KO TE kupu saliote ʼi te Fakakeleka ʼi te Fakaliliu ʼo Te Malama Foʼou ʼe feala ke fakaʼuhiga ki he ʼu saliote kehekehe. (Gaue 8:28, 29, 38) Neʼe lagi faifagona te Etiopea ʼi he saliote lahi kae mole ʼi he saliote tau peʼe ʼi he saliote lele. Tou vakaʼi he ʼu fakamahino.

Ko te Etiopea neʼe ko te tagata maʼu tuʼulaga pea neʼe loaloaga tana faifolau. “Neʼe ko te tagata maʼu tuʼulaga ʼa te fineʼaliki ʼo te kau Etiopea ko Kanetase pea neʼe tokaga ki ʼona koloa fuli.” (Gaue 8:27) Ko te fenua ʼo Etiopea ʼi te temi muʼa ʼe fakaʼuhiga ʼi te temi nei ki te fenua ʼo Soudan pea mo te potu saute ʼo te fenua ʼo Esipito. ʼI te faifagona ʼa te tagata ʼaia, neʼe lagi fetogi saliote, kae ʼe mahino ia neʼe lahi tana uta he neʼe loaloaga tana faifagona. ʼI te ʼu saliote ʼae neʼe fakaʼaogaʼi ke faifagona ai te hahaʼi ʼi te temi ʼaia, neʼe ʼi ai he ʼu saliote teka fa mo ʼona kiʼi fale fakamalumalu. ʼE fakamahino mai ʼi he tohi “ko te ʼu saliote ʼaia ʼe feala ke lahi te ʼu uta ʼae ʼe ʼave ai, ke fimalie te faifagona pea mo loaloaga.”

Neʼe lolotoga lautohi ia te Etiopea ʼi te alu age ʼae ʼa Filipo. ʼE ui fenei mai ʼi te Tohi-Tapu: “Neʼe lele ia Filipo ia tafa ʼo te saliote, pea neʼe logo ki tana lau leʼo lahi ia te tohi ʼa te polofeta ko Esaia.” (Gaue 8:30) Neʼe mole faʼu te ʼu saliote ʼaia moʼo lele vave. Koia ʼi te alu mamalie ʼa te saliote, neʼe feala ai ke lautohi te enuke pea ke kaku ia Filipo ki ai.

Neʼe kole fakamalotoloto e te tagata Etiopea kia Filipo “ke kake ake ʼo heka mo ia.” (Gaue 8:31) Ko te ʼu saliote lele neʼe maʼua ke tutuʼu te hahaʼi. Kae ko te ʼu saliote faifagona neʼe lalahi, koia neʼe feala ai te heheka ʼi te saliote ia te Etiopea mo Filipo.

ʼO mulimuli ki te fakamatala ʼae ia Gaue kapite 8 pea mo te ʼu fakamoʼoni ʼo te hisitolia ʼae ʼe tou maʼu, ʼe fakaha ʼi tatatou ʼu tohi foʼou neʼe heka te tagata Etiopea ʼi he saliote lahi kae mole ko he saliote taʼu peʼe ko he saliote lele.