ʼE Tapuakiʼi e Sehova Ia Natou ʼAe ʼe Toe Liliu Ki Tonatou Fenua
TOKOLAHI te ʼu tehina mo tuagaʼane neʼe natou mavae mai tonatou fenua ʼo olo ki te tahi ʼu fenua maʼu koloa ʼo maʼuʼuli ai. Kae ki muli age, neʼe natou toe liliu ki te ʼu fenua ʼae neʼe tutupu ai. Kotea tona tupuʼaga? Neʼe natou olo ʼo maʼuʼuli ʼi te ʼu fenua ʼae ʼe ʼaoga lahi ai he kau faifakamafola ʼo te Puleʼaga, ʼuhi ko tonatou ʼofa kia Sehova pea mo tonatou tatau. (Mat. 22:37-39) Kotea te ʼu sakilifisio ʼae neʼe natou fai? Pea kotea te ʼu tapuakina neʼe natou maʼu? Moʼo tali ki te ʼu fehuʼi ʼaia, tou vakaʼi te ʼu faʼifaʼitaki ʼo ʼihi, neʼe toe liliu ki tonatou fenua ko Cameroun, ʼi Afelika.
“ʼI TE KOGA MEʼA LELEI MOʼO ‘GELU’”
ʼI te taʼu 1998, neʼe mavae te tehina ko Onésime mai tona fenua ko Cameroun. Neʼe maʼuli taʼu ʼe 14 ʼi te tahi fenua. ʼI te tahi ʼaho, neʼe logo ki he fakata neʼe fakaʼaogaʼi e te tehina faiakonaki ʼi he fono neʼe malave kia ia. Neʼe ina ui fenei: “Kotou fakakaukauʼi age muʼa, ko he ʼu kaumeʼa ʼe lua ʼe nā gelu ʼi he ʼu koga meʼa kehekehe. Pea ko te tahi ʼe lahi age te ʼu ika ʼae ʼe ina maʼu. Ko ia ʼae ʼe mole lahi ʼana ika, ʼe mole alu anai koa ki te koga meʼa ʼae ʼe gelu ai tona kaumeʼa?”
ʼI te logo ʼa Onésime ki te fakata ʼaia, neʼe fakakaukau ai ke toe liliu ki Cameroun, ki te koga meʼa ʼae ʼe lahi ai te hahaʼi ʼe fia ako te Tohi-Tapu. Kae neʼe ʼi ai te ʼu faʼahi neʼe tuʼania ki ai. ʼI te kua fualoa ʼo tana maʼuli ʼi te tahi fenua, ʼe toe lava fakamamahani anai koa ki te maʼuli ʼo tona fenua? Ke ina iloʼi pe ʼe ina lavaʼi anai, neʼe ina fai te tonu ʼae ke maʼuli ai ʼi ni mahina ʼe ono. Pea ʼi te taʼu 2012, neʼe alu leva ʼo nofo ʼosi ai.
ʼE ina fakamatala fenei: “Neʼe tonu ke au fakamamahani ki te vevela mo te maʼuli ʼo te fenua. ʼI te fale fono neʼe tonu ke au toe fakamamahani ʼi te heka ki he ʼu hekaʼaga loloa mo fefeka.” ʼE ina toe ui fenei ʼaki he malimali: “Kae ʼi taku fakalogo lelei ki te fono, neʼe mole kei au manatuʼi te ʼu hekaʼaga lelei ʼae neʼe au heka ai ʼi muʼa atu.”
ʼI te taʼu 2013, neʼe ʼohoana ia Onésime mo Géraldine ʼae neʼe toe liliu ki Cameroun, hili tana maʼuli ʼi Falani ʼi ni taʼu ʼe hiva. Kotea te ʼu tapuakina neʼe maʼu e te taumatuʼa ʼaia, ʼi tanā fakamuʼamuʼa te ʼu gaue fakalaumalie? ʼE tali fenei e Onésime: “Neʼe ma kau ki te Ako ʼo Te Kau Faifakamafola ʼo Te Puleʼaga, pea kua ma gaue nei ʼi te Petele. Heʼeki faʼa fualoa ki ai ʼi toma kokelekasio, neʼe papitema te ʼu ako ʼe toko 20 ʼi he taʼu pe ʼe tahi. Kua au nofo nei ʼi te koga meʼa lelei moʼo ‘gelu.’ ” (Mko. 1:17, 18) ʼE toe ui fenei e Géraldine: “Neʼe mole au ʼamanaki pe la ʼe lahi anai toku tapuakina.”
TE FIAFIA ʼO TE MAʼU ʼO HE ʼU FANAU FAKALAUMALIE
Ko Judith ʼae neʼe alu ʼo maʼuli ʼi Amelika, neʼe loto ia ke lahi age tana gaue kia Sehova. ʼE
ina fakamahino fenei: “Neʼe au tau alu ʼo fakasiosio toku famili ʼi Cameroun. Neʼe au tagi tuʼumaʼu moka au mavae, he neʼe tonu ke au tuku ni hahaʼi neʼe au kamata tanatou ako.” Kae neʼe lotolotolua ia Judith ʼi te toe liliu ʼo maʼuli ʼi Cameroun. Neʼe lelei tana gaue, pea neʼe feala ke ina totogi te ʼu faitoʼo ʼo tana matuʼa ʼae ʼe maʼuli ʼi ai. Kae neʼe falala ia kia Sehova pea neʼe toe liliu ki Cameroun. Neʼe ina ui ʼi te kamata neʼe manamanatu ki te ʼu lelei ʼo tona maʼuli ʼi Amelika. Neʼe faikole kia Sehova ke tokoni age ke mamahani mo tona maʼuli foʼou. Pea neʼe lahi tona fakalotomalohiʼi e te taupau siliko mo tona ʼohoana.ʼE toe manatuʼi fenei e Judith: “Ia taʼu ʼe tolu, neʼe au fiafia he neʼe au maʼu ʼaku fanau fakalaumalie ʼe toko fa.” Pea neʼe liliu leva ʼo pionie makehe. ʼI te temi nei, ʼe gaue fakatahi mo tona ʼohoana ko Sam-Castel, ʼi te gaue fakasiliko. Kae neʼe feafeaʼi ki te aluʼaga ʼo tana matuʼa? Neʼe maʼu e Judith mo tona famili he lopitali ʼi te tahi age fenua neʼe ina tali ke ina totogi tona tafa. Pea neʼe to lelei pe tona tafa.
NEʼE TOKONI IA SEHOVA KIA NAUA
Neʼe alu te tehina ko Victor ʼo maʼuli ʼi Canada. Neʼe fakakaukau leva ʼi tana ʼosi lau te alatike ʼo Te Tule Leʼo neʼe palalau ki te ʼu ako maʼoluga. Neʼe ina fakagata tana ako maʼoluga pea neʼe ina filifili he ako ʼo he gaue. ʼE ina fakamahino fenei: “Neʼe feala ai ke au maʼu vave haku gaue, pea ke au fai te meʼa ʼae neʼe au loto ki ai, ke au pionie.” Ki muli age, neʼe ʼohoana mo Caroline, pea neʼe nā olo leva ki Cameroun. ʼI tanā mamata ki te Petele, neʼe fakalotomalohiʼi naua e te ʼu tehina ke nā vakaʼi pe ʼe feala ke nā tauhi kia Sehova ʼi te fenua ʼaia. ʼE ui fenei e Victor: “Neʼe mole ʼi ai he tupuʼaga ke ma fakafisi ki te fakaafe ʼaia. Neʼe faigafua kia maua te tali ʼo te fakaafe he neʼe ma maʼuʼuli fakafeʼauga.” Tatau aipe pe neʼe mahamahaki ia Caroline kae neʼe nā fakatotonu pe ke nā fetogi fenua.
Neʼe liliu ia Victor mo Caroline ko ni pionie katoa. Neʼe feala ai ke nā akoʼi te Tohi-Tapu ki he ʼu hahaʼi tokolahi ʼe natou fia iloʼi te moʼoni. ʼI te kamata, neʼe mole ʼaoga ke nā gaue he neʼe nā fakaʼaogaʼi te foʼi falā ʼae neʼe nā tanaki kehe. Kae ki muli age neʼe nā toe liliu ki Canada, ʼo gaue ai ʼi ni kiʼi mahina. Neʼe feala ai ke nā toe liliu ki Cameroun ʼo hoko atu tanā gaue pionie. Kotea te ʼu tapuakina neʼe nā maʼu? Neʼe nā kau ki te Ako ʼo Te Kau Faifakamafola ʼo Te Puleʼaga. Neʼe hinoʼi naua ko he ʼu pionie makehe. Pea ʼe nā kau ʼi te temi nei ki te gaue laga fale. ʼE ui fenei e Victor: “ ʼI tamā tuku toma maʼuli lelei ʼi Canada, neʼe ma falala kia Sehova pea neʼe tokoni mai.”
TE FIAFIA ʼO TE TOKONI KI TE HAHAʼI KE NATOU FOAKI TONATOU MAʼULI KIA SEHOVA
ʼI te taʼu 2002, neʼe ako ia Alain ʼi te univelesite ʼi Siamani. ʼI te tahi ʼaho neʼe ina lau te kiʼi pepa lotu Jeunes gens, qu’allez-vous faire de votre vie ? Neʼe tokoni te kiʼi pepa lotu ʼaia ke ina fetogi ʼana fakatuʼutuʼu. ʼI te taʼu 2006, neʼe kau ki te Ako Ki Te Gaue Fakaminisitelio. Pea neʼe fekauʼi ia ia ke toe liliu ki Cameroun, te fenua ʼae neʼe tupu ai.
ʼI Cameroun, neʼe maʼu e Alain tana gaue vaeluaʼi temi. Neʼe ina maʼu leva he tahi gaue neʼe totogi lelei age, kae neʼe tuʼania naʼa siʼisiʼi tana faifakamafola. Koia, ʼi tona fakaafe leva ke pionie makehe, neʼe ina tali atu aipe. Neʼe fia hiki e tona patolo tona totogi, kae neʼe fakafisi ia Alain, pea neʼe liliu ai ko he pionie makehe. Ki muli age, neʼe ʼohoana ia Alain mo Stéphanie, ʼae neʼe maʼuli ʼi ni taʼu ʼi Falani. Kotea te ʼu faigataʼaʼia neʼe tau mo Stéphanie ʼi tana maʼuli ʼi Cameroun?
ʼE fakamahino fenei e Stéphanie: “Neʼe au mahamahaki. Kae neʼe feala ke au maʼu hoku ʼu faitoʼo ke au fimalie ai.” Neʼe tapuakiʼi te faʼa kataki ʼa te taumatuʼa ʼaia. ʼE ui fenei e Alain: “ ʼI te tahi ʼaho neʼe ma olo ʼo faifakamafola ʼi he kolo ʼe tuʼu mamaʼo, ko Katé. Neʼe ma felaveʼi mo ni hahaʼi neʼe natou fia ako te Tohi-Tapu. Ki muli age, neʼe feala ke ma fai te ʼu ako Tohi-Tapu ʼo natou ʼaia ʼi te telefoni. ʼI te hahaʼi ʼaia, neʼe ko te toko lua neʼe papitema, pea neʼe fakatuʼu ʼi te kolo ʼaia he kiʼi kutuga faifakamafola.” ʼE toe ui fenei e Stéphanie: “ ʼE mole he fiafia ʼe lahi age ʼi te tokoni ki he tahi ke ina foaki tona maʼuli kia Sehova. Neʼe tuʼa lahi tamā maʼu te fiafia ʼaia ʼi tamā tauhi ʼae ki te ʼAtua ʼi heni.” ʼI te temi nei, ʼe kau ia Alain mo Stéphanie ki te gaue taupau siliko.
“NEʼE MA FAI TE MEʼA ʼAE NEʼE TONU KE MA FAI”
Neʼe papitema ia Gisèle ʼi Italia lolotoga tana ako fakatoketa. Neʼe malave kia ia te maʼuli fakafeʼauga ʼa te taumatuʼa pionie, ʼae neʼe nā fai tana ako Tohi-Tapu. Pea neʼe loto ke lahi age tana faifakamafola. ʼI tana fakaʼosi tana ako fakatoketa, neʼe liliu ai ʼo pionie katoa.
Neʼe toe fia liliu ia Gisèle ki Cameroun ke lahi age tana gaue kia Sehova. Kae neʼe ʼi ai te ʼu meʼa neʼe tuʼania ki ai. ʼE ina fakamahino fenei: “Neʼe tonu ke au fakafisi ki te fakagafua e te lao ke au maʼuli ʼi Italia. Pea neʼe tonu foki ke au mavae mai ʼoku kaumeʼa pea mo ʼihi ʼo toku famili ʼae neʼe maʼuʼuli ʼi ai.” Logo la te faʼahi ʼaia, ʼi Maio 2016, neʼe alu pe ia Gisèle ʼo maʼuli ʼi Cameroun. Ki muli age, neʼe ʼohoana mo Léonce, pea neʼe kole age e te filiale ʼo Cameroun ke nā olo ki te kolo ko Ayos, ʼae ʼe ʼaoga lahi ai he kau faifakamafola.
Neʼe feafeaʼi te maʼuli ʼi Ayos? ʼE fakamatala fenei e Gisèle: “ ʼI ʼihi temi neʼe mole ʼi ai he hila ʼi ni vahaʼa, pea neʼe mole feala ke ma fakafonu ʼama telefoni toʼotoʼo. Neʼe mole haʼele tuʼumaʼu ia. Neʼe au ako te tafu ʼo he afi ke au kuka ai. Neʼe ma olo mo he ʼu pulueti mo he ʼu hila, ʼo ohu vai ʼi te poʼuli ʼi te temi ʼae ʼe mole hahaʼi ai ʼi te matapuna vai.” Neʼe katakiʼi feafeaʼi e te taumatuʼa te ʼu fihifihia ʼaia? ʼE tali fenei e Gisèle: “Neʼe ko te laumalie maʼoniʼoni ʼa Sehova ʼae neʼe tokoni mai kia maua. Neʼe ma toe fefakalotomalohiʼaki. Pea neʼe lagolago mai ʼoma famili pea mo ʼoma kaumeʼa. ʼI ʼihi temi, neʼe natou foaki mai hamā foʼi falā.”
Neʼe fiafia koa ia Gisèle ʼi tana toe liliu ki te fenua ʼae neʼe tupu ai? ʼE ina tali fenei: “ ʼI foki! ʼI te kamata neʼe ma tau mo ni faigataʼaʼia ʼo ma lotovaivai ai, kae neʼe ma lava tauʼi. Pea ʼe ma mahino neʼe ma fai te meʼa ʼae neʼe tonu ke ma fai. Kua lahi age tamā falala kia Sehova, pea mo tamā fakaovi kia te ia.” Neʼe kau ia Léonce mo Gisèle ki te Ako ʼo Te Kau Faifakamafola ʼo Te Puleʼaga. Pea ʼi te temi nei ʼe nā pionie makehe fakatemi.
Ko he ʼu tagata tautai ʼe natou tauʼi he ʼu aluʼaga faigataʼa moʼo puke he ʼu tuʼuga ika. ʼO toe feia pe, ko te kau faifakamafola ʼae ʼe natou toe liliu ki tonatou fenua, ʼe natou fai ni sakilifisio moʼo tokoni kia natou ʼae ʼe fia iloʼi te logo ʼo te Puleʼaga. ʼE manatuʼi anai e Sehova ia meʼa fuli ʼae neʼe natou fai maʼa ia, pea mo tanatou ʼoʼofa ki tona huafa. (Nee. 5:19; Hep. 6:10) Kapau ʼe ke maʼuli ʼi he tahi fenua pea ʼe ʼaoga he kau faifakamafola ʼi te fenua ʼae neʼe ke tupu ai, ʼe feala koa ke ke toe liliu ʼo maʼuli ai? Kapau ʼe feala, ʼe tapuakiʼi lahi anai koe e Sehova.—Taag. 10:22.