ʼI te alatike ʼaia, neʼe tou ako ai ʼe ko te fehuʼi maʼuhiga pe ʼe tahi ʼae ʼe kau ki ai te ʼu hahaʼi pea mo te ʼu ʼaselo fuli: Ko te fakatapuha ʼo te huafa lahi ʼo Sehova. ʼE pipiki ki te fehuʼi maʼuhiga ʼaia te faʼahiga pule ʼa Sehova, pe ʼe lelei koa peʼe kailoa. ʼE toe pipiki ki ai te faʼahi ʼae pe ʼe nofo agatonu anai koa he tahi kia Sehova peʼe kailoa.

He koe ʼe maʼuhiga kia tatou ʼi te temi nei te fehuʼi ʼo ʼuhiga mo te huafa ʼo Sehova pea mo tona fakatapuha? Tou vakaʼi tupuʼaga ʼe tolu.

ʼUluaki, neʼe ʼulihi e Satana te huafa ʼo Sehova, peʼe ko tona matagafua ʼi te ʼoloto ʼo Eteni. ʼI tana fai te fehuʼi kaka kia Eva, neʼe lau ai e Satana neʼe mole lotofoaki ia Sehova pea ko ʼana fakatotonu kia Atama mo Eva neʼe mole fakapotopoto. Pea neʼe ui fakahagatonu e Satana kia Eva ʼe mole moʼoni te ʼu meʼa ʼae neʼe ui e te ʼAtua, neʼe ina lau ai ko te ʼAtua ʼe gutuloi. Koia neʼe fasituʼu ai ki te huafa ʼo Sehova. Neʼe liliu ai ko “te Tevolo,” ko tona fakaʼuhiga ko he tahi ʼe “faifasituʼu.” (Soa. 8:44) Neʼe tui ia Eva ki te ʼu loi ʼa Satana, pea neʼe talagataʼa ai ki te ʼAtua, ʼo ina fakaha ai ʼe mole fia fai ki te pule ʼa te ʼAtua. (Sen. 3:1-6) ʼO kaku mai kia ʼaho nei, kei hoko atu pe e Satana tana faifasituʼu ʼo ʼuhiga mo te huafa ʼo Sehova ʼo ina fakamafola ai ni loi ʼo ʼuhiga mo te ʼAtua. Ko natou ʼae ʼe natou tui ki te ʼu loi ʼaia ʼe natou liliu ʼo talagataʼa ki te ʼAtua. Maʼa te hahaʼi ʼa te ʼAtua, ko te ʼu fasituʼu ʼae neʼe fai ʼo ʼuhiga mo te huafa maʼoniʼoni ʼo te ʼAtua, ʼe ko he toe agakovi ia he ʼe tupu mai ai te ʼu mamahi mo te agakovi ʼae ʼe hoko ʼi te malamanei.

Lua, ke fua lelei ki tana fakatupu fuli, neʼe fakatotonu ai e Sehova ke ina fakamaʼa tona huafa mai te ʼu loi fuli ʼae neʼe fai ki ai. ʼE maʼuhiga ʼaupito te faʼahi ʼaia kia Sehova. Neʼe ina ui fenei: “ ʼE au fakamaʼoniʼoniʼi anai toku huafa lahi.” (Esk. 36:23) Pea neʼe fakaha lelei e Sesu ko te faʼahi ʼaia ʼe tonu ke fakamuʼamuʼa e te ʼu kaugana agatonu fuli ʼa Sehova moka natou faikole. Neʼe ui e Sesu: “Ke fakamaʼoniʼoni tou huafa.” (Mat. 6:9, kiʼi nota) ʼE fakaha liuliuga ʼi te Tohi-Tapu te maʼuhiga ʼae ke fakakololiaʼi te huafa ʼo Sehova. Ohage la ko te ʼu vaega ʼaeni: “Kotou foaki te kololia kia Sehova ʼuhi ko tona huafa.” (1 Klk. 16:29; Pes. 96:8) “Kotou vikiʼi ʼaki ni hiva tona huafa ʼae ʼe fonu ʼi te kololia.” (Pes. 66:2) “ ʼE au fia fakakololiaʼi tou huafa ʼo talu ai.” (Pes. 86:12) Pea ko te tahi lakaga ʼae neʼe palalau ai ia Sehova mai te lagi, neʼe hoko ʼi te fale lotu ʼo Selusalemi. Neʼe ui ai e Sesu: “Tamai, fakakololiaʼi tou huafa.” Pea neʼe tali fenei age e Sehova: “Neʼe au fakakololiaʼi pea ʼe au toe fakakololiaʼi.”—Soa. 12:28. a

Tolu, ko te fakatuʼutuʼu ʼa Sehova ʼe pipiki tuʼumaʼu ki tona huafa, peʼe ki tona matagafua. Fakakaukauʼi age muʼa te maʼuhiga ʼo te huafa ʼo Sehova ʼi te ʼosi ʼAfio Hau ʼa Kilisito ia Taʼu ʼe Afe pea hili te ʼahiʼahi fakaʼosi. ʼE hoko atu pe anai koa te femaveteveteʼaki ʼa te kau ʼaselo mo te hahaʼi ʼuhi ko te fakatapuha ʼo te huafa ʼo Sehova? Moʼo tali ki te fehuʼi  ʼaia, manatuʼi te ʼu faʼahi ʼe lua ʼe pipiki ki te fakatapuha ʼo te huafa ʼo Sehova, ʼae ko te pule faʼitaliha ʼo Sehova pea mo te nofo agatonu ʼa te hahaʼi. ʼI te temi ʼaia, ʼe mole kei ʼaoga anai ke fakamoʼoni e te hahaʼi tanatou fia nonofo agatonu ki te ʼAtua, he ʼe kua natou haohaoa pea kua ʼahiʼahiʼi katoa natou. ʼE natou maʼuʼuli anai ʼo heʼe gata. ʼE hoko atu anai koa te fakafihiʼi e te kau ʼaselo pea mo te hahaʼi te pule faʼitaliha ʼo Sehova? ʼOho. ʼO toe feia pe, ʼi te temi ʼaia, ʼe mole toe ʼaoga anai ke fakamoʼoni e Sehova ʼe ko tana pule ʼae ʼe lelei age. Ko natou fuli ʼae ʼi te lagi mo te kele ʼe natou logo tahi anai, pea mo natou loto ke pule Sehova kia natou. Kae ʼe feafeaʼi anai ʼo ʼuhiga mo te huafa ʼo Sehova?

ʼI te temi ʼaia, ʼe iloʼi anai e te hahaʼi fuli te moʼoni ʼo ʼuhiga mo Sehova, pea ʼe fakamaʼoniʼoniʼi katoa anai tona huafa. Kae ʼe maʼuhiga pe anai te huafa ʼo te ʼAtua ki ʼana kaugana ʼae ʼi te lagi mo te kele. Kotea tona tupuʼaga? Heʼe hoko atu pe anai tanatou sisio ki te fakahoko e Sehova he ʼu gaue fakaofoofo. Fakakaukauʼi age muʼa te ʼu aluʼaga ʼaeni: ʼUhi ʼae ʼe foaki anai e Sesu, ʼae ʼe agavaivai, te pule katoa kia Sehova, ʼe liliu anai te ʼAtua “ko meʼa fuli maʼa te hahaʼi fuli.” (1 Ko. 15:28) Hili ʼaia, ko te hahaʼi ʼi te kele ʼe natou maʼu anai “te ʼateaina fakakololia ʼo te ʼu fanau ʼa te ʼAtua.” (Loma 8:21) Pea ʼe fakahoko katoa anai e Sehova tana fakatuʼutuʼu ʼae ke fakatahiʼi ʼana fanau ʼae ʼi te lagi mo ʼae ʼi te kele, ke natou liliu ko he foʼi famili ʼe tahi.—Efe. 1:10.

ʼE malave feafeaʼi anai te ʼu fetogi ʼaia ki te famili ʼa Sehova ʼae ʼi te lagi mo te kele? ʼE mahino ia, ʼe tou fia hoko atu pe anai te vikiʼi ʼo te huafa ʼo Sehova. ʼAki te takitaki ʼa te ʼAtua, neʼe tohi fenei e Tavite: “Ke vikiʼi ia Sehova ʼAtua . . . Ke vikiʼi tona huafa ʼae ʼe fonu ʼi te kololia ʼo heʼe gata.” (Pes. 72:18, 19) ʼEi, ʼe tou maʼu anai he tahi ʼu tupuʼaga fakaofoofo ke tou vikiʼi ai te huafa ʼo Sehova ki te heʼe gata.

Ka tou logo ki te huafa ʼo Sehova, ʼe tou manatu atu aipe ki te ʼu meʼa fuli ʼo ʼuhiga mo ia. Pea ʼe tou manatuʼi tafito ia tona ʼofa. (1 Soa. 4:8) ʼE tou manatuʼi tuʼumaʼu anai neʼe fakatupu tatou e Sehova pea neʼe ina foaki tona ʼAlo ko he sakilifisio ʼuhi ko tona ʼofa. Pea ʼe tou toe manatuʼi tuʼumaʼu anai ko tana faʼahiga pule ʼe faitotonu mo fonu ʼi te ʼofa. ʼE hoko atu anai tatatou logoʼi ʼe ʼofa Sehova ia tatou ʼo heʼe gata. ʼE tou fia fakaovi ai anai ki tatatou Tamai pea mo hiva he ʼu fakavikiviki ki tona huafa ʼae ʼe fonu ʼi te kololia.—Pes. 73:28.