ALATIKE AKO 34
ʼE Ke Maʼuhiga ʼi Te Kokelekasio ʼa Sehova!
“Ohage pe ko he sino ʼe tahi ʼe ina maʼu he ʼu koga sino ʼe lahi, pea logo la te lahi ʼo te ʼu koga sino fuli ʼaia, kaʼe ʼe ko he sino pe ʼe tahi, pea ʼe toe feia foki mo Kilisito.”—1 KO. 12:12.
KATIKO 101 Tou Gaue ʼi Te Logo Tahi
TE ʼU MANATU FAKANOUNOU *
1. Kotea te toe pilivilesio ʼae ʼe tou maʼu?
ʼI TOE pilivilesio leva hatatou kau ki te kokelekasio ʼa Sehova! ʼE tou tauhi fakatahi mo ʼotatou tehina mo tuagaʼane ʼi te fiafia mo te tokalelei. Kae kotea tau gaue ʼi te kokelekasio?
2. Kotea te fakata ʼae neʼe fakaʼaogaʼi e te apositolo ko Paulo ʼi ʼana tohi?
2 Kapau ʼe tou fia iloʼi pe ʼe ʼi ai hotatou ʼaoga ʼi te kokelekasio, tou vakaʼi te fakata ʼae neʼe fakaʼaogaʼi e te apositolo ko Paulo ʼi ʼana tohi. Neʼe tuʼa lahi te fakata e Paulo te kokelekasio ki he sino. Neʼe ina toe fakata ia natou ʼo te kokelekasio ki te ʼu koga kehekehe ʼo he sino.—Loma 12:4-8; 1 Ko. 12:12-27; Efe. 4:16.
3. Kotea te ʼu ako ʼe tou vakaʼi anai ʼi te alatike ʼaeni?
3 ʼE ʼi ai totatou ʼaoga ʼi te kokelekasio ʼa Sehova. ʼE feala kia tatou fuli ke tou fakamalohiʼi te kokelekasio. ʼE tou maʼuhiga fuli tatau aipe totatou lanu, totatou fenua, pe ʼe tou koloaʼia peʼe masiva, peʼe tou maʼu tuʼulaga, peʼe kotea te ako neʼe tou fai. ʼI te alatike ʼaeni, ʼe tou taʼofi anai he ʼu ako maʼuhiga ʼe tolu mai te fakata ʼa Paulo. ʼUluaki, ʼe tou maʼuhiga fuli ʼi te kokelekasio ʼa Sehova. Lua, ʼe tou vakaʼi anai te meʼa ʼae ʼe feala ke tou fai mo kapau ʼe tou manatu ʼe mole tou maʼuhiga. Tolu, ʼe tou vakaʼi anai pe ʼe koʼe ʼe maʼuhiga ke tou maʼumaʼua ʼi te ʼu gaue ʼae neʼe foaki mai e Sehova kia tatou takitokotahi ʼi te kokelekasio.
ʼE TOU MAʼUHIGA FULI ʼI TE KOKELEKASIO ʼA SEHOVA
4. Kotea te fakaʼuhiga ʼo te ʼu palalau ʼae neʼe fai e Paulo ia Loma 12:4, 5?
4 Ko te ʼuluaki ako ʼaeni ʼe tou taʼofi mai te fakata ʼa Paulo: ʼE tou maʼuhiga fuli ʼi te famili ʼo Sehova. ʼE fakamahino fenei Loma 12:4, 5) Kotea te fakaʼuhiga ʼo te ʼu palalau ʼaia ʼa Paulo? ʼE mole tatau te ʼu gaue ʼae ʼe tou tahi fai ʼi te kokelekasio, kae ʼe tou maʼuhiga fuli.
e Paulo: “Ohage ko he sino ʼe tahi ʼe ina maʼu he ʼu koga sino ʼe lahi, kaʼe ʼe mole tatau te gaue ʼae ʼe fai e te ʼu koga sino ʼaia, ʼo toe feia pe mo tatou, logo la tatatou kaugā malie, kaʼe ko tatou ko te sino pe ʼe tahi ʼo fakatahi mo Kilisito, pea ko tatou ko he ʼu koga sino ʼe pipiki tahi.” (5. Kotea te ʼu “meʼa ʼofa” neʼe foaki e Sehova maʼa te kokelekasio?
5 ʼE lagi ke manatu ko natou ʼae ʼe maʼuhiga ʼi te kokelekasio ʼe ko te ʼu tehina takitaki. (1 Tes. 5:12; Hep. 13:17) ʼE moʼoni, neʼe foaki e Sehova ʼaki ia Kilisito maʼa Tana kokelekasio ni “tagata ohage ko ni meʼa ʼofa.” (Efe. 4:8) ʼE kau ʼi te ʼu tagata ʼaia te ʼu tehina ʼo te Kolesi Pule, mo natou ʼae ʼe tokoni ki te Kolesi Pule, mo natou ʼo te ʼu Komite ʼo Te ʼu Filiale, mo te ʼu taupau fakasiliko, mo te ʼu tehina faiako ʼo te ʼu ako ʼa te kautahi, mo te kau tagata ʼafeā pea mo te ʼu tagata faifekau fakaminisitelio. Ko te ʼu tehina fuli ʼaia neʼe filifili ʼaki te laumalie maʼoniʼoni ke natou tokakaga ki te ʼu ovi maʼuhiga ʼa Sehova, pea mo fakamalohiʼi te kokelekasio.—1 Pet. 5:2, 3.
6. Ohage ko tona ui ia 1 Tesalonika 2:6-8, kotea ʼae ʼe faiga ke fai e te ʼu tehina ʼae neʼe filifili ʼaki te laumalie maʼoniʼoni?
6 Ko te ʼu tehina ʼae neʼe filifili ʼaki te laumalie maʼoniʼoni ʼe natou fakahoko he ʼu gaue kehekehe. Pea ʼe hage tanatou gaue ko te gaue fakatahi ʼo te ʼu koga kehekehe ʼo te sino, ohage ko te ʼu nima mo te ʼu vaʼe ke fua lelei ki te sino katoa. ʼEi, ko te ʼu tehina ʼaia ʼe natou gaue kinakina ke fua lelei ki te kokelekasio katoa. ʼE mole natou faiga ke fakakololiaʼi natou. Kae ʼe natou fia fakalotomalohiʼi ʼonatou tehina mo tuagaʼane. (Lau ia 1 Tesalonika 2:6-8.) ʼE tou fakafetaʼi kia Sehova ʼi tana foaki mai te ʼu tehina ʼaia ʼe natou maʼu tana manatu, pea ʼe natou fakamuʼamuʼa te ʼu meʼa ʼae ʼe ʼaoga ki te ʼu ovi.
7. Kotea te ʼu tapuakina ʼe maʼu e natou ʼae ʼe kau ki te selevisi temi katoa?
7 Ko ʼihi tehina mo tuagaʼane ʼi te kokelekasio ʼe natou misionea, peʼe pionie makehe, peʼe pionie katoa. Koia, ʼi te malamanei katoa ʼe fakatuʼutuʼu e te ʼu tehina mo tuagaʼane ʼaia ke natou faifakamafola temi katoa pea mo fai ni tisipulo. ʼE natou maʼu ai te faigamalie ke natou tokoni ki te hahaʼi ke natou liliu ko ni tisipulo ʼa Sesu. Tokolahi ia natou ʼaia ʼe mole lahi tanatou foʼi falā peʼe ko ʼonatou koloa. Kae ʼe tapuakinaʼi lahi natou e Sehova. (Mko. 10:29, 30) ʼE tou ʼoʼofa ki te ʼu tehina mo tuagaʼane ʼaia pea ʼe tou fiafia ʼi tanatou kau ki te kokelekasio.
8. He koʼe ʼe maʼuhiga kia Sehova ia natou fuli ʼae ʼe natou fakamafola te logo lelei?
8 Ko te ʼu tehina ʼae neʼe filifili ʼaki te laumalie pea mo natou ʼae ʼe kau ki te selevisi temi katoa, ʼe ko natou pe koa ʼaia ʼe maʼuhiga ʼi te kokelekasio? Kailoa ia. ʼE maʼuhiga te kau faifakamafola fuli kia Sehova pea mo te kokelekasio. (Loma 10:15; 1 Ko. 3:6-9) ʼE moʼoni te faʼahi ʼaia, koteʼuhi ko te fakatuʼutuʼu tafito ʼa te kokelekasio ʼe ko te fai ʼo ni tisipulo ʼo totatou ʼAliki ko Sesu Kilisito. (Mat. 28:19, 20; 1 Tim. 2:4) Ko natou fuli ʼae ʼe kau ki te kokelekasio, pe ʼe kua papitema peʼe kei kauga fagona, ʼe natou faiga ke natou fakamuʼamuʼa te faifakamafola.—Mat. 24:14.
9. He koʼe ʼe maʼuhiga kia tatou ʼotatou tuagaʼane?
9 ʼE maʼuhiga kia Sehova ʼotatou tuagaʼane he ʼe ina foaki age kia natou he gaue maʼuhiga ʼi te kokelekasio. ʼE fakaʼapaʼapa Luka 8:2, 3; Gaue 16:14, 15; Loma 16:3, 6; Flp. 4:3; Hep. 11:11, 31, 35) ʼE tou lotofakafetaʼi kia Sehova ʼi tatatou maʼu he ʼu tuagaʼane ʼi tatatou kokelekasio ʼe natou toe fakaha mo natou te ʼu kalitate ʼaia.
lahi ki te ʼu fafine ʼohoana, mo te ʼu faʼe, mo te ʼu vitua, pea mo te ʼu tuagaʼane selipatea he ʼe natou tauhi agatonu kia te ia. ʼE lahi te talanoa ʼi te Tohi-Tapu ki te ʼu fafine neʼe natou tuku he faʼifaʼitakiʼaga lelei pea neʼe natou maʼu te ʼofa ʼo te ʼAtua. ʼE fakamatala ai tanatou fakaha te poto, mo te tui, mo te faʼafai, mo te lototoʼa, mo te lotofoaki, ʼo feia mo te ʼu gaue lelei neʼe natou fai. (10. He koʼe ʼe maʼuhiga kia tatou te ʼu tehina mo tuagaʼane ʼae kua vaivai?
10 ʼE tou toe fiafia ʼi te maʼu ʼi totatou kokelekasio he ʼu tehina mo tuagaʼane kua vaivai. Ko ʼihi ia natou ʼaia neʼe natou fakaʼaogaʼi tonatou maʼuli katoa ki te tauhi kia Sehova. Pea ko ʼihi neʼe natou hoki iloʼi age pe te moʼoni. Tokolahi ia natou kua mahamahaki ʼuhi ko te vaivai matuʼa. ʼE mole kei lahi ai te ʼu gaue ʼe natou fakahoko ʼi te kokelekasio pea mo te faifakamafola. Kae ʼe natou fai pe te meʼa ʼae ʼe natou lavaʼi. Pea ʼe natou fakaʼaogaʼi tonatou malohi katoa moʼo fakalotomalohiʼi pea mo akoako ʼihi. ʼE ʼaoga kia tatou te ʼu faʼahi ʼae neʼe natou ako ʼi tonatou maʼuli. ʼE natou matalelei kia mata ʼo Sehova pea mo tatou.—Taag. 16:31.
11-12. ʼE fakalotomalohiʼi feafeaʼi koe e te kau tupulaga ʼo tau kokelekasio?
11 Tou toe talanoa foki ki ʼatatou kau tupulaga. ʼE mole faigafua te maʼuli kia natou, he ʼe natou lahilahi ake ʼi he malama ʼe puleʼi e Satana pea kua mafola ai tana ʼu manatu ʼe kovi. (1 Soa. 5:19) ʼE fakalotomalohi moka tali he tupulaga ʼi tatatou ʼu fono, pea moka natou faifakamafola. ʼE toe fakalotomalohi moka tou logo neʼe natou lototoʼa ʼo palalau ki tanatou tui. Kau tupulaga, ʼe kotou maʼuhiga ʼi te kokelekasio ʼa Sehova.—Pes. 8:3.
12 Kae ʼe faigataʼa ki ʼihi tehina mo tuagaʼane hanatou tui ʼe natou maʼuhiga ʼi te kokelekasio. Kotea ʼae ʼe tonu ke tou fai ke tui
papau ai ʼe tou maʼuhiga fuli ʼi te kokelekasio? Tou vakaʼi te faʼahi ʼaia.KE KE MAHINO ʼE KE MAʼUHIGA ʼI TE KOKELEKASIO
13-14. He koʼe ʼe faigataʼa ki ʼihi hanatou tui ʼe natou maʼuhiga ʼi te kokelekasio?
13 Tou vakaʼi te lua ako ʼe tou taʼofi mai te fakata ʼa Paulo. Neʼe talanoa ia Paulo ki he meʼa ʼe logoʼi e te tokolahi ia ʼaho nei. ʼE faigataʼa hanatou tui ʼe natou maʼuhiga ʼi te kokelekasio. Neʼe tohi fenei e Paulo: “Kapau la ʼe ui fenei e te vaʼe: ‘ ʼUhi ʼae ʼe mole ko au ko he nima, ʼe mole au kau au ki te sino,’ ʼe fakaʼuhiga ai koa ʼe mole kau ki te sino? Pea kapau la ʼe ui fenei e te taliga: ‘ ʼUhi ʼae ʼe mole ko au ko he foʼi mata, ʼe mole au kau au ki te sino,’ ʼe fakaʼuhiga ai koa ʼe mole kau ki te sino?” (1 Ko. 12:15, 16) Kotea te fakaʼuhiga ʼo te ʼu palalau ʼaia ʼa Paulo?
14 Kapau ʼe ke fakatatau ia koe ki ʼihi ʼo te kokelekasio, ʼe feala ai leva ke ke manatu ʼe mole hou ʼaoga. ʼE lagi ʼi ai ʼihi ʼe faiva ʼi te faiakonaki, peʼe ko te fakatuʼutuʼu ʼo he ʼu gaue, peʼe ko te fakalotofimalieʼi mo fakalotomalohiʼi te ʼu tehina mo tuagaʼane. Pea ʼe feala ai leva ke ke manatu ʼe mole ke poto ohage ko natou. ʼE ha ai ʼe ke agavaivai. (Flp. 2:3) Kae ke ke tokaga. Kapau ko hau agamahani te fakatatau ʼo koe kia natou ʼae ʼe lahi ʼonatou faiva, ʼe ke lotovaivai anai. Pea ohage ko tona ui e Paulo, ʼe feala ke ke manatu ʼe mole ke maʼuhiga ʼi te kokelekasio. Kae ʼe feala ke ke tauʼi te taʼi manatu ʼaia.
15. Ohage ko tona ui ia 1 Kolonito 12:4-11, ʼe feafeaʼi anai tatatou faʼahiga manatu moka ʼe ʼi ai hotatou fealagia?
15 Tou fakakaukauʼi ia te aluʼaga ʼaeni: Neʼe foaki e Sehova ki ʼihi ʼi te ʼu ʼuluaki Kilisitiano he ʼu fealagia ke natou fai he ʼu gaue fakaofoofo. Kae neʼe mole tatau te ʼu fealagia ʼae neʼe maʼu e te kau Kilisitiano ʼaia. (Lau ia 1 Kolonito 12:4-11.) Neʼe kehekehe te ʼu fealagia ʼae neʼe foaki age e Sehova kia natou, kae neʼe natou maʼuhiga fuli kia te ia. Ia ʼaho nei, ʼe mole tou maʼu mai te laumalie maʼoniʼoni he ʼu fealagia ke tou fai ai he ʼu gaue fakaofoofo. Kae ko te faʼahi ʼae ʼe tou tui papau ki ai, ʼe tou maʼuhiga fuli kia Sehova logo la te kehekehe ʼo ʼotatou fealagia.
16. Kotea te tokoni ʼa Paulo ʼae ʼe tonu ke tou maʼuliʼi?
16 Koia, ʼe mole tonu ke tou fakatatau ia tatou ki ʼihi. Kae tou maʼuliʼi te tokoni ʼaeni ʼa Paulo: “Ke tahi vakavakaʼi e te tagata ʼana gaue ʼa ia totonu, pea ʼe ina maʼu ai anai he tupuʼaga ke fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.”—Kal. 6:4.
17. He koʼe ʼe lelei ke tou maʼuliʼi te tokoni ʼa Paulo?
17 Kapau ʼe tou maʼuliʼi te tokoni ʼaia ʼa Paulo, ʼo tou tahi vakavakaʼi te ʼu gaue ʼa tatou totonu, ʼe tou tokagaʼi ai ʼe ʼi ai ʼotatou fealagia ʼe mole maʼu e ʼihi. Ohage ko he tagata ʼafeā ʼe mole faiva ʼi te faiakonaki, kae ʼe feala ke ina fai he gaue lelei ʼi te faifakamafola pea mo te fai ʼo ni tisipulo. Peʼe ko he tagata ʼafeā ʼe mole ina fakatuʼutuʼu lelei ʼana gaue ohage ko ʼihi kau tagata ʼafea, kae ʼe agalelei pea mo ʼofa. Pea ʼe mole matataku te ʼu tehina mo tuagaʼane ʼi te fakaovi age ki ai, peʼe ko he tahi ʼe tali kaiga. (Hep. 13:2, 16) Kapau ʼe tou iloʼi ʼotatou fealagia, ʼe tou fiafia anai ʼi te tokoni ki totatou kokelekasio. Pea ʼe mole tou maheheka anai ki ʼotatou tehina mo tuagaʼane he ʼe natou maʼu he ʼu fealagia ʼe mole tou maʼu.
18. Kotea ʼae ʼe tonu ke tou fai ke lelei age tatatou faiako?
18 Tatau aipe pe ʼe kotea te gaue ʼe tou fai ʼi te kokelekasio, kae ʼe tou faiga fuli anai ke lelei age tatatou faiako pea mo tatatou tauhi. ʼE tokoni mai ia Sehova, ʼo ina akoako tatou ʼaki tana kautahi. Ohage la, ʼe tou maʼu ni tokoni ʼi tatatou ʼu fono ʼi te vahaʼa ke lelei age tatatou faifakamafola. ʼE ke faiga koa ke ke mulimuli ki te ʼu tokoni ʼaia?
19. Kotea ʼae ʼe feala ke ke fai ke ke kau ki te Ako ʼo Te Kau Faifakamafola ʼo Te Puleʼaga?
19 ʼE toe akoako lelei tatou ʼi te Ako ʼo Te Kau Faifakamafola ʼo Te Puleʼaga. ʼE feala ke kau ki ai te ʼu tehina mo tuagaʼane ʼae ʼe pionie katoa pea mo taʼu 23 ki te 65. ʼE lagi ke manatu anai ʼe mole feala hau kau ki te ako ʼaia. ʼE lelei age tau mole fakakaukauʼi te ʼu faʼahi ʼae ʼe natou taʼofi koe ke ke kau ki ai. Kae ke ke tohi te ʼu faʼahi ʼae ʼe natou uga koe ke ke fia kau ki ai. Pea ke ke fakakaukauʼi te meʼa ʼae ʼe tonu ke ke fai ke ke kau ki te ako ʼaia. ʼAki te tokoni ʼa Sehova pea mo ʼau faiga, ʼe ke fai anai he meʼa neʼe ke manatu ʼe mole ke lavaʼi.
FAKAʼAOGAʼI ʼOU FEALAGIA MOʼO FAKAMALOHIʼI TE KOKELEKASIO
20. Kotea te ako ʼe tou taʼofi mai ia Loma 12:6-8?
20 Ko te tolu ako ʼae ʼe tou taʼofi mai te fakata ʼa Paulo, ʼe tuʼu ia Loma 12:6-8. (Lau.) ʼE toe fakaha e Paulo ʼi te ʼu vaega ʼaeni ʼe tou maʼu he ʼu fealagia kehekehe. Kae ʼe ina fakamaʼuhigaʼi te ʼaoga ʼae ke tou fakaʼaogaʼi totatou ʼu fealagia ʼaia moʼo fakamalohiʼi te kokelekasio.
21-22. Kotea te ako ʼe feala ke tou taʼofi mai te faʼifaʼitaki ʼa Robert mo Felice?
21 Tou vakaʼi te faʼifaʼitaki ʼo te tehina ko Robert. * Neʼe alu ʼo faifakamafola ʼi te tahi fenua, pea neʼe fekauʼi leva ke toe liliu ki tona fenua, ʼo gaue ʼi te Petele. Neʼe fakamahino age e te ʼu tehina neʼe mole ina fai he meʼa ʼe kovi. Kae neʼe ina ui fenei: “Lolotoga ni mahina, neʼe au lotomamahi he neʼe au manatu neʼe mole lelei taku fai taku selevisi. ʼI ʼihi temi neʼe au fia mavae ʼi te Petele.” Kae neʼe toe maʼu feafeaʼi e Robert te fiafia? Neʼe fakamanatuʼi age e he tagata ʼafea ko te ʼu faʼahiga selevisi ʼae neʼe tou fai ʼi muʼa atu, neʼe akoako ai tatou e Sehova ke ʼi ai hotatou ʼaoga ʼi te ʼu selevisi ʼae ʼe tou fai nei. Neʼe mahino kia Robert neʼe mole tonu ke toe sio ki muli, kae ke tokaga tafito ki te ʼu meʼa ʼae ʼe ina lava fai ʼi te temi nei.
22 Neʼe toe hoko he aluʼaga feia ki te tehina ko Felice Episcopo. Ko ia mo tona ʼohoana neʼe nā kau ki te Ako ʼo Kalaate ʼi te taʼu 1956. Pea neʼe taupau fakasiliko ʼi Bolivie. ʼI te taʼu 1964, neʼe nā maʼu leva tana toe. Neʼe ui fenei e Felice: “Neʼe ma lotomamahi ʼaupito ʼi te tuku ʼo tamā selevisi. ʼE moʼoni neʼe au lotovaivai lolotoga te taʼu katoa, kae ʼaki te tokoni ʼa Sehova neʼe au fetogi ai taku faʼahiga manatu, pea mo tokaga tafito ki toku ʼuhiga tamai.” ʼE ke hage koa ko Robert mo Felice? ʼE ke lotovaivai koa ʼi tau mole kei maʼu te ʼu gaue ʼae neʼe ke fai ʼi muʼa atu? Kapau koia, ʼe lelei age ke ke fetogi tau faʼahiga manatu. Ke ke tokagaʼi te ʼu meʼa ʼae ʼe ke lava fai ʼi te temi nei maʼa Sehova, pea mo te ʼu tehina mo tuagaʼane. Ke ke maʼumaʼua tuʼumaʼu pea mo ke fakaʼaogaʼi ʼou fealagia moʼo tokoni ki ʼihi. ʼE ke fiafia anai he ʼe ke fakamalohiʼi te kokelekasio.
23. (1) Kotea ʼae ʼe tonu ke tou fakakaukauʼi lelei ki ai? (2) Kotea ʼae ka tou vakaʼi anai ʼi te alatike ʼae ka hoa mai?
23 ʼE tou maʼuhiga fuli kia Sehova. ʼE ina loto ke tou kau fuli ki tona famili. Koia, tou toʼo he temi ke tou fakakaukauʼi lelei ai te meʼa ʼae ʼe feala ke tou fai moʼo fakamalohiʼi ʼotatou tehina mo tuagaʼane. Pea hili ʼaia, tou fakahoko te aluʼaga ʼaia. Kapau ʼe ke fai te faʼahi ʼaia, pea ʼe mole ke manatu anai ʼe mole hou ʼaoga ʼi te kokelekasio. Kae ʼe feafeaʼi leva tatatou manatu ʼo ʼuhiga mo natou ʼo te kokelekasio? ʼE feafeaʼi hatatou fakaha ʼe tou ʼoʼofa pea mo fakaʼapaʼapa kia natou? ʼE tou vakaʼi anai ʼi te alatike ʼae ka hoa mai.
KATIKO 24 Tou Hake Ki Te Moʼuga ʼo Sehova
^ pal. 5 Ko ʼihi higoa neʼe fetogi.
^ pal. 21 ʼE tou loto fuli ke ʼofainaʼi tatou e Sehova. Kae ʼe feala ʼi ʼihi temi ke tou feʼekeʼaki pe ʼe ʼi ai hotatou ʼaoga. ʼE tokoni mai anai te alatike ʼaeni ke tou mahino ʼe tou maʼuhiga fuli ʼi te kokelekasio.
^ pal. 62 FAKAMATALA ʼO TE ʼU PĀKI: ʼI te ʼu pāki ʼaeni ʼe tolu ʼe fakaha ai he ʼu meʼa ʼe hoko ʼi muʼa ʼo te fono ʼo te kokelekasio, ʼi tona lolotoga fai, pea ʼi tona hili. Pāki 1: ʼE fakatalitali e he tagata ʼafea he tagata ʼe mole ko he Fakamoʼoni, ʼe tokaga he tehina tupulaga ki te ʼu mikolo, pea ʼe faipalalau he tuagaʼane mo he tuagaʼane kua vaivai matuʼa. Pāki 2: Ko he ʼu fanau mo he ʼu hahaʼi lalahi ʼe natou hiki ʼonatou nima ke natou faitali ʼi Te Tule Leʼo. Pāki 3: ʼE kau he taumatuʼa ki te fakamaʼa ʼo te Fale Fono. Ko he faʼe ʼe tokoni ki tana kiʼi taʼahine ke ina ʼai tona meʼa ʼofa ki te puha meʼa ʼofa. Ko he tehina tupulaga ʼe tokaga ki te ʼu tohi, pea ko he tahi tehina ʼe ina fakalotomalohiʼi he tuagaʼane kua vaivai matuʼa.