ALATIKE AKO 47
KATIKO 103 Te ʼu Tauhi Ovi Ko He ʼu Meʼa ʼOfa ʼo Te ʼAtua
ʼU Tehina, ʼe Kotou Faiga Koa Ke Kotou Tagata ʼAfeā?
“Kapau ʼe faiga he tehina ke liliu ko he taupau, pea ʼe faiga ia ki he gaue ʼe lelei.”—1 TIM. 3:1.
TE MANATU TAFITO
ʼE tou vakaʼi anai ʼihi fakamaʼua ʼi te Tohi-Tapu ke liliu ai he tehina ko he tagata ʼafeā.
1-2. Kotea te “gaue lelei” ʼe fakahoko e he tagata ʼafeā?
KAPAU kua fualoa hau tagata faifekau, ʼe lagi ke faiga malohi anai ke ke liliu ko he tagata ʼafeā. ʼE ke faiga koa ki te “gaue lelei” ʼaia?—1 Tim. 3:1.
2 Kotea te gaue ʼe fakahoko e he tagata ʼafeā? Ko he tagata ʼafeā ʼe faifakamafola tuʼumaʼu, ʼe faʼafai he ʼe alu ʼo ʼaʼahi te ʼu tehina mo tuagaʼane pea mo faiakonaki. Pea ʼe ina fakalotomalohiʼi natou ʼaki ʼana palalau pea mo ʼana gaue. Koia ʼae ʼe ui ai ʼi te Tohi-Tapu ʼo ʼuhiga mo te ʼu tagata faʼafai ʼaia “ko ni meʼa ʼofa.”—Efe. 4:8.
3. ʼE feafeaʼi he liliu ʼa he tehina ko he tagata ʼafeā? (1 Timoteo 3:1-7; Tito 1:5-9)
3 ʼE feafeaʼi hau liliu ko he tagata ʼafeā? ʼE ʼi ai he toe kehekehe ʼo ʼuhiga mo te ʼu fakamaʼua ʼae ʼe tonu ke fai ke kita liliu ko he tagata ʼafeā mo te ʼu fakamaʼua ʼae ke kita maʼu he gaue. ʼI te agamahani, ka tou kumi gaue ʼe tonu ke tou maʼu he ʼu faiva. Kae kapau ʼe ke fia liliu ko he tagata ʼafeā, ʼe mole gata pe ki tau faiva ʼi te faifakamafola mo te faiakonaki. Kae ʼe tonu ke ke mulimuli ki te ʼu fakamaʼua ʼae ʼe tonu ke fai e he tagata ʼafeā ʼe talanoa ki ai ia 1 Timoteo 3:1-7 pea mo Tito 1:5-9. (Lau.) Koia ʼi te alatike ʼaeni, ʼe tou vakaʼi anai aluʼaga ʼe tolu ʼe talanoa ki ai te ʼu vaega ʼaia. ʼE tou talanoa anai pe ʼe feafeaʼi ki he tehina hana maʼu hona matagafua ʼe lelei, mo liliu ko he pule famili ʼe lelei pea mo lotolelei ke tokoni ki te kokelekasio.
KE KE MAʼU HE MATAGAFUA ʼE LELEI
4. Kotea te fakaʼuhiga ʼo te ui ʼae ‘ ʼe tonu . . . ke lelei tou maʼuli ke mole valokiʼi’ koe?
4 Kapau ʼe ke fia liliu ko he tagata ʼafeā, pea ʼe tonu ‘ke lelei tou maʼuli ke mole valokiʼi’ koe. Ko tona fakaʼuhiga ke ke maʼu hou matagafua ʼe lelei ʼi te kokelekasio he ʼe mole tukugakoviʼi koe ʼuhi ko hau aga ʼe kovi. Pea tahi, “ ʼe tonu ke lelei te ʼu palalau ʼae ʼe fai e te hahaʼi ʼo tuʼa” ʼo ʼuhiga mo koe. Logo la ʼe valoki e te hahaʼi ʼae ʼe mole tauhi kia Sehova ia tau tui, kae ʼe tonu pe ke natou palalau lelei ʼo ʼuhiga mo tau aga fakahagatonu pea mo tau fai tuʼumaʼu te meʼa ʼae ʼe lelei. (Tan. 6:4, 5) Koia fai kia koe te fehuʼi ʼaeni: ‘ ʼE au maʼu koa hoku matagafua ʼe lelei ʼi te loto kokelekasio pea mo tuʼa atu?’
5. Kotea ʼae ʼe ha ai ʼe ke “ ʼofa ki te meʼa ʼae ʼe lelei”?
5 Kapau ʼe ke “ ʼofa ki te meʼa ʼae ʼe lelei,” ʼe ke kumi anai te meʼa ʼae ʼe lelei ʼi ʼihi pea ʼe ke vikiʼi anai ia natou ʼuhi ko ʼonatou kalitate. ʼE ke toe fiafia anai ʼi te fai ʼo te meʼa ʼae ʼe lelei kia natou, maʼia pe ke fai he meʼa ʼe lahi age ʼi te ʼu meʼa ʼae ʼe fakamaʼua ki he tagata ʼafeā. (1 Tes. 2:8; Tito 1:8.) He koʼe ʼe maʼuhiga ke ʼofa he tagata ʼafeā ki te meʼa ʼae ʼe lelei? Koteʼuhi ʼe lotolelei ke ina foaki tona temi moʼo tokaga ki te ʼu ovi pea mo ʼana gaue. (1 Pet. 5:1-3) Kae ʼe lahi age te fiafia ʼae ʼe ina logoʼi ʼi tana tokoni ki ʼona tehina mo tuagaʼane ʼi te ʼu sakilifisio ʼae neʼe ina fai.—Gaue 20:35.
6. ʼE feafeaʼi hau fakaha ʼe ke “tali kaiga”? (Hepeleo 13:2, 16; vakaʼi mo te pāki.)
6 ʼE ke fakaha ʼe ke “tali kaiga” moka ʼe ke agalelei mo te hahaʼi ʼae ʼe mole ke fakatahi tuʼumaʼu mo ia. (1 Pet. 4:9) ʼE ui fenei e he tikisionalio Fakatohi-tapu ʼo ʼuhiga mo he tahi ʼe tali kaiga: “ ʼE agalelei pea ʼe ava tuʼumaʼu pe tona ia ʼapi ki te hahaʼi, maʼia mo natou ʼae ʼe mole ina iloʼi.” Ke ke fai te fehuʼi ʼaeni: ‘ ʼE iloʼi koa au ko he tahi ʼe tali kaiga?’ (Lau ia Hepeleo 13:2, 16.) Ko he tagata ʼe tali kaiga ʼe ina vaevae te ʼu meʼa ʼae ʼe ina maʼu mo ʼona tehina mo tuagaʼane, ʼo kau ai ia natou ʼae ʼe masisiva, mo te ʼu tehina taupau feoloʼaki pea mo natou ʼae ʼe ʼomai ʼo ʼaʼahi te kokelekasio.—Sen. 18:2-8; Taag. 3:27; Luka 14:13, 14; Gaue 16:15; Loma 12:13.
7. ʼE fakaha feafeaʼi e he tagata ʼafeā ʼe mole “manako ki te paʼaga”?
7 Ko te ui ʼae ʼe mole tonu ke ke “manako ki te paʼaga,” ko tona fakaʼuhiga ʼe mole ke fakahagahaga tafito tou maʼuli ki te ʼu koloa. Pe ʼe ke koloaʼia peʼe masiva, kae ʼe tonu ke ke fakamuʼamuʼa ia te Puleʼaga ʼo te ʼAtua ʼi tou maʼuli. (Mat. 6:33) ʼE ke fakaʼaogaʼi anai tou temi, mo tou malohi pea mo ʼou koloa ki tau tauhi kia Sehova, mo tokaga ki tou kiʼi famili pea mo tokoni ki te kokelekasio. (Mat. 6:24; 1 Soa. 2:15-17) Ke ke fai ia te ʼu fehuʼi ʼaeni: ‘ ʼE maʼuhiga feafeaʼi kia au te falā? ʼE au maʼuli fakafeʼauga koa? Peʼe au tokaga tafito koa au ke lahi tuʼumaʼu taku falā pea mo tanaki ke lahi ʼoku koloa?’—1 Tim. 6:6, 17-19.
8. ʼE feafeaʼi hau fakaha ʼe ke ‘lotololomi ʼi te ʼu aluʼaga fuli ʼo tou maʼuli’?
8 Kapau ʼe ke ‘lotololomi ʼi te ʼu aluʼaga fuli ʼo tou maʼuli’ pea ʼe ke fakapotopoto anai ia aluʼaga fuli pe ʼo tou maʼuli. Ko tona fakaʼuhiga ʼe tonu ke ke fakapotopoto ʼi tau kai, mo tau inu kava, mo tau faʼahiga faiteuteu peʼe ko tau ʼu fakafiafia. ʼE mole tonu ke ke muliʼi ia te faʼahiga maʼuli ʼo te hahaʼi ʼo te malama. (Luka 21:34; Sakp. 4:4) ʼE mahino ia, ʼe ke iloʼi lelei pe, pe ʼe feafeaʼi hau faʼahiga lotololomi moka hoko ni alu’aga. Ohage la, ka hoko ni fihi ʼe mole ke ita anai. Pea tahi, ʼe mole ke “ inu kava fakavale” anai. Koia ʼe mole iloʼi ai koe ko he tahi ʼe inu pe ia. Ke ke fai te fehuʼi ʼaeni: ‘ ʼE au fakaha koa ʼi toku faʼahiga maʼuli ʼe au lotololomi mo fakapotopoto ʼi te ʼu aluʼaga fuli ʼo toku maʼuli?’
9. Kotea te fakaʼuhiga ʼo te ui ʼae ke ke “fakapotopoto” pea mo “aga fakatokatoka”?
9 Kapau ʼe ke “fakapotopoto,” ʼe ke vakavakaʼi lelei te meʼa ʼae ʼe ui ʼi te Tohi-Tapu ʼo ʼuhiga mo te ʼu aluʼaga kehekehe ʼo te maʼuli. ʼE ke metitasio lelei ki te ʼu pelesepeto ʼaia, ʼo feala ai hau maʼu te fakasiosio tonu pea mo mahino lelei ki te ʼu aluʼaga. ʼAua naʼa ke foimo toʼo fakavilivili he tonu. Kae faiga ke ke maʼu ia faʼahi fuli pe ʼo ʼuhiga mo he aluʼaga. (Taag. 18:13) Pea ʼe ke toʼo anai ni tonu fakapotopoto ʼe ha ai te manatu ʼa Sehova. Kapau ʼe ke “aga fakatokatoka” pea ʼe ke fai anai ia meʼa fuli ʼi te fakatokatoka pea mo ke tautonu tuʼumaʼu. Ke iloʼi koe ko he tahi ʼe tuha mo te falala pea ʼe ke mulimuli fakalelei ki te ʼu fakatotonu. Koia ke ke gaueʼi te ʼu kalitate ʼae neʼe tou vakaʼi ʼi te kupu taki ʼaeni pea ʼe ke maʼu anai hou matagafua ʼe lelei. Tou talanoa leva ki te ʼu fakamaʼua fakatohi-tapu ʼe tonu ke mulimuli ki ai he tagata ʼafeā ʼi tona ʼuhiga pule famili.
KE KE TAKITAKI LELEI TOU KIʼI FAMILI
10. Kotea te fakaʼuhiga ʼo te ui ʼae ko he tagata ʼe “ina takitaki lelei tona loto fale”?
10 Kapau kua ke ʼohoana pea ʼe ke fia mulimuli ki te ʼu fakamaʼua ʼe tonu ke fai e he tagata ʼafeā, ʼe maʼuhiga anai ke lelei te aga ʼo tou kiʼi famili. Koia ʼe tonu ai ke ke ‘takitaki lelei tou loto fale.’ ʼE tonu ke iloʼi ko koe ko he pule famili ʼe fonu ʼi te ʼofa pea mo maʼu te fakasiosio poto. ʼE ke tokaga tafito anai ke maʼu e tou kiʼi famili ia he ʼu agamahani fakalaumalie ʼe lelei. Ohage la, ʼe ke takitaki takotou ako fakafamili, mo tokaga ke natou kau tuʼumaʼu ki te ʼu fono pea mo tokoni kia natou ʼi te faifakamafola. He koʼe ʼe maʼuhiga? Neʼe fai e te apositolo ko Paulo te fehuʼi ʼaeni: “Kapau ʼe mole poto ʼi te takitaki ʼo tona loto fale, ʼe feafeaʼi anai hana tokaga ki te kokelekasio ʼa te ʼAtua?”—1 Tim. 3:5.
11-12. He koʼe ʼe maʼuhiga ʼaupito ke lelei te aga ʼa he fanau ʼo he tehina ʼe fia liliu ko he tagata ʼafeā? (Vakaʼi mo te pāki.)
11 Kapau ʼe ʼi ai hau ʼu fanau heʼeki taʼu 18, ʼe tonu ke natou “fakalogo . . . ʼaki he aga fakaʼapaʼapa.” ʼE tonu ke ke akoʼi natou ʼaki te ʼofa pea mo tokaga lelei kia natou. ʼE mahino ia, ʼe hage pe ko te fanau fuli, ʼe natou fia kokolo mo gaoʼi. Kapau ʼe akoʼi lelei natou, ʼe natou fakalogo anai, mo fakaʼapaʼapa pea mo lelei anai tanatou aga. Pea tahi, ʼe tonu ke ke fai ia meʼa fuli moʼo tokoni kia natou ke natou felogoi lelei mo Sehova, mo maʼuliʼi te ʼu pelesepeto Fakatohi-tapu pea ke natou tuputupu ʼo kaku ki te papitema.
12 ʼE tonu “ke tui ʼana fanau pea ke mole tukugakoviʼi natou ʼe natou fai he ʼu aga heʼe ʼaoga pea mo talagataʼa.” Kapau ʼe fai hana fanau kua papitema he agahala mamafa peʼe kua ʼamanaki papitema pea ʼe kei nofo pe ʼi te loto fale, kotea anai ʼona fua ki te tamai? Kapau neʼe meʼa noaʼi e te tamai te akoʼi ʼo tana ʼu fanau pea mole ina fakatonutonuʼi natou, ʼe mole feala ia ke liliu ko he tagata ʼafeā.—Vakaʼi Te Tule Leʼo ʼo te ʼaho 15 ʼo Oketopeli 1996, p. 21, pal. 6-7.
KE KE TOKONI KI TE KOKELEKASIO
13. ʼE ke fakaha feafeaʼi ʼe mole ke ‘faiga ke tuʼu tau manatu,’ pea ʼe ‘mole ke logotaʼa’?
13 Ka fakaha e te ʼu tehina te ʼu kalitate Fakakilisitiano, ʼe ko he toe tokoni lahi ki te kokelekasio. Ko he tehina ‘ ʼe mole faiga ke tuʼu tana manatu’ ʼe ko he tahi ʼe ina kumi te tokalelei. Kapau ʼe ke loto ke iloʼi koe ko he tahi ʼe mole faiga ke tuʼu tana manatu, pea ʼe ke fakalogo ki te meʼa ʼae ʼe ui atu e ʼihi, pea mo faiga ke ke mahino ki ʼanatou manatu. Ohage la, kapau ʼi he fono ʼe kauga malie te kau tagata ʼafeā neʼe ʼio ki he tonu ʼe alu tahi mo he pelesepeto Fakatohi-tapu, ʼe ke lagolago koa ki ai logo la ʼe mole alu ai tau manatu? Pea ko te ui ʼae ʼe mole “logogata’a” ko tona fakaʼuhiga ke ʼaua naʼa ke fakamalohiʼi he tahi ke ina fai ia meʼa fuli ʼo mulimuli ki tau faʼahiga fai. ʼE ke mahino ʼe maʼuhiga ke ke iloʼi te ʼu manatu ʼa ʼihi. (Sen. 13:8, 9; Taag. 15:22) ʼE mole ke “fakatupu ke” peʼe “hoko ita.” Ko tona fakaʼuhiga ʼe mole tonu ke ke fai ni palalau ʼe mole fakaʼapaʼapa ki ʼihi peʼe ke ke mo natou. Kae ʼe tonu ke ke agalelei mo natou. Kapau ko koe ko he tahi ʼe ina kumi te tokalelei, ʼe ke ʼuluaki alu anai ʼo kumi te tokalelei moka hoko he ʼu fihi. (Sakp. 3:17, 18) Kapau ʼe ke fai ni palalau ʼe lelei, ʼe feala ke malū ifo ai te aga ʼa ʼihi, ʼo kau ai mo natou ʼae ʼe fakafeagai ki te moʼoni.—Tfm. 8:1-3; Taag. 20:3; 25:15; Mat. 5:23, 24.
14. Kotea te fakaʼuhiga ʼo te ui ʼae “ ʼe mole tonu ko he tahi neʼe hoki tafoki age pe” pea ʼe tonu ke “agatonu”?
14 Ko he tehina ʼe mulimuli ki te ʼu fakamaʼua ʼae ke liliu ko he tagata ʼafeā, “ ʼe mole tonu ko he tahi neʼe hoki tafoki age pe.” ʼE mole maʼua ia ke fualoa muʼa ʼi te moʼoni ke liliu ko he tagata ʼafeā. Kae ʼe ʼaoga anai he temi ke liliu ia ia ko he tahi kua fotufotuʼa ʼi te faʼahi fakalaumalie. Ohage ko Sesu, ʼe tonu ke ke agavaivai pea mo fiafia ʼi te tauhi kia Sehova ia aluʼaga fuli pe. ʼE ke faʼa kataki anai pea mo fakatalitali ke foaki atu e Sehova he tahi ʼu gaue ʼi te kokelekasio. (Mat. 20:23; Flp. 2:5-8) Pea tahi, ʼe ke “agatonu” anai ʼo pipiki maʼu kia Sehova mo fakalogo ki ʼana lekula pea mo te takitaki ʼo tana kautahi.—1 Tim. 4:15.
15. ʼE tonu koa ke makehe age te faiakonaki ʼa he tagata ʼafeā? Fakamahino.
15 ʼE fakaha lelei ʼi te Tohi-Tapu ʼe tonu ki he taupau “ke poto ʼi te faiakonaki.” Ko tona fakaʼuhiga koa ʼe tonu ke makehe age tana faiakonaki? Kailoa. Ko te ʼu tagata ʼafeā ʼe mole natou faiva fuli ʼi te faiakonaki. Kae ka natou faifakamafola pea mo ʼaʼahi te ʼu tehina mo tuagaʼane, ʼe tonu ke natou popoto ʼi te fakaʼaogaʼi lelei ʼo te Tohi-Tapu moʼo akoʼi pea mo fakalotomalohiʼi. (Vakaʼi ia 1 Kolonito 12:28, 29 mo Efeso 4:11.) Tatau aipe pe ʼe ke faiva ʼi te faiakonaki peʼe kailoa, kae ʼe tonu ke ke faiga ke ke hikihiki tau faʼahiga faiakonaki. ʼO feafeaʼi?
16. ʼE feafeaʼi hau liliu ko he tehina ʼe poto ʼi te faiakonaki? (Vakaʼi mo te pāki.)
16 ‘ ʼE tonu ke ke pipiki malohi ki te folafola agatonu.’ Kapau ʼe ke fia liliu ko he tehina ʼe poto ʼi te faiakonaki, ke ke fakatafito tau faiakonaki pea mo ʼau tokoni ki te Folafola ʼa te ʼAtua. Ke ke ako fakalelei te Tohi-Tapu pea mo ʼatatou tohi. (Taag. 15:28; 16:23.) Ka ke fai te faʼahi ʼaia ke ke tokaga lelei ki te faʼahiga maʼuliʼi ʼo te ʼu vaega. Pea ka ke faiakonaki, faiga ke malave ki te loto ʼo natou ʼae ʼe fagono atu. Pea tahi, kapau ʼe ke fia tuputupu, kumi tokoni ki he ʼu tagata ʼafeā kua fakapotopoto pea mo ke mulimuli ki ai. (1 Tim. 5:17) ʼE tonu ki he tagata ʼafeā ke “feala hana fakalotomalohiʼi” ʼona tehina mo tuagaʼane. ʼE toe tonu anai ʼi ʼihi temi ke ina “fakatonutonuʼi” ia natou. ʼI te ʼu aluʼaga fuli ʼaia, ʼe tonu ke ina fakaha tuʼumaʼu te agalelei. Koia, kapau ʼe ke agamalū, mo agaʼofa pea mo fakatafito tau faiakonaki ki te Folafola ʼa te ʼAtua ʼe ke faiva anai, he ʼe ke faʼifaʼitakiʼi anai te Tagata Faiako Lahi ko Sesu.—Mat. 11:28-30; 2 Tim. 2:24.
KE HOKO ATU ʼAU FAIGA
17. (1) Kotea ʼae ʼe feala ke tokoni ki he tagata faifekau ke hoko atu pe ʼana faiga ke liliu ko he tagata ʼafeā? (2) Ka sivisivi e te kau tagata ʼafeā te aluʼaga ʼa he tehina pe feala hona fakanofo ko he tagata ʼafeā, kotea ʼae ʼe tonu ke natou mahino ki ai? (Vakaʼi te fakamatala ʼae ʼi te ʼa takai “ Kotou Fakapotopoto Moka Kotou Sivisivi Te Aluʼaga ʼo He Tehina.”)
17 Hili ia te toe vakaʼi ʼo te ʼu fakamaʼua ʼaia ke liliu he tahi ko he tagata ʼafeā, ʼe manatu anai ʼihi tagata faifekau ʼe mole feala hanatou mulimuli ki te ʼu fakamaʼua ʼaia. Kae ke ke manatuʼi ʼe mole kole atu e Sehova peʼe ko tana kautahi ke lelei tukupau tau fakahoko te ʼu gaue ʼaia pea ke ʼaua naʼa to hala he meʼa. (1 Pet. 2:21) Pea tahi, ʼe tokoni lahi atu anai ia te laumalie ʼo Sehova ʼi te ʼu faiga ʼae ʼe ke fai. (Flp. 2:13) ʼE ʼi ai koa he aluʼaga ʼe ke tokagaʼi ai ʼe tonu ke ke gaueʼi? Kapau koia, faikole ʼo ʼuhiga mo te aluʼaga ʼaia. Fai hau fekumi pea mo kole tokoni ki he tagata ʼafeā.
18. Kotea ʼe fakalotomalohiʼi ke fai e te kau tagata faifekau fuli?
18 ʼE fakalotomalohiʼi tatou fuli ʼo kau ai mo te ʼu tehina ʼae kua tagata ʼafeā, ke hoko atu tatatou gaueʼi te ʼu kalitate ʼae neʼe tou vakaʼi ʼi te alatike ʼaeni. (Flp. 3:16) Ko koe koa ko he tagata faifekau fakaminisitelio? ʼAua naʼa ke tuʼu ai, kae hoko atu ʼau faiga! Kole kia Sehova ke ina akoʼi koe ke lahi age te ʼu gaue ʼae ʼe ke fai ʼi tau tauhi kia te ia pea mo tau tokoni ki te kokelekasio. (Esa. 64:8) ʼOfa pe ke haga Sehova ʼo tapuakinaʼi lahi ʼau faiga ke ke liliu ko he tagata ʼafeā.
KATIKO 101 Tou Gaue ʼi Te Logo Tahi