ALATIKE AKO 46
KATIKO 49 Tou Fakafiafiaʼi Ia Sehova
ʼU Tehina, ʼe Kotou Faiga Koa Ke Kotou Tagata Faifekau?
“ ʼE lahi age te fiafia moka kita foaki, ʼi takita tali.” —GAUE 20:35.
TE MANATU TAFITO
Ko te fakatuʼutuʼu ʼo te alatike ʼaeni ʼe ko te fakalotomalohiʼi ʼo te ʼu tehina ke natou fia liliu ko he ʼu tagata faifekau fakaminisitelio pea mo mulimuli ki te ʼu fakamaʼua ʼe tonu ke natou fai.
1. Neʼe kotea te manatu ʼa te apositolo ko Paulo ʼo ʼuhiga mo te kau tagata faifekau?
ʼI TE ʼu kokelekasio, ʼe fakahoko e te kau tagata faifekau he ʼu gaue maʼuhiga. Neʼe fakaʼapaʼapa lahi te apositolo ko Paulo ki te ʼu tagata agatonu ʼaia. Ohage la ʼi tana tohi ki te kau Kilisitiano ʼo Filipe, neʼe fakamalo tafito ki te kau tagata faifekau ʼo feia pe mo te kau tagata ʼafeā.—Flp. 1:1.
2. Kotea ʼae ʼe ui e Luis ʼo ʼuhiga mo tana gaue tagata faifekau?
2 Tokolahi te ʼu tehina ʼe natou fiafia ʼi tanatou fakahoko ia te gaue faifekau fakaminisitelio, tatau aipe pe kei natou tupulaga peʼe kailoa. Ohage la, neʼe fakanofo ia Devan ko tagata faifekau fakaminisitelio ʼi tona taʼu 18. Kae ko Luis ia neʼe fakanofo ko te tagata faifekau kua taʼu 50 tupu. Kotea ʼae neʼe ina logoʼi ʼi tana liliu ko he tagata faifekau? ʼE ina ui fenei: “ ʼE au fiafia ʼosi ʼi taku fakahoko ia te gaue ʼaia he ʼe au tauhi ʼoku tehina mo tuagaʼane. ʼE natou ʼofa mamahi ia au pea ʼe au toe fia fakaha toku ʼofa kia natou.” Tokolahi te ʼu tagata faifekau ʼe natou toe logoʼi te faʼahi ʼaia.
3. Kotea te ʼu fehuʼi ka tou tali anai ki ai?
3 Kapau kua ke papitema kae heʼeki ke tagata faifekau, ʼe feala koa hau faiga ki ai? He koʼe ʼe ke fia fakahoko ia te gaue ʼaia? Kotea te ʼu fakamaʼua ʼi te Tohi-Tapu ʼe tonu ke ke mulimuli ki ai? ʼI te alatike ʼaeni, ʼe tou tali anai ki te ʼu fehuʼi ʼaia. Kae tou vakaʼi muʼa pe kotea te gaue ʼa he tagata faifekau.
KOTEA TE GAUE ʼA HE TAGATA FAIFEKAU?
4. Kotea te ʼu gaue ʼe fai e he tagata faifekau? (Vakaʼi mo te pāki.)
4 Ko he tagata faifekau, ʼe ko he tehina kua papitema pea neʼe fakanofo ʼaki te laumalie maʼoniʼoni. ʼE tokoni ki te kau tagata ʼafeā ki te fai ʼo he ʼu gaue maʼuhiga ʼi te kokelekasio. ʼE tokaga ʼihi tagata faifekau ke maʼu feʼauga e te kau faifakamafola hanatou ʼu tohi mo telituale ki tanatou faifakamafola. Ko ʼihi ʼe natou tokoni ki te taupau lelei mo te fakamaʼa ʼo te Fale Fono. ʼE tokakaga ʼihi ki te tali kaiga, mo te ʼu mikolo pea mo te viteo lolotoga te ʼu fono. Koia, ko te ʼu gaue fuli ʼae ʼe natou fakahoko ʼe ʼaoga ia. Pea ko te ʼu tagata faifekau ʼe ko he ʼu tehina ʼe malohi ʼanatou felogoi mo Sehova. ʼE natou ʼoʼofa ia Sehova pea mo maʼuliʼi ʼana lekula faitotonu. Pea tahi, ʼe natou ʼoʼofa mamahi ʼi ʼonatou tehina mo tuagaʼane. (Mat. 22:37-39) Koia, ʼe feafeaʼi ki he tehina hana liliu ko he tagata faifekau?
5. Kotea ʼe feala ke fai e he tehina ke liliu ko he tagata faifekau?
5 ʼE fakaha ʼi te Tohi-Tapu te ʼu fakamaʼua ʼe tonu ke fai e he tehina ke liliu ai ko he tagata faifekau. (1 Tim. 3:8-10, 12, 13) Kapau ʼe ke fia fai ki te gaue ʼaia, vakavakaʼi lelei te ʼu fakamaʼua Fakatohi-tapu ʼaia ʼo faiga ke ke fakahoko lelei. Kae ʼe tonu muʼa ke ke fakakaukauʼi lelei te ʼu tupuʼaga ʼo tau fia liliu ko he tagata faifekau.
HE KOʼE ʼE KE FIA LILIU KO HE TAGATA FAIFEKAU?
6. Kotea anai ʼe ina uga koe ke ke fakahoko ia gaue kehekehe moʼo tokoni ki ʼou tehina mo tuagaʼane? (Mateo 20:28; vakaʼi mo te ʼo te takafi.)
6 Ke ke fakakaukauʼi age muʼa totatou faʼifaʼitakiʼaga lelei ia Sesu Kilisito. Neʼe ina fai ia meʼa fuli ʼuhi ko tona ʼofa ki tana tamai pea mo te hahaʼi. Ko tona ʼofa ʼaia neʼe ina uga ai ia ia ke gaue kinakina pea mo fakahoko he ʼu gaue ʼe mole faʼa maʼuhiga maʼa te hahaʼi. (Lau ia Mateo 20:28; Soa. 13:5, 14, 15) Kapau ʼe ko te ʼofa ʼae ʼe ina toe uga koe ke ke fai te faʼahi ʼaia, ʼe tapuakinaʼi anai koe e Sehova. Pea ʼe tokoni atu anai ke ke mulimuli ki te ʼu fakamaʼua ʼae ke ke liliu ko he tagata faifekau.—1 Ko. 16:14; 1 Pet. 5:5.
7. He koʼe ʼe mole tonu ke fiaha he tehina?
7 ʼI te malama ʼaeni, ʼe sioʼi tuʼumaʼu e te hahaʼi ia natou ʼae ʼe fiaha. Kae ʼe mole feia ʼi te kautahi ʼa Sehova. Ohage la, ko he tehina ʼe ʼofa ki te hahaʼi ohage ko Sesu, ʼe mole ina puleʼi anai te hahaʼi pea mole ina loto ke fakamaʼuhigaʼi ia ia. Kapau foki la neʼe foaki he ʼu gaue ʼo te kokelekasio ki he tahi ʼe fiaha, ʼe mahino ia ʼe mole ina fia fai anai ʼihi gaue ʼe mole faʼa maʼuhiga ki te hahaʼi kae ʼe ʼaoga anai ia ki te maʼuli lelei ʼo te ovi ʼa Sehova. ʼE lagi manatu anai ʼe mole tuha mo ia ke ina fai te ʼu gaue ʼaia. (Soa. 10:12) Koia, ʼe mole tapuakinaʼi anai e Sehova te ʼu faiga ʼa he tahi ʼe fialahi peʼe fiaha.—1 Ko. 10:24, 33; 13:4, 5.
8. Kotea te tokoni neʼe foaki e Sesu ki ʼana apositolo?
8 ʼI ʼihi temi, neʼe fia fai e te ʼu kaumeʼa lelei ʼo Sesu ia he ʼu gaue kae mole ʼaki he ʼu tupuʼaga lelei. Ke ke manatuʼi te fakatuʼutuʼu ʼae neʼe fai ʼi te tahi ʼaho e Sakopo pea mo Soane, tana ʼu apositolo ʼaia ʼe lua. Neʼe nā kole age ki ai ke ina foaki age honā tuʼulaga ʼi tona Puleʼaga. Neʼe mole ui age e Sesu neʼe lelei tanā kole, ʼae ke nā maʼu tuʼulaga. Kae neʼe ina fakamahino fenei ki te ʼu apositolo ʼe 12: “Ko ʼae ʼe loto ke liliu ʼo lahi, ʼe tonu ke ina tauhi koutou. Pea ko ʼae ʼe loto ke ʼuluaki, ʼe tonu ke kaugana kia koutou fuli.” (Mko. 10:35-37, 43, 44) ʼE liliu anai he tehina ko he toe tokoni lahi maʼa te kokelekasio mo kapau ʼe ina fakahoko he ʼu gaue mo he manatu ʼe lelei. ʼE tonu anai ke ina maʼu te manatu lelei ʼaeni: ʼE ina fakahoko te ʼu gaue ʼaia ʼuhi he ʼe ina fia tauhi ʼona tehina mo tuagaʼane.—1 Tes. 2:8.
KOTEA ʼE TOKONI ATU KE KE FIA LILIU KO HE TAGATA FAIFEKAU?
9. Kotea ʼe tokoni atu ke ke fia liliu ko he tagata faifekau?
9 ʼE mahino ia, ʼe ke ʼofa ia Sehova pea ʼe ke fia tauhi ʼou tehina mo tuagaʼane. Kae ʼe lagi mole ke fia fakahoko moʼoni he ʼu gaue ʼe fai e he tagata faifekau. Kapau koia, kotea ʼe feala ke tokoni atu ke ke fia fai ki te gaue ʼaia? He koʼe ʼe mole ke fakakaukauʼi ia te ʼu fiafia ka ke maʼu anai ʼi tau fai he ʼu gaue moʼo tokoni ki ʼou tehina mo tuagaʼane? Neʼe ui fenei e Sesu: “ ʼE lahi age te fiafia moka kita foaki, ʼi takita tali.” (Gaue 20:35) Neʼe maʼuliʼi e Sesu te pelesepeto ʼaia. Koia ka ina tauhi ʼihi pea ʼe ina logoʼi he toe fiafia lahi. Pea ʼe toe feala pe mo koe hau logoʼi ia te fiafia ʼaia.
10. Neʼe fakaha feafeaʼi e Sesu neʼe fiafia ʼi tana tokoni ʼae ki ʼihi? (Maleko 6:31-34)
10 Tou vakaʼi he faʼifaʼitaki ʼe ha ai neʼe fiafia ia Sesu ʼi tana tauhi ʼihi. (Lau ia Maleko 6:31-34.) Neʼe kua gaʼegaʼe ia Sesu mo ʼana apositolo. Koia, neʼe natou olo ai ki he koga meʼa lavaki ke natou malolo. Kae neʼe kua muʼamuʼa he hahaʼi kaugamalie ia natou, he neʼe natou loto ke akoʼi natou e Sesu. Neʼe feala pe ke fakafisi Sesu ki ai. Ko ia mo ʼana apositolo “neʼe mole maʼu pe la he temi ke natou kakai ai.” Neʼe feala pe hana akoʼi age ki te hahaʼi ʼaia he ʼu manatu ʼe lua peʼe tolu pea ina ui age ke natou toe liliu la kio natou. Kae neʼe ʼofa mamahi ia natou koia ʼae “neʼe lahi ai te ʼu meʼa neʼe ina akoʼi age kia natou.” Pea tahi, neʼe ina akoʼi natou ʼo kaku ki te “kua afiafi.” (Mko. 6:35) Koia, neʼe mole ina fai te faʼahi ʼaia ʼuhi he neʼe fakamaʼua age kae ʼuhi ʼae ‘neʼe ʼofa mamahi ia natou.’ ʼEi, neʼe ʼofa ia natou koia ʼae neʼe ina fia akoʼi ai natou. Neʼe logoʼi e Sesu hona toe fiafia lahi ʼi tana fakaʼaogaʼi tona temi mo tona malohi moʼo tokoni ki ʼihi.
11. Kotea te tokoni neʼe foaki e Sesu ki te hahaʼi? (Vakaʼi mo te pāki.)
11 ʼI te tokoni ʼa Sesu ki te hahaʼi ʼaia, neʼe mole gata pe ki tana akoʼi ia natou ʼo ʼuhiga mo te ʼAtua. Kae neʼe toe tokoni kia natou ʼi te faʼahi fakasino. Neʼe ina foaki fakamilakulo he meʼa kai maʼa natou ʼo ina foaki ki ʼana tisipulo ke natou tufa. (Mko. 6:41) ʼI tana fai te faʼahi ʼaia, neʼe ina akoʼi ai ki ʼana tisipulo he tahi age faʼahi ʼe feala ai hanatou toe tokoni ki ʼihi. Pea neʼe ina fakaha age ʼe ko he tahi gaue ʼaia ʼe maʼuhiga pea ʼe feala ke fai e he tagata faifekau. Fakakaukauʼi age muʼa koe te fiafia ʼae neʼe maʼu e te kau apositolo ʼi tanatou tokoni kia Sesu ki te tufa ʼo te meʼa kai ʼaia neʼe foaki fakamilakulo. “Neʼe natou kakai fuli ai ʼo makokona.” (Mko. 6:42) ʼE mahino ia, neʼe mole ko te milakulo pe ʼaia ʼe tahi neʼe fakaha ai e Sesu ia tana fakamuʼamuʼa te ʼu meʼa ʼae neʼe ʼaoga ki ʼihi. Neʼe fai feia ia ʼi te temi ʼae neʼe maʼuli ai ʼi te kele. (Mat. 4:23; 8:16) Neʼe fiafia ʼaupito ia Sesu ʼi tana akoʼi ʼihi pea neʼe agavaivai ʼi tana tokaga ki te ʼu meʼa ʼae neʼe ʼaoga kia natou. Koia, ʼe feala pe mo koe ke ke toe iloʼi ia te fiafia ʼaia moka ke faiga ke ke liliu ko he tagata faifekau.
12. He koʼe ʼe mole tonu ke manatu he tahi ʼe mole hona ʼaoga ʼi te kokelekasio?
12 Kapau ʼe ke manatu ʼe mole lahi ʼou fealagia, ʼaua naʼa ke lotovaivai. ʼE mahino ia, ʼe ke maʼu he ʼu kalitate ʼe feala hau fakaʼaogaʼi moʼo tokoni ki te kokelekasio. Ke ke faikole kia Sehova pea mo ke fakakaukauʼi te ʼu palalau ʼae neʼe ui e Paulo ia 1 Kolonito 12:12-30. ʼE ha lelei ʼi te ʼu palalau ʼa Paulo, ʼe ʼi ai tou ʼaoga pea ʼe feala tau fai he gaue maʼuhiga ʼi te kokelekasio, ohage pe ko te ʼu kaugana fuli ʼae ʼa Sehova. Kapau ʼi te temi nei, ʼe mole feala hau mulimuli ki te ʼu fakamaʼua ʼae ke ke liliu ko he tagata faifekau, ʼaua naʼa tuku ʼau faiga. Kae ke ke fai ia meʼa fuli ke ke tauhi kia Sehova pea mo tokoni ki ʼou tehina mo tuagaʼane. Pea tahi, ʼe foaki atu anai e te kau tagata ʼafeā he ʼu gaue ʼo mulimuli ki te meʼa ʼae ʼe ke lavaʼi.—Loma 12:4-8.
13. ʼE toe fakaʼuhiga kia ai te ʼu fakamaʼua ʼae ke liliu he tahi ko he tagata faifekau?
13 Koʼeni te tahi tupuʼaga ke ke fakakaukau ki ai he tahi ke ke liliu ai ko he tagata faifekau. ʼI te Tohi-Tapu, ʼe lahi te ʼu kalitate ʼe fakamaʼua ai ki te kau tagata faifekau ke natou maʼu. Ko te ʼu kalitate pe ʼaia ʼe tonu ke toe maʼu e te kau Kilisitiano fuli. ʼE tonu ki te kau Kilisitiano fuli ke natou fakaovi kia Sehova, mo fiafia ʼi te lotofoaki, pea mo maʼu he faʼahiga maʼuli ʼe fakafiafiaʼi ai te ʼAtua. Koia, ʼe lagi kua lahi he ʼu kalitate kua ke maʼu ke ke liliu ai ko he tagata faifekau. Kae tou vakaʼi muʼa te ʼu fakamaʼua ʼae ke liliu ai he tehina ko he tagata faifekau.
TE ʼU FAKAMAʼUA ʼI TE TOHI-TAPU
14. Kotea te fakaʼuhiga ʼo te ui ʼae ʼe ke “tuha”? (1 Timoteo 3:8-10, 12)
14 Tou vakaʼi ʼihi fakamaʼua ʼi te Tohi-Tapu ʼe tou maʼu ia 1 Timoteo 3:8-10, 12. (Lau.) Ko he tagata faifekau ʼe tonu ke “tuha.” ʼI te Fakakeleka, ʼe feala ke fakaliliu fenei, ke “tuha mo te fakaʼapaʼapa,” peʼe ke “fakamaʼuhigaʼi.” ʼE mole fakaʼuhiga leva ʼi heni, ke mole ke kata, peʼe ke mole ke fai fakahuahua. (Ekl. 3:1, 4) Kae, ʼe tonu ke ke toʼo fakamalotoloto te ʼu gaue fuli ʼae ʼe foaki atu. Kapau ʼe iloʼi koe ko he tahi ʼe tuha mo te falala, pea ʼe fakaʼapaʼapa atu anai te kokelekasio.
15. Kotea te fakaʼuhiga ʼae ‘ke mole malualoi’ pea ke ‘mole holi ki he paʼaga neʼe maʼu ʼaki he agakaka’?
15 Ka ui ‘ke mole malualoi,’ ko tona fakaʼuhiga ʼe tonu ke fakamalotoloto, mo aga fakahagatonu pea mo tuha mo te falala. Pea ʼe ina fakahoko te ʼu meʼa ʼae ʼe ina ui, pea ʼe mole ina kakaʼi te hahaʼi. (Taag. 3:32) ‘ ʼE mole holi ki he paʼaga ʼe maʼu ʼaki he agakaka’ ko tona fakaʼuhiga, ʼe aga fakahagatonu ʼi te ʼu koga fakakoloa, pea mo meʼa fuli ʼae ʼe pipiki ki ai te falā. Pea tahi, ʼe mole ke fakaʼaogaʼi anai ʼou kaumeʼa ʼae ʼi te kokelekasio ke ke maʼu ai hau foʼi falā.
16. (1) Kotea te fakaʼuhiga ke “mole inu fakavale te vino”? (2) Kotea te fakaʼuhiga ʼae ke tou maʼu “he leʼo loto ʼe maʼa”?
16 Ka ui ko he tahi ‘ ʼe mole ina inu fakavale te vino,’ ko tona fakaʼuhiga, ʼe mole ina inu fakavalevale te kava, pea ʼe mole iloʼi ia ia ko he tahi ʼe inu kava fakavale. Ko he tahi ʼe ina maʼu “he leʼo ʼo loto ʼe maʼa” ko tona fakaʼuhiga, ʼe ina fakaalu tahi tona maʼuli mo te ʼu lekula ʼa Sehova. Ka tou maʼu he leʼo ʼo loto ʼe maʼa, ʼe feala ke tou logoʼi te tokalelei ʼae ʼe tou maʼu mai he ʼu felogoi lelei mo te ʼAtua, logo foki la totatou ʼuhiga agahala.
17. Ka ui ko he tehina ʼe “ ʼahiʼahiʼi” pe ʼe ‘tuha mo he pilivilesio,’ ʼe ina fakaha feafeaʼi ʼe tuha mo te falala? (1 Timoteo 3:10; vakaʼi mo te pāki.)
17 Ka ui ʼe tonu ke “ ʼahiʼahiʼi” koe pe ʼe ke ‘tuha mo he pilivilesio,’ ko tona fakaʼuhiga, neʼe kua ke fakaha ʼe feala ke foaki atu he ʼu gaue ke ke fakahoko. Koia, ka foaki atu e te kau tagata ʼafeā he gaue, pea ke mulimuli fakalelei ki ʼanatou fakatotonu mo te ʼu fakatuʼutuʼu ʼa te kautahi. Faiga ke ke mahino lelei ki te meʼa ʼae ʼe tonu ke ke fai, pea mo te temi ʼae ʼe tonu ke ke fakaʼosi ai te gaue ʼaia. ʼE tokagaʼi anai e te kokelekasio tau fakahoko fakamalotoloto ia te ʼu gaue ʼaia, pea mo tau tuputupu. Koia naʼi tagata ʼafeā, kotou akoako lelei siʼi ʼu tehina. (Lau ia 1 Timoteo 3:10.) ʼE maʼu koa ʼi tau kokelekasio he kau tupulaga peʼe ko he ʼu fanau kua papitema? ʼE natou fai lelei koa ʼanatou ako tokotahi, pea mo teuteuʼi lelei ʼanatou fono? ʼE faitali tuʼumaʼu koa ʼi te ʼu fono pea ʼe natou faifakamafola tuʼumaʼu koa? Kapau koia, foaki age he ʼu gaue ʼo mulimuli ki ʼonatou taʼu pea mo ʼonatou fealagia. ʼE ko he faʼahiga “ ʼahiʼahiʼi” ʼaia ʼo natou pe ʼe natou ‘tuha mo he pilivilesio.’ Koia, ka natou lalahi ake, ʼe natou tokalelei anai ke natou mulimuli ki te ʼu fakamaʼua ʼe tonu ke fai e he tagata faifekau.
18. Kotea te fakaʼuhiga ʼae ʼe “mole fai he tukugakovi” ʼo ʼuhiga mo koe?
18 Ka ui ʼe “mole fai he tukugakovi” ko tona fakaʼuhiga, ʼe mole tukugakoviʼi koe he neʼe ke fai he aga ʼe kovi.ʼE mahino ia, ʼe feala ke fai he ʼu tukugakovi hala ki he tehina. Neʼe hoko te aluʼaga ʼaia kia Sesu pea neʼe ina fakakikite ʼe toe hoko pe anai ki ʼana tisipulo. (Soa. 15:20) Ohage ko Sesu, kapau ʼe lelei tuʼumaʼu tau aga, pea ʼe ke matagafua lelei anai ʼi te kokelekasio.—Mat. 11:19.
19. Kotea te fakaʼuhiga ʼae ʼe tonu ke ke “ ʼohoana mo he fafine ʼe tahi”?
19 ʼE tonu ke ke “ ʼohoana mo he fafine ʼe tahi.” Kapau kua ke ʼohoana, ʼe tonu ke ke fakaʼapaʼapa ki te lao ʼae neʼe fakatuʼu e Sehova ʼi te kamataʼaga. Neʼe ina ui ko te ʼohoana, ʼe ko te fakatahiʼi ʼo he tagata pea mo he fafine. (Mat. 19:3-9) ʼE mole tonu ki he tehina ke ina fai he ʼu aga heʼe ʼaoga (Hep. 13:4) Kae ko te ui ʼae ʼe tonu ke ʼohoana mo he fafine ʼe tahi, ʼe ʼi ai tona tahi fakaʼuhiga, ʼe tonu ke toe agatonu ki tona ʼohoana. Koia, ʼe mole manako anai ki he tahi age ʼu fafine.—Sopo 31:1.
20. ʼE fakaha feafeaʼi e he tehina ʼe ina “ takitaki lelei” tona kiʼi famili?
20 ʼE tonu ke ina “takitaki lelei ʼana fanau pea mo tona loto fale.” Kapau ko koe ko he pule famili, pea ʼe tonu ke ke toʼo fakamalotoloto tou ʼuhiga pule famili. Faiga ke fai ʼi te vahaʼa fuli ia te ako fakafamili. Kapau ʼe feala, pea ke faifakamafola mo natou fuli ʼo tou kiʼi famili. Tokoni ki ʼau fanau ke natou maʼu he ʼu felogoi lelei mo Sehova. (Efe. 6:4) Ka tokaga lelei he tehina ki tona kiʼi famili pea ʼe ina fakaha ai ʼe tokaga lelei anai ki te kokelekasio.—Vakaʼi mo 1 Timoteo 3:5.
21. Kapau heʼeki ke tagata faifekau, kotea ʼae ʼe tonu ke ke fai?
21 Naʼi tehina ʼae heʼeki tagata faifekau, kotou fakakaukauʼi lelei te ʼu tokoni ʼae neʼe tou vakaʼi ʼi te alatike ʼaeni, pea mo kotou faikole ki te faʼahi ʼaia. Kotou vakavakaʼi te ʼu fakamaʼua Fakatohi-tapu ʼae ʼe tonu ke fai pea kotou mulimuli ki ai. Kotou manatuʼi tokotou ʼofa ʼae kia Sehova pea mo ʼokotou tehina mo tuagaʼane. Pea ʼaki te ʼofa ʼaia, ʼe ina uga koutou ke kotou fia tokoni kia natou. (1 Pet. 4:8, 10) ʼEi, kotou ʼahiʼahi te fiafia ʼae ke koutou tokoni ki tokotou famili fakalaumalie, pea ke tapuakinaʼi lahi e Sehova ʼakotou faiga ʼae ke kotou liliu ko he ʼu tagata faifekau!—Flp. 2:13.
KATIKO 17 “ ʼE Au Loto Ki Ai”
a FAKAMATALA ʼO TE PĀKI: ʼI te faʼahi hema, ʼe tokoni Sesu ʼaki he agavaivai ki tana ʼu tisipulo. ʼI te faʼahi mataʼu, ʼe tokoni he tagata faifekau ki he tehina kua matuʼa.