ALATIKE AKO 14
’E Kotou Fakahoko Katoa Koa Takotou Tauhi ʼAe Ki Te ʼAtua?
“Fai te gaue ʼa he tagata faifakamafola ʼo te logo lelei, pea ke ke fakahoko katoa tau minisitelio.”—2 TIM. 4:5.
KATIKO 57 Tou Fakamafola Ki Te Faʼahiga Hahaʼi Fuape
TE ʼU MANATU FAKANOUNOU *
1. Kotea te gaue ʼe fia fakahoko e te ʼu kaugana fuli ʼa te ʼAtua? Pea kotea tona tupuʼaga? (Vakaʼi te ʼuluaki pāki.)
KOʼENI te fakatotonu neʼe foaki e Sesu Kilisito ki ʼana tisipulo ke natou “olo ʼo fai ni tisipulo ʼi te hahaʼi ʼo te ʼu fenua fuli pe.” (Mat. 28:19) ʼE loto e te ʼu kaugana agatonu ʼa te ʼAtua ke natou ako pe ʼe feafeaʼi hanatou “fakahoko katoa” te gaue faifakamafola ʼae neʼe foaki age kia natou. (2 Tim. 4:5) Tafito la, ko te gaue ʼaia ʼe maʼuhiga pea ʼe ʼaoga tona fakahoko fakavilivili ʼi ʼihi age ʼu maʼua ʼo te maʼuli. ʼE moʼoni, ʼe tou fia fakahoko katoa tatatou gaue faifakamafola kae ʼe feala pe ke faigataʼa.
2. Kotea ʼae ʼe tonu ke tou tauʼi ke feala ai hatatou fakahoko katoa tatatou gaue faifakamafola?
2 Ko ʼihi gaue ʼe maʼuhiga ki ai he temi pea mo he malohi. Ohage la, ʼe tonu ke tou gaue ʼi te ʼaho fuli moʼo taupau ʼo te famili. ʼE tou toe fakahoko anai ʼotatou maʼua fakafamili, te katakiʼi ʼo te ʼu mahaki, te tauʼi ʼo te vaivai matuʼa peʼe ko te lotovaivai. ʼE feafeaʼi hatatou fakahoko katoa tatatou tauhi ʼae ki te ʼAtua logo la te ʼu fihifihia ʼae ʼe tou felaveʼi mo ia?
3. Kotea ʼae neʼe fia ui e Sesu ia Mateo 13:23?
3 ʼE feala pe ke fakatuʼakoi tatatou gaue kia Sehova ʼuhi ko te ʼu aluʼaga ʼo te maʼuli, kae ʼe mole tonu ke tou lotovaivai ai. Neʼe iloʼi e Sesu ʼe mole tatau anai te ʼu fua ʼo te gaue ʼae ʼe tou fakahoko ki te Puleʼaga. (Lau ia Mateo 13:23.) ʼE fakamaʼuhigaʼi e Sehova ʼatatou faiga fuli mo kapau ʼe tou fakahoko fakamalotoloto tatatou gaue kia te ia. (Hep. 6:10-12) Koia ʼe feala pe ke tou manatu ʼe tou lava fakahoko tatatou gaue ke lahi age logo la te ʼu aluʼaga ʼo te maʼuli. ʼI te alatike ʼaeni, ʼe tou vakaʼi anai pe ʼe feafeaʼi hatatou fakamuʼamuʼa ʼi totatou maʼuli te gaue faifakamafola, te maʼuli fakafeʼauga pea mo faiga ke lelei age tatatou faifakamafola mo te faiako? Tou vakaʼi muʼa pe kotea te fakaʼuhiga ʼo te fakahoko katoa ʼo te gaue faifakamafola?
4. Kotea te fakaʼuhiga ʼo te fakahoko katoa ʼo te gaue faifakamafola?
4 Ko te fakahoko katoa ʼo te gaue faifakamafola ʼe fakaʼuhiga ʼe tou fakaʼaogaʼi te ʼu fealagia fuli ʼe tou maʼu moʼo faifakamafola pea mo faiako. Koia ʼe maʼuhiga age te gaue faifakamafola ʼi hatatou faiga ke lahi feafeaʼi te ʼu hola ʼae ʼe tou fai. Tou manatuʼi ʼe maʼuhiga age kia Sehova ke tou fakahoko te gaue faifakamafola koteʼuhi ʼe tou ʼoʼofa ia te ia pea mo ʼotatou tatau. Koia ʼae ʼe tou gaue fakamalotoloto ai ʼi tatatou tauhi ki te ʼAtua. * (Mko. 12:30, 31; Kol. 3:23) Ko te tauhi ʼae ki te ʼAtua ʼaki totatou maʼuli katoa ʼe ko tatatou foaki ia tatou totonu mo tou fakaʼaogaʼi totatou malohi pea mo ʼotatou fealagia fuli ki tana tauhi. Kapau ʼe tou leleiʼia te pilivilesio ʼae ko te faifakamafola, ʼe tou faiga anai ke tou vaevae mo te hahaʼi fuli te logo lelei.
5-6. ʼE feafeaʼi ki he tahi ʼe maʼumaʼua hana fakamuʼamuʼa tana tauhi ki te ʼAtua? Tuku mai he faʼifaʼitaki.
5 Fakakaukauʼi age muʼa he tupulaga ʼe ina leleiʼia te ta ʼukalele. Ka maʼu pe hona temi pea ta ʼukalele. Pea kua maʼu tana gaue ko te ta ʼukalele ʼi te ʼu fakaʼosi vahaʼa ʼi te fale kafe. Kae ʼe mole lahi te foʼi falā ʼae ʼe ina maʼu moʼo totogi te ʼu meʼa ʼae ʼe ʼaoga ki ai. Koia la ʼae neʼe toe gaue ai ʼi te fale koloa mai te Monite ki te Feliaono. Logo la te lahi ʼo te temi ʼae ʼe ina fakaʼaogaʼi ʼi te gaue ʼaia kae ʼe ina leleiʼia age pe tana faimaholo. Koia ʼe ina ako ai ke poto lelei ʼi te ta ʼukalele ke feala ʼi he ʼaho ke ina tuku tana gaue ʼi te fale koloa kae maʼuli pe ki te faimaholo. ʼE faiga fakamalotoloto anai ke ina maʼu he ʼu faigamalie ke faimaholo ai.
6 Pea ʼe toe feia pe mo tatou, ʼe tou fia faifakamafola ʼi te ʼaho fuli kae ʼe mole feala. ʼE tou fia hikihiki ke lelei age ia tatatou faifakamafola ke malave ki te loto ʼo te hahaʼi ia te logo lelei. ʼE lahi tatatou gaue, koia ʼae ʼe tonu ai ke tou fai te fehuʼi ʼaeni: ʼE tou fakamuʼamuʼa koa te faifakamafola ʼi totatou maʼuli?
TOU FAKAMUʼAMUʼA TE FAIKAMAFOLA
7-8. ʼE tou faʼifaʼitakiʼi feafeaʼi ia Sesu ʼi te faifakamafola?
7 Neʼe fakaha mai e Sesu pe ʼe feafeaʼi hatatou fakamaʼuhigaʼi te faifakamafola. Ko te faʼahi ʼae neʼe maʼuhiga ʼi tona maʼuli ko tana palalau ki te Puleʼaga ʼo te ʼAtua. (Soa. 4:34, 35) Neʼe haʼele ia kilometa ʼe lauʼi teau moʼo fakamafola ki te hahaʼi fuli pe te logo lelei. Neʼe ina kumi te ʼu faigamalie fuli ke palalau ai ki te hahaʼi ʼi te ʼu fakatahiʼaga pea mo te ʼu ʼapi. Neʼe fakamuʼamuʼa tuʼumaʼu e Sesu te faifakamafola ʼi tona maʼuli.
8 ʼE feala ke tou faʼifaʼitakiʼi ia Kilisito ʼo tou kumi te ʼu faigamalie fuli ke tou palalau ki te hahaʼi ʼo ʼuhiga mo te logo lelei ʼi te ʼu faʼahi fuli pe ʼe tou to ai. ʼE tou lotolelei anai ke tou fai ni sakilifisio moʼo faifakamafola. (Mko. 6:31-34; 1 Pet. 2:21) Ko ʼihi ʼi te kokelekasio ʼe feala ke natou toʼo te selevisi pionie makehe, temi katoa peʼe vaelua. Neʼe ako e ʼihi he lea matapule peʼe ko ʼihi neʼe natou olo ki he ʼu potu fenua ʼae ʼe ʼaoga ki ai he tokoni. Kae ko te ʼu tehina mo tuagaʼane ʼae ʼe mole natou lava fai te ʼu faʼahiga gaue ʼaia, ko natou ʼaia ʼe natou fakahoko te gaue lahi. ʼE natou faiga malohi te fakamafola ʼo te logo lelei. Pe ʼe lahi peʼe veliveli tatatou gaue faifakamafola kae ko Sehova ʼe mole ina kole mai ke tou fai he meʼa ʼe mole tou lavaʼi. ʼE loto e Sehova ke tou tauhi fiafia kia te ia moka tou fakamafola “te logo lelei taulekaleka ʼae ʼe haʼu mai te ʼAtua fiafia.”—1 Tim. 1:11; Tet. 30:11.
9. (1) Neʼe fakamuʼamuʼa feafeaʼi e Paulo te faifakamafola logo la neʼe tonu ke gaue? (2) Kotea te manatu ʼa Paulo ʼo ʼuhiga mo te faifakamafola ʼae ia Gaue 28:16, 30, 31?
9 ʼE foaki mai e te apositolo ko Paulo he faʼifaʼitaki lelei ʼo ʼuhiga mo tana fakamuʼamuʼa te faifakamafola ʼi tona maʼuli. Neʼe mole lahi te falā ʼa Paulo ʼi tana tau ʼae ki Kolonito ʼi tana lua folau fakamisionea. Koia neʼe tonu ai ke gaue ʼo ina faʼu ai te ʼu fale la. Kae neʼe mole ko te gaue ʼaia neʼe maʼuhiga kia Paulo. Neʼe fakafealagia e te gaue ʼaia, ke maʼuli ki ai pea mo fakahoko te gaue faifakamafola. Koia neʼe ina tala fakafiafia ai te logo lelei ʼo te ʼAtua ki te kau Kolonito koteʼuhi neʼe mole he temi neʼe liliu ai ko he kavega kia natou. (2 Ko. 11:7) Tatau aipe pe neʼe gaue ia Paulo, kae neʼe ina fakamuʼamuʼa tuʼumaʼu te faifakamafola maʼia mo te ʼu Sapato fuli. ʼI te temi leva ʼae kua ina maʼu ai te ʼu meʼa ʼae ʼe ʼaoga ki ai, neʼe mole kei ʼaoga ke gaue, neʼe feala ai kia Paulo ke ina fakahoko katoa tana gaue faifakamafola. Pea neʼe “tokaga tafito leva . . . ʼo fakamafola te folafola, ʼo ina fakamoʼoni ki te kau Sutea ko Sesu ʼe ko Kilisito.” (Gaue 18:3-5; 2 Ko. 11:9) Ki muli age lolotoga tana pilisoni taʼu ʼe lua ʼi Loma, neʼe palalau ia Paulo ki te moʼoni kia natou ʼae neʼe ʼomai ʼo ʼahiʼahi kia ia pea mo ina fai he ʼu tohi. (Lau ia Gaue 28:16, 30, 31.) Neʼe fakamuʼamuʼa tuʼumaʼu e Paulo te faifakamafola ʼi te ʼu meʼa fuli. Neʼe ina tohi fenei: “ ʼI tamatou maʼu te minisitelio ʼaia . . . , ʼe mole matou tuku anai.” (2 Ko. 4:1) Ohage ko Paulo, tatau aipe pe lahi te temi ʼae tou gaue ai, kae ʼe feala pe ke tou fakamuʼamuʼa pe te faifakamafola ʼi totatou maʼuli.
10-11. ʼE feafeaʼi hatatou fakahoko katoa tatatou faifakamafola logo la te ʼu fihifihia fakasino ʼae ʼe tou tau mo ia?
10 ʼE feala ke fakatuʼakoi tatatou faifakamafola ʼi te ʼu ʼapi ʼuhi ko te vaivai matuʼa peʼe ko te mahaki. Kae ʼe feala pe ke tou fiafia tuʼumaʼu mo kapau ʼe tou fakaʼaogaʼi te ʼu aluʼaga kehekehe ʼo te faifakamafola. Neʼe kumi e te kau Kilisitiano ʼo te ʼuluaki sekulo te hahaʼi ʼi te ʼu potu fuli pe neʼe natou taka ai. Neʼe natou kumi te ʼu faigamalie fuli moʼo palalau ki te hahaʼi ʼo ʼuhiga mo te moʼoni ʼi te ʼu ʼapi, ʼi muʼa ʼo te kaugā malie peʼe ko te faifakamafola faigamalie Gaue 17:17; 20:20) Kapau ʼe mole kei feala ke tou haʼele fualoa, ʼe lagi lelei ke tou heheka ʼi he koga meʼa ʼe kaugā malie ʼo faifakamafola ai ki te hahaʼi. ʼE feala pe ke tou faitohi peʼe ke tou faifakamafola ʼi te telefoni peʼe ke tou faipalalau ki he tahi pe ʼe tou felaveʼi. ʼE lahi te ʼu tehina mo tuagaʼane ʼe mole feala hanatou faifakamafola ʼi te ʼu ʼapi koteʼuhi ʼe natou mahahaki peʼe ko he faʼahiga fihifihia pe kae ʼe feala pe ke natou maʼu te fiafia ʼi tanatou fakaʼaogaʼi he ʼu aluʼaga kehekehe ʼo te faifakamafola.
ki te hahaʼi ʼae ʼe natou felaveʼi. (11 ʼE feala ke tou fakahoko katoa tatatou faifakamafola logo la te ʼu mahaki ʼae ʼe tou tau mo ia. Tou toe palalau muʼa ki te faʼifaʼitaki ʼo te apositolo ko Paulo. Neʼe ina ui fenei: “ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.” (Flp. 4:13) Neʼe ʼaoga he malohi kia Paulo koteʼuhi neʼe mahaki ʼi te temi ʼae neʼe folau fakamisionea ai. Neʼe ina ui fenei ki te kau Kilisitiano ʼo Kalate: “Neʼe au ʼuluaki maʼu te faigamalie ʼae ke au tala atu te logo lelei kia koutou ʼuhi ko toku mahaki.” (Kal. 4:13) ʼE toe feia pe mo tatou ko ʼotatou fihifihia fakasino ʼe ina fakafealagia ke tou fakamafola te logo lelei ki te ʼu faʼahiga hahaʼi ohage la ko te ʼu toketa, ko te kau afilimie peʼe ko natou ʼae ʼe ʼomai ʼo tokoni kia tatou. ʼI te agamahani, ko natou ʼaia ʼe gaue ʼi te temi ʼae ʼe olo ai te Kau Fakamoʼoni ʼa Sehova ʼo fisifisi ʼi ʼonatou ʼapi.
TE MAʼULI FAKAFEʼAUGA
12. Kotea te fakaʼuhiga “ ʼe tokaga tou mata ki he faʼahi pe ʼe tahi”?
12 Neʼe ui fenei e Sesu: “Ko te malama ʼo te sino ʼe ko te mata. Kapau ʼe tokaga tou mata ki he faʼahi pe ʼe tahi, pea ʼe malamagia anai tou Mat. 6:22) Kotea tona fakaʼuhiga? ʼE fakaʼuhiga ki te maʼuli fakafeʼauga pea ke tou tokaga ki he fakatuʼutuʼu pe ʼe tahi. ʼE mole tonu ke fakaleluʼi tatou peʼe ke tou liʼaki leva ʼatatou fakatuʼutuʼu. Neʼe tuku mai e Sesu he faʼifaʼitaki lelei kia tatou he neʼe tokaga ʼateaina pe ki te faifakamafola. Neʼe ina akoʼi ki ʼana tisipulo ke natou tokakaga ki tanatou tauhi kia Sehova pea mo Tona Puleʼaga. ʼE tou faʼifaʼitakiʼi ia Sesu mo kapau ʼe tou fakamuʼamuʼa te faifakamafola ʼi totatou maʼuli, mo tou “haga fakamuʼamuʼa ia te Puleʼaga pea mo [te] faitotonu [ʼa te ʼAtua].”—Mat. 6:33.
sino katoa.” (13. Kotea ʼae ʼe feala ke tokoni mai ke tou tokakaga ki te faifakamafola?
13 Ko te faʼahiga fakamuʼamuʼa ʼo tatatou gaue faifakamafola ʼe ko te fakafeʼauga ʼo totatou maʼuli ke lahi age totatou temi ke tou tokoni ai ki te hahaʼi ke natou iloʼi ia Sehova. * Ohage la, ʼe feala koa ke tou fakasiʼisiʼi ʼotatou hola gaue kae ke tou faifakamafola ʼi te vahaʼa? ʼE lagi feala koa ke tou fakasiʼisiʼi ʼatatou fakafiafia?
14. Kotea te ʼu fetogi neʼe fai e te taumatuʼa ke feala ke lahi age tanā faifakamafola?
14 Neʼe fai te faʼahi ʼaia e te tagata ʼafeā ʼe higoa ko Elias pea mo tona ʼohoana. ʼE ina fakamatala fenei: “Neʼe mole feala ke ma pionie atu aipe, kae neʼe lahi te ʼu faʼahi neʼe feala ke ma fakahoko ke lahi ai toma temi ʼi te faifakamafola. Neʼe lahi leva te ʼu fetogi neʼe ma fai ke feala ai hamā kau tuʼumaʼu ki te faifakamafola. Ohage la, neʼe fakasiʼisiʼi ʼamā fakatau, toe fakasiʼisiʼi mo ʼamā fakafiafia pea neʼe ma kole ki ʼomā patolo ke fetogi ʼomā hola gaue ke lahi ai tamā faifakamafola. ʼI te temi nei, kua feala ke ma faifakamafola ʼi te ʼu afiafi, fai he ʼu ako Tohi-Tapu peʼe ma faifakamafola ʼi te vahaʼa tuʼa lua ʼi te mahina. Ko he toe fiafia lahi.”
KE TOU TUPUTUPU ʼI TE FAIFAKAMAFOLA MO TE FAIAKO
15-16. Ohage ko tona ui ia 1 Timoteo 4:13, 15, ʼe feafeaʼi hatatou liliu ʼo faiva ʼi te faifakamafola? (Toe vakaʼi te fakamatala ʼae ʼi te ʼa takai “He ʼu Fakatuʼutuʼu ʼe Tokoni Mai Anai Ke Au Fakahoko Katoa Taku Faifakamafola.”)
15 Ko te tahi aluʼaga ke tou fakahoko katoa ai te faifakamafola ʼe ko te tuputupu ʼi tatatou faʼahiga faifakamafola. ʼI ʼihi gaue, ʼe ʼaoga ke akoʼi lelei te kau gaue ke natou faiva pea mo fakahoko lelei tanatou gaue. ʼE toe feia pe mo te kau faifakamafola ʼo te Puleʼaga, ʼe tonu ke hoko atu tatatou ako ʼae ke tou liliu ko he kau faifakamafola faiva.—Taag. 1:5; lau ia 1 Timoteo 4:13, 15.
16 Kotea ʼae ʼe tonu ke tou fai ke hoko atu tatatou tuputupu ʼi te faifakamafola? ʼE tou tokaga anai ki te ʼu ako ʼae ʼe tou maʼu mai te ʼu fono ʼo te vahaʼa. Ko te ʼu fono ʼaia ʼe akoʼi ai ke tou tuputupu ʼi te faifakamafola. Ohage la ʼe tokoniʼi e te pelesita ia natou ʼae neʼe fai hanatou ʼu kiʼi faipalalau pea ʼe feala pe ke tou taʼofi mai ai he ʼu tokoni ki te tuputupu ʼae ʼi te faifakamafola. ʼE tou fakaʼaogaʼi anai te puani ʼae neʼe tou taʼofi moka tou faifakamafola ki he tahi. ʼE tou kole tokoni anai ki te takitaki ʼo te kiʼi kutuga ʼae ʼe tou kau ai ke tou faifakamafola mo ia peʼe ko he tahi age pe kua faiva, ko he pionie peʼe ko te taupau ’o te siliko. Kapau ʼe tou fakaʼaogaʼi lelei te ʼu Meʼa Gaue Ki Te Faiako, ʼe tou maʼu anai te fiafia ʼi te faifakamafola pea mo te akoʼi ʼo te moʼoni.
17. Kotea anai ʼe kotou logoʼi mo kapau ʼe kotou fakahoko katoa takotou faifakamafola?
17 ʼE foaki mai e Sehova te pilivilesio ʼae ke tou “kaugā gaue” mo ia. (1 Ko. 3:9) Kapau ʼe kotou “iloʼi papau te ʼu meʼa ʼae ʼe maʼuhiga ʼaupito” pea mo kotou tokakaga ki te faifakamafola, ʼe kotou ‘fiafia anai ʼi te tauhi kia Sehova.’ (Flp. 1:10; Pes. 100:2) ʼE kotou kau ʼi te ʼu minisi ʼa te ʼAtua, koia ʼae ʼe feala ai ke kotou falala ʼe foaki atu anai e te ʼAtua te malohi ʼaoga moʼo fakahoko katoa takotou faifakamafola logo la te ʼu fihifihia ʼae ʼe feala ke kotou tau mo ia. (2 Ko. 4:1, 7; 6:4) ʼO mulimuli ki tokotou aluʼaga, pe ʼe kotou faifakamafola lahi peʼe kailoa, ʼe feala pe ke kotou ‘fiafia’ he ʼe kotou faiga fakamalotoloto ke lelei age takotou faifakamafola. (Kal. 6:4) Kapau ʼe kotou fakahoko katoa takotou faifakamafola, ʼe kotou fakaha ai tokotou ʼofa ʼae kia Sehova pea mo tokotou tatau. “ ʼI [takotou] fai te faʼahi ʼaia, ʼe [kotou] haofaki anai ia [koutou] totonu pea mo natou ʼae ʼe fagono atu.”—1 Tim. 4:16.
KATIKO 58 Tou Kumi Te ʼu Kaumeʼa ʼo Te Tokalelei
^ pal. 5 Neʼe foaki mai e Sesu te fakatotonu ʼae ke fakamafola te logo lelei ʼo te Puleʼaga pea mo fai he ʼu tisipulo. ʼI te alatike ʼaeni, ʼe tou vakaʼi anai pe ʼe feafeaʼi hatatou fakahoko katoa tatatou gaue faifakamafola, logo la te ʼu fihifihia ʼae ʼe tou tau mo ia. ʼE tou toe vakaʼi anai pe ʼe feafeaʼi hatatou hikihiki ke lelei age tatatou faifakamafola pea ʼe toe lahi ai anai totatou fiafia.
^ pal. 4 HE ʼU FAKAMAHINO: Ko tatatou tauhi ki te ʼAtua ʼe kau ki ai te ʼu aluʼaga kehekehe ʼo te faifakamafola pea mo te faiako, te laga fale mo te taupau ke tologa te ʼu Fale Fono mo te ʼu Petele pea mo te gaue ki te haofaki maʼuli.—2 Ko. 5:18, 19; 8:4.
^ pal. 13 Vakaʼi te fakamatala ʼae ʼi te ʼa takai “ ʼE Feafeaʼi Anai Hau Fakafaigafua Tou Maʼuli?” ʼi Te Tule Leʼo ʼo Sulio 2016 p. 8.
^ pal. 62 FAKAMATALA ʼO TE ʼU PĀKI: Ko he tuagaʼane ʼe ina fai te faʼifaʼitaki ʼo te ʼuluaki ʼaʼahi ʼi te fono ʼo te vahaʼa. Hili ia pea ʼe ina tohi te ʼu tokoni ʼae neʼe foaki e te pelesita ʼi te Kaupepa Ako. ʼI te fakaʼosi vahaʼa leva, ʼe ina fakaʼaogaʼi ai te ʼu tokoni ʼae neʼe ina tohi ʼi te fono ki te faifakamafola.