1. Kotea ʼae ʼe tou loto fuli ki ai?

 PE NEʼE hoki tou papitema age pe, peʼe kua fualoa tatatou papitema, kae ʼe tou loto fuli ke leleiʼia e Sehova totatou ʼuluagaaga. Koia ʼe tonu ai ke tou puleʼi ʼatatou manatu. He kotea tona tupuʼaga? He ʼe fakalogo ʼatatou aga mo totatou ʼuluagaaga ki tatatou faʼahiga manatu. Ka tou manatu tuʼumaʼu ki ʼotatou holi fakakakano, ʼe tou palalau anai pea mo fai ni aga ʼe kovi. (Efe. 4:17-19) Kae kapau ʼe tou manatu tuʼumaʼu ki he ʼu meʼa ʼe lelei, ʼe tou fai anai ni palalau pea mo ni aga ʼe leleiʼia e Sehova.​—Kal. 5:16.

2. Kotea te ʼu fehuʼi ʼe tou vakaʼi anai ʼi te alatike ʼaeni?

² Neʼe tou vakaʼi ʼi te alatike ʼaeni kua ʼosi atu, ʼe mole feala ke tou taʼofi te ʼu manatu ʼae ʼe mole lelei ke ulu ki totatou fakakaukau. Kae ʼe feala ke mole tou fai te ʼu aga ʼae ʼe kovi, ʼae neʼe tou manatu ki ai. Koia ʼi muʼa ʼo tatatou papitema, ʼe tonu ke tou tuku te fai te ʼu palalau mo te ʼu aga ʼae ʼe fehiʼa ki ai ia Sehova. Ko te ʼuluaki gaue ʼaia maʼuhiga ʼe tonu ke tou fai ke feala hatatou liʼaki ia te ʼuluagaaga ʼafeā. Kae kapau ʼe tou fia fakafiafiaʼi te loto katoa ʼo Sehova, ʼe tonu ke tou fakalogo ki te fakatotonu ʼaeni: “Kotou kofuʼi ia te ʼuluagaaga foʼou.” (Kol. 3:10) ʼE tou tali anai ʼi te alatike ʼaeni ki te ʼu fehuʼi ʼaeni: Kotea ia “te ʼuluagaaga foʼou”? Kotea ʼae ʼe tonu ke tou fai ke tou kofuʼi pea mo taupau ia te ʼuluagaaga foʼou?

3. Ka tou lau ia Kalate 5:22, 23, kotea ia “te ʼuluagaaga foʼou”? Pea kotea ʼae ʼe tonu ke tou fai ke tou kofuʼi ia te ʼuluagaaga foʼou ʼaia?

³ Ko he tahi ʼe ina maʼu ia “te ʼuluagaaga foʼou” ʼe ko he tahi ʼe ina faʼifaʼitakiʼi ia te faʼahiga manatu pea mo te aga ʼa  Sehova. ʼE kofuʼi e he tahi ia te ʼuluagaaga foʼou moka ina maʼu ia te fua ʼo te laumalie maʼoniʼoni ʼa te ʼAtua, ko tona fakaʼuhiga ʼe ina tuku ia te laumalie maʼoniʼoni ke gaue ʼi ʼana manatu, mo te ʼu meʼa ʼae ʼe ina logoʼi pea mo ʼana gaue. (Lau ia Kalate 5:22, 23.) Ohage la ʼe ʼofa ia Sehova pea mo Tana hahaʼi. (Mat. 22:36-39) Ko he tahi ʼe fiafia tuʼumaʼu pe ia maʼia moka tau mo ni ʼahiʼahi. (Sakp. 1:2-4) ʼE ko he tahi ʼe ina kumi tuʼumaʼu ia te tokalelei. (Mat. 5:9) ʼE ko he tahi ʼe faʼa kataki pea mo agalelei mo te hahaʼi fuli. (Kol. 3:13) ʼE ko he tahi ʼe ina fia fai tuʼumaʼu ia te lelei. (Luka 6:35) ʼE ha ʼi ʼana gaue ʼe tui ki te ʼAtua. (Sakp. 2:18) ʼE mole hoko ita moka ʼahiʼahiʼi ia ia pea ʼe ina lolomi tona loto moka fakahalaʼi ia ia.​—1 Ko. 9:25, 27; Tito 3:2.

4. He koʼe ʼe tonu ke tou faiga ke tou maʼu ia te ʼu kalitate takitahi ʼae ʼe tohi ia Kalate 5:22, 23? Fakamahino.

⁴ Kapau ʼe tou fia maʼu ia te ʼuluagaaga foʼou ʼe tonu ke tou maʼu ia te ʼu kalitate fuli ʼae ʼe tohi ia Kalate 5:22, 23 pea mo ʼihi atu ʼu vaega Tohi-Tapu. * ʼE mole hage te ʼu kalitate ʼaia ko he ʼu mutuʼi meʼa kehekehe ʼe feala ke tou tui. ʼE lahi te ʼu kalitate ʼe tatau. Ohage la, kapau ʼe kotou oʼofa moʼoni ki he tahi, ʼe kotou katakiʼi anai tana aga pea mo agalelei ki ai. ʼE tonu anai ke kotou agamalū pea mo lotololomi.

5. Ka tou lau ia 1 Kolonito 2:16, kotea ia “te manatu ʼa Kilisito”? Pea he koʼe ʼe tonu ke tou ako ia te maʼuli ʼo Sesu?

⁵ Lau ia 1 Kolonito 2:16. Kapau ʼe tou fia maʼu ia te ʼuluagaaga foʼou ʼe tonu ke tou maʼu ia “te manatu ʼa Kilisito.” ʼE tonu ke tou ako ke tou mahino ki te faʼahiga manatu ʼa Sesu pea mo faʼifaʼitakiʼi ia ia. Neʼe maʼu katoa e Sesu ia te fua ʼo te laumalie ʼo te ʼAtua. Neʼe ina faʼifaʼitakiʼi lelei te ʼu kalitate ʼo Sehova. (Hep. 1:3) Kapau ʼe tou maʼu ia te faʼahiga manatu ʼa Sesu, ʼe tou lava faʼifaʼitakiʼi anai tana aga pea mo tona ʼuluagaaga.​—Flp. 2:5.

6. Kotea ʼae ʼe tonu ke tou manatuʼi moka tou faiga ke tou maʼu ia te ʼuluagaaga foʼou?

⁶ ʼE feala koa ke tou faʼifaʼitakiʼi tuʼumaʼu ia Sesu? ʼE feala pe ke tou manatu fenei: ‘Ko Sesu neʼe ko te tagata haohaoa. ʼE mole feala anai ke au hage ʼosi ko ia.’ Kapau ʼe kotou maʼu ia te manatu ʼaia, kotou  manatuʼi: ʼuluaki, neʼe fakatupu tatou ki te pāki ʼo Sehova pea mo Sesu. Koia ʼe feala pe ke tou faʼifaʼitakiʼi ia naua. (Sen. 1:26) Lua, ko te laumalie maʼoniʼoni ʼe ko te malohi ʼe lahi tukupau ʼi te ʼatulaulau. Koia ʼaki te malohi ʼaia ʼe feala ke tou fakahoko ni gaue ʼe mole tou lava fai ʼaki totatou malohi. Tolu, ʼe mole fakamaʼua mai e Sehova, ke tou fakaha katoa ia te ʼu kalitate ʼo te laumalie maʼoniʼoni. ʼE iloʼi e Sehova ʼe ʼaoga anai ni taʼu ʼe 1 000 maʼa natou ʼae ka maʼuʼuli anai ʼi te kele ke natou liliu ʼo haohaoa. (Apk. 20:1-3) Kae ʼe loto e Sehova ke tou faiga malohi ke tou maʼu ia te ʼu kalitate ʼaia pea mo falala ki tana tokoni.

7. Kotea ʼae ka tou vakaʼi?

⁷ ʼE feafeaʼi hatatou faʼifaʼitakiʼi ia Sesu? ʼE tou vakaʼi anai ia faʼahi ʼe fa ʼo te fua ʼo te laumalie ʼo te ʼAtua. ʼE tou vakaʼi anai ʼi te ʼu aluʼaga takitahi ʼaia, pe neʼe fakaha feafeaʼi e Sesu ia te ʼu kalitate ʼaia. ʼE tou vakaʼi anai ʼihi fehuʼi ʼe tokoni mai anai ke tou iloʼi pe ʼe kua tou maʼu koa ia te ʼuluagaaga foʼou.

8. Neʼe fakaha feafeaʼi e Sesu tona ʼofa?

⁸ Neʼe ʼofa mamahi ia Sesu ia Sehova, koia neʼe ina fai ai ni sakilifisio maʼa tana Tamai pea mo tatou. (Soa. 14:31; 15:13) Neʼe fakaha e Sesu tana ʼofa lahi ki te hahaʼi ʼi tana faʼahiga maʼuli ʼi te kele. ʼI te aho fuli neʼe agalelei pea mo lotomahino, maʼia moka fakafeagai ʼihi kia ia. Neʼe fakaha tafito e Sesu tana ʼofa ki te hahaʼi ʼi tana akoʼi kia natou ia te Puleʼaga ʼo te ʼAtua. (Luka 4:43, 44) Neʼe toe fakamoʼoni e Sesu tona ʼofa ki te ʼAtua pea mo te hahaʼi ʼi tana tali ke fakamamahiʼi pea mo matehi ia ia e ni tagata agahala. Neʼe ina fakafealagia ai ki te hahaʼi fuape ke natou maʼu ia te maʼuli heʼe gata.

9. ʼE feafeaʼi hatatou faʼifaʼitakiʼi ia te ʼofa ʼo Sesu?

⁹ Neʼe tou foaki totatou maʼuli kia Sehova pea mo papitema he ʼe tou ʼoʼofa ia te ia. Koia ʼe tonu anai ke tou faʼifaʼitakiʼi ia Sesu, ʼe tou fakaha tatatou ʼoʼofa ia Sehova ʼaki tatatou aga ki te hahaʼi. Neʼe tohi fenei e te apositolo ko Soane: “Ko ia ʼae ʼe mole ʼofa ki tona tehina ʼae ʼe sio ki ai, ʼe mole feala ke ʼofa ki te ʼAtua ʼae ʼe mole sio ki ai.” (1 Soa. 4:20) ʼE feala ke tou fai ia te ʼu fehuʼi ʼaeni: ‘ ʼE au ʼofa moʼoni koa ki te hahaʼi? ʼE au lotomahino koa ki te hahaʼi, tatau aipe pe ʼe mole natou agalelei mai? ʼE au fakaʼaogaʼi koa toku temi mo ʼoku fealagia ke au tokoni ki te hahaʼi ke natou iloʼi ia Sehova? ʼE au fia tokoni koa ki te hahaʼi, tatau aipe pe ʼe mole tokagaʼi e te tokolahi ʼaku faiga peʼe natou agakovi mai? ʼE au faiga koa ke lahi age te temi ʼe au fakaʼaogaʼi moʼo tokoni ki te hahaʼi ke natou liliu ko ni tisipulo ʼa Sesu?’​—Efe. 5:15, 16.

10. Neʼe fakaha feafeaʼi e Sesu ko ia ko te tagata ʼe ina kumi te tokalelei?

¹⁰ Ko Sesu neʼe ko he tagata neʼe ina kumi tuʼumaʼu pe te tokalelei. Ka agakovi te hahaʼi kia ia, ʼe mole ina liufaki te kovi ʼaki te kovi. Neʼe faiga tuʼumaʼu pe ia ke ina kumi te tokalelei pea neʼe ina fakalotomalohiʼi te hahaʼi ke natou fakatokatoka mo natou ʼae neʼe natou fekēʼaki. Ohage la, neʼe akoʼi ki te hahaʼi kapau ʼe natou loto ke tali e Sehova tanatou tauhi, ʼe tonu ke natou tokalelei mo ʼonatou tehina. (Mat. 5:9, 23, 24) Neʼe tokoni tuʼa lahi ia Sesu ki ʼana kau apositolo ke natou fakatokatoka ʼanatou fihi, ʼi tanatou fia iloʼi pe ko ai ʼae ʼe lahi ia natou.​—Luka 9:46-48; 22:24-27.

11. ʼE feafeaʼi hatatou kumi ia te tokalelei?

¹¹ Ko he tahi ʼe manako ki te tokalelei ʼe  mole ko he tahi pe ʼe faiga ke ʼaua naʼa kē mo he tahi. ʼE ko he tahi ʼe alu ki tona tehina ʼo fakatokatoka mo ia pea mo kumi te tokalelei. ʼE ko he tahi ʼe ina fakalotomalohiʼi ʼona tehina mo tuagaʼane ke natou fakatokatoka ʼonatou fihifihia. (Flp. 4:2,3; Sakp. 3:17, 18) Tou fai te ʼu fehuʼi ʼaeni: ‘ ʼE au faiga fakamalotoloto koa ke au fakatokatoka mo toku tehina? Ka agakovi mai he tehina peʼe ko he tuagaʼane, ʼe au taupau koa toku ita kia ia? ʼE au atali koa ke haʼu muʼa ia ia ʼae neʼe au fihi mo ia, ʼo fakalelei mai? Peʼe au alu muʼa au ʼo fakatokatoka mo ia, tatau aipe pe neʼe ko tana hala? ʼE au uga koa ia natou ʼae ʼe natou fetokakoviʼaki ke natou fakatokatoka mo kumi te tokalelei?’

12. Neʼe fakaha feafeaʼi e Sesu tana agalelei?

¹² Ko Sesu neʼe ko te tagata agalelei. (Mat. 11:28-30) Neʼe agalelei pea mo agamalū pea mo lotomahino, maʼia ʼi te ʼu aluʼaga faigataʼa. Ohage la, neʼe alu age te fafine Fenisia ʼo kolekole age ki ai ke ina fakamalolo tana taʼahine. Neʼe ʼuluaki fakafisi ki ai Sesu, kae ʼi tana sio leva ʼae ki tana tui malohi, neʼe ina fakamalolo ai tana fanau. (Mat. 15:22-28) Neʼe agalelei ia Sesu, kae neʼe mole ʼofa vale. ʼI ʼihi temi neʼe palalau fakahagatonu kia natou ʼae neʼe ʼofa ai. Ohage la, neʼe faiga e Petelo ke ina fakalotovaivaiʼi ia Sesu ke ʼaua naʼa ina fakahoko ia te finegalo ʼo Sehova. Neʼe haga ia Sesu ʼo fakatonutonuʼi ia ia ia muʼa ʼo ʼana tisipulo. (Mko. 8:32, 33) Neʼe mole ina fia fakatolaloʼi ia Petelo, kae neʼe ina fia akoʼi ia ia pea mo fakatokaga ʼana tisipulo ke ʼaua naʼa natou fialahi. Neʼe lagi ufiufi ia Petelo, kae neʼe fua lelei kia ia te ako ʼaia.

13. ʼE feafeaʼi hatatou agalelei ki te hahaʼi?

¹³ Kapau ʼe tou fia agalelei moʼoni kia natou ʼae ʼe tou ʼoʼofa ai, ʼi ʼihi temi ʼe tonu ke tou palalau fakahagatonu kia natou. Kae ʼe tonu ke tou faʼifaʼitakiʼi ia Sesu ʼo tou fakatafito ʼatatou tokoni ki te Folafola ʼa te ʼAtua. Kotou agamalū. Kotou taupau he manatu ʼe lelei ʼo ʼuhiga mo natou, mo kotou manatuʼi, kapau ʼe natou ʼoʼofa ia Sehova pea mo koutou, ʼe natou tali leleiʼi anai te ʼu tokoni. Kotou fai ia te ʼu fehuʼi ʼaeni: ‘ ʼE au lototoʼa koa ʼo palalau ki he tahi ʼe au ʼofa ai, moka au sio ʼe ina fai ia he meʼa ʼe kovi? Ka au tokoniʼi he tahi, ʼe au palalau koa ʼaki he agalelei peʼe au agafefeka? He koʼe ʼe au fia tokoniʼi ia ia? ʼE au tokoniʼi koa ia ia he ʼe au ita ki ai peʼe he ʼe au ʼofa ai.’

14. Neʼe fakaha feafeaʼi e Sesu tona manavaʼofa?

¹⁴ Neʼe fai e Sesu ia te meʼa ʼae ʼe lelei. Neʼe ʼofa ʼi tana Tamai, koia neʼe ina fia fai tuʼumaʼu ia te meʼa ʼae ʼe lelei. Ko he tahi ʼe manavaʼofa ʼe ina kumi tuʼumaʼu ia te ʼu faigamalie ke tokoni ki te hahaʼi pea mo agalelei kia natou. ʼE mole tonu pe ke tou iloʼi ia te meʼa ʼae ʼe lelei ke fai, kae ʼe tonu foki ke tou fia fai ia te faʼahi ʼaia. Kotou fakakaukauʼi age muʼa: ‘ ʼE feala koa ke tou fai ia he meʼa ʼe lelei kae mole ʼaki he loto lelei?’ ʼEi, ʼe feala. Ohage la, neʼe palalau ia Sesu ki te hahaʼi ʼae ʼe natou foaki he meʼa ʼofa ki te kau masisiva ʼae ʼe kai kolekole, kae ʼe natou faiga ke iloʼi e te hahaʼi. ʼE ko he aga ʼe lelei kae ʼe mole hona ʼuhiga kia Sehova.​—Mat. 6:1-4.

15. Kotea ʼae ʼe tonu ke tou fai ke tou agalelei moʼoni?

¹⁵ Ko he tahi ʼe manavaʼofa moʼoni ʼe ina fai te meʼa ʼae ʼe lelei ʼuhi ko tona ʼofa. Tou fai ia te ʼu fehuʼi ʼaeni: ‘Kapau ʼe au iloʼi te meʼa ʼae ʼe tonu ke au fai, ʼe au fai anai koa ʼo kaku ki tona gataʼaga? He koʼe ʼe au fai ia te meʼa ʼae ʼe lelei?’

16. Kotea ʼae ʼe tonu ke tou fai ʼi te ʼaho fuli?

¹⁶ ʼAua naʼa tou manatu ka papitema pe he tahi, kua ina maʼu ia te ʼuluagaaga foʼou ʼo talu ai. ʼE tonu ke tou taupau ia te ʼuluagaaga foʼou ke lelei mo katoa. Koia ʼe tonu ke tou faiga ʼi te ʼaho fuli ke tou maʼu ia te ʼu kalitate ʼo te fua ʼo te laumalie ʼo te ʼAtua. He kotea tona tupuʼaga? He ko Sehova ʼe ko he ʼAtua ʼe gaue tuʼumaʼu pea ko tona laumalie ʼe ko he malohi gaue ʼe maʼuli. (Sen. 1:2) Koia ka maʼu e he tahi ia he kalitate ʼo te laumalie maʼoniʼoni, ʼe ina uga ia ia ke ina fai he gaue. Ohage la, neʼe tohi fenei e te tisipulo ko Sakopo: “Kapau ʼe mole fakaha ʼaki he ʼu gaue, ʼe mate ia.” (Sakp. 2:26) ʼE toe feia pe mo te ʼu kalitate ʼo te laumalie ʼo te ʼAtua. Ka tou fakaha te ʼu kalitate ʼaia, ʼe tou fakamoʼoni ai ʼe gaue te laumalie ʼo te ʼAtua ia tatou.

17. Kotea ʼae ʼe tou fai moka tou fakaha te fua ʼo te laumalie ʼo te ʼAtua?

¹⁷ ʼE mole faigafua tuʼumaʼu te fakaha ia te fua ʼo te laumalie ʼo te ʼAtua, maʼia mo natou ʼae kua fualoa tanatou papitema. Kae ko te maʼuhiga ko tatatou faiga tuʼumaʼu ki ai. Tou toʼo he faʼifaʼitaki. Kapau la ʼe kotou haeʼi ia he kofu ʼe kotou leleiʼia ʼaupito, ʼe kotou foimo liʼaki atu aipe? Kailoa. ʼE feala ke kotou ʼavage ki he tahi ke ina tui te faʼahi ʼae neʼe mahae. Pea ʼe kotou tokakaga anai naʼa toe mahae. ʼE toe feia pe, kapau neʼe mole tou manavaʼofa mo agalelei ki he tahi, ʼaua naʼa tou lotovaivai. ʼE feala pe ke tou faifakalelei age pea mo fakatokatoka mo ia. Pea mo tou faiga ke ʼaua naʼa tou toe fai ia te aga ʼaia.

18. Kotea ʼae ʼe tou tui papau ki ai?

¹⁸ ʼE tou fiafia ʼaupito ʼi te tuku mai e Sesu ia he faʼifaʼitakiʼaga. Kapau ʼe tou faʼifaʼitakiʼi tana faʼahiga manatu pea mo tana aga, ʼe tou faʼifaʼitakiʼi anai tana aga. Pea ke tou faʼifaʼitakiʼi te aga ʼa Sesu, ʼe tou kofuʼi ai te ʼuluagaaga foʼou. Neʼe tou vakaʼi ʼi te alatike ʼaeni, ia aluʼaga ʼe fa ʼo te laumalie ʼo te ʼAtua. ʼE lelei ke tou toʼo he temi ke tou vakavakaʼi ia te tahi ʼu kalitate ʼo te laumalie ʼo te ʼAtua pea mo fakakaukauʼi pe feafeaʼi hatatou fakaha te ʼu kalitate ʼaia. ʼE kotou maʼu anai ia te ʼu alatike ʼo ʼuhiga mo te faʼahi ʼaia ʼi te Kumiʼaga Tohi Maʼa Te Kau Fakamoʼoni ʼa Sehova ʼi te kupu “Maʼuli Fakakilisitiano” pea mo “Fua ʼo Te Laumalie.” Kotou tui papau, kapau ʼe kotou fai ia te faʼahi ʼaia, ʼe tokoni atu anai e Sehova ke kotou kofuʼi pea mo taupau ia te ʼuluagaaga foʼou.