1. He koʼe ʼe ke leleiʼia te hahaʼi ʼae ʼe kataki fualoa?

 ʼE TOU leleiʼia fuli te hahaʼi ʼae ʼe kataki fualoa. ʼE tou fakaʼapaʼapa kia natou ʼae ʼe mole iita moka natou atalitali. ʼE tou fiafia moka ʼe kataki fualoa ni ʼihi kia tatou moka tou fai ni lakahala. Pea ʼe tou lotofakafetaʼi ki te kataki fualoa ʼa ia ʼae neʼe ina fai tatatou ako Tohi-tapu. ʼE moʼoni tokolahi ia tatou neʼe faigataʼa hatatou mahino, mo tali pea mo maʼuliʼi ʼihi moʼoni ʼi te Tohi-Tapu. ʼE tou toe lotofakafetaʼi tafito ki te kataki fualoa ʼa Sehova kia tatou!—Loma 2:4.

2. Ko te ʼu aluʼaga fea ʼae ʼe lagi faigataʼa ai kia tatou tatatou kataki fualoa?

² Koia ʼe tou leleiʼia ke kataki fualoa mai ʼihi kia tatou. Kae ʼe faigataʼa koa kia tatou tatatou kataki fualoa? Ohage la, ʼe tou kamata ita koa moka ʼe maʼua ke tou fakaʼatu ʼo atalitali fualoa, tafito la moka kua tou tauhala? ʼE faigataʼa koa te lolomi ʼo tatatou ita moka ʼe mole agalelei mai he tahi? Peʼe ʼi ʼihi temi, ʼe lagi tou loto ke fakatuʼu la e Sehova te malama foʼou ʼae ʼe ina fakapapauʼi mai. ʼE ke fia kataki fualoa koa? ʼI te alatike ʼaeni ʼe tou vakaʼi anai pe ʼe kotea te fakaʼuhiga ʼo te kataki fualoa, he koe ʼe maʼuhiga te kataki fualoa pea kotea ʼae ʼe feala ke tou fai ke tou kataki fualoa.

3. ʼE feafeaʼi he tahi ʼe kataki fualoa moka gaohi he meʼa ke ita ai?

³ Tou vakaʼi aluʼaga ʼe fa ʼe tonu ai ke tou maʼu te kataki fualoa.ʼUluaki, ko he tahi ʼe kataki fualoa ʼe tuai ʼi te ita. Tatau  aipe pe ʼe gaohi he meʼa ke ita ai peʼe hoha fau, ʼe mole ita ia. ʼI te Tohi-Tapu, ʼe ʼuluaki ha te kupu “tuai ʼi te ita” moʼo talanoa ʼo ʼuhiga mo Sehova. Ia Ekesote 34:6 ʼe ui ai ko Sehova ko te “ ʼAtua manavaʼofa, tuai ʼi te ita pea mo fonu ʼi te ʼofa agatonu mo te moʼoni.”

4. ʼE feafeaʼi he tahi ʼe kataki fualoa moka ʼe tonu ke atalitali?

⁴ Lua, ko he tahi ʼe kataki fualoa ʼe mole ita moka ʼe tonu ke atalitali. Kapau neʼe mole ʼosi he gaue ʼi te temi ʼae neʼe kua fakatuʼutuʼu ki ai, ko he tahi ʼe kataki fualoa ʼe faiga anai ke ʼaua naʼa ita. (Mat. 18:26, 27) ʼE lahi te ʼu aluʼaga ʼe tonu ke tou atalitali ai kae mole tou iita. Ohage la, ʼe tou kataki fualoa ʼo fakalogo moka palalau mai he tahi, kae mole tou tuʼusi tana palalau. (Sopo 36:2) ʼE toe tonu foki ke tou maʼu te kataki fualoa moka tou tokoni ki he tahi ʼe ina ako te Tohi-Tapu ke mahino ki he akonaki fakatohi-tapu peʼe ke ina liʼaki hana aga ʼe kovi.

5. Kotea te tahi aluʼaga ʼe ha ai te kataki fualoa ʼa he tahi?

⁵ Tolu, ko he tahi ʼe kataki fualoa ʼe mole gaohi meʼa fakavilivili anai. ʼE moʼoni ʼi ʼihi aluʼaga ʼe tonu ke tou gaohi meʼa fakavilivili. Kae ka fai e he tahi ʼe kataki fualoa he gaue ʼe maʼuhiga, ʼe mole faiga anai ke foimo fai pea mo fakaʼosi vave te gaue ʼaia kae mole lelei. ʼE ina toʼo hona temi ke ina fakatuʼutuʼu lelei ai tana gaue pea ke ina fakahoko fakalelei.

6. ʼE feafeaʼi he tahi ʼe kataki fualoa moka tau mo ni fihifihia?

⁶ Fa, ko he tahi ʼe kataki fualoa ʼe faiga anai ke ina ʼutakiʼi ʼona fihifihia kae mole meo. ʼE moʼoni ka tou tau mo he fihifihia ʼe mole kovi hatatou avahi totatou loto ki hotatou kaumeʼa. Kae ko he tahi ʼe kataki fualoa, ʼe ina tokagaʼi te ʼu meʼa lelei ʼo tona maʼuli pea mo faiga ke tauhi kia Sehova mo he loto fiafia. (Kol. 1:11) Ko tatou ʼae ʼe tou tauhi kia Sehova ʼe tonu anai ke  tou fakaha te ʼu agaaga fuli ʼaia ʼo te kataki fualoa. Tou vakaʼi tona ʼu tupuʼaga?

7. ʼO mulimuli kia Sakopo 5:7, 8, he koʼe ʼe maʼuhiga te kataki fualoa? (Vakaʼi mo te pāki.)

⁷ ʼE maʼuhiga ke tou kataki fualoa moka ʼe tou loto ke haofaki tatou. Ohage pe ko te ʼu kaugana agatonu ʼa Sehova ʼo te temi muʼa, ʼe tonu ke tou atalitali mo he kataki fualoa ke ina fakahoko ʼana fakapapau. (Hep. 6:11, 12) ʼE fakatatau ʼi te Tohi-Tapu totatou aluʼaga ki he tagata gaue kele. (Lau ia Sakopo 5:7, 8.) Ko he tagata gaue kele ʼe gaue kinakina, heʼe tonu ke ina to pea mo fakavai te pulapula. ʼE mole ina iloʼi pe ʼe ko te temi fea ʼae ka homo ai. Koia ʼe atalitali ai mo he kataki fualoa pea mo falala ʼe ʼi ai anai he ʼaho ʼe ina utu ai. ʼO toe feia pe, ʼe tou maʼumaʼua ʼo fakahoko ʼatatou gaue fakalaumalie, tatau aipe pe ‘ ʼe mole tou iloʼi pe ko te ʼaho fea ʼae ʼe haʼu ai totatou ʼAliki.’ (Mat. 24:42) ʼE tou atalitali mo he kataki fualoa mo falala ʼe fakahoko anai e Sehova ʼana fakapapau ʼi tona temi totonu. Kapau ʼe mole tou kataki fualoa, ʼe tou pipiko anai ʼi te atalitali pea ʼe tou fakamamaʼo mamalie anai mai ia Sehova. ʼE tou fia kumi anai he ʼu aluʼaga ʼe tou maʼu vave ai te fiafia. Kae kapau ʼe tou kataki fualoa, ʼe tou ʼutakiʼi anai ia meʼa fuli ʼo kaku ki te fakaʼosi pea ʼe haofaki anai tatou.—Mik. 7:7; Mat. 24:13.

8. ʼE fua lelei feafeaʼi tatatou felogoi mo ʼihi moka tou kataki fualoa? (Kolose 3:12, 13)

⁸ Ka tou kataki fualoa, ʼe tou felogoi lelei anai mo ʼihi. ʼE tou fakalogo lelei anai moka palalau mai ʼihi. (Sakp. 1:19) ʼE tou tokalelei anai mo natou. Pea ka tou hoha, ʼe mole tou fai anai ni palalau fakatupu lotomamahi. Ka tou mamahi ki he tahi ʼuhi ko he palalau peʼe ko he aga neʼe ina fai, ʼe mole tou ita anai. ʼE mole tou liufaki anai te kovi ʼaki te kovi, kae ʼe tou “haga fekatakiʼaki, pea mo fefakamolemoleʼaki ʼaki he lotolelei.”—Lau ia Kolose 3:12, 13.

9. He koʼe ʼe tonu ke tou kataki fualoa moka maʼua ke tou toʼo he tonu? (Taʼaga Lea 21:5)

⁹ Kapau ʼe tou kataki fualoa, ʼe tou toe fai anai ni tonu ʼe lelei. ʼE tou toʼo anai he temi ke tou fai ni fekumi pea mo vakaʼi te ʼu fealagia ʼae ʼe tuku mai pea ʼe mole tou ʼoho noa. (Lau ia Taʼaga Lea 21:5.) Ohage la, ka tou kumi gaue ʼe lagi tou fia tali atu aipe te ʼuluaki gaue ʼae ʼe tuku mai, tatau aipe pe ʼe tou to fono peʼe fakasiʼisiʼi ai tatatou gaue faifakamafola. Kae kapau ʼe tou kataki fualoa, ʼe tou toʼo anai he temi ke tou vakaʼi ʼihi faʼahi, ohage la ko te tuʼuʼaga ʼo te fale gaue, te ʼu hola gaue pea mo tona ʼu fua ki totatou maʼuli fakafamili mo ʼatatou felogoi mo Sehova. Kapau ʼe tou kataki fualoa ʼe mole tou fai anai he ʼu tonu ʼe kovi.

10. Kotea ʼae ʼe tonu ke fai e he tahi ke ina maʼu pea mo ina haga fakaha te kataki fualoa?

¹⁰ Kole kia Sehova te kataki fualoa. ʼE kau te kataki fualoa ki te fua ʼo te laumalie maʼoniʼoni. (Kal. 5:22, 23) Koia ʼe tonu ai ke tou kole kia Sehova ke ina foaki mai tona laumalie maʼoniʼoni pea ke tokoni mai ke tou maʼu te fua ʼo te laumalie maʼoniʼoni. Ka tou to mo he aluʼaga ʼe faigataʼa ai tatatou kataki fualoa, tou “haga kole” te laumalie maʼoniʼoni ke tou maʼu te kalitate ʼaia. (Luka 11:9, 13) ʼE toe feala pe ke tou kole kia Sehova ke tokoni mai ke tou manatu ohage ko ia. Hili tatatou faikole, ʼe tou faiga anai ke tou kataki fualoa ʼi te ʼaho fuli. Ka lahi tatatou kole ke tou maʼu te kataki fualoa pea mo tou fakaha te kalitate ʼaia, ʼe  tauaka anai ʼi totatou loto pea ʼe iloga anai ʼi totatou maʼuli.

11-12. He koʼe ʼe feala ke tou ui ko Sehova ʼe kataki fualoa?

¹¹ Metitasio ki ni hahaʼi ʼi te Tohi-Tapu neʼe kataki fualoa. ʼE palalau ʼi te Tohi-Tapu ki ni hahaʼi tokolahi neʼe kataki fualoa. Kapau ʼe tou metitasio ki tanatou faʼifaʼitaki, ʼe tou iloʼi ai pe ʼe feafeaʼi hatatou kataki fualoa. Kae tou vakaʼi muʼa te faʼifaʼitaki lelei tukupau ʼe tuku mai e Sehova ʼo ʼuhiga mo te kataki fualoa.

¹² ʼI te ʼoloto ʼo Eteni, neʼe ʼulihi e Satana te huafa ʼo Sehova. ʼI tana palalau kia Eva, neʼe ina lau ko Sehova ʼe ko he pule ʼe heʼe faitotonu pea ʼe mole ʼofa. Neʼe mole pulihi atu aipe e Sehova ia Satana, kae neʼe kataki fualoa pea mo lotololomi, koteʼuhi neʼe ina iloʼi ʼe maʼua anai he temi loaloaga moʼo fakamoʼoni ʼe ko tana pule ʼae ʼe lelei tokotahi. Talu mai te temi ʼaia mo tana katakiʼi te ʼu loi ʼae ʼe lau kia te ia. Tahi ʼae, ʼe kataki fualoa ia Sehova ke foaki ai ki he kaugamalie te faigamalie ʼae ke natou maʼu te maʼuli heʼe gata. (2 Pet. 3:9, 15) ʼE feala ai ki te toko lauʼi miliona hahaʼi ke natou ako ke natou iloʼi ia ia. Kapau ʼe tou manatuʼi te ʼu lelei ʼae ʼe tou maʼu mai te kataki fualoa ʼo Sehova, ʼe lagi faigafua age anai kia tatou hatatou atalitali ki te ʼaho ʼae kua ina fakatuʼutuʼu ke ina pulihi ai te malama ʼaeni.

13. Kotea ʼae ʼe ha mai ʼe faʼifaʼitakiʼi lelei e Sesu te kataki fualoa ʼo tana Tamai? (Vakaʼi mo te pāki.)

¹³ ʼE faʼifaʼitakiʼi lelei e Sesu te kataki fualoa ʼo tana Tamai, tafito ʼi tana maʼuli ʼi te kele. Neʼe mole faigafua tuʼumaʼu kia ia. Ohage la, neʼe lagi faigataʼa hana kataki fualoa ki te kau sekelipa mo te kau Faliseo malualoi. (Soa. 8:25-27) Kae ohage ko tana Tamai, neʼe tuai Sesu ʼi te ita. Neʼe mole ina liufaki te kovi moka neʼe leakoviʼi peʼe  moka neʼe faiga ʼihi ke natou fihi mo ia. (1 Pet. 2:23) Neʼe faʼa kataki pe pea neʼe mole meo. Koia la ʼae ʼe tokoni mai ʼi te Tohi-Tapu ke tou “tokagaʼi lelei ia ia ʼae neʼe ina katakiʼi te ʼu palalau fakafeagai mai te kau agahala.” (Hep. 12:2, 3) ʼAki te tokoni ʼa Sehova ʼe toe feala pe anai mo tatou ke tou ʼutakiʼi he fihifihia ʼe tou tau mo ia.

14. Kotea ʼae ʼe feala ke tou ako mai te kataki fualoa ʼa Apalahamo? (Hepeleo 6:15) (Vakaʼi mo te pāki.)

¹⁴ Kua fualoa koa tau atalitali ki te ʼaho ʼo Sehova? Kapau koia ʼe lagi ke tuʼania naʼa ke mate kae heʼeki hoko mai te ʼaho ʼaia. Kotea ʼae ka tokoni atu ke ke haga kataki fualoa ʼo atalitali? Tou vakaʼi te faʼifaʼitaki ʼa Apalahamo. ʼI tona taʼu 75, neʼe mole hana fanau kae neʼe fakapapauʼi fenei age e Sehova: “ ʼE au fakaliliu anai koe ko he puleʼaga lahi.” (Sen. 12:1-4) Neʼe sio koa ia Apalahamo ki te fakahoko ʼo te fakapapau ʼaia? Neʼe sio pe ki te fakahoko ʼo hona kiʼi koga. Hili taʼu ʼe 25 ʼi tana ʼosi fakalaka ʼi te vai tafe ʼo te Efalate, neʼe tupu fakamilakulo tona foha ko Isaake. Pea hili ki ai taʼu ʼe 60, neʼe tupu ʼona mokopuna ko Isaake mo Sakopo. (Lau ia Hepeleo 6:15.) Kae neʼe mole sio ia Apalahamo ki te liliu ʼo tona hakoga ko he puleʼaga lahi pea mo natou maʼu te kele ʼo te fakapapau. Logo la te faʼahi ʼaia, kae ko te tagata agatonu ʼaia neʼe kaumeʼa mo tona Tupuʼaga ʼi tona maʼuli katoa. (Sakp. 2:23) Pea fakakaukauʼi age muʼa, moka ina iloʼi anai ʼi tona fakatuʼuake, neʼe tapuakinaʼi te ʼu puleʼaga fuli ʼuhi ko tana tui pea mo tana kataki fualoa. (Sen. 22:18) Kotea te ako maʼa tatou? ʼE mole lagi tou mamata anai ki fakahoko ʼo te ʼu fakapapau fuli ʼa Sehova. Kae kapau ohage ko Apalahamo ʼe tou kataki fualoa, ʼe feala ke tou tui papau  ʼe fakapale tatou e Sehova ʼi te temi nei pea mo lahi age ʼi te malama foʼou ʼae ʼe ina fakapapauʼi mai.—Mko. 10:29, 30.

15. Kotea ʼae ʼe feala ke tou vakaʼi ʼi tatatou ako takitokotahi?

¹⁵ ʼE palalau ʼi te Tohi-Tapu ki te tahi ʼu hahaʼi neʼe kataki fualoa. (Sakp. 5:10) He koe ʼe mole ke vakavakaʼi tanatou faʼifaʼitaki ʼi tau ako tokotahi? b Ohage la ʼe feala ke ke vakaʼi te faʼifaʼitaki ʼa Tavite ʼae neʼe filifili ʼi tana kei veliveli ke liliu ko te hau ʼo Iselaele, kae neʼe tonu ke atalitali ʼi ni taʼu ʼi muʼa ʼo tana maʼu te tuʼulaga hau. Peʼe ko te faʼifaʼitaki ʼa Simeone mo Ana ʼae neʼe nā tauhi agatonu kia Sehova ʼo fakatalitali ki te Mesia. (Luka 2:25, 36-38) Lolotoga tau ako tokotahi, faiga ʼo tali ki te ʼu fehuʼi ʼaeni: Kotea ʼae neʼe lagi tokoni kia ia ʼaia ke kataki fualoa? Kotea te ʼu fua lelei neʼe ina maʼu? ʼE feafeaʼi haku faʼifaʼitakiʼi ia ia? ʼE toe feala foki ke ke ako mai te faʼifaʼitaki ʼo ʼihi ʼi te Tohi-Tapu neʼe mole kataki fualoa. (1 Sam. 13:8-14) ʼE feala ke ke fai te ʼu fehuʼi ʼaeni: “He koe neʼe mole natou kataki fualoa? Pea neʼe fua kovi feafeaʼi kia natou?”

16. Kotea te ʼu fua lelei moka ʼe tou kataki fualoa?

¹⁶ Manatuʼi te ʼu fua lelei moka ʼe ke kataki fualoa. Ka tou kataki fualoa, ʼe lahi age tatatou fiafia pea ʼe mole tou iita. ʼI te agamahani, ʼe toe fua lelei ki totatou maʼuli fakasino ʼo feia mo tatatou fakakaukau. ʼE lelei age ʼatatou felogoi mo te hahaʼi. ʼE tou taupau te logo tahi ʼi te kokelekasio. Kapau ʼe mole tou iita vave moka fai e he tahi he meʼa ʼe mole tou leleiʼia, ʼe mole hoko ai anai he tokakovi. (Pes. 37:8, kiʼi nota; Taag. 14:29) Pea ko te faʼahi ʼae ʼe maʼuhiga age, ka tou kataki fualoa, ʼe tou faʼifaʼitakiʼi tatatou Tamai ʼae ʼi selo pea ʼe tou fakaovi kia te ia.

17. Kotea ʼae ʼe tou fakatotonu ke tou fai?

¹⁷ ʼEi, ʼe fua lelei kia tatou fuli moka ʼe tou kataki fualoa. ʼE mole faigafua tuʼumaʼu tatatou fakaha te kalitate ʼaia. Kae ʼaki te tokoni ʼa Sehova, ʼe feala anai ke tou haga fakaha te kataki fualoa. Pea ʼi tatatou atalitali ʼae ki te malama foʼou, ʼe feala ke tou tui papau ʼe “sio ia Sehova kia natou ʼae ʼe manavasiʼi kia te ia, ia natou ʼae ʼe falala [peʼe atalitali] ki tona ʼofa agatonu.” (Pes. 33:18) Koia, tou fakatotonu ke tou fakaha tuʼumaʼu te kataki fualoa.