ALATIKE AKO 48
Ke Ke Falala ʼe Tokoni Atu Sehova ʼi Te ʼu Temi Faigataʼa
“ ‘Kotou lotomalohi’ . . . ʼe ui e Sehova ʼo te ʼatu kautau: ‘Koteʼuhi ʼe au nofo mo koutou.’ ”—AKE. 2:4.
KATIKO 118 Foaki Lahi Mai Te Tui
TE ʼU MANATU FAKANOUNOU a
1-2. (1) Kotea ʼae ʼe tatau ai totatou aluʼaga mo ʼae ʼa te kau Sutea ʼae neʼe toe liliu ki Selusalemi? (2) Fakaha he ʼu faigataʼaʼia neʼe tau mo te kau Sutea? (Vakaʼi te fakamatala ʼae ʼe ʼa takai “ Te ʼu Aluʼaga Neʼe Hoko ʼi Te Temi ʼo Akeseo, Sakalia mo Esetalasi.”)
ʼE KE tuʼania koa ʼi ʼihi temi ʼo ʼuhiga mo te apogipogi? Peʼe lagi mole kei ke gaue ʼo ke feʼekeʼaki ai pe ke taupau feafeaʼi anai tou kiʼi famili. Peʼe lagi ke tuʼania naʼa hoko he meʼa ki tou kiʼi famili ʼuhi ko te ʼu tokakovi fakapolitike, te fakataga peʼe ko te fakafeagai ʼa te hahaʼi ki tatatou faifakamafola. ʼE ke tau nei koa mo he faigataʼaʼia feia? Kapau koia, ʼe fua lelei anai kia koe tatatou vakaʼi ʼae pe neʼe tokoni feafeaʼi ia Sehova ki te kau Iselaele ʼae neʼe toe tau mo te ʼu faigataʼaʼia ʼaia.
2 Neʼe tonu ke malohi te tui ʼa te kau Sutea ʼae neʼe mavae ʼi Papiloni ʼo olo ki Selusalemi. Koteʼuhi neʼe natou tuku tonatou maʼuli lelei ʼi ai ʼo natou olo ki he fenua neʼe mole natou iloʼi. Mole fualoa ʼi tanatou tau atu ki ai, pea kamata ai leva ʼonatou faigataʼaʼia. Neʼe faigataʼa tanatou taupau ʼonatou famili, neʼe hoko ni tokakovi fakapolitike ʼi te fenua pea neʼe toe ʼi ai mo te fakafeagai. Koia, neʼe faigataʼa ai ki ʼihi ke natou tokakaga tafito ki te toe laga ʼo te fale lotu ʼa Sehova. ʼI te teitei taʼu 520 I.M.T.S. b neʼe fekauʼi ai e Sehova te ʼu polofeta ʼe lua ko Akeseo mo Sakalia ke nā uga te hahaʼi ke natou toe faʼafai ʼi tanatou tauhi kia Sehova. (Ake. 1:1; Sakl. 1:1) ʼE tou vakaʼi anai neʼe fua lelei te ʼu fakalotomalohi ʼae neʼe foaki e te ʼu polofeta ʼaia. Kae hili ki ai teitei taʼu ʼe 50, neʼe ʼaoga ke toe fakalotomalohiʼi te kau Sutea ʼaia neʼe toe liliu ki Selusalemi. Ko Esetalasi, ʼae neʼe ko he tagata hiki tohi faiva ʼo te Lao, neʼe mavae mai Papiloni ʼo alu ki Selusalemi. Neʼe ina fakalotomalohiʼi ai te hahaʼi ʼa te ʼAtua ke natou fakamuʼamuʼa ʼi tonatou maʼuli tanatou tauhi kia Sehova.—Eset. 7:1, 6.
3. Kotea te ʼu fehuʼi ka tou tali anai ki ai? (Taʼaga Lea 22:19)
3 Neʼe tokoni te ʼu lea fakapolofeta ʼo Akeseo mo Sakalia ki te hahaʼi ʼa te ʼAtua ke hoko atu tanatou falala kia te ia logo la te fakafeagai. ʼE feala ke toe tokoni mai te ʼu lea fakapolofeta ʼaia ke tou haga falala ʼe tokoni mai anai te ʼAtua moka tou tau mo he ʼu faigataʼaʼia. (Lau ia Taʼaga Lea 22:19.) ʼE tou vakaʼi anai ʼi te alatike ʼaeni te logo mai te ʼAtua ʼae neʼe tala e Akeseo mo Sakalia ki te kau Sutea, ʼo feia mo te faʼifaʼitaki ʼo Esetalasi. ʼE tou tali ai ki te ʼu fehuʼi ʼaeni: Neʼe malave feafeaʼi te ʼu faigataʼaʼia ki te kau Sutea ʼae neʼe toe liliu mai ki Selusalemi? He koʼe ʼe tonu ke tou haga fakamuʼamuʼa te fakahoko ʼo te finegalo ʼo ʼAtua ʼi te ʼu temi faigataʼa? Pea kotea ʼae ʼe tonu ke tou fai ke malohi age tatatou falala ʼae ʼe tokoni mai ia Sehova ʼi te ʼu temi faigataʼa?
NEʼE PULI TANATOU FAʼAFAI ʼUHI KO TE ʼU FAIGATAʼAʼIA
4-5. Kotea ʼae neʼe tupu ai te mole kei faʼafai ʼa te kau Sutea moʼo laga te fale lotu?
4 ʼI te tau atu ʼa te kau Sutea ki Selusalemi, neʼe lahi te ʼu gaue neʼe tonu ke natou fai. Neʼe ʼosi vave tanatou laga te ʼaletale ʼa Sehova pea mo hili te ʼu fakatafito ʼo te fale lotu. (Eset. 3:1-3, 10) Kae neʼe puli leva tanatou faʼafai. Kotea ʼae neʼe hoko? ʼO hilifaki ki tanatou laga te fale lotu, neʼe tonu ke natou laga mo ʼonatou ʼapi, mo to ʼanatou gaueʼaga. Pea neʼe tonu ke natou tokaga ki ʼonatou kiʼi famili. (Eset. 2:68, 70) Tahi ʼae, neʼe fakafeagai ʼonatou fili kia natou, ʼo natou faiga ke fakagata te ʼu gaue ʼo te fale lotu.—Eset. 4:1-5.
5 Neʼe toe faigataʼa ki te kau Sutea ʼae neʼe toe liliu ki Selusalemi ʼuhi ko te ʼu fihifihia fakapaʼaga pea mo te tokakovi ʼi te faʼahi fakapolitike ʼo te fenua. Neʼe kau te fenua ki te Puleʼaga ʼo Pelesia. Hili te mate ʼo te Hau Pelesia ko Siliusi ʼi te taʼu 530 I.M.T.S. ko Cambyse ʼae neʼe ina fetogi ia ia. Pea neʼe alu te Hau ʼaia ʼo laga tau ki Esipito. ʼI tana alu ʼae ʼo ʼohofi ia Esipito, neʼe lagi kole e ʼana solia ki te kau Iselaele hanatou meʼa kai, he meʼa inu pea mo he ʼu nofoʼaga. Neʼe liliu ai ʼo faigataʼa te maʼuli ʼo te kau Iselaele. Neʼe fetogi leva e Taliusi 1 ia Cambyse. ʼI tana kamata pule, neʼe hoko ai ni agatuʼu ʼi te fenua pea mo te ʼu tokakovi ʼi te faʼahi fakapolitike. ʼE mahino ia, ʼuhi ko te ʼu fihifihia ʼaia neʼe lagi tuʼania ʼihi Sutea ʼo ʼuhiga mo te taupau ʼo ʼonatou famili. ʼI tanatou tau mo te ʼu fihifihia fuli ʼaia, neʼe lagi manatu ai ʼihi Sutea neʼe heʼeki hoko mai te temi ʼae ke toe laga ai te fale lotu ʼa Sehova.—Ake. 1:2.
6. ʼO mulimuli kia Sakalia 4:6, 7, kotea te tahi ʼu faigataʼaʼia neʼe felaveʼi mo te kau Sutea, pea kotea ʼae neʼe ui age e Sakalia kia natou?
6 Lau ia Sakalia 4:6, 7. Neʼe mole tau pe te kau Sutea mo te ʼu fihifihia fakapaʼaga pea mo te ʼu tokakovi ʼi te faʼahi fakapolitike. Neʼe toe fakatagaʼi natou. ʼI te taʼu 522 I.M.T.S. neʼe tapuʼi e ʼonatou fili te toe laga ʼo te fale lotu ʼa Sehova. Kae neʼe ui e Sakalia ki te kau Sutea ʼe fakaʼaogaʼi anai e Sehova ia Tona laumalie malohi moʼo pulihi te ʼu fakafeagai fuli. Koia, ʼi te taʼu 520 I.M.T.S. neʼe fakagafua leva e te Hau ko Taliusi ke toe hoko atu te ʼu gaue ʼo te fale lotu. Neʼe ina toe foaki pe la he falā moʼo tokoni ki ai pea mo ina fakatotonu ki te ʼu kovana ʼo te potu fenua ʼaia ke natou tokoni ki te kau Sutea.—Eset. 6:1, 6-10.
7. Ka fakamuʼamuʼa e te kau Sutea te finegalo ʼo Sehova, kotea te ʼu lelei neʼe natou maʼu?
7 ʼAki te ʼu polofeta ko Akeseo mo Sakalia, neʼe fakapapauʼi e Sehova ki tana hahaʼi ʼe tokoni anai kia natou mo kapau ʼe natou fakamuʼamuʼa te toe laga ʼo te fale lotu. (Ake. 1:8, 13, 14; Sakl. 1:3, 16) Neʼe fakalotomalohiʼi ia te kau Sutea e te ʼu palalau ʼaia ʼa te ʼu polofeta, pea neʼe natou hoko atu te gaue ʼi te taʼu 520 I.M.T.S. Hili teitei taʼu ʼe nima, neʼe ʼosi ai te laga ʼo te fale lotu. Logo la ʼonatou faigataʼaʼia, kae neʼe fakamuʼamuʼa pe e te kau Sutea te fai ʼo te finegalo ʼo te ʼAtua. Pea neʼe tokoni ia Sehova kia natou ʼo ina foaki te ʼu meʼa ʼae neʼe ʼaoga kia natou ʼi te faʼahi fakasino mo fakalaumalie. Neʼe natou tauhi fakafiafia ai kia Sehova.—Eset. 6:14-16, 22.
FAKAMUʼAMUʼA TE FAI ʼO TE FINEGALO ʼO TE ʼATUA
8. ʼE tokoni feafeaʼi mai ia Akeseo 2:4 ke tou fakamuʼamuʼa ia te Puleʼaga ʼo te ʼAtua? (Vakaʼi mo te kiʼi nota.)
8 ʼI te ovi mai ʼo te mamahi lahi, ʼe tou mahino lelei age ki te maʼuhiga ʼae ke tou kau ki te gaue faifakamafola. (Mko. 13:10) Kae ʼe lagi faigataʼa hatatou fakamuʼamuʼa te faifakamafola moka tou tau mo he fihifihia fakapaʼaga, peʼe mo kapau ʼe fakafeagai te hahaʼi ki tatatou faifakamafola. Kotea ʼae ka tokoni mai ke tou fakamuʼamuʼa te ʼu gaue ʼo te Puleʼaga? Ko tatatou falala ʼae ko “Sehova ʼo te ʼatu kautau” c ʼe nofo mo tatou. ʼE tokoni mai anai mo kapau ʼe tou haga fakamuʼamuʼa te ʼu gaue ʼo te Puleʼaga ʼi te ʼu meʼa ʼae ʼe tou loto ki ai. Koia, ʼe mole ʼaoga ai ke tou matataku.—Lau ia Akeseo 2:4.
9-10. Neʼe hoko moʼoni feafeaʼi ki he taumatuʼa te ʼu palalau ʼa Sesu ia Mateo 6:33?
9 Tou vakaʼi te aluʼaga neʼe hoko kia Oleg mo Irina, d ko he taumatuʼa pionie. Neʼe nā mavae ʼo olo ki he tahi koga meʼa, moʼo tokoni ki he kokelekasio. Neʼe mole kei ʼi ai hanā gaue he neʼe ʼaʼasili kovi te aluʼaga fakaekonomika ʼo te fenua. Logo la neʼe mole nā gaue hoholo ʼi te taʼu katoa, neʼe nā logoʼi tuʼumaʼu pe te tokoni ʼofa ʼa Sehova kia naua, ʼo feia mo te tokoni ʼi ʼihi temi ʼa te ʼu tehina mo tuagaʼane. Neʼe nā lava tauʼi feafeaʼi ʼonā faigataʼaʼia? ʼE ui e te tehina, ʼae neʼe lotovaivai ʼi te kamata: “Ko tamā maʼumaʼua ʼi te minisitelio ʼae neʼe tokoni mai ke ma tokakaga tafito ki te ʼu faʼahi ʼae ʼe maʼuhiga age.” Logo la kei hoko atu pe tanā kumi hanā gaue, kae ʼe lahi pe tanā maʼumaʼua ʼi te faifakamafola.
10 ʼI te tahi ʼaho, ʼi tanā ʼosi faifakamafola, neʼe nā toe liliu kio naua. Neʼe fakaha age leva neʼe haʼu mai mamaʼo tona kaumeʼa mo he ʼu kato meʼa kai ʼe lua. ʼE ui e te tehina ko Oleg: “ ʼI te ʼaho ʼaia, neʼe ma toe logoʼi ai te tokaga ʼofa ʼa Sehova pea mo te kokelekasio kia maua. Neʼe ma tui papau ai ʼe mole galoʼi e Sehova ʼana kaugana, tatau aipe peʼe kua hage ia ʼe mole kei he puleʼaki ki tonatou aluʼaga.”—Mat. 6:33.
11. Kotea ʼae ʼe feala ke tou tui papau ki ai mo kapau ʼe tou fakamuʼamuʼa te fai ʼo te finegalo ʼo te ʼAtua?
11 ʼE loto e Sehova ke tou tokakaga tafito ʼo fai ni tisipulo he ʼe haofaki ai te hahaʼi. Ohage ko tona fakaha ʼi te palakalafe 7, neʼe uga e Akeseo te hahaʼi ʼa Sehova ke natou toe hoko atu te ʼu gaue moʼo laga ʼo te fale lotu, ohage ko te temi ʼae neʼe natou hili ai te ʼu fakatafito ʼo te fale lotu. Kapau ʼe natou fai te faʼahi ʼaia, neʼe fakapapau e Sehova ʼe ina ‘tapuakiʼi anai ia natou.’ (Ake. 2:18, 19) ʼE feala ke tou toe tui papau ʼe tapuakiʼi anai e Sehova ʼatatou faiga mo kapau ʼe tou fakamuʼamuʼa te gaue ʼae neʼe ina kole mai ke tou fakahoko.
KE MALOHI AGE TAU FALALA KIA SEHOVA
12. He koʼe neʼe tonu ke maʼu e Esetalasi mo te tahi kau Sutea he tui ʼe malohi?
12 ʼI te taʼu 468 I.M.T.S. neʼe mavae ia Esetalasi mo te tahi ʼu Sutea mai Papiloni ʼo olo ki Selusalemi. Neʼe tonu kia Esetalasi mo te kau Sutea ʼaia ke natou maʼu he tui ʼe malohi ʼi tanatou faifagona ʼaia. Neʼe feala ke hoko ni tuʼutamaki ʼi te ala, he neʼe natou ʼave mo natou he tuʼuga aulo mo siliva, neʼe ko te ʼu meʼa ʼofa ki te laga ʼo te fale lotu. Neʼe feala ke ʼohofi natou e he kau kaihaʼa. (Eset. 7:12-16; 8:31) Pea ʼi tanatou tau atu ki Selusalemi, neʼe natou mahino neʼe feala ke toe hoko ai kia natou he ʼu tuʼutamaki. Neʼe tokosiʼi te hahaʼi ʼae neʼe nonofo ʼi te kolo, pea neʼe kei tuku maumau te ʼu kaupa pea mo te ʼu matapa. Kotea te ako ʼe tou lava taʼofi mai ia Esetalasi, ke malohi age ai tatatou falala kia Sehova?
13. Neʼe malohi feafeaʼi te falala ʼa Esetalasi kia Sehova? (Vakaʼi mo te kiʼi nota.)
13 Neʼe sio ia Esetalasi ʼi muʼa atu ki te tokoni ʼae ʼa Sehova ki tana hahaʼi ʼi tanatou tuʼutamakiʼia. ʼI ni taʼu ki muʼa atu, ʼi te taʼu 484 I.M.T.S. neʼe kua lagi maʼuli ia Esetalasi ʼi Papiloni ʼi te temi ʼae neʼe fakaha ai te fakatotonu ʼa te Hau ko Asuelusi ke matematehi te kau Sutea ʼo te Puleʼaga katoa ʼo Pelesia. (Esit. 3:7, 13-15) Neʼe feala ke matehi ai mo Esetalasi. ʼI tanatou iloʼi ia te fakatotonu ʼaia, ko te kau Sutea ʼae neʼe maʼuʼuli “ ʼi te ʼu potu fenua fuli” neʼe natou sesunio mo putu, pea neʼe natou kole kia Sehova ke tokoni age kia natou. (Esit. 4:3) Fakakaukauʼi age muʼa koe pe neʼe feafeaʼi ia Esetalasi mo te kau Sutea ʼi te temi ʼae neʼe mole ko natou ʼae neʼe matematehi kae ko ʼonatou fili. (Esit. 9:1, 2) Ko te ʼu meʼa ʼae neʼe sio ki ai ia Esetalasi ʼi te ʼu temi faigataʼa ʼaia neʼe lagi teuteuʼi ai ia ia ki he ʼu fihifihia ka felaveʼi anai mo ia, pea neʼe toe malohi age tana falala ʼae ʼe lava puipui e Sehova Tana hahaʼi. e
14. ʼI te sio ʼa he tuagaʼane ki te tokaga lelei ʼa Sehova kia ia ʼi tana felaveʼi mo he faigataʼaʼia, kotea te ako neʼe ina maʼu mai ai?
14 Ka tou sio ki te tokaga ʼa Sehova kia tatou ʼi te ʼu temi faigataʼa, ʼe malohi age tatatou falala ʼae ʼe tokoni mai anai ʼi te ka haʼu. Tokagaʼi te faʼahi ʼaeni neʼe hoko kia Anastasia, ʼae ʼe maʼuli ʼi te Potu Esite ʼo Eulopa. Neʼe mavae ʼi tana gaue he neʼe mole fia faipolitike. ʼE ina ui: “Neʼe mole kei ʼi ai haku falā, pea neʼe ko taku hoki felaveʼi ʼaia mo he aluʼaga feia ʼi toku maʼuli.” ʼE ina hoko atu: “Neʼe au fakaha kia Sehova toku aluʼaga pea neʼe au sio ki tana tokaga lelei ʼae kia au. Koia, kapau ʼe toe hoko he aluʼaga feia kia au, ʼe mole au mataku anai. Kapau ʼe tokaga lelei taku Tamai ʼae ʼi selo kia au ia ʼaho nei, ʼe toe tokaga lelei pe anai kia au ʼi te ka haʼu.”
15. Kotea ʼae neʼe tokoni kia Esetalasi ke haga falala kia Sehova? (Esetalasi 7:27, 28)
15 Neʼe mahino ia Esetalasi neʼe nofo te nima ʼo Sehova mo ia. ʼE mahino papau ia, moka fakakaukauʼi e Esetalasi te ʼu lakaga ʼae neʼe tokoni ai ia Sehova kia ia, neʼe toe malohi age tana falala kia te ia. Tokagaʼi tana ui fenei: “Neʼe nofo te nima ʼo Sehova toku ʼAtua mo au.” (Lau ia Esetalasi 7:27, 28.) Neʼe toe fakaʼaogaʼi tuʼa nima e Esetalasi te ʼu palalau ʼaia ʼi te tohi ʼae ʼe toʼo tona higoa.—Eset. 7:6, 9; 8:18, 22, 31.
16. Ko te ʼu aluʼaga fea ʼae ʼe feala ke tou sisio ai ʼe nofo te nima ʼo Sehova mo tatou? (Vakaʼi mo te pāki.)
16 ʼE feala ke tokoni mai ia Sehova moka tou felaveʼi mo he faigataʼaʼia. Ohage la, ʼe tonu ke tou kole hatatou ʼaho malolo ki totatou patolo, ke tou kau ai ki he fakatahi lahi, peʼe tou kole ke fetogi ʼatatou ʼu hola gaue ke tou kau tuʼumaʼu ai ki te ʼu fono. ʼE ko he faigamalie ʼaia ke tou sisio ʼe nofo te nima ʼo Sehova mo tatou. ʼE lagi tou punamaʼuli anai ki te tali leleiʼi ʼo tatatou kole. Pea ʼe tou toe falala lahi age ai kia Sehova.
17. Neʼe fakaha feafeaʼi e Esetalasi tana agavaivai ʼi te ʼu temi faigataʼa? (Vakaʼi te pāki ʼo te takafi.)
17 Neʼe agavaivai ia Esetalasi he neʼe ina kole te tokoni ʼa Sehova. ʼI te ʼu lakaga fuli ʼae neʼe hoha ʼaupito ai ia Esetalasi ʼo ʼuhiga mo ʼona maʼua, neʼe agavaivai ʼo haga kia Sehova ʼi te faikole. (Eset. 8:21-23; 9:3-5) Ko tana aga ʼaia neʼe ina uga ai ʼihi ke natou tokoni ki ai pea mo natou faʼifaʼitakiʼi tana tui. (Eset. 10:1-4) Ka lahi fau totatou hoha ʼo ʼuhiga mo te ʼu meʼa ʼae ʼe ʼaoga ki totatou maʼuli peʼe ko ʼae ʼo totatou kiʼi famili, ʼe tonu ke tou falala kia Sehova ʼo tou faikole ke tokoni mai.
18. Kotea ʼae ʼe lava tokoni mai ke malohi age tatatou falala kia Sehova?
18 Kapau ʼe tou agavaivai ʼo kole te tokoni ʼa Sehova pea mo tou tali ke tokoni mai te ʼu tehina mo tuagaʼane, ʼe malohi anai tatatou falala ʼae ki te ʼAtua. Ko te tuagaʼane ko Erika, mo ʼana toe ʼe toko tolu, neʼe falala tuʼumaʼu pe kia Sehova ʼi te ʼu temi ʼae neʼe lotomamahi ʼaupito ai. ʼI he kiʼi temi nounou, neʼe mate tana tamasiʼi ʼae neʼe ina fuafatuʼi pea mo tona ʼohoana. Neʼe ina ui fenei ʼo ʼuhiga mo te ʼu aluʼaga fuli ʼae neʼe hoko kia ia: “ ʼE mole feala ke tou iloʼi fakatomuʼa pe ʼe tokoni feafeaʼi mai anai ia Sehova. ʼE tou punamaʼuli ʼi ʼihi temi ki tana faʼahiga tokoni mai. Neʼe au tokagaʼi neʼe tali ki ʼaku faikole ʼo ina fakaʼaogaʼi ʼoku kaumeʼa ʼaki ʼanatou palalau peʼe ko he ʼu gaue neʼe natou fai. Kapau ʼe ke fakaha ki ʼou kaumeʼa te ʼu meʼa ʼae ʼi tou loto, pea ʼe faigafua age hanatou tokoni atu.”
FALALA KIA SEHOVA ʼO KAKU KI TE FAKAʼOSI
19-20. Kotea ʼae ʼe feala ke tou ako mai te kau Sutea ʼae neʼe mole feala ke natou toe liliu ki Selusalemi?
19 ʼE feala ke tou toe maʼu he ako mai te kau Sutea ʼae neʼe mole feala hanatou toe liliu ki Selusalemi. Tokolahi ia natou neʼe mole lagi lahi te ʼu gaue ʼae neʼe feala ke natou fai ʼuhi he neʼe kua matuʼa, peʼe mahahaki peʼe ʼuhi ko ʼonatou maʼua fakafamili. Logo la te ʼu faʼahi ʼaia, kae neʼe natou fia tokoni pe kia natou ʼae neʼe toe liliu ki Selusalemi ʼo natou foaki ni meʼa ʼofa. (Eset. 1:5, 6) ʼE ha mai, hili taʼu ʼe 19 ʼi te ʼosi tau ʼa te ʼuluaki kutuga Sutea ki Selusalemi, ko natou ʼae neʼe nonofo ʼi Papiloni neʼe hoko atu pe tanatou momoli ni meʼa ʼofa ki Selusalemi.—Sakl. 6:10.
20 Tatau aipe pe ʼe tou manatu ʼe mole lahi te ʼu gaue ʼae ʼe tou fai maʼa Sehova, kae ʼe feala ke tou tui papau ʼe maʼuhiga kia Sehova ʼatatou faiga ʼae ke tou fakafiafiaʼi tona loto. ʼE tou iloʼi feafeaʼi te faʼahi ʼaia? ʼI te temi ʼo Sakalia, neʼe kole e Sehova ki tana polofeta ke ina faʼu he pale ʼaki te aulo mo te siliva ʼae neʼe momoli age e te kau Sutea ʼae neʼe nonofo ʼi Papiloni. (Sakl. 6:11) ʼE fakamanatuʼi e “te pale” ʼaia tanatou loto foaki lahi. (Sakl. 6:14) ʼE feala ke tou falala ʼe mole galoʼi anai e Sehova ʼatatou faiga ʼae ke tou tauhi fakamalotoloto kia te ia ʼi te ʼu temi faigataʼa.—Hep. 6:10.
21. Kotea ʼae ʼe lava tokoni mai ke tou haga falala kia Sehova ʼi te ʼu temi faigataʼa ʼae ka hoko mai?
21 ʼE tou iloʼi ʼe hoko atu pe anai tatatou tau mo ni aluʼaga faigataʼa ʼi te ʼu ʼaho fakamuli ʼaeni, pea ʼe ʼaʼasili kovi age anai. (2 Tim. 3:1, 13) Kae ʼe mole tonu leva ke tou tuʼania fau. Manatuʼi te ʼu palalau ʼaeni neʼe fai e Sehova ki tana hahaʼi ʼi te temi ʼo Akeseo: “ ʼE au nofo mo koutou . . . ʼAua naʼa kotou matataku.” (Ake. 2:4, 5) ʼE feala ke tou tui papau ʼe nofo anai ia Sehova mo tatou mo kapau ʼe tou fai ia meʼa fuli ʼe tou lavaʼi moʼo fakahoko tona finegalo. ʼE tou haga falala pe anai kia Sehova ʼi te ʼu temi faigataʼa mo kapau ʼe tou mulimuli ki te ʼu ako ʼae neʼe tou maʼu mai te ʼu lea fakapolofeta ʼo Akeseo mo Sakalia pea mo te faʼifaʼitaki ʼo Esetalasi.
KATIKO 122 Tou Lotomalohi Mo Faʼa Kataki
a ʼE tokoni mai anai te alatike ʼaeni ke lahi age tatatou falala kia Sehova moka tou tau mo ni fihifihia fakapaʼaga, peʼe moka tou maʼuli ʼi he fenua ʼe tokakovi ʼi te faʼahi fakapolitike peʼe moka fakafeagai te hahaʼi ki tatatou faifakamafola.
b Ko te ʼu mataʼi tohi I.M.T.S. ko tona fakaʼuhiga: ʼI Muʼa ʼo te Temi ʼo Sesu.
c ʼI te tohi ʼa Akeseo, ʼe ha tuʼa 14 te kupusiga palalau ʼae “Sehova ʼo te ʼatu kautau.” Neʼe manatuʼi ai e te kau Sutea ʼo feia mo tatou ia ʼaho nei te toe malohi lahi ʼae ʼe maʼu e Sehova pea ʼe pule ki he ʼu kautau ʼaselo ʼe kauga malie.—Pes. 103:20, 21.
d Ko ʼihi higoa neʼe fetogi.
e Ko Esetalasi neʼe ko he tagata hiki tohi faiva ʼo te Lao ʼa te ʼAtua. Koia neʼe kua falala katoa ki te ʼu lea fakapolofeta ʼa Sehova ʼi muʼa ʼo tana faifagona ʼae ki Selusalemi.—2 Klk. 36:22, 23; Eset. 7:6, 9, 10; Sel. 29:14.
f FAKAMATALA ʼO TE PĀKI: ʼE kole e he tehina ki tona patolo hona ʼaho malolo ke feala hana kau ki te fakatahi lahi, kae mole tali e tona patolo. ʼE ina kole kia Sehova ke tokoni age ʼi tana teuteu ʼae ke toe alu ʼo fai tana kole ki tona patolo. ʼE ina fakaha ki tona patolo te polokalama ʼo te fakatahi, ʼo ina fakamahino age te ʼu tokoni lelei mai te Tohi-Tapu ka fakaha ʼi te fakatahi ʼaia. ʼE punamaʼuli tona patolo pea fetogi ai tana manatu.