1. Neʼe fakatuʼutuʼu feafeaʼi te ʼu ʼuluaki Kilisitiano?

 KA FOAKI e Sehova he gaue ki ʼana kaugana, ko tona loto ke fakatuʼutuʼu lelei tanatou gaue. (1 Ko. 14:33) Ohage la, ʼe ko te finegalo ʼo te ʼAtua ke fakamafola te logo lelei ʼi te kele katoa. (Mat. 24:14) Neʼe ina tuku kia Sesu ia te maʼua ʼae ke ina takitaki ia te gaue ʼaia. Pea ʼe tokaga ia Sesu ke fakatuʼutuʼu lelei te gaue ʼaia. ʼI te temi ʼo te ʼu ʼuluaki Kilisitiano, ka neʼe fakatuʼu he ʼu kokelekasio ʼi te ʼu koga meʼa kehekehe, neʼe hinoʼi he ʼu tagata ʼafea ke natou tokakaga ki ai. (Gaue 14:23) ʼI Selusalemi, neʼe ʼi ai te kolesi pule neʼe faʼufaʼu e he ʼu tagata ʼafea. Ko te ʼu tagata ʼafea ʼaia neʼe ko ni apositolo mo ni tehina faiva. Neʼe natou toʼo ni tonu ke mulimuli ki ai te ʼu kokelekasio. (Gaue 15:2; 16:4) Pea ʼi te mulimuli ʼa te ʼu kokelekasio ki te ʼu tonu ʼaia “neʼe haga malolohi aipe ʼi te tui pea mo tuputupu ʼo kauga malie.”​—Gaue 16:5.

2. Talu mai te taʼu 1919, ʼe takitaki feafeaʼi e Sehova ʼana kaugana pea ʼe feafeaʼi tana foaki age ia te meʼa kai fakalaumalie?

² ʼE toe feia ʼi te temi nei, kei hoko atu pe te fakatuʼutuʼu e Sehova ʼana kaugana. Talu mai te taʼu 1919, ʼe fakaʼaogaʼi e Sesu te kiʼi kutuga, ko te ʼu tehina neʼe fakafono ʼaki te laumalie maʼoniʼoni moʼo fakatuʼutuʼu te gaue faifakamafola pea mo foaki te meʼa kai fakalaumalie ki ʼana tisipulo. a (Luka 12:42) ʼE ha lelei  mai, ʼe tapuakina e Sehova te gaue ʼa te kiʼi kutuga ʼaia.​—Esa. 60:22; 65:13, 14.

3-4. (1) Tuku mai he faʼifaʼitaki ʼe ha ai ʼe ʼi ai te ʼu fua lelei mo kapau ʼe fakatuʼutuʼu lelei ʼatatou gaue. (2) Kotea ʼae ka tou vakaʼi anai ʼi te alatike ʼaeni?

³ Ka na neʼe mole fakatuʼutuʼu lelei la te gaue ʼae neʼe tuku mai e Sesu, ka na ʼaua la neʼe mole feala ke tou fakahoko. (Mat. 28:19, 20) Ohage la, fakakaukauʼi age muʼa pe ʼe feafeaʼi anai mo ka na pau la neʼe olo pe te ʼu tehina ʼo faifakamafola ʼi te ʼu telituale ʼae neʼe natou loto ki ai, kae mole ki te ʼu telituale ʼae neʼe ʼavage. ʼE mahino ia, ʼe gaueʼi tuʼumaʼu pe anai ʼihi telituale kae tuku noaʼi leva ʼihi. ʼE ke manatu koa ki he tahi ʼu lelei ʼe tou maʼu ʼuhi he ʼe fakatuʼutuʼu lelei tatatou gaue?

⁴ ʼE fakatuʼutuʼu e Sesu tatatou gaue ia ʼaho nei ohage pe ko tana fakatuʼutuʼu te gaue ʼo ʼana tisipulo ʼi tana kei maʼuli ʼae ʼi te kele. ʼI te alatike ʼaeni, ʼe tou vakaʼi anai te faʼifaʼitaki ʼae neʼe ina tuku mai, pea ʼe mulimuli feafeaʼi tatatou kautahi ki ai. ʼE tou toe vakaʼi anai pe ʼe feafeaʼi hatatou fakaha tatatou falala ki te kautahi ʼa Sehova.

ʼE MULIMULI TATATOU KAUTAHI KI TE FAʼIFAʼITAKI ʼA SESU

5. ʼE faʼifaʼitakiʼi feafeaʼi e tatatou kautahi ia Sesu? (Soane 8:28)

⁵ Neʼe ako e Sesu mai tana Tamai ʼae ʼi selo te ʼu palalau mo te ʼu gaue ʼae neʼe tonu ke ina fai. ʼE muliʼi e te kautahi ʼa Sehova te faʼifaʼitaki ʼa Sesu. ʼE fakaʼaogaʼi e te kautahi ia te Folafola ʼa te ʼAtua moʼo fakaha mai te meʼa ʼae ʼe lelei mo ʼae ʼe kovi, pea mo foaki mai ni tokoni ʼe ʼaoga ki totatou maʼuli. (Lau ia Soane 8:28; 2 Tim. 3:16, 17) ʼE tau fakamanatuʼi mai e te kautahi ʼa Sehova te maʼuhiga ʼae ke tou lau tuʼumaʼu pea mo maʼuliʼi te Folafola ʼa te ʼAtua. Kotea la he faʼahiga fai ke tou ako ai te Tohi-Tapu, pea kotea tona fua lelei kia tatou?

6. ʼE fua lelei feafeaʼi kia tatou te ako ʼo te Tohi-Tapu? Tuku mai he faʼifaʼitaki.

⁶ Ka tou fakaʼaogaʼi ʼatatou tohi moʼo ako te Tohi-Tapu, ʼe fua lelei ʼaupito ai kia tatou. Ohage la, ʼe feala ke tou fakatatau te manatu ʼae ʼe tuʼu ʼi te Tohi-Tapu pea mo te ʼu tokoni ʼae ʼe foaki mai e tatatou kautahi. Ka tou tokagaʼi ʼe fakatafito te ʼu tokoni ʼaia ki te Tohi-Tapu, ʼe toe lahi ai tatatou falala ki te kautahi ʼa Sehova.​—Loma 12:2.

7. Kotea ʼae neʼe fakamafola e Sesu, pea ʼe mulimuli feafeaʼi te kautahi ʼa Sehova ki tana faʼifaʼitaki?

⁷ Neʼe fakamafola e Sesu “te logo lelei ʼo te Puleʼaga ʼo te ʼAtua.” (Luka 4:43, 44) Neʼe toe fakatotonu e Sesu ki ʼana tisipulo ke natou fakamafola ia te Puleʼaga. (Luka 9:1, 2; 10:8, 9) Ia ʼaho nei, ko natou fuli ʼae ʼe kau ki te kautahi ʼa Sehova, ʼe natou fakamafola te logo ʼo te Puleʼaga ʼi he faʼahi pe ʼe natou maʼuʼuli ai, tatau aipe pe ʼe kotea te maʼua ʼae ʼe natou maʼu ʼi te kokelekasio.

8. Kotea te pilivilesio ʼae ʼe foaki mai?

⁸ Ko he pilivilesio kia tatou tatatou fakamafola ia te moʼoni ʼo ʼuhiga mo te Puleʼaga ʼo te ʼAtua ki te hahaʼi. ʼE mole foaki ki te hahaʼi fuli te pilivilesio ʼaia. Ohage la, ʼi te kei maʼuli ʼa Sesu ʼi te kele, neʼe mole ina tuku ke palalau te ʼu laumalie agakovi ʼo ʼuhiga mo ia. (Luka 4:41) ʼI te temi nei, kapau ʼe fia faifakamafola he tahi mo te ʼu kaugana ʼa Sehova, ʼe ʼi ai te ʼu maʼua ʼe tonu ke ina fakahoko. ʼE ha ʼe malave ʼosi kia tatou te pilivilesio ʼaia neʼe foaki mai he ʼe tou palalau ki te hahaʼi ʼi he faʼahi pe pea mo tou fakaʼaogaʼi te ʼu faigamalie fuli. Ohage ko Sesu, ʼe tou loto moʼoni ke tou to mo fakavai te pulapula ʼo te moʼoni ʼo te Puleʼaga ʼi te loto ʼo te hahaʼi.​—Mat. 13:3, 23; 1 Ko. 3:6.

9. ʼE fakaha feafeaʼi e tatatou kautahi ia te huafa ʼo te ʼAtua?

⁹ Neʼe fakaha e Sesu te huafa ʼo te ʼAtua. ʼI tana faikole, neʼe ina ui ki tana Tamai ʼae ʼi  selo: “Neʼe au fakaha . . . tou huafa.” (Soa. 17:26) Ohage pe ko Sesu, ʼe faiga lahi ia te kautahi ʼa Sehova ke iloʼi e te hahaʼi ia te huafa ʼo te ʼAtua. Moʼo fakahoko ia te faʼahi ʼaia, ʼe ina fakaʼaogaʼi te Tohi-Tapu Fakaliliu ʼo Te Malama Foʼou ʼae neʼe toe fakatuʼu ai te huafa ʼo te ʼAtua ʼi te ʼu vaega ʼae ʼe tonu ke tuʼu ai. Kua maʼu te Tohi-Tapu ʼaia katoa peʼe fakakoga ia lea ʼe 270 tupu. ʼI Appendices A4 pea mo A5 ʼi te Tohi-Tapu ʼaia ʼe ke maʼu ai he ʼu fakamahino ʼo ʼuhiga mo te toe fakatuʼu ʼo te huafa ʼo te ʼAtua ʼi te Tohi-Tapu. Pea ʼi Appendice C, ʼe ke toe maʼu ai he ʼu fakamoʼoni ʼe ha ai ʼe tonu ke tuʼu te huafa ʼo te ʼAtua ʼi te Koga Tohi-Tapu Fakakeleka Fakakilisitiano.

10. Kotea te ako ʼe ke taʼofi mai te faʼahi ʼae neʼe hoko ki te fafine ʼe maʼuli ʼi Birmanie?

¹⁰ Ohage ko Sesu, ʼe tou fia tokoni ki te hahaʼi tokolahi ke natou iloʼi ia te huafa ʼo te ʼAtua. Ko te fafine ʼe taʼu 67 pea ʼe maʼuli ʼi Birmanie, neʼe tagi ʼi tana iloʼi ʼae te huafa ʼo te ʼAtua. Neʼe ina ui fenei ki tana fafine faiako: “Ko taku hoki iloʼi e ko te huafa ʼo te ʼAtua ʼe ko Sehova. . . . Neʼe ke akoʼi mai he faʼahi maʼuhiga ki toku maʼuli.” Ohage ko tona fakaha ʼi te faʼifaʼitaki ʼaeni, ko te iloʼi ia te huafa ʼo te ʼAtua ʼe feala ke fetogi ai te maʼuli ʼo he tahi ʼe fakamalotoloto.

FAKAHA ʼE KE FALALA KI TATATOU KAUTAHI

11. ʼE fakaha feafeaʼi e te kau tagata ʼafea ʼe natou falala ki te kautahi ʼa Sehova? (Vakaʼi mo te pāki.)

¹¹ ʼE fakaha feafeaʼi e te ʼu tagata ʼafea ʼe natou falala ki te kautahi ʼa te ʼAtua? Ka natou maʼu ni fakatotonu mai te kautahi, pea ʼe natou lau fakaleleiʼi pea mo faiga fakamalotoloto ke natou mulimuli ki ai. Ohage la, ʼe foaki e te kautahi kia natou he ʼu tokoni ke natou teuteuʼi ʼanatou akonaki pea mo ʼanatou faikole moka natou fakafofoga te kokelekasio. Pea ʼe toe fakamahino age pe ʼe feafeaʼi hanatou tokakaga ki te ʼu ovi ʼa Kilisito. Ka mulimuli lelei ki ai te kau tagata ʼafea, ʼe logoʼi e te kokelekasio ʼe puipui natou pea mo ʼofainaʼi.

12. (1) He koʼe ʼe tonu ke tou fakalogo kia natou ʼae ʼe natou takitaki tatou? (Hepeleo 13:7, 17) (2) He koʼe ʼe tonu ke tou tokagaʼi te ʼu kalitate ʼo natou ʼae ʼe natou takitaki tatou?

¹² Ka tuku mai e te ʼu tagata ʼafea he ʼu fakatuʼutuʼu, pea ʼe tou lotolelei ʼo mulimuli ki ai. ʼE faigafua ai anai tanatou fakahoko tanatou gaue. ʼE fakalotomalohiʼi tatou ʼi te Tohi-Tapu ke tou fakalogo pea mo talagafua kia natou ʼe takitaki. (Lau ia Hepeleo 13:7, 17.) Kae ʼe mole faigafua ʼi ʼihi temi. Kotea tona tupuʼaga? He ʼe natou heʼe haohaoa. Kae kapau ʼe tou tokagaʼi tafito pe ʼonatou vaivaiʼaga kae mole ko ʼanatou kalitate, pea ʼe tou fai anai te ʼu meʼa ʼae ʼe loto ki ai ʼotatou fili. ʼEi, ʼe puli anai tatatou falala ki te kautahi ʼa te ʼAtua. ʼE feafeaʼi hatatou iloʼi mo liʼaki te ʼu loi ʼae ʼe tala e ʼotatou fili?

ʼAUA NAʼA FAKAVAIVAIʼI E ʼIHI TAU FALALA KI TE KAUTAHI

13. Kotea ʼae ʼe fai ʼe te ʼu fili ʼo te ʼAtua moʼo ʼulihi tana kautahi?

¹³ Ko te ʼu fili ʼo te ʼAtua ʼe natou faigaʼi ʼo ʼave keheʼi te ʼu fakatuʼutuʼu lelei ʼo te kautahi ʼa te ʼAtua. Ohage la, ʼe akoʼi mai ʼi te Tohi-Tapu ʼe loto e Sehova ke maʼa ʼana kaugana ʼi te faʼahi fakasino, mo tanatou aga, ʼo feia mo tanatou tauhi. ʼE ina fakamaʼua ke toʼo mai te lotolotoiga ʼo te kokelekasio he tahi ʼe ina fai he aga heʼe ʼaoga kae mole fakahemala. (1 Ko. 5:11-13; 6:9, 10) ʼE tou fakalogo ki te fakatotonu Fakatohi-tapu ʼaia. Kae ko natou ʼae ʼe fakafeagai mai ʼe natou ui ʼe mole tou ʼoʼofa ki te hahaʼi, ʼe tou fakamauʼi natou pea ʼe mole tou tali ia natou ʼae ʼe mole hage ko tatou.

14. ʼE haʼu mai ia ai te ʼu loi ʼae ʼe lau ʼo ʼuhiga mo tatou?

 ¹⁴ Ke ke mahino pe ko ai ʼae ʼe ina tauʼi moʼoni tatou. ʼE haʼu mai ia Satana te Tevolo te ʼu loi ʼae ʼe lau ʼo ʼuhiga mo tatou. Tou manatuʼi ko Satana “te tamai ʼo te loi.” (Soa. 8:44; Sen. 3:1-5) Koia ʼe mole tou punamaʼuli ai moka ina fakaʼaogaʼi natou ʼae ʼe kau mo ia ke natou fakamafola ni loi ʼo ʼuhiga mo te kautahi ʼa Sehova. Neʼe kua ina fai pe kia Sesu pea mo te ʼu ʼuluaki Kilisitiano.

15. Neʼe feafeaʼi te aga ʼa te kau takitaki lotu kia Sesu mo ʼana tisipulo?

¹⁵ Logo la ko Sesu te ʼAlo ʼo te ʼAtua neʼe haohaoa pea mo ina fai ni milakulo, kae neʼe fakaʼaogaʼi e Satana tana hahaʼi ke natou lau ni loi ʼo ʼuhiga mo Sesu. Ohage la, neʼe ui e te kau takitaki lotu ki te hahaʼi ko te malohi ʼae neʼe maʼu e Sesu moʼo kapu te ʼu temonio neʼe haʼu ia mai “te pule ʼo te kau temonio.” (Mko. 3:22) ʼI te fakamauʼi ʼae ʼo Sesu, neʼe natou ui neʼe laukovi Sesu ki te ʼAtua pea neʼe natou uga te hahaʼi ke natou kalaga ke matehi ia Sesu. (Mat. 27:20) Ki muli age, ʼi te faifakamafola ʼa te ʼu tisipulo ʼa Kilisito, ko te kau fakafeagai neʼe natou “fakamaveuveu pea mo fakakoviʼi te hahaʼi” ke natou fakatagaʼi ai te kau Kilisitiano ʼaia. (Gaue 14:2, 19) ʼI Te Tule Leʼo ʼo te ʼaho 1 ʼo Tesepeli 1998 neʼe ui ai ʼo ʼuhiga mo Gaue 14:2: “Neʼe mole gata pe tanatou fakafisi ki te logo, kae neʼe fakatuʼutuʼu e te kau Sutea fakafeagai ke natou fai he ʼu tukugakovi, ʼo natou faiga ke agakovi te kau Senitile ki te kau Kilisitiano.”

16. Kotea ʼae ʼe tonu ke tou manatuʼi moka tou logo ki ni loi ʼe lau ʼo ʼuhiga mo tatou?

¹⁶ ʼI te temi nei, kei hoko atu pe te loi ʼa Satana. “ ʼE ina fakaheʼi te kele katoa.” (Fkha. 12:9) Ka ke logo ki he ʼu loi ʼe lau ʼo ʼuhiga mo te kautahi peʼe ko te ʼu tehina ʼae ʼe natou takitaki tatou, pea ke manatuʼi pe neʼe feafeaʼi te  aga ʼa te ʼu fili ʼo te ʼAtua kia Sesu mo ʼana tisipulo. Ohage pe ko tona fakakikite ʼi te Tohi-Tapu, ko te ʼu kaugana ʼa Sehova ʼi te temi nei ʼe laukoviʼi pea mo fakatagaʼi. (Mat. 5:11, 12) Kae kapau ʼe tou mahino pe ʼe tupu mai ia ai te ʼu fakamatala loi pea mo tou foimo fai he puleʼaki moʼo puipui ʼo tatou, ʼe mole tou tui anai ki te ʼu fakamatala loi ʼaia. ʼE feafeaʼi hatatou puipui ʼo tatou?

17. Kotea ʼae ʼe tonu ke tou fai ke mole tou fagono ai ki te ʼu fakamatala ʼae ʼe loi? (2 Timoteo 1:13) (Vakaʼi mo te fakamatala ʼo te ʼa takai “  ʼAua Naʼa Ke Fagono Ki Ni Fakamatala Loi.”)

¹⁷ ʼAua naʼa ke fagono ki te ʼu fakamatala ʼae ʼe loi. Neʼe fakamahino lelei e te apositolo ko Paulo pe kotea ʼae ʼe tonu ke tou fai. Neʼe ina ui kia Timoteo ke ina “fakatotonu ki ʼihi ke ʼaua naʼa natou . . . tokagaʼi te ʼu fakamatala loi” pea ke ina “liakī te ʼu fakamatala loi ʼae ʼe ina moamoagaʼi te ʼAtua.” (1 Tim. 1:3, 4; 4:7) ʼI ʼihi temi ʼe tae e te ʼu kiʼi tamaliki he ʼu meʼa ʼe leta ʼi lalo ʼo ʼai ki ʼonatou gutu. Kae ʼe mole fai feia anai e he tahi kua lahi he ʼe ina iloʼi ʼe mahaki ai anai. ʼE tou liʼaki te ʼu fakamatala loi he ʼe tou iloʼi pe ko ai ʼae ʼe tupu mai ai. Kae ʼe tou fagono ki “te ʼu folafola ʼae ʼe lelei” ʼo te moʼoni.​—Lau ia 2 Timoteo 1:13.

18. ʼE feafeaʼi hatatou fakaha tatatou falala ki te kautahi ʼa Sehova?

¹⁸ Neʼe tou vakaʼi faʼahi pe ʼe tolu ʼae ʼe faʼifaʼitakiʼi ai e te kautahi ʼa te ʼAtua ia Sesu. ʼI te temi ʼae ʼe ke ako ai te Tohi-Tapu, faigaʼi ke ke maʼu he tahi ʼu faʼahi ʼe tou muliʼi ai te faʼifaʼitaki ʼa Sesu. Tokoni ki ʼou tehina mo tuagaʼane ʼo tau kokelekasio ke natou fakamalohiʼi tanatou falala ki te kautahi ʼa te ʼAtua. Pea haga fakaha tau falala ʼo ke tauhi agatonu kia Sehova pea mo pipiki maʼu ki te kautahi ʼae ʼe ina fakaʼaogaʼi moʼo fakahoko tona finegalo. (Pes. 37:28) ʼOfa pe ke maʼuhiga tuʼumaʼu kia tatou te pilivilesio ʼae ke tou kau ki te hahaʼi agaʼofa mo agatonu ʼa Sehova.