leva e Aïda he gaue ʼo hoko atu tana pionie pea mo tokaga ki ʼana matuʼā. ʼE ina ui fenei: “Neʼe au ako ke au falala katoa kia Sehova. ʼI te temi nei, moka au ʼosi faikole, ʼe puli atu ai mo ʼoku tuʼania.”

TE ʼU MEʼA ʼAE KA FAI E SEHOVA ʼI TE KA HAʼU

12. Ia Pesalemo 56:9, Kotea ʼae neʼe tui papau ki ai ia Tavite?

¹² Lau ia Pesalemo 56:9. ʼE fakaha ʼi te vaega ʼaeni, te tahi fakalotomalohi neʼe tokoni ai kia Tavite ke ina tauʼi tona mataku. Logo la te tuʼutamakiʼia ʼo tona maʼuli, kae neʼe ina metitasioʼi te ʼu meʼa ʼae ka fai e Sehova maʼa ia ʼi te ka haʼu. Neʼe ina iloʼi ʼe haofaki anai ia ia e tona ʼAtua ʼi tona temi totonu, he neʼe kua ina fakapapauʼi age ko ia ka liliu ko te hau ʼo Iselaele. (1 Sam. 16:1, 13) Pea kia Tavite, ka fai pe e Sehova he fakapapau, kua hage pe ia kua ʼosi fakahoko.

13. Kotea ʼe fakapapauʼi atu e Sehova ke ina fai maʼa koe?

¹³ Kotea ʼae neʼe fakapapauʼi atu e Sehova ke ina fai maʼa koe? ʼE mole tou ʼamanaki ʼe ina haofaki anai tatou mai te ʼu fihifihia fuli. c Kae kotea pe he ʼu ʼahiʼahi ʼe ke tau mo ia ʼi te tuʼu ʼaeni, ʼe pulihi anai ia Sehova te ʼu aluʼaga fuli ʼaia ʼi te malama foʼou. (Esa. 25:7-9) ʼE maʼu e totatou Tupuʼaga he malohi feʼauga moʼo fakatuʼuake te kau mate, moʼo fakamalolo tatou mai te ʼu mahaki fuli pea moʼo pulihi ai te kau fakafeagai fuli.​—1 Soa. 4:4.

14. Kotea ʼae ʼe feala ke tou metitasio ki ai?

¹⁴ Ka ke mataku, metitasioʼi te ʼu meʼa ʼae ka fai e Sehova ʼi te ka haʼu. Fakakaukauʼi age muʼa te ʼu meʼa ka ke logoʼi moka puli anai ia Satana ʼo talu ai, pea moka pulihi anai mo te kau agakovi fuli, kae ʼe maʼuʼuli pe ia te kau faitotonu, ʼo toe feia pe moka puli mamalie te agahala ia tatou. ʼI te fakatahi fakafenua 2014, neʼe fakaha ʼi te faʼifaʼitaki pe ʼe feafeaʼi hatatou metitasio ki tatatou ʼamanaki. Neʼe palalau ai te tamai ki te maʼuli ka tou maʼu anai ʼi te Palatiso. Neʼe ina fetogi ai te ʼu palalau ʼae ia 2 Timoteo 3:1-5 ʼo ui fenei: “ ʼI te malama foʼou, ʼe ʼi ai anai he ʼu temi fakafiafia. Koteʼuhi ʼe feʼofaʼofani anai te hahaʼi, mo manako ki te ʼu koloa fakalaumalie, mo fiamalalo, mo agavaivai, mo fakavikiviki ki te ʼAtua, mo agalelei ki te hahaʼi, mo fakalogo ki ʼanatou matuʼā, mo lotofakafetaʼi, mo agatonu, mo ʼofa ki ʼonatou famili, mo felogoi lelei, mo palalau tuʼumaʼu ki ʼihi, mo lotololomi, mo agamalū, mo ʼofa ki te lelei, mo tuha mo te falala, mo fakalogo, mo fia vaivai mo natou ʼoʼofa ki te ʼAtua kae mole ki te ʼu fakafiafia, pea ʼe natou fia fakaha ʼe natou pipiki ki te ʼAtua ʼo natou fai ʼi ʼonatou maʼuli. Ke ke fakaovi tuʼumaʼu ki te hahaʼi ʼaia.” ʼE ke faipalalau koa mo tou kiʼi famili peʼe ko ʼou kaumeʼa ki te maʼuli lelei tukupau ʼae ka tou maʼu anai ʼi te malama foʼou?

15. Kotea ʼae neʼe tokoni kia Tanja ke hoko atu tana nofo agatonu logo la tona mataku?

¹⁵ Tou vakaʼi te aluʼaga ʼo te tuagaʼane ʼe higoa ko Tanja ʼe maʼuli ʼi Masetonia Noleto. ʼI tana kamata ako te Tohi-Tapu, neʼe fakafeagai malohi ʼana matuʼā ki ia. ʼE ina ui fenei: “Ko te ʼu meʼa ʼae neʼe au tuʼania naʼa hoko, neʼe hoko pe ia. Neʼe ta tuʼumaʼu au e taku faʼe moka au haʼu mai te ʼu fono. Pea neʼe fakamatakuʼi au e ʼaku matuʼā, ʼe nā matehi anai au mo kapau ʼe au liliu ko he Fakamoʼoni ʼa Sehova.” Ki muli age, neʼe kapu Tanja e ʼana matuʼā ʼi tonatou ʼapi. Kae neʼe feafeaʼi ia Tanja? ʼE ina tali fenei: “Neʼe au manatuʼi tuʼumaʼu te fiafia ka au maʼu anai ʼo heʼe gata, mo kapau ʼe au hoko atu taku nofo agatonu. Neʼe au metitasio ki te ʼu fakapale ʼae ka foaki mai e Sehova ʼi te malama foʼou, pea ʼe toe lahi age ia ʼi te ʼu meʼa ka puli anai ia au ʼi te tuʼu ʼaeni. Pea neʼe au toe fakakaukauʼi pe ʼe  feafeaʼi anai te maʼuli moka puli fuli anai te ʼu mamahi.” Neʼe hoko atu pe Tanja tana nofo agatonu. Pea ʼaki te tokoni ʼa Sehova, neʼe ina maʼu leva hona nofoʼaga. ʼI te temi nei, kua ʼohoana leva ia Tanja mo he tehina agatonu, pea ʼe nā fiafia ʼi tanā tauhi fakatahi kia Sehova ʼi te selevisi temi katoa.

FAKAMALOHIʼI TAU FALALA ʼAE KIA SEHOVA

16. Ka hoko anai te ʼu aluʼaga ʼae neʼe fakakikite ia Luka 21:26-28, kotea ka tokoni mai ke tou maʼu te lototoʼa?

¹⁶ Lolotoga te mamahi lahi, tokolahi te hahaʼi ʼe natou ‘pogigia anai ʼi tanatou matataku.’ Kae ko te ʼu kaugana ia ʼa te ʼAtua ʼe natou tutuʼu malohi anai mo lototoʼa. (Lau ia Luka 21:26-28.) He koʼe ʼe tou lototoʼa anai? Koteʼuhi neʼe kua tou ako ke tou falala kia Sehova. Neʼe ui e Tanja ʼae ʼe palalau ki ai te palakalafe ʼaeni kua ʼosi, ko te ʼu fihifihia ʼae neʼe tau mo ia neʼe tokoni ai ke ina lava katakiʼi ʼihi atu faigataʼaʼia. ʼE ina ui fenei: “Neʼe au ako ai ko he aluʼaga pe ʼe tou tau mo ia, ʼe tokoni mai anai Sehova ke tou lava ʼutakiʼi pea ʼe ina tapuakiʼi ai tatou. ʼI ʼihi temi, ʼe tou ui tatou ko ʼihi ʼae ʼe natou puleʼi te aluʼaga, kae ʼe malohi age pe Sehova ia natou. Pea maʼia mo he ʼahiʼahi ʼe faigataʼa ʼosi, kae ʼe fakagata pe anai.”

17. ʼE tokoni feafeaʼi mai anai kia tatou te koga tohi ʼo te taʼu 2024? (Vakaʼi te pāki ʼo te takafi.)

¹⁷ Ia ʼaho nei, ʼe lahi te ʼu meʼa ʼe fakatupu mataku. Kae ohage ko Tavite, ʼaua naʼa tou tuku te mataku ke ina puleʼi tatou. Neʼe faikole fenei te tagata agatonu ʼaia kia Sehova: “Ka au mataku ʼe au falala kia te koe.” (Pes. 56:3) Ko te ʼu palalau ʼaia ʼa Tavite ʼe ko te koga tohi ʼo te taʼu 2024. Neʼe fakamahino fenei e te tagata sivi Tohi-Tapu ʼo ʼuhiga mo te vaega ʼaia: “Neʼe mole haga Tavite ia ki te ʼu meʼa ʼae ʼe ina fakamatakuʼi ia ia peʼe ki ʼona fihifihia, kae neʼe haga tafito ia kia Ia ʼae ka ina haofaki anai ia ia.” Manatuʼi te vaega ʼaia ʼi te ʼu mahina ʼaeni ka haʼu, tafito moka ke tau anai mo he aluʼaga fakamataku. Toʼo he temi ke ke metitasio ki te ʼu meʼa ʼae neʼe fai e Sehova ʼi muʼa atu, mo ʼae ʼe ina fai ʼi te temi nei pea mo ʼae i te ka haʼu. Pea ʼe feala anai ke ke ui ohage ko Tavite: “ ʼE au falala ki te ʼAtua, ʼe mole au mataku.”​—Pes. 56:4.