1-2. (1) Neʼe felogoi feafeaʼi ia Sehova mo te hahaʼi? (2) Kotea ʼae ka tou vakaʼi ʼi te alatike ʼaeni?

ʼE FIA felogoi ia Sehova mo tatou. ʼI te ʼu temi muʼa, neʼe ina fakaʼaogaʼi te ʼu polofeta, te kau ʼaselo pea mo tona ʼAlo, ia Sesu Kilisito moʼo fakaha mai ʼana manatu. (Amo. 3:7; Kal. 3:19; Fkha. 1:1) Ia ʼaho nei, ʼe felogoi mo tatou ʼaki tana Folafola te Tohi-Tapu ʼaia neʼe ina foaki mai ke feala ai hatatou iloʼi ia tana manatu pea ke tou mahino ai pe ʼe feafeaʼi tona fakahoko.

² ʼI te nofo ʼa Sesu ʼi te kele, neʼe tuʼa tolu te palalau ʼa Sehova mai te lagi. Tou vakaʼi pe kotea ʼae neʼe ui e Sehova, kotea te ako ʼe tou taʼofi mai ai, pea kotea te ʼu tapuakina ʼe feala ke tou maʼu.

3. ʼI tatatou lau ia Maleko 1:9-11, kotea neʼe ui e Sehova ʼi te papitema ʼo Sesu? Pea kotea te ʼu moʼoni maʼuhiga ʼe tou maʼu ai?

³ Ia Maleko 1:9-11 ʼe fakamatala ai te ʼuluaki palalau ʼa Sehova mai te lagi. (Lau.) ʼE palalau fenei: “Ko koe toku ʼAlo, toku ʼofaina, ʼae ʼe au fiafia ai.” Neʼe lagi malave ʼaupito kia Sesu ia tana logo ki te leʼo ʼo tana Tamai, ʼo fakaha ki ai tona ʼofa mo tana falala. Neʼe fakamoʼoni ʼaki te ʼu palalau ʼa Sehova ia moʼoni ʼe tolu ʼo ʼuhiga mo Sesu. ʼUluaki, ko Sesu ʼe ko tona ʼAlo. Lua, ʼe ʼofa Sehova ʼi tona ʼAlo. Pea tolu, ko Sehova ʼe fiafia ki tona ʼAlo. Tou vakaʼi fakalelei ia te ʼu moʼoni takitahi ʼaia.

4. ʼI tona papitema, kotea te felogoi foʼou ʼae neʼe maʼu e Sesu mo te ʼAtua?

⁴ “Ko koe toku ʼAlo.” ʼAki te ʼu kupu ʼaia, neʼe fakaha ai e Sehova ko tona ʼAlo ʼofaina ia Sesu pea kua maʼu e Sesu ia he felogoi  foʼou mo tana Tamai. ʼI te kei nofo ʼa Sesu ʼi te lagi, neʼe ko te foha fakalaumalie ia ʼo te ʼAtua. Kae lolotoga tona papitema, neʼe fakanofo ia e te laumalie maʼoniʼoni. ʼI te temi ʼaia, neʼe fakaha ai e te ʼAtua ko Sesu ko Tona ʼAlo fakanofo pea neʼe kua ina maʼu te ʼamanaki ʼae ke toe liliu ki te lagi ʼo Hau pea mo Pelepitelo Lahi he neʼe filifili tonu e te ʼAtua. (Luka 1:31-33; Hep. 1:8, 9; 2:17) Ko te tupuʼaga la ʼaia, ʼo te ui e tana Tamai lolotoga tona papitema: “Ko koe toku ʼAlo.”—Luka 3:22.

5. ʼE feafeaʼi hatatou faʼifaʼitakiʼi ia Sehova?

⁵ “Ko koe . . . toku ʼofaina.” Ko te fakaha ʼae e Sehova ia tona ʼofa pea mo tana leleiʼia ia Sesu, ʼe ko he faigamalie kia tatou ke tou toʼo tanā faʼifaʼitaki ʼo fakalotomalohiʼi ai niʼihi. (Soa. 5:20) Ka ui mai e he tahi ʼe ʼofa ia tatou mo ina leleiʼia ʼatatou gaue, pea ʼe tou fiafia ai. ʼO feia aipe mo ʼotatou tehina mo tuagaʼane ʼo te kokelekasio mo ʼotatou famili ʼae ʼe tou ʼoʼofa ai, ʼe ʼaoga ke tou fakaha kia natou te ʼofa mo te fakalotomalohi. Ka tou fakamalo ki ʼotatou tehina mo tuagaʼane, ʼe tuputupu ai tanatou tui pea ʼe ko he tokoni ke natou tauhi agatonu ai kia Sehova. ʼE tonu ki te ʼu matuʼā ke natou fakalotomalohiʼi ʼanatou fanau. Moka fakamalo te ʼu matuʼā ki ʼanatou fanau he ʼe natou fakamalotoloto pea mo ʼoʼofa ia natou, ʼe tokoni te ʼu matuʼā ke fiafia ai ʼanatou fanau.

6. He koʼe ʼe tonu ke tou falala kia Sesu Kilisito?

⁶ “ ʼE au fiafia ai.” ʼAki te ʼu palalau ʼaia, neʼe fakaha ai e Sehova tana tui ʼe fakahoko agatonu anai e Sesu ia tona finegalo. Pea neʼe falala ia Sehova ki tona ʼAlo, ko te tupuʼaga la ʼaia, ʼe tonu ai mo tatou ke tou falala ʼe fakahoko agatonu anai e Sesu te ʼu fakapapau fuli ʼa Sehova. (2 Ko. 1:20) Ka tou sisio ki te  faʼifaʼitaki ʼa Sesu pea ʼe uga ai tatou ke tou haga ako ke tou iloʼi ia ia pea ke tou mulimuli ki ai. ʼE falala ia Sehova ʼe hoko atu anai e ʼana kaugana ia te ako ke natou mahino ʼo ʼuhiga mo tona ʼAlo.—1 Pet. 2:21.

7. ʼO mulimuli kia Mateo 17:1-5, ko te temi fea ʼae neʼe palalau ai ia Sehova mai te lagi? Pea kotea ʼae neʼe ina ui?

⁷ Lau ia Mateo 17:1-5. Ko te tuʼa lua leva ʼaeni ʼo te palalau ʼa Sehova mai te lagi, ʼi te temi ʼae neʼe fetogi ai te fofoga ʼo Sesu. Neʼe fakaafe e Sesu ia Petelo, Sakopo mo Soane ke natou hake ki te moʼuga. ʼI ai, neʼe natou sisio ki he aluʼaga maʼuhiga. Ko te fofoga ʼo Sesu neʼe gigila ʼo feia mo ʼona mutuʼi meʼa neʼe toe gigila. Pea neʼe ʼi ai te foʼi toko lua ʼe nā fakata ia Moisese mo Elia, neʼe nā kamata faipalalau mo Sesu ʼo ʼuhiga mo tona mate pea mo tona fakatuʼuake ʼi te ka haʼu. Logo la tanatou kua “mate moe” kae neʼe natou ʼaʼala lelei ʼi tanatou sisio ki te meʼa ʼae neʼe ha. (Luka 9:29-32) Pea neʼe ʼi ai he ʼao gigila neʼe ina ʼuʼufi ia natou pea neʼe natou logo ki he leʼo neʼe haʼu mai te ʼao. ʼE ko te leʼo ʼo te ʼAtua. Ohage pe ko te temi ʼae neʼe papitema ai ia Sesu, ʼi te ui ʼae e Sehova: “Ko toku ʼAlo ʼaeni, toku ʼofaina, ʼae ʼe au fiafia ai,” neʼe fakaha ai e Sehova ʼe ina tali tona ʼAlo pea mo ʼofa ai. Pea neʼe toe ui e Sehova: “Kotou fakalogo kia te ia.”

8. Neʼe malave feafeaʼi kia Sesu mo te ʼu tisipulo te meʼa ʼae neʼe ha?

⁸ ʼAki te meʼa ʼae neʼe ha kia natou, neʼe feala ai ke natou sisio ki te kololia pea mo te malohi ʼae ka maʼu e Sesu moka Hau anai ʼi te Puleʼaga ʼo te ʼAtua. ʼE mahino papau ia, neʼe maʼu e Sesu ia he lotomalohi pea mo he malohi ʼo ʼuhiga mo te ʼu mamahi fakamataku ʼae ka hoko ki ai pea mo tona mate. Neʼe toe fakamalohiʼi ai te tui ʼa te ʼu tisipulo ʼaki te aluʼaga ʼae neʼe natou sisio ki ai pea ko he teuteuʼi ʼaia ʼo natou ki te ʼu ʼahiʼahi ʼae ka hoko anai pea mo te ʼu taʼu ʼae ka kinakina ai anai te gaue. ʼOsi taʼu ʼe 30 ki ai, ko te apositolo ko Petelo neʼe ina fakamatala te meʼa ʼae neʼe ha ʼo ʼuhiga mo te fetogi ʼo te fofoga ʼo Sesu ʼo iloga ai tana kei manatuʼi lelei te meʼa ʼae neʼe ha ki ai.—2 Pet. 1:16-18.

9. Kotea te ʼu tokoni maʼuhiga ʼae neʼe foaki e Sesu ki ʼana tisipulo?

⁹ “Kotou fakalogo kia te ia.” Neʼe fakaha lelei e Sehova ia tona loto ʼae ke tou fagono lelei ki tona ʼAlo pea ke tou fakalogo ki ai. Kotea ʼae neʼe ui e Sesu ʼi tana nofo ʼi te kele? Neʼe lahi te ʼu faʼahi neʼe palalau ki ai. Ohage la, neʼe akoʼi e Sesu ʼana tisipulo pe ʼe feafeaʼi te fakamafola ʼo te logo lelei ʼaki te ʼofa. Pea neʼe ina fakamanatuʼi age ʼo liuliuga ke natou nonofo tokakaga. (Mat. 24:42; 28:19, 20) Neʼe ina toe fakalotomalohiʼi natou ke natou gaue kinakina pea mo hoko atu. (Luka 13:24) Neʼe toe fakamanatuʼi age e Sesu ia te maʼuhiga ʼae ke natou feʼofaʼofani, ke natou logo tahi pea ke natou fakalogo ki ʼana fakatotonu. (Soa. 15:10, 12, 13) Neʼe foaki e Sesu ia te ʼu tokoni ʼaoga mo maʼuhiga ki ʼana tisipulo. Ko te ʼu tokoni ʼaia, ʼe kei ʼaoga tafito pe kia tatou ia ʼaho nei.

10-11. ʼE feafeaʼi hatatou fakaha ʼe tou fakalogo kia Sesu?

¹⁰ Neʼe ui fenei e Sesu: “Ko ʼae ʼe kau ki te moʼoni ʼe fakalogo ia ki toku leʼo.” (Soa. 18:37) ʼE tou fakaha anai ʼe tou fakalogo ki tona leʼo mo kapau ʼe tou “haga fekatakiʼaki, pea mo fefakamolemoleʼaki ʼaki he lotolelei.” (Kol. 3:13; Luka 17:3, 4) Tatau aipe pe ʼe ‘faigamalie peʼe faigataʼa,’ kae kapau ʼe tou faʼafai ʼi te fakamafola ʼo te logo lelei, ʼe tou fakaha ai ʼe tou fakalogo ki tona leʼo.—2 Tim. 4:2.

¹¹ Neʼe ui e Sesu: “ ʼE fakalogo ʼaku ovi ki  toku leʼo.” (Soa. 10:27) ʼE mole natou tokagaʼi ia te ʼu “tuʼania ʼo te maʼuli.” (Luka 21:34) Tokolahi ʼi ʼotatou tehina ʼe natou felaveʼi mo te ʼu faigataʼaʼia ʼe kovi age ohage la ko tanatou tau mo te fakafeagai, te masisiva pea mo te ʼu tuʼutamaki fakanatula. Logo la te ʼu aluʼaga ʼaia, kae ʼe natou nonofo agatonu aipe kia Sehova. Neʼe fai age e Sesu ia te fakapapau ʼaeni: “Ko ʼae ʼe ina tali ʼaku fakatotonu pea mo mulimuli ki ai, ʼe ko ia ʼaia ʼe ʼofa ia te au. Pea ko ʼae ʼe ʼofa ia te au, ʼe ʼofainaʼi anai e taku Tamai.”—Soa. 14:21.

12. ʼE feafeaʼi hatatou fakaha ʼe tou fakalogo kia Sesu?

¹² Koʼeni te faʼahiga fai ʼae ʼe tou fakaha ai tatatou fakalogo kia Sesu: ʼe tonu ke tou gaue fakatahi mo natou ʼae neʼe ina hinoʼi moʼo takitaki ʼo tatou. (Hep. 13:7, 17) ʼI te ʼu taʼu kua hili, neʼe lahi te ʼu fetogi neʼe fai e te kautahi ʼa Sehova. Ohage la, ko he ʼu meʼa gaue foʼou, te ʼu faʼahiga fai ʼo te fakamafola mo te fetogi ʼo te ʼu fono pea mo te faʼahiga faʼu ʼo ʼotatou Fale Fono. ʼE tou leleiʼia totatou faʼahiga takitaki pea mo te tokaga ʼae ʼe fakaha mai ʼaki te ʼofa. ʼE tou tui papau, ʼe tapuakiʼi anai e Sehova ʼatatou faiga ʼae ke tou mulimuli ki te ʼu fakatuʼutuʼu ʼo te kautahi.

13. Kotea te ʼu lelei ʼe tou maʼu moka ʼe tou fakalogo kia Sesu?

¹³ Kapau ʼe tou fakalogo ki te ʼu ako ʼae neʼe tuku mai e Sesu pea ʼe tou maʼu anai he ʼu tapuakina. Neʼe fakapapauʼi e Sesu ki ʼana tisipulo ʼe fakafimalieʼi anai natou e ʼana akonaki, ʼaki tana ui fenei: “ ʼE kotou maʼu anai he fakafimalie. Koteʼuhi ʼe malū taku ʼakau ʼamo pea ʼe maʼamaʼa taku kavega.” (Mat. 11:28-30) ʼE fakafimalieʼi tatou e te Folafola ʼa te ʼAtua ʼae ʼe kau ki ai te ʼu Evaselio ʼe fa ʼae ʼe ina fakamatala ai te maʼuli pea mo te faifakamafola ʼa Sesu. ʼE ina fakamalohiʼi totatou maʼuli fakalaumalie, pea ʼe tou liliu ai ʼo fakapotopoto. (Pes. 19:8; 23:3) Neʼe tala fenei e Sesu: “Manuʼia ia natou ʼae ʼe natou logo ki te folafola ʼa te ʼAtua pea mo natou taupau!”—Luka 11:28.

14-15. (1) ʼO mulimuli kia Soane 12:27, 28, ko ʼanafea ʼae neʼe palalau ai Sehova mai te lagi ko te tuʼa tolu ʼaia? (2) He koʼe neʼe fakafimalie pea mo fakalotomalohi te ʼu palalau ʼa Sehova kia Sesu?

¹⁴ Lau ia Soane 12:27, 28. ʼE toe fakamatala ʼi te Evaselio ʼo Soane ia te tolu aluʼaga ʼae neʼe toe palalau ai Sehova mai te lagi. ʼI ni kiʼi ʼaho ʼi muʼa ʼo tana mate, neʼe alu ia Sesu ki Selusalemi moʼo fakahoko ai tana Pasikate  fakaʼosi. Neʼe ina ui ai: “ ʼE au lotohoha.” Pea neʼe faikole leva ʼo ui: “Tamai, fakakololiaʼi tou huafa.” Neʼe ui fenei leva e tana Tamai mai te lagi: “Neʼe au fakakololiaʼi pea ʼe au toe fakakololiaʼi anai.”

¹⁵ Neʼe tuʼania ia Sesu koteʼuhi neʼe tonu ke nofo agatonu kia Sehova. Pea neʼe ko he maʼua mamafa ia. Neʼe iloʼi e Sesu ʼe huipiʼi pea ʼe tau anai mo he mate fakamataku. (Mat. 26:38) Kae neʼe fia fakakololiaʼi tafito e Sesu te huafa ʼo tana Tamai. Neʼe tukugakoviʼi Sesu pea neʼe ina tuʼania naʼa ʼaki tana mate ʼe ʼulihi anai te huafa ʼo tana Tamai ʼi he faʼahiga aluʼaga pe. Kae ʼaki te ʼu palalau ʼa Sehova, neʼe ina fakafimalieʼi ai Sesu. Neʼe tui papau ia, ʼe fakakololiaʼi anai te huafa ʼo Sehova. Neʼe malave ʼaupito te ʼu palalau ʼo tana Tamai ʼo ina fakafimalieʼi Sesu pea mo fakalotomalohiʼi ʼo ʼuhiga mo te ʼu aluʼaga ʼae ka hoko. Logo la, neʼe ko Sesu tokotahi ʼae neʼe mahino ki te ʼu palalau ʼo tana Tamai, kae neʼe tokaga ia Sehova ke tohi ʼAna palalau maʼa tatou fuli.—Soa. 12:29, 30.

16. He koʼe ʼe tonu ke tou tuʼania naʼa tou ʼulihi te huafa ʼo Sehova?

¹⁶ Ohage pe ko Sesu, ʼe tonu ke tou tuʼania naʼa tou ʼulihi te huafa ʼo Sehova. ʼE lagi feala pe ke tou hage ko Sesu, ʼe lagi fai mai he ʼu aga heʼe faitotonu peʼe lagi tou tuʼania ʼo ʼuhiga mo te ʼu loi ʼe fai e natou ʼae ʼe fakafeagai. ʼE feala pe ke tou manatuʼi te ʼu nunuʼa ʼae ʼe feala ke hoko ki te huafa ʼo Sehova mo tana kautahi  ʼuhi ko te ʼu loi ʼaia. ʼI te ʼu lakaga ʼaia, ʼe feala ki te Folafola ʼa Sehova ke ina fakafimalieʼi tatou. ʼE mole tonu ke tou hoha. Kae ʼe tou tui papau ko te “tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai [ʼotatou] loto pea mo [ʼotatou] fealagia fakakaukau ʼaki ia Kilisito Sesu.” (Flp. 4:6, 7) ʼE tou tui papau, ʼe fakakololiaʼi anai e Sehova tona huafa. Pea ʼaki tona Puleʼaga, ʼe ina pulihi anai te ʼu malaʼia fuli ʼae neʼe tau mo ʼana kaugana agatonu ʼuhi ko Satana mo tona malama.—Pes. 94:22, 23; Esa. 65:17.

17. Ia Esaia 30:21, ’e palalau feafeaʼi mai ia Sehova kia tatou ia ʼaho nei?

¹⁷ ’E toe palalau mai pe Sehova kia tatou ia ʼaho nei. (Lau ia Esaia 30:21.) ʼE moʼoni ʼe mole palalau mai anai ia te ʼAtua mai te lagi. Kae neʼe ina foaki mai tana Folafola te Tohi-Tapu, ke tou maʼu ai ʼana fakatuʼutuʼu. Pea tahi, ʼe fakaʼaogaʼi e Sehova tona laumalie maʼoniʼoni moʼo ʼekenaki “te tagata tauhi ʼapi agatonu” ke ina foaki ki Tana hahaʼi tanatou meʼa kai ʼi tona temi totonu. (Luka 12:42) Koia ʼe lahi te meʼa kai fakalaumalie ʼe tou maʼu ʼi te ʼu tohi, peʼe ko te ʼu alatike ʼi te Neti, peʼe ko te ʼu ʼata viteo, peʼe ko te ʼu fakamatala neʼe puke.

18. ʼE tou lava maʼu feafeaʼi te tui pea mo te lototoʼa ʼaki te Folafola ʼa Sehova?

¹⁸ Tou manatuʼi te ʼu palalau neʼe fai e Sehova ʼi te temi ʼae neʼe kei nofo ai tona ʼAlo ʼi te kele. Ka tou lau te ʼu palalau ʼa Sehova ʼe tohi ʼi te Tohi-Tapu, ʼe tou tui papau ai ʼe puleʼi pe e Sehova ia meʼa fuli pea ʼe ina pulihi anai ia te ʼu mamahi fuli neʼe fakatupu e Satana pea mo tana malama agakovi ʼaeni. Tou fakatotonu malohi ke tou fakalogo lelei ki te leʼo ʼo Sehova. Kapau ʼe tou fai feia, ʼe tou lava katakiʼi anai ia te ʼu faʼahiga fihifihia fuli pe ʼe tou tau mo ia ʼi te temi nei mo ʼae ka hoko mai. ʼE fakamanatuʼi fenei mai ʼi te Tohi-Tapu: “ ʼE ʼaoga kia koutou te faʼa kataki, ke feala ai ʼi takotou ʼosi fai te finegalo ʼo te ʼAtua, hakotou maʼu te meʼa ʼae neʼe ina fakapapauʼi atu.”—Hep. 10:36.