ʼE FAIGATAʼA koa kia koe pea mo fakapiko tau fai tau ako tokotahi ʼi te vahaʼa fuli? Neʼe tou feia fuli ʼi ʼihi temi. Kae fakakaukauʼi age muʼa he ʼu faʼahi ʼe tonu ke ke fai ʼi te ʼaho fuli. Ohage la ko te maʼanu. ʼI ʼihi temi, ʼe mole tou fia maʼanu, koia ʼe tonu ai ke tou toʼo he temi pea mo faiga ke tou olo ʼo maʼanu. Pea ʼi tau ʼosi maʼanu, kua ke logo lelei leva! ʼO toe feia pe, ko tau ako tokotahi ʼe feala ke fua lelei kia koe he ʼe ko “te folafola ʼa te ʼAtua” ʼe hage ʼe ina fufulu kita “ ʼaki te vai.” (Efe. 5:​26) Koʼeni he ʼu manatu ʼe feala ke tokoni atu:

• Filifili he ʼaho ʼi te vahaʼa. Ko te ako tokotahi ʼo te Tohi-Tapu ʼe kau ki “te ʼu meʼa ʼae ʼe maʼuhiga ʼaupito” ʼae ʼe tonu ke tou fai. (Flp. 1:​10) Ke ke manatuʼi ʼo fai tau ako, ʼe lelei moka ke tohi ki he pepa te ʼaho mo te hola, pea ke pulusi leva ʼi he faʼahi ʼe ke sio tuʼumaʼu ki ai, ohage la ʼi tau ʼaisi. Peʼe ke fakatagi ʼi tau telefoni ke ina fakamanatuʼi atu te hola ʼo tau ako.

• Mulimuli ki tou aluʼaga. ʼE faigafua koa kia koe hau fakakaukauʼi ʼi he temi fualoa, peʼe ko he kiʼi temi veliveli pe? ʼE ke iloʼi lelei ʼou fealagia. Koia ʼe ke mulimuli anai ki ai moka ke fakatuʼutuʼu tau ako. Kapau la ʼe mole ke fia ako ʼi te temi ʼae kua ke fakatuʼutuʼu ki ai, faiga ʼo fai ia kiʼi minuta pe ʼe hogofulu. Tatau aipe pe ʼe nounou te temi ʼae ʼe ke ako ai, kae ʼe ʼi ai pe anai he ʼu faʼahi ʼe ke mahino ki ai. Pea ʼi tau fai ʼaia tau ako ki he kiʼi temi, ʼe ke fiafia anai pea ʼe lagi ke fia hoko atu tau ako.​—Flp. 2:​13.

• Filifili fakatomuʼa te meʼa ʼae ka ke ako. Kapau ʼe ke fakatalitali ki te temi ʼae ka fai ai tau ako ke ke filifili ai te ʼu meʼa ka ke ako, ʼe mahino ia ʼe mole ke ‘fakaʼaogaʼi lelei anai tou temi.’ (Efe. 5:​16) Koia, tohi ki he pepa te ʼu alatike ʼae ʼe ke fia ako. Feia la, ka ke fai he fehuʼi, pea feala anai ke ke tohi. Pea ʼi te ʼosi ʼo tau ako, ʼe feala ke ke tohi ʼi te pepa ʼaia he tahi ʼu manatu ʼe ke fia ako.

• Fai ni fetogi moka ʼe ʼaoga. Ko te meʼa ʼae ʼe maʼuhiga, ko tau fai tau ako ʼi te vahaʼa fuli. Pea ke feala ia te faʼahi ʼaia, fetogi te loaloaga ʼo te temi ʼae ʼe ke fai ai tau ako peʼe ko te manatu ka ke ako moka ke sio ʼe ʼaoga.

Kapau ʼe ke fai tau ako tokotahi ʼi te vahaʼa fuli, ʼe ke maʼu ai anai ni fua lelei. ʼE ke fakaovi ai kia Sehova, mo ke maʼu te poto pea mo fakalotomalohi anai kia koe.​—Sos. 1:8.