ALATIKE AKO 46
Ke Ke Lototoʼa, ʼe Tokoni Atu Ia Sehova
“ ʼE mole au tuku anai koe ʼi he temi, pea ʼe mole au liakī anai koe ʼi he temi.”—HEP. 13:5.
KATIKO 55 ʼAua Naʼa Kotou Matataku Ia Natou
TE ʼU MANATU FAKANOUNOU *
1. Kapau ʼe tou manatu ʼe mole ʼi ai he tahi moʼo tokoni mai ke tou tauʼi he fihifihia peʼe mole tou lavaʼi, kotea ʼae ka ina fakalotomalohiʼi anai tatou? (Pesalemo 118:5-7)
NEʼE kua ke manatu koa ʼe mole ʼi ai he tahi moʼo tokoni atu ke ke tauʼi tau fihifihia? Tokolahi neʼe natou manatu feia, ʼo toe feia pe la mo te ʼu kaugana agatonu ʼa Sehova. (1 Hau 19:14) Kapau ʼe hoko anai te faʼahi ʼaia kia koe, ke ke manatuʼi te fakapapau ʼaeni ʼa Sehova: “ ʼE mole au tuku anai koe ʼi he temi, pea ʼe mole au liakī anai koe ʼi he temi.” Koia ʼe tou falala fuli ai pea mo ui fenei: “Ko Sehova ʼe ko toku tokoni. ʼE mole au mataku anai.” (Hep. 13:5, 6) Neʼe tohi e te apositolo ko Paulo te ʼu palalau ʼaia ki te kau Kilisitiano ʼo Sutea, ʼi te tau 61 H.T.S. * ʼE fakamanatuʼi mai e te ʼu palalau ʼaia te ʼu manatu ʼae neʼe tohi e te tagata faipesalemo ia Pesalemo 118:5-7.—Lau.
2. Kotea ʼae ka tou vakaʼi anai ʼi te alatike ʼaeni, pea kotea tona tupuʼaga?
2 Ohage ko te tagata faipesalemo, neʼe iloʼi e Paulo ʼe tokoni anai ia Sehova ki ai, he neʼe kua tuʼa lahi tana tokoni ki ai. Ohage la, ia taʼu ʼe lua ʼi muʼa ʼo tona fai tana tohi ki te kau Hepeleo, neʼe hao mai he afā malohi ʼi te tai. (Gaue 27:4, 15, 20) Neʼe mole tokoni pe ia Sehova kia ia ʼi te faifolau ʼaia, kae neʼe kua toe tokoni kia ia ʼi te ʼu taʼu ʼi muʼa atu ʼo te hoko ʼo te aluʼaga ʼaia. ʼE tou vakaʼi anai he ʼu tokoni ʼe tolu neʼe foaki e Sehova kia Paulo. Neʼe fakaʼaogaʼi e Sehova: (1) ia Sesu pea mo te ʼu ʼaselo, (2) mo ni kau pule, pea (3) ʼona tehina mo tuagaʼane. ʼI tatatou manatuʼi te ʼu aluʼaga kehekehe ʼaia ʼo te maʼuli ʼo Paulo, ʼe fakalotomalohiʼi ai tatatou tui papau ʼae ʼe tali anai e te ʼAtua ki tatatou kole ʼae ke tokoni mai ohage ko tona fakapapauʼi mai.
TE TOKONI ʼA SESU MO TE ʼU ʼASELO
3. Kotea ʼae neʼe lagi feʼekeʼaki ai ia Paulo, pea kotea tona tupuʼaga?
3 Neʼe ʼaoga kia Paulo he tokoni. ʼI te teitei taʼu 56 H.T.S. ʼi Selusalemi, neʼe toho ia ia e te hahaʼi ki tuʼa mai te fale lotu, pea neʼe natou faigaʼi ke natou matehi ia ia. ʼI te ʼaho ake, ʼi tanatou ʼaumai ia ia ʼi muʼa ʼo te Sanetualio neʼe meʼa pe ke matehi ia ia e ʼona fili. (Gaue 21:30-32; 22:30; 23:6-10) ʼI te moʼi temi pe ʼaia, neʼe lagi feʼekeʼaki fenei ia Paulo: ‘ ʼE kaku anai ki ʼafea taku lava katakiʼi toku gaohi koviʼi ʼaeni?’
4. Neʼe fakaʼaogaʼi feafeaʼi e Sehova ia Sesu moʼo tokoni kia Paulo?
4 Kotea te tokoni neʼe maʼu e Paulo? ʼI te po pe hili tona puke, neʼe tuʼu ia Sesu te ʼAliki ʼi ʼona tafa, ʼo ina ui fenei age: “Ke ke lotomalohi! Koteʼuhi, ohage pe ko tau foaki he fakamoʼoni katoa ʼo ʼuhiga mo au ʼi Selusalemi, ʼe tonu ke ke toe foaki foki he fakamoʼoni ʼi Loma.” (Gaue 23:11) Neʼe to tonu te fakalotomalohiʼi ʼaia. Neʼe vikiʼi e Sesu ia Paulo ʼi te lelei ʼo tana faifakamafola ʼi Selusalemi. Pea neʼe ina fakapapauʼi age ʼe tau maʼuli anai ki Loma, pea ʼe toe faifakamafola anai ʼi ai. ʼI tana ʼosi maʼu te fakapapau ʼaia, neʼe lagi lotofimalie ai ia Paulo, ohage ko he fanau ʼe puipui e tana tamai.
5. Neʼe fakaʼaogaʼi feafeaʼi e Sehova he ʼaselo moʼo tokoni kia Paulo? (Vakaʼi te pāki ʼo te takafi.)
5 Kotea te tahi ʼu fihifihia neʼe felaveʼi mo Paulo? Hili teitei taʼu ʼe lua ki muli age, ʼi te teitei taʼu 58 H.T.S., neʼe faifolau ia Paulo ki Italia pea neʼe to te afā. ʼI te to ʼaia ʼo te afā, neʼe manatu te kau vaka pea mo te kau faifolau ʼe natou mamate anai. Kae neʼe mole mataku ia Paulo. Kotea tona tupuʼaga? Neʼe ina fakamahino fenei ki te hahaʼi ʼae neʼe ʼi te vaka: “ ʼAnapo, ko te ʼAtua ʼae ʼe au atolasio pea mo foaki ki ai he tauhi taputapu, neʼe ina fekauʼi mai he ʼaselo pea neʼe ina ui fenei mai: ‘Paulo, ʼaua naʼa ke mataku. ʼE tonu ke ke tuʼu ia muʼa ʼo Sesale, pea ʼe haofaki anai e te ʼAtua ia natou fuli ʼae ʼe folau fakatahi mo koe.’ ” Neʼe fakaʼaogaʼi e Sehova he ʼaselo, ohage ko tona fakaʼaogaʼi ia Sesu, moʼo fakalotomalohiʼi ia Paulo. Pea neʼe tau ia Paulo ki Loma ohage ko tona fakapapauʼi age e Sehova.—Gaue 27:20-25; 28:16.
6. Kotea te fakapapau ʼa Sesu ʼe fakalotomalohiʼi ai tatou, pea kotea tona tupuʼaga?
6 Kotea te tokoni ʼe tou maʼu? ʼE tokoni mai anai ia Sesu ohage ko tana fai kia Paulo. ʼE ina fakapapau fenei ki ʼana tisipulo fuli: “ ʼE au nofo anai mo koutou ʼi te ʼaho fuli pe ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaeni.” (Mat. 28:20) Ko te ʼu palalau ʼaia ʼa Sesu ʼe fakalotomalohiʼi tatou. Kotea tona tupuʼaga? Koteʼuhi ʼi ʼihi temi ʼe faigataʼa hatatou katakiʼi ʼotatou mamahi. Ohage la, neʼe mate he tahi neʼe tou ʼofa mamahi ai. ʼE mole tou lotomamahi pe ʼi he ʼu kiʼi ʼaho, kae ʼe feala ke lauʼi taʼu. Peʼe lagi faigataʼa ki ʼihi he kua natou matutuʼa. Pea ko ʼihi leva ʼe natou tauʼi te mahaki ʼae ko te lotomamahi ʼaupito. Logo la te ʼu faʼahi ʼaia, kae ʼe tou maʼu pe te malohi moʼo ʼutakiʼi, koteʼuhi ʼe tou iloʼi ʼe nofo ia Sesu mo tatou “ ʼi te ʼaho fuli pe,” ʼo kau ai mo te ʼu ʼaho ʼae ʼe tou lotomamahi ʼaupito ai.—Mat. 11:28-30.
7. ʼE tokoni feafeaʼi mai ia Sehova kia tatou ia ʼaho nei ʼo mulimuli kia Fakaha 14:6?
7 ʼE fakaha lelei mai ʼi te Folafola ʼa te ʼAtua ʼe tokoni mai ia Sehova kia tatou ʼaki ʼana ʼaselo. (Hep. 1:7, 14) Ohage la, ʼe tokoni mai pea mo takitaki tatou e te kau ʼaselo moka tou fakamafola ‘te logo lelei ʼo te Puleʼaga’ ki te ʼu hahaʼi ʼo “te ʼu puleʼaga fuli, mo te ʼu telepi fuli, mo te ʼu lea fuli.”—Mat. 24:13, 14; lau ia Fakaha 14:6.
TE TOKONI ʼA NATOU ʼAE ʼE MAʼU TE PULE
8. Neʼe fakaʼaogaʼi feafeaʼi e Sehova he kamutoa Loma moʼo tokoni kia Paulo?
8 Kotea te tokoni neʼe maʼu e Paulo? Ohage ko tatatou kua vakaʼi, ʼi te taʼu 56 H.T.S. neʼe fakapapauʼi age e Sesu kia Paulo ʼe tau maʼuli anai ki Loma. Kae neʼe faigaʼi e ʼihi kau Sutea ʼi Selusalemi ke natou matehi ia ia, pea mo fonofono ke natou ʼohofi fakafokifa ia ia. ʼI te logo ʼae ʼo te kamutoa Loma ko Kolote Lisiasi ki tanatou fonofono ʼaia, neʼe tokoni kia Paulo. Neʼe ina foimo kole ke ʼave ia Paulo ki Sesalea ʼae ʼe vaha mamaʼo ia kilometa ʼe 105 mo Selusalemi. Pea neʼe olo mo ia he ʼu solia kaugamalie moʼo puipui ia ia. ʼI Sesalea, neʼe fakatotonu e te Kovana ko Felise ke “leʼoleʼo ia ia ʼi te fale hau ʼo Helote.” ʼI tana tuku ʼi ai, neʼe mole feala ke fai he meʼa ʼe kovi kia Paulo.—Gaue 23:12-35.
9. Neʼe tokoni feafeaʼi ia te Kovana ko Feseto kia Paulo?
9 Hili ki ai taʼu ʼe lua, neʼe kei pilisoniʼi pe ia Paulo ʼi Sesalea. Neʼe ko Feseto leva te kovana. Neʼe kole mamahi age e te kau Sutea ke ʼaumai ia Paulo ki Selusalemi ke fakamauʼi ai ia ia. Kae neʼe fakafisi ki ai ia Feseto. Neʼe lagi neʼe ina iloʼi ʼe ‘fakatuʼutuʼu anai e te kau Sutea ke natou ʼohofi ia Paulo ʼi te ala pea mo matehi ia ia.’—Gaue 24:27–25:5.
10. ʼI te kole age e Paulo ke fakamauʼi ia ia e Sesale, neʼe kotea te tali ʼa Feseto?
10 Ki muli age neʼe fakamauʼi ia Paulo ʼi Sesalea. Neʼe loto e Feseto “ke ʼofainaʼi ia ia e te kau Sutea.” Koia, neʼe ina fehuʼi fenei age kia Paulo: “ ʼE ke fia alu koa ki Selusalemi ke fakamauʼi ai koe ʼi ʼoku muʼa?” Neʼe iloʼi e Paulo kapau ʼe alu ki Selusalemi, ʼe matehi anai ia ia. Pea neʼe toe iloʼi e Paulo te meʼa ʼae neʼe tonu ke ina fai moʼo haofaki tona maʼuli. Neʼe tonu ke alu ki Loma ke hoko atu ai tona faifakamafola. Koia, neʼe ina tali fenei: “ ʼE au tagi kia Sesale!” ʼI te ʼosi felogoi ʼa Feseto mo ʼana kau faitokoni, neʼe ina ui fenei leva: “Neʼe ke tagi kia Sesale, pea ʼe ke alu anai kia Sesale.” Ko te tonu ʼaia ʼa Feseto neʼe puipui ai ia Paulo mai ʼona fili. ʼE nofo anai ʼi Loma ʼo mamaʼo mai te kau Sutea ʼae neʼe natou fia matehi ia ia.—Gaue 25:6-12.
11. Kotea te ʼu palalau fakalotofimalie ʼa Esaia neʼe lagi fakakaukauʼi e Paulo?
11 Neʼe fai e te polofeta ko Esaia te fakatokaga ʼaeni kia natou ʼae ʼe fakafeagai kia Sehova: “Koutou fai ni fakatuutuu, pea e natou alu noa anai; koutou tuku ni fakatotonu, pea e mole natou aoga anai: Koteuhi e kau te Atua mo matou.” (Esa. 8:10) Neʼe lagi fakakaukauʼi e Paulo te ʼu palalau ʼaia ʼo Esaia ʼi tana fakatalitali ke ʼave ia ia ki Italia. Neʼe ina iloʼi ʼe tokoni anai te ʼAtua kia ia. Pea neʼe lagi fakalotomalohiʼi ia ia ke ina ʼutakiʼi te ʼu ʼahiʼahi ʼae ka tau anai mo ia.
12. Neʼe feafeaʼi te aga ʼa Suliusi kia Paulo, pea kotea neʼe lagi mahino ki ai e Paulo?
12 ʼI te taʼu 58 H.T.S., neʼe heka ia Paulo ki he vaka ki Italia. Ko te pule solia Loma neʼe higoa ko Suliusi neʼe leʼoleʼo kia Paulo, he neʼe ko he tagata pilisoni. Neʼe feala kia Suliusi ke ina gaohi koviʼi ia Paulo peʼe ke agalelei mo ia. ʼE feafeaʼi anai tana aga ʼi tana ʼuhiga solia? ʼI te ʼaho ake neʼe natou tau ki Sitoni. “Neʼe agalelei ia Suliusi kia Paulo ʼo ina tuku ke alu ki ʼona kaumeʼa, pea ke natou tokakaga kia ia.” Ki muli age neʼe ina haofaki ia Paulo. ʼO feafeaʼi? Neʼe fia matehi e te kau solia te kau pilisoni fuli ʼae neʼe ʼi te vaka, kae neʼe taʼofi natou e Suliusi. Kotea tona tupuʼaga? He ‘neʼe loto ke ina haofaki ia Paulo.’ Neʼe lagi mahino ai e Paulo, neʼe fakaʼaogaʼi e Sehova te pule solia agalelei ʼaia moʼo tokoni pea mo puipui ia ia.—13. ʼE feafeaʼi te gaue ʼa te laumalie ʼo Sehova ki he tahi ʼe ina maʼu te pule?
13 Kotea te tokoni ʼe tou maʼu? Ke fakahoko e Sehova tana fakatuʼutuʼu, ʼe feala ʼi ʼihi temi ke ina fakaʼaogaʼi tona laumalie maʼoniʼoni mo mafimafi moʼo uga ia natou ʼae ʼe maʼu te pule, ke natou fai te meʼa ʼae ʼe ina loto ki ai. Neʼe tohi fenei e te hau ko Salomone: “Ko te loto o te hau ko he vaitafe i te nima o te Eteleno; e ina fulihi ia ki te u kogamea fuli e loto ia ki ai.” (Taag. 21:1) Kotea te fakaʼuhiga ʼo te taʼaga lea ʼaia? Moʼo fakahoko tanatou fakatuʼutuʼu, ʼe feala ki te tagata ke ina keli he tafega vai ke tafe te vai ki te faʼahi ʼae ʼe natou loto ki ai. ʼO toe feia pe, moʼo fakahoko tana fakatuʼutuʼu ʼe feala kia Sehova ke ina fakaʼaogaʼi tona laumalie moʼo fetogi te ʼu manatu ʼa he tahi ʼe ina maʼu te pule, ke ina fai te meʼa ʼae ʼe ina loto ki ai. Ka gaue te laumalie maʼoniʼoni ki he tahi ʼe ina maʼu te pule, ʼe ina uga ia ia ke ina fai he ʼu tonu lelei maʼa te hahaʼi ʼa te ʼAtua.—Vakaʼi mo Esetalasi 7:21, 25, 26.
14. Ko ai ʼae ʼe feala ke tou hufakiʼi ʼo mulimuli kia Gaue 12:5?
14 Kotea ʼe feala ke tou fai? ʼE feala ke tou faikole ʼo ʼuhiga mo “te ʼu hau pea mo natou fuli ʼae ʼe pule” moka ʼe tonu ke natou fai ni tonu ʼo ʼuhiga mo tatatou faifakamafola pea mo ʼatatou fono. (1 Tim. 2:1, 2, kiʼi nota; Nee. 1:11) Ohage pe ko tona fai e te kau ʼuluaki Kilisitiano, ʼe tou hufakiʼi ʼotatou tehina pea mo tuagaʼane ʼae ʼe pilisoniʼi. (Lau ia Gaue 12:5; Hep. 13:3) Kae ʼe toe feala ke tou faikole ʼo ʼuhiga mo natou ʼae ʼe leʼoleʼo ki ʼotatou tehina mo tuagaʼane. ʼE feala ke tou kole mamahi kia Sehova ke ina uga ʼanatou manatu ke hage tanatou aga ko Suliusi. Pea ke natou “agalelei” ki ʼotatou tehina mo tuagaʼane ʼae ʼe pilisoniʼi.
TE TOKONI ʼA TE ʼU TEHINA MO TUAGAʼANE
15-16. Neʼe fakaʼaogaʼi feafeaʼi e Sehova ia Alisitake pea mo Luka ke nā tokoni kia Paulo?
15 Kotea te tokoni neʼe maʼu e Paulo? Lolotoga tana faifolau ki Loma, neʼe tau fakaʼaogaʼi e Sehova te ʼu tehina mo tuagaʼane Kilisitiano ke natou tokoni kia Paulo. Tou vakaʼi he ʼu faʼifaʼitaki.
16 Ko te ʼu kaumeʼa agatonu ʼe lua ʼo Paulo ko Alisitake pea mo Luka neʼe nā muli folau mo ia ki Loma. * ʼE mole ui ʼi te Tohi-Tapu neʼe fakapapauʼi age e Sesu kia Alisitake mo Luka, ʼe nā tau maʼuli anai ki Loma. Koia, neʼe feala pe ke tuʼutamaki tonā maʼuli ʼi tanā faifolau ʼaia mo Paulo. Kae neʼe nā fia fakahoko te faʼahi ʼaia he neʼe nā fia tokoni kia Paulo. Neʼe hoki nā iloʼi ki muli age ʼi tanā faifolau ʼaia, ʼe mole nā mamate anai. Koia, ʼi tanā heheka ʼi te vaka mo Paulo ʼi Sesalea, neʼe lagi fakamalo ia Paulo kia Sehova ʼaki tona loto katoa ʼi tana foaki age kia ia te ʼu kaumeʼa lototoʼa ʼaia ʼe lua.—Gaue 27:1, 2, 20-25.
17. Neʼe fakaʼaogaʼi feafeaʼi e Sehova he kau Kilisitiano moʼo tokoni kia Paulo?
17 Lolotoga tana faifolau, neʼe tuʼa lahi te tokoni ʼa te ʼu tehina mo tuagaʼane kia Paulo. Ohage la, ʼi tanatou tau atu ki te kolo ko Sitoni, neʼe tuku e Suliusi ‘ke alu ia Paulo ki ʼona kaumeʼa pea ke natou tokakaga kia ia.’ Ki muli age, ʼi te kolo ko Puteoli, neʼe maʼu e Paulo mo ʼona kaumeʼa ni tehina, pea ‘neʼe natou kole age ke natou nonofo mo natou ia ʼaho ʼe fitu.’ Neʼe tokakaga lelei te ʼu Kilisitiano ʼaia kia Paulo mo ʼona kaumeʼa. Pea neʼe lagi natou fiafia ʼi te fakamatala age e Paulo ni aluʼaga fakalotomalohi neʼe hoko kia ia. (Vakaʼi mo Gaue 15:2, 3.) Hili tanatou fefakalotomalohiʼaki ʼaia, neʼe hoko atu pe e Paulo mo ʼona kaumeʼa tanatou faifolau.—Gaue 27:3; 28:13, 14.
18. Kotea ʼae neʼe uga ai ia Paulo ke fakafetaʼi ki te ʼAtua pea ke lotomalohi?
18 ʼI tana haʼele ki Loma, neʼe lagi manatuʼi e Paulo te meʼa ʼaeni neʼe ina tohi, taʼu ʼe tolu ki muʼa atu ki te kokelekasio ʼo te kolo ʼaia: “Talu mai fualoa mo taku fia alu atu.” (Loma 15:23) ʼI te temi ʼaia neʼe mole manatu ʼe alu anai ki ai kae ʼe pilisoni. Neʼe lagi lotomalohi ia Paulo ʼi tana sio ʼae ki te olo age ʼo te ʼu tehina ʼo Loma ʼo fakafetaulaki kia ia. “ ʼI te sio ʼa Paulo kia natou, neʼe fakafetaʼi ki te ʼAtua pea neʼe lotomalohi ai.” (Gaue 28:15) Kotou tokagaʼi ʼi te sio ʼa Paulo ki ʼona tehina neʼe fakafetaʼi ki te ʼAtua. Kotea tona tupuʼaga? Koteʼuhi neʼe toe mahino ia Paulo ʼi te aluʼaga ʼaia, neʼe fakaʼaogaʼi e Sehova ʼona tehina moʼo tokoni kia ia.
19. ʼE fakaʼaogaʼi feafeaʼi e Sehova ia tatou moʼo tokoni ki ʼana kaugana ʼo mulimuli kia 1 Petelo 4:10?
19 Kotea ʼe feala ke tou fai? ʼE ʼi ai koa ʼi tou kokelekasio he ʼu tehina mo tuagaʼane ʼe natou lotomamahi ʼuhi he ʼe natou mahahaki, peʼe natou tau mo he tahi ʼu fihifihia? Neʼe mate koa he tahi neʼe natou ʼofa mamahi ai? Kapau ʼe tou iloʼi he tahi ʼe ʼaoga ki ai he tokoni, tou faikole kia Sehova ke tou fai he palalau peʼe ko he meʼa ʼe lelei kia ia. Ko te fakalotomalohi ʼae ka tou foaki anai ki ai, ʼe lagi ko te meʼa totonu pe ʼaia ʼae ʼe ʼaoga ki ai. (Lau ia 1 Petelo 4:10.) * Pea ʼe lagi tou tokoni anai ki ai ke toe tui papau ʼe fakaʼuhiga kia ia te fakapapau ʼaeni ʼa Sehova: “ ʼE mole au tuku anai koe ʼi he temi, pea ʼe mole au liakī anai koe ʼi he temi.” ʼE mahino ia, ʼe tou fiafia lahi anai.
20. He koʼe ʼe feala ke tou ui fenei ʼaki he tui papau: “Ko Sehova ʼe ko toku tokoni”?
20 Ohage ko Paulo mo ʼona kaumeʼa, ʼi ʼihi temi ʼe tou felaveʼi mo ni faigataʼaʼia ʼe hage ko ni afā malohi. Kae, ʼe tou iloʼi ʼe ʼi ai he ʼu tupuʼaga ke tou lototoʼa ai. ʼEi, ko Sehova ʼe nofo mo tatou. ʼE ina fakaʼaogaʼi ia Sesu mo te kau ʼaselo moʼo tokoni mai. Pea mo fakahoko tana fakatuʼutuʼu, ʼe feala kia Sehova ke ina fakaʼaogaʼi he ʼu hahaʼi ʼe natou maʼu te pule moʼo tokoni mai. Pea ʼe ina fakaʼaogaʼi leva tona laumalie maʼoniʼoni moʼo uga ʼana kaugana ke natou tokoni ki ʼonatou tehina mo tuagaʼane. Neʼe lagi hoko te faʼahi ʼaia ki te tokolahi ia tatou. Koia ohage ko Paulo, ʼe feala ke tou ui fenei ʼaki he tui papau: “Ko Sehova ʼe ko toku tokoni. ʼE mole au mataku anai. Kotea ʼae ʼe feala ke fai mai e te tagata?”—Hep. 13:6.
KATIKO 38 ʼE Ina Fakamalohi Anai Ia Koe
^ pal. 5 Neʼe mole faigafua te maʼuli ʼo te apositolo ko Paulo, kae neʼe tokoni ia Sehova ki ai. ʼE palalau anai te alatike ʼaeni ki he ʼu tokoni ʼe tolu. ʼI tatatou manatuʼi ʼae ko Sehova ʼe ko he ʼAtua ʼe tokoni ki ʼana kaugana, ʼe fakamalohiʼi ai tatatou tui papau ʼae ʼe toe feala ke tokoni mai ia Sehova ke tou katakiʼi te ʼu fihifihia ʼo te maʼuli.
^ pal. 1 Ko te ʼu mataʼi tohi ʼaeni H.T.S. ko tona fakaʼuhiga: Hili te Temi ʼo Sesu.
^ pal. 16 Neʼe kua folau ia Alisitake mo Luka pea mo Paulo ʼi muʼa atu. Neʼe toe nonofo te ʼu tagata agatonu ʼaia mo ia ʼi tona pilisoniʼi ʼi Loma.—Gaue 16:10-12; 20:4; Kol. 4:10, 14.
^ pal. 19 Vakaʼi Te Tule Leʼo ʼo te ʼaho 1 ʼo Sanualio 2009, pasina 18-19, palakalafe 5-9.