ALATIKE AKO 44
KATIKO 33 Tuku Tau Kavega Kia Sehova
ʼE Feafeaʼi Hatatou Tauʼi He Aluʼaga Heʼe Faitotonu?
“ ʼAua naʼa ke tuku ke malo te kovi ia koe, kae ke ke haga malo ʼi te kovi ʼaki te lelei.”—LOMA 12:21.
TE MANATU TAFITO
ʼE tou vakaʼi anai pe ʼe feafeaʼi hatatou tauʼi he aluʼaga heʼe faitotonu kae ke mole tou fai he meʼa ke toe ʼasili kovi age.
1-2. Ka hoko he aluʼaga heʼe faitotonu, ʼe malave feafeaʼi kia tatou?
NEʼE fakamatala e Sesu te hisitolia ʼo he fafine vitua, neʼe kole tokoni tuʼumaʼu ki he tuʼi fakamau, he neʼe tau mo he aluʼaga heʼe faitotonu. ʼE mahino ia, neʼe lahi te ʼu tisipulo ʼa Sesu neʼe natou iloʼi te aluʼaga ʼaia, he ʼe tokolahi ʼi te temi ʼaia, neʼe natou tau mo he ʼu aluʼaga heʼe faitotonu. (Luka 18:1-5) Ia ʼaho nei, ʼe tou toe mahino ki te meʼa ʼae neʼe logoʼi e te fafine vitua ʼaia, he ʼe kua hoko kia tatou fuli he ʼu aluʼaga heʼe faitotonu.
2 Ia ʼaho nei, tokolahi ʼe natou fakapalatahi mo agakovi pea mo manatu pe kia natou totonu, koia ʼe mole tou punamaʼuli ai moka tou tau mo he ʼu aluʼaga heʼe faitotonu. (Ekl. 5:8) Kae ko te meʼa ʼae ʼe mole tou ʼamanaki ki ai, ʼe ko te fakamamahiʼi ʼo tatou e he tehina peʼe ko he tuagaʼane. Ko he aluʼaga ia ʼe feala ke hoko. ʼE moʼoni, ʼe tou iloʼi ʼe mole fakafeagai ʼotatou tehina mo tuagaʼane ki te moʼoni. Kae ʼe ko he ʼu hahaʼi agahala pe. ʼE lahi te ʼu ako ʼe tou maʼu mai te aga ʼa Sesu ʼo ʼuhiga mo he aluʼaga heʼe faitotonu neʼe fai age e ʼona fili. Kapau foki la, ʼe tou lava katakiʼi te ʼu aga heʼe faitotonu ʼe fai mai e ʼihi, kae ʼe feafeaʼi age la ia ki ʼotatou tehina mo tuagaʼane? Kotea ʼae ʼe logoʼi e Sehova moka tou tau mo he ʼu aluʼaga heʼe faitotonu ʼe fai mai e te hahaʼi ʼo te malama peʼe ko ʼotatou tehina mo tuagaʼane? ʼE tokaga koa ki te aluʼaga ʼe hoko kia tatou?
3. ʼE tokagaʼi moʼoni koa e Sehova te ʼu aluʼaga heʼe faitotonu ʼae ʼe tou tau mo ia? Pea kotea tona tupuʼaga?
3 ʼE tokagaʼi moʼoni e Sehova ia te ʼu aga ʼae ʼe fai mai e ʼihi. “ ʼE ʼofa ia Sehova ki te faitotonu.” (Pes. 37:28) ʼE fakapapauʼi mai e Sesu ʼe ‘fakahoko atu aipe anai e Sehova tana faitotonu’ ʼi tona temi totonu. (Luka 18:7, 8) Pea kua ina vave pulihi ia te ʼu aga kovi fuli pe ʼe tou tau mo ia, ʼo feia mo te ʼu aluʼaga heʼe faitotonu fuli.—Pes. 72:1, 2.
4. ʼE tokoni feafeaʼi mai ia Sehova ia ʼaho nei?
4 ʼI tatatou talitali ki te fakatuʼu ʼo te faitotonu, ʼe tokoni mai ia Sehova ke tou katakiʼi te ʼu aluʼaga heʼe faitotonu. (2 Pet. 3:13) ʼE ina akoʼi tatou pe ʼe feafeaʼi hatatou mole fai he aga ʼe kovi, moka fai mai e ʼihi he ʼu aga heʼe faitotonu. ʼE fakaha mai e Sehova ʼi tana Folafola, pe neʼe katakiʼi feafeaʼi e Sesu ia te ʼu aluʼaga heʼe faitotonu. Pea ʼe ina foaki mai he ʼu tokoni ʼaoga ke tou muliʼi moka fai mai he ʼu aluʼaga feia.
TE AGA ʼAE ʼE TONU KE FAI MOKA HOKO HE ALUʼAGA HEʼE FAITOTONU
5. He koʼe ʼe tonu ke tou tokakaga ki te aga ʼae ʼe tonu ke tou fai moka hoko he aluʼaga heʼe faitotonu?
5 ʼE feala pe ke tou mamahi ʼuhi ko he aluʼaga heʼe faitotonu. (Ekl. 7:7) Neʼe toe logoʼi pe e te ʼu kaugana agatonu ʼaeni ko Sopo mo Hapakuke ia te faʼahi ʼaia. (Sopo 6:2, 3; Hap. 1:1-3) ʼE tou logoʼi fuli te aluʼaga ʼaia, kae ʼe tonu ke tou tokakaga ki te aga ʼae ʼe tonu ke tou fai, ke ʼaua naʼa tou fai he meʼa ʼe kovi.
6. Kotea te ako ʼe tou maʼu mai te faʼifaʼitaki ʼo Salomone? (Vakaʼi mo te pāki.)
6 Ka hoko he aluʼaga heʼe faitotonu, ʼe faiga leva tatou ke tou fakatokatoka te aluʼaga ʼaia, ohage la ke tou lagavaka. Kae ka tou fai feia, ʼe feala pe ke ʼaʼasili kovi age te aluʼaga. Tou vakaʼi te faʼifaʼitaki ʼo Apesalone te foha ʼo te Hau ko Tavite. Neʼe kovi ʼosi tona ita ʼi te fakaʼalikiʼi ʼe tona tehina ko Amenone ia tona tokolua ko Tamale. ʼI te Lao ʼa Moisese, neʼe tonu ke matehi ia Amenone ʼuhi ko te aga ʼae neʼe ina fai. (Lev. 20:17) Logo foki la ʼe tou mahino ki te ita ʼa Apesalone, kae neʼe mole fakagafua kia ia ke ina fakatokatoka ia te aluʼaga ʼaia.—2 Sam. 13:20-23, 28, 29.
7. Kotea ʼae neʼe logoʼi e te tagata faipesalemo ʼo ʼuhiga mo he aluʼaga heʼe faitotonu?
7 Ka mole fakatuʼā ia natou ʼae ʼe natou fai he ʼu aga heʼe faitotonu, ʼe feala pe ke tou feuiʼaki pe ʼe ʼaoga koa ke tou fai te meʼa ʼae ʼe totonu. Tou vakaʼi te aluʼaga ʼo te tagata faipesalemo. Neʼe ina tokagaʼi ʼe hage ʼe maʼuli fimalie te kau agakovi ʼi te kau faitotonu. Neʼe ina ui fenei: “ ʼE feia te kau agakovi ʼae ʼe maʼuli fimalie.” (Pes. 73:12) Neʼe kovi ʼosi tona ita, pea neʼe manatu ʼe mole he ʼuhiga ʼo tana tauhi kia Sehova. Neʼe ina ui fenei: “Neʼe au lotohoha ʼi taku faigaʼi ʼae ke au mahino ki te faʼahi ʼaia.” (Pes. 73:14, 16) Neʼe ina toe ui fenei: “Kae neʼe au meʼa pe ke au hehe ʼi taku haʼele, neʼe meʼa pe ke heke ʼoku vaʼe.” (Pes. 73:2) Neʼe toe hoko pe te aluʼaga ʼaia ki te tehina ʼaeni ko Alberto.
8. Kotea ʼae neʼe logoʼi e he tehina ʼo ʼuhiga mo he aluʼaga heʼe faitotonu?
8 Neʼe tukugakoviʼi hala ia Alberto neʼe ina kaihaʼa te falā ʼo te kokelekasio. Koia neʼe toʼo ai ʼona pilivilesio. Pea tokolahi natou ʼo te kokelekasio neʼe natou iloʼi te koga ʼaia, neʼe mole kei natou fakaʼapaʼapa ki ai. Neʼe ina manatuʼi: “Neʼe au lotomamahi ʼaupito pea mo kovi ʼosi toku ita.” Koia, neʼe ina tuku ai tona mamahi mo tona ita ke maumauʼi ai tona maʼuli fakalaumalie. Pea neʼe mole kei kau ki te ʼu fono lolotoga taʼu ʼe nima. ʼE ha mai ʼi te aluʼaga ʼaia, te meʼa ʼae ʼe feala ke hoko mo kapau ʼe tou iita ʼuhi ko he aluʼaga heʼe faitotonu.
NEʼE KATAKIʼI FEAFEAʼI E SESU TE ʼU ALUʼAGA HEʼE FAITOTONU?
9. Kotea ia te ʼu aluʼaga heʼe faitotonu neʼe katakiʼi e Sesu? (Vakaʼi mo te pāki.)
9 Neʼe tuku mai e Sesu he faʼifaʼitaki lelei ʼo ʼuhiga mo te faʼahiga katakiʼi ʼo he ʼu aluʼaga heʼe faitotonu. Neʼe fai kia ia he ʼu aluʼaga heʼe faitotonu e te hahaʼi pea mo tona famili. Neʼe ui e tona famili ʼae neʼe mole tui, kua ʼulu vale ia. Neʼe ui e te kau takitaki lotu ʼe gaue fakatahi mo te kau temonio. Pea neʼe manukiʼi ia ia e te kau solia Loma mo natou gaohi koviʼi, pea mo matehi leva. (Mko. 3:21, 22; 14: 55; 15:16-20, 35-37) Kae, neʼe katakiʼi pe Sesu te ʼu aluʼaga heʼe faitotonu ʼaia ʼo mole lagavaka. Kotea te ako ʼe tou taʼofi mai tana faʼifaʼitaki?
10. Kotea ʼae neʼe fai e Sesu ʼi tana tau mo he ʼu aluʼaga heʼe faitotonu? (1 Petelo 2:21-23)
10 Lau ia 1 Petelo 2:21-23. a Neʼe tuku mai e Sesu he faʼifaʼitaki lelei ke tou muliʼi moka tou tau mo he aluʼaga heʼe faitotonu. Neʼe ina iloʼi te temi ʼae ke fakalogologo ai pea ke palalau ai. (Mat. 26:62-64) ʼI ʼihi temi, ka fai fasituʼu ʼihi ʼo ʼuhiga mo ia, neʼe mole ina tali age he meʼa. (Mat. 11:19) Ka palalau, neʼe mole ina laukoviʼi ia natou ʼae neʼe natou fakatagaʼi ia ia peʼe ina fakamatakuʼi natou. Neʼe lotololomi ia Sesu he neʼe ina “tuku ia meʼa fuli kia Ia ʼae ʼe ina fakamauʼi ʼi te faitotonu.” Neʼe ina iloʼi neʼe maʼuhiga ʼaupito age ia te sio ʼa Sehova. Neʼe falala ʼe fakatokatoka anai e Sehova ia aluʼaga heʼe faitotonu fuli ʼi tona temi totonu.
11. Ka tou palalau, ʼe feafeaʼi hatatou lotololomi? (Vakaʼi mo te ʼu pāki.)
11 ʼE feala ke tou lotololomi ohage ko Sesu, moka hoko kia tatou he aluʼaga heʼe faitotonu. Ko ʼihi aluʼaga heʼe faitotonu ʼe mole faʼa maʼuhiga. Koia, ʼe feala pe hatatou fakalaka ai, peʼe ke tou nofo fakalogologo ke ʼaua naʼa tou fai he ʼu palalau ʼe feala ke ʼasili ai te aluʼaga. (Ekl. 3:7; Sakp. 1:19, 20) ʼI ʼihi temi, ʼe ʼaoga leva ke tou palalau, moka tou tokagaʼi ia he aluʼaga heʼe faitotonu peʼe moka tonu ke tou tauʼi tatatou tui. (Gaue 6:1, 2) Kapau ʼe tou palalau, pea ʼe tou faiga anai ke tou palalau ʼi te tokalelei mo te fakaʼapaʼapa.—1 Pet. 3:15. b
12. ʼE feafeaʼi hatatou “tuku ia meʼa fuli kia Ia ʼae ʼe ina fakamauʼi ʼi te faitotonu”?
12 ʼE feala ke tou faʼifaʼitakiʼi ia Sesu ʼaki hatatou “tuku ia meʼa fuli kia Ia ʼae ʼe ina fakamauʼi ʼi te faitotonu.” ʼE sio ia Sehova moka ʼe fakamauʼi hala mo gaohi koviʼi tatou. Ka tou iloʼi ʼe fakatokatoka anai e Sehova te ʼu aluʼaga ʼaia, ʼe tokoni mai anai ke tou faʼa kataki, moka hoko he aluʼaga heʼe faitotonu. Koia, ka tou tuku ia meʼa fuli kia nima ʼo Sehova, ʼe mole tou nofo anai mo he loto ita peʼe loto kovi. Ka tou nofo mo he ʼu manatu feia, ʼe feala ke tou fai he meʼa ʼe kovi, ʼo puli ai totatou fiafia mo maumauʼi ai totatou felogoi mo Sehova.—Pes. 37:8.
13. Kotea ʼae ʼe feala ke tokoni mai ke tou haga katakiʼi he aga heʼe faitotonu?
13 ʼE mahino ia, ʼe mole feala ke tou faʼifaʼitakiʼi lelei ia Sesu. ʼE feala pe ke tou fai he aga, peʼe ko he palalau ʼe tou fakahemala ai ki ʼamuli. (Sakp. 3:2) Pea ʼi ʼihi temi, ʼe feala ke galo gataʼa ʼihi aga heʼe faitotonu, ʼo tupu ai hatatou lotomamahi mo lotohoha ʼi totatou maʼuli. Kapau kua hoko kia koe, ke ke iloʼi papau ʼe iloʼi e Sehova ia te aluʼaga ʼae kua ke tau mo ia. ʼE toe iloʼi pe la mo Sesu te faʼahi ʼae ʼe ke logoʼi he neʼe tau pe la mo te ʼu aga heʼe faitotonu. (Hep. 4:15, 16) ʼE mole gata pe ki te faʼifaʼitaki lelei ʼo Sesu, kae ʼe toe foaki mai e Sehova he ʼu tokoni maʼuhiga ke tou faʼa kataki moka ʼe tou tau mo he aluʼaga heʼe faitotonu. Koia, tou vakaʼi he ʼu vaega ʼe lua ʼo te tohi ʼo Loma.
“TUKU KE FAKAHA E TE ʼATUA IA TONA HAUHAU”
14. Kotea te fakaʼuhiga ʼo te ui ʼae ke “tuku ke fakaha e te ʼAtua ia tona hauhau”? (Loma 12:19)
14 Lau ia Loma 12:19. Neʼe ke tokagaʼi koa ʼi te vaega ʼaeni ko te hauhau ʼo ʼai ʼae ʼe tonu ke tuku ke fakaha? Ko te hauhau ʼo te ʼAtua. Ka tou tuku ke fakaha e Sehova tona hauhau, ko tona fakaʼuhiga ʼe tou tuku ia ia ke ina fakatuʼutuʼu te temi mo te faʼahiga fakahoko ʼo te faitotonu. Neʼe tau te tehina ʼaeni ko John mo he aluʼaga heʼe faitotonu. ʼE ina ui fenei: “Neʼe au lava tataʼofi toku ita ke ʼaua naʼa au fai he meʼa ʼe kovi, kae neʼe mole faigafua. Neʼe tokoni mai ia Loma 12:19 ke au faʼa kataki mo fakatalitali kia Sehova.”
15. He koʼe ʼe lelei ko tou atali ke fakatokatoka e Sehova totonu te ʼu fihifihia?
15 Kapau ʼe tou tuku kia Sehova ke ina fakatokatoka te ʼu fihifihia, pea ʼe to lelei pe anai. Kapau ʼe tou fai feia, ʼe mole tou hoha anai mo mamahi ʼuhi ko totatou fia fakatokatoka totonu pe te fihifihia. ʼE tokoni mai ia Sehova. ʼE hage pe ʼe ina ui mai, ‘Tuku koe te aluʼaga heʼe faitotonu ʼaia, ke au tokaga au ki ai.’ Kapau ʼe tou tui ki tana fakapapau ʼaeni: “ ʼE au liufaki anai,” ʼe mole tou nonofo anai mo hotatou ita, he ʼe tou iloʼi ʼe ina fai pe anai te meʼa ʼae ʼe faitotonu. ʼE ko te aluʼaga ʼaia neʼe tokoni kia John ʼae neʼe kua tou palalau ki ai. Neʼe ina ui fenei: “Kapau ʼe au atali ʼe tokaga Sehova ki te fihifihia ʼaia, ʼe lelei age la ia moka na pau ko au.”
“KE KE HAGA MALO ʼI TE KOVI ʼAKI TE LELEI”
16-17. ʼE tokoni feafeaʼi mai te faikole ke tou “haga malo ʼi te kovi ʼaki te lelei”? (Loma 12:21)
16 Lau ia Loma 12:21. Neʼe toe fakalotomalohiʼi e Paulo te kau Kilisitiano ke natou “haga malo ʼi te kovi ʼaki te lelei.” ʼI tana akonaki ʼae ʼi te moʼuga, neʼe ui fenei e Sesu: “Kotou haga ʼoʼofa ki ʼokotou fili pea mo hufakiʼi ia natou ʼae ʼe natou fakatagaʼi koutou.” (Mat. 5:44) Pea ʼe ko te meʼa pe ʼaia neʼe ina fai. ʼE mahino ia, neʼe kua tou fakakaukauʼi ia te toe mamahi ʼae neʼe logoʼi e Sesu, ʼi tona tutuki ʼae ki te pou e te kau solia Loma. Neʼe kovi ʼosi ia te gaohi koviʼi ʼo Sesu pea mo tana ʼutakiʼi ia he toe mamahi ʼaupito. Koia, ʼe mole feala ke tou mahino katoa ki te toe mamahi ʼaia neʼe tau mo ia.
17 Neʼe mole tuku e Sesu ke malo ʼi te ʼu aluʼaga heʼe faitotonu fuli ʼaia. Neʼe mole ina fai he meʼa ʼe kovi ki te kau solia ʼaia, kae neʼe faikole fenei: “Tamai, fakamolemole kia natou koteʼuhi ʼe mole natou iloʼi te meʼa ʼae ʼe natou fai.” (Luka 23:34) Ka tou faikole kia natou ʼae ʼe natou gaohi koviʼi tatou, ʼe siʼisiʼi ai totatou loto kovi pea mo totatou iita, maʼia mo tatatou faʼahiga sio kia natou ʼae ʼe natou fakamamahiʼi tatou.
18. Neʼe tokoni feafeaʼi te faikole kia Alberto pea mo John ke nā katakiʼi he ʼu aluʼaga heʼe faitotonu?
18 Neʼe tokoni te faikole ki te ʼu tehina ʼaia ʼe lua, neʼe tou talanoa ki ai ʼi te alatike ʼaeni ke nā katakiʼi te ʼu aluʼaga heʼe faitotonu neʼe nā tau mo ia. ʼE ui fenei e Alberto: “Neʼe au hufakiʼi ia natou ʼae neʼe natou fakamamahiʼi au. Neʼe tuʼa lahi taku kole kia Sehova ke tokoni mai ke ʼaua naʼa au nofo mo hoku ita kia natou.” Kae meʼa lelei, neʼe toe hoko atu pe e Alberto tana tauhi agatonu kia Sehova. Pea ʼe ui fenei e John ʼo ʼuhiga mo ia: “Neʼe au hufakiʼi tuʼumaʼu te tehina ʼae neʼe ina fakamamahiʼi au. Neʼe tokoni mai te ʼu faikole ʼaia ke au fakamolemole ki toku tehina pea ke tuku taku fakamauʼi ia ia. Pea mole gata ai, neʼe toe tokoni mai ke au maʼu te tokalelei ʼo te loto.”
19. Kotea ʼe tonu ke tou fai ʼi tatatou fakatalitali ki te fakaʼosi ʼo te malama ʼaeni? (1 Petelo 3:8, 9)
19 ʼE mole feala hatatou iloʼi pe ʼe kotea te tahi ʼu aluʼaga heʼe faitotonu ʼe tou toe tau anai mo ia, ʼi muʼa ʼo te fakaʼosi ʼo te malama ʼaeni. Kae tatau aipe pe ʼe kotea te aluʼaga ʼae ka hoko, tou haga kole tuʼumaʼu te tokoni ʼa Sehova. Pea tahi, tou faʼifaʼitakiʼi te aga ʼa Sesu ʼo ʼuhiga mo tona ʼu gaohi koviʼi, pea mo tou haga maʼuliʼi te ʼu pelesepeto Fakatohi-tapu. Koia, kapau ʼe tou fai feia ʼe tou tui papau anai ʼe tapuakinaʼi anai tatou e Sehova.—Lau ia 1 Petelo 3:8, 9.
KATIKO 38 ʼE Ina Fakamalohi Anai Ia Koe
a ʼI te kapite 2 mo 3 ʼo te ʼuluaki tohi ʼo te apositolo ko Petelo, ʼe palalau ai ki he ʼu aluʼaga heʼe faitotonu neʼe tau mo te ʼu tehina mo tuagaʼane ʼo te ʼuluaki sekulo, ʼuhi ko ʼonatou pule, peʼe ko ʼonatou hoa ʼae neʼe mole tui.—1 Pet. 2:18-20; 3:1-6, 8, 9.
b Vakaʼi ʼi te jw.org te ʼata viteo Ko te ʼOfa ʼe Ina Taki Tatou Ki Te Tokalelei Moʼoni.