1. Kotea ʼe feala ke malave ki he tahi neʼe ina fai he agahala mamafa?

 ʼI TE alatike kua ʼosi, neʼe tou vakaʼi ai pe kotea ʼae neʼe fai e te apositolo ko Paulo ʼo ʼuhiga mo he tahi neʼe ina fai he agahala mamafa ʼi te kokelekasio ʼo Kolonito. Neʼe mole fakahemala te tagata ʼaia pea neʼe tonu ke toʼo mai te kokelekasio. Kae ohage ko tona fakaha ʼi te vaega tafito, ʼe feala ke malave ki ʼihi ia natou ʼae neʼe natou fai he agahala mamafa ia te ʼu faiga ʼae ʼe fai moʼo tokoni kia natou. ʼE feala ke taki ai natou ki te fakahemala. (Loma 2:4) ʼE tokoni feafeaʼi age te kau tagata ʼafeā ke natou fakahemala?

2-3. Kotea ʼe tonu ke tou fai mo kapau ʼe tou iloʼi neʼe fai e he tehina he agahala mamafa? Pea kotea tona tupuʼaga?

² Kapau ʼe mole iloʼi e te kau tagata ʼafeā neʼe fai e he tahi he agahala mamafa, ʼe mole feala hanatou tokoni ki ai. ʼE lagi neʼe fai e he tahi ʼo ʼotatou tehina he agahala mamafa ʼe feala ai ke toʼo ia ia ʼi te kokelekasio. Kapau ʼe tou iloʼi te faʼahi ʼaia, pea ʼe tonu anai ke tou fakalotomalohiʼi ia ia ke alu ki te kau tagata ʼafeā ʼo kole tokoni.​—Esa. 1:​18; Gaue 20:28; 1 Pet. 5:2.

³ Kae ʼe feafeaʼi mo kapau ʼe mole fia alu ʼo fakaha ki te kau tagata ʼafeā? Kapau koia, ʼe tou olo anai ʼo fakaha ki te kau tagata ʼafeā ke natou tokoni ki ai. Ka tou fai feia, ʼe tou fakaha ai totatou ʼofa ki ai. Koia, ʼe mole tou loto ke mavae totatou tehina peʼe tuagaʼane ʼaia. Kapau ʼe hoko atu pe tana agahala, ʼe feala ke ina maumauʼi ai tana ʼu felogoi mo Sehova. Pea ʼe toe feala pe ke ina ʼulihi te kokelekasio. Koia, logo la ʼe mole faigafua, kae ʼe tou olo ʼo fakaha ki te kau tagata ʼafeā he ʼe tou ʼoʼofa ia Sehova pea mo totatou tehina peʼe tuagaʼane ʼaia neʼe agahala.​—Pes. 27:14.

 KOTEA ʼE FAI E TE KAU TAGATA ʼAFEĀ MOʼO TOKONI KIA NATOU ʼAE NEʼE AGAHALA MAMAFA?

 4. Kotea te fakatuʼutuʼu ʼa te kau tagata ʼafeā moka natou felogoi mo he tahi neʼe agahala mamafa?

⁴ Ka fai e he tahi ʼi te kokelekasio he agahala mamafa, ʼe fakatuʼu e te kolesi ʼo te kau tagata ʼafeā he komite ko he ʼu tagata ʼafeā ʼe toko tolu ke natou felogoi mo te tehina peʼe tuagaʼane ʼaia. a ʼE tonu ki te ʼu tagata ʼafeā ʼaia ke natou agamalū mo agavaivai. ʼE natou faiga anai ke fakahemala ia ia ʼaia neʼe agahala, kae ʼe tonu ke natou mahino ʼe mole feala hanatou fakamalohiʼi he tahi ke fetogi. (Tet. 30:19) ʼE tonu ke mahino te kau tagata ʼafeā ko natou ʼae neʼe agahala ʼe mole natou fakahemala fuli anai ohage ko te Hau ko Tavite. (2 Sam. 12:13) ʼE mole tali anai e ʼihi te fakatonutonu ʼa Sehova. (Sen. 4:​6-8) Kae ko te fakatuʼutuʼu ʼa te kau tagata ʼafeā ke natou tokoni kia ia ʼae neʼe agahala ke fakahemala. Kotea te ʼu pelesepeto ʼe tokoni anai kia natou moka natou felogoi mo he tahi neʼe ina fai he agahala mamafa?

 5. ʼE tonu ke feafeaʼi te aga ʼa te kau tagata ʼafeā moka natou felogoi mo ia ʼae neʼe agahala? (2 Timoteo 2:​24-​26) (Vakaʼi mo te pāki.)

⁵ ʼE iloʼi e te kau tagata ʼafeā ko ia ʼae neʼe agahala ʼe ko he ovi neʼe puli kae ʼe kei maʼuhiga kia mata ʼo Sehova. (Luka 15:​4, 6) Koia, ka natou felogoi mo ia, ʼe mole natou palalau fefeka anai ki ai. ʼE mole tonu ke manatu te kau tagata ʼafeā ko te meʼa pe ʼe tonu ke natou fai ʼe ko te faifehuʼi pea ke natou maʼu he ʼu logo. Kae ʼe natou fakaha te ʼu kalitate ʼae ʼe talanoa ki ai ia 2 Timoteo 2:​24-​26. (Lau.) ʼE faiga tuʼumaʼu te kau tagata ʼafeā ke natou agamalū mo agalelei koteʼuhi ʼe natou fia tokoni ki ai ke fetogi tana faʼahiga manatu.

 6. ʼE toʼo feafeaʼi e te kau tagata ʼafeā he temi ke natou maʼu te faʼahiga manatu ʼa Sehova? (Loma 2:4)

⁶ ʼE toʼo e te kau tagata ʼafeā he temi ke natou maʼu te faʼahiga manatu ʼa Sehova. ʼE natou faiga ke natou faʼifaʼitakiʼi ia Sehova ʼi tanatou felogoi ʼaia mo ia ʼae neʼe agahala. Pea ʼe natou taupau tuʼumaʼu te ʼu palalau ʼaeni ʼa Paulo: “ ʼE faigaʼi e te ʼAtua, ʼi tona agaʼofa, ke ina taki koe ki te fakahemala.” (Lau ia Loma 2:4.) ʼE tonu ke manatuʼi e te kau tagata ʼafeā ko natou ko he ʼu tagata tauhi ovi, pea ʼe natou mulimuli ki te takitaki ʼa Kilisito. (Esa. 11:​3, 4; Mat. 18:​18-​20) ʼI muʼa ʼo tanatou felogoi mo ia ʼae neʼe agahala, ʼe natou faikole fakatahi pea mo manatuʼi tuʼumaʼu ko tanatou fakatuʼutuʼu, ʼe ko te taki mai ia ia ʼae neʼe agahala ke fakahemala. ʼE natou fai he ʼu fekumi ʼi te Tohi-Tapu mo ʼatatou tohi, pea ʼe natou kole kia Sehova ke natou maʼu te fakasiosio tonu. ʼE natou vakavakaʼi te meʼa ʼae ʼe  ʼaoga kia natou ke natou iloʼi tona maʼuli ʼi muʼa atu. Kotea tona tupuʼaga? Koteʼuhi ke natou mahino lelei pe koʼe ʼe feia tana faʼahiga manatu pea mo tana aga.​—Taag. 20:5.

7-8. Ka felogoi te kau tagata ʼafeā mo ia ʼae neʼe agahala, ʼe feafeaʼi hanatou faʼifaʼitakiʼi te kataki fualoa ʼa Sehova?

⁷ ʼE faʼifaʼitakiʼi e te kau tagata ʼafeā ia te kataki fualoa ʼa Sehova. ʼE natou manatuʼi te meʼa ʼae neʼe fai e Sehova ki te kau agahala ʼi te temi muʼa. Tou vakaʼi he ʼu faʼifaʼitaki. ʼAki he kataki fualoa, neʼe tokoni ia Sehova kia Kaino. Pea neʼe ina fakatokaga age ki ai te aluʼaga ka hoko moka ʼe mole fetogi tana aga. Neʼe ina ui age ʼe ina tapuakinaʼi anai ia ia moka ʼe fakalogo. (Sen. 4:​6, 7) Neʼe fakatonutonuʼi e Sehova ia Tavite ʼaki te polofeta ko Natane. Neʼe fakaʼaogaʼi e te polofeta ʼaia he faʼifaʼitaki ke malave ki tona loto ke fakahemala. (2 Sam. 12:​1-7) Pea neʼe ina fekauʼi “tuʼumaʼu” mo “liuliuga” ʼana polofeta ki te puleʼaga ʼo Iselaele, ʼae neʼe agatuʼu. (Sel. 7:​24, 25) Neʼe mole talitali ia ke fakahemala muʼa tana hahaʼi ke tokoni kia natou. Kae neʼe foimo tokoni mo fakalotomalohiʼi natou ke natou fakahemala.

⁸ Ka tokoni te kau tagata ʼafeā ki he tahi neʼe agahala mamafa, ʼe natou faʼifaʼitakiʼi ia Sehova. Ohage ko tona ui ia 2 Timoteo 4:​2, ʼe natou “kataki fualoa” moka natou tokoni ki he tehina ʼe tau mo he faigataʼaʼia. Koia, ʼe tonu ki he tagata ʼafeā ke mole itaita pea ke kataki fualoa moka tokoni kia ʼae neʼe agahala ke ina fia fai te meʼa ʼae ʼe lelei. Kapau leva ʼe ita te tagata ʼafeā, ʼe mole fia fakalogo anai pea mo fakahemala.

9-10. ʼE lava tokoni feafeaʼi te kau tagata ʼafeā kia ia ʼae neʼe agahala ke ina fakakaukauʼi te tupuʼaga ʼo tana agahala?

⁹ ʼE faiga ia te kau tagata ʼafeā ke natou vakavakaʼi te ʼu aluʼaga ʼae neʼe tupu ai tana agahala. Ohage la, ʼe mole kei malohi koa ʼana felogoi mo Sehova ʼuhi ʼae neʼe ina meʼa noaʼi tana ako tokotahi peʼe ko tana faifakamafola? ʼE mole kei faikole tuʼumaʼu koa kia Sehova? ʼE ina haga tauʼi koa ʼona holi ʼae ʼe kovi? Neʼe ina filifili koa hona ʼu fakakaugā kovi peʼe ko he ʼu fakafiafia ʼe mole lelei? Neʼe ʼi ai koa hona ʼu fua kovi ki tana faʼahiga manatu peʼe ko ʼona holi? Pea ʼe mahino koa ko ʼana tonu pea mo tana aga neʼe ina fakamamahiʼi ai tana Tamai ko Sehova?

¹⁰ ʼE fai anai e te kau tagata ʼafeā he ʼu fehuʼi fakapotopoto kia ia neʼe agahala kae mole natou faiga anai ke natou iloʼi ia meʼa fuli. ʼE natou fai te faʼahi ʼaia moʼo tokoni ki ai ke ina fakakaukauʼi te ʼu aluʼaga ʼae neʼe ina fakavaivaiʼi ai ʼana felogoi mo Sehova, pea mo te tupuʼaga ʼae ʼo tana agahala. Pea ʼe natou fai anai ʼaki he agalelei. (Taag. 20:5) Pea tahi, ʼe feala ke natou faʼifaʼitakiʼi te meʼa ʼae neʼe fai e Natane kia Tavite. ʼE feala ke natou fakaʼaogaʼi he ʼu faʼifaʼitaki moʼo tokoni ki ai ke fakakaukau pea mo mahino ki te kovi ʼae ʼo tana agahala. ʼE lagi ʼi tanatou ʼuluaki felogoi ʼaia, ʼe ina kamata logoʼi anai hana lotomamahi moʼoni ʼuhi ko te meʼa ʼae neʼe ina fai. Pe ʼe lagi ʼe fakahemala moʼoni anai.

11. ʼE faʼifaʼitakiʼi feafeaʼi e te kau tagata ʼafeā ia Sesu?

¹¹ ʼE faiga ia te kau tagata ʼafeā ke natou faʼifaʼitakiʼi ia Sesu. Neʼe fai e Sesu te fehuʼi ʼaeni kia Saulo ʼo Talesi ke tupu ai hana sivisivi ia ia totonu: “Saulo, Saulo, he koʼe ʼe ke fakatagaʼi au?” Neʼe tokoni ai ki ai ke ina fakakaukauʼi mo mahino ki te kovi ʼo te meʼa ʼae neʼe ina fai. (Gaue 9:​3-6) Pea neʼe ina ui fenei ʼo ʼuhiga mo “te fafine ʼae ko Sesapele”: “Neʼe au tuku age ki ai he temi ke fakahemala.”​—Fkha. 2:​20, 21.

12-13. ʼE fakaha feafeaʼi e te kau tagata ʼafeā ʼe natou tuku he temi kia ia ʼae neʼe agahala ke fakahemala? (Vakaʼi mo te pāki.)

¹² Ohage ko Sesu, ʼe mole foimo ui atu aipe e te kau tagata ʼafeā ʼe mole fakahemala anai ia ia ʼae neʼe agahala. ʼE fakahemala anai ʼihi ʼi tanatou ʼuluaki felogoi mo te kau tagata ʼafeā. Kae ʼe ʼaoga anai he temi lahi ia ki ʼihi. Koia ʼae ʼe mole tonu ai ke felogoi tuʼa tahi pe te kau tagata ʼafeā mo ia ʼae neʼe agahala. ʼE lagi ʼi te ʼosi ʼo  tanatou ʼuluaki felogoi, ʼe ina kamata fakakaukauʼi lelei leva te meʼa ʼae neʼe ui age. Pea lagi feala pe ke uga ai ia ia ke ina kole ʼaki he agavaivai te fakamolemole ʼa Sehova. (Pes. 32:5; 38:18) Pea ʼi tanatou tahi felogoi leva, kua fetogi leva tana faʼahiga manatu ʼe mole kei hage ko tanatou ʼuluaki felogoi.

¹³ Kapau ʼe fia taki mai e te kau tagata ʼafeā ia ia ʼae ʼe agahala ke fakahemala, ʼe natou lotomahino anai pea mo agalelei. ʼE natou fakaʼamu ʼe tapuakinaʼi anai e Sehova ʼanatou faiga, pea ʼe toe maʼu anai e ia ʼae neʼe agahala te ʼatamai malama totonu pea mo fakahemala. Pea ʼe natou faikole ʼo ʼuhiga mo te faʼahi ʼaia.​—2 Tim. 2:​25, 26.

14. Ka fakahemala he tahi, ko ai ʼae neʼe tokoni moʼoni ki ai? Pea kotea tona tupuʼaga?

¹⁴ Ka fakahemala he tahi neʼe agahala, ʼe ko he toe fiafia lahi. (Luka 15:​7, 10) Ko ai ʼae neʼe tokoni moʼoni ki ai ke fakahemala? Ko te kau tagata ʼafeā koa? Manatuʼi te meʼa ʼaeni neʼe tohi e Paulo ʼo ʼuhiga mo te kau agahala: “ ʼE lagi fakafealagia anai e te ʼAtua ke natou fakahemala.” “(2 Tim. 2:​25) Koia, ʼe ko Sehova kae mole ko te tagata ʼae ʼe tokoni ki he tehina ke fetogi tana manatu pea mo tana aga. ʼE fakamahino e Paulo te ʼu fua lelei ʼae ʼe hoko moka fakahemala he tahi. ʼE feala ke ina toe maʼu lahi age te ʼatamai malama totonu ʼo ʼuhiga mo te moʼoni, mo toe fakakaukau lelei pea mo hao mai te ʼu hele ʼa Satana.​—2 Tim. 2:​26.

15. ʼE hoko atu feafeaʼi e te kau tagata ʼafeā tanatou tokoni kia ia ʼae neʼe agahala kae kua fakahemala?

¹⁵ Ka fakahemala ia ia ʼae neʼe agahala, ʼe hoko atu pe anai tona ʼaʼahi e te komite ʼo te kau tagata ʼafeā. ʼE natou tokoni ai ki ai ke ina fakamalohiʼi tana tui, mo tauʼi te ʼu fakaneke ʼa Satana pea ke ina fai te meʼa ʼae ʼe lelei. (Hep. 12:​12, 13) ʼE mahino ia, ʼe mole fakaha anai e te kau tagata ʼafeā ki he tahi te agahala ʼae neʼe fai. Kae kotea ʼae ʼe tonu ke iloʼi e te kokelekasio?

“FAKATONUTONUʼI IA MUʼA ʼO TE KOKELEKASIO”

16. Ka tou lau ia 1 Timoteo 5:​20, kotea te fakaʼuhiga ʼo te ui ʼae e Paulo ke fakatonutonuʼi he tahi ia muʼa ʼo “te kokelekasio”?

¹⁶ Lau ia 1 Timoteo 5:​20. Neʼe ui e Paulo kia Timoteo, ʼae neʼe ko te tagata ʼafeā, ke ina  fakatonutonuʼi te kau agahala ia muʼa ʼo “te kokelekasio.” Kotea tona fakaʼuhiga? Ko tona fakaʼuhiga koa neʼe tonu ke ina fakatonutonuʼi ia muʼa ʼo te kokelekasio katoa? ʼE mole gata pe ʼi ai. Neʼe toe manatu ia Paulo kia natou ʼae neʼe natou iloʼi te agahala ʼae neʼe fai. ʼE lagi ko natou ʼae neʼe sio mata ki ai peʼe ko natou ʼae neʼe alu ia ia ʼae neʼe agahala ʼo fakaha ki ai. ʼE tonu leva ke olo te kau tagata ʼafeā kia natou pe ʼaia, ʼo fakaha age kua natou vakaʼi te aluʼaga, pea kua natou fakatonutonuʼi ia ia ʼae neʼe agahala.

17. Kapau kua iloʼi e te tokolahi te agahala mamafa ʼae neʼe fai peʼe iloʼi anai ki ʼamuli, kotea ʼae ka tala ifo ʼi te kokelekasio? Pea kotea tona tupuʼaga?

¹⁷ ʼI ʼihi temi, tokolahi natou ʼi te kokelekasio kua natou iloʼi te agahala mamafa ʼae neʼe fai e he tahi, peʼe feala pe ke natou iloʼi ki ʼamuli. Koia ʼi te aluʼaga ʼaia, ko te ui ʼae ke “fakatonutonuʼi ia muʼa ʼo te kokelekasio” ko tona fakaʼuhiga ʼe tonu ke fai ia muʼa ʼo te kokelekasio katoa. ʼE tala ifo anai e he tagata ʼafeā ʼi te kokelekasio, neʼe fakatonutonuʼi te tehina peʼe ko te tuagaʼane. Kotea tona tupuʼaga? ʼE tali fenei e Paulo: “Ke liliu ai ko he fakatokaga kia natou ʼae,” ko tona fakaʼuhiga, ke natou taʼofi ai he ako pea ke ʼaua naʼa natou agahala mo natou.

18. Ka fai e he tupulaga ʼe heʼeki taʼu 18 he agahala mamafa kae kua papitema, kotea ʼe tonu ke fai e te kau tagata ʼafeā? (Vakaʼi mo te pāki.)

¹⁸ Kapau ko he tupulaga ʼe heʼeki taʼu 18, neʼe ina fai he agahala mamafa kae kua papitema, kotea ʼe feala ke fai e te kau tagata ʼafeā? ʼE hinoʼi anai e te kolesi ʼo te kau tagata ʼafeā he foʼi toko lua ia natou ke felogoi mo ʼana matuʼā, b mo kapau ko he ʼu Fakamoʼoni ʼa Sehova. ʼE fakalavelave age anai e te ʼu tagata ʼafeā ʼaia ʼe lua ki te ʼu matuʼā pe kotea tanā fakatuʼutuʼu neʼe nā  fai moʼo tokoni ki tanā fanau ke fakahemala. Kapau ʼe fakalogo mo fakahemala te tupulaga ʼaia, ʼe feala ki te ʼu tagata ʼafeā ʼaia ʼe lua ke nā tuku pe ki te ʼu matuʼā ke hoko atu tanā tokoni ki tanā fanau. Koia, neʼe tuku e te ʼAtua ki te u matuʼā te maʼua ʼae ke nā fakatonutonuʼi tanā fanau ʼaki te ʼofa. (Tet. 6:​6, 7; Taag. 6:​20; 22:6; Efe. 6:​2-4) ʼI ʼihi temi, ʼe faipalalau anai te kau tagata ʼafeā mo te ʼu matuʼā ke natou iloʼi pe ʼe foaki tuʼumaʼu ki tanā fanau te tokoni ʼae ʼe ʼaoga ki ai. Kae ʼe feafeaʼi mo kapau ʼe mole fakahemala pea mo ina fia fetogi ia tana aga? ʼI te aluʼaga leva ʼaia, ʼe felogoi anai te komite ʼo te kau tagata ʼafeā mo te tupulaga pea mo ʼana matuʼā, mo kapau ko he ʼu Fakamoʼoni ʼa Sehova.

“KO SEHOVA ʼE FONU ʼI TE ʼOFA MAMAHI PEA MO MANAVAʼOFA”

19. ʼE faʼifaʼitakiʼi feafeaʼi e te kau tagata ʼafeā ia Sehova moka natou felogoi mo ia ʼae neʼe agahala mamafa?

¹⁹ ʼE iloʼi e te ʼu tehina ʼae ʼe kau ʼi te komite ʼo te kau tagata ʼafeā, neʼe foaki age e Sehova te maʼua ʼae ke natou taupau ke maʼa te kokelekasio. (1 Ko. 5:7) Kae ʼe natou toe loto foki ke taki mai ia ia ʼaia neʼe agahala ki te fakahemala, mo kapau ʼe feala. Koia, ʼe hoko atu pe anai tanatou fakaʼamu ʼae ʼe fetogi anai. Kotea tona tupuʼaga? He ʼe natou fia faʼifaʼitakiʼi ia Sehova, ʼae “ ʼe fonu ʼi te ʼofa mamahi pea mo manavaʼofa.” (Sakp. 5:11) Ko te kalitate ʼaia neʼe fakaha e te apositolo ko Soane. Neʼe ina tohi fenei: “Siʼaku ʼu fanau, ʼe au tohi atu te ʼu meʼa ʼaia ke ʼaua naʼa kotou agahala. Kae kapau ʼe agahala he tahi, ʼe ʼi ai totatou tokoni ia muʼa ʼo te Tamai, ʼe ko Sesu Kilisito, te tagata faitotonu.”​—1 Soa. 2:1.

20. Kotea ʼae ka tou vakaʼi ʼi te alatike fakaʼosi?

²⁰ ʼE fakaʼofaʼofa foki he ʼe feala ki he tehina peʼe ko he tuagaʼane neʼe ina fai he agahala mamafa ke mole fakahemala. Koia, ʼe tonu leva ke toʼo ʼi te kokelekasio. Kotea leva ʼe tonu ke fai e te kau tagata ʼafeā moka hoko te aluʼaga ʼaia? ʼE tou maʼu anai te tali ki te fehuʼi ʼaia ʼi te alatike fakaʼosi.