NEʼE ke tokagaʼi koa tokolahi ʼi te malamanei ʼe natou manatu ʼe ʼi ai te ʼu meʼa ʼe tonu ke natou maʼu, peʼe ke lahi age te ʼu lelei ʼe tonu ke natou maʼu peʼe ke kehe age tonatou tokagaʼi? Tatau aipe pe kotea te ʼu meʼa ʼae kua natou ʼosi maʼu, kae ʼe natou toe loto pe ke toe lahi age. Ko te hahaʼi ʼae ʼe natou maʼu te taʼi manatu ʼaia, ʼe natou manatu pe kia natou totonu pea mo maʼuli galo. Pea ko te aluʼaga ʼaia neʼe kua fakaha ʼi te Tohi tapu, ʼe feia anai te hahaʼi ʼi te ʼu ʼaho fakamuli.​—2 Tim. 3:2.

ʼE mahino ia, ʼe mole ko he meʼa foʼou ia te manatu pe ʼae kia kita totonu. Neʼe fakatotonu e Atama mo Eva ke nā filifili te meʼa ʼae lelei mo ʼae ʼe kovi maʼa naua, ʼo tupu ai he ʼu nunuʼa kovi. ʼI ni sekulo ki muli age neʼe manatu te Hau ʼo Suta ko Osiasi neʼe tonu ke ina tutu te iseso ʼi te fale lotu. Kae neʼe faihala ʼosi. (2 Klk. 26:​18, 19) Neʼe manatu te kau Faliseo mo te kau Satuseo ʼe tonu ke makehe age te tokaga ʼa te ʼAtua kia natou ʼuhi pe ʼe natou hifo mai ia Apalahamo.​—Mat. 3:9.

ʼE tou maʼuʼuli ʼi he malama ʼe manatu te hahaʼi kia natou totonu. Pea ʼe feala ke tou maʼu te faʼahiga manatu ʼaia. (Kal. 5:​26) ʼE feala pe ke tou manatu ʼe tuha ke tou maʼu he ʼu lelei peʼe ke makehe age totatou tokagaʼi. ʼE feafeaʼi hatatou liʼaki te faʼahiga manatu ʼaia? Kapau ʼe tou fia mahino kia ai, ʼe tonu ke tou vakaʼi ia te manatu ia ʼa Sehova ʼo ʼuhiga mo te faʼahi ʼaia. ʼE feala ke tokoni mai he ʼu pelesepeto Fakatohi-tapu ʼe lua.

ʼE ko Sehova ʼae ʼe ina filifili te ʼu meʼa ʼae ʼe tuha ke tou maʼu. Tou vakaʼi he ʼu faʼifaʼitaki.

• ʼI te famili, ʼe tonu ke logoʼi e te tagata ʼohoana ʼe  fakaʼapaʼapaʼi e tona ʼohoana. Pea ʼe tonu ke logoʼi e te fafine ʼohoana ʼe ʼofa tona ʼohoana ia ia. (Efe. 5:​33) ʼE tonu ki he taumatuʼa ke nā fefakahaʼaki tanā feʼofaʼofani. (1 Ko. 7:3) ʼE fakamaʼua e te ʼu matuʼā ke fakalogo age ʼanatou fanau, pea ʼe tonu anai ke logoʼi e te ʼu fanau tonatou ʼofa pea mo tanatou tokaga kia natou.​—2 Ko. 12:14; Efe. 6:2.

• ʼI te kokelekasio, ʼe tonu ke tou fakaʼapaʼapa ki te kau tagata ʼafeā ʼae ʼe gaue kinakina. (1 Tes. 5:​12) Kae, ʼe mole tonu ke natou puleʼi ʼonatou tehina mo tuagaʼane.​—1 Pet. 5:​2, 3.

• Neʼe fakagafua e te ʼAtua ki te ʼu puleʼaga fakatagata ke natou fakamaʼua te totogi ʼo te ʼu tuku hau. Pea ʼe ina loto ke tou fakaʼapaʼapa fuli ki te ʼu pule ʼae neʼe ina fakatuʼu.​—Loma 13:​1, 6, 7.

ʼE ʼofa Sehova ia tatou ʼo lahi age ʼi te ʼu meʼa ʼae ʼe ina foaki mai, logo la ʼe mole tou tuha ke tou maʼu. ʼE tou agahala, koia ʼe tuha mo tatou ke tou mamate. (Loma 6:​23) Kae, ʼe lahi te ʼu tapuakina ʼe foaki mai e Sehova, koteʼuhi ʼe ina fakaha mai kia tatou tona ʼofa agatonu. (Pes. 103:​10, 11) Koia, ʼe ina foaki mai te ʼu tapuakina fuli ʼaia pea ʼo laka age ʼuhi pe ko tona ʼofa makehe.​—Loma 12:​6-8; Efe. 2:8.

Tou liʼaki te manatu ʼa te malama. ʼE feala pe ke tou kamata manatu, ʼe tou tuha ke lahi age te ʼu lelei ʼae ʼe tou maʼu ʼi ʼihi kae mole tou tokagaʼi. ʼI te tahi ʼaho, neʼe talanoa ia Sesu ki he faʼifaʼitaki ʼe ha ai ʼe faigafua te maʼu ʼo te taʼi manatu ʼaia. ʼE ko te faʼifaʼitaki ʼa te kau gaue ʼo te gaueʼaga vite ʼae neʼe totogi natou ʼaki he foʼi tenalio ʼe tahi. Neʼe ʼi ai ʼihi ia natou neʼe natou kamata gaue uhuuhu. Pea neʼe natou gaue ʼaho katoa, kae sisiga ʼosi te laʼa. Kae neʼe gaue pe ʼihi ia ʼi he hola katoa. Neʼe manatu te ʼuluaki kau gaue ia ʼe lahi age anai tanatou totogi ia natou ʼae. (Mat. 20:​1-​16) ʼI te faʼifaʼitaki ʼaia, neʼe fakaha ai e Sesu te ako ʼae neʼe tonu ke taʼofi ʼe ʼana tisipulo. Neʼe tonu ke natou fiafia ʼi te meʼa ʼae neʼe foaki age e te ʼAua.

Tou lotofakafetaʼi, kae ʼaua naʼa tou fakamaʼua ki ʼihi ke natou foaki mai ni meʼa. (1 Tes. 5:​18) Tou faʼifaʼitakiʼi te apositolo ko Paulo. Neʼe mole ina kole ki ʼona tehina ʼo Kolonito ke tokoni age ʼi te faʼahi fakasino, logo la neʼe tonu ke ina fai te faʼahi ʼaia. (1 Ko. 9:​11-​14) ʼE tonu ke maʼuhiga kia tatou ia te ʼu tapuakina fuli ʼe tou maʼu. Kae ʼaua naʼa tou fakamaʼua ki ʼihi ke natou foaki mai ni meʼa.

 Tou agavaivai. Ko ʼae ʼe manatu ʼe maʼuhiga age ia ʼi ʼihi, ʼi te agamahani, ʼe manatu ia ʼe lahi age te ʼu meʼa ʼe tonu ke ina maʼu ʼi ʼihi. Tou manatuʼi ʼe tokoni ki ai ia te agavaivai ke ina liʼaki te manatu kovi ʼaia.

Neʼe tuku mai e te polofeta ko Taniela, he faʼifaʼitaki lelei ʼo ʼuhiga mo te agavaivai. Neʼe haʼu mai he famili ʼaliki, neʼe tupulaga mo poto pea neʼe lahi ʼona faiva. (Tan. 1:​3, 4, 19, 20) Logo la te ʼu faʼahi ʼaia, kae neʼe mole manatu ia ke kehe age tona tokagaʼi pea ʼe tuha mo te ʼu gaue ʼae neʼe foaki age. Kae, neʼe agavaivai pe ia Taniela. Pea neʼe maʼuhiga kia mata ʼo Sehova ʼuhi ko tana agavaivai.​—Tan. 2:​30; 10:​11, 12.

Koia, tou liʼaki te manatu pe ʼae kia tatou totonu ʼae kua mafola ʼi te malama ʼaeni. Kae tou haga fiafia pe ʼi te tapuakina fuli ʼe foaki mai e Sehova ʼuhi ko tona ʼofa makehe.