1. Kotea ʼae neʼe ui e Sesu ʼo ʼuhiga mo te ʼu koloa ʼae ʼi selo?

KO ʼIHI meʼa ʼofa ʼe mole tou sisio ki ai, tafito te ʼu koloa ʼae ʼe maʼuhiga ʼaupito. ʼI te Akonaki ʼa Sesu ʼi Te Moʼuga, neʼe palalau ai ki te ʼu koloa ʼae ʼi selo pea ʼe maʼuhiga age ʼi te ʼu koloa fakamalama. Pea neʼe ina toe ui fenei: “Ko te faʼahi ʼae ʼe tuku ai tou koloa ʼe toe tuku ai foki mo tou loto.” (Mat. 6:19-21) Pea ʼe uga anai tatou e totatou loto ke tou faiga malohi ke tou maʼu te ʼu meʼa ʼae ʼe maʼuhiga kia tatou. ʼE tou tanaki anai “he ʼu koloa ʼi selo” ʼaki hatatou maʼu he matagafua lelei ia muʼa ʼo te ʼAtua. Ohage ko tona fakamahino e Sesu, ko te ʼu koloa ʼaia ʼe mole feala ke maumauʼi peʼe kaihaʼa.

2. (1) Ia 2 Kolonito 4:17, 18, kotea ʼae ʼe fakalotomalohiʼi ai tatou e te apositolo ko Paulo ke tou fai? (2) Kotea ʼae ka tou palalau anai ki ai ʼi te alatike ʼaeni?

² ʼE fakalotomalohiʼi tatou e te apositolo ko Paulo ke tou ‘sisio fakamamaʼu ki te ʼu meʼa ʼae ʼe mole tou sisio ki ai.’ (Lau ia 2 Kolonito 4:17, 18.) Pea ʼi te ʼu meʼa ʼaia ʼe kau ai te ʼu tapuakina ʼe tou maʼu anai ʼi te malama foʼou. Kae ʼi te alatike ʼaeni, ʼe tou vakaʼi anai te ʼu koloa fakapulipuli ʼaeni ʼe fa ʼe feala ke tou maʼu ʼi te temi nei: tatatou fakakaumeʼa mo te ʼAtua, mo te faikole, mo te tokoni ʼo te laumalie maʼoniʼoni, pea mo te lagolago mai ʼa Sehova, mo Sesu, pea mo te kau ʼaselo ʼi te faifakamafola. ʼE tou toe vakaʼi anai pe ʼe tou fakaha feafeaʼi tonatou maʼuhiga kia tatou.

3. Kotea te koloa fakapulipuli ʼae ʼe maʼuhiga ʼaupito age? Pea ʼe feafeaʼi hatatou maʼu te koloa ʼaia?

³ Ko te koloa fakapulipuli ʼae ʼe maʼuhiga ʼaupito age ʼe ko tatatou fakakaumeʼa mo Sehova ʼAtua. (Taag. 3:32) ʼE lava feafeaʼi  te fakakaumeʼa ʼa he ʼAtua maʼoniʼoni mo ni hahaʼi agahala? ʼE feala ʼaki te sakilifisio faitotogi ʼa Sesu ʼae ʼe ina “toʼo te agahala ʼo te malamanei.” (Soa. 1:29) Maʼia ʼi muʼa ʼo te mate ʼa Sesu, neʼe iloʼi e Sehova ʼe nofo agatonu anai ia Sesu ʼo kaku ki tona mate ʼo feala ai ke ina haofaki te malamanei. Ko te tupuʼaga la ʼaia ʼo te lava fakakaumeʼa ʼa te ʼAtua mo te hahaʼi ʼae neʼe maʼuʼuli ʼi muʼa ʼo te mate ʼa Kilisito.—Loma 3:25.

4. Tuku mai he ʼu faʼifaʼitaki ʼo he ʼu tagata neʼe natou fakakaumeʼa mo te ʼAtua ʼi muʼa ʼo te haʼu ʼa Kilisito ki te kele.

⁴ Tou vakaʼi he ʼu tagata neʼe natou fakakaumeʼa mo te ʼAtua ia muʼa ʼo te haʼu ʼa Kilisito ki te kele. Ko Apalahamo neʼe ina maʼu he tui malohi. Hili taʼu ʼe 1 000 tupu ki tona mate, neʼe fakahigoaʼi fenei ia ia e Sehova: ko “toku kaumeʼa.” (Esa. 41:8, MN) Ko tona fakaʼuhiga maʼia mo te mate ʼe mole feala ke ina fakagata te fakakaumeʼa ʼa Sehova mo ʼona kaumeʼa. Koia ʼe kei manatuʼi pe e Sehova ia Apalahamo. (Luka 20:37, 38) Tou vakaʼi leva te faʼifaʼitaki ʼa Sopo. Ia muʼa ʼo te ʼu ʼaselo ʼae neʼe fakatahitahi ʼi selo, neʼe fakaha e Sehova tana falala katoa kia ia. Neʼe ina ui fenei: “Ko he tagata haohaoa ia mo agatonu, mo mataku ki te Atua, pea mo fakamamao mai te kovi.” (Sopo 1:6-8) Pea neʼe kotea te manatu ʼa Sehova ʼo ʼuhiga mo Taniela, ʼi tana tauhi agatonu kia te ia lolotoga taʼu ʼe 80, ʼi he fenua neʼe tauhi ai te hahaʼi ki te ʼu ʼatua loi? Neʼe tuʼa tolu te fakaha age ʼa te ʼaselo ki te polofeta kua matuʼa ʼaia, neʼe ko he “tagata ofaina” ia mata ʼo te ʼAtua. (Tan. 9:23; 10:11, 19) ʼE tou tui papau ai ʼe maʼuhiga ʼaupito kia Sehova ʼona kaumeʼa, pea ʼe loto moʼoni ke ina fakatuʼuake natou.—Sopo 14:15.

5. Kotea ʼae ʼe tonu ke tou fai ke feala ai hatatou kaumeʼa lelei mo Sehova?

⁵ Ia ʼaho nei, ko te toko lauʼi miliona hahaʼi ʼe natou kaumeʼa lelei mo Sehova. ʼI te malamanei, tokolahi te ʼu tagata, mo te ʼu fafine, pea mo te ʼu fanau ʼe natou fakaha ʼi ʼanatou aga ʼe natou fakakaumeʼa lelei mo te ʼAtua. Ko Sehova ʼe fia “kaumea” mo te ʼu hahaʼi faitotonu. (Taag. 3:32) ʼE feala ke fakakaumeʼa te hahaʼi pea mo te ʼAtua ʼaki tanatou tui ki te sakilifisio faitotogi ʼa Sesu. ʼAki te sakilifisio faitotogi ʼaia, ʼe feala ai ke tou kaumeʼa mo Sehova, mo tou foaki totatou maʼuli kia te ia pea mo papitema. Pea ka tou fakahoko te ʼu aluʼaga maʼuhiga ʼaia, ʼe tou kau ki te toko lauʼi miliona kau Kilisitiano ʼae ʼe “kaumea” mo Ia ʼae ʼe lahi tokotahi ʼi te ʼatulaulau.

6. ʼE tou fakaha feafeaʼi ʼe maʼuhiga kia tatou te fakakaumeʼa mo Sehova?

⁶ ʼE tou fakaha feafeaʼi ʼe maʼuhiga kia tatou te fakakaumeʼa mo Sehova? ʼAki tatatou nonofo agatonu ohage ko Apalahamo mo Sopo, logo ai kua fualoa tatatou tauhi kia Sehova. Tou manatuʼi ko te ʼu kaugana ʼaia ʼe lua ʼa te ʼAtua neʼe nā tauhi agatonu ʼi ni lauʼi taʼu. Pea ohage ko Taniela, ke maʼuhiga age tatatou fakakaumeʼa mo te ʼAtua, kae mole ko totatou maʼuli. (Tan. 6:7, 10, 16, 22) ʼAki te tokoni ʼa Sehova, ʼe feala ai ke tou ʼutakiʼi te ʼu ʼahiʼahi fuli, pea mo tou kaumeʼa tuʼumaʼu mo ia.—Flp. 4:13.

7. (1) Ia Taaga Lea 15:8, ʼe feafeaʼi ia Sehova moka fakalogo ki ʼatatou faikole? (2) ʼE tali feafeaʼi mai e Sehova ki ʼatatou faikole?

⁷ ʼE ʼi ai te tahi koloa fakapulipuli ʼe ko te faikole. Ko he ʼu kaumeʼa ʼe natou leleiʼia te fefakahaʼaki ʼanatou manatu mo te ʼu meʼa ʼae ʼe natou logoʼi. ʼE tatau koa mo tatatou fakakaumeʼa ʼae mo Sehova? ʼEi! He ʼe ko Sehova ʼe palalau mai ʼaki te Tohi-Tapu. ʼI tana Folafola, ʼe ina fakaha mai tana manatu pea mo te meʼa ʼae ʼe ina logoʼi. Pea ʼi te faikole ʼe tou palalau ki ai ʼo tou fakaha age ʼatatou manatu mo te ʼu meʼa ʼae ʼe tou logoʼi. Pea ʼe fiafia ia Sehova ʼi tana fakalogo ki ʼatatou faikole. (Lau ia Taaga Lea 15:8.) Ohage ko he Kaumeʼa ʼe ʼofa, ko  Sehova ʼe ina fakalogo ʼatatou faikole pea mo tali ki ai. ʼI ʼihi temi, ʼe ina tali vave mai ki ʼatatou faikole. Pea ʼi ʼihi temi leva, ʼe tonu pe ke tou haga faikole ʼo ʼuhiga mo he aluʼaga. Kae ʼe feala ke tou tui papau ʼe tali mai anai e Sehova ʼi hona aluʼaga ʼe lelei age pea ʼi tona temi totonu. Pea ko te tali ʼaia ʼe lagi kehe age ia ʼi te meʼa ʼae neʼe tou ʼamanaki ki ai. Ohage la, ko Sehova ʼe mole ina pulihi te ʼahiʼahi ʼae ʼe tou tau mo ia, kae ʼe ina foaki mai te poto mo te malohi ‘ke feala hatatou ʼutakiʼi.’—1 Ko. 10:13.

8. ʼE tou fakaha feafeaʼi ko te faikole ʼe ko he meʼa ʼofa maʼuhiga kia tatou?

⁸ ʼE tou fakaha feafeaʼi ko te faikole ʼe ko he meʼa ʼofa maʼuhiga kia tatou? ʼE tou fakaha anai ʼaki tatatou fakalogo ki te tokoni ʼaeni ʼa te ʼAtua: “Kotou faikole tuʼumaʼu.” (1 Tes. 5:17) Ko Sehova ʼe mole ina fakamalohiʼi tatou ke tou faikole age. ʼE fakaʼapaʼapa ki totatou loto faʼitaliha kae ʼe ina fakalotomalohi tatou ke tou “kataki ʼi te faikole.” (Loma 12:12) Koia ʼe tou fakaha ʼe tou leleiʼia te meʼa ʼofa ʼaia ʼaki tatatou faikole tuʼumaʼu lolotoga te ʼaho katoa. ʼE mahino ia, ʼe mole tonu anai ke tou galoʼi ke tou fakavikiviki pea mo fakamalo kia te ia ʼi ʼatatou faikole.—Pes. 145:2, 3.

9. Kotea te manatu ʼa te tehina ʼo ʼuhiga mo te faikole? Kae ʼe feafeaʼi kia koe ia te faikole?

⁹ Kapau kua fualoa tatatou tauhi kia Sehova, pea mo tou sisio pe neʼe feafeaʼi tana tali ki ʼatatou faikole, pea ʼe tou mahino ai ko te faikole ʼe maʼuhiga. Tou vakaʼi te faʼifaʼitaki ʼo te tehina ko Chris, ʼae kua taʼu 47 tana pionie katoa. ʼE ina ui fenei: “ ʼE au leleiʼia taku ʼalaʼala ʼi te uhu fuli ke au faikole ai kia Sehova. Ko he meʼa fakafiafia haku palalau kia Sehova kae hopo ake te laʼa, pea ko meʼa fuli ʼe matalelei. ʼE uga ai au ke au fakamalo kia Sehova ki ʼona meʼa ʼofa fuli, ʼo feia mo te pilivilesio ʼae ke au faikole. Pea ʼi te fakaʼosi ʼo te ʼaho, hili taku faikole ʼe au alu leva ʼo moe he ʼe kua au fiafia mo fimalie.”

10. He koʼe ʼe tonu ke maʼuhiga kia tatou te laumalie maʼoniʼoni?

¹⁰ Ko te laumalie maʼoniʼoni ʼe ko he tahi ʼaia koloa fakapulipuli ʼe tonu ke maʼuhiga kia tatou.  Ko Sesu ʼe ina fakalotomalohiʼi tatou ke tou haga kole te laumalie maʼoniʼoni. (Luka 11:9, 13) ʼAki tona laumalie maʼoniʼoni, ʼe foaki mai ai e Sehova tona malohi, ʼei “te malohi makehe.” (2 Ko. 4:7; Gaue 1:8) Koia, ʼaki te tokoni ʼa te laumalie ʼo te ʼAtua, ʼe feala ke tou tauʼi te ʼu faigataʼaʼia fuli.

11. ʼE lava tokoni feafeaʼi mai ia te laumalie maʼoniʼoni?

¹¹ ʼE feala ke tokoni mai te laumalie maʼoniʼoni ke tou lava fakahoko ʼotatou maʼua ʼi tatatou tauhi ʼae ki te ʼAtua. ʼE toe feala ki te laumalie ʼo te ʼAtua ke ina hikihiki age ʼotatou fealagia ʼae kua tou maʼu. Koia, ʼe tou mahino ai kapau ʼe tou lava fakahoko ʼotatou maʼua, ʼe feala pe ʼuhi ko te tokoni mai ʼo te laumalie ʼo Sehova.

12. ʼO mulimuli kia Pesalemo 139:23, 24, kotea ʼae ʼe tou lava fai ʼaki te tokoni ʼo te laumalie maʼoniʼoni?

¹² ʼE toe feala ke tou fakaha ʼe maʼuhiga kia tatou te laumalie ʼo te ʼAtua, ʼaki tatatou kole kia Sehova ke tokoni mai tona laumalie ke tou iloʼi ai te ʼu manatu mo te ʼu holi ʼae ʼe kovi ia tatou. (Lau ia Pesalemo 139:23, 24.) Kapau ʼe tou faikole ki te faʼahi ʼaia, pea ko Sehova ʼaki tona laumalie maʼoniʼoni, ʼe feala ke ina fakatokaga mai hatatou manatu peʼe ko hatatou holi ʼe kovi. Pea ʼe tonu ai leva ke tou faikole ke foaki mai e te tona laumalie te malohi ke tou lava tekeʼi. Pea kapau ʼe tou fai te faʼahi ʼaia, ʼe sio mai anai e Sehova ʼe mole tou loto ke tou fai he meʼa ʼe feala ke ina taʼofi ai tana foaki mai tona laumalie maʼoniʼoni.—Efe. 4:30.

13. ʼE feala ke maʼuhiga feafeaʼi age kia tatou te tokoni ʼa te laumalie maʼoniʼoni?

¹³ Kapau ʼe tou fakakaukauʼi te ʼu gaue ʼa te laumalie ia ʼaho nei, pea ʼe toe maʼuhiga lahi age kia tatou tana tokoni. ʼI muʼa ʼo te hake ʼa Sesu ki selo, neʼe ina ui fenei ki ʼana tisipulo: “ ʼE kotou maʼu anai te malohi moka hifo mai ia te laumalie maʼoniʼoni kia koutou, pea ʼe kotou liliu anai ko ʼaku fakamoʼoni . . . ʼo kaku ki te ʼu potu taupotu ʼo te kele.” (Gaue 1:8) Ko te ʼu folafola ʼaia ʼe lolotoga hoko ia ʼaho nei. Ko te fakatahitahi ʼo te toko lauʼi 8 miliona tupu kau atolasio ʼa Sehova mai te kele katoa, ko te fakamoʼoni ʼaia ʼo te gaue ʼa te laumalie maʼoniʼoni. Tahi ʼae meʼa, ʼe tou fiafia ʼi te maʼuli ʼi he palatiso fakalaumalie, he ʼe ko te laumalie ʼe  tokoni mai ke tou maʼu te ʼu kalitate ʼae ko te ʼofa, mo te fiafia, mo te tokalelei, mo te kataki fualoa, mo te agaʼofa, mo te agalelei, mo te tui, mo te agamalū pea mo te lotololomi. Pea ko te ʼu kalitate matalelei ʼaia ʼe ko “te fua ʼo te laumalie.” (Kal. 5:22, 23) Koia ko te laumalie maʼoniʼoni ʼe ko he meʼa ʼofa maʼuhiga ʼaupito.

14. Kotea te tokoni fakapulipuli ʼae ʼe tou maʼu moka ʼe tou faifakamafola?

¹⁴ ʼE tou maʼu te pilivilesio ʼae ke tou “gaue fakatahi” mo Sehova, mo Sesu pea mo te kau ʼaselo. (2 Ko. 6:1) ʼI te temi ʼae ʼe tou faifakamafola ai, ʼe tou gaue fakatahi ai mo natou. Neʼe ui fenei e Paulo ʼo ʼuhiga mo ia totonu pea mo natou fuli ʼae ʼe faifakamafola: ‘ ʼE matou kaugā gaue mo te ʼAtua.’ (1 Ko. 3:9) Pea ka tou faifakamafola ʼe tou toe kaugā gaue pea mo Sesu. Koteʼuhi, hili tana fakatotonu ki ʼana tisipulo ke natou fai he tahi ʼu tisipulo ʼi te ʼu puleʼaga fuli, neʼe ina ui fenei age kia natou: “ ʼE au nofo anai mo koutou.” (Mat. 28:19, 20) Kae feafeaʼi ki te kau ʼaselo? ʼE tou fiafia lahi he ʼe takitaki tatou e te kau ʼaselo moka tou tala te “logo lelei ʼe heʼe gata . . . kia natou ʼae ʼe nonofo ʼi te kele.”—Fkha. 14:6.

15. Tuku mai he faʼifaʼitaki ʼi te Tohi-Tapu ʼe fakaha ai te gaue maʼuhiga ʼa Sehova ʼi te faifakamafola.

¹⁵ Kotea ʼae ʼe tou lava fakahoko ʼaki te lagolago mai ʼa Sehova, mo Sesu pea mo te kau ʼaselo? Ka tou to te pulapula ʼo te logo ʼo te Puleʼaga, ʼe to he pulapula ʼi he loto ʼo he tahi ʼe ina tali lelei. Pea ko te pulapula ʼaia ʼe homo ake. (Mat. 13:18, 23) Ko ai ʼae ʼe ina fakahomo ake te pulapula ʼaia ke liliu ai ko he fuʼu ʼakau ʼe fua? Neʼe fakamahino mai e Sesu ʼe mole he tahi ʼe feala ke liliu ko hana tisipulo mo kapau la ʼe mole taki mai ia ia e te Tamai. (Soa. 6:44) Ohage la ko Paulo neʼe faifakamafola ki he hahaʼi fafine ʼi tuʼa atu ʼo te kolo ko Filipe. Pea ʼi te ʼu fafine ʼaia, neʼe ʼi ai te fafine neʼe higoa ko Litia. Koʼeni te meʼa ʼae ʼe ui ʼi te Tohi-Tapu ʼo ʼuhiga mo Litia: “Neʼe avahi e Sehova tona loto ke ina tokagaʼi te ʼu palalau ʼa Paulo.” (Gaue 16:13-15) Ohage ko Litia, ko te toko lauʼi miliona hahaʼi neʼe taki mai natou e Sehova.

16. Ko ai ʼae ʼe tonu ke tou fakavikiviki moka fua lelei tatatou faifakamafola?

¹⁶ Ko ai ʼae ʼe tonu ke tou fakavikiviki moka fua lelei tatatou faifakamafola? Neʼe tali e Paulo ki te fehuʼi ʼaia ʼaki tana tohi te ʼu palalau ʼaeni ʼo ʼuhiga mo natou ʼae ʼi te kokelekasio ʼo Kolonito: “Neʼe au to, pea neʼe fakavai e Apolose, kaʼe neʼe haga fakatuputupu e te ʼAtua. Koia, ʼe mole ko ʼae ʼe ina to ʼae ʼe maʼuhiga peʼe ko ʼae ʼe ina fakavai, kaʼe ʼe ko te ʼAtua ʼae ʼe ina haga fakatuputupu.” (1 Ko. 3:6, 7) Ohage ko Paulo, moka fua lelei tatatou faifakamafola ʼe tonu ai ke tou fakavikiviki tuʼumaʼu kia Sehova.

17. ʼE tou fakaha feafeaʼi ʼe maʼuhiga kia tatou tatatou gaue fakatahi mo te ʼAtua, mo Sesu, pea mo te kau ʼaselo?

¹⁷ ʼE tou fakaha feafeaʼi ʼe maʼuhiga kia tatou tatatou gaue fakatahi mo te ʼAtua, mo Sesu, pea mo te kau ʼaselo? ʼAki tatatou tala te logo lelei ki te hahaʼi mo he faʼafai. Ohage la, ʼe feala ke tou faifakamafola “ia muʼa ʼo te hahaʼi pea mo te ʼu ʼapi.” (Gaue 20:20) Pea tokolahi ʼe natou leleiʼia te fagonogono faigamalie. Moka natou felaveʼi mo he tahi, ʼe natou fakamalo ki ai pea mo natou faipalalau mo ia. Kapau ko he tahi ʼe fia faipalalau, ʼe natou palalau age leva ki te logo ʼo te Puleʼaga.

18-19. (1) Kotea ʼae ʼe tonu ke tou fai ke tou fakavai te pulapula ʼo te moʼoni? (2) Tuku mai he faʼifaʼitaki ʼe fakaha ai pe neʼe tokoni feafeaʼi ia Sehova ki te tagata neʼe ina ako te Tohi-Tapu.

¹⁸ ʼE lelei anai tatatou gaue fakatahi mo te ʼAtua, mo kapau ʼe tou to te pulapula ʼo te moʼoni  pea mo fakavai. Kapau ʼe tali lelei e he tahi te logo, ʼe tou faiga malohi anai ke tou toe liliu ki ai ʼo kamata hana ako. Kae ʼi ʼihi aluʼaga, ʼe feala ke tou kole ki he kaugā fagona ke toe liliu ki ai. Ko he meʼa fakafiafia tatatou sisio kia Sehova ʼe tokoni ki he tahi ʼe ako mo tatou te Tohi-Tapu ke ina fetogi tana manatu mo tona loto.

¹⁹ Tou vakaʼi muʼa te faʼifaʼitaki ʼo Raphalalani ʼae ʼe maʼuli ʼi Afelika Saute. Neʼe ina leleiʼia te ʼu meʼa ʼae neʼe ina ako ʼi te Tohi-Tapu. Kae neʼe ko he tahi neʼe faifakalauʼakau, koia ʼae neʼe faigataʼa ʼaupito ai tana tali te ʼu moʼoni ʼo te Tohi-Tapu ʼo ʼuhiga mo te palalau mo te kau mate. (Tet. 18:10-12) Kae neʼe ina tuku ia Sehova ke ina fetogi tana manatu. Pea ki muli age, neʼe ina liʼaki leva tana faifakalauʼakau tatau aipe pe neʼe mole kei maʼu mai ai hana foʼi falā. ʼI te temi nei kua taʼu 60, pea ʼe ina ui fenei: “ ʼE au fakamalo lahi ki te kau Fakamoʼoni ʼa Sehova ki te ʼu meʼa fuli ʼae neʼe natou fai maʼa ʼaku. Neʼe natou tokoni mai ke au maʼu haku tahi gaue. Kae ʼe au fakamalo tafito kia Sehova ʼi tana fakafealagia mai ke au fakamaʼa toku maʼuli. ʼI te temi nei kua au papitema, pea mo hoko atu pe taku faifakamafola.”

20. Kotea ʼae ʼe tou loto ke tou fai?

²⁰ ʼI te alatike ʼaeni neʼe tou palalau ki he ʼu koloa fakapulipuli ʼe fa. Ko te koloa ʼae ʼe maʼuhiga age ʼe ko te pilivilesio ʼae ke liliu ia Sehova ko totatou Kaumeʼa. Pea ko te koloa ʼaia ʼe ina fakafealagia mai ke tou maʼu te ʼu koloa fakapulipuli ʼae ʼe tolu: te faikole, mo te tokoni ʼa te laumalie maʼoniʼoni, mo te lagolago mai ʼa Sehova, mo Sesu, pea mo te kau ʼaselo ʼi te minisitelio. ʼE tou loto ke tou fakaha ʼe maʼuhiga kia tatou te ʼu koloa fakapulipuli ʼaia. Pea tou fakamalo tuʼumaʼu kia Sehova ʼi tana liliu ko hotatou Kaumeʼa moʼoni.