ʼE maʼuli ia Mary mo tona ʼohoana ko John, a ʼi he fenua ʼe kauga malie ai te kau gaue matapule ʼe ʼomai mai Filipine. Pea ʼe feala tanā fakamafola te logo lelei kia natou ʼaia. Lolotoga te taʼi mahaki ʼo te COVID-19, neʼe kamata e Mary he ʼu ako Tohi-Tapu ʼo ni hahaʼi ʼo te fenua ʼae ʼe maʼuli ai. Pea neʼe ina toe fai he ʼu ako ʼo ni hahaʼi ʼe maʼuʼuli ʼi te tahi ʼu fenua. ʼO feafeaʼi?

Neʼe fehuʼi fenei age e Mary ki ʼana ako: “ ʼE kotou iloʼi la he tahi ʼe ina fia ako te Tohi-Tapu?” Kapau neʼe natou tali age ʼei, pea neʼe ina kole age ke felaveʼi mo ia. Ka fai he fehuʼi faigafua feia, ʼe tau maʼu ai he ʼu fua lelei. Kotea tona tupuʼaga? Koteʼuhi ʼe fia fakaha e te hahaʼi, ʼae ʼe natou leleiʼia te Folafola ʼa Te ʼAtua, te ʼu meʼa ʼae ʼe natou ako ki ʼonatou famili mo ʼonatou kaumeʼa. Kotea te ʼu fua lelei neʼe maʼu e Mary?

Ko Jasmin neʼe ko te ako ʼa Mary. Pea neʼe haʼu mo he foʼi toko fa kia Mary, ʼo ina kamata ai he ako Tohi-Tapu. Neʼe ʼi ai te tahi ia natou ʼe higoa ko Kristine, pea neʼe ina leleiʼia ʼosi tana ako, ʼo ina loto ai ke fai tuʼa lua ʼi te vahaʼa. Neʼe fehuʼi age leva e Mary ki ai, pe ʼe ina iloʼi la he tahi ʼe ina fia ako te Tohi-Tapu. Pea neʼe ina tali fenei age: “ ʼEi, pea tali ke ta olo ki ʼoku kaumeʼa.” ʼI ni kiʼi vahaʼa pe, neʼe haʼu ai Kristine mo hona ʼu kaumeʼa ʼe toko fa ʼe natou fia ako te Tohi-Tapu. Ki muli age, neʼe haʼu mo tona tahi age ʼu kaumeʼa, pea neʼe ʼi ai ʼihi ia natou neʼe natou ʼomai mo tonatou ʼu kaumeʼa.

Neʼe loto e Kristine ke toe ako e tona famili ʼae ʼe maʼuʼuli ʼi Filipine te Tohi-Tapu. Koia, neʼe palalau ai ki tana taʼahine ko Andrea ʼo ʼuhiga mo te faʼahi ʼaia. ʼI te kamata, neʼe manatu fenei ia Andrea: ‘Ko te kau Fakamoʼoni ʼe ko te lotu mavae, ʼe mole tui natou kia Sesu, pea ʼe fakatafito pe ʼanatou akonaki ki te Tauhi ʼAfeā.’ Kae ʼi te ʼuluaki fai pe ʼo tana ako, neʼe mahino ai neʼe faihala. Pea ka ina ako ia he meʼa foʼou, ʼe ina ui fenei: “Kapau ʼe ui ʼi te Tohi-Tapu te faʼahi ʼaia, pea ʼe moʼoni ia.”

Ki muli age, neʼe haʼu ia Andrea mo tona ʼu kaumeʼa ʼe lua pea mo hona kauga gaue ke natou felaveʼi mo Mary, ʼo natou ako ai te Tohi-Tapu. Pea tahi, neʼe ʼi ai te mahikitaga ʼo Andrea neʼe higoa ko Angela, pea neʼe kivi. Kae neʼe mole iloʼi pe la e Mary, neʼe ina fakalogo tanatou ʼu faipalalau ʼae ki te Tohi-Tapu. ʼI te tahi ʼaho, neʼe kole age e Angela kia Andrea ke felaveʼi mo Mary ke feala mo ia ke ina toe ako mo te Tohi-Tapu. Neʼe ina leleiʼia ʼosi te ʼu meʼa ʼae neʼe ina ako. Hili he mahina  katoa, neʼe lahi te ʼu vaega neʼe ina maʼu loto, pea neʼe ina loto ke fai tuʼa fa ia tana ako. Pea ʼaki te tokoni ʼa Andrea, neʼe kamata kau tuʼumaʼu ki te ʼu fono ʼi te neti.

ʼI te iloʼi ʼae ʼe Mary te fealuʼaki ʼa Joshua, te ʼohoana ʼo Kristine ʼi tonā ʼapi lolotoga tanā ako, neʼe ina fehuʼi age pe ʼe mole fia haʼu ʼo fakalogo. Neʼe ina tali fenei age: “ ʼE au haʼu pe anai ʼo fakalogo. ʼAua naʼa ke fai mai he fehuʼi, naʼa au alu anai.” Kae ʼe ʼosi pe ki ai minuta ʼe nima ki te ako, neʼe kua lahi te ʼu fehuʼi ia neʼe ina fai ia Kristine. Pea neʼe ina loto ke toe fai mo ia hana ako.

Koia, ʼaki pe he fehuʼi faigafua neʼe lahi ai te ʼu ako neʼe kamata fai e Mary. Neʼe ina fai he ʼu fakatuʼutuʼu ke tuku ʼihi ako ke fai e ni tehina mo tuagaʼane. Neʼe ina kamata fai ni ako ʼe 28 ʼo ni hahaʼi neʼe maʼuʼuli ia fenua kehekehe ʼe fa.

Neʼe papitema ia Jasmin, tana ʼuluaki ako ʼi Apelili 2021. Neʼe papitema ia Kristine ʼi Maio 2022, pea neʼe toe liliu ki Filipine ki tona famili. Neʼe toe papitema te tahi ʼu ako ʼe lua, ʼae neʼe ʼave e Kristine ke felaveʼi mo Mary. Hili ki ai ni kiʼi mahina ki te papitema ʼa Kristine neʼe ko Angela leva ʼae neʼe papitema, pea ʼe pionie katoa ʼi te temi nei. Pea ʼe tuputupu lelei te ʼohoana ʼo Kristine ko Joshua, mo tanā taʼahine ko Andrea, ʼo feia pe mo ʼihi atu kau ako.

ʼI te ʼuluaki sekulo, tokolahi neʼe natou fakamafola te logo lelei ki ʼonatou famili pea mo kaumeʼa. (Soa. 1:​41, 42, ʼuluaki koga; Gaue 10:​24, 27, 48; 16:​25-​33) ʼE feala koa ke ke fehuʼi ki ʼau ako peʼe ko natou ʼae ʼe natou fia logo ki te moʼoni, pe ʼe natou iloʼi la he tahi ʼe ina fia ako te Tohi-Tapu. Ko ai ʼe ina iloʼi ʼe lagi feala pe anai ke ke kamata he ako ʼaki pe te kiʼi fehuʼi faigafua ʼaia?