ALATIKE AKO 45
Tokoni Ki ʼIhi Ke Natou Mulimuli Ki Te ʼu Tokoni ʼa Sesu
“Koia, kotou olo ʼo fai ni tisipulo . . . ʼo akoʼi natou ke natou mulimuli ki te ʼu meʼa fuli ʼae neʼe au fakatotonu atu kia koutou.”—MAT. 28:19, 20.
KATIKO 89 ʼE Tapuakinaʼi Te Fakalogo
TE ʼU MANATU FAKANOUNOU *
1. Kotea te fakatotonu ʼae neʼe foaki e Sesu ki ʼana tisipulo ʼo mulimuli kia Mateo 28:18-20?
HILI tana fakatuʼuake, neʼe ha ia Sesu ki ʼana tisipulo ʼi Kalilea. Neʼe fia palalau kia natou ʼo ʼuhiga mo he meʼa maʼuhiga. Neʼe kotea te meʼa ʼaia? ʼE maʼu ʼana palalau ia Mateo 28:18-20.—Lau.
2. Kotea te ʼu fehuʼi ʼe tou tali anai ki ai?
2 ʼE toe fai te fakatotonu ʼa Sesu ʼae ke fai ni tisipulo kia tatou takitahi. Koia ʼi te alatike ʼaeni, ʼe tou tali anai ki ni fehuʼi ʼe tolu, ʼe ʼi ai tona pikipikiga mo te gaue ʼae neʼe foaki mai e Sesu kia tatou. ʼUluaki, kotea ʼe tonu ke tou toe fai, ʼo mole gata pe ki tatatou akoʼi te ʼu tisipulo foʼou ke natou fai te meʼa ʼae ʼe loto ki ai te ʼAtua? Lua, ʼe feafeaʼi he tokoni ʼa te kau faifakamafola fuli ʼo he kokelekasio, ke tuputupu te kau ako ʼo te Tohi-Tapu? Tolu, ʼe feafeaʼi hatatou tokoni ki te ʼu tehina mo tuagaʼane ʼae kua fakamamaʼo mai te kokelekasio ke natou toe faifakamafola?
AKOʼI NATOU KE NATOU MULIMULI KI TE ʼU MEʼA ʼAE NEʼE FAKATOTONU E SESU
3. Kotea te manatu maʼuhiga ʼe maʼu ʼi te fakatotonu ʼa Sesu?
3 ʼE mahino gafua te fakatotonu ʼae neʼe foaki mai e Sesu. ʼE tonu ke tou akoʼi ki te hahaʼi te ʼu meʼa fuli ʼae neʼe ina fakatotonu mai. Kae ʼe mole tonu ke tou galoʼi he manatu maʼuhiga. Neʼe mole ui fenei e Sesu: ‘Akoʼi age kia natou te ʼu meʼa fuli ʼae neʼe au fakatotonu atu.’ Kae ‘akoʼi age kia natou ke natou mulimuli ki te ʼu meʼa fuli ʼae neʼe au fakatotonu atu.’ Koia moʼo fakalogo lelei ki te fakatotonu ʼaia ʼa Sesu, ʼe mole gata pe ke tou akoʼi Gaue 8:31.
ki ʼatatou ako te ʼu meʼa ʼae ʼe tonu ke natou fai, kae ʼe tonu ke tou toe fakaha age pe ʼe feafeaʼi tona fai.—4. ʼE feafeaʼi hatatou akoʼi ki ʼatatou ako ke mulimuli ki te ʼu meʼa ʼae neʼe fakatotonu mai e Sesu? Tuku mai he faʼifaʼitaki.
4 ʼE feafeaʼi hatatou tokoni ki he tahi ke mulimuli ki te ʼu meʼa ʼae neʼe fakatotonu mai e Sesu, ko tona fakaʼuhiga ke fakalogo ki ai? Tou toʼo he faʼifaʼitaki. ʼE feafeaʼi ki he tagata faiako taki motoka hana akoʼi ʼana kau ako ke natou fakalogo ki te ʼu lao ʼo te ala? ʼE ina fakamahino age muʼa kia natou ʼi te fale ako ʼuli motoka pe ʼe kotea te ʼu lao ʼo te ala. Kae moʼo akoʼi natou ke fakalogo ki ai, ʼe ʼi ai te tahi meʼa ʼe tonu ke fai e te tagata faiako. Moka natou ʼuli motoka ʼi te ala, pea mo faigaʼi ai ke natou mulimuli ki te ʼu meʼa ʼae neʼe natou ako ʼi te fale ako, ʼe tonu ke nofo ʼi ʼonatou tafa pea mo fakamahinohino age. Kotea ʼe tou ako ʼi te faʼifaʼitaki ʼaia?
5. (1) Kotea ʼae ʼe tonu ke tou akoʼi ki he tahi ʼe ina ako te Tohi-Tapu ʼo mulimuli kia Soane 14:15; 1 Soane 2:3? (2) ʼE feafeaʼi hatatou takitaki he tahi ʼe ako?
5 Ka tou akoʼi te Tohi-Tapu ki he tahi, ʼe tou fakaha age te meʼa ʼae ʼe loto e te ʼAtua ke tou fai. Kae ʼe ʼi ai te tahi meʼa ʼe tonu ke tou fai. ʼE tonu ke tou akoʼi age pe ʼe feafeaʼi hana mulimuli ki te meʼa ʼae ʼe ina ako. (Lau ia Soane 14:15; 1 Soane 2:3.) ʼAki tatatou faʼifaʼitaki, ʼe feala ke tou fakaha age pe ʼe feafeaʼi hana mulimuli ki te ʼu pelesepeto fakatohi-tapu ʼi te fale ako, ʼi te gaue, peʼe ʼi te ʼu temi fakafiafia. ʼE feala ke tou fakamatala age he aluʼaga neʼe hoko ʼi totatou maʼuli ʼe ha ai ʼe puipui tatou e te ʼu tokoni ʼo te Tohi-Tapu. Pea ʼaki te ʼu tokoni ʼaia, ʼe feala ke tou fai ai he ʼu tonu ʼe lelei. Tahi ʼae, ʼe feala ke tou faikole mo ia, pea ke tou kole kia Sehova ke ina taki ia ia ʼaki tona laumalie maʼoniʼoni.—Soa. 16:13.
6. Kotea ʼe tonu ke tou toe fai moʼo akoʼi ki ʼatatou ako ke mulimuli ki te fakatotonu ʼae neʼe foaki mai e Sesu?
6 Kotea ʼae ʼe tonu ke tou fai moʼo akoʼi ki ʼatatou ako ke mulimuli ki te fakatotonu ʼae neʼe foaki mai e Sesu? ʼE tonu ke tou tokoni ki ai ke fia kau ki te gaue ʼae ko te fai ʼo ni tisipulo. Ko ʼihi ako ʼe feala ke natou matataku ʼi te faifakamafola. Koia ʼe tonu ai ke tou faʼa kataki ʼo akoʼi natou. Ka natou mahino lelei age anai ki te ʼu moʼoni fakatohi-tapu, ʼe malave anai ki ʼonatou loto pea ʼe uga ai anai natou ke natou faifakamafola. Kotea te meʼa ʼe feala ke tou fai moʼo tokoni ki ʼatatou ako ke natou fia faifakamafola?
7. ʼE feafeaʼi hatatou tokoni ki he ako ke fia faifakamafola?
7 ʼE feala anai ke tou fehuʼi age ki tatatou ako: “Talu mai tau maʼuliʼi te ʼu pelesepeto fakatohi-tapu kua ke tokagaʼi koa kua fetogi tou maʼuli? ʼI tau manatu la ʼe ʼaoga koa ke logo ʼihi ki te ʼu moʼoni ʼaia? ʼE feafeaʼi hau tokoni kia natou ʼaia?” (Taag. 3:27; Mat. 9:37, 38) Fakaha age te ʼu kiʼi pepa lotu ʼae ʼe maʼu ʼi te Meʼa Gaue Ki Te Faiako. Pea ke kole age ke ina filifili te ʼu pepa lotu ʼae ʼe fia lau anai e tona famili, mo ʼona kaumeʼa, pea mo ʼona kauga gaue. Foaki lahi age te ʼu kiʼi pepa lotu ʼaia. Pea ka kolua fai he faʼifaʼitaki ʼo te faifakamafola, tokoni ki ai ke lelei ʼana palalau moka ina fakaha he kiʼi pepa lotu. Ka liliu anai tatatou ako ko he kauga fagona ʼe heʼeki papitema, ʼe tou faifakamafola anai mo ia ʼo tokoni ki ai.—Ekl. 4:9, 10; Luka 6:40.
ʼE FEALA KE TOKONI TE KOKELEKASIO KE NATOU TUPUTUPU
8. He koʼe ʼe maʼuhiga ki he ako ke ina fakatuputupu tona ʼofa ki te ʼAtua pea mo tona tatau? (Toe vakaʼi mo te fakamatala ʼae ʼi te ʼa takai “ Tokoni Ki Tau Ako Ke Ina Fakamalohiʼi Tona ʼOfa Ki Te ʼAtua.”)
8 ʼAua naʼa galo kia koe neʼe fakatotonu mai e Sesu ke tou ako ki ʼihi “ke natou mulimuli ki te ʼu meʼa fuli” ʼae neʼe ina fakatotonu mai. ʼE kau ki ai te ʼu fakatotonu ʼaeni ʼe lua ʼe lahi age, ʼae ko te ʼofa ki te ʼAtua mo te ʼofa ki tou tatau. ʼE Mat. 22:37-39) Kotea tona fakaʼuhiga? Ko te tupuʼaga tafito ʼo tatatou faifakamafola, ʼe ko tatatou ʼofa ʼae ki te ʼAtua pea mo tatatou ʼofa ʼae ki totatou tatau. ʼE mahino ia, ʼe feala ke matataku ʼihi kau ako ʼi te faifakamafola. Kae ʼe feala ke tou fakalotomalohiʼi natou, ʼo ui age ʼaki te tokoni ʼa Sehova ʼe natou lava tauʼi anai tanatou mataku ki te tagata. (Pes. 18:2-4; Taag. 29:25) ʼE fakamahino mai ʼi te fakamatala ʼae ʼi te ʼa takai ʼi te alatike ʼaeni pe ʼe feafeaʼi hatatou tokoni ki ʼatatou ako ke ina fakamalohiʼi tona ʼofa ki te ʼAtua. Kae ʼe toe tokoni feafeaʼi te kokelekasio ki te kau tisipulo foʼou ke tuputupu tonatou ʼofa?
ʼi ai te pikipikiga ʼo te ʼu fakatotonu ʼaia mo te gaue faifakamafola pea mo te gaue faiako. (9. ʼE feafeaʼi te akoako e he tahi te ʼuli motoka?
9 Tou toe vakaʼi te faʼifaʼitaki ʼo ia ʼae ʼe ako ʼuli motoka. ʼI tana alu ʼaia ʼi te ala mo te tagata faiako, ʼe feafeaʼi tana akoako te ʼuli motoka? ʼI tana fakalogo ki te ʼu tokoni ʼo tana tagata faiako, pea mo tana sioʼi ia natou ʼae ʼe lelei tanatou ʼuli motoka. Ohage la, ʼe lagi ʼe fakaha age e te tagata faiako he tahi ʼe taki motoka ʼe agalelei, ʼe ina tuku ki he tahi motoka ke fakalaka ʼi ʼona muʼa. ʼE feala ke ina toe fakatokagaʼi ki tana ako he tahi ʼe taki motoka ʼe mole ina fakamu malohi ʼona hila naʼa pulagia te ʼu motoka ʼae ʼe haʼu mai muʼa. ʼAki tanatou faʼifaʼitaki, ʼe tokoni te kau ʼuli motoka ʼaia ki te ako ke taki motoka lelei.
10. Kotea ʼe tokoni anai ki he ako Tohi-Tapu ke tuputupu?
10 ʼE toe feia pe mo ia ʼae ʼe kamata haʼele ʼi te ala ʼae ʼe taki ki te maʼuli, ʼe lahi anai te ʼu meʼa ʼe ina ako mai tana faiako pea mo ʼihi kaugana ʼa Sehova. Koia ʼe feafeaʼi he tuputupu vave ʼo he ako Tohi-Tapu? ʼI tana kau ki ʼatatou fono. ʼE feala ke mahino lelei age ki te Tohi-Tapu, ʼuhi ko te ʼu manatu ʼae ʼe logo ki ai ʼi te ʼu fono, mo fakamalohiʼi ai tana tui pea mo lahi age tona ʼofa ki te ʼAtua. (Gaue 15:30-32) Pea tahi ʼae, ʼe feala ʼi te ʼu fono ki tana faiako ke tokoni ki ai, ke feiloʼiʼaki mo ni tehina mo tuagaʼane ʼe tatau ʼonatou aluʼaga mo ia. ʼE toe feala ki te ako ke sio ai ki te feʼofaʼaki ʼo te ʼu tehina mo tuagaʼane. Tou vakaʼi te ʼu aluʼaga ʼaeni.
11. Kotea te ʼu aluʼaga ʼe feala ke malave ki he tahi ʼe ako, pea kotea tona fua kia ia?
11 Ko he fafine ʼe ako te Tohi-Tapu ʼe ina taupau tokotahi ʼana fanau, ʼe ina sioʼi te tuagaʼane ʼe tatau tona aluʼaga mo ia. ʼE malave kia ia tana sio ki te ʼu faiga ʼae ʼe fai e te tuagaʼane ke haʼu ki te ʼu fono mo ʼana fanau. Ko he tagata ʼe ako pea ʼe faigataʼa kia ia tana tuku tana suluka. ʼE feiloʼiʼaki mo he tehina neʼe ina lava tauʼi te faigataʼaʼia ʼaia. ʼE fakamatala age e te tehina tona hisitolia pea mo fakamahino age, neʼe lava mulimuli ki te ʼu fakatotonu ʼaia ʼi tana fakamalohiʼi tona ʼofa kia Sehova. (2 Ko. 7:1; Flp. 4:13) Pea ʼe lotomalohi te ako ke hoko atu ʼana faiga ʼi te ui age e te tehina: “Mo koe la, ʼe ke lava tuku tau suluka.” ʼE tokagaʼi e te kiʼi taʼahine ʼe ako te Tohi-Tapu, te tuagaʼane kei finemui ʼe lototokaga pea mo fiafia tuʼumaʼu, ʼe tupu ai tana fia iloʼi pe koʼe ʼe fiafia tuʼumaʼu.
12. He koʼe ʼe tou ui ko te ʼu tehina mo tuagaʼane fuli ʼo te kokelekasio ʼe feala hanatou tokoni ki te tuputupu ʼo he ako?
12 Neʼe fakatotonu mai e Sesu ke tou ʼofa ki te ʼAtua pea mo ʼofa ki totatou tatau. (Soa. 13:35) ʼI te feiloʼiʼaki ʼa te ako mo ni tehina mo tuagaʼane kehekehe ʼo te kokelekasio, ʼe feala ai ke ina ako mai tanatou faʼifaʼitaki pe ʼe feafeaʼi tana fakalogo ki te fakatotonu ʼaia. (1 Tim. 4:12) Pea ohage pe ko tatatou kua ʼosi ui, ʼe lahi te ʼu meʼa ʼe feala ke ina ako mai te ʼu tehina mo tuagaʼane neʼe natou lava tauʼi te ʼu faigataʼaʼia ʼe tatau mo ia. ʼE ha ʼi ʼanatou faʼifaʼitaki ʼe feala mo ia ke ina fai te ʼu fetogi ʼae ʼe ʼaoga ke liliu ko he tisipulo ʼa Kilisito. (Tet. 30:11) ʼE feala ki te ʼu tehina mo tuagaʼane fuli ʼo te kokelekasio ke natou tokoni ki te tuputupu ʼo he ako. (Mat. 5:16) Kae kia koe, kotea ʼae ʼe ke fai moʼo fakalotomalohiʼi te kau ako ʼae ʼe kau ki te ʼu fono?
KE KE TOKONI KIA NATOU ʼAE KUA FAKAMAMAʼO MAI TE KOKELEKASIO KE NATOU TOE FAIFAKAMAFOLA
13-14. Neʼe feafeaʼi te aga ʼa Sesu ki ʼana kau apositolo ʼi tanatou kua lotovaivai?
13 ʼE tou fia tokoni ki ʼotatou tehina mo tuagaʼane ʼae kua fakamamaʼo mai te kokelekasio, ke natou toe kau ki te gaue ʼae neʼe fakatotonu mai e Sesu ke tou fakahoko, ʼae ko te fai ʼo ni tisipulo. Ke tou iloʼi pe ʼe feafeaʼi tona faʼahiga fai, tou vakaʼi pe neʼe feafeaʼi te aga ʼa Sesu ki ʼana kau apositolo ʼi tanatou kua lotovaivai.
14 ʼI muʼa pe ʼo te mate ʼa Sesu, ko ʼana kau apositolo “neʼe natou liʼaki fuli ia ia kae natou feholaki.” (Mko. 14:50; Soa. 16:32) Neʼe feafeaʼi te aga ʼa Sesu kia natou ʼi tanatou kua lotovaivai ʼaia? ʼI te hili pe ʼo tona fakatuʼuake, neʼe ina ui fenei ki ʼihi ʼo ʼana tisipulo: “ ʼAua naʼa kolua matataku! Kolua olo ʼo fakamatala ki ʼoku tehina [kua fakatuʼuake au].” (Mat. 28:10, ʼuluaki koga) Neʼe mole liʼaki e Sesu ʼana kau apositolo. Tatau aipe pe neʼe natou liʼaki ia ia, kae neʼe ina fakahigoaʼi pe ia natou “ ʼoku tehina.” Ohage ko Sehova, neʼe fonu ia Sesu ʼi te manavaʼofa pea mo lotofakamolemole.—2 Hau 13:23.
15. Kotea ʼae ʼe tou logoʼi ʼo ʼuhiga mo natou ʼae ʼe mole kei faifakamafola?
15 ʼO toe feia pe, ʼe tou toe tokakaga fakamalotoloto kia natou ʼae ʼe mole kei faifakamafola. ʼE ko ʼotatou tehina mo tuagaʼane pea ʼe tou ʼoʼofa ia natou. ʼE mole galo kia tatou te ʼu gaue fuli ʼae neʼe natou fai he neʼe natou ʼoʼofa kia Sehova, pea ko ʼihi neʼe gaue kinakina ʼi ni lauʼi taʼu. (Hep. 6:10) ʼE tou fia sisio kia natou. (Luka 15:4-7) ʼE feafeaʼi hatatou fakaha tatatou ʼofa kia natou? Tou toe vakaʼi te faʼifaʼitaki ʼa Sesu.
16. ʼE feafeaʼi hatatou fakaha tatatou ʼofa ki ʼotatou tehina mo tuagaʼane ʼae kua fakamamaʼo mai te kokelekasio?
16 Fakaafe natou ki ʼatatou fono. Neʼe fakalotomalohiʼi e Sesu ʼana kau apositolo ʼi tana fakaafe natou ki he fono. (Mat. 28:10, lua koga; 1 Ko. 15:6) ʼO toe feia pe, ʼe feala ke tou fakalotomalohiʼi ʼotatou tehina mo tuagaʼane, ʼae kua fakamamaʼo mai te kokelekasio ke natou kau ki ʼatatou fono. ʼE mahino ia, ʼe lagi tonu anai ke tou fakaafe liuliuga ia natou ia muʼa ʼo tanatou tali. Kae kapau ʼe natou ʼomai ʼe tou fiafia lahi anai, ohage ko Sesu ʼae neʼe lagi fiafia ʼi te tali ʼo ʼana kau apositolo tana fakaafe.—Vakaʼi ia Mateo 28:16 pea mo Luka 15:6.
17. ʼE feafeaʼi hatatou fakatalitali he tahi kua fakamamaʼo mai te kokelekasio ʼe haʼu ki ʼatatou fono?
17 Tou fakatalitali lelei natou. ʼI te toe felaveʼi ʼa Sesu mo ʼana kau apositolo, neʼe mole natou tuʼania. Neʼe fakaovi mo palalau age kia natou. (Mat. 28:18) ʼE feafeaʼi hatatou fakatalitali ʼi tatatou fale fono he tahi kua fakamamaʼo mai te kokelekasio? Tou olo ki ai pea mo fakamalo age. ʼE lagi ʼe tou tuʼania anai he ʼe mole tou iloʼi pe kotea ʼae ka tou ui age. Kae ʼe feala pe ke tou ui age ʼe tou fiafia ʼi tatatou sio ki ai.
18. ʼE feafeaʼi hatatou fakalotomalohiʼi ia natou ʼae kua fakamamaʼo mai te kokelekasio ke natou toe faifakamafola?
18 Fakalotomalohiʼi natou. Neʼe lagi ui e te ʼu tisipulo ʼa Sesu ʼe mole feala anai ke natou faifakamafola ʼi te malamanei katoa. Neʼe fakalotomalohiʼi natou e Sesu, ʼo ina ui fenei: “ ʼE au nofo anai mo koutou ʼi te ʼaho fuli pe.” (Mat. 28:20) Neʼe malave feafeaʼi te ʼu palalau ʼaia kia natou? Neʼe mole fualoa ki ai neʼe natou “faiakonaki pea mo tala te logo lelei” ʼaki he faʼafai. (Gaue 5:42) Pea ʼe toe ʼaoga foki ke toe fakalotomalohiʼi ia natou ʼae kua fakamamaʼo mai te kokelekasio. ʼE lagi ʼe natou manatu ʼe mole feala anai hanatou toe faifakamafola. ʼE feala ke tou fakalotomalohiʼi natou, ʼo ui age ʼe tou gaue fakatahi anai mo natou. Pea ka natou tokalelei, ʼe tou olo anai ʼo faifakamafola mo natou. ʼE natou leleiʼia anai tatatou tokoni. Kapau ʼe natou tokagaʼi ʼe tou fakaʼuhiga natou ko ʼotatou tehina mo tuagaʼane, ʼe lagi natou toe fia kau anai ki te kokelekasio. Pea ʼe lahi anai te fiafia ʼo te kokelekasio.
ʼE TOU FIA FAKAʼOSI TE GAUE ʼAE NEʼE FOAKI MAI
19. Kotea te meʼa ʼe tou loto ke tou fai, pea kotea tona tupuʼaga?
19 ʼE kaku anai ki ʼafea tatatou fai ʼo ni tisipulo? ʼE kaku anai ki te fakaʼosi ʼo te ʼu faʼahiga meʼa ʼaeni. (Mat. 28:20; vakaʼi Te ʼu Kupu Mo ʼOna Fakaʼuhiga, ʼi te kupu “Fakaʼosi ʼo te tuʼu ʼo te ʼu faʼahiga meʼa.”) ʼE tou lava fakahoko anai koa te gaue ʼae neʼe foaki mai e Sesu ʼo kaku ki te temi ʼaia? Kua tou loto moʼoni ki ai. ʼE tou fiafia ʼi te foaki ʼo totatou temi, mo totatou malohi pea mo tatatou paʼaga moʼo kumi te hahaʼi ʼae ʼe “lelei ʼonatou loto ke natou maʼu te maʼuli heʼe gata.” (Gaue 13:48) ʼE tou mulimuli ai ki te faʼifaʼitaki ʼa Sesu. Neʼe ina ui fenei: “Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au pea mo fakaʼosi tana gaue.” (Soa. 4:34; 17:4) ʼE ko te meʼa ʼaia ʼe tou loto ke tou fai. ʼE tou fia fakaʼosi te gaue ʼae neʼe foaki mai. (Soa. 20:21) Pea ʼe tou faʼa kataki ʼi te gaue ʼaia, ʼo fakatahi mo te ʼu tehina mo tuagaʼane fuli. ʼE tou loto ke kau mo tatou ʼi te gaue ʼaia ia natou ʼae kua fakamamaʼo mai te kokelekasio.—Mat. 24:13.
20. Kotea te tokoni ʼe foaki mai moʼo fakahoko te gaue ʼae neʼe fakatotonu mai e Sesu ke tou fai, ʼo mulimuli kia Filipe 4:13?
20 ʼE moʼoni ia, ʼe mole faigafua te fakahoko ʼo te gaue ʼae neʼe foaki mai e Sesu. Kae ʼe mole tou tokotahi moʼona fakahoko. Neʼe fakapapau mai e Sesu ʼe nofo anai mo tatou. ʼE tou “kauga gaue mo te ʼAtua” mo faifakamafola ʼo “fakatahi mo Kilisito.” (1 Ko. 3:9; 2 Ko. 2:17) Koia ʼe tou lava fakahoko te gaue ʼaia. Ko he toe pilivilesio mo he toe fiafia tatatou fakahoko te gaue ʼaia pea mo tokoni ki ʼihi ke natou fai feia.—Lau ia Filipe 4:13.
KATIKO 79 Akoʼi Age Ke Natou Tutuʼu Malohi
^ pal. 5 Neʼe fakatotonu e Sesu ki ʼana tisipulo ke natou fai ʼihi tisipulo, pea mo akoʼi natou ke natou mulimuli ki te ʼu meʼa fuli ʼae neʼe ina fakatotonu. ʼE fakaha ʼi te alatike ʼaeni pe ʼe feafeaʼi hatatou fakalogo ki te fakatotonu ʼaia ʼa Sesu. ʼE toe fakaʼaogaʼi ai te ʼu manatu ʼo te alatike ʼo Te Tule Leʼo ʼo te ʼaho 1 ʼo Sulio 2004, pasina 14-19.
^ pal. 66 FAKAMATALA ʼO TE PĀKI: ʼE fakamahino e he tuagaʼane ki tana ako Tohi-Tapu pe ʼe feafeaʼi hana fakamalohiʼi tona ʼofa ki te ʼAtua. Ki muli age, ʼe maʼuliʼi e te ako te ʼu tokoni ʼe tolu neʼe foaki age e tana faiako.