ALATIKE AKO 48
Ke Ke ‘Sio Fakahagatonu Ki Muʼa’ Ki Te Ka Haʼu
“Ke sio fakahagatonu ʼou mata ki muʼa, ʼei, ke ke sio fakamamaʼo ki te meʼa ʼae ʼi muʼa.”—TAAG. 4:25, NWT.
KATIKO 77 He Malama ʼi Te Fakapoʼuli
TE ʼU MANATU FAKANOUNOU *
1-2. ʼE feafeaʼi hatatou muliʼi te tokoni ʼae ia Ta’aga Lea 4:25? Tuku mai he faʼifaʼitaki.
FAKAKAUKAUʼI age muʼa te ʼu faʼifaʼitaki ʼaeni ʼe tolu. Ko he tuagaʼane kua finematuʼa ʼe ina manatuʼi te ʼu temi fiafia ʼi tana kei finemui. Tatau aipe pe faigataʼa tona maʼuli ia ʼaho nei, kae ʼe haga fai pe te meʼa ʼae ʼe ina lavaʼi maʼa Sehova. (1 Ko. 15:58) ʼI te ʼaho fuli, ʼe sio kia ia ʼi te malama foʼou mo natou ʼae ʼe ʼofa mamahi ai. ʼE manatuʼi e he tahi tuagaʼane neʼe mamahi ki he tahi ʼo te kokelekasio, kae ʼe ina fakatotonu ke mole ina toe manatuʼi. (Kol. 3:13) Ko he tehina ʼe ina manatuʼi te ʼu hala ʼae neʼe ina fai ʼi te temi muʼa, kae ʼe faiga ke nofo agatonu kia Sehova ʼi te temi nei.—Pes. 51:12.
2 Kotea ʼae ʼe tatau ai te ʼu Kilisitiano ʼaeni ʼe tolu? ʼE natou manatuʼi te ʼu meʼa neʼe hoko ʼi muʼa atu, kae ʼe mole natou manatuʼi tuʼumaʼu. ʼE natou ‘sisio fakahagatonu ki muʼa’ ki te ka haʼu.—Lau ia Ta’aga Lea 4:25, NWT. *
3. He koʼe ʼe tonu ke tou ‘sisio fakahagatonu ki muʼa’ ki te ka haʼu?
3 He koʼe ʼe maʼuhiga ke tou ‘sisio fakahagatonu ki muʼa’ ki te ka haʼu? Kapau ʼe tou sisio tuʼumaʼu ki muli ʼe mole feala anai ke tou haʼele fakahagatonu, pea ʼe toe feia pe mo tatatou tauhi kia Sehova. ʼE mole feala ke katoa tatatou tauhi kia Sehova mo kapau ʼe tou manatuʼi tuʼumaʼu te ʼu meʼa ʼae neʼe hoko ʼi muʼa atu.—Luka 9:62.
4. Kotea ka tou vakaʼi anai ʼi te alatike ʼaeni?
4 ʼI te alatike ʼaeni, ʼe tou vakaʼi anai te ʼu hele ʼaeni ʼe tolu, ʼe feala ke tupu ai tatatou manatuʼi tuʼumaʼu pe te ʼu meʼa ʼae neʼe Flp. 3:13.
hoko ʼi te temi muʼa: (1) te manamanatu ki te ʼu fiafia ʼo te temi muʼa, (2) te lotokovi, pea (3) te tukugakoviʼi fau ʼo kita. ʼE tou vakaʼi pe ʼe tokoni feafeaʼi mai te Tohi-Tapu ke mole tou manatuʼi tuʼumaʼu pe “te ʼu meʼa ʼae ʼi muli” kae ke tou haga ki “te ʼu meʼa ʼae ʼi muʼa.”—TE MANAMANATU KI TE ʼU FIAFIA ʼO TE TEMI MUʼA
Kotea ʼe feala ke ina taʼofi tatou ke mole tou sisio ki muʼa ki te ka haʼu? (Vakaʼi te ʼu palakalafe 5, 9, 13) *
5. Kotea ʼae ʼe mole tonu ke tou fai ʼo mulimuli kia Ekelesiasi 7:10?
5 Lau ia Ekelesiasi 7:10. Ke ke tokagaʼi ʼi te vaega ʼaeni, ʼe mole ui ʼe kovi te ui ʼae: “Kotea nee lelei ai te u aho i mua i te u aho aeni?” Ko te manatuʼi te ʼu fiafia ʼae neʼe hoko ʼi te temi muʼa ʼe ko he meʼa ʼofa mai ia Sehova. Kae ʼe ui fenei ʼi te vaega ʼaia: “Aua naa ke ui: Kotea nee lelei age ai te u aho i mua i te u aho aeni?” Ke ʼaua naʼa ke fakatatau tou maʼuli ʼi te temi nei pea mo ʼae ʼi te temi muʼa. ʼE mole ko he aga fakapotopoto ʼaia.
Hili tanatou mavae mai Esipito, kotea te hala neʼe fai e te kau Iselaele? (Vakaʼi te palakalafe 6)
6. He koʼe ʼe mole ko he aga fakapotopoto tatatou ui tuʼumaʼu ʼae neʼe lelei age totatou maʼuli ʼi muʼa atu? Tuku mai he faʼifaʼitaki.
6 He koʼe ʼe mole ko he aga fakapotopoto tatatou ui tuʼumaʼu ʼae neʼe lelei age totatou maʼuli ʼi muʼa atu. Koteʼuhi ʼe tou manatuʼi pe te ʼu lelei ʼae neʼe hoko, kae ʼe tou meʼa noaʼi te ʼu faigataʼaʼia ʼae neʼe tou tau mo ia ʼi te temi muʼa. Tou vakaʼi te faʼifaʼitaki ʼa te kau Iselaele. ʼOsi pe tanatou mavae mai Esipito, neʼe galo kia natou tanatou maʼuli mamahi ʼi ai. Kotea ʼae neʼe natou manatuʼi tafito? Neʼe natou ui fenei: “E tou manamanatu ki te u ika ae nee tou kai noa i Esipito, mo te u kokope, mo te u melo, mo te u pualo, mo te u onioni, pea mo te u lai.” (Num. 11:5) Kae neʼe natou kai noa koa te ʼu meʼa fuli ʼaia? Kailoa ia. Neʼe natou maʼuli mamahi he neʼe natou popula pea neʼe gaohi koviʼi natou e te kau Esipito. (Eke. 1:13, 14; 3:6-9) Ki muli age neʼe natou galoʼi leva te ʼu mamahi ʼaia, ʼo natou manamanatu ki te ʼu lelei ʼo te temi muʼa. Kae neʼe mole natou tokagaʼi te ʼu lelei ʼae neʼe hoki fai age pe e Sehova maʼa natou. Neʼe ita ʼosi ia Sehova kia natou.—Num. 11:10.
7. Kotea neʼe tokoni ki he tuagaʼane ke mole manamanatu tuʼumaʼu ki te ʼu fiafia ʼo te temi muʼa?
7 Kotea ʼe tonu ke tou fai ke mole tou manamanatu tuʼumaʼu ki te ʼu fiafia ʼo te temi muʼa.
Tou palalau ki he tuagaʼane neʼe kamata gaue ʼi te Petele ʼo Brooklyn ʼi te taʼu 1945. Ki muli age, neʼe ʼohoana mo he Petelite pea neʼe hoko atu tanā tauhi ʼae kia Sehova ʼi te Petele lolotoga ni taʼu. Kae neʼe mahaki leva tona ʼohoana ʼi te taʼu 1976. ʼI tana iloʼi ʼae kua vave mate, neʼe ina foaki he ʼu tokoni lelei ki tona ʼohoana. Neʼe ina ui fenei age: “Neʼe manuʼia totā maʼuli fakataumatuʼa, pea ko te tokolahi ʼe mole natou iloʼi anai te fiafia ʼaia.” Kae neʼe ina foaki age te tokoni ʼaeni: “ ʼE mole ke galoʼi anai te ʼu meʼa lelei neʼe ta fai, kae ʼaua naʼa lahi fau tau manatu ki ai. ʼAki te temi ʼe siʼisiʼi anai tou lotomamahi, ʼaua naʼa ke lotovaivai pea mo lotomamahi ʼuhi ko tou aluʼaga ʼaia. ʼAua naʼa galo kia koe te temi ʼae neʼe ta tauhi fakafiafia ai kia Sehova pea mo te ʼu tapuakina ʼae neʼe ta maʼu. Ko te manatuʼi ʼo te ʼu meʼa lelei ʼaia neʼe ta fai, ʼe ko he meʼa ʼofa mai te ʼAtua.” ʼE mole koa la ko he ʼu tokoni ʼaia ʼe lelei?8. Kotea te ʼu fua lelei neʼe maʼu e totatou tuagaʼane ʼi tana mulimuli ki te ʼu tokoni ʼae neʼe foaki age e tona ʼohoana?
8 Neʼe mulimuli ia totatou tuagaʼane ki te ʼu tokoni ʼae neʼe fai age e tona ʼohoana. Neʼe tauhi agatonu kia Sehova ʼo kaku ki tona mate ʼi tona taʼu 92. ʼI ni taʼu ʼi muʼa ʼo tana mate, neʼe ina ui fenei: “ ʼI taku manatuʼi ia te ʼu taʼu ʼaeni ʼe 63 ʼae neʼe au tauhi ai kia Sehova, ʼe feala pe ke au ui neʼe au maʼuli fiafia.” Kotea ʼae neʼe tupu ai tona maʼuli fiafia? Neʼe ina fakamahino fenei: “ ʼE feala ke tou maʼuli fiafia ʼuhi ko totatou famili taulekaleka ʼae ko te ʼu tehina mo tuagaʼane. ʼE tou toe fiafia ʼuhi ko totatou ʼamanaki ʼae ke tou maʼuli fakatahi ʼi te palatiso ʼi te kele, ʼo tauhi ki totatou Tupuʼaga Lahi, ʼae ko te ʼAtua moʼoni pe ʼe tahi, ko Sehova, ʼo talu ai.” * Ko te tuagaʼane ʼaia ʼe ko he faʼifaʼitaki lelei maʼa tatou, he ʼe sio fakahagatonu ki muʼa ki te ka haʼu.
TE LOTOKOVI
9. Ko te aluʼaga fea ʼae ʼe faigataʼa ai hatatou fakamolemole ʼo mulimuli kia Levitiko 19:18?
9 Lau ia Levitiko 19:18. ʼE lagi faigataʼa tatatou fakamolemole moka ʼe ko he tehina, peʼe ko he tuagaʼane, peʼe ko he kaumeʼa lelei, peʼe ko he tahi ʼo totatou famili neʼe ina fakamamahiʼi tatou. Tou vakaʼi te faʼifaʼitaki ʼa he tuagaʼane neʼe tukugakoviʼi hala neʼe ina kaihaʼa te foʼi falā ʼa te tahi tuagaʼane. Ki muli age, neʼe faifakalelei te tuagaʼane ʼae ki ai. Kae neʼe lotokovi ia. Neʼe kua ke tau koa mo he aluʼaga feia mo ke lotokovi ai? Neʼe lagi tou tau fuli mo te aluʼaga ʼaia pea mo ui ʼe mole tou lava galoʼi anai ʼi he temi te kovi ʼae neʼe fai mai.
10. Kotea ʼae ka tokoni mai ke mole tou lotokovi?
10 Kotea ʼae ka tokoni mai ke mole tou lotokovi? Tou manatuʼi ʼe sio ia Sehova kia meʼa fuli. ʼE ina iloʼi lelei pe te ʼu fihifihia fuli ʼae ʼe tou tau mo ia, ʼo toe feia pe mo te ʼu aluʼaga heʼe faitotonu ʼae neʼe fai mai kia tatou. (Hep. 4:13) ʼE ina logoʼi te mamahi ʼae ʼe tou tau mo ia. (Esa. 63:9) Pea ʼe ina fakapapauʼi mai ʼe ina pulihi anai ʼi he ʼaho te ʼu mamahi fuli ʼo totatou loto, ʼae neʼe tupu ʼuhi ko he ʼu aluʼaga heʼe faitotonu ʼae neʼe hoko kia tatou.—Fkha. 21:3, 4.
11. He koʼe ʼe tou lotofimalie anai mo kapau ʼe tou fakamolemole?
11 Tou toe manatuʼi ʼe tou lotofimalie anai mo kapau ʼe tou fakamolemole. Neʼe ko te faʼahi ʼaia neʼe mahino ki ai te tuagaʼane ʼae neʼe tukugakoviʼi hala. ʼAki te temi, neʼe mole kei lotokovi ia. Neʼe ina manatuʼi ʼe fakamolemole anai ia Sehova kia tatou mo kapau ʼe tou fakamolemole ki ʼihi. (Mat. 6:14) Neʼe ina iloʼi ko te meʼa ʼae neʼe fai age e te tuagaʼane ʼe kovi, kae neʼe ina filifili ke ina fakamolemole ki ai. Pea neʼe lahi ai tona fiafia ʼo tokaga tafito ai ki tana tauhi ʼae kia Sehova.
TE TUKUGAKOVIʼI FAU ʼO KITA
12. Kotea ʼe tou ako mai ia 1 Soane 3:19, 20?
12 Lau ia 1 Soane 3:19, 20. ʼI ʼihi temi, ʼe feala ke tou tukugakoviʼi tatou. (Loma 3:23) Ko ʼihi ʼe natou tukugakoviʼi natou ʼuhi ko te ʼu meʼa ʼae neʼe natou fai ʼi muʼa ʼo tanatou iloʼi te moʼoni. Peʼe ko ʼihi ʼi te hili ʼo tanatou papitema. ʼE moʼoni, tatau aipe pe ʼe tou faiga ke tou fai te meʼa ʼae ʼe lelei, kae “ ʼe lahi te ʼu lakaga ʼe tou lakahala fuli ai.” (Sakp. 3:2; Loma 7:21-23) ʼE mahino ia, ʼe mole ko he meʼa lelei te tukugakoviʼi ʼo kita, kae ʼe feala pe ke fua lelei kia tatou. Kotea tona tupuʼaga? He ʼe feala ke uga ai tatou ke tou fai ni fetogi ʼi totatou maʼuli pea mo fakamalohiʼi tatou ke mole tou toe fai te hala ʼaia.—Hep. 12:12, 13.
13. He koʼe ʼe mole tonu ke tou tukugakoviʼi fau tatou?
13 ʼI te tahi fahaʼi, ʼe feala ke tou tukugakoviʼi fau ia tatou. ʼE feala pe ke tou haga tukugakoviʼi tatou, kae neʼe kua tou fakahemala ki ʼatatou agahala, pea neʼe kua fakamolemole mai ia Sehova kia tatou. ʼE kovi te faʼahi ʼaia, he ʼe feala ai ke fakatupu tuʼutamaki kia tatou. (Pes. 31:11; 38:4, 5) Ko he tuagaʼane neʼe ina tukugakoviʼi ia ia ʼuhi ko te ʼu agahala ʼae neʼe ina fai ʼi te temi muʼa. Neʼe ina ui fenei: “Kia au neʼe mole he ʼuhiga ʼo taku gaue kinakina maʼa Sehova, he ʼe lagi ʼe mole haofaki anai ia au.” Ko te tokolahi ia tatou ʼe manatu feia. Kae ʼe tonu ke tou mahino lelei ko te taʼi manatu ʼaia ʼe ko he hele fakatupu tuʼutamaki kia tatou. Fakakaukauʼi age muʼa te fiafia ʼa Satana mo kapau ʼe tou fakagata tatatou tauhi ʼae kia Sehova, kae neʼe kua ina fakamolemole mai.—Vakaʼi mo 2 Kolonito 2:5-7, 11.
14. ʼE feafeaʼi hatatou iloʼi papau kua fakamolemole mai ia Sehova?
14 Logo la te faʼahi ʼaia, ʼe feala ke tou feʼekeʼaki: “ ʼE feafeaʼi haku iloʼi papau kua fakamolemole mai ia Sehova?” Kapau ʼe tou fai te fehuʼi ʼaia, ʼe ha ai kua fakamolemole mai ia Sehova. Kua hili ki ai ni taʼu, neʼe fakamahino fenei mai e Te Tule Leʼo: “ ʼE feala ʼi ʼihi temi ke tou tukia pea mo to tuʼa lahi ʼo fai he agamahani ʼe kovi, neʼe pipiki malohi ki totatou maʼuli ʼafea. . . . ʼAua naʼa kotou lotovaivai. ʼAua naʼa kotou manatu kua kotou fai te agahala ʼae ʼe mole feala
hona fakamolemole. ʼE ko te manatu ʼaia ʼae ʼe loto e Satana ke kotou maʼu. Kapau ʼe kotou tukugakoviʼi koutou pea mo kotou lotomamahi, ʼe ha ai neʼe mole heʼeki mamafa te agahala ʼae neʼe kotou fai. ʼAua naʼa kotou fiu ʼi te haga ki te ʼAtua ʼaki he agavaivai pea mo fai fakamalotoloto, ʼo kotou kole ke fakamolemole atu, ke ina fakamaʼa koutou, pea mo tokoni kia koutou. Kotou fakaovi kia te ia ohage ko te fakaovi ʼa he kiʼi tamasiʼi ki tana tamai ʼi te temi ʼae ʼe lotomamahi ai, tatau aipe pe ʼe kua tuʼa fia takotou fai te agahala ʼaia. Pea ʼe foaki atu anai e Sehova he tokoni ʼaki he lotomanavaʼofa.”15-16. Kotea neʼe logoʼi e ʼihi kaugana ʼa Sehova ʼi tanatou mahino ʼae neʼe kua fakamolemole age ia Sehova kia natou?
15 Tokolahi ʼi te ʼu kaugana ʼa Sehova neʼe natou lotofimalie ʼi tanatou mahino ʼae neʼe kua fakamolemole ia Sehova kia natou. Ohage la ʼe mole faʼa fualoa ki ai, neʼe malave ki he tehina te fakamatala ʼae neʼe fai e he tuagaʼane neʼe tuʼu ʼi te alatike “ ʼE Fetogi Te ʼu Maʼuli ʼUhi Ko Te Tohi-Tapu.” Neʼe fakamahino ai e te tuagaʼane, ʼuhi ko te ʼu meʼa ʼae neʼe hoko ʼi tona maʼuli ʼi muʼa atu, neʼe faigataʼa ai kia ia tana tui ʼae ʼe feala kia Sehova ke ʼofa kia ia. Pea neʼe tonu ke ina tauʼi malohi te manatu ʼaia lolotoga ni taʼu hili tona papitema. Kae ʼi te temi ʼae neʼe metitasio ai ki te totogi ʼa Kilisito, neʼe tui leva ʼe ʼofa ia Sehova ia ia. *
16 Neʼe tokoni feafeaʼi ia te fakamatala ʼa te tuagaʼane ki te tehina? Neʼe ina tohi fenei: “ ʼI taku kei tupulaga, neʼe au sioʼi tuʼumaʼu he ʼu pāki ʼe ha ai he ʼu felaveʼi fakasino pea neʼe faigataʼa kia au taku tuku te faʼahi ʼaia. Kae heʼeki faʼa fualoa, neʼe au toe to ki taku vaivaiʼaga ʼaia. Neʼe au kumi tokoni ki te ʼu tagata ʼafeā ʼo te kokelekasio. Neʼe natou fakalotomalohiʼi au ke au tui ʼe ʼofa pea mo manavaʼofa ia te ʼAtua. Talu mai ai, kua au lava tauʼi toku vaivaiʼaga. Kae ʼi ʼihi temi ʼe au logoʼi, ʼe mole ʼi ai hoku ʼaoga pea ʼe hage ʼe mole feala kia Sehova ke ʼofa ia au. Neʼe au mahino lelei ki toku aluʼaga ʼuhi ko te fakamatala ʼaia ʼo te tuagaʼane. Kapau ʼe au manatu ʼe mole feala ki te ʼAtua ke fakamolemole mai, pea ko tona fakaʼuhiga ʼae ʼe mole feala ki te sakilifisio ʼo tona ʼAlo ke ina ʼuʼufi ʼaku agahala. Neʼe au sipi te alatike ʼaia, ke feala ai haku
toe lau pea mo metitasio ki ai moka hage ʼe au logoʼi ʼe mole ʼofainaʼi au e Sehova.”17. Kotea ʼae neʼe tokoni kia Paulo ke mole ina manatuʼi tuʼumaʼu te ʼu meʼa ʼae neʼe ina fai ʼi muʼa atu?
17 ʼE fakamanatuʼi mai e te ʼu fakamatala ʼaia ʼo te tehina pea mo te tuagaʼane ia te apositolo ko Paulo. ʼI muʼa ʼo tana liliu ko he Kilisitiano, neʼe ina fai he ʼu agahala mamafa. Logo la neʼe mole galo kia ia te ʼu meʼa ʼaia neʼe ina fai, kae neʼe mole ina manatuʼi tuʼumaʼu. (1 Tim. 1:12-15) Neʼe tui papau neʼe feala ke fakamolemole te ʼAtua kia ia, koteʼuhi ko te totogi neʼe ko he meʼa ʼofa ʼa te ʼAtua maʼa ia. (Kal. 2:20) Neʼe feala ai kia Paulo ke tauhi kia Sehova ʼaki tona loto katoa. Pea neʼe mole ina tuku ke taʼomia ia ia ʼi tana manatu tuʼumaʼu ki te ʼu agahala ʼae neʼe ina fai ʼi te temi muʼa.
HAGA KI TE MALAMA FOʼOU
Tou lotomalohi ʼo manatuʼi te ka haʼu (Vakaʼi te palakalafe 18-19) *
18. Kotea neʼe tou ako ʼi te alatike ʼaeni?
18 ʼI te alatike ʼaeni, kotea te ʼu ako neʼe tou maʼu mai te ʼu hele ʼaia ʼe tolu? (1) Ko te manamanatu ki te ʼu meʼa neʼe hoko ʼi te temi muʼa ʼe ko he meʼa ʼofa mai ia Sehova. Pea tatau aipe pe neʼe tou fiafia lahi ai, kae ko te maʼuli ʼae ka tou maʼu anai ʼi te malama foʼou ʼe lelei age ia. (2) Ka tou mamahi ki he tahi, tou fakamolemole ki ai. Pea ʼe feala anai ke tou tokakaga tafito ki tatatou tauhi ʼae kia Sehova. (3) Ko te tukugakoviʼi fau ʼo kita ʼe feala ke mole tou fiafia ʼi te tauhi kia Sehova. Koia ohage ko Paulo, tou tui papau neʼe kua fakamolemole mai ia Sehova kia tatou.
19. ʼE tou iloʼi feafeaʼi ʼi te malama foʼou, ʼe mole tou toe manatuʼi anai te ʼu meʼa ʼae neʼe tou lotomamahi ai?
19 Ko tatatou ʼamanaki ʼe ko te maʼuli heʼe gata. ʼI te malama foʼou ʼe mole tou manatuʼi anai te ʼu meʼa ʼae neʼe tou lotomamahi ai. ʼO ʼuhiga mo te temi ʼaia, ʼe ui fenei ʼi te Tohi-Tapu: “E mole toe manatu anai ki te u mea kua hili.” (Esa. 65:17) Ko ʼihi ia tatou kua lauʼi taʼu tatatou tauhi ʼae kia Sehova pea kua tou matutuʼa. Kae ʼi te malama foʼou ʼe tou toe liliu anai ʼo tupulaga. (Sopo 33:25) Koia tou lotomalohi ʼo mole manatuʼi tuʼumaʼu te ʼu meʼa ʼae neʼe hoko ʼi te temi muʼa. Kae tou haga ki te ka haʼu pea mo manatuʼi te maʼuli taulekaleka ʼae ka tou maʼu anai.
KATIKO 142 Tou Taupau Maʼu Totatou ʼAmanaki
^ pal. 5 ʼE ko he meʼa lelei te manatuʼi te ʼu meʼa ʼae neʼe hoko ʼi totatou maʼuli ʼi muʼa atu. Kae kapau ʼe lahi fau tatatou manatuʼi te ʼu meʼa ʼaia, ʼe feala ai ke mole tou fai ia meʼa fuli maʼa Sehova ʼi te temi nei pea mo galoʼi te ʼu fakapapau taulekaleka ʼa Sehova ʼo ʼuhiga mo te palatiso. ʼI te alatike ʼaeni, ʼe tou vakaʼi anai he ʼu hele ʼe tolu ʼe feala ke tupu ai tatatou manatuʼi tuʼumaʼu pe te ʼu meʼa ʼae neʼe hoko ʼi totatou maʼuli ʼi muʼa atu. ʼE tou vakaʼi anai pe ʼe tokoni feafeaʼi mai te Tohi-Tapu pea mo te ʼu faʼifaʼitaki ʼo ʼotatou tehina mo tuagaʼane ke mole tou to ki te ʼu hele ʼaia.
^ pal. 2 Ta’aga Lea 4:25, NWT: “Ke sio fakahagatonu ʼou mata ki muʼa, ʼei, ke ke sio fakamamaʼo ki te meʼa ʼae ʼi muʼa.”
^ pal. 15 Vakaʼi Te Tule Leʼo (Fakafalani) ʼaho 1 ʼo ʼAukusito 2011, pasina 20-21.
^ pal. 58 FAKAMATALA ʼO TE ʼU PĀKI: Ko te manamanatu ki te ʼu fiafia ʼo te temi muʼa, mo te lotokovi, pea mo te tukugakoviʼi fau ʼo kita ʼe hage ko he ʼu toe kavega ʼe tou toho, pea ʼe faigataʼa ai tatatou haʼele ʼi te ala ʼae ʼe ina taki ki te maʼuli.
^ pal. 65 FAKAMATALA ʼO TE ʼU PĀKI: Ka tou liʼaki te ʼu manatu mamafa ʼaia, ʼe tou fimalie ai pea mo fiafia pea ʼe tou toe malohi ake. ʼE feala ai leva ke tou sisio ki te ka haʼu.