ALATIKE AKO 45
ʼE Tokoni Mai Ia Sehova Ke Tou Fakahoko Tatatou Minisitelio
“E natou iloi anai [neʼe] i ai he polofeta i te lotolotoga o natou.”—ESK. 2:5.
KATIKO 67 Fakamafola Te Folafola
TE ʼU MANATU FAKANOUNOU a
1. Kotea te aluʼaga ʼe tonu ke hoko, pea kotea ʼae ʼe feala ke tou tui papau ki ai?
ʼE TOU iloʼi ʼe fakafeagai anai te hahaʼi ki tatatou faifakamafola. Pea ko te fakafeagai ʼaia ʼe ʼaʼasili age anai ʼi te ka haʼu. (Tan. 11:44; 2 Tim. 3:12; Apk. 16:21) Kae ʼe tou tui papau ʼe tokoni mai anai ia Sehova ke tou fakahoko tatatou minisitelio. Kotea tona tupuʼaga? He neʼe tokoni tuʼumaʼu pe ia Sehova ki ʼana kaugana, logo la te faigataʼa ʼo tanatou gaue. Tou vakaʼi ni aluʼaga neʼe hoko ʼi te maʼuli ʼo te polofeta ko Esekiele, ʼi tana faifakamafola ki te kau Sutea ʼae neʼe ʼaunofo ʼi Papiloni.
2. Kotea neʼe ui e Sehova ʼo ʼuhiga mo te hahaʼi ʼae neʼe faifakamafola ki ai ia Esekiele? Kotea ka tou vakaʼi anai ʼi te alatike ʼaeni? (Esekiele 2:3-6)
2 Neʼe feafeaʼi te hahaʼi ʼae neʼe faifakamafola ki ai ia Esekiele? Neʼe ui e Sehova ʼe natou “fiatuu mo fefeka,” pea mo “agatuu.” Neʼe natou agakovi ohage ko ni “akau talatala” pea mo ni “sekolopio.” Koia la ʼae neʼe ui tuʼa lahi ai e Sehova kia Esekiele: “Aua naa ke mataku.” (Lau ia Esekiele 2:3-6.) Neʼe feala ke fakahoko e Esekiele tana gaue faifakamafola ʼuhi ʼae (1) neʼe fekauʼi ia ia e Sehova, (2) neʼe malohi ʼuhi ko te laumalie ʼo te ʼAtua, pea (3) neʼe malohi tana tui ʼuhi ko te ʼu folafola ʼa te ʼAtua. Neʼe tokoni feafeaʼi te ʼu faʼahi ʼaia ʼe tolu kia Esekiele? Pea ʼe tokoni feafeaʼi mai kia tatou ia ʼaho nei?
NEʼE FEKAUʼI E SEHOVA IA ESEKIELE
3. Ko te ʼu palalau fea neʼe lotomalohi ai ia Esekiele? Pea neʼe fakaha feafeaʼi e Sehova ʼe tokoni anai kia ia?
3 Neʼe ui e Sehova kia Esekiele: “E au fekaui . . . koe.” (Esk. 2:3, 4) Neʼe lagi lotomalohi ia Esekiele ʼuhi ko te ʼu palalau ʼaia. Kotea tona tupuʼaga? Neʼe lagi ina manatuʼi neʼe fai e Sehova te ʼu palalau ʼaia ʼi tana filifili ia Moisese pea mo Esaia ke nā liliu ko Hana ʼu polofeta. (Eke. 3:10; Esa. 6:8) Pea neʼe ina toe iloʼi foki neʼe tokoni ia Sehova kia naua, ke nā fakahoko ʼanā gaue faigataʼa. Koia, ʼi te ui tuʼa lua age e Sehova kia Esekiele ‘ ʼE au fekauʼi koe’ neʼe falala katoa ai ʼe tokoni anai Sehova kia ia. Tahi ʼae, neʼe tuʼa lahi te tohi e Esekiele ʼi tana tohi: “Neʼe palalau mai ia Sehova.” (Esk. 3:16, NWT) Neʼe ina toe tohi tuʼa lahi: “Neʼe toe palalau mai ia Sehova.” (Esk. 6:1, NWT) ʼE mahino ia, neʼe tui papau ia Esekiele neʼe fekauʼi ia ia e Sehova. Pea tahi, ko te tamai ʼa Esekiele neʼe ko he pelepitelo. ʼE mahino ia, neʼe ina akoʼi age neʼe fakapapauʼi tuʼumaʼu e Sehova ʼe tokoni anai ki ʼAna polofeta. Ohage la, neʼe ui e Sehova kia Isaake, feia kia Sakopo, pea mo Selemia: “ ʼE au nofo mo koe.”—Sen. 26:24; 28:15; Sel. 1:8.
4. Kotea te ʼu manatu fakalotofimalie neʼe maʼu ai e Esekiele te malohi?
4 Neʼe tali feafeaʼi e te kau Iselaele tokolahi te faifakamafola ʼa Esekiele? Neʼe ui e Sehova: “E mole loto anai te fale o Iselaele ke fakalogo kia koe, koteuhi e mole fia fakalogo . . . kia au.” (Esk. 3:7) ʼI tanatou situʼa kia Esekiele, neʼe natou situʼa ai kia Sehova. Neʼe lagi fakalotofimalie te ʼu palalau ʼaia kia Esekiele. Ko te situʼa ʼaia ʼa te hahaʼi kia ia, neʼe mole fakaʼuhiga leva neʼe mole ina fakahoko fakaleleiʼi tana gaue ʼi tona ʼuhiga polofeta. Neʼe toe fakamahino age e Sehova kia Esekiele, ka hoko anai te ʼu fakamau ʼae neʼe ina tala ʼe iloʼi anai e te kau Iselaele ‘neʼe ʼi ai he polofeta ʼi te lotolotoiga ʼo natou.’ (Esk. 2:5; 33:33) ʼE mahino papau ia, ko te ʼu manatu fakalotofimalie ʼaia neʼe maʼu ai e Esekiele he malohi moʼo fakahoko tana minisitelio.
ʼE FEKAUʼI TATOU E SEHOVA
Ohage ko Esekiele, tatau aipe pe mole fia fakalogo pea mo fakafeagai mai te hahaʼi, kae ʼe tou iloʼi ʼe nofo Sehova mo tatou (Vakaʼi te palakalafe 5-6)
5. ʼO mulimuli kia Esaia 44:8, kotea ʼae ʼe tou maʼu ai te malohi?
5 Mo tatou foki, ʼe tou maʼu te malohi ʼi tatatou iloʼi ʼae ʼe fekauʼi tatou e Sehova ke tou olo ʼo faifakamafola. ʼE ina fakamaʼuhigaʼi tatou ʼi tana fakahigoaʼi tatou ko ʼana “fakamooni.” (Esa. 43:10) Ohage pe ko te ui e Sehova kia Esekiele: “Aua naa ke mataku,” ʼe toe ui mai e Sehova ‘ ʼAua naʼa kotou tekelili.’ He koʼe ʼe mole tonu ke tou tuʼania te hahaʼi ʼae ʼe fakafeagai mai? Koteʼuhi ohage pe ko Esekiele, ʼe fekauʼi tatou e Sehova pea ʼe ina puipui tatou.—Lau ia Esaia 44:8.
6. (1) ʼE tou iloʼi feafeaʼi ʼe tokoni mai ia Sehova? (2) He koʼe ʼe tou lotofimalie mo malohi?
6 ʼE fakapapau e Sehova ʼe tokoni mai anai. Ohage la, ia muʼa ʼo tana ui: “Ko koutou ko aku . . fakamooni” neʼe ina ui: “Kapau e ke fakalaka i te atu vai e au nofo anai mo koe, pea ko te u vaitafe lalahi, e mole natou fakalaka anai ia koe; kapau e ke haele i te afi, e mole ke vela anai, pea e mole tutu anai ia koe e te ulo.” (Esa. 43:2) Ka tou faifakamafola, ʼi ʼihi temi ʼe tou felaveʼi ai mo ni faigataʼaʼia ʼe hage mai ko ni lofia peʼe ko he afi. Kae ʼaki te tokoni ʼa Sehova, ʼe tou hoko atu pe tatatou faifakamafola. (Esa. 41:13) Ohage pe ko te temi ʼo Esekiele, tokolahi ia ʼaho nei ʼe natou fakafisi ki te logo ʼae ʼe tou fakamafola. Kae tou manatuʼi ko tanatou fakafisi mai ʼaia, ʼe mole fakaʼuhiga leva ʼe mole lelei tatatou faifakamafola. ʼE tou lotofimalie mo malohi ʼi tatatou iloʼi ʼae ʼe fiafia ia Sehova ʼi tatatou haga tala ia tana logo. Neʼe fakaha fenei e te apositolo ko Paulo: “ ʼE . . . tahi maʼu pe anai tona fakapale ʼo mulimuli ki tana gaue.” (1 Ko. 3:8; 4:1, 2) Neʼe ui e te tuagaʼane ʼe pionie talu mai fualoa: “ ʼE au fiafia ʼi taku iloʼi ʼae ʼe fakapale e Sehova ʼatatou faiga.”
NEʼE FOAKI E TE LAUMALIE ʼO TE ʼATUA TE MALOHI KIA ESEKIELE
ʼE ha kia Esekiele te saliote ʼa Sehova ʼae ʼi te lagi. Neʼe malohi ai tana tui ʼae ʼe tokoni anai Sehova kia ia ke ina fakahoko tana minisitelio (Vakaʼi te palakalafe 7)
7. ʼI te fakakaukauʼi e Esekiele te meʼa fakamanavahe ʼae neʼe sio ki ai, kotea neʼe lagi ina logoʼi? (Vakaʼi te pāki ʼo te takafi.)
7 Neʼe sio ia Esekiele ki te malohi ʼaupito ʼo te laumalie ʼo te ʼAtua. Neʼe mamata ki te gaue ʼa te laumalie maʼoniʼoni ʼi te kau ʼaselo malolohi pea mo te ʼu foʼi teka lalahi ʼo te saliote ʼi te lagi. (Esk. 1:20, 21) Kotea neʼe fai e Esekiele? Neʼe ina tohi te meʼa ʼae neʼe hoko. “ ʼI taku sio ki te meʼa ʼaia, neʼe au fakato mapeʼe leva ki te kele.” ʼUhi ko te lahi ʼo tana manavasiʼi, neʼe fakato mapeʼe ia Esekiele ki te kele. (Esk. 1:28, NWT) Ki muli age, ʼi te fakakaukauʼi e Esekiele te meʼa fakamanavahe ʼae neʼe sio ki ai, neʼe lagi fakamalohi ai tana tui ʼae ʼe ina lava fakahoko tana minisitelio ʼaki te laumalie ʼo te ʼAtua.
8-9. (1) Neʼe feafeaʼi ia Esekiele ʼi tana logo ki te fakatotonu age e Sehova ke tuʼu ki ʼoluga? (2) Neʼe fakamalohi feafeaʼi e Sehova ia Esekiele ke lava faifakamafola ki te hahaʼi lotofefeka?
8 Neʼe fakatotonu age e Sehova kia Esekiele: “Foha o te tagata, tuu ki oluga, pea e au palalau atu anai kia koe.” Ko te fakatotonu ʼaia fakatahi mo te laumalie ʼo te ʼAtua neʼe toe maʼu ai e Esekiele he malohi ke toe tuʼu ake mai te kele. Neʼe tohi e Esekiele: “Nee ulu leva te Laumalie kia au pea nee ina fakatuu leva au ki oluga.” (Esk. 2:1, 2) Ki muli age pea lolotoga tana minisitelio, neʼe takitaki ia Esekiele e “te nima” ʼo Sehova, peʼe ko tona laumalie maʼoniʼoni. (Esk. 3:22; 8:1; 33:22; 37:1; 40:1) Neʼe fakamalohi ia ia e te laumalie ʼo te ʼAtua ke ina lava fakahoko tana gaue, ʼae ko te fakamafola ki te hahaʼi “agatuu” pea mo lotofefeka. (Esk. 3:7) Neʼe ui age e Sehova kia Esekiele: “Neʼe au fakaliliu tou fofoga ke fefeka age ʼi ʼonatou fofoga, pea ke fefeka age tou laʼe ʼi ʼonatou laʼe. Neʼe au fakaliliu tou laʼe ohage ko he foʼi taimani, ke fefeka age ʼi te maka hunu. ʼAua naʼa ke mataku ia natou pea ʼaua naʼa ke tekelili ʼuhi ko ʼonatou fofoga.” (Esk. 3:8, 9, NWT) ʼE hage pe neʼe ui age e Sehova kia Esekiele: “ ʼAua naʼa ke lotovaivai ʼuhi ko tanatou lotofefeka. ʼE au fakamalohi anai koe.”
9 Ki muli age, neʼe ʼave leva e te laumalie ʼo te ʼAtua ia Esekiele ki te potu fenua neʼe tonu ke faifakamafola ai. Neʼe tohi e Esekiele: “Nee gaue malohi te nima o [“Sehova,” NWT] kia au.” Neʼe vahaʼa katoa te ako mo mahino ʼa Esekiele ki te logo ʼae neʼe ina tala, ʼo feala ai hana faifakamafola ʼaki he lototoʼa. (Esk. 3:14, 15) Pea neʼe ui age e Sehova kia Esekiele ke alu ki he potu laulelei ʼae “nee ulu leva te Laumalie kia [ia].” (Esk. 3:23, 24) Neʼe kua tokalelei leva ia Esekiele ke kamata tana minisitelio.
ʼE FOAKI MAI E TE LAUMALIE ʼO TE ʼATUA TE MALOHI
Ohage ko Esekiele, kotea ʼae ʼe tokoni mai ke tou fakahoko tatatou minisitelio? (Vakaʼi te palakalafe 10)
10. Kotea ʼe ʼaoga mai kia tatou ke feala hatatou faifakamafola, pea kotea tona tupuʼaga?
10 Kotea ʼae ʼe ʼaoga mai kia tatou ke feala hatatou faifakamafola? Moʼo tali ki ai, tou manatuʼi te meʼa ʼae neʼe hoko kia Esekiele. ʼI muʼa ʼo tana faifakamafola, neʼe foaki age e te laumalie ʼo te ʼAtua te malohi ʼae neʼe ʼaoga ki ai. Ia ʼaho nei, ohage pe ko Esekiele, hoki tou lava faifakamafola moka tokoni mai te laumalie ʼo te ʼAtua. Kotea tona tupuʼaga? Heʼe tauʼi tatou e Satana ke fakagata tatatou faifakamafola. (Apk. 12:17) ʼI te sio fakatagata, ʼe malohi age ia Satana. Kae ka tou faifakamafola, ʼe tou malo ai. (Apk. 12:9-11) ʼO feafeaʼi? Ka tou faifakamafola, ʼe tou fakaha ai ʼe mole tou matataku kia Satana. ʼI te temi fuli pe ʼe tou faifakamafola ai, ʼe tou malo ia Satana. Koia, kotea ʼae ʼe ha moka tou haga faifakamafola logo la te fakafeagai? ʼE ha ai ʼe foaki mai e Sehova tona malohi ʼaki tona laumalie maʼoniʼoni pea ʼe tou maʼu tona tapuakina.—Mat. 5:10-12; 1 Pet. 4:14.
11. Kotea ʼae ʼe tou lava fai ʼaki te tokoni ʼa te laumalie ʼo te ʼAtua, pea kotea ʼae ʼe tonu ke tou fai ke tou haga maʼu te laumalie ʼo te ʼAtua?
11 Kotea te tahi ako ʼe tou maʼu ʼi tatatou mahino ʼae neʼe foaki e Sehova kia Esekiele te malohi ke feala hana faifakamafola? ʼE feala ki te laumalie ʼo te ʼAtua ke ina foaki mai te malohi ʼae ʼe ʼaoga ke tou lava tauʼi te ʼu fihifihia fuli ʼe feala ke hoko ʼi te faifakamafola. (2 Ko. 4:7-9) Kotea ʼae ʼe tonu ke tou fai ke tou haga maʼu te laumalie ʼo te ʼAtua? ʼE tonu ke tou kole tuʼumaʼu, mo falala ʼe fakalogo mai ia Sehova ki ʼatatou kole. Neʼe akoʼi mai e Sesu ke tou “haga kole, . . . haga kumi, . . . [mo] haga tukituki.” Pea ʼe foaki anai e Sehova “te laumalie maʼoniʼoni kia natou ʼae ʼe natou kole age.”—Luka 11:9, 13; Gaue 1:14; 2:4.
NEʼE FAKAMALOHI TE TUI ʼA ESEKIELE E TE ʼU FOLAFOLA ʼA TE ʼATUA
12. ʼO mulimuli kia Esekiele 2:9–3:3, neʼe haʼu maifea te takaiga tohi pea kotea neʼe tuʼu ai?
12 Mole gata pe ki te laumalie ʼo te ʼAtua ʼae neʼe ina foaki kia Esekiele te malohi, kae neʼe toe fakamalohi tana tui e te ʼu folafola ʼa te ʼAtua. Neʼe sio ia Esekiele ki he nima ʼe ina toʼo he takaiga tohi. (Lau ia Esekiele 2:9–3:3.) Neʼe haʼu maifea te takaiga tohi ʼaia? Pea kotea neʼe tuʼu ai? Neʼe ina fafaga feafeaʼi ia Esekiele? Neʼe haʼu te takaiga tohi mai te hekaʼaga fakahau ʼo te ʼAtua. Neʼe lagi fekauʼi e Sehova he ʼaselo ʼi te ʼu ʼaselo ʼe fa ʼae neʼe sio ki ai ia Esekiele ki muʼa atu, ke ina ʼavage ki ai te takaiga tohi. (Esk. 1:8; 10:7, 20) Neʼe tuʼu ʼi te takaiga tohi te ʼu folafola ʼa te ʼAtua. Neʼe ko te logo fakamau neʼe tonu ke tala e Esekiele ki te kau ʼaunofo talagataʼa. (Esk. 2:7) Neʼe tohi te logo ʼaia ʼi loto mo te tuʼa takaiga tohi.
13. Kotea neʼe ui age e Sehova kia Esekiele ke ina fai ki te takaiga tohi? He koʼe neʼe huʼa malie te takaiga tohi?
13 Neʼe ui age e Sehova ki tana polofeta ke ina kai te takaiga tohi ke fonu tona fatu. Neʼe fakalogo ki ai ia Esekiele, ʼo ina kai te takaiga tohi katoa. Kotea te fakaʼuhiga ʼo te faʼahi ʼaia? Neʼe tonu ke mahino katoa ia Esekiele ki te logo ʼae ka ina tala. Pea neʼe tonu ke tui ki ai, ke uga ai ke ina tala te logo ʼaia. Neʼe hoko leva he aluʼaga fakapunamaʼuli. ʼI te kai e Esekiele te takaiga tohi ʼaia, neʼe huʼa malie ohage ko te meli. (Esk. 3:3) Kotea tona tupuʼaga? Maʼa Esekiele, ko tana fakafofoga ia Sehova neʼe ko he aluʼaga fakatupu fakafiafia mo fakafimalie. (Pes. 19:9-12) Neʼe lotofakafetaʼi ʼi tona fakaʼaogaʼi e Sehova ko tana polofeta.
14. Kotea ʼae neʼe tokoni kia Esekiele ke ina fakahoko pea mo fakaʼosi tana gaue?
14 Ki muli age, neʼe ui e Sehova kia Esekiele: “Ke ke tali i tou loto pea mo fakalogo mai . . . ki te u folafola fuli ae e au fakaha atu anai kia koe.” (Esk. 3:10) ʼAki te ʼu fakatotonu ʼaia, neʼe ui age e Sehova kia Esekiele ke ina fakamaʼumaʼu te ʼu folafola ʼae ʼi te takaiga tohi, pea mo metitasio ki ai. ʼI te fai e Esekiele te faʼahi ʼaia, ʼe malohi anai tana tui. Pea ʼe ina maʼu ai he logo maʼuhiga ke ina tala ki te hahaʼi. (Esk. 3:11) ʼI te kua mahino katoa ʼa Esekiele pea mo tui ki te logo ʼa te ʼAtua, neʼe kua feala leva ke ina fakahoko pea mo fakaʼosi tana gaue.—Vakaʼi mo Pesalemo 19:15.
ʼE FAKAMALOHI TATATOU TUI E TE ʼU FOLAFOLA ʼA TE ʼATUA
15. Ke feala hatatou faʼa kataki ʼi te minisitelio, kotea ʼae ʼe tonu ke tou ‘tali ʼi ʼotatou loto’?
15 Ke feala hatatou faʼa kataki ʼi te minisitelio, ʼe tonu mo tatou ke tou tuku te Folafola ʼa te ʼAtua ke ina haga fakamalohi tatatou tui. ʼE tonu ke tou ‘tali ʼi ʼotatou loto’ te ʼu faʼahi fuli ʼae ʼe ui mai e Sehova. Ia ʼaho nei, ʼe palalau mai ia Sehova ʼaki tana Folafola, te Tohi-Tapu. ʼE lava gaue feafeaʼi te Folafola ʼa te ʼAtua ki ʼatatou manatu, mo ʼotatou loto pea mo uga tatou ke tou fai he ʼu gaue?
16. ʼE feafeaʼi hatatou mahino lelei ki te Folafola ʼa te ʼAtua?
16 Ka tou kai pea mo fakahifo te meʼa kai, ʼe tou logo malohi ai. ʼO toe feia pe, ka tou ako te Folafola ʼa te ʼAtua pea mo metitasio ki ai, ʼe malohi ai tatatou tui. ʼE ko te faʼahi ʼaia ʼe tonu ke tou taʼofi mai te takaiga tohi ʼae neʼe sio ki ai Esekiele. ʼE loto e Sehova ke tou fakafonu ʼotatou loto ʼaki tana Folafola, ko tona fakaʼuhiga ke tou mahino lelei ki ai. Pea ʼe feala anai hatatou mahino ki ai, moka tou faikole, mo lau pea mo metitasio. ʼUluaki ʼe tou faikole, ke teuteuʼi ai ʼotatou loto ke tou tali te ʼu manatu ʼa te ʼAtua. ʼE tou lau leva he vaega Tohi-Tapu. Pea tou ʼai he kiʼi tuʼu ʼo metitasio ki ai, ko tona fakaʼuhiga ke tou fakakaukau loloto ki ai. Kotea anai tona fua? Ka lahi tatatou metitasio, pea ʼe lahi ai tatatou mahino ki te Folafola ʼa te ʼAtua, pea ʼe malohi ai tatatou tui.
17. He koʼe ʼe maʼuhiga ke tou metitasio ki te ʼu meʼa ʼae ʼe tou lau ʼi te Tohi-Tapu?
17 He koʼe ʼe maʼuhiga ke tou lau te Tohi-Tapu mo metitasio ki ai? Koteʼuhi ʼe tou lototoʼa anai ʼo fakamafola te logo ʼo te Puleʼaga ia ʼaho nei, pea mo te logo malohi ʼo ʼuhiga mo he tautea ʼae ka tou vave tala. Pea tahi, ka tou metitasio ki te ʼu kalitate taulekaleka ʼo Sehova, pea ʼe toe malohi age tatatou felogoi mo ia. ʼE tou logoʼi ai ʼi totatou loto te tokalelei. Ko he aluʼaga fakatupu fiafia mo fakalotofimalie.—Pes. 119:103.
TOU LOTOMALOHI ʼO FAʼA KATAKI
18. Kotea anai ka fakamoʼoni ki ai te hahaʼi?
18 Neʼe tala e te polofeta ko Esekiele te logo neʼe fakaha fakahagatonu age e Sehova. Kae kia tatou, ʼe tou lotomalohi ʼo tala te logo mai ia Sehova ʼae neʼe ina fakatuʼu ʼi tana Folafola, ʼo kaku ki tana kua tonu ke fakagata la te gaue. Ka hoko mai anai te temi fakamau, ʼe mole feala anai ke ui e te hahaʼi kia Sehova neʼe mole natou logo ki te fakatokaga ʼaia. (Esk. 3:19; 18:23) Kae ʼe natou fakamoʼoni anai ko te logo ʼae neʼe tou tala neʼe haʼu mai te ʼAtua.
19. Kotea ʼae ʼe ina foaki mai te malohi ke tou fakahoko tatatou minisitelio?
19 Kotea ʼae ʼe ina foaki mai te malohi ke tou fakahoko tatatou minisitelio? Ko te ʼu faʼahi ʼe tolu ʼae neʼe fakamalohi ai ia Esekiele. ʼE hoko atu tatatou faifakamafola he ʼe tou iloʼi neʼe fekauʼi tatou e Sehova. ʼE tou malohi ʼuhi ko te laumalie maʼoniʼoni. Pea ʼe fakamalohi tatatou tui e te Folafola ʼa te ʼAtua. ʼAki te tokoni ʼa te ʼAtua ʼe uga ai tatou ke tou fakahoko tatatou minisitelio pea ke tou faʼa kataki “ ʼo kaku ki te fakaʼosi.”—Mat. 24:13.
KATIKO 65 Tou Haʼele Ki Muʼa
a ʼI te alatike ʼaeni, ʼe tou vakaʼi anai faʼahi ʼe tolu neʼe tokoni ki te polofeta ko Esekiele ke ina fakahoko tana faifakamafola. ʼE tou vakaʼi anai pe neʼe tokoni feafeaʼi ia Sehova ki tana polofeta, pea ʼe fakamalohi ai tatatou falala ʼe toe tokoni mai anai ke tou fakahoko tatatou minisitelio.