ALATIKE AKO 16
Kotou Tauʼi Te Moʼoni ʼo ʼUhiga Mo Te Mate
“ ʼE tou iloʼi ai te folafola ʼae ʼe moʼoni mai te folafola ʼae ʼe hala.”—1 SOA. 4:6.
KATIKO 73 Ke Matou Lototoʼa
TE ʼU MANATU FAKANOUNOU *
ʼE mole tou kau ki te ʼu agaʼi fenua ʼae ʼe fehiʼa ki ai te ʼAtua, kae ʼe feala pe ke tou fakafimalieʼi totatou famili ʼae ʼe putu (Vaka’i te palakalafe 1-2) *
1-2. (1) ʼE fakahalaʼi feafeaʼi e Satana te hahaʼi? (2) Kotea ʼae ka tou vakaʼi ʼi te alatike ʼaeni?
KO SATANA “te tamai ʼo te loi” ʼae neʼe ina fakahalaʼi te hahaʼi talu mai te kamata ʼo te hisitolia ʼo te tagata. (Soa. 8:44) ʼE kau ki ʼana loi te ʼu akonaki hala ʼo ʼuhiga mo te kau mate pea mo te maʼuli hili te mate. ʼE lahi te ʼu agaʼi fenua ʼe fakatafito ki te ʼu akonaki hala. Koia la ʼae, ʼe tonu ai ki te ʼu tehina mo tuagaʼane ke natou “taupau [tanatou] tui” moka mate he tahi ʼi tonatou famili peʼe ʼi te kolo.—Suta 3.
2 Kapau ʼe kotou tau mo he fihifihia feia, kotea ʼae ka tokoni atu ke kotou nofo agatonu pea mo kotou fakaʼapaʼapa ki te ʼu palalau ʼae ʼe tou maʼu ʼi te Tohi-Tapu ʼo ʼuhiga mo te kau mate? (Efe. 6:11) ʼE feafeaʼi hakotou fakafimalieʼi mo fakalotomalohiʼi he tehina peʼe ko he tuagaʼane ʼe fakamalohiʼi ke kau ki he agaʼi fenua ʼe fehiʼa ki ai ia te ʼAtua? ʼE tou vakaʼi anai ʼi te alatike ʼaeni pe ʼe feafeaʼi he tokoni mai ʼa Sehova kia tatou. Kae ʼe tou vakaʼi muʼa pe ʼe kotea ʼae ʼe ui ʼi te Tohi-Tapu ʼo ʼuhiga mo te kau mate?
TE MOʼONI ʼO ʼUHIGA MO TE KAU MATE
3. Kotea te ʼu nunuʼa ʼo te ʼuluaki loi?
3 Neʼe mole fakatupu e te ʼAtua te tagata ke mate. Ke maʼu e Atama mo Eva te maʼuli heʼe gata, neʼe tonu ke nā fakalogo kia Sehova. Neʼe ina foaki kia naua he fakatotonu ʼe faigafua: “E mole ke kai anai ki te akau o te iloilo o te lelei mo te kovi, koteuhi ko te aho ae e ke kai ai anai ki te akau aena, e ke mate anai.” (Sen. 2:16, 17) Pea neʼe haʼu leva ia Satana ʼo fakatupu he ʼu fihifihia. Neʼe fakaʼaogaʼi leva e Satana te gata moʼo palalau kia Eva ʼo ina ui fenei: “E mole kolua mamate anai.” ʼE fakaʼofaʼofa he neʼe tui ia Eva ki te loi ʼaia ʼo ina kai ai te fuaʼi ʼakau. Ki muli age, neʼe toe kai tona ʼohoana ki te fuaʼi ʼakau ʼaia. (Sen. 3:4, 6) Neʼe agahala leva te hahaʼi fuli pea mo natou mamate ʼuhi ko te aluʼaga ʼaia.—Loma 5:12.
4-5. ʼE hoko atu feafeaʼi e Satana tana fakahalaʼi te hahaʼi?
4 Ohage pe ko tona fakatotonu e te ʼAtua, neʼe mamate leva ia Atama mo Eva. Kae ko Satana neʼe mole gata tana loi ʼo ʼuhiga mo te mate. Ki muli age neʼe ina toe fai ʼihi loi. Ohage la, ka mate he tahi ʼe pala tona sino kae mavae tona laumalie ʼo alu ki he tahi faʼahi. Ia ʼaho nei, kei hoko atu pe e Satana tana fakahalaʼi te hahaʼi ʼaki ʼana ʼihi loi.—1 Tim. 4:1.
5 He koʼe ʼe kaugā malie ia natou ʼae ʼe tui ki te ʼu loi ʼa Satana? ʼE ina iloʼi te manatu ʼa te hahaʼi ʼo ʼuhiga mo te mate pea ʼe ina toe iloʼi pe ʼe feafeaʼi honatou fakahalaʼi. Neʼe fakatupu tatou ke tou maʼuli ʼo heʼe gata. Koia la ʼae, ʼe mole tou fia mamate ai. (Ekl. 3:11) Ko te mate ʼe ko totatou fili.—1 Ko. 15:26.
6-7. (1) Neʼe feala koa ke fufu e Satana te moʼoni ʼo ʼuhiga mo te mate? Fakamahino. (2) ʼE tokoni feafeaʼi mai te ʼu moʼoni Fakatohi-tapu ke ʼaua naʼa tou matataku ki te mate?
6 Logo la te ʼu faiga ʼa Satana kae neʼe mole feala ke fufu te moʼoni ʼo ʼuhiga mo te mate. Tokolahi kua natou iloʼi ʼi te temi nei pe kotea ʼae ʼe akoʼi mai ʼi te Tohi-Tapu ʼo ʼuhiga mo te aluʼaga ʼo te kau mate pea mo te ʼamanaki ki te fakatuʼuake pea ʼe natou fakaha ki te hahaʼi te ʼu moʼoni ʼaia. (Ekl. 9:5, 10; Gaue 24:15) Ko te ʼu moʼoni ʼaia, ʼe fakalotomalohi pea mo tokoni mai ke ʼaua naʼa tou matataku ki te mate. Pea kua tou iloʼi lelei te aluʼaga ʼo he tahi moka mate. Ohage la ʼe mole tou toe matataku anai ki te mate pea mo te kau mate. ʼE tou iloʼi ʼe mole kei natou maʼuʼuli pea ʼe mole feala ke natou fakamamahiʼi tatou. ʼE hage pe ʼe natou momoe. (Soa. 11:11-14) ʼE tou toe iloʼi foki ʼe mole iloʼi e te kau mate te haʼele ʼo te temi. Koia la ʼae ko natou ʼae kua fualoa tanatou mamate ʼe hage pe ia neʼe heʼeki faʼa fualoa hanatou mamate.
7 ʼE kotou manatu koa la ko te moʼoni ʼo ʼuhiga mo te mate ʼe faigafua pe hatatou mahino ki ai? ʼE kehekehe ia mo te ʼu loi ʼa Satana ʼae ʼe faigataʼa hatatou mahino ki ai. Ko te ʼu loi ʼaia ʼe mole natou fakahalaʼi pe te hahaʼi kae ʼe ko he fasituʼu ki totatou Tupuʼaga? Ke tou mahino lelei ki te ʼu fua kovi ʼae ʼe fakatupu e Satana, tou faigaʼi ke tou tali ki te ʼu fehuʼi ʼaeni: ʼE fasituʼu feafeaʼi te ʼu loi ʼa Satana kia Sehova? Neʼe fakahalaʼi feafeaʼi e te ʼu loi ʼaia te manatu ʼa te hahaʼi ʼo ʼuhiga mo te sakilifisio faitotogi ʼa Kilisito? Kua tuputupu feafeaʼi te mamahi ʼa te hahaʼi?
ʼE FAKATUPU E TE ʼU LOI ʼA SATANA TE ʼU MAMAHI LAHI
8. Ohage ko tona fakaha mai ia Selemia 19:5, he koʼe ʼe ko he fasituʼu te ʼu loi ʼa Satana kia Sehova?
8 Ko te ʼu loi ʼa Satana ʼo ʼuhiga mo te mate ʼe ko he fasituʼu kia Sehova. ʼI ʼana loi ʼaia, ʼe ʼi ai te akonaki ʼo ʼuhiga mo he tahi ʼe mate ʼe feala ia ke alu ʼo mamahi ʼi he ʼifeli kakaha. Ko te ʼu faʼahiga akonaki ʼaia ʼe ko he fasituʼu ki te ʼAtua. ʼO feafeaʼi? ʼE ʼekenaki e te ʼu akonaki hala ʼaia te hahaʼi ke natou tui ko te ʼAtua ʼofa ʼe faifakapo pea mo agakovi. (1 Soa. 4:8) Kotea takotou manatu? Pea kotea te manatu ʼa Sehova? ʼE fehiʼa ia Sehova ki te ʼu agakovi fuli pea mo te faifakapo.—Lau ia Selemia 19:5.
9. ʼE meʼa noaʼi feafeaʼi e te ʼu loi ʼa Satana te maʼuhiga ʼo te sakilifisio faitotogi ʼo Kilisito ʼae ʼe talanoa ia Soane 3:16 pea mo te 15:13?
9 Ko te ʼu loi ʼa Satana ʼo ʼuhiga mo te mate ʼe natou meʼa noaʼi te sakilifisio faitotogi ʼo Kilisito. (Mat. 20:28) Ko te tahi loi ʼa Satana ʼe ko te hoko atu te maʼuli ʼo te tagata hili te mate. Ka na pau la neʼe moʼoni te loi ʼaia, neʼe maʼuʼuli te hahaʼi ʼo heʼe gata. Pea neʼe mole he ʼuhiga ʼo te momoli e Kilisito tona maʼuli ko he totogi maʼa tatou pea ke tou maʼu ai te maʼuli heʼe gata. Kotou manatuʼi ko te sakilifisio ʼo Kilisito ʼe ko he fakamoʼoni lahi ʼaia ʼo te ʼofa ʼo te ʼAtua kia tatou. (Lau ia Soane 3:16; 15:13.) Fakakaukauʼi age muʼa pe kotea ʼae neʼe logoʼi e Sehova pea mo Sesu ʼi tanā sisio ki te ʼu akonaki loi ʼae ʼe meʼa noaʼi ai te meʼa ʼofa maʼuhiga ʼae neʼe nā fai.
10. ʼE tuputupu feafeaʼi te mamahi ʼo te hahaʼi ʼuhi ko te ʼu loi ʼa Satana ʼo ʼuhiga mo te mate?
10 ʼE fakatuputupu e te ʼu loi ʼa Satana te ʼu mamahi ʼa te hahaʼi. Ko he ʼu matuʼā ʼe lotomamahi ʼi te mate ʼo hanā fanau. ʼE feala pe ke nā ui ko te finegalo ʼo te ʼAtua pea lagi kua liliu ia ko he ʼaselo ʼi te lagi. ʼE fakafimalieʼi koa e te ʼu loi ʼa Satana te hahaʼi peʼe tuputupu ai ʼonatou mamahi? Neʼe fakaʼaogaʼi te akonaki loi ki te ʼifeli kakaha moʼo fakamamahiʼi pea mo tutu ia natou ʼae neʼe fakafeagai ki te ʼu akonaki ʼo te ʼekelesia. ’E fakamahino ’i te tohi ʼae ’e palalau ’o ʼuhiga mo te Telepinale Fakalotu ʼo Sepania (Inquisition espagnole), neʼe ʼi ai ʼihi tuʼi fakamau neʼe natou tutu te hahaʼi ʼae neʼe mole natou tali te ʼu akonaki ʼa te ʼekelesia, ke natou fakahemala ai ʼi muʼa ʼo tanatou mamate pea ke mole ʼave natou ki te ʼifeli kakaha hili tanatou mamate. ʼE lahi te ʼu fenua ʼe fakahoko e te hahaʼi tanatou tauhi ki ʼanatou kui ʼae kua mamate mo fakamaʼuhigaʼi natou pea mo kole tapuakina kia natou. ʼE ʼi ai ʼihi ʼe natou faiga ke ʼaua naʼa iita ʼanatou kui ʼae kua mamate, ke ʼaua naʼa natou tauteaʼi natou. Kae ko te ʼu akonaki ʼaia ʼe fakatafito ki te ʼu loi ʼa Satana, ʼe mole ina fakafimalieʼi te loto ʼo te hahaʼi. Kailoa, kae ʼe natou fakatupu hoha pea mo fakamatakuʼi te hahaʼi.
ʼE FEAFEAʼI HATATOU PUIPUI TE ʼU MOʼONI ʼO TE TOHI-TAPU?
11. ʼE fakamalohiʼi feafeaʼi tatou e te famili peʼe ko te ʼu kaumeʼa ke tou fai he ʼu meʼa ʼe fakafeagai ki te Tohi-Tapu?
11 Kapau ʼe tou ʼoʼofa kia Sehova mo tana Folafola, ʼe tou fakalogo anai kia te ia tatau aipe pe ʼe fakamalohiʼi tatou e ʼotatou famili peʼe ko ʼotatou kaumeʼa ke tou fai he agaʼi fenua ʼe mole alu tahi mo te Tohi-Tapu. ʼE feala pe ke natou faigaʼi te fakamalaloʼi ʼo tatou ʼo natou ui ʼe mole tou fakaʼapaʼapa peʼe mole tou ʼoʼofa kia ia ʼae neʼe mate. Pea ʼe toe feala pe ke natou ui mai ʼe fakamamahiʼi anai tatou ʼe ia ʼae kua mate ʼuhi ko tatatou fakafisi ki ʼanatou agaʼi fenua. ʼE tou puipui feafeaʼi te ʼu moʼoni ʼo te Tohi-Tapu? ʼE tou vakaʼi anai pe ʼe feafeaʼi hatatou maʼuliʼi te ʼu pelesepeto Fakatohi-tapu ka hoa mai.
12. Kotea te ʼu agaʼi fenua ʼo te kau mate ʼe fakafeagai ki te Tohi-Tapu?
12 Tou “mavae kehe mai” te ʼu akonaki hala mo te ʼu agaʼi fenua ʼae ʼe fakafeagai ki te Tohi-Tapu. (2 Ko. 6:17) ʼI he koga fenua ʼo Caraïbes, ʼe kaugā malie ai te hahaʼi ʼe natou tui ka mate he tahi pea ko tona “laumalie” ʼe taka ia natou pea ʼe ina tauteaʼi ia natou ʼae neʼe natou fakamamahiʼi ia ia. ʼE fakamahino fenei ʼi te tohi, ko te “laumalie” ʼe feala pe ke ina “fakahoko he ʼu maumau ʼi he kolo.” ʼE ko he agaʼi fenua ʼi Afelika ko te ʼuʼufi ʼo te ʼu sioʼata ʼi te loto fale feia mo te ʼu pāki ʼo ia ʼae kua mate. Kotea tona tupuʼaga? Ko ʼihi ʼe natou ui ʼe mole feala ki te kau mate ke natou fesioʼaki. Kae kia tatou Kau Fakamoʼoni ʼa Sehova, ʼe mole feala anai ke tou tui ki te ʼu fagana pea mo tou kau ki he ʼu aluʼaga ʼe fakatafito ki te ʼu loi ʼa Satana.—1 Ko. 10:21, 22.
Kapau ʼe tou fai he ʼu fekumi ʼi ʼatatou nusipepa pea mo fakamahino ʼaki he fakaʼapaʼapa ki ʼotatou famili ʼae ʼe mole tauhi kia Sehova, ʼe mole tou tau anai mo he ʼu fihifihia (Vaka’i te palakalafe 13-14) *
13. Ohage ko tona ui ia Sakopo 1:5, kotea anai ka kotou fai mo kapau ʼe mole kotou iloʼi papau pe ʼe fakafeagai he agaʼi fenua ki te Tohi-Tapu?
13 Kapau ʼe mole kotou iloʼi papau ʼe fakafeagai he agaʼi fenua ki te Tohi-Tapu, kotou faikole kia Sehova ʼaki te tui pea mo kotou kole te poto. (Lau ia Sakopo 1:5.) Pea kotou fai he ʼu fekumi ʼi ʼatatou nusipepa. Kapau leva ʼe ʼaoga, kotou kole tokoni ki te ʼu tagata ʼafeā ʼo takotou kokelekasio. ʼE mole natou fakaha atu anai pe kotea ʼae ʼe tonu ke kotou fai kae ʼe natou tokoni atu anai ke kotou maʼu ia te ʼu pelesepeto Fakatohi-tapu ohage la ko te ʼu pelesepeto ʼaeni neʼe tou vakaʼi. Kapau ʼe kotou fai feia, ʼe kotou fakaʼaogaʼi anai ʼokotou “fealagia fakakaukau” pea ʼe tokoni atu anai ke kotou lava “fakakehekeheʼi te meʼa ʼae ʼe lelei mo te meʼa ʼae ʼe kovi.”—Hep. 5:14.
14. Kotea ʼae ʼe tonu ke tou fai ke ʼaua naʼa tou fakatukia te hahaʼi?
14 “Kotou fai ia meʼa fuli moʼo fakakololiaʼi ia te ʼAtua. ʼAua naʼa kotou fakatupu tukia.” (1 Ko. 10:31, 32) Kapau ʼe tou fakatotonu ke tou kau ki he agaʼi fenua, ʼe tonu ke tou fakakaukauʼi pe ʼe ko te tonu ʼae neʼe tou toʼo ʼe mole fakatukia anai ki ʼihi kae tafito ʼotatou tehina mo tuagaʼane. ʼE mole he temi ʼe tou fia fakatukia ai he tahi. (Mko. 9:42) ʼE toe feia pe mo natou ʼae ʼe mole ko he Kau Fakamoʼoni ʼa Sehova, ʼe mole tou fai anai he meʼa ke natou lotomamahi ai. ʼE ʼekenaki tatou e te ʼofa ke tou palalau ʼaki he fakaʼapaʼapa ki te hahaʼi fuli he ʼe fakakololiaʼi aipe ia Sehova. ʼE mole tou fakakeʼi anai te hahaʼi ʼuhi pe ko ʼanatou talatisio. Tou manatuʼi ko te ʼofa ʼe malohi. Kapau ʼe tou fakaʼapaʼapa ki te hahaʼi ʼae ʼe fakafeagai mai, ʼe feala pe ke malu ai ʼonatou loto.
15-16. (1) He koʼe ʼe fakapotopoto hatatou fakamahino ki te hahaʼi tatatou tui? Tuku mai he faʼifaʼitaki. (2) ʼE feafeaʼi hatatou maʼuliʼi te ʼu palalau ʼa Paulo ia Loma 1:16?
15 Kotou fakaha ki ʼokotou vahaʼa fale ko koutou ʼe ko te Kau Fakamoʼoni ʼa Sehova. (Esa. 43:10) Ka mate he tahi ʼi tokotou famili, ʼe feala pe ke natou iita feia ki ʼokotou vahaʼa fale, koteʼuhi ʼe mole kotou kau ʼi te agaʼi fenua ʼo te ʼavaifo. Koia ke ʼaua naʼa hoko he fihifihia feia, ʼe lelei age ke fakamahino fakatomuʼa ko tatou ko te ʼu Fakamoʼoni ʼa Sehova feia mo te ʼu agaʼi fenua ʼae ʼe mole lelei ke tou kau ki ai. Neʼe fakamatala fenei e Francisco ʼe maʼuli ʼi Mozambique: “ ʼI tamā ako te moʼoni mo toku ʼohoana ko Carolina, neʼe ma fakaha ki ʼomā famili ʼe mole ma toe atolasio anai ki ʼamatou kui ʼae kua mamate. Neʼe ma tau mo he fihifihia ʼi te mate ʼo te kiʼi tehina ʼo Carolina. ʼI te agaʼi fenua, ʼe fai he toʼotoʼoga kae lolotoga teuteuʼi te mate. Hili ia, pea ko ia ʼae ʼe famili totonu mo te mate ʼe tonu ke moe ia ʼaho ʼe tolu ki te koga meʼa ʼae neʼe huaʼi ki ai te vai ʼae neʼe fakamaʼanu ai te mate. Ko te ʼu agaʼi fenua ʼaia, neʼe fakatuʼutuʼu moʼo fakamalu te ita ʼo te mate. Neʼe manatu ia te famili ʼo Carolina ʼe kau anai ki te agaʼi fenua ʼaia.”
16 Kotea ʼae neʼe fai e Francisco mo tona ʼohoana? ʼE fakamatala fenei e Francisco: “ ʼE ma ʼoʼofa ia Sehova pea ʼe ma fia fakafiafiaʼi tona loto. Ko te tupuʼaga la ʼaia ʼo tamā fakafisi ki te agaʼi fenua ʼaia. Neʼe iita kovi ʼosi te famili ʼo Carolina. Neʼe natou tukugakoviʼi ia maua ʼo ui ʼe mole ma fakaʼapaʼapa ki te mate. Pea ko te famili ʼe mole toe fia fakatahi mo maua peʼe natou tokoni mai. Neʼe mole ma fakatau ki tanatou iita ʼaia koteʼuhi neʼe kua ʼosi ma fakaha fakatomuʼa age tamā tui. Ko ʼihi ʼo te famili neʼe kau mo maua he neʼe natou iloʼi kua ʼosi ma fakamahino age tamā tauhi ki te ʼAtua. Ko ʼihi neʼe natou ʼomai ki toma ʼapi ʼo kole mai hanatou ʼu tohi Fakatohi-tapu.” ʼE ma fakaʼamu ke ʼaua naʼa ma ufiufi ʼi he temi ʼi te nofo agatonu kia Sehova he ʼe kua ma iloʼi te manatu ʼa te Tohi-Tapu ʼo ʼuhiga mo te kau mate.—Lau ia Loma 1:16.
TOU TOKONI PEA MO FAKAFIMALIEʼI NATOU ʼAE ʼE PUTU
Ko te ʼu kaumeʼa moʼoni ʼe natou tokoni pea mo fakafimalieʼi ia natou ʼae ʼe mamahi ʼuhi ko te mate (Vaka’i te palakalafe 17-19) *
17. ʼE tou tokoni feafeaʼi anai ki hotatou tehina neʼe putu?
17 Ka mate he famili ʼo he tehina peʼe ko he tuagaʼane, tou faigaʼi ke tou “kaumeʼa moʼoni . . . pea ʼe ko he tehina neʼe tupu ki te ’u temi faigataʼa.” (Taag. 17:17, MN) ʼE tou liliu feafeaʼi ko he “kaumeʼa moʼoni” ʼi te temi ʼae ʼe uga ai e te famili te tehina peʼe ko te tuagaʼane ʼae ʼe putu ke kau ki he agaʼi fenua ʼe fakafeagai ki te Tohi-Tapu? ʼE tou vakaʼi ia pelesepeto Fakatohi-tapu ʼe lua ʼe tokoni mai anai ke tou fakafimalieʼi natou ʼae ʼe putu.
18. He koʼe neʼe tagi ia Sesu? Pea kotea ʼae ʼe feala ke tou ako mai tona faʼifaʼitaki?
18 “Kotou fetagihi mo natou ʼae ʼe fetagihi.” (Loma 12:15) ʼI ʼihi temi, ʼe mole kei tou iloʼi he palalau ʼe fai kia ia ʼae ʼe putu. Kae kapau ʼe tou fetagihi mo ia, ʼe ina iloʼi ʼe tou kaugā mamahi mo ia. ʼI te mate ʼo Lasalo te kaumeʼa ʼo Sesu, neʼe fetagihi ia Malia mo Maleta ʼi te mate ʼo tonā tokolua. ʼI te tau mai ʼa Sesu kua hili ki ai ʼaho ʼe fa, neʼe “tagi” ia ia logo la neʼe ina iloʼi ʼe ina fakatuʼuake anai ia Lasalo. (Soa. 11:17, 33-35) Pea ʼi te tagi leva ʼae ʼa Sesu, neʼe ina fakaha ai te meʼa ʼae ʼe logoʼi e tana Tamai. ʼI te sio ʼo te famili ʼo Lasalo ki te tagi ʼa Sesu, neʼe mahino kia natou tona ʼofa moʼoni. Neʼe fakalotomalohiʼi ai ia Malia mo Maleta. ʼO feia mo tatou, ka logoʼi e ʼotatou tehina mo tuagaʼane totatou ʼofa pea mo tatatou tokaga fakamalotoloto kia natou, ʼe natou lotomalohi ai. Pea ʼe natou iloʼi ʼe tokoni pea mo tokaga lelei ʼonatou kaumeʼa kia natou.
19. ʼE feafeaʼi anai hatatou maʼuliʼi ia Ekelesiasi 3:7 moka tou fakafimalieʼi he tahi ʼe putu?
19 ʼE ʼi ai “he temi ke fakalologo ai, pea mo he temi ke palalau ai.” (Ekl. 3:7) Ko te tahi aluʼaga ʼe fakafimalie ki he tehina peʼe ko he tuagaʼane ʼe putu, ʼe ko tatatou fakalogo lelei ʼana palalau. Kotou fakalogo lelei moka palalau ki te ʼu meʼa ʼae ʼe ina logoʼi ʼi tona loto kae ʼaua naʼa kotou punamaʼuli mo kapau ʼe ina fai he ʼu ‘palalau noa’ neʼe mole fakakaukauʼi. (Sopo 6:2, 3) ʼE mahino papau, ʼe lahi fau tona hoha ʼuhi ko tona famili ʼae ʼe mole tauhi kia Sehova. Koia ʼae, ʼe tonu ai ke tou faikole pea mo ia. Kotou kole ki te ʼAtua “ ʼae ʼe fagono ki te faikole” ke ina foaki mai te malohi mo te ʼatamai malama. (Pes. 65:2, MN) Kapau ʼe feala, kotou lau fakatahi te Tohi-Tapu peʼe kotou lau he alatike ʼi ʼatatou nusipepa ʼe fakamatala ai he aluʼaga ʼe tatau mo te aluʼaga ʼae ʼe lolotoga fakalaka ai.
20. Kotea anai ka tou vakaʼi ʼi te alatike ʼae ka hoa mai?
20 ʼE tou fiafia lahi ʼi tatatou kua iloʼi te moʼoni ʼo ʼuhiga mo te mate pea mo te ʼamanaki taulekaleka kia natou ʼae ʼe takoto ʼi te ʼu faitoka. (Soa. 5:28, 29) Tou fakaha ʼi ʼatatou palalau pea mo ʼatatou aga, ʼe tou puipui te ʼu moʼoni Fakatohi-tapu pea ʼe tou fakaʼaogaʼi te ʼu faigamalie fuli moʼo palalau ki te hahaʼi ʼo ʼuhiga mo te ʼu moʼoni ʼaia. ʼE tou vakaʼi anai ʼi te alatike ʼae ka hoa mai te tahi loi ʼe fakaʼaogaʼi e Satana ke ʼaua naʼa iloʼi te moʼoni e te hahaʼi: ʼe ko te gaohi meʼa faifakalauʼakau. ʼE tou toe vakaʼi anai pe koʼe ʼe tonu ke tou liʼaki he ʼu meʼa peʼe ko he ʼu fakafiafia ʼe pipiki ki te hele ʼaia ʼa te Tevolo.
KATIKO 24 Tou Hake Ki Te Moʼuga ʼo Sehova
^ pal. 5 ʼE fakahalaʼi e Satana mo ʼana temonio te hahaʼi ʼaki te ʼu loi ʼo ʼuhiga mo te aluʼaga ʼo te kau mate. ʼAki te ʼu loi ʼaia, neʼe natou fakatupu he ʼu agaʼi fenua ʼe mole alu tahi mo te Tohi-Tapu. ʼE tou vakaʼi anai ʼi te alatike ʼaeni, pe ʼe feafeaʼi hatatou agatonu kia Sehova moka fakamalohiʼi tatou e te hahaʼi ke tou kau ki te ʼu agaʼi fenua ʼaia.
^ pal. 55 FAKAMATALA ʼO TE ʼU PĀKI: Ko he fafine neʼe mate he tahi ʼi tona famili neʼe ʼofa mamahi ai pea ko te taumatuʼa ʼe famili mo ia ʼe ko te ʼu Fakamoʼoni ʼa Sehova ʼe nā fakapelepeleʼi ia ia.
^ pal. 57 FAKAMATALA ʼO TE ʼU PĀKI: Ko he tehina ʼe ina fai he ʼu fekumi ʼo ʼuhiga mo te agaʼi fenua ʼo te ʼu ʼavaifo. Hili ia, pea alu leva ʼo fakamahino ʼaki he aga fakaʼapaʼapa tana tui ki tona famili.
^ pal. 59 FAKAMATALA ʼO TE ʼU PĀKI: Ko te ʼu tagata ʼafeā ʼe nā fakafimalieʼi he tehina neʼe mate he tahi neʼe ʼofa mamahi ki ai.