1. Kotea ʼae neʼe hoko ki te kau Sutea ʼae neʼe ʼaunofo ʼi Papiloni?

 NEʼE fiafia moʼoni ia te kau Sutea. Neʼe ‘fafagu e Sehova ʼAtua ia te laumalie ʼo Siliusi, Hau ʼo Pelesia’ ke ina fakaʼateainaʼi te kau Iselaele, ʼae neʼe kua fualoa tanatou ʼaunofo ʼi Papiloni. Neʼe fakaha e te hau ki te kau Sutea ke natou toe liliu ki tonatou fenua pea ke natou toe ‘fakatuʼu te fale ʼo Sehova, te ʼAtua ʼo Iselaele.’ (Eset. 1:1, 3) ʼI fakatotonu fakafiafia leva. Ko tona fakaʼuhiga ʼe toe fakatuʼu anai ia te tauhi ki te ʼAtua moʼoni ʼi te fenua ʼae neʼe ina foaki ki tana hahaʼi.

2. Kotea ʼae neʼe ʼuluaki fai e te kau Sutea ʼi tanatou toe liliu ki Selusalemi?

² ʼI te taʼu 537 I.M.T.S., * neʼe tau mai ia natou ʼae neʼe ʼuluaki liliu mai ki Selusalemi, ʼae neʼe ko te kolo muʼa ʼo te puleʼaga ʼo te potu saute ʼo Suta. Neʼe toe kamata laga atu aipe e te kau Sutea ia te fale lotu, ʼae neʼe kua fakatuʼu ʼona fakatafito ʼi te taʼu 536 I.M.T.S.

3. Ko ai ʼae neʼe fakafeagai ki te kau Sutea?

³ ʼI te temi ʼae neʼe natou kamata laga ai te fale lotu, neʼe felaveʼi te kau Sutea mo he fakafeagai malohi. ‘Neʼe fakalotovaivaiʼi ai leva e te hahai ʼo te fenua te hahaʼi ʼo Suta, neʼe natou fakamatakuʼi leva natou ke taʼofi te gaue ʼo te fale.’ (Eset. 4:4) Neʼe ko he aluʼaga faigataʼa ki te kau Sutea, pea neʼe ʼaʼasili age tona kovi. ʼI te taʼu 522 I.M.T.S., neʼe fakanofo leva ia te hau foʼou ʼo Pelesia ko Aletasese. * ʼAki te fetogi ʼaia, neʼe toʼo leva e te kau fakafeagai ia te faigamalie ʼae ke natou fakagata ʼosi ia te gaue laga fale ʼaki tanatou “fai ni fakakaukau kovi ki te lao.” (Pes. 94:20) Neʼe natou fakaha ai ki te Hau ko Aletasese ʼe fia  talagataʼa te kau Sutea kia te ia. (Eset. 4:11-16) Neʼe tui te hau ki ʼanatou loi pea neʼe ina fakatotonu ke taʼofi te laga ʼo te fale tapu. (Eset. 4:17-23) Ko te tupuʼaga la ʼaia ʼo te taʼofi ʼo te gaue ʼa te kau laga fale lotu ʼae neʼe fiafia ki muʼa atu.​—Eset. 4:24.

4. Ka tou lau ia Esaia 55:11, kotea ʼae neʼe fai e Sehova ʼi te temi ʼae neʼe tapuʼi ai e te kau fakafeagai ia te laga ʼo te fale lotu?

⁴ Neʼe lotomalohi ia te hahaʼi heʼe tui ʼo te fenua pea mo ʼihi kau taki ʼo te puleʼaga ʼo Pelesia ke natou fakagata ia te laga ʼo te fale lotu. Kae neʼe kua fakatotonu e Sehova ke hoko atu te ʼu gaue pea ʼe hoko tuʼumaʼu ʼana fakatuʼutuʼu. (Lau ia Esaia 55:11.) Neʼe ina fakaʼaogaʼi leva te polofeta lototoʼa ko Sakalia pea ina fakasio ki ai he ʼu aluʼaga maʼuhiga ʼe valu neʼe tonu ke ina vaevae ki te kau Sutea moʼo fakalotomalohiʼi ʼo natou. ʼAki te ʼu aluʼaga ʼaia, neʼe natou mahino ai leva ʼe mole tonu ke natou tuʼania ʼonatou fili pea neʼe natou hoko atu ai te gaue ʼa Sehova. ʼI te nima aluʼaga ʼae neʼe sio ki ai ia Sakalia, neʼe sio ai ki te tuʼulaga malama pea mo te ʼu fuʼu oliveto ʼe lua.

5. Kotea ʼae ka tou vakaʼi anai ʼi te alatike ʼaeni?

⁵ Ko tatou fuli ʼe tou lotovaivai ʼi ʼihi temi. ʼE feala ke tou maʼu vaega mai te fakalotomalohi ʼae neʼe foaki e Sehova ki te kau Iselaele ʼaki te aluʼaga ʼae neʼe sio ki ai ia Sakalia. Ka tou mahino ki te aluʼaga ʼaia, ʼe feala ke tou tauhi agatonu kia Sehova tatau aipe pe ʼe tou felaveʼi mo te fakafeagai, mo he ʼu fetogi foʼou pea moka foaki mai he ʼu tuʼutuʼuni ʼe mole tou mahino ki ai.

6. Neʼe fakalotomalohi feafeaʼi ki te kau Sutea ia te aluʼaga ʼae neʼe sio ki ai ia Sakalia ʼo ʼuhiga mo te tuʼulaga malama pea mo te ʼu fuʼu oliveto ʼe lua ia Sakalia 4:1-3? (Pāki ʼo te takafi.)

⁶ Lau ia Sakalia 4:1-3. Ko te sio ki te tuʼulaga malama pea mo te ʼu fuʼu oliveto ʼe lua, neʼe ina foaki ki te kau Sutea ia te lototoʼa ke natou tauʼi te fakafeagai. ʼO feafeaʼi? Neʼe kua kotou tokagaʼi koa la te mu fualoa ʼo te malama ʼi he tuʼulaga malama? Neʼe maʼu mai te lolo mai te ʼu fuʼu oliveto ʼe lua ʼi he tanakiʼaga meʼa ʼe hage ko he foʼi ipu. Pea neʼe ʼai te lolo ʼaia ki te ʼu malama ʼe fitu ʼo te tuʼulaga malama. Neʼe feala ʼaki te lolo ʼaia ke mu fualoa ia te ʼu malama ʼaia. Neʼe fakalavelave fenei e Sakalia: “Kotea ʼae ʼe fakata e te ʼu meʼa ʼaia?” Neʼe tali fenei age te ʼaselo ʼaki he logo mai ia Sehova: “ ‘ ʼE mole hoko anai te ʼu meʼa ʼaia ʼaki he ʼu malohi fakasolia peʼe ʼaki he malohi fakatagata, kae ʼaki toku laumalie,’ ko te ui ʼaia ʼa Sehova ʼo te ʼatu kautau.” (Sakl. 4:4, 6) Ko te lolo ʼae ʼe maʼu mai te ʼu fuʼu oliveto ʼe ina fakata ia te malohi ʼo te laumalie maʼoniʼoni ʼo Sehova, ʼae ʼe mole feala ke puli ʼi he temi. Neʼe mole feala ki te malohi fakasolia ʼo te puleʼaga Pelesia ke laka age ʼi te malohi ʼo te laumalie ʼo te ʼAtua. ʼAki te tokoni ʼa Sehova, neʼe feala ai ki te kau laga fale lotu ke natou tauʼi he fakafeagai pe pea mo fakaʼosi te gaue. ʼI logo fakalotomalohi leva. Neʼe kei toe pe ke falala ia te kau Sutea kia Sehova pea mo natou hoko atu te gaue. Pea neʼe natou fai ia te faʼahi ʼaia, logo aipe la tona kei tapuʼi.

7. Ko te fetogi fea ʼae neʼe maʼu ai e te kau laga fale lotu ia he faʼahiga fimalie?

⁷ Neʼe hoko he fetogi ʼo maʼu ai e te kau laga fale lotu ia he faʼahiga fimalie. Kotea te fetogi ʼaia? ʼI te taʼu 520 I.M.T.S., neʼe nofo hau ai ʼi Pelesia te hau foʼou ko Taliusi 1. ʼI tona lua taʼu ʼi te tuʼulaga hau, neʼe mahino ai ko te tapu ʼae neʼe fai ʼo ʼuhiga mo te toe laga ʼo te fale lotu neʼe mole alu tahi mo te lao. Koia neʼe folafola ai te hau ke fakaʼosi ia te gaue. (Eset. 6:1-3) ʼAki te fakatotonu foʼou ʼaia, neʼe punamaʼuli ai te tokolahi kae mole gata ai. Neʼe fakatotonu e te hau ki te hahaʼi ʼo te ʼu tafaʼaki ke natou fakagata ia tanatou fakalelu ki te fai ʼo te gaue kae ke natou tanaki he falā pea mo he ʼu meʼa gaue ʼo tokoni ki te gaue.  (Eset. 6:7-12) Koia, neʼe fakaʼosi ai e te kau Sutea ia te laga ʼo te fale lotu ʼi he ʼu taʼu ʼe fa ki muli age, ʼi te taʼu 515 I.M.T.S.​—Eset. 6:15.

8. He koʼe ʼe feala ke kotou lototoʼa moka kotou felaveʼi mo he fakafeagai?

⁸ Ia ʼaho nei, tokolahi te kau atolasio ʼa Sehova ʼe natou felaveʼi mo te ʼu fakafeagai. Ohage la, ko ʼihi ʼe natou maʼuʼuli ʼi he ʼu fenua ʼe mole fakahoko faʼifaʼitaliha ai tatatou gaue. ʼI te ʼu fenua ʼaia, ʼe feala ke puke te ʼu tehina ʼo ʼave “kia muʼa ʼo te ʼu kovana mo te ʼu hau.” (Mat. 10:17, 18) ʼI ʼihi temi, ko te fetogi ʼo te taki fakapuleʼaga ʼe feala ke natou fimalie ai. Peʼe fakagafua e he tuʼi fakamau ʼe mole fakapalatahi ia tatatou gaue. Ko ʼihi kau Fakamoʼoni, ʼe natou felaveʼi mo ʼihi atu faʼahiga fakafeagai. ʼE lagi natou maʼuʼuli ʼi he fenua ʼe faigafua ai tanatou atolasio kia Sehova, kae ʼe lagi natou felaveʼi mo te fakafeagai ʼo te famili ʼae ʼe natou loto ke fakagata tanatou tauhi ki te ʼAtua. ʼE lahi te ʼu aluʼaga, ka tokagaʼi e natou ʼae ʼe fakafeagai ʼe to noa tanatou faiga ʼae ke natou fakalotovaivaiʼi he tahi ʼo tonatou famili ʼe kau ki te kau Fakamoʼoni, ʼe natou taʼofi ia te faʼahi ʼaia. (Mat. 10:32-36) ʼI ʼihi aluʼaga, ko natou ʼae neʼe fakafeagai malohi ki muʼa atu kua natou liliu ʼi te temi nei ko he kau Fakamoʼoni faʼafai. Koia, ka kotou tauʼi he fakafeagai, ʼaua naʼa kotou lotovaivai. Kotou lotomalohi. ʼE tokoni atu anai ia Sehova pea mo tona laumalie maʼoniʼoni, ʼe mole tonu ke kotou tuʼania ki he meʼa.

9. He koʼe neʼe lotomamahi ʼihi kau Sutea ʼi te fakatuʼu ʼo te ʼu fakatafito ʼo te fale lotu foʼou?

⁹ ʼI te temi ʼae neʼe fakatuʼu ai te ʼu fakatafito ʼo te fale lotu foʼou, neʼe fetagihi ʼihi kau matuʼa Sutea. (Eset. 3:12) Koteʼuhi neʼe natou sisio mata ʼi te fale lotu matalelei ʼae neʼe laga e Salomone pea neʼe natou manatu ko te fale lotu foʼou ʼe ‘mole tatau’ ia mo te ʼuluaki. (Ake. 2:2, 3) Neʼe faigataʼa kia natou tanatou tali ia te kehekehe ʼo te fale lotu ʼafeā mo ʼae ʼe foʼou. Neʼe tokoni ia te aluʼaga ʼae neʼe sio ki ai ia Sakalia ke natou tauʼi te lotomamahi ʼaia. ʼO feafeaʼi?

10. Neʼe tokoni feafeaʼi te ʼu palalau ʼa te ʼaselo ia Sakalia 4:8-10 ki te kau Sutea ke natou tauʼi tonatou lotomamahi?

¹⁰ Lau ia Sakalia 4:8-10. Kotea ʼae neʼe fia ui e te ʼaselo ʼi tana ui age ki te kau Sutea ‘ ʼe natou fakafiafia anai pea ʼe natou sisio anai ki te filo ʼae ʼe tautau ai he foʼi pulu ʼi te nima [ʼo te kovana Sutea] ʼo Solopapele’? Ko te filo ʼae ʼe tautau ai he foʼi pulu, ʼe ko he meʼa gaue ʼe fakaʼaogaʼi moʼo vakaʼi pe ʼe tuʼu tonu he meʼa peʼe ke matatau. Neʼe fakaha age e te ʼaselo ki te hahaʼi ʼa te ʼAtua tatau aipe pe ʼe  mole matalelei ia te fale lotu ki ʼihi, kae ʼe fakaʼosi anai pea ʼe alu tahi anai mo te loto ʼo Sehova. ʼE leleiʼia anai e Sehova. Ko te faʼahi ʼae ʼe maʼuhiga kia Sehova ke alu tahi ia te tauhi ʼae ʼe fai ʼi te fale lotu foʼou ʼaia mo ʼana fakamaʼua. Kapau ʼe fai e te kau Sutea ia he tauhi ʼe tali leleiʼi e Sehova pea mo natou maʼu tona ʼofa, ʼe natou toe maʼu anai mo natou ia te fiafia.

11. Kotea te ʼu faigataʼaʼia ʼe tonu ke tauʼi e ʼihi kau atolasio ʼa Sehova ʼi te temi nei?

¹¹ ʼE ʼaoga kia tatou fuli he lotomalohi moka hoko he ʼu fetogi. Neʼe kole ki ʼihi kua fualoa tanatou pionie makehe ke natou fetogi selevisi. Neʼe fakafisi ʼihi ki he pilivilesio neʼe natou leleiʼia ʼuhi kua natou matutuʼa. ʼE mahino, ʼe tou lotomamahi moka hoko he ʼu fetogi feia. ʼI te kamata, ʼe lagi mole tou mahino katoa ki te tonu ʼaia peʼe mole tou manatu tahi mo ia. ʼE lagi tou manatuʼi te ʼu meʼa ʼae neʼe tou fai ki muʼa atu. Pea ʼe feala ke tou lotovaivai ʼo tou manatu ʼe mole anai hotatou ʼaoga kia Sehova ʼi te gaue foʼou ʼae neʼe foaki mai. (Taag. 24:10) ʼE tokoni feafeaʼi mai te aluʼaga ʼae neʼe sio ki ai ia Sakalia ke tou haga faʼafai maʼa totatou ʼAtua?

12. ʼE lava tokoni feafeaʼi mai ia te aluʼaga ʼae neʼe sio ki ai ia Sakalia ke tou tauʼi te lotomamahi moka hoko he ʼu fetogi foʼou?

¹² ʼE feala ke hoko atu tatatou faʼafai ʼi te gaue foʼou ʼaia mo kapau ʼe tou maʼu ia te faʼahiga manatu ʼa Sehova. ʼE ina lolotoga fakahoko nei he ʼu gaue lalahi, pea ʼe tou maʼu ia te pilivilesio ʼae ke tou kaugā gaue mo ia. ʼE feala ke fetogi te ʼu gaue ʼae ʼe foaki mai, kae ʼe mole fetogi te ʼofa ʼo Sehova kia tatou. (1 Ko. 3:9) Koia, kapau ʼe hoko he ʼu fetogi foʼou ʼi te kautahi ʼo kotou kau ai, ʼaua naʼa kotou faiga ke kotou kumi pe koʼe ʼe hoko te ʼu fetogi ʼaia. Kotou kumikumi ʼi te faikole pe kotea ʼe lelei ʼi te ʼu fetogi foʼou ʼaia kae ke mole kotou manatu pe ki te ʼu temi ki muʼa atu. Kotou fakakaukauʼi te ʼu gaue fuli ʼe feala ke kotou fai kae ke mole kotou manatu pe ki te ʼu meʼa ʼae ʼe mole kei kotou fai. (Ekl. 7:10) ʼE fakaha mai ʼi te aluʼaga ʼae neʼe sio ki ai ia Sakalia ia te maʼuhiga ʼae ke tou maʼu he manatu ʼe lelei. Kapau ʼe tou fai feia, ʼe tou taupau anai totatou fiafia pea mo tou agatonu, tatau aipe pe ʼe hoko he ʼu fetogi foʼou.

13. He koʼe neʼe manatu ʼihi kau Iselaele neʼe mole fakapotopoto ia te fakatuʼutuʼu ʼae ke toe laga ia te fale lotu?

¹³ Neʼe tapuʼi ia te toe laga ʼo te fale lotu. Kae ko te ʼu tagata ʼae neʼe hinoʼi ke natou takitaki ia te gaue, neʼe ko te Pelepitelo Lahi ko Sesua pea mo te Kovana ko Solopapele,  pea neʼe nā ‘kamata faʼu te fale ʼo te ʼAtua.’ (Eset. 5:1, 2) Neʼe manatu ʼihi kau Sutea ʼe mole fakapotopoto ia te tonu ʼaia. Neʼe mole feala ke ugia ia te toe laga ʼo te fale lotu ki ʼonatou fili, ʼae ka natou fakaʼaogaʼi ia meʼa fuli moʼo fakatupu he ʼu fihifihia. Neʼe ʼaoga ke fakalotomalohiʼi ia te ʼu tagata ʼae neʼe nā taki ia te gaue ʼaia, ia Sesua mo Solopapele ʼe tokoni age anai ia Sehova. Pea neʼe fakalotomalohiʼi naua, ʼo feafeaʼi?

14. Ka tou lau ia Sakalia 4:12, 14, kotea te fakalotomalohi ʼae neʼe maʼu e te Pelepitelo Lahi ko Sesua pea mo te Kovana ko Solopapele?

¹⁴ Lau ia Sakalia 4:12, 14. ʼI te koga ʼaia neʼe sio ki ai ia Sakalia, neʼe fakaha e te ʼaselo ki te polofeta agatonu ʼa te ʼAtua, ko te ʼu fuʼu oliveto ʼe lua ʼe fakaʼuhiga ki “te ʼu tagata ʼe lua neʼe fakanofo,” ia Sesua mo Solopapele. Ko te ʼu tagata aia ʼe toko lua “ ʼe tutuʼu ovi ki te ʼAliki ʼo te kele katoa,” ia Sehova. ʼI ʼu tuʼulaga maʼuhiga leva. Neʼe falala ia Sehova kia naua. Koia, neʼe tonu ai ke falala ʼonatou tehina Iselaele ki te ʼu tonu ʼae neʼe nā toʼo pea mo te takitaki ʼa te ʼAtua, tatau aipe pe kotea te tonu ʼae neʼe toʼo.

15. ʼE tou fakaha feafeaʼi anai ʼe tou fakaʼapaʼapa ki te takitaki ʼa Sehova ohage ko tona tuku mai ʼi tana Folafola?

¹⁵ Ko tana faʼahiga takitaki tatou ʼi te temi nei, ʼe ko te haga takitaki e Sehova ia tana hahaʼi ʼaki tana Folafola, te Tohi-Tapu. ʼI te ʼu tohi taputapu ʼaia, ʼe ina fakaha mai te faʼahiga tauhi ʼae ʼe ina leleiʼia. ʼE tou fakaha feafeaʼi anai ʼe tou fakaʼapaʼapa ki te ʼu fakatotonu ʼae ʼe tou maʼu ʼi te Folafola ʼa te ʼAtua? ʼAki tatatou lau fakalelei pea mo tou toʼo he temi ke tou mahino ki ai. Kotou fai ia te ʼu fehuʼi ʼaeni: ‘ ʼI te temi ʼae ʼe au lau ai te Tohi-Tapu peʼe ko te ʼu tohi Fakatohi-tapu, ʼe au toʼo koa he temi ke au fakakaukauʼi mo metitasioʼi? ʼE au faiga koa ke au mahino ki te fakaʼuhiga ʼo te ʼu moʼoni Fakatohi-tapu ʼae “ ʼe faigataʼa te mahino ki ai”? Peʼe au lau fakavilivili pe au?’ (2 Pet. 3:16) Kapau ʼe tou toʼo he temi ke tou fakakaukauʼi ai te ʼu meʼa ʼe akoʼi mai e Sehova, ʼe faigafua anai tatatou mulimuli ki tana takitaki pea mo tatatou fakahoko ia te gaue faifakamafola.—1 Tim. 4:15, 16.

16. ʼI te temi ʼae ʼe mole tou mahino katoa ai ki te ʼu fakatuʼutuʼu ʼae ʼe foaki mai e “te tagata faifekau agatonu mo poto,” kotea ʼae ʼe tokoni mai ke tou mulimuli ki ai?

¹⁶ Ko te tahi faʼahiga takitaki ʼo tatou, ʼe foaki mai e Sehova he ʼu tuʼutuʼuni ʼaki “te tagata faifekau agatonu mo poto.” (Mat. 24:45) ʼI ʼihi temi, ʼe foaki mai e te tagata faifekau ʼaia he ʼu tuʼutuʼuni ʼe mole tou mahino katoa ki ai. Ohage la, ʼe feala ke ina foaki mai he ʼu tuʼutuʼuni ki tatatou faʼahiga teuteu ki he tuʼutamaki fakanatula pea tou manatu ʼe  mole feala anai ke hoko ia te aluʼaga ʼaia ʼi totatou fenua. Peʼe tou manatu, ʼe fefeka fau te ʼu tuʼutuʼuni ʼe foaki mai e te tagata faifekau ʼo uhiga mo te taʼi mahaki. Kotea ʼe tonu anai ke tou fai mo kapau ʼe tou manatu ʼe mole ʼaoga te ʼu tuʼutuʼuni ʼaia? ʼE feala ke tou manatuʼi te kau Iselaele ʼae neʼe natou fakalogo ki te ʼu tokoni ʼae neʼe foaki age e Sesua mo Solopapele. ʼE feala ke tou manatu ki ʼihi atu fakamatala Fakatohi-tapu kua tou lau. ʼI ʼihi temi, neʼe maʼu e te hahaʼi ʼa te ʼAtua ia he ʼu tuʼutuʼuni, ki te sio fakatagata ʼe mole ʼaoga, kae ki muli age neʼe haofaki ai ʼonatou maʼuli.​—Tfm. 7:7; 8:10.

17. Neʼe malave feafeaʼi ki te kau Sutea ia te tuʼulaga malama pea mo te ʼu fuʼu oliveto ʼe lua ʼae neʼe sio ki ai ia Sakalia?

¹⁷ ʼI tona tuʼa nima, neʼe mole fualoa ia te meʼa ʼae neʼe sio ki ai ia Sakalia, kae neʼe maʼu e te kau Sutea ia he faʼahiga sio foʼou ki tanatou gaue pea mo tanatou tauhi. Pea ʼi tanatou mulimuli ki te meʼa ʼae neʼe sio ki ai ia Sakalia, neʼe natou logoʼi ai te tokoni pea mo te takitaki ʼofa ʼa Sehova. ʼAki te malohi ʼo tona laumalie maʼoniʼoni, neʼe tokoni ia Sehova kia natou ke hoko atu tanatou gaue pea mo natou toe maʼu ia te fiafia.​—Eset. 6:16.

18. ʼE malave feafeaʼi kia koutou ia te meʼa ʼae neʼe sio ki ai ia Sakalia?

¹⁸ Ko te meʼa ʼae neʼe sio ki ai ia Sakalia ʼo ʼuhiga mo te tuʼulaga malama pea mo te ʼu fuʼu oliveto ʼe lua, ʼe feala ke malave malohi ki totatou maʼuli. Ohage pe ko tatatou vakaʼi, ʼe feala ke ina foaki atu te malohi moʼo tauʼi ʼokotou fili, mo te fiafia moka hoko he ʼu fetogi foʼou pea mo te falala ke kotou fakalogo moka foaki atu he ʼu tuʼutuʼuni ʼe mole kotou mahino ki ai. Kotea ʼe tonu ke kotou fai moka kotou tau mo ni fihifihia? ʼUluaki, kotou sisio ki te meʼa ʼae neʼe sio ki ai Sakalia, ia te fakamoʼoni ʼae neʼe tokaga ia Sehova ki tana hahaʼi. Pea lua, kotou fakahoko te meʼa ʼae ʼe kotou sisio ki ai ʼo kotou falala kia Sehova pea mo kotou haga tauhi kia te ia mo tokotou loto katoa. (Mat. 22:37) Kapau ʼe kotou fai feia, ʼe tokoni atu anai ia Sehova ke kotou tauhi age kia te ia ʼaki te fiafia ʼo talu ai.​—Kol. 1:10, 11.