1. He koʼe ʼe tou ui ʼe tahi alu pe te tagata mo tana manatu ʼo ʼuhiga mo te lotofakamolemole?

 KAPAU ʼe tou iloʼi neʼe tou fai he ʼu palalau peʼe ko he ʼu aga ʼe mamahi ai he tahi, ʼe mahino ia ʼe tou logoʼi he toe fimalie moka ʼe ina fai mai te ʼu palalau ʼaeni: “ ʼE au fakamolemole atu.” Kae kotea te fakaʼuhiga moʼoni ʼo te ʼu palalau ʼaia? ʼE fia ui koa e ia ʼae neʼe tou fakamamahiʼi ʼe hoko atu pe tatatou kaumeʼa lelei mo ia? Pe neʼe ina fia ui pe koa ia ʼe mole fia palalau ki te aluʼaga ʼae neʼe hoko? ʼE tahi alu pe te tagata mo tana manatu ʼo ʼuhiga mo te lotofakamolemole.

 2. Kotea ʼae ʼe ui ʼi te Tohi-Tapu ʼo ʼuhiga mo te fakamolemole ʼa Sehova? (Vakaʼi mo te nota.)

² ʼE kehe ʼaupito te fakamolemole ʼa Sehova ʼae ʼe ina fai ki te tagata agahala mo ʼae ʼe fefakahaʼaki e te tagata. ʼE kehe tokotahi pe ia te lotofakamolemole ia ʼa Sehova. Neʼe ui fenei e te tagata faipesalemo kia Sehova: “ ʼE maʼu te fakamolemole moʼoni ʼi ʼou tafa, ke manavasiʼi ai te hahaʼi kia te koe.” a (Pes. 130:4) ʼEi, ʼe ko te “fakamolemole moʼoni” ʼae ʼe fai e Sehova. Pea ʼaki tana faʼifaʼitaki, ʼe ina fakaha mai kia tatou pe kotea te fakaʼuhiga moʼoni ʼo te lotofakamolemole. Ka talanoa te kau faitohi ʼo te Tohi-Tapu ki tana lotofakamolemole ʼe ina tau fakaʼaogaʼi he kupu neʼe heʼeki fakaʼaogaʼi moʼo palalau ki te fakamolemole ʼae ʼe ina fai ki te tagata.

 3. He koʼe ʼe kehe te fakamolemole ʼa Sehova mo ʼae ʼa te tagata? (Esa. 55:​6, 7)

 ³ Ka fakamolemole e Sehova ki he tahi, ʼe ina molehi tana agahala. ʼE ha mai ai ʼe kei feala hana toe maʼu he ʼu felogoi lelei mo Sehova. Koia, ka fakamolemole ia Sehova ʼe katoa pea ʼe fia fakamolemole tuʼumaʼu pe.​—Lau ia Esaia 55:​6, 7.

 4. ʼE tokoni feafeaʼi mai e Sehova ke tou mahino pe kotea te fakamolemole moʼoni?

⁴ ʼE tou iloʼi ʼe tou heʼe haohaoa pea ʼe kehe te lotofakamolemole ʼa Sehova mo ʼae ʼa tatou. Koia ʼe feafeaʼi hatatou mahino ki te fakaʼuhiga moʼoni ʼo tana lotofakamolemole? ʼE fakaʼaogaʼi e Sehova he ʼu palalau fakata mo malave loto ʼi te Tohi-Tapu moʼo tokoni mai ke tou mahino ki te faʼahi ʼaia. ʼI te alatike ʼaeni, ʼe tou vakaʼi ai anai ʼihi palalau fakata. ʼE ha ai ka tou fakahemala moʼoni, ʼe molehi e Sehova ʼatatou agahala. Pea ʼe ina fai he fakatuʼutuʼu ke ina toe maʼu he ʼu felogoi lelei mo tatou. Pea tahi, ʼe toe fakamalohiʼi anai tatatou lotofakafetaʼi ki tatatou Tamai fonu ʼi te lotoʼofa. Kotea tona tupuʼaga? ʼE lahi te ʼu aluʼaga ʼe ina fakaha mai ai ia tana lotofakamolemole kia tatou.

ʼE TOʼO E SEHOVA ʼAU AGAHALA

 5. Ka fakamolemole mai ia Sehova, ʼe hage pe ʼe ina fai tea ki ʼatatou agahala?

⁵ ʼI te Tohi-Tapu, ʼe fakatatau ia te ʼu agahala ki he ʼu kavega mamafa. Neʼe ui fenei e te Hau ko Tavite ʼo ʼuhiga mo ʼana agahala: “ ʼE au taʼomia ʼi ʼaku agahala, ʼe hage ko he kavega mamafa ʼe mole au lava ʼamo.” (Pes. 38:4) Kae ʼe fakamolemole e Sehova te ʼu agahala ʼo natou ʼae ʼe fakahemala. (Pes. 25:18; 32:5) Ko te kupu Fakahepeleo ʼae neʼe fakaliliu ʼaki te kupu “fakamolemole,” ʼe fakaʼuhiga tafito “hiki” peʼe “toʼo.” Koia, ʼe feala ke tou fakatatau ia Sehova ki he tagata malohi ʼe ina toʼo ʼi ʼotatou fuga ʼuma te mamafa ʼo ʼatatou agahala, pea mo ʼave ki mamaʼo.

 6. ʼE fakamamaʼo feafeaʼi e Sehova ʼatatou agahala ia tatou?

⁶ ʼI te Pesalemo 103:​12, ʼe toe maʼu ai he tahi palalau fakata ʼe ha ai pe ʼe fakamamaʼo feafeaʼi e Sehova ʼatatou agahala ia tatou. ʼE ui fenei ʼi te vaega ʼaia: “Ohage pe ko te mamaʼo ʼo te hopoʼaga ʼo te laʼa mai tona toʼaga, ʼe feia tana fakamamaʼo ʼatatou agahala mai ia tatou.” ʼE mamaʼo ʼosi ia te potu esite mai te te potu uesite. Koia, ʼe mole feala ke nā fetaulaki. Ko tona fakaʼuhiga ʼe ʼave Sehova ʼatatou agahala ʼo mamaʼo ʼosi ia tatou. ʼI fakalotofimalie leva!

 7. Kotea te tahi ʼu palalau fakata ʼe fakamahino lelei ai te meʼa ʼae ʼe fai e Sehova ki ʼatatou agahala? (Mikea 7:​18, 19)

⁷ Kapau ʼe toʼo e Sehova ʼatatou agahala ke mamaʼo ʼosi ia tatou, ko tona fakaʼuhiga koa ke ina toʼo ʼo taupau? Kailoa. Neʼe ui fenei e te Hau ko Esekiasi kia Sehova: “Neʼe ke li ʼaku agahala fuli ki ʼou tuʼa,” peʼe ohage ko tona ui ʼi te nota, “toʼo ʼaku agahala fuli ʼi ʼou muʼa.” (Esa. 38:​9, 17; nota.) ʼE ha ʼi te ʼu palalau ʼaia, ʼe toʼo e Sehova te ʼu agahala ʼa natou ʼae ʼe fakahemala ʼo liʼaki, ke ʼaua naʼa natou toe sisio ki ai. Neʼe hage pe ʼe palalau fenei ia Esekiasi: “ ʼE ke fai ohage pe neʼe mole ʼi ai haku agahala.” ʼE fakaha ʼi te Tohi-Tapu te manatu ʼaia ʼaki he tahi age ʼu palalau fakata, ʼe tou maʼu ia Mikea 7:​18, 19. (Lau.) ʼE ui ʼi te ʼu vaega ʼaia, ʼe siʼaki e Sehova ʼatatou agahala ki te loto tai. ʼI te temi muʼa, neʼe mole feala ki he tahi ke ina toe maʼu he meʼa neʼe liʼaki ki te loto tai.

 8. Kotea ia te ʼu faʼahi ʼae neʼe tou ako?

⁸ ʼE tou ako mai te ʼu palalau fakata ʼaia, ka fakamolemole mai ia Sehova ʼe ina fakafimalieʼi ʼosi tatou mai te mamafa ʼo ʼatatou agahala. Neʼe ui fenei e Tavite: “Manuʼia ia natou ʼae kua fakamolemole ʼanatou aga ʼae ʼe kovi pea kua molehi ʼanatou agahala. Manuʼia te tagata ʼae ʼe mole toe manatuʼi anai e Sehova tana agahala. (Loma 4:​7, 8) ʼEi, ʼe ko te fakaʼuhiga moʼoni ʼaia ʼo te fakamolemole moʼoni.

 ʼE MOLEHI E SEHOVA ʼAU AGAHALA

 9. Kotea te tahi ʼu palalau fakata ʼe fakaʼaogaʼi e Sehova ke tou mahino ai ki te lahi ʼo tana fakamolemole?

⁹ ʼE toe fakaʼaogaʼi e Sehova te tahi ʼu palalau fakata. Pea ʼe tokoni mai ke tou mahino ʼe feala hana molehi te ʼu agahala ʼa natou ʼae ʼe fakahemala ʼuhi pe ko te totogi. ʼE ui ʼi te Tohi-Tapu, ʼe hage pe neʼe ina fakamaʼa ʼanatou agahala. Koia, kua fakamaʼa natou. (Pes. 51:7; Esa. 4:4; Sel. 33:8) ʼE fakamahino totonu e Sehova pe kotea ʼona fua lelei. ʼE ina ui fenei: “Tatau aipe pe ʼe kula fakapoʼuli ʼakotou agahala, ʼe liliu anai ia ʼo hihina ohage ko te nive. Tatau aipe pe ʼe hage ko he kie ʼe kula fakapoʼuli, ʼe liliu anai ia ohage ko te fuluʼi ovi.” (Esa. 1:​18) ʼE faigataʼa ʼaupito te toʼo ʼo he ʼu pulepule kula ʼi he kofu. Kae, ʼe fakapapauʼi mai e Sehova ʼaki te ʼu palalau fakata ʼaia, ʼe feala ke fakamaʼa ʼatatou agahala ʼo puli ʼosi, ʼo mole feala hatatou toe sisio ki ai.

10. Kotea te tahi ʼu palalau fakata ʼe fakaʼaogaʼi e Sehova moʼo fakaha ia te lahi ʼo tana fakamolemole?

¹⁰ Neʼe tou ui ʼi te alatike ʼae kua ʼosi ʼe toe feala pe ke fakatatau ʼatatou agahala ki he ʼu “maʼua.” (Mat. 6:​12, nota; Luka 11:4) Ka tou agahala kia Sehova, ʼe hage pe kua toe ʼasili age tatatou tuʼu maʼua kia te ia. ʼE lahi ʼaupito te maʼua ʼae ʼe tonu ke tou huʼi age. Kae moka ʼe ina fakamolemole mai, ʼe hage pe ʼe ina molehi te maʼua ʼae ʼe tonu ke tou huʼi age. Koia, ʼe mole ina fakamaʼua mai ke tou totogi te ʼu agahala ʼae kua fakamolemole. ʼE malave loto te ʼu palalau fakata ʼaia he ʼe tou logoʼi ai te lotofimalie moka fakamolemole mai e Sehova.

11. Ka tou lau ʼi te Tohi-Tapu ʼe “molehi” ʼatatou agahala, kotea ʼae ʼe tonu ke tou mahino ki ai? (Gaue 3:​19)

¹¹ ʼE molehi e Sehova ʼotatou maʼua, peʼe ko ʼatatou agahala. (Lau ia Gaue 3:​19.) Fakakaukauʼi age muʼa koe, ʼe ke tuʼu maʼua ki he tahi, pea ʼe haga te kilisitiano ʼaia ʼo halusi ʼi te pepa te maʼua ʼae ʼe tonu ke ke huʼi age. Logo pe la kua halusi kae ʼe kei iloga lelei pe te falā ʼae ʼe tonu ke huʼi. Kae ʼe kehe ia moka ʼe molehi ia he meʼa. Kapau ʼe tou fia mahino ki te ʼu palalau fakata ʼaia, ʼe tonu ke tou manatuʼi ʼi te temi muʼa, neʼe fai te vaitohi ʼaki te carbone, mo te gomme pea mo te vai. Koia, neʼe feala ke “molehi” te meʼa ʼae neʼe tohi ʼaki he meʼa palapala. Koia ʼae ka molehi he maʼua, ko tona fakaʼuhiga neʼe molehi ʼosi te meʼa ʼae neʼe tohi, ʼe mole kei iloga he meʼa. Neʼe hage pe neʼe mole ʼi ai he maʼua. ʼE ko he aluʼaga fakafiafia kia tatou, tatatou iloʼi ʼae ʼe haga anai ia Sehova ʼo molehi katoa ʼatatou agahala!​—Pes. 51:9.

12. Kotea te ako ʼe tou maʼu mai te ʼu palalau fakata ʼae ia Esaia 44:22?

¹² ʼE toe fakaʼaogaʼi e Sehova he tahi palalau fakata ʼe tatau moʼo fakamahino pe ʼe feafeaʼi ia tana molehi ia te ʼu agahala. ʼE ina ui fenei: “ ʼE au molehi anai ʼau talagataʼa ohage ʼe ʼuʼufi e he ʼao, pea mo ʼau agahala ohage ʼe ʼuʼufi e he ʼao matolu.” (Esa. 44:22) Ka fakamolemole mai Sehova, ʼe hage pe ʼe ina fakaʼaogaʼi he ʼao matolu moʼo ʼuʼufi ʼatatou talagataʼa ke mole tou sisio pea mo ia ki ai.

13. Kotea ʼae ʼe mole tonu ke tou fai?

¹³ Kotea ʼe tou ako mai te ʼu palalau fakata ʼaia? ʼE mole tonu ke tou haga tukugakoviʼi pe ia tatou totonu, ʼuhi ko te ʼu agahala ʼae neʼe tou fai ʼi totatou maʼuli ʼi muʼa atu. Neʼe kua molehi ʼosi ʼotatou maʼua ʼuhi ko te taʼataʼa ʼo Sesu Kilisito, pea mo te lotofakamolemole ʼa Sehova. Maʼia mo te totogi ʼo te ʼu maʼua ʼaia, ʼe mole tou sisio ki ai. ʼE ko te fakahemala moʼoni la ʼaia ʼe haʼu mai ia Sehova, ʼe ina fai maʼa natou ʼae ʼe fakahemala.

ʼE TOE MAʼU E SEHOVA HE ʼU FELOGOI LELEI MO TATOU

14. He koʼe ʼe tou tui ki te fakamolemole ʼa Sehova? (Vakaʼi mo te te ʼu pāki.)

¹⁴ ʼAki te fakamolemole moʼoni ʼa Sehova kua feala ai hatatou maʼu he ʼu felogoi lelei mo ia.  Pea ʼe toe tokoni mai tana fakamolemole moʼoni ʼaia ke ʼaua naʼa tou tukugakoviʼi ia tatou totonu. ʼE mole kei tou matataku naʼa kei nofo ita pe ia Sehova kia tatou, pea mo kumi he faigamalie ke ina fakatuʼa ia tatou. ʼE mole feala tuʼa tahi ia. He koʼe ʼe tou tui ki te fakamolemole ʼa Sehova? Neʼe tohi e Selemia ia te ʼu palalau ʼaeni ʼa Sehova: “ ʼE au fakamolemole anai tanatou hala pea ʼe mole au toe manatuʼi anai tanatou agahala.” (Sel. 31:34) Pea ki muli age, neʼe toe fai pe e te apositolo ko Paulo ia te ʼu palalau ʼaia. Neʼe ina ui fenei: “ ʼE mole au toe manatuʼi anai ʼanatou agahala.” (Hep. 8:​12) Kae kotea ia tona fakaʼuhiga?

15. Kotea te fakaʼuhiga ʼo te ui ʼae ʼe Sehova ʼe mole ina toe manatuʼi anai ʼatatou agahala?

¹⁵ ʼI te Tohi-Tapu, ko te kupu “manatuʼi” ʼe mole fakaʼuhiga pe ki hakita manatuʼi he meʼa neʼe hoko ʼi muʼa atu. Kae ʼe toe fakaʼuhiga ki hakita fakahoko he koga. Ko te tagata kaihaʼa ʼae neʼe tautau ʼi te pou ia tafa ʼo Sesu, neʼe ina kole fenei age: “Sesu, manatuʼi au moka ke hu ki tou Puleʼaga.” (Luka 23:​42, 43) Neʼe mole ina kole age pe kia Sesu ke ina manatuʼi ia ia. Pea ʼe ha ʼi te tali age ʼa Sesu, ʼe ina fai anai he meʼa ki te tagata ʼaia ʼaki tana fakatuʼuake ia ia. Koia, ka ui mai e Sehova ʼe mole ina toe manatuʼi anai ʼatatou agahala, ko tona fakaʼuhiga kua fakamolemole mai kia tatou, pea ʼe mole ina fai anai he meʼa ke fakatuʼa ai tatou ʼi te ka haʼu.

16. Kotea te ʼu palalau fakata ʼe fakaʼaogaʼi ʼi te Tohi-Tapu moʼo fakaha te ʼateaina ʼe tou logoʼi moka fakamolemole Sehova?

¹⁶ ʼE toe fakaʼaogaʼi ʼi te Tohi-Tapu ia he tahi ʼu palalau fakata ʼe tokoni mai ke tou logoʼi he ʼateaina moka ʼe fakamolemole mai Sehova ki ʼatatou agahala. ʼE ui ʼi te Tohi-Tapu, ʼe tou heʼe haohaoa, koia ʼe tou “popula ki te agahala.” Kae ʼaki te fakamolemole ʼa Sehova, kua tou hage ko ni kaugana neʼe ‘fakaʼateainaʼi mai te agahala.’ (Loma 6:​17, 18; Fkha. 1:5) ʼEi, kua tou ʼateaina mai tatatou popula ki te agahala ʼuhi ko te fakamolemole ʼa Sehova, pea ʼe tou logoʼi ai he toe fiafia lahi.

17. ʼE fakamalolo feafeaʼi tatou ʼaki te fakamolemole ʼa Sehova? (Esaia 53:5)

 ¹⁷ Lau ia Esaia 53:5. ʼI te ʼu palalau fakata fakaʼosi ʼae ka tou vakaʼi, ʼe fakatatau ai tatou ki ni hahaʼi ʼe tau mo he mahaki ʼe fakatupu mate. Kae ʼaki te totogi ʼae neʼe foaki e Sehova ʼi tana momoli tona ʼAlo ko he sakilifisio, neʼe fakamalolo ai tatou. (1 Pet. 2:​24) Ka tou mahahaki ʼi te faʼahi fakalaumalie, ʼe mole kei tou felogoi lelei ai mo Sehova. Kae neʼe fakamalolo tatou ʼuhi ko te totogi, koia ʼae kua tou toe maʼu ai he ʼu felogoi lelei mo ia. Ohage pe ko he tahi kua fakamalolo mai hona mahaki ʼe kovi, ʼe lahi ia tona fiafia. ʼO toe feia pe mo tatou, ʼe lahi totatou fiafia moka fakamalolo tatou ʼi te faʼahi fakalaumalie. Pea ʼaki te fakamolemole ʼa Sehova, ʼe tou toe maʼu ai tona ʼofa.

ʼE MALAVE FEAFEAʼI TE FAKAMOLEMOLE ʼA SEHOVA KIA TATOU?

18. Kotea ʼae neʼe tou ako mai te ʼu palalau fakata ʼo te Tohi-Tapu ʼo ʼuhiga mo te fakamolemole ʼa Sehova? (Vakaʼi mo te ʼa takai “ ʼE Fakamolemole Feafeaʼi Mai ia Sehova?”)

¹⁸ Kotea ʼae neʼe tou ako mai te ʼu palalau fakata ʼo te Tohi-Tapu ʼo ʼuhiga mo te fakamolemole ʼa Sehova? Neʼe tou ako ka fakamolemole mai ia Sehova ʼatatou agahala, ʼe katoa pea ʼe ina fakahoko tuʼumaʼu. Pea ʼe feala ai ke tou maʼu he ʼu felogoi lelei mo ia. Kae ʼaua naʼa galo kia tatou, ko te fakamolemole moʼoni ʼe ko te meʼa ʼofa ʼaia mai ia Sehova. Neʼe ina foaki mai te meʼa ʼofa ʼaia, he ʼe ʼofa ki te hahaʼi agahala pea ʼuhi ko tona ʼofa makehe. ʼE mole ko he meʼa ia ʼe tonu ke tou fakamaʼua ki ai ke ina foaki mai, he ʼe mole tuha ia mo tatou.​—Loma 3:​24.

19. (1) He koʼe ʼe tonu ke tou lotofakafetaʼi lahi kia Sehova? (Loma 4:8) (2) Kotea ka tou vakaʼi anai ʼi te alatike ʼae ka hoa mai?

¹⁹ Lau ia Loma 4:8. ʼE tonu ke tou lotofakafetaʼi lahi kia Sehova he ʼe “fakamolemole moʼoni” kia tatou. (Pes. 130:4) Pea kapau ʼe tou loto ke fakamolemole mai ia Sehova, ʼe ʼi ai te faʼahi maʼuhiga ʼe tonu ke tou fai. Neʼe ui fenei e Sesu: “Kapau ʼe mole kotou fakamolemole ki te hahaʼi ʼanatou hala, pea ʼe mole toe fakamolemole atu anai takotou Tamai ʼakotou hala.” (Mat. 6:​14, 15) Koia, ʼe tonu ke tou faʼifaʼitakiʼi ia Sehova pea mo tou fakamolemole ki te hahaʼi. ʼO feafeaʼi? ʼE tou vakaʼi anai ʼi te alatike ʼae ka hoa mai.