TONATOU MAʼULI
“Neʼe Mole Galoʼi Au e Sehova”
ʼE AU maʼuli ʼi Guyana, ʼi Amelika Saute, ʼi te kolo ko Orealla, pea ʼe maʼuli ai te toko 2 000 hahaʼi. ʼE tuʼu mamaʼo te kiʼi kolo ʼaia, pea ʼe feala pe ke kaku ki ai ʼaki he kiʼi vakalele peʼe ko he vaka.
Neʼe au tupu ʼi te taʼu 1983. ʼI taku kei veliveli, neʼe mole au mahamahaki. Kae ʼi toku taʼu 10 leva, neʼe kamata mamahi toku sino katoa. Hili ki ai taʼu ʼe lua, neʼe au ʼala ake ʼi te tahi ʼaho, neʼe mole kei feala haku gaugaue. Neʼe mole kei au logoʼi ʼoku vaʼe. Neʼe au faigaʼi ke au gaugaue ʼoku vaʼe, kae neʼe mole au lavaʼi. Talu mai ai, mole kei au haʼele. Neʼe fakagata e toku mahaki taku lahilahi ake. Ia ʼaho nei, ʼe au nounou ohage ko he kiʼi tamasiʼi.
Neʼe kua lauʼi mahina taku nofo fale ʼi te temi ʼae neʼe ʼomai ai te ʼu fafine ʼe lua, neʼe ko te ʼu Fakamoʼoni ʼa Sehova, ʼo fisifisi tomatou matapa. ʼI te agamahani, moka ʼomai ni hahaʼi, neʼe au nono. Kae ʼi te ʼaho ʼaia, neʼe au fakalogo ki te ʼu fafine ʼaia ʼe lua. Neʼe nā palalau mai ki te Palatiso, ʼo au manatuʼi ai te ʼu meʼa neʼe kua au ʼosi logo ki ai ʼi muʼa atu. ʼI toku taʼu nima, ko te tehina misionea ko Jethro ʼae neʼe maʼuli ʼi Suriname, neʼe haʼu tuʼa tahi ʼi te mahina ki tamatou kiʼi kolo ʼo akoʼi te Tohi-Tapu ki taku tamai. Neʼe agalelei ʼosi mo au. Pea neʼe au ʼofa mamahi ʼi ai. Tahi ʼae, neʼe tau ʼave au e ʼaku kui ki te ʼu fono ʼa te kau Fakamoʼoni ʼa Sehova ʼae neʼe fai ʼi tamatou kiʼi kolo. Koia, ʼi te kole mai e Florence, he tahi ʼo te ʼu tuagaʼane ʼaia ʼe lua, pe ʼe au fia iloʼi he tahi ʼu meʼa, neʼe au io ki ai.
Neʼe toe liliu mai ia Florence mo tona ʼohoana ko Justus, ʼo nā kamata ai taku ako. Neʼe nā tokagaʼi neʼe mole au poto ʼi te lautohi, koia neʼe nā akoʼi mai te lautohi. Ki muli age, neʼe kua au poto leva. Kae ʼi te tahi ʼaho, neʼe nā ui mai neʼe hinoʼi naua ke nā olo ʼo faifakamafola ʼi Suriname. Neʼe mole ʼi ai he tahi ʼi Orealla ke ina hoko atu taku ako. Kae neʼe mole galoʼi au e Sehova.
Neʼe mole faʼa fualoa ki ai, neʼe haʼu te pionie ko Floyd ki Orealla. ʼI tana faifakamafola ʼi te ʼu fale lau, neʼe haʼu leva kio matou. Neʼe au malimali ʼi tana fakalavelave mai pe ʼe au fia ako te Tohi-Tapu. Neʼe ina fehuʼi fenei mai: “He koʼe ʼe ke malimali?” Neʼe au tali age neʼe kua au ʼosi ako te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? pea neʼe kua au kamata ako te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. * Pea neʼe au fakamahino age pe ʼe koe neʼe tuku taku ako. Koia neʼe au fakaʼosi leva mo ia te tohi Te ʼAtamai Mālama. Ki muli age, neʼe toe hinoʼi mo ia ke alu ʼo faifakamafola ʼi he tahi koga meʼa. Pea neʼe mole toe ʼi ai he tahi moʼo fai taku ako.
Kae ʼi te taʼu 2004, neʼe hinoʼi te ʼu pionie makehe ʼe lua, ko Granville mo Joshua ki Orealla. ʼI tanā faifakamafola ʼi te ʼu fale lau, neʼe nā maʼu ai au. ʼI tanā fakalavelave mai pe ʼe au fia ako te Tohi-Tapu, neʼe au malimali. Neʼe au kole age kia naua ke au toe ako te tohi Te ʼAtamai Mālama. Neʼe au fia iloʼi pe ʼe tatau te ʼu meʼa ʼae neʼe nā akoʼi mai mo ʼae neʼe au ako ʼi muʼa atu. Neʼe fakaha mai e Granville ʼe ʼi ai te ʼu fono ʼe fai ʼi te kiʼi kolo. Neʼe kua teitei taʼu hogofulu taku heʼeki mavae ʼio ʼoku. Kae neʼe au fia kau ki ai. Koia, neʼe fakaheka au e Granville ki he saliote toho ʼo ʼave au ki te Fale Fono.
Ki muli age, neʼe fakalotomalohiʼi au e Granville ke au kau ki te Ako Fakateokalatike. Neʼe ina ui fenei mai: “ ʼE ke maʼimoa, kae ʼe feala pe ke ke palalau. ʼE au iloʼi papau, ʼe ke fai anai he akonaki ʼi he ʼaho.” ʼAki ʼana palalau ʼaia, neʼe au lotomalohi ai.
Neʼe au kamata faifakamafola mo Granville. Kae neʼe tokakovi te ʼu ala kele ʼo te kiʼi kolo ke toho ai au ʼi taku saliote. Koia, neʼe au kole ai kia Granville ke ina toho au ʼi he pulueti. Neʼe lelei ʼosi te fakatuʼutuʼu ʼaia. ʼI Apelili 2005, neʼe au papitema ai. Mole faʼa fualoa ki ai, neʼe akoako au e te ʼu tehina ke au tokaga ki te ʼu tohi ʼo te kokelekasio, pea neʼe natou kole mai ke au tokaga ki te fakatagi ʼo te Fale Fono.
Meʼa fakaʼofaʼofa, ʼi te taʼu 2007, neʼe mate taku tamai ʼuhi he neʼe hoko he tuʼutamaki ʼi te tai. Neʼe lotomamahi tomatou famili. Neʼe faikole ia Granville mo matou, pea neʼe ina vaevae he ʼu vaega Tohi-Tapu fakalotofimalie. Hili taʼu ʼe lua ki muli age, neʼe hoko te tahi tuʼutamaki: ko Granville neʼe mate ʼi te tai.
Neʼe lotomamahi ai tomatou kiʼi kokelekasio, pea neʼe mole kei ʼi ai he tagata ʼafeā, kae ko he tagata faifekau fakaminisitelio pe ʼe tahi. Neʼe au lotomamahi ʼaupito ʼi te mate ʼa Granville, he neʼe ko toku kaumeʼa lelei. Neʼe tokoni tuʼumaʼu mai kia au. Neʼe ina takitaki au ʼi te faʼahi fakalaumalie pea mo tokaga ki te ʼu meʼa ʼae neʼe ʼaoga kia au. ʼI te fono ʼae neʼe fai hili tana mate, neʼe ko au ʼae neʼe lautohi ʼi Te Tule Leʼo. Neʼe au lava lau pe te ʼu ʼuluaki palakalafe ʼe lua, pea neʼe au tagi leva ʼo mole feala haku tuku. Koia, neʼe au mavae ai mai te faiakonakiʼaga.
Neʼe au toe lotomalohi ʼi te ʼomai ʼa te ʼu tehina ʼo te tahi kokelekasio ki Orealla moʼo tokoni mai. Tahi ʼae, neʼe fekauʼi mai e te pilo ʼo te filiale ia Kojo, ʼae neʼe pionie makehe. Neʼe au fiafia ʼaupito he neʼe ako leva taku faʼe mo toku kiʼi tehina veliveli pea neʼe nā papitema. Pea ʼi Malesio 2015, neʼe fakanofo au ko he tagata faifekau fakaminisitelio. Ki muli age, neʼe au fai leva taku ʼuluaki akonaki. ʼI te ʼaho ʼaia, neʼe au toe manatuʼi ʼaki he lotofakafetaʼi te ʼu palalau ʼae neʼe fai mai e Granville ʼi ni taʼu ki muʼa atu: “ ʼE au iloʼi papau, ʼe ke fai anai he akonaki ʼi he ʼaho.” Neʼe au malimali ai mo tagi.
ʼI taku sioʼi te Televisio JW, neʼe au iloʼi ai ʼe tatau te aluʼaga ʼo ʼihi tehina mo tuagaʼane mo au. Logo la tonatou maʼimoa, kae ʼe natou fiafia pea mo fakahoko ni gaue lelei. Mo au la, ʼe kei feala pe ke au fai he ʼu gaue. ʼE au fia tauhi kia Sehova ʼaki te malohi ʼae ʼe kei au maʼu. Koia, neʼe au toʼo leva taku selevisi pionie katoa. Pea ʼi Sepetepeli 2019, neʼe au maʼu te logo ʼae kua fakanofo au ko he tagata ʼafeā ʼi tomatou kiʼi kokelekasio, ʼae ʼe toko 40 kau faifakamafola.
ʼE lahi taku lotofakafetaʼi ki te ʼu tehina mo tuagaʼane ʼae neʼe natou akoʼi mai te Tohi-Tapu pea mo faifakamafola mo au. Kae ʼe au lotofakafetaʼi lahi tafito kia Sehova, ʼae neʼe mole ina galoʼi au.
^ pal. 8 Neʼe ta e te kau Fakamoʼoni ʼa Sehova, kae ʼe mole kei maʼu ʼi te temi nei.