1-2. (1) Kotea te ʼu fehuʼi ka tou vakaʼi anai? (2) ʼE tou iloʼi feafeaʼi ʼe fia tokoni moʼoni mai ia Sehova?

 ʼE LAVA tokoni mai ia Sehova ke tou katakiʼi te ʼu faigataʼaʼia pea ke tou fiafia ʼi tatatou tauhi taputapu. ʼE feafeaʼi tana tokoni mai? Pea ʼe feafeaʼi hatatou maʼu te tokoni ʼaia mai ia Sehova? ʼE tali anai te alatike ʼaeni ki te ʼu fehuʼi ʼaia. Kae tou tali muʼa ki te fehuʼi ʼaeni: ʼE fia tokoni moʼoni mai koa ia Sehova kia tatou?

² ʼE tou maʼu tona tali ʼi te kupu neʼe fakaʼaogaʼi e te apositolo ko Paulo ʼi tana tohi ʼae ki te kau Hepeleo. Neʼe ina tohi fenei: “Ko Sehova ʼe ko toku tokoni. ʼE mole au mataku anai. Kotea ʼae ʼe feala ke fai mai e te tagata?” (Hep. 13:6) ʼI te tahi ʼu fakamahino fakatohi-tapu, ko te kupu “tokoni” ʼi te vaega ʼaia ʼe fakaʼuhiga ki he tahi ʼe lele ʼo tokoni ki he tahi. Kotou fakakaukauʼi age muʼa te tokoni fakavilivili ʼa Sehova ki he tahi ʼe tau mo he faigataʼaʼia. Koia, ʼe ha lelei mai ai ʼe fia tokoni fakavilivili mai ia Sehova kia tatou. ʼAki te tokoni ʼa Sehova, ʼe tou lava katakiʼi ai ʼotatou faigataʼaʼia mo he lotofiafia.

3. Kotea te ʼu faʼahi ʼe tolu ʼe tokoni mai ai Sehova kia tatou?

³ ʼE tokoni feafeaʼi mai ia Sehova ke tou lava katakiʼi ʼotatou faigataʼaʼia mo he lotofiafia? Moʼo tali ki ai, tou vakaʼi te tohi ʼo Esaia. Kotea tona tupuʼaga? Heʼe lahi te ʼu lea fakapolofeta neʼe fakaha e Sehova kia Esaia, ʼe ʼaoga ki te ʼu kaugana ʼa te ʼAtua ia ʼaho nei. Pea tahi, ʼe tau fakaʼaogaʼi e Esaia he ʼu kupu ʼe faigafua hatatou mahino ki ai moka palalau ʼo ʼuhiga mo Sehova. Ohage la ʼi te kapite 30, ʼe fakaʼaogaʼi ai e Esaia he ʼu fakata matalelei moʼo fakaha mai pe ʼe feafeaʼi te tokoni ʼa Sehova ki tana hahaʼi. Neʼe ina tohi ʼe tokoni mai ia Sehova  (1) ʼaki tana fakalogo ki ʼatatou faikole pea mo tali ki ai, (2) ʼaki tana takitaki tatou, pea (3) ʼaki tana tapuakinaʼi tatou ʼi te temi nei pea mo te ka haʼu. Tou vakaʼi te ʼu faʼahi ʼaia ʼe tolu.

4. (1) Kotea ʼae neʼe ui e Sehova huʼu mo te kau Sutea ʼi te temi ʼo Esaia, pea kotea neʼe ina tuku ke hoko kia natou? (2) Kotea te logo fakafiafia neʼe tala e Sehova ki te kau agatonu? (Esaia 30:18, 19, NWT)

⁴ ʼI te kamata pe ʼo te kapite 30 ʼo Esaia, neʼe ui e Sehova ko te kau Sutea “ko te u fanau logogataa” pea ʼe lahi tanatou fai ni agahala. Neʼe ina toe hoko atu fenei: “Ko he hahai agatuu, . . . e mole fia logo ki te lao a [“Sehova,” NWT].” (Esa. 30:1, 9) ʼUhi ko te mole fia fakalogo ʼa te hahaʼi, neʼe fakakikite e Esaia ʼe tuku anai e Sehova ke hoko he malaʼia kia natou. (Esa. 30:5, 17; Sel. 25:8-11) Pea neʼe hoko te faʼahi ʼaia, he neʼe ʼave natou ʼo ʼaunofo ʼi Papiloni. Kae neʼe ʼi ai pe ni hahaʼi agatonu ʼi te kau Sutea ʼaia, pea neʼe tala e Esaia kia natou he logo fakafiafia. Neʼe ina ui age ʼe fakagafua anai e Sehova ke natou toe liliu ki Selusalemi. (Lau ia Esaia 30:18, 19, NWT. b) Pea ko te meʼa pe ʼaia neʼe hoko. Neʼe fakaʼateainaʼi natou e Sehova mai Papiloni. Kae neʼe hili ni taʼu ʼi muʼa ʼo tonatou fakaʼateaina ʼaia. Ko te ui ʼae “ ʼe haga fakatalitali ia Sehova ke ina fakaha atu tona ʼofa,” ko tona fakaʼuhiga neʼe tonu ke fakalaka he temi, ʼi muʼa ʼo te haofaki ʼo te kau agatonu. ʼEi, neʼe taʼu 70 te ʼaunofo ʼa te kau Iselaele ʼi Papiloni, pea neʼe hoki fakagafua leva ke toe liliu ʼihi ki Selusalemi. (Esa. 10:21; Sel. 29:10) Neʼe mole kei natou fetagihi ʼi te lotomamahi ʼuhi ko tanatou ʼaunofo. Kae neʼe natou fetagihi fakafiafia ʼuhi ko tanatou toe liliu ki tonatou fenua.

5. Kotea te ʼu palalau fakalotofimalie ʼe tou maʼu ia Esaia 30:19 (NWT)?

⁵ Ia ʼaho nei, ʼe tou maʼu he fakalotofimalie ʼi te ʼu palalau ʼaeni: “ ʼE ina fakaha moʼoni atu anai tona manavaʼofa moka ke kalaga ke tokoni atu.” (Esa. 30:19, NWT) ʼE ui e Esaia, ʼe fakalogo lelei anai ia Sehova moka tou kalaga age kia te ia, pea ʼe tali fakavilivili mai anai. ʼE toe ui fenei e Esaia: “ ʼI te temi pe ʼae ka logo ki ai, ʼe tali atu anai kia koe.” ʼE fakamanatuʼi mai e te ʼu palalau fakalotofimalie ʼaia, te loto moʼoni ʼa tatatou Tamai ke tokoni kia natou ʼe kole tokoni age. ʼI tatatou iloʼi te faʼahi ʼaia, ʼe tou faʼa kataki ai mo he lotofiafia.

6. ʼE ha feafeaʼi ʼi te ʼu palalau ʼa Esaia ʼe fakalogo ia Sehova ki te ʼu faikole ʼa ʼana kaugana takitokotahi?

⁶ Kotea te tahi faʼahi ʼe tou ako mai te vaega ʼaia ʼo ʼuhiga mo ʼatatou faikole? ʼE fakalogo ia Sehova ki ʼatatou faikole takitokotahi. ʼE tou iloʼi te faʼahi ʼaia, he ʼe ʼi te ʼuluaki koga ʼo te kapite 30 ʼo Esaia, ʼe fakaʼaogaʼi e Sehova te kupu “koutou” he ʼe palalau ki tana hahaʼi katoa. Kae ʼi te vaega 19, ʼe palalau leva ia kia natou takitokotahi. ʼE tohi e Esaia: “ ʼE mole ke toe tagi anai,” “ ʼe ina fakaha moʼoni atu anai kia koe,” “ ʼe tali atu anai kia koe.” ʼI tona ʼuhiga Tamai ʼofa, ʼe mole ui e Sehova ki hona foha peʼe ko hona ʼofafine kua lotovaivai: “Lotomalohi ohage ko tou tehina peʼe ko tou tuagaʼane ʼae.” Kailoa ia, kae ʼe tokaga kia tatou takitokotahi, pea ʼe fakalogo fakalelei ki ʼatatou faikole.—Pes. 116:1; Esa. 57:15.

7. ʼE fakaha feafeaʼi mai e Esaia mo Sesu te maʼuhiga ʼae ke tou faikole tuʼumaʼu?

⁷ Ka tou faikole kia Sehova ʼo ʼuhiga mo hotatou faigataʼaʼia, ʼe lagi ina tali fakavilivili  mai anai, ʼo ina foaki mai te malohi ke tou lava katakiʼi. Pea kapau ʼe hoko atu pe te faigataʼaʼia ʼaia, ʼe lagi tonu anai ke tou kole liuliuga age te malohi. Pea ko te faʼahi ʼaia ʼe ui mai e Sehova ke tou fai, ʼi te ʼu palalau ʼaeni neʼe tohi e Esaia: “Aua naa koutou tuku he malolo kia [Sehova] i he lakaga.” (Esa. 62:7) Kotea tona fakaʼuhiga? ʼE tonu ke tou faikole tuʼumaʼu ʼo ʼuhiga mo hotatou faigataʼaʼia, ohage pe ʼe mole tou tuku kia Sehova he malolo ʼi he lakaga. ʼE fakamanatuʼi mai e te ʼu palalau ʼaia ʼa Esaia te ʼu lea fakata ʼa Sesu ʼo ʼuhiga mo te faikole, ia Luka 11:8-10, 13. ʼE fakalotomalohiʼi ai tatou e Sesu ke tou “haga kole fakakinau” pea mo “haga kole” te laumalie maʼoniʼoni. ʼE feala ke tou toe kole mamahi kia Sehova ke tokoni mai ke tou toʼo he ʼu tonu ʼe lelei.

8. ʼI te temi muʼa, neʼe hoko feafeaʼi te ʼu palalau ia Esaia 30:20, 21 (NWT)?

⁸ Lau ia Esaia 30:20, 21, NWT. c ʼI te ʼa takai ʼo Selusalemi e te kautau ʼo Papiloni ʼi he taʼu katoa vaelua, neʼe lahi ʼaupito te mamahi ʼa te hahaʼi. Kae, ohage ko tona ui ʼi te ʼu vaega 20, 21 neʼe fakapapau e Sehova ki te kau Sutea kapau ʼe natou fakahemala mo fetogi ʼanatou aga, ʼe ina haofaki anai natou. Neʼe fakata e Esaia ia Sehova ki he “Faiako Lahi,” pea neʼe ina fakapapau ki te hahaʼi ʼe akoʼi anai e Sehova kia natou te tauhi ʼae ʼe ina leleiʼia. Neʼe hoko te ʼu palalau ʼaia ʼi te fakaʼateainaʼi ʼo te kau Sutea mai tanatou ʼaunofo. Neʼe liliu ia Sehova ko tonatou Faiako Lahi, pea ʼaki tana takitaki neʼe feala ke natou toe fakatuʼu te tauhi maʼa. ʼE tou fiafia ia ʼaho nei he ʼe ko Sehova totatou Faiako Lahi.

9. ʼE takitaki feafeaʼi tatou e Sehova ia ʼaho nei?

⁹ ʼE toe fakata tatou e Esaia ki ni kau ako ʼe akoʼi e Sehova ʼi ni aluʼaga ʼe lua. ʼUluaki ʼe ui e Esaia: “ ʼE ke sio tonu anai ki tou Faiako Lahi.” ʼI te palalau fakata ʼaia, ʼe tuʼu te Faiako ʼi muʼa ʼo ʼana kau ako. ʼE tou fiameʼameʼa ʼi te akoʼi ʼo tatou e te ʼAtua ia ʼaho nei! ʼE ina akoʼi feafeaʼi tatou? ʼAki tana kautahi. ʼE tou lotofakafetaʼi ki te akoʼi ʼo tatou e tana kautahi ʼi te ʼu fono, mo te ʼu fakatahi, mo te ʼu tohi, mo te Televisio jw, pea mo te tahi atu ʼu aluʼaga. ʼE tokoni mai te ako ʼaia ke tou katakiʼi ʼotatou faigataʼaʼia mo he lotofiafia.

10. ʼE feafeaʼi hatatou logo ki “he folafola ʼe haʼu mai [ʼotatou] tuʼa”?

 ¹⁰ ʼE fakaha e Esaia te lua faʼahiga akoʼi ʼo tatou e Sehova. Neʼe ina ui fenei: “ ʼE logo anai ʼou taliga ki he folafola ʼe haʼu mai tou tuʼa.” ʼE fakata ʼi heni e Esaia ia Sehova ki he faiako ʼe ina muliʼi ʼana kau ako. ʼE ina fakaha age te ala ʼae ʼe tonu ke natou olo ai pea mo takitaki natou. Ia ʼaho nei, ʼe tou logo ki te leʼo ʼo te ʼAtua mai ʼotatou tuʼa. ʼO feafeaʼi? Ko te ʼu folafola mai te ʼAtua neʼe tohi kua fualoa talu mai muʼa ʼi te Tohi-Tapu. Koia, ka tou lau te Tohi-Tapu ʼe hage pe ʼe tou logo ki te leʼo ʼo te ʼAtua ʼe haʼu mai ʼotatou tuʼa.—Esa. 51:4.

11. Ke tou faʼa kataki mo he lotofiafia, kotea te ʼu faʼahi ʼe tonu ke tou fai, pea kotea tona tupuʼaga?

¹¹ ʼE feafeaʼi hatatou maʼu te ʼu lelei ʼo te takitaki ʼa Sehova ʼaki tana kautahi pea mo tana Folafola? Kotou tokagaʼi ʼe ui e Esaia faʼahi ʼe lua. ʼUluaki: “Koʼeni te ala” pea lua “kotou haʼele ai.” (Esa. 30:21, NWT) ʼE mole gata pe tatatou iloʼi “te ala,” kae ʼe tonu foki ke tou “haʼele ai.” ʼAki ia te Folafola ʼa Sehova pea mo te ʼu fakamahino mai tana kautahi, ʼe tou ako ai te ʼu meʼa ʼae ʼe loto e Sehova ke tou fai, pea mo tona faʼahiga maʼuliʼi. Ke tou faʼa kataki mo he lotofiafia ʼi tatatou tauhi kia Sehova, ʼe tonu ke tou mulimuli ki te ʼu faʼahi ʼaia ʼe lua. Kapau ʼe tou fai te ʼu faʼahi ʼaia, ʼe tapuakinaʼi moʼoni anai tatou e Sehova.

12. ʼO mulimuli kia Esaia 30:23-26, neʼe tapuakinaʼi feafeaʼi e Sehova tana hahaʼi?

¹² Lau ia Esaia 30:23-26. Neʼe hoko feafeaʼi te lea fakapolofeta ʼaia ki te kau Sutea ʼae neʼe toe liliu ki Iselaele hili tanatou ʼaunofo ʼi Papiloni? Neʼe tapuakinaʼi lahi natou ʼi te faʼahi fakasino mo te faʼahi fakalaumalie. Neʼe foaki e Sehova ki tana hahaʼi te toe meʼa kai lahi. Kae ko te faʼahi ʼae neʼe maʼuhiga age, neʼe tokoni lahi age ke natou fakaovi kia te ia pea mo natou toe fai te tauhi ʼae ʼe ina tali leleiʼi. Neʼe heʼeki maʼu e te hahaʼi ʼa te ʼAtua ni tapuakina lahi fakalaumalie feia ʼi muʼa atu. Ohage ko tona ui ʼi te vaega 26, neʼe foaki age e Sehova he malama ʼe lahi age, ko tona fakaʼuhiga neʼe tokoni age ke natou mahino ki tana Folafola. (Esa. 60:2) Neʼe feala, ʼaki te ʼu tapuakina ʼaia mai ia Sehova, ke haga hoko atu e ʼana kaugana tanatou tauhi mo he lotofiafia pea mo he malohi ‘ ʼuhi ko te lelei ʼo ʼonatou loto.’—Esa. 65:14.

13. Neʼe hoko feafeaʼi ia ʼaho nei te lea fakapolofeta ʼo ʼuhiga mo te toe fakatuʼu ʼo te tauhi maʼa?

¹³ Ko te lea fakapolofeta ʼo ʼuhiga mo te toe fakatuʼu ʼo te tauhi maʼa, ʼe toe hoko koa  ia ʼaho nei? ʼEi. ʼO feafeaʼi? Talu mai te 1919 ko te toko lauʼi miliona hahaʼi neʼe natou mavae mai tanatou ʼaunofo ʼi Papiloni Lahi, te kautahi fakamalamanei ʼo te lotu hala. Pea neʼe taki natou ki he palatiso fakalaumalie, ʼae ʼe lelei age ʼi te Kele ʼo Te Fakapapau ʼo Iselaele. (Esa. 51:3; 66:8) Kotea te palatiso fakalaumalie ʼaia?

14. Kotea te palatiso fakalaumalie, pea ko ai ʼe maʼuli ai ia ʼaho nei? (Vakaʼi Te ʼu Fakamahino.)

¹⁴ Talu mai te 1919, kua fiafia te kau fakanofo ʼi tanatou maʼuʼuli ʼi te palatiso fakalaumalie. d Neʼe toe hu ki ai “ ʼihi atu ʼu ovi,” ʼae ʼe ʼamanaki maʼuʼuli ʼi te kele. Pea ʼe natou maʼu ai ni tapuakina lahi mai ia Sehova.—Soa. 10:16; Esa. 25:6; 65:13.

15. ʼE maʼu ʼifea te palatiso fakalaumalie?

¹⁵ ʼE maʼu ʼifea te palatiso fakalaumalie? Ia ʼaho nei, ʼe maʼuʼuli te kau atolasio ʼa Sehova ʼi te ʼu potu fuli ʼo te kele. Koia ko te palatiso fakalaumalie ʼae ʼe natou maʼuʼuli ai ʼe maʼu ʼi te malamanei katoa. Ia ʼaho nei, ko he potu pe ʼe tou nofo ai, ʼe feala ke tou kau ki te palatiso fakalaumalie moka tou gaue moʼo lagolago ki te tauhi moʼoni.

16. ʼE feafeaʼi hatatou haga sio ki te matalelei ʼo te palatiso fakalaumalie?

¹⁶ Ke tou nonofo ʼi te palatiso fakalaumalie, ʼe tonu ke hoko atu tatatou leleiʼia te ʼu kokelekasio fuli ʼi te malamanei. ʼO feafeaʼi? ʼAki hatatou tokagaʼi te ʼu kalitate kae mole ko te ʼu lakahala ʼo ʼotatou tehina mo tuagaʼane. (Soa. 17:20, 21) He koʼe ʼe maʼuhiga te faʼahi ʼaia? Tou toʼo te faʼifaʼitaki ʼaeni: Ka tou olo ki he ʼoloto matalelei, ʼe tou ʼamanaki ke tou sio ki he ʼu fuʼu ʼakau kehekehe. ʼO toe feia pe ʼi ʼotatou kokelekasio ia ʼaho nei, ʼe tou maʼu ai ni hahaʼi kehekehe ʼe fakatatau ki he ʼu fuʼu ʼakau. (Esa. 44:4; 61:3) ʼE tonu ke tou tokagaʼi te matalelei ʼo te ʼulu ʼakau, kae mole tou sioʼi pe te ʼu fuʼu ʼakau ʼae ʼe hage mai ʼe mole maʼuli lelei. ʼE mole tou tuku ki ʼotatou lakahala, ʼo feia mo ʼae ʼo ʼihi ʼi te kokelekasio, ke natou taʼofi tatatou sio ki te matalelei ʼo te ʼu kokelekasio logo tahi ʼi te malamanei.

17. Kotea ʼae ʼe feala ke tou fai takitokotahi moʼo taupau ʼo te logo tahi ʼi te kokelekasio?

 ¹⁷ Kotea ʼae ʼe feala ke tou fai takitokotahi moʼo taupau ʼo te logo tahi ʼi te kokelekasio? Tou kumi ke tou tokalelei mo te hahaʼi fuli. (Mat. 5:9; Loma 12:18) ʼI te temi fuli pe ʼae ʼe tou faiga ai ke tou tokalelei mo natou ʼo te kokelekasio, ʼe tou fakamataleleiʼi ai te palatiso fakalaumalie. ʼE tonu ke tou manatuʼi neʼe taki mai e Sehova ki te tauhi maʼa ia tatou takitokotahi ʼae kua tou ʼi te palatiso fakalaumalie. (Soa. 6:44) Fakakaukauʼi age muʼa te fiafia lahi ʼo Sehova ʼi tana sio mai ʼae ʼe tou gaue kinakina moʼo taupau ʼo te tokalelei mo te logo tahi ʼi ʼana kaugana, ʼae ʼe maʼuhiga kia te ia.—Esa. 26:3; Ake. 2:7.

18. Kotea ʼae ʼe tonu ke tou metitasio tuʼumaʼu ki ai, pea kotea tona tupuʼaga?

¹⁸ ʼE feafeaʼi hatatou maʼu te ʼu tapuakina ʼi totatou ʼuhiga kaugana ʼa te ʼAtua? ʼE feala ke tou fakakaukau loloto ki te Folafola ʼa te ʼAtua pea mo ʼatatou tohi fakatohi-tapu. ʼE tokoni mai ia te ako mo te metitasio ʼaia ke tou maʼu te ʼu kalitate Fakakilisitiano ʼae ʼe ʼaoga ke tou “feʼofaʼaki moʼoni ohage ko he fale tau tehina” ʼi te kokelekasio. (Loma 12:10) Ka tou metitasio ki ʼotatou tapuakina ia ʼaho nei, ʼe fakamalohi ai ʼatatou felogoi mo Sehova. Pea ka tou metitasio ki te ʼu tapuakina ʼae ka foaki mai anai e Sehova ʼi te ka haʼu, ʼe malohi ai tatatou tui ʼae ʼe tou tauhi anai kia te ia ʼo talu ai. ʼE tokoni mai te ʼu faʼahi ʼaia ke tou tauhi kia Sehova ʼi te temi nei mo he lotofiafia.

19. (1) ʼO mulimuli kia Esaia 30:18 (NWT), kotea ʼae ʼe feala ke tou tui papau ki ai? (2) Kotea ka tokoni mai anai ke tou faʼa kataki mo he lotofiafia?

¹⁹ Ka pulihi e Sehova te malama agakovi ʼaeni, ʼe “tuʼu ake anai” moʼo haofaki ʼo tatou. (Esa. 30:18, NWT) ʼE tou iloʼi ʼe mole tuku anai e Sehova ke tuʼu fualoa ia te malama ʼo Satana, he ʼe “ko te ʼAtua ʼo te faitotonu.” (Esa. 25:9) ʼE tou faʼa kataki ʼo fakatalitali mo Sehova ke hoko mai te ʼaho ʼaia ʼo te haofaki. Kae ʼi muʼa ʼo tona hoko mai, tou haga faikole, mo ako pea mo maʼuliʼi te Folafola ʼa te ʼAtua, pea mo metitasio ki ʼotatou tapuakina. ʼI tatatou fai feia, ʼe tokoni mai anai Sehova ke tou faʼa kataki ʼo tauhi kia te ia mo he lotofiafia.