ʼI TE feliafa ʼaho 18 ʼo Sanualio 2023, neʼe fakaha ai he logo makehe ʼi te jw.org ko te ʼu tehina ko Gage Fleegle mo Jeffrey Winder neʼe fakanofo ke nā kau ki te Kolesi Pule ʼo te kau Fakamoʼoni ʼa Sehova. Ko te ʼu tehina ʼaia kua fualoa tana tauhi agatonu kia Sehova.

Neʼe pusiaki te tehina ko Fleegle ʼi te moʼoni e ʼana matuʼa ʼi te potu Uesite ʼo Pennsylvanie ʼi Amelika. ʼI tana kei veliveli neʼe hiki leva tona famili ki he kiʼi kolo ʼi te vao ʼae neʼe ʼaoga lahi ki ai he ʼu tokoni. Mole faʼa fualoa kia ai neʼe papitema leva ia Fleegle ʼi te ʼaho 20 ʼo Novepeli 1988.

Neʼe fakalotomalohiʼi tuʼumaʼu te tehina ko Fleegle e ʼana matuʼa ke ina toʼo te selevisi pionie katoa. Neʼe natou fakaafe tuʼumaʼu ki tonatou ʼapi he ʼu tehina taupau fakasiliko pea mo he ʼu Petelite, pea neʼe feala ai ke sio te tehina ko Fleegle ki te fiafia ʼo te ʼu tehina mo tuagaʼane ʼaia. Mole faʼa fualoa ki tona ʼosi papitema neʼe pionie katoa ʼi te ʼaho 1 ʼo Sepetepeli 1989. Pea hili taʼu e lua neʼe ina fakahoko leva tana fakatuʼutuʼu ʼae neʼe ina fai talu mai tona taʼu 12: ke gaue ʼi te Petele. Koia neʼe kamata gaue leva ʼi te Petele ʼo Brooklyn ʼi Oketopeli 1991.

ʼI te Petele neʼe gaue taʼu valu ia te tehina ko Fleegle ʼi te fale fakapipiki tohi, hili ʼaia neʼe ʼave leva ke gaue ʼi te Selevisi Gaue. ʼI te temi ʼaia neʼe kau ki he kokelekasio ʼi te lea fakalusia lolotoga ni taʼu. ʼI te 2006 neʼe ʼohoana mo Nadia pea neʼe nā nonofo leva ʼi te Petele. Neʼe nā lagolago ki he kokelekasio ʼe lea Portugais pea lolotoga taʼu ʼe hogofulu tupu ki he kokelekasio lea fakaesipaniolo. Hili ni taʼu ki tana gaue ʼi te Selvisi Gaue, neʼe ʼave te tehina ko Fleegle ke gaue ʼi te pilo ʼo te Komite ʼo Te ʼu Akonaki pea ki muli age neʼe gaue leva ʼi te pilo ʼo te Komite ʼo Te Gaue. Pea ʼi Malesio 2022 neʼe hinoʼi ia ia ke tokoni ki te Komite ʼo Te Gaue ʼo te Kolesi Pule.

Neʼe lahi ake te tehina ko Winder ʼi te kolo ko Murrieta ʼo Californie ʼi Amelika. Neʼe pusiaki  te tehina ko Winder ʼi te moʼoni e ʼana matuʼa pea neʼe papitema ʼi te ʼaho 29 ʼo Malesio 1986. ʼI te mahina ʼae neʼe hoa mai ki ai neʼe ina fakatotonu leva ke pionie vaeluaʼi temi. Pea ʼi tana fia fai mamahi ʼi te selevisi ʼaia neʼe ina fia hoko atu pe. Koia hili ni mahina ki tana pionie vaelua temi ʼi te ʼaho 1 ʼo Oketopeli 1986 neʼe pionie katoa leva.

ʼI te kei veliveli ʼa te tehina ko Winder neʼe alu ʼo fakafelaveʼi mo ʼona tehina lalahi e toko lua neʼe nā gaue ʼi te Petele. Neʼe tupu ai leva ia tana fia gaue ʼi te Petele moka lahi anai. Pea ʼi Maio 1990 neʼe fakaafe ia ia ke gaue ʼi te Petele ʼo te Filiale ʼo Wallkill.

Neʼe gaue te tehina ko Winder ʼi te Petele ʼi he ʼu selevisi kehekehe, ohage la ʼi te selevisi Gaue Fakamaʼa, ʼi te selevisi Fai ʼOloto pea ʼi te ʼu pilo ʼo te Petele. Neʼe ʼohoana leva mo Angela ʼi te 1997 pea talu mai ai ʼe nā gaue fakatahi ʼi te Petele. ʼI te 2014 neʼe fekauʼi naua ki Warwick ʼo kau ai te tehina ko Winder ki te laga ʼo te ʼu pilo fakamalamanei ʼa te Kau Fakamoʼoni ʼa Sehova. ʼI te 2016 neʼe nā hiki leva ki te fale ʼae ʼe fai ai te ʼu ako ʼa te Kau Fakamoʼoni ʼa Sehova, ʼi Patterson, ʼo gaue ai te tehina ko Winder ʼi te ʼu Selevisi Viteo. Hili ki ai taʼu e fa neʼe nā toe liliu ki Warwick pea neʼe gaue leva te tehina ko Winder ʼi te Pilo ʼo te Komite Ki Te Hahaʼi Gaue. Pea ʼi Malesio 2022 neʼe hinoʼi ia ia ke tokoni ki te Komite Ki Te Hahaʼi Gaue ʼo te Kolesi Pule.

Tou faikole ke tapuakinaʼi e Sehova te ʼu tagata ʼaia neʼe ina foaki mai “ohage ko ni meʼa ʼofa” ʼe natou haga gaue kinakina ki te ʼu gaue ʼo te Puleʼaga.