1. Kotea ʼae ʼe kole mai e Sehova ke tou fai?

 ʼE KAU ki te ʼu fiafia lahi ʼa he taumatuʼa te tupu ʼo hanā fanau. ʼE mahino ia ʼe nā ʼoʼofa mamahi ki tana kiʼi toe ʼaia kei meamea kae ʼe mole nā fakaʼamu leva ke feia tuʼumaʼu. Kapau ʼe mole tuputupu, pea ʼe nā tuʼania moʼoni anai. ʼO toe feia pe, ʼe fiafia ia Sehova moka tou kamata ako ke tou iloʼi lelei ia ia. Kae ʼe mole ina loto ke gata ai. (1 Ko. 3:1) ʼE ina kole mai ke tou liliu ko ni Kilisitiano “kua fotufotuʼa.”​—1 Ko. 14:20.

2. Kotea te ʼu fehuʼi ʼe tou tali anai ki ai ʼi te alatike ʼaeni?

² ʼE feafeaʼi te manatu mo te aga ʼa he tahi kua fotufotuʼa ʼi te faʼahi fakalaumalie? Kotea ʼae ʼe tonu ke tou fai ke tou liliu ai ʼo fotufotuʼa ʼi te faʼahi fakalaumalie? Ko te ako ʼo te ʼu moʼoni loloto ʼi te Tohi-Tapu ʼe tokoni feafeaʼi mai ke tou tuputupu ʼi te faʼahi fakalaumalie? Pea he koʼe ʼe mole tonu ke tou ui kua tou fotufotuʼa pea mole kei ʼaoga ke tou fakamalohiʼi ʼatatou felogoi mo Sehova? ʼE tou vakaʼi anai ʼi te alatike ʼaeni te ʼu tali ki te ʼu fehuʼi ʼaia.

ʼE FEAFEAʼI HE TAHI KUA FOTUFOTUʼA ʼI TE FAʼAHI FAKALAUMALIE?

3. Kotea te fakaʼuhiga ʼo te liliu ʼa he tahi ʼo fotufotuʼa ʼi te faʼahi fakalaumalie?

³ ʼI te Tohi-Tapu, ko te kupu Fakakeleka ʼae neʼe fakaliliu ʼaki te kupu “he tahi kua lahi” ʼe toe fakaʼuhiga ki he tahi kua “fotufotuʼa,” “haohaoa” pea mo “katoa.” a (1 Ko. 2:6) Ohage pe ko te tuputupu  ʼo he kiʼi toe meamea ʼo liliu ko he tahi kua lahi, ʼe toe feia aipe ʼe tonu ke toe malohi age ʼatatou felogoi mo Sehova. ʼI tatatou fai te faʼahi ʼaia, ʼe tou liliu ai ko he ʼu kaugana ʼa Sehova kua fotufotuʼa. Pea ka kua tou kaku ki te aluʼaga ʼaia, ʼe tou haga fakamalohiʼi pe anai ʼatatou felogoi mo Sehova. (1 Tim. 4:15) ʼE feala ki te ʼu kaugana fuli ʼa Sehova ke natou liliu ʼo fotufotuʼa, maʼia mo te kau tupulaga. Kae ʼe tou iloʼi feafeaʼi kua fotufotuʼa he tahi ʼi te faʼahi fakalaumalie?

4. ʼE tou iloʼi feafeaʼi kua fotufotuʼa he tahi ʼi te faʼahi fakalaumalie?

⁴ Ko he tahi kua fotufotuʼa ʼi te faʼahi fakalaumalie ʼe mulimuli ki te ʼu fakatotonu fuli ʼa te ʼAtua, kae mole ki ʼae pe ʼe ina leleiʼia. ʼE mahino ia, ʼuhi ʼae ʼe kei agahala, ʼe ina fai pe anai ni hala. Kae ʼe faiga ʼi te ʼaho fuli ke alu tahi ʼana manatu mo tana aga pea mo ʼae ʼa Sehova. ʼE ina kofuʼi te ulugaaga foʼou pea mo faiga ʼi te temi fuli pe ke manatu ohage ko Sehova. (Efe. 4:22-24) ʼE ina toʼo ni tonu ʼe lelei he ʼe mahino ki te ʼu lao mo te ʼu pelesepeto ʼa Sehova. ʼE mole ina loto ia ke fakatuʼu he ʼu tuʼuga lekula ʼo ʼuhiga mo te meʼa ʼae ʼe tonu ke ina fai. Pea ka ina toʼo he tonu, ʼe ina fai ia meʼa fuli moʼona fakahoko.​—1 Ko. 9:26, 27.

5. Kotea te ʼu tuʼutamaki ʼe feala ke hoko ki he kaugana ʼa Sehova ʼe mole fotufotuʼa ʼi te faʼahi fakalaumalie? (Efeso 4:14, 15)

⁵ Kae kapau ʼe mole liliu he kaugana ʼa Sehova ʼo fotufotuʼa ʼi te faʼahi fakalaumalie, ʼe faigafua pe anai hona fakaheʼi e “te ʼu akonaki loi” pea mo hoko tui ki te ʼu aposita. b (Lau ia Efeso 4:14, 15.) ʼE maheka, fihi mo ʼihi, hoko ita. Pea ʼe feala ke to gafua ki te fakahala.​—1 Ko. 3:3.

6. Kotea ʼae ʼe feala ke tou fakatatau ki ai ia te liliu ʼa he kaugana ʼa Sehova ʼo fotufotuʼa ʼi te faʼahi fakalaumalie? (Vakaʼi mo te pāki.)

⁶ Ohage ko tatatou ui ʼi muʼa atu, ʼe fakatatau ʼi te Tohi-Tapu te liliu ʼa he tahi ʼo fotufotuʼa ʼi te faʼahi fakalaumalie ki te liliu ʼa he kiʼi toe meamea ko he tahi kua lahi. ʼE lahi te ʼu faʼahi ʼe mole iloʼi e he kiʼi tamasiʼi, koia ʼe ʼaoga ai ke puipui mo tokaga ki ai he tahi kua lahi. ʼE hage pe ko he faʼe ʼe ina ui age ki tana kiʼi taʼahine ʼae kei veliveli ke ina puke tona nima ʼi tanā fakalaka ʼi te ala. ʼI te lahilahi ake ʼo tana taʼahine, ʼe tuku leva e te faʼe ke fakalaka tokotahi ʼi te ala, kae ʼe ina fakamanatuʼi age pe anai ke sio muʼa ki hema mo mataʼu. Pea ʼi te kua lahi leva ʼa te taʼahine, ʼe ina iloʼi te meʼa ʼae ʼe tonu ke ina fai ke hao mai  he tuʼutamaki. ʼEi, ʼe ʼaoga ki te fanau fuli he tahi kua lahi moʼo puipui ʼo natou. ʼO toe feia aipe, ʼe ʼaoga ki te ʼu kaugana ʼa Sehova ʼae heʼeki fotufotuʼa ʼi te faʼahi fakalaumalie ke tokoni kia natou ni Kilisitiano kua fotufotuʼa ʼi te faʼahi fakalaumalie ke mole tuʼutamakiʼia ʼanatou felogoi ʼae mo Sehova pea ke natou fai ni tonu ʼe lelei. ʼI te tahi age faʼahi, ko te ʼu kaugana ʼa Sehova ʼae kua fotufotuʼa ʼi te faʼahi fakalaumalie, ka natou toʼo he tonu, ʼe natou fakakaukauʼi te ʼu pelesepeto ʼi te Tohi-Tapu ke natou iloʼi ai te manatu ʼa Sehova pea ke natou mulimuli ki ai.

7. ʼE kei ʼaoga koa he tokoni ki he Kilisitiano kua fotufotuʼa ʼi te faʼahi fakalaumalie?

⁷ Ko tona fakaʼuhiga koa ʼe mole kei ʼaoga he tokoni ki he Kilisitiano kua fotufotuʼa ʼi te faʼahi fakalaumalie? Kailoa. ʼI ʼihi temi, ʼe toe feala pe ke kumi tokoni. Kae ko ia ʼae ʼe heʼeki fotufotuʼa ʼi te faʼahi fakalaumalie, ʼe lagi loto ia ke ui age e ʼihi te meʼa ʼae ʼe tonu ke ina fai pe ke natou toʼo he tonu maʼa ia. ʼI te tahi age faʼahi, ko ia ʼae kua fotufotuʼa ʼi te faʼahi fakalaumalie ʼe ina kumi te manatu ʼo natou ʼae ʼe poto pea kua fakalaka ʼi te aluʼaga ʼae ʼe tau mo ia, kae ʼe ina iloʼi ʼe loto e Sehova ke ina ʼamo e ia totonu tana ʼamoga.​—Kal. 6:5.

8. Kotea ʼae ʼe mole tatau ai he ʼu kaugana ʼa Sehova kua fotufotuʼa ʼi te faʼahi fakalaumalie?

⁸ ʼE mole tatau fuli te ʼu fofoga ʼa te hahaʼi lalahi. ʼO toe feia pe ʼe mole tatau te ʼu kalitate ʼae ʼe maʼu e natou ʼae kua fotufotuʼa ʼi te faʼahi fakalaumalie. Ohage la ʼe feala ke ha lelei ʼi ʼihi kua natou maʼu te poto ʼo te ʼAtua, peʼe malohi te lototoʼa ʼa ʼihi, pea ko ʼihi ʼe lahi tanatou lotofoaki, kae lotomahino lelei ʼihi. Pea ka tau he ʼu kaugana ʼa Sehova kua fotufotuʼa ʼi te faʼahi fakalaumalie mo he aluʼaga ʼe tatau, ʼe feala pe ke nā fai he ʼu tonu ʼe kehekehe, kae ko te ʼu tonu ʼaia ʼe alu tahi pe mo te ʼu pelesepeto ʼae ʼi te Tohi-Tapu. Tafito la mo kapau ko he aluʼaga ʼe fakalogo pe ia ki te leʼo ʼo loto takitokotahi. ʼI tanā mahino ki te faʼahi ʼaia, ʼe mole valokiʼi e he tahi te tonu ʼae neʼe fai e te tahi age. ʼE maʼuhiga age kia naua te logo tahi.​—Loma 14:10; 1 Ko. 1:10.

TOU LILIU ʼO FOTUFOTUʼA ʼI TE FAʼAHI FAKALAUMALIE

9. ʼE tou liliu koa ʼo fotufotuʼa ʼi te faʼahi fakalaumalie ʼaki pe te temi? Tuku mai he faʼifaʼitaki.

⁹ ʼI te agamahani, ʼaki te temi ʼe lahilahi ake he kiʼi tamasiʼi. Kae ʼe mole feia ʼo ʼuhiga mo he tahi ʼe liliu ʼo fotufotuʼa ʼi te faʼahi fakalaumalie. Ohage ko te ʼu tehina mo tuagaʼane ʼo Kolonito. Neʼe natou tali te logo lelei, neʼe natou papitema, neʼe fakanofo natou ʼaki te laumalie maʼoniʼoni, pea neʼe lahi te ʼu meʼa neʼe natou ako mai te apositolo ko Paulo. (Gaue 18:8-11) Kae hili ni taʼu ʼi tanatou ʼosi papitema, tokolahi neʼe heʼeki natou liliu ʼo fotufotuʼa ʼi te faʼahi fakalaumalie. (1 Ko. 3:2) Kotea ʼae ʼe tonu ke tou fai ke mole hoko te faʼahi ʼaia kia tatou?

10. Kotea ʼae ʼe tonu ke tou fai ke tou fotufotuʼa ʼi te faʼahi fakalaumalie? (Suta 20)

¹⁰ Ke tou fotufotuʼa ʼi te faʼahi fakalaumalie ʼe tonu muʼa ke tou loto moʼoni ki ai. Ko natou ʼae ʼe “manako ki te vale,” peʼe natou fia hage pe ko ni kihiʼi tamaliki ʼi te faʼahi fakalaumalie, ʼe mole natou tuputupu anai. (Taag. 1:22) ʼE mole tou fia hage ko he tahi kua lahi kae kei falala pe ki ʼana matuʼā ke nā fai he ʼu tonu maʼa ia. Kae ʼe tou fia fakahoko ʼotatou maʼua pea mo malohi age ʼatatou felogoi ʼae mo Sehova. (Lau ia Suta 20.) Kapau ʼe ke faiga ke ke liliu ʼo fotufotuʼa ʼi te faʼahi fakalaumalie, faikole kia Sehova ke ina foaki atu “te fakaʼamu pea mo te malohi moʼo fakahoko ia meʼa fuli ʼae ʼe ina leleiʼia.”​—Flp. 2:13.

11. Kotea ʼae ʼe foaki mai e Sehova ke tou liliu ʼo fotufotuʼa ʼi te faʼahi fakalaumalie? (Efeso 4:11-13)

¹¹ ʼE mole loto e Sehova ke tou faiga tokotahi ke tou liliu ʼo fotufotuʼa ʼi te faʼahi fakalaumalie. Neʼe ina foaki mai he ʼu tehina tauhi ovi mo faiako ʼi te kokelekasio moʼo tokoni mai ke “katoa totatou ʼuhiga fotufotuʼa, ohage ko Kilisito.” (Lau ia Efeso 4:11-13.) ʼE toe foaki mai e Sehova  tona laumalie maʼoniʼoni moʼo tokoni mai ke tou maʼu “te manatu ʼa Kilisito.” (1 Ko. 2:14-16) Pea neʼe toe foaki mai e te ʼAtua te ʼu Evaselio ʼe fa ke tou iloʼi ai te ʼu manatu, mo te ʼu palalau pea mo te ʼu aga ʼa Sesu ʼi tana maʼuli ʼae ʼi te kele. Kapau ʼe ke faʼifaʼitakiʼi te faʼahiga manatu mo te aga ʼa Sesu, ʼe feala anai ke ke fakahoko tau fakatuʼutuʼu ʼae ke ke liliu ʼo fotufotuʼa ʼi te faʼahi fakalaumalie.

TOU AKO TE ʼU MOʼONI LOLOTO ʼAE ʼI TE TOHI-TAPU

12. Kotea “te ʼu ʼuluaki akonaki ʼo ʼuhiga mo Kilisito”?

¹² Ke feala hatatou liliu ʼo fotufotuʼa ʼi te faʼahi fakalaumalie, ʼe mole gata pe anai tatatou iloʼi “te ʼu ʼuluaki akonaki ʼo ʼuhiga mo Kilisito” peʼe ko te ʼu akonaki Fakakilisitiano tafito. ʼE kau ki ai te ʼu akonaki ʼo ʼuhiga mo te fakahemala, te tui, te papitema, pea mo te fakatuʼuake. (Hep. 6:1, 2) ʼE fakatafito ki ai te tui ʼa te kau Kilisitiano fuli. Koia la ʼae neʼe palalau ia te apositolo ko Petelo ki te ʼu akonaki ʼaia ʼi tana faifakamafola ki te hahaʼi ʼi te ʼaho ʼo te Penikosite. (Gaue 2:32-35, 38) ʼE tonu ke tou tui ki te ʼu akonaki tafito ʼaia ke tou liliu ai ko ni tisipulo ʼa Kilisito. Ohage la, neʼe fakatokaga e Paulo kapau ʼe mole tui he tahi ki te akonaki ʼo te fakatuʼuake, ʼe mole feala ia ke ui ʼe ko he Kilisitiano moʼoni. (1 Ko. 15:12-14) Kae ʼe mole tonu ke tou gata aipe.

13. Kotea ʼae ʼe tonu ke tou fai ke tou maʼu te ʼu fua lelei mai te meʼa kai fakalaumalie fefeka ʼae ʼe talanoa ki ai ia Hepeleo 5:14? (Vakaʼi mo te pāki.)

¹³ Ko te meʼa kai fefeka ʼe mole hage ia ko te ʼu akonaki tafito. ʼE fakaʼuhiga ia ki te ʼu lao pea mo te ʼu pelesepeto ʼa Sehova, ʼae ʼe tokoni mai ke tou mahino ki tana manatu. Ke tou maʼu te ʼu fua lelei mai te meʼa kai ʼaia, ʼe tonu ke tou ako te Tohi-Tapu, mo metitasio, pea mo maʼuliʼi te ʼu meʼa ʼae neʼe tou ako. Ka tou fai te ʼu faʼahi ʼaia, ʼe tou akoako ai ke tou fai ni tonu ʼe fiafia ai ia Sehova. c​—Lau ia Hepeleo 5:14.

14. Neʼe tokoni feafeaʼi ia Paulo ki te kau Kolonito ke natou liliu ʼo fotufotuʼa ʼi te faʼahi fakalaumalie?

¹⁴ ʼE faigataʼa ki te ʼu Kilisitiano ʼae ʼe mole fotufotuʼa ʼi te faʼahi fakalaumalie hanatou toʼo ni tonu ʼe lelei moka ʼe mole he lao ʼi te Tohi-Tapu huʼu mo te aluʼaga ʼae ʼe tau mo natou. Kapau ʼe mole he lao, ʼe lagi manatu ʼihi ʼe feala ke natou fai te meʼa ʼae ʼe natou loto ki ai. Pea ʼe loto e ʼihi  ke ʼi ai he lao ʼi te ʼu aluʼaga ʼe mole ʼaoga ki ai. ʼE hage ko te ʼu Kilisitiano ʼi Kolonito. Neʼe lagi natou loto ke fakatuʼu e Paulo he lao ʼe ui ai pe ʼe tonu ke natou kai te meʼa kai ʼae neʼe momoli ki he taula ʼatua. Neʼe mole fakaha age e Paulo te meʼa ʼae ʼe tonu ke natou fai, kae neʼe ina ui age ʼe natou tahi maʼu ‘te fealagia ke natou filifili’ ʼo mulimuli ki tonatou leʼo ʼo loto. Neʼe ina fakaha ni pelesepeto ʼi te Tohi-Tapu neʼe tokoni kia natou ke natou fai he tonu ʼe mole vevele ai tonatou leʼo ʼo loto pea mole fakatupu tukia ki ʼihi. (1 Ko. 8:4, 7-9) Neʼe tokoni ai ia Paulo ki te kau Kolonito ke natou tuputupu ʼi te faʼahi fakalaumalie, ke natou popoto ʼi te fakaʼaogaʼi ʼo ʼonatou fealagia fakakaukau kae mole natou mulimuli ki te manatu ʼa he tahi peʼe natou loto ki he lao.

15. Neʼe tokoni feafeaʼi ia Paulo ki te kau Kilisitiano Hepeleo ke natou tuputupu ʼi te faʼahi fakalaumalie?

¹⁵ ʼE feala ke tou taʼofi he ako maʼuhiga mai te faʼahi ʼae neʼe tohi e Paulo ki te kau Kilisitiano Hepeleo. Neʼe mole kei tuputupu ʼihi ʼi te faʼahi fakalaumalie. ʼI tona fakahagatonu, neʼe “kua toe ʼaoga kia [natou] te huʼa pipi, kaʼe mole ko te meʼa kai [fakalaumalie] fefeka.” (Hep. 5:12) Neʼe mole natou ako pea mo mulimuli ki te ʼu moʼoni foʼou ʼae neʼe akoʼi age e Sehova ʼi te kokelekasio. (Taag. 4:18) Ohage la neʼe hahaʼi te kau Kilisitiano Sutea neʼe kei natou fia mulimuli pe ki te Lao ʼa Moisese, kae neʼe kua molehi te Lao ʼaia ia taʼu ʼe 30 ki muʼa atu ʼaki te sakilifisio ʼa Kilisito. (Loma 10:4; Tito 1:10) Lolotoga te ʼu taʼu ʼaia ʼe 30, neʼe natou maʼu he temi feʼauga ke natou fetogi ai tanatou manatu. Koia ʼi te tohi ʼae neʼe fai e Paulo ki te kau Hepeleo, neʼe ina faigaʼi ke natou tali te ʼu moʼoni loloto ʼae neʼe ina akoʼi age kia natou. Neʼe ko te meʼa ʼaia neʼe ʼaoga ki te kau Kilisitiano ʼaia ke natou tui ai ʼe maʼoluga age te tauhi kia Sehova ʼae neʼe fakatuʼu e Sesu. Neʼe natou toe maʼu mai ai te lotomalohi ke natou haga faifakamafola logo la tonatou fakatagaʼi e te kau Sutea.​—Hep. 10:19-23.

HAGA FAKAMALOHIʼI ʼAU FELOGOI MO SEHOVA

16. ʼI tatatou liliu ʼae ʼo fotufotuʼa ʼi te faʼahi fakalaumalie, kotea te tahi faʼahi ʼe tonu ke tou fai?

¹⁶ ʼE tonu ke tou faiga malohi ke tou liliu ʼo fotufotuʼa ʼi te faʼahi fakalaumalie, pea mo tokaga ke mole tou toe liliu ko he kihiʼi tamaliki ʼi te faʼahi fakalaumalie. ʼE tonu ke tou tokakaga naʼa tou ui ʼe mole kei ʼaoga ke fakamalohiʼi ʼatatou felogoi mo Sehova. (1 Ko. 10:12) ʼE tonu ke tou  “haga vakavakaʼi” ia tatou totonu pe kei tou tuputupu ʼi te faʼahi fakalaumalie.​—2 Ko. 13:5.

17. ʼE ha feafeaʼi ʼi te tohi ʼa Paulo ki te kau Kolose te maʼuhiga ʼae ke tou nonofo fotufotuʼa tuʼumaʼu ʼi te faʼahi fakalaumalie?

¹⁷ ʼI tana tohi ki te kau Kolose, neʼe toe fakaha e Paulo te maʼuhiga ʼae ke tou vakavakaʼi pe ʼe kei tou fotufotuʼa ʼi te faʼahi fakalaumalie. Logo la neʼe kua fotufotuʼa te kau Kolose ʼi te faʼahi fakalaumalie, kae neʼe ui age e Paulo ke natou tokakaga naʼa kakaʼi natou e te ʼu manatu ʼa te hahaʼi ʼo te malama. (Kol. 2:6-10) Pea ko Epafalasi, ʼae neʼe ina iloʼi lelei te kau Kilisitiano ʼo Kolose, neʼe faikole tuʼumaʼu ke natou “tutuʼu malohi ohage ko he hahaʼi kua fotufotuʼa.” (Kol. 4:12) Kotea ʼae ʼe tou ako mai ai? Neʼe mahino kia Paulo mo Epafalasi kapau ʼe tou loto ke tou fotufotuʼa tuʼumaʼu ʼi te faʼahi fakalaumalie, ʼe ʼaoga ke tokoni mai te ʼAtua, kae ʼe tonu foki ke tou haga fakamalohiʼi ʼatatou felogoi mo ia. Neʼe nā loto ke taupau tuʼumaʼu e te kau Kolose tonatou ʼuhiga fotufotuʼa fakalaumalie, logo la te ʼu faigataʼaʼia neʼe natou tau mo ia.

18. Kotea ʼae ʼe feala ke hoko ki he Kilisitiano kua fotufotuʼa ʼi te faʼahi fakalaumalie? (Vakaʼi mo te pāki.)

¹⁸ Neʼe fai e Paulo te fakatokaga ʼaeni ki te kau Hepeleo: ko he tahi kua fotufotuʼa ʼi te faʼahi fakalaumalie, ʼe feala pe ke mole kei ʼofa Sehova ia ia mo kapau ʼe mole nofo tokaga. Pea ka mole fia fakalogo he Kilisitiano kia Sehova, ʼe feala ke fakamamaʼo mai ia te ia. Ka mole fakahemala pea ʼe mole feala ke fakamolemole e te ʼAtua tana aga. Meʼa lelei foki, neʼe mole ko te aluʼaga ʼaia neʼe hoko ki te kau Hepeleo. (Hep. 6:4-9) ʼE feafeaʼi ʼi te temi nei kia natou ʼae kua fakamamaʼo mai te kokelekasio pea mo natou ʼae neʼe fakamavae kae natou fakahemala ki muli age? Ko tanatou agavaivai ʼo fakahemala ʼe ha ai tanatou kehe mai ia natou ʼae neʼe talanoa ki ai ia Paulo. ʼE mahino ia, ʼi tanatou toe liliu mai ʼae kia Sehova ʼe ʼaoga ke natou tali tana tokoni. (Esk. 34:15, 16) ʼE feala ke kole e te ʼu tagata ʼafea ki he Fakamoʼoni kua fotufotuʼa ʼi te faʼahi fakalaumalie ke tokoni kia natou ke toe fakamalohi ʼanatou felogoi mo Sehova.

19. Kotea ʼae ʼe tonu ke tou faiga ki ai?

¹⁹ ʼE feala ke iku ʼau faiga ʼae ke ke fotufotuʼa ʼi te faʼahi fakalaumalie. Koia hoko atu tau ako te ʼu moʼoni loloto ʼae ʼi te Tohi-Tapu, pea faiga ke ke manatu ohage ko Sehova. Pea ka kua ke fotufotuʼa ʼi te faʼahi ʼi te fakalaumalie, fai ia meʼa fuli ke malohi tuʼumaʼu ʼau felogoi mo Sehova ʼo talu ai.