1. Kotea te palatiso fakalaumalie pea kotea ʼae ʼe tou fakatotonu ke tou fai?

 ʼI TE temi nei kua maʼu ʼi te kele ia he aluʼaga fakatalakitupua ʼe maʼuʼuli ai te hahaʼi tokolahi pea ʼe natou fai ni gaue lelei. ʼE natou fakatotonu ke mole natou mavae mai ai. Pea ko tonatou loto ke fakatahi age te hahaʼi tokolahi. Kotea te aluʼaga ʼaia? Ko te palatiso fakalaumalie! a

2. He koʼe ʼe fakatalakitupua te palatiso fakalaumalie?

² Neʼe fakatupu e Sehova te aluʼaga fakatalakitupua ʼaia, ko he koga meʼa fimalie ʼi te malama ʼaeni ʼa Satana, ʼae ʼe fakamataku pea maʼuʼuli ai te hahaʼi agakovi. (1 Soa. 5:19; Fkha. 12:12) ʼE molemo puli ki totatou ʼAtua ʼofa te ʼu mamahi ʼe hoko ʼi te malama ʼaeni. Koia ʼe ina loto ai ke tou logo fimalie, pea ke tou tauhi kia te ia ʼaki te fiafia. ʼI tana Folafola, ʼe ina ui ai ko te palatiso fakalaumalie ʼe ko he “nonoʼaga” pea mo he “ ʼoloto ʼe fakavai lelei.” (Esa. 4:6; 58:11) Tatau aipe te ʼu temi faigataʼa ʼae ʼe tou maʼuʼuli ai nei, kae ko natou ʼae ʼe nonofo ʼi te palatiso ʼaia ʼe feala ke natou fiafia he ʼe tapuakinaʼi e Sehova te palatiso fakalaumalie ʼaia.​—Esa. 54:14; 2 Tim. 3:1.

3. Neʼe ʼuluaki fakahoko feafeaʼi ia te fakamatala ʼae ia Esaia 65 ʼi te temi muʼa?

³ ʼAki te polofeta ko Esaia neʼe fakaha e Sehova pe ʼe feafeaʼi te maʼuli ʼi te palatiso fakalaumalie. ʼE tou maʼu te fakamatala ʼaia ia Esaia 65, ʼae neʼe ʼuluaki fakahoko ʼi te tau 537 I.M.T.S.  Mole fualoa ʼi te ʼosi fakaʼateaina ʼa te kau Sutea lotofakahemala mai tanatou ʼaunofo ʼi Papiloni, ko ʼihi ia natou neʼe natou toe liliu ki tonatou fenua. Neʼe tapuakinaʼi natou e Sehova pea neʼe ina fakafealagia ke natou toe laga ia Selusalemi ʼae neʼe maumauʼi pea ke toe fakatuʼu te tauhi moʼoni ʼi te fale lotu ʼi Iselaele.​—Esa. 51:11; Sakl. 8:3.

4. ʼE fakahoko feafeaʼi ia te fakamatala ʼae ia Esaia kapite 65 ʼi totatou temi?

⁴ Ko te lua fakahoko ʼo te lea fakapolofeta ʼo Esaia neʼe kamata ʼi te taʼu 1919, ʼae neʼe fakaʼateainaʼi ai te ʼu kaugana ʼa Sehova mai Papiloni Lahi. Neʼe kamata mafola ai leva te palatiso fakalaumalie ʼi te kele katoa. Ko te kau faifakamafola faʼafai ʼo te Puleʼaga ʼo te ʼAtua neʼe natou fakatuʼu ni kokelekasio pea neʼe ha ia natou te fua ʼo te laumalie maʼoniʼoni. Ohage la, ko ʼihi neʼe agamalohi pe neʼe hage tanatou aga ko ni manu ʼi muʼa atu. Kae neʼe natou “kofuʼi ia te ʼulugaaga foʼou ʼae neʼe fakatupu ʼo mulimuli ki te finegalo ʼo te ʼAtua.” (Efe. 4:24) ʼE moʼoni, ʼe lahi te ʼu tapuakina ʼae neʼe fakamatala e Esaia ka hoko moʼoni anai ʼi te malama foʼou ka haʼu. Kae ʼi te temi nei, kua tou maʼu ni lelei ʼi tatatou maʼuʼuli ʼi te palatiso fakalaumalie. Tou vakaʼi he ʼu lelei pea he koʼe ʼe mole tonu ke tou mavae mai ai.

NATOU ʼAE ʼE MAʼUʼULI ʼI TE PALATISO FAKALAUMALIE

5. Ohage ko tona fakapapau ia Esaia 65:13, ʼe feafeaʼi totatou maʼuli ʼi te palatiso fakalaumalie?

⁵ ʼE natou kakai lelei mo maʼu he maʼuli malolo ʼe lelei. ʼE fakaha ʼi te lea fakapolofeta ʼa Esaia te kehekehe ʼo natou ʼae ʼe nonofo ʼi te palatiso fakalaumalie pea mo natou ʼae ʼe mole nonofo ai. (Lau ia Esaia 65:13.) ʼE foaki e Sehova ki ʼana kaugana te ʼu meʼa ʼae ʼe ʼaoga kia natou ʼi te faʼahi fakalaumalie. ʼE tou maʼu tona laumalie maʼoniʼoni, mo tana Folafola, pea mo he toe meʼa kai fakalaumalie ke tou “kakai,” mo “iinu” pea mo tou “fiafia” ai. (Vakaʼi mo Fakaha 22:17.) Kae ko natou ʼae ʼe mole ʼi te palatiso fakalaumalie ʼe natou “pakupaku,” mo “fia iinu” pea mo “ufiufi.” ʼE mole natou maʼu te ʼu meʼa ʼae ʼe ʼaoga kia natou ʼi te faʼahi fakalaumalie.​—Amo. 8:11.

6. Ia Soele 2:21-24, ʼe fakamatala feafeaʼi ai te ʼu meʼa ʼofa ʼae ʼe foaki mai e Sehova, pea ʼe fua lelei feafeaʼi kia tatou?

⁶ ʼI tana lea fakapolofeta, neʼe palalau ia Soele ki te ʼu meʼa kai ʼae ʼe ʼaoga, ohage ko te fulumeto, mo te vino, pea mo te lolo oliveto. Neʼe ina fakaha ai ʼe foaki lahi e Sehova ki Tana hahaʼi te ʼu meʼa ʼae ʼe ʼaoga kia natou, tafito ʼi te faʼahi fakalaumalie. (Soe. 2:21-24) ʼE fakahoko e Sehova te faʼahi ʼaia, ʼaki tana foaki mai te Tohi-Tapu mo ʼatatou tohi Fakatohi-tapu, tatatou tuʼasila ʼi te Neti, mo ʼatatou fono pea mo te ʼu fakatahi lalahi. ʼE feala ke tou kai ki te meʼa kai fakalaumalie ʼaia ʼi te ʼaho fuli. Koia, ʼe tou kakai lelei ai pea mo maʼuli malolo lelei.

7. Kotea ʼae ʼe tupu ai ‘te lelei ʼo totatou loto’? (Esaia 65:14)

⁷ ʼE natou fiafia. Ko te hahaʼi ʼa te ʼAtua ʼe natou “kalaga fakafiafia” koteʼuhi ʼe lahi tanatou lotofakafetaʼi. (Lau ia Esaia 65:14.) ‘ ʼE lelei totatou loto’ ʼuhi ko te ʼu moʼoni fakalotomalohi pea mo te ʼu fakapapau fakalotofimalie ʼae ʼi te Folafola ʼa te ʼAtua, ʼo feia mo tatatou ʼamanaki ʼae ʼe fakatafito ki te sakilifisio ʼo Kilisito. Ka tou palalau mo ʼotatou tehina mo tuagaʼane ki te ʼu faʼahi ʼaia, ʼe tou fiafia moʼoni ai.​—Pes. 34:8; 133:1-3.

8. Kotea ʼae ʼe iloga lelei ʼi te palatiso fakalaumalie?

⁸ Ko te ʼofa mo te logo tahi ʼa te hahaʼi ʼa Sehova ʼe iloga lelei ʼi te palatiso fakalaumalie. (Kol. 3:14) ʼE fakaha mai ai pe ʼe feafeaʼi anai te maʼuli ʼi te malama foʼou, ʼae ka lahi age ai te feʼofaʼaki mo te logo tahi ʼa te ʼu kaugana ʼa  Sehova. ʼE fakamatala e te tuagaʼane te faʼahi ʼae neʼe malave kia ia ʼi tana ʼuluaki felaveʼi mo te kau Fakamoʼoni ʼa Sehova: “Neʼe mole au iloʼi pe kotea ka au fai ke au maʼu te fiafia pea ke toe fiafia mo toku kiʼi famili. Ko te hahaʼi ʼae neʼe au sio ʼe natou fefakahaʼaki ia te ʼofa moʼoni, neʼe ko te kau Fakamoʼoni ʼa Sehova.” Kapau ʼe fia maʼu e he tahi te fiafia moʼoni ʼe tonu ke kau ki tatatou palatiso fakalaumalie. Tatau aipe pe kotea te manatu ʼa te hahaʼi ʼo te malama, kae ʼe maʼu e te ʼu kaugana ʼa Sehova he matagafua, peʼe ko he higoa ʼe lelei, kia mata ʼo Sehova pea mo natou fuli ʼae ʼe natou tauhi kia te ia.​—Esa. 65:15.

9. Kotea ʼae ʼe fakapapau mai ia Esaia 65:16, 17 ʼo ʼuhiga mo ʼotatou mamahi?

⁹ ʼE natou fimalie. ʼE ui ia Esaia 65:14 ko natou ʼae ʼe filifili ke natou nonofo ʼi tuʼa ʼo te palatiso fakalaumalie, ʼe natou ‘kalaga anai ʼuhi ko te mamahi ʼo tonatou loto, pea ʼe natou tagilaulau anai ʼuhi ko tonatou lotovaivai.’ Kae ʼe feafeaʼi ki te ʼu aluʼaga ʼae ʼe fakatupu mamahi ki te ʼu kaugana ʼa Sehova? ʼAki te temi, ko te ʼu aluʼaga ʼaia “ ʼe galoʼi anai” “pea ʼe ʼū anai” kia mata ʼo te ʼAtua. (Lau ia Esaia 65:16, 17.) ʼE pulihi anai e Sehova ʼotatou fihifihia pea ʼaki te temi ʼe mole tou toe manatuʼi anai, ʼo mole kei tou toe mamahi ai.

10. He koʼe ʼe ke fakafetaʼi ʼi tau fakatahi mo te ʼu tehina mo tuagaʼane? (Vakaʼi mo te pāki.)

¹⁰ Kae ʼi te temi nei kua feala pe ke tou fimalie moka tou kau ki ʼatatou fono. Ka tou kau ki ai, ʼe tou tuku keheʼi ʼotatou hoha ʼae ʼe tupu mai te malama agakovi ʼaeni. ʼE tou tokoni ki ʼotatou tehina mo tuagaʼane ke natou toe fimalie mo natou moka tou fakaha te ʼofa, te fiafia, te tokalelei, te agaʼofa pea mo te agamalū. ʼE kau te ʼu kalitate ʼaia ki te fua ʼo te laumalie ʼa te ʼAtua. (Kal. 5:22, 23) ʼE tou lotofakafetaʼi lahi ʼi tatatou kau ki te kautahi ʼa te ʼAtua. Pea ko natou ʼae ʼe nonofo ʼi te palatiso fakalaumalie ʼe natou sisio anai ki te fakahoko katoa ʼo te fakapapau ʼa te ʼAtua ke ina fakatupu “he lagi foʼou mo he kele foʼou.”

11. ʼO mulimuli kia Esaia 65:18, 19, kotea ʼae ʼe tou logoʼi ʼi tatatou kau ki te palatiso ʼae neʼe fakatupu e Sehova?

¹¹ ʼE natou lotofakafetaʼi. ʼE toe hoko atu e Esaia, ʼo ina fakamahino mai pe koʼe ʼe tou “fakafiafia pea mo . . . fiafia” ʼi te palatiso fakalaumalie. Ko Sehova ʼae neʼe ina fakatupu te palatiso ʼaia. (Lau ia Esaia 65:18, 19.) Koia ʼe mole tou punamaʼuli ai ʼi tana fakaʼaogaʼi tatou moʼo tokoni ki te hahaʼi ke natou mavae mai te ʼu kautahi ʼo te malama ʼaeni, ʼae ʼe hage ko ni toafa kua magemage. Pea ke tou taki mai natou ki totatou palatiso fakalaumalie  taulekaleka. ʼE tou lotofakafetaʼi ʼuhi ko te ʼu tapuakina ʼae ʼe tou maʼu ʼi tatatou ʼi te moʼoni, pea ʼe uga ai tatou ke tou palalau ki te hahaʼi.​—Sel. 31:12.

12. ʼE feafeaʼi tou loto ʼi tau lau te ʼu fakapapau ʼae ʼe tuʼu ia Esaia 65:20-24, pea kotea tona tupuʼaga?

¹² ʼE tou toe lotofakafetaʼi ʼi tatatou ʼi te palatiso fakalaumalie he ʼe ʼi ai tatatou ʼamanaki. Tou fakakaukauʼi age muʼa ia meʼa fuli ka tou sisio mo fai anai ʼi te malama foʼou ʼa te ʼAtua! ʼE fakapapau mai ʼi te Tohi-Tapu: “ ʼE mole toe maʼu anai he kiʼi toe meamea ʼe maʼuli pe ʼi ni kiʼi ʼaho, peʼe ko ni matuʼa ʼe mole kaku ki tonatou temi vaivai.” ʼE tou “laga anai ni ʼapi mo [tou] nofoʼi,” ʼe tou “to anai ni gaueʼaga vite mo kai ʼona fua.” ʼE mole tou “kinakina noa anai” he ʼe “tapuakiʼi [anai tatou] e Sehova.” ʼE ina fakapapauʼi mai he maʼuli ʼe pulihi ai te ʼu tuʼutamaki, he maʼuli fiafia, ʼe tou maʼu ai he fakatuʼutuʼu moʼoni. “Ia muʼa ʼo tanatou pauʼi age” kua iloʼi ia e Sehova te ʼu meʼa ʼae ʼe ʼaoga ki ʼana kaugana takitahi, pea ʼe ina “fakahoko [anai] te fakaʼamu ʼo te ʼu meʼa maʼuli fuli.”​—Esa. 65:20-24; Pes. 145:16.

13. ʼE fakamatala feafeaʼi ia Esaia 65:25 te ʼu fetogi ʼae ʼe fai e te hahaʼi ʼi tonatou maʼuli moka natou kamata tauhi kia Sehova?

¹³ ʼE natou maʼuʼuli ʼi te tokalelei. Tokolahi ʼi muʼa atu neʼe hage tanatou aga ko ni manu. Kae kua natou fai ni toe fetogi lahi ʼi tonatou maʼuli ʼaki te tokoni ʼa te laumalie ʼa te ʼAtua. (Lau ia Esaia 65:25.) Neʼe natou faiga malohi ke pulihi ʼanatou aga ʼae ʼe kovi. (Loma 12:2; Efe. 4:22-24) ʼE moʼoni ʼe kei agahala pe te ʼu kaugana ʼa te ʼAtua, koia la ʼae ʼe natou lakahala tuʼumaʼu pe anai. Kae ʼe fakatahiʼi e Sehova “te faʼahiga tagata fuli pe” ʼae ʼe ʼoʼofa ia te ia mo feʼofaʼaki, pea ʼe natou tokalelei ai mo logo tahi. (Tito 2:11) ʼE gata pe ki totatou ʼAtua mafimafi ʼae neʼe ina lava fakahoko te milakulo ʼaia!

14. Neʼe hoko feafeaʼi ia Esaia 65:25 ʼi te maʼuli ʼo he tehina?

¹⁴ ʼE feala moʼoni koa ke fetogi e he tahi tona ʼulugaaga? Tou vakaʼi he faʼifaʼitaki. Ko te tupulaga neʼe kovi ʼosi tana agamalohi pea neʼe ina fai ni aga heʼe ʼaoga. ʼI tona taʼu 20, neʼe kua tuʼa lahi tona ʼave ʼo pilisoni he neʼe ina kaihaʼa te ʼu motoka pea mo ʼihi atu meʼa. Neʼe fia fuhu tuʼumaʼu. Kae ʼi tana ʼuluaki logo ʼae ki te ʼu moʼoni ʼae ʼi te Tohi-Tapu pea mo kau ki ʼatatou fono, neʼe tui ai kua ina maʼu he fakatuʼutuʼu ʼi tona maʼuli, ʼae ke tauhi kia Sehova ʼi te palatiso fakalaumalie. Hili tona papitema, neʼe ina tau fakaʼuhiga pe kia ia te koga tohi ʼo Esaia 65:25. Neʼe fetogi tona ʼulugaaga, he neʼe agamalohi mo aga fekai ohage he laione pea kua liliu ʼo agamalū ohage ko he akeno.

15. He koʼe ʼe tou fia tokoni ki te tokolahi ke natou ʼomai ki te palatiso fakalaumalie, pea ʼe feafeaʼi tatatou fai te faʼahi ʼaia?

¹⁵ ʼE kamata fenei ia Esaia 65:13: “Koʼeni te folafola ʼa te Tuʼi ʼAliki ko Sehova.” Pea ʼe fakaʼosi fenei ʼi te vaega 25: “Ko te ui ʼaia ʼa Sehova.” Ko tana ʼu folafola fuli ʼe hoko tuʼumaʼu pe ia. (Esa. 55:10, 11) Kua ʼosi fakatuʼu ia ʼaho nei ia te palatiso fakalaumalie. Neʼe fakatupu e Sehova he foʼi famili ʼe makehe. ʼI tatatou maʼuʼuli ai, ʼe tou maʼu te tokalelei mo te fiafia ʼi te lotolotoiga ʼo he malama agamalohi. (Pes. 72:7) Ko te tupuʼaga la ʼae ʼo tatatou fia tokoni ki te tokolahi ke natou ʼomai ʼo kau ki totatou famili fakalaumalie. ʼE tou fai te faʼahi ʼaia moka tou kau ki te faifakamafola mo te fai ʼo ni tisipulo.​—Mat. 28:19, 20.

TOU TAKI MAI TE HAHAʼI KI TE PALATISO FAKALAUMALIE

16. Kotea ʼae ʼe feala ke tokoni ki te hahaʼi ke natou fia kau ki te palatiso fakalaumalie?

¹⁶ ʼE feala ke tou tokoni ki te hahaʼi ke natou fia ʼomai ki te moʼoni. Pea mo fakahoko te  faʼahi ʼaia ʼe tonu ke tou faʼifaʼitakiʼi ia Sehova. ʼE mole ina fakamalohiʼi he tahi ke haʼu ki tana kautahi. ʼE ina “taki” mai te hahaʼi takitokotahi ʼaki he agamalū. (Soa. 6:44; Sel. 31:3) Pea ko te hahaʼi loto fakamalotoloto ʼae ʼe natou iloʼi ko Sehova ko te ʼAtua ʼofa pea mo ʼona tahi ʼu kalitate, ʼe natou fia fakaovi ai kia te ia. ʼE feala ke tou taki mai te hahaʼi ki te palatiso fakalaumalie moka tou fakaha he ʼu kalitate pea mo fai ni gaue lelei. ʼO feafeaʼi?

17. Kotea ʼae ʼe feala ke tou fai ke fia ʼomai te hahaʼi ki te palatiso fakalaumalie?

¹⁷ ʼE fia ʼomai anai te hahaʼi ki te palatiso fakalaumalie mo kapau ʼe tou fefakahaʼaki te ʼofa ia tatou pea mo tou feagaleleiʼaki. Ka kau ni hahaʼi foʼou ki ʼatatou fono, ʼe tou fakaʼamu ke natou fai te ʼu palalau neʼe fai e te hahaʼi ʼae neʼe lagi natou kau ki te ʼu fono ʼi te kokelekasio ʼo Kolonito. Neʼe natou ui: “ ʼE nofo moʼoni te ʼAtua ia koutou.” (1 Ko. 14:24, 25; Sakl. 8:23) Koia, tou haga muliʼi te tokoni ʼaeni: “Ke kotou fetokaleleiʼaki.”​—1 Tes. 5:13.

18. Kotea ʼae ʼe feala ke ina taki mai te hahaʼi ki tatatou kautahi?

¹⁸ ʼE tonu ke tou faiga tuʼumaʼu ke tou sio ki ʼotatou tehina mo tuagaʼane ohage ko te sio ʼa Sehova. ʼE feala anai moka tou tokagaʼi tafito ʼonatou kalitate kae mole ko ʼonatou vaivaiʼaga, ʼae ka puli anai ʼi te ka haʼu. ʼE feala ke tou fakatokatoka ʼotatou fihifihia ʼaki te ʼofa mo kapau ʼe tou “feagaleleiʼaki, mo fonu ʼi te manavaʼofa, ʼo [tou] fefakamolemoleʼaki ʼaki he lotolelei.” (Efe. 4:32) Feia age la ʼe fia ʼomai anai te hahaʼi ki te palatiso fakalaumalie he ʼe natou loto ke fai te aga ʼaia kia natou. b

 NOFO MAʼU ʼI TE PALATISO FAKALAUMALIE

19. (1) Kotea ʼae neʼe ui e ʼihi ʼi tanatou toe liliu mai ki te palatiso fakalaumalie? (Vakaʼi te fakamatala ʼi te ʼa takai “ Neʼe Natou Mavae Pea Kua Natou Toe Liliu Mai.”) (2) Kotea ʼae ʼe tou fakatotonu ke tou fai? (Vakaʼi mo te pāki.)

¹⁹ ʼE maʼuhiga ʼaupito kia tatou te palatiso fakalaumalie! Kua toe lahi age la tona matalelei ʼi te temi nei pea kua kaugamalie age te kau atolasio ʼa Sehova ʼe nonofo ʼi ai. ʼOfa pe ke tou lotofakafetaʼi tuʼumaʼu ki te palatiso ʼaia neʼe fakatupu e Sehova maʼa tatou. Kapau ʼe fia maʼuli malolo lelei he tahi, mo maʼuli fiafia, ʼi te tokalelei mo te fimalie, ʼe tonu ke kau ki te palatiso fakalaumalie pea ke nofo maʼu ʼi ai. Kae ʼe tonu ke tou tokakaga, he ʼe fai e Satana ia meʼa fuli ke tou mavae mai ai. (1 Pet. 5:8; Fkha. 12:9) ʼAua naʼa tou fakagafua ke hoko te aluʼaga ʼaia. Tou puipui lelei te matalelei, te maʼa, mo te tokalelei ʼo te palatiso fakalaumalie.