ALATIKE AKO 15
Kotou Faʼifaʼitakiʼi Ia Sesu Pea Mo Kotou Taupau Te Tokalelei
“Ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto.”—FLP. 4:7.
KATIKO 113 Kua Tou Maʼu Te Tokalelei
TE ʼU MANATU FAKANOUNOU *
1-2. He koʼe neʼe hoha ia Sesu?
NEʼE hoha ʼaupito ia Sesu ʼi tona ʼaho fakaʼosi. Neʼe kua vave pe tona fakamamahiʼi e te ʼu hahaʼi agakovi ʼo kaku ki tona mate. Kae neʼe mole hoha pe Sesu ʼuhi ko te faʼahi ʼaia. Neʼe ʼofa mamahi ʼi tana Tamai pea neʼe ina fia fakafiafiaʼi tona loto. Neʼe iloʼi pe e Sesu, kapau ʼe nofo agatonu kia Sehova lolotoga tona ʼahiʼahiʼi, ʼe lagolago anai ki te fakatapuha ʼo te huafa ʼo Sehova. Neʼe toe ʼofa ia Sesu ki te hahaʼi, pea neʼe mahino pe kia ia, kapau ʼe nofo agatonu kia Sehova ʼo kaku ki te mate, ʼe feala anai ke tou maʼu ia te ʼamanaki ʼae ki te maʼuli heʼe gata.
2 Logo la neʼe hoha ʼaupito ia Sesu, kae neʼe ina maʼu pe te tokalelei. Neʼe ina ui fenei ki ʼana apositolo: “ ʼE au foaki atu toku tokalelei.” (Soa. 14:27) ʼE ina maʼu ia “te tokalelei ʼo te ʼAtua,” ko te tokalelei ʼae ʼe maʼu e he tahi moka ina maʼu he ʼu felogoi lelei mo Sehova. Koia ʼae neʼe tokalelei ai te fakakaukau ʼa Sesu pea mo tona loto.—Flp. 4:6, 7.
3. Kotea ʼae ka tou vakaʼi anai ʼi te alatike ʼaeni?
3 ʼE mole he tahi ia tatou ʼe tau anai mo te ʼu faʼahiga mamahi ʼae neʼe tau pea mo Sesu, kae ko natou fuli ʼae ʼe natou fia muliʼi ia Sesu ʼe natou tau anai mo ni ʼahiʼahi. (Mat. 16:24, 25; Soa. 15:20) Pea ohage pe ko Sesu, ʼe feala ʼi ʼihi temi ke tou hoha. Kotea ʼae ʼe tonu ke tou fai ke mole tou tuʼania fau ʼo puli ai totatou tokalelei? Tou vakaʼi pe kotea te ʼu faʼahi ʼe tolu neʼe fai e Sesu lolotoga tana faifakamafola ʼi te kele pea mo vakaʼi pe ʼe tou lava faʼifaʼitakiʼi feafeaʼi ia ia moka tou tau mo ni ʼahiʼahi.
NEʼE FAIKOLE TUʼUMAʼU IA SESU
4. ʼO mulimuli kia 1 Tesalonika 5:17, kotou fakaha he ʼu faʼifaʼitaki neʼe ha ai neʼe faikole tuʼumaʼu ia Sesu ʼi tona ʼaho fakaʼosi ʼi te kele?
4 Lau ia 1 Tesalonika 5:17. ʼI te ʼaho fakaʼosi ʼo tona maʼuli ʼi te kele, neʼe faikole tuʼumaʼu ia Sesu. ʼI te temi ʼae neʼe ina fakaha ai ki ʼana tisipulo pe ʼe feafeaʼi te fakamanatu ʼo tona mate, neʼe faikole ʼo ʼuhiga mo te pane pea mo te vino. (1 Ko. 11:23-25) ʼI muʼa ʼo tanatou mavae mai te koga fale ʼae neʼe natou fai ai te Pasikate, neʼe faikole ia Sesu pea mo ʼana tisipulo. (Soa. 17:1-26) ʼI tana tau atu pea mo ʼana tisipulo ki te Moʼuga ʼo Oliveto, ʼi te po ʼaia, neʼe faikole liuliuga. (Mat. 26:36-39, 42, 44) Pea ko ʼana palalau fakaʼosi ʼi muʼa pe ʼo tona mate, neʼe ko tana faikole ki te ʼAtua. (Luka 23:46) Neʼe faikole ia Sesu kia Sehova ʼo ʼuhiga mo te ʼu aluʼaga fuli ʼae neʼe hoko kia ia ʼi tona ʼaho fakaʼosi.
5. He koʼe neʼe mole lototoʼa te ʼu apositolo ʼa Sesu?
5 Neʼe lava katakiʼi e Sesu tona ʼahiʼahiʼi he neʼe falala ki tana Tamai, pea neʼe ina fakaha te faʼahi ʼaia ʼi tana faikole tuʼumaʼu ki ai. Kae ʼi te po ʼaia neʼe mole faʼa kataki te ʼu apositolo ʼo faikole tuʼumaʼu. Koia neʼe mole natou lototoʼa ai ʼi te temi ʼae neʼe ʼahiʼahiʼi ai natou. (Mat. 26:40, 41, 43, 45, 56) Ka tou tau mo ni ʼahiʼahi, ʼe tou nonofo agatonu anai mo kapau ʼe tou faʼifaʼitakiʼi ia Sesu ʼo tou “faikole tuʼumaʼu.” Kotea ʼae ʼe feala ke tou ui ʼi ʼatatou faikole?
6. He koʼe ʼe ʼaoga te tui ke tou taupau ai te tokalelei?
6 ʼE feala ke tou kole kia Sehova ke ina ‘fakatuputupu tatatou tui.’ (Luka 17:5; Soa. 14:1) ʼE maʼuhiga kia tatou te tui, he ʼe ʼahiʼahiʼi anai e Satana ia natou fuli ʼae ʼe natou fia muliʼi ia Sesu. (Luka 22:31) ʼE ʼaoga kia tatou te tui ke tou lava taupau te tokalelei, tafito la moka hoko hoholo te ʼu fihifihia. Kotea tona tupuʼaga? Ka hoko he fihifihia, ʼe tou faiga anai ke tou fakatokatoka te koga ʼaia. Pea kapau ʼe tou tui kia Sehova, ʼe mole tou tuʼania fau anai, koteʼuhi ʼe tou tui papau ʼe fakatokatoka anai e Sehova te koga ʼaia ʼi tona temi totonu. Kapau ʼe tou tui papau ʼe fakatokatoka anai e Sehova te aluʼaga ʼaia, pea tokalelei anai ʼatatou fakakaukau pea mo ʼotatou loto.—1 Pet. 5:6, 7.
7. Kotea te ako ʼe tou maʼu mai ia Robert?
7 Ka tou tau mo he faʼahiga ʼahiʼahi pe, ʼe feala ke tou taupau totatou tokalelei mo kapau ʼe tou faikole kia Sehova. Koʼeni te aluʼaga neʼe hoko kia Robert, ko te tagata ʼafeā kua taʼu 80 nei. Neʼe ina ui fenei: “Neʼe ʼaoga ʼosi kia au ia Filipe 4:6, 7, ke au lava tauʼi ʼoku fihifihia. Neʼe au tau mo he ʼu fihifihia fakapaʼaga. ʼI te tahi temi neʼe mole kei au tagata ʼafeā.” Kotea ʼae neʼe tokoni kia Robert ke ina taupau tona tokalelei? Neʼe ina ui fenei: “Neʼe au faikole ʼi te temi pe ʼae neʼe au hoha ai. ʼE au tui papau ka au faikole tuʼumaʼu pea ʼe au logoʼi te tokalelei ʼo toku loto.”
NEʼE FAʼAFAI IA SESU ʼI TE FAIFAKAMAFOLA
8. Ka tou lau ia Soane 8:29, he koʼe neʼe tokalelei pe te loto ʼo Sesu?
8 Lau ia Soane 8:29. Neʼe tokalelei pe te loto ʼo Sesu maʼia ʼi te ʼu temi ʼae neʼe fakatagaʼi ai ia ia, he neʼe ina iloʼi ʼe ina fakafiafiaʼi te loto ʼo tana Tamai. Neʼe nofo agatonu kia te ia, ʼi te ʼu temi ʼae neʼe faigataʼa ai tana fakalogo. Neʼe ʼofa ʼi tana Tamai pea neʼe ina fakamuʼamuʼa tana tauhi ʼae kia Sehova ʼi tona maʼuli katoa. ʼI muʼa ʼo tana hifo mai ki te kele, neʼe ko te “tufuga faiva” ʼa te ʼAtua. (Taag. 8:30, MN) Pea ʼi tana ʼi te kele, neʼe ina akoʼi ki te hahaʼi, ʼaki he faʼafai, pe ko ai tana Tamai. (Mat. 6:9; Soa. 5:17) Neʼe logoʼi e Sesu ia te toe fiafia lahi ʼuhi ko tana fakahoko ia te gaue ʼaia.—Soa. 4:34-36.
9. He koʼe ʼe tou taupau totatou tokalelei moka tou maʼumaʼua ʼi te gaue faifakamafola?
9 ʼE feala ke tou faʼifaʼitakiʼi ia Sesu moka tou fakalogo kia Sehova, pea ke “lahi tuʼumaʼu [ʼatatou] gaue ʼi te ʼAliki.” (1 Ko. 15:58) Ka tou “tokaga tafito” ki te gaue faifakamafola, ʼe mole tou hoha anai ʼuhi ko ʼotatou fihifihia. (Gaue 18:5) Ohage la, ko te hahaʼi ʼae ʼe tou felaveʼi ʼi te faifakamafola ʼe natou tau mo he ʼu faigataʼaʼia ohage pe ko tatou. Pea ka natou ako ʼo ʼuhiga mo Sehova pea mo ʼoʼofa ai, mo natou maʼuliʼi ʼana tokoni, ʼe fetogi anai ʼonatou maʼuli pea mo natou fiafia age. Ka tou sisio ki he ʼu aluʼaga feia, ʼe tou tui papau ai ʼe tokaga anai ia Sehova kia tatou. Koia ʼe mole tou hoha fau anai pea mo taupau totatou tokalelei. Neʼe ʼi ai te tehina neʼe ina maʼu he ʼu manatu fakatupu lotomamahi ʼo ʼuhiga mo ia totonu, he neʼe manatu ʼe mole hona ʼaoga pea ʼe mole he ʼuhiga ʼo tona maʼuli. Pea neʼe faiga ʼi tona maʼuli katoa ke ina tauʼi te ʼu manatu ʼaia. Neʼe ina ui fenei: “Ka au maʼumaʼua ʼi te gaue faifakamafola, ʼe au logoʼi toku fiafia. Neʼe au tokagaʼi ai kapau ʼe au kau ki te gaue faifakamafola, ʼe au nofo ovi kia Sehova.”
10. Kotea te ako ʼe tou maʼu mai ia Brenda?
10 Kotou tokagaʼi te aluʼaga ʼaeni neʼe hoko ki te tuagaʼane ko Brenda. Neʼe tau pea mo tana taʼahine mo te mahaki kovi ʼae ko te Sclérose en plaques. Neʼe mole kei feala ke haʼele ia Brenda koia neʼe fealuʼaki ai mo tana kiʼi saliote toho pea neʼe mole kei hona malohi. Kapau ʼe feala, pea ʼe alu ʼo faifakamafola ʼi te ʼu ʼapi, kae ʼe lahi age pe tana faitohi ki te hahaʼi. Neʼe ina ui fenei: “Neʼe hoki au tokaga tafito ki te gaue faifakamafola ʼi te temi pe ʼae neʼe au mahino ai ʼe mole feala anai ke au malolo ʼi toku mahaki ʼi te tuʼu ʼaeni. Ka au faifakamafola ʼe mole kei au manatu ki ʼoku mamahi. ʼE au faiga tafito ke au tokoni kia natou ʼae ʼe matou felaveʼi ʼi te telituale ʼo tomatou kokelekasio. Pea ʼe au manatuʼi tuʼumaʼu te ʼamanaki lelei ʼae ʼe au maʼu anai ʼo ʼuhiga mo toku ka haʼu.”
NEʼE TALI E SESU KE TOKONI KI AI ʼONA KAUMEʼA
11-13. (1) Neʼe fakaha feafeaʼi e te ʼu apositolo pea mo ʼihi atu neʼe ko te ʼu kaumeʼa moʼoni ʼo Sesu? (2) Kotea ʼae neʼe logoʼi e Sesu ʼi te tokoni ʼo ʼona kaumeʼa kia ia?
11 Lolotoga tana minisitelio ʼi te kele, neʼe fakaha e te ʼu apositolo agatonu ʼa Sesu tanatou kaumeʼa lelei mo ia. Neʼe natou maʼuliʼi te tokoni ʼae ʼe ui ʼi te taʼaga lea: “Kae ʼe ʼi ai te kaumeʼa ʼe ʼofa lahi age ia ʼi he tehina.” (Taag. 18:24) Neʼe maʼuhiga ʼosi te ʼu kaumeʼa feia kia Sesu. Lolotoga tana minisitelio, neʼe mole he tahi ʼi ʼona tehina totonu neʼe tui kia te ia. (Soa. 7:3-5) ʼI te tahi ʼaho, neʼe ui e tona famili kua liliu ia ʼo vale. (Mko. 3:21) Kae ʼi te fakaʼosi ʼi muʼa ʼo tona mate, neʼe ui fenei e Sesu ki ʼana apositolo ʼae neʼe nonofo agatonu kia te ia: “Ko koutou ʼae neʼe kotou fakatahi tuʼumaʼu mo au ʼi ʼoku ʼahiʼahi.”—Luka 22:28.
12 ʼI ʼihi temi, neʼe feala pe ke lotovaivai te ʼu apositolo ʼa Sesu. Neʼe mole ina taʼofi ʼanatou lakahala, kae neʼe tokagaʼi tafito e Sesu tanatou tui ʼae kia te ia. (Mat. 26:40; Mko. 10:13, 14; Soa. 6:66-69) ʼI te po fakaʼosi ʼi muʼa ʼo tona mate, neʼe ui fenei e Sesu ki ʼana tagata agatonu: “ ʼE au fakahigoaʼi koutou ko ʼoku kaumeʼa koteʼuhi neʼe au fakaha atu kia koutou ia meʼa fuli neʼe au logo ki ai mai taku Tamai.” (Soa. 15:15) ’E mahino, neʼe fakalotomalohiʼi lahi e te ʼu kaumeʼa ʼo Sesu ia ia. Neʼe fiafia lahi ia Sesu ʼuhi ko te tokoni ʼae neʼe foaki age ki ai e ʼona kaumeʼa.—Luka 10:17, 21.
13 Kae neʼe ʼi ai te tahi ʼu kaumeʼa ʼo Sesu. Neʼe ko te ʼu tagata mo te ʼu fafine neʼe tokoni ki ai Luka 10:38-42; Soa. 12:1, 2) Ko ʼihi neʼe natou faifolau mo ia pea mo vaevae mo ia ʼonatou koloa. (Luka 8:3) Neʼe ʼi ai pe te ʼu kaumeʼa lelei ʼo Sesu neʼe fia tokoni ki ai, he ʼe natou iloʼi ʼe tokoni anai ia Sesu kia natou. Neʼe agalelei kia natou pea mo fakapotopoto, neʼe mole ina fakamaʼua kia natou he ʼu meʼa ʼe mole natou lavaʼi. Neʼe haohaoa ia Sesu, kae neʼe fiafia pe ʼi te tokoni age ʼo ʼona kaumeʼa heʼe haohaoa. Pea neʼe mahino kia natou, ka natou tokoni ki ai, ʼe ina lava taupau tona tokalelei.
ʼi te gaue faifakamafola pea mo te tahi ʼu aluʼaga. Ko ʼihi neʼe natou fakaafe ia ia ki ʼonatou ʼapi ke natou kai meʼa kai. (14-15. ʼE feafeaʼi he maʼu ʼo hotatou ʼu kaumeʼa lelei? Pea ʼe natou tokoni feafeaʼi mai anai kia tatou?
14 Ko he ʼu kaumeʼa lelei ʼe tokoni mai anai ke tou nofo agatonu kia Sehova. Pea kapau ʼe kotou fia maʼu hokotou kaumeʼa lelei, ʼe tonu foki ke tou liliu ko he kaumeʼa ʼe lelei. (Mat. 7:12) Ohage la, ʼe tokoni mai te Tohi-Tapu ke tou faiga malohi ʼo tokoni ki ʼihi tafito natou “ ʼae ʼe nofo ʼi te faigataʼaʼia.” (Efe. 4:28) ʼE ʼi ai koa he tahi ʼi te kokelekasio ʼe tonu ke kotou tokoni ki ai? ʼE feala koa ke kotou fai he fakatau ʼa he tahi ʼe mahaki peʼe kua vaivai matuʼa? ʼE feala koa hakotou foaki he meʼa kai ki he famili ʼe mole lahi hanatou foʼi falā? Kapau ʼe kotou popoto ʼi te fakaʼaogaʼi ʼo te tuʼasila jw.org® peʼe ko te application JW Library®, ʼe kotou tokoni koa kia natou ʼae ʼe mole popoto ʼi te fakaʼaogaʼi ʼo te tuʼasila ʼaia? Kapau ʼe tou maʼumaʼua ʼi te tokoni ki ʼihi, ʼe tou fiafia anai.—Gaue 20:35.
15 ʼE tokoni mai anai ʼotatou kaumeʼa moka tou tau mo he ʼu faigataʼaʼia. ʼE natou tokoni Sopo 32:4) ʼAua naʼa tou manatu ʼe toʼo anai e ʼotatou kaumeʼa te ʼu tonu maʼa tatou. Kae ʼe tou fakapotopoto anai ʼo fakalogo ʼanatou tokoni ʼae ʼe fakatafito ki te Tohi-Tapu. (Taag. 15:22) Ko te Hau ko Tavite, neʼe ina tali ʼaki he agavaivai ke tokoni age ʼona kaumeʼa. ʼE feia mo tatou, ʼe mole tonu ke tou fialahi ʼo mole tou fia tali te tokoni ʼo ʼotatou kaumeʼa moka tou tau mo he ʼu fihifihia. (2 Sam. 17:27-29) ʼEi, ko he ʼu kaumeʼa feia ko he ʼu meʼa ʼofa ia mai ia Sehova.—Skp. 1:17.
mai ke tou taupau te tokalelei ʼo te loto. Neʼe fakalogo lelei Eliu kia Sopo ʼi tana fakamahino age ʼona mamahi. ʼE toe feia pe mo ʼotatou kaumeʼa, ʼe natou fakalogo moka tou palalau age ki ʼotatou fihifihia. (ʼE TOU TAUPAU FEAFEAʼI TE TOKALELEI?
16. ʼO mulimuli kia Filipe 4:6, 7, ʼe tou maʼu feafeaʼi anai te tokalelei? Kotou fakamahino.
16 Lau ia Filipe 4:6, 7. He koʼe ʼe ui mai e Sehova ʼe hoki tou maʼu te tokalelei “ ʼaki ia Kilisito Sesu”? Koteʼuhi ʼe tou maʼu pea mo taupau te tokalelei ʼo te loto mo kapau ʼe tou mahino pea mo tou tui ki te tuʼulaga ʼo Sesu ʼi te ʼu fakatuʼutuʼu ʼa Sehova. Ohage la, ʼaki te sakilifisio faitotogi ʼo Sesu, neʼe feala ai ke fakamolemole ʼatatou agahala. (1 Soa. 2:12) ʼE ko he manatu fakalotomalohi kia tatou. Ko Sesu te Hau ʼo te Puleʼaga ʼo te ʼAtua ʼae ka ina molehi te ʼu malaʼia fuli neʼe fakahoko e Satana pea mo tana tuʼu agakovi ʼaeni. (Esa. 65:17; 1 Soa. 3:8; Fkha. 21:3, 4) Pea ʼe ko he toe fiafia lahi kia tatou. Koia, ʼe tatau aipe pe neʼe foaki mai e Sesu he gaue faigataʼa kae ʼe nofo mo tatou ʼo tokoni mai ʼi te ʼu ʼaho fakaʼosi ʼo te tuʼu ʼaeni. (Mat. 28:19, 20) ʼE tou maʼu te fimalie, te ʼamanaki pea mo te lototoʼa he ʼe ko te ʼu fakatafito malohi ʼaia ʼo totatou tokalelei. Pea ʼe ko he fakalotomalohi kia tatou.
17. (1) ʼE taupau feafeaʼi e he Kilisitiano te tokalelei ʼo tona loto? (2) Ohage ko tona fakapapau e Soane 16:33, kotea anai ʼae ka tou lava fakahoko?
17 ʼE kotou taupau feafeaʼi te tokalelei ʼo te loto moka kotou tau mo he ʼu fihifihia? Mo kapau ʼe tou fai te ʼu gaue ʼae neʼe fakahoko e Sesu. ʼUluaki, kotou faikole pea haga faikole logo la te ʼu fihifihia ʼae ʼe kotou tau mo ia. Lua, kotou fakalogo kia Sehova pea mo faʼafai ʼi te faifakamafola tatau aipe pe ʼe faigataʼa. Tolu leva, kotou kumi tokoni ki ʼokotou kaumeʼa. Pea ko te tokalelei ʼo te ʼAtua ʼe ina taupau anai takotou fakakaukau pea mo tokotou loto. Pea ohage ko Sesu, ʼe kotou malo anai ʼi he faʼahiga fihifihia pe.—Lau ia Soane 16:33.
KATIKO 41 Ke Ke Fagono Ki Siʼaku Kole
^ pal. 5 ʼE tou tau fuli mo he ʼu faigataʼaʼia ʼe feala ke puli ai totatou tokalelei. ʼE tou vakaʼi anai ʼi te alatike ʼaeni he ʼu faʼahi ʼe tolu neʼe fai e Sesu pea ʼe feala ke tou fai mo tatou ke tou maʼu ai te tokalelei, tatau aipe pe ʼe tou tau mo he ʼu faigataʼaʼia fakamataku.