Paul: Neʼe mā fiafia ʼaupito! Neʼe mā folau ki Libéria ʼi Afelika Uesite, ʼae ka kamata ai tamā gaue fakamisionea. Neʼe mā olo ʼi Novepeli 1985. Neʼe tuʼu tomā vakalele ʼi Sénégal. Neʼe ui fenei mai e Anne: “Kei toe pe te kiʼi hola, pea tā kaku leva ki Libéria.” Kae mā logo leva ki te tala mai ʼo te logo ʼaeni: “ ʼE kole atu ki te kau folau ʼae ʼe olo ki Libéria ke natou hihifo.” ʼE faigaʼi ʼihi hahaʼi ke fakafeagai ki te puleʼaga. Koia ʼae neʼe mole lava to ai te vakalele ʼi Libéria. ʼI te ʼu ʼaho ʼe hogofulu ʼae neʼe hoa mai ki ai, neʼe mā nonofo ʼi te ʼapi ʼo te ʼu misionea ʼi Sénégal, ʼo mā muliʼi mai ai te ʼu logo ʼo Libéria. Neʼe talanoa ai ki he ʼu kamio ʼe fonu ai ko he ʼu hahaʼi kua mamate, pea mo te fakatuʼakoi ai ʼo te feoloʼaki naʼa fana natou.

Anne: Ko maua ia ʼe mole ko he ʼu hahaʼi ʼe ʼoho noa, ʼe mā nonofo tokakaga pe. ʼI taku kei veliveli, ʼe tau ui mai ʼe au hoko mataku. Ka tonu ke au fakalaka ki he tahi kauala, ʼe au tuʼania mo mataku. Kae neʼe mā loto moʼoni pe ke mā olo ki te koga meʼa ʼae neʼe hinoʼi maua ki ai.

Paul: Ko au mo Anne neʼe mā tutupu ʼi te potu uesite ʼo Pilitania, neʼe mā vaha pe ia kilometa ʼe valu. Neʼe mā pionie tokolua ʼi te ʼosi pe ʼo tamā ako. Neʼe fakalotomalohiʼi maua e ʼaku matuʼa feia pe mo te faʼe ʼa Anne. Neʼe lagolago malohi ʼosi mai ʼamā matuʼa ki tamā loto ʼae ke mā foaki tomā maʼuli, ke mā tauhi temi katoa kia Sehova. ʼI toku taʼu 19, neʼe au ulu ai leva ki te Petele, pea hili tomā ʼohoana ʼi te 1982, neʼe toe ulu mai leva mo Anne.

Anne: Neʼe mā leleiʼia ʼosi te Petele, kae neʼe mā loto tuʼumaʼu ke mā gaue kia Sehova, ʼi he koga meʼa ʼe ʼaoga lahi ki ai he kau faifakamafola. ʼI te Petele neʼe mā gaue fakatahi mo he ʼu tehina mo tuagaʼane neʼe misionea ʼi muʼa atu. Pea neʼe toe ʼasili malohi age tamā fia fai ki te gaue ʼaia. ʼI te afiafi fuli, lolotoga taʼu ʼe tolu, neʼe kau ʼi te ʼu meʼa ʼae neʼe mā kole ʼi ʼamā faikole. Koia, ʼi te 1985 neʼe fakaafe maua ke mā kau ki te 79 kalasi ʼo te Ako ʼo Kileate. Neʼe mā fiafia ʼosi pea neʼe hinoʼi leva maua ke mā olo ki Libéria.

Paul: Neʼe mā toʼo te ʼuluaki vakalele ʼae neʼe fakagafua ke to ʼi Libéria. Neʼe heʼeki tokalelei te fenua pea neʼe heʼeki fakagafua ke feoloʼaki. Neʼe kovi ʼosi te matataku ʼo te hahaʼi. Ka natou logo ki he motoka ʼe logoaʼa, neʼe natou kalaga fuli mo feholaki. Neʼe mā lau mo Anne te ʼu vaega ʼo te Pesalemo ʼi te afiafi fuli moʼo fakasiʼisiʼi tomā tuʼania. Kae neʼe mā leleiʼia ʼosi te koga meʼa ʼae neʼe hinoʼi maua ki ai. Neʼe misionea ia Anne kae kia au ia, neʼe au gaue ʼi te  Petele fakatahi mo te tehina ko John Charuk. a Neʼe lahi te ʼu ako neʼe au maʼu mai te tehina ʼaia, he neʼe kua fualoa tana maʼuli ʼi Libéria, pea neʼe ina iloʼi lelei te ʼu faigataʼaʼia ʼo te ʼu tehina mo tuagaʼane ʼo te fenua.

Anne: Kotea te tupuʼaga ʼo tomā leleiʼia ʼae tamā gaue ʼi Libéria? ʼUhi ko ʼomā tehina mo tuagaʼane. Neʼe natou fakaha mai tonatou ʼofa kia kia maua pea neʼe malohi tanatou tui. Neʼe toe malohi foki ʼamatou ʼu felogoi ʼo matou liliu ai ko he foʼi famili. ʼAki ʼanatou tokoni, neʼe mā lotomalohi ai. Neʼe lelei ʼosi te gaue faifakamafola ʼi ai. Kapau neʼe mole matou nonofo fualoa ʼi te ʼapi ʼo te hahaʼi, neʼe natou iita. Neʼe fia palalau te hahaʼi ki te Tohi-Tapu ʼi te ala, neʼe faigafua ai tamatou faipalalau mo natou. Neʼe lahi ʼosi tamā ʼu ako ʼo faigataʼa ai te maʼu he temi feʼauga moʼo fai fuli te ʼu ako ʼaia. Logo la te faʼahi ʼaia, kae neʼe ko he aluʼaga fakafiafia ia.

Paul: Lolotoga taʼu ʼe fa, neʼe feala pe ke ui neʼe tokalelei te fenua, kae neʼe mole faʼa ko ia. Kae ʼi te taʼu 1989, neʼe kamata tau leva te hahaʼi ʼo te fenua. Kae ʼi te ʼaho 2 ʼo Sulio 1990, neʼe kaku ia te kau agatuʼu ki te faʼahi ʼae ʼe tuʼu ai te Petele. Lolotoga mahina ʼe tolu, neʼe mole kei mā lava felogoʼi mo natou ʼae ʼe tuʼa puleʼaga, ʼomā famili pea mo natou ʼae ʼi tamatou ʼu pilo lalahi ʼae ʼi Amelika. Neʼe kovi ʼosi te maveuveu ʼae neʼe hoko ai, te hoge pea neʼe lahi te ʼu fafine neʼe fakaʼalikiʼi. Neʼe hoko te ʼu aluʼaga ʼaia ʼi te fenua lolotoga taʼu ʼe 14.

Anne: Neʼe fetauʼaki mo fematematehiʼaki te ʼu kolo. Neʼe tui e te ʼu tagata he ʼu meʼa faikehe. Neʼe lahi te ʼu mahafu neʼe natou toʼo ʼi tanatou taka ʼi te ala, pea neʼe natou kaihaʼa ia te ʼu ʼapi fuli. Neʼe ui e ʼihi ko te matehi ʼo te tagata, neʼe ko hage pe ia ko te matehi ʼo he manu.” Neʼe pupunu e te kau agatuʼu te ʼu ala ʼo natou taʼofi te hahaʼi, pea neʼe natou tau matehi ia natou ʼae neʼe fia fakalaka. Hili ʼaia, neʼe natou fakatuʼuga te ʼu sino mate. Neʼe hoko te aluʼaga ʼaia ovi pe ki te Petele. Neʼe matehi ai ʼomā ʼu tehina mo tuagaʼane ʼofaina, ʼo kau ai ʼomā kaumeʼa lelei misionea ʼe lua.

Ka maʼu e te kau agatuʼu he ʼu hahaʼi ʼe kau ʼi he ʼu kolo ʼe natou fehihiʼa ai, pea ʼe natou haga ʼo matehi. Neʼe feala ke tuʼutamakiʼia te maʼuli ʼo te ʼu tehina ʼi tanatou fakanono te ʼu tehina mo tuaagaʼane pea mo tonatou haofaki. Ko te aluʼaga pe la ʼaia neʼe toe fai e te kau Petelite mo te kau misionea. ʼI te Petele, neʼe momoe te ʼu tehina mo tuagaʼane ʼae neʼe feholaki ʼi lalo, kae ko ʼihi neʼe fakaʼapi natou e te kau Petelite ʼi ʼonatou nofoʼaga ʼae ʼi fata. Ko maua ia neʼe mā fakaʼapi te kiʼi famili neʼe natou toko fitu.

Paul: ʼI te ʼaho fuli, neʼe faiga te ʼu tagata ke natou hu ki te Petele ʼo vakaʼi pe ʼe kaugamalie ia natou ʼe matou fakanono. Koia, neʼe matou fai ai te puleʼaki ʼaeni moʼo puipui ia matou. Neʼe olo he foʼi toko lua ki te matapa lahi ʼae hu ki loto, kae ʼe sioʼi mai naua e he tahi foʼi toko lua mai te matapa fakamalama. Kapau neʼe ʼai tuʼumaʼu e te ʼu  tehina ʼaia neʼe olo ki te matapa lahi ʼona nima ʼi muʼa, pea ko tona fakaʼuhiga neʼe lelei pe ia. Kae kapau neʼe nā ʼai ʼona nima ki muli, pea ko tona fakaʼuhiga neʼe agamalohi ia natou ʼae neʼe faiga ke hu ki loto. Pea ko te foʼi tokolua ʼae neʼe fakasiosio mai te matapa fakamalama, neʼe nā foimo fakanono te ʼu tehina mo tuagaʼane.

Anne: ʼI te tahi ʼaho, neʼe mole lava taʼofi e te ʼu tehina te hufi ʼo te Petele e he kiʼi kutuga tagata agamalohi mo itaita. Ko au mo te tahi kiʼi tehina neʼe mā fenonoʼi ʼi te ʼu kapine. Neʼe ʼi ai te puha pea neʼe ʼi ai te faʼahi ʼe tuʼu atu ki loto neʼe feala ke nono ai te kiʼi tehina. Ko te ʼu tagata ʼae neʼe natou muliʼi au ʼi te tuʼuga, neʼe natou toʼo ʼanatou fana pea neʼe natou ta malohi te matapa. Neʼe ui age e Paul: “Fakalelei ʼokotou loto, koʼe siʼoku ʼohoana ʼi te fale mamaʼo.” ʼI taku pupunu te faʼahi ʼae neʼe nono ai te kiʼi tehina, neʼe logoaʼa. Pea neʼe tonu ke au toe fakatoka te ʼu meʼa fuli ʼae neʼe ʼi te ʼu hilihiliga, pea neʼe ʼai tona kiʼi fualoa. Neʼe au iloʼi ʼosi au ʼe feuiʼaki anai e te ʼu tagata ʼaia pe kotea ʼae neʼe au fai. Pea neʼe kovi ʼosi toku mataku ʼo au tekelili ai. Neʼe mole feala ke au avahi te matapa ʼi taku feia. Koia, neʼe au faikole kia Sehova ʼi toku loto. Neʼe au avahi leva te matapa pea mo fakamalo ki te ʼu tagata, ʼo mole au hoha ke feafeaʼi. Neʼe humuki au e he tahi ia natou, pea neʼe alu ki te puha ʼo huke te ʼu hilihiliga. Neʼe punamaʼuli ʼosi ʼi tana mole maʼu he meʼa. Pea ko ia mo ʼihi tagata, neʼe hoko atu tanatou huke ʼihi koga fale, pea mo te ʼu faʼahi fuli ʼo te ʼu koga fale. Kae neʼe mole natou toe maʼu pe la he meʼa.

Paul: Lolotoga ni mahina, neʼe hoge ʼosi te meʼa kai kae neʼe haofaki matou e te meʼa kai fakalaumalie. Neʼe mole he meʼa moʼo matou inu kafeʼi ʼi te uhu, kae neʼe hage pe ia te koga tohi ʼae ʼe fai ʼi te uhu fuli ʼi te Petele, ko hamatou meʼa inu kafe he neʼe tokoni mai ai ke matou lotomalohi. Pea neʼe maʼuhiga ʼaupito kia matou fuli te faʼahi ʼaia.

Neʼe matou iloʼi kapau ʼe matou olo ki tuʼa ʼo kumi meʼa kai peʼe ko te vai, neʼe mole feala ke matou puipui te ʼu tehina mo tuʼagaʼane ʼae neʼe matou fakanono, pea neʼe feala pe ke matehi natou. Neʼe foaki tuʼumaʼu mai pe e Sehova te ʼu meʼa ʼae neʼe ʼaoga kia matou ʼi tona temi totonu ʼi hona aluʼaga fakaofoofo. Neʼe tokaga ia kia matou pea mo tokoni mai ke siʼisiʼi tamatou matataku.

Logo la neʼe kua ʼasili kovi te aluʼaga ʼo te fenua, neʼe hage pe neʼe kua nofo ʼi te fakapoʼuli gaogao. Kae neʼe haga mu pe te malama ʼo te moʼoni. Neʼe tuʼa lahi te feholaki ʼomatou tehina mo tuagaʼane moʼo haofaki ʼonatou maʼuli. Kae neʼe natou haga taupau pe ke malohi tanatou tui ʼo mole natou hoha logo la te ʼu fihifihia fuli. Neʼe ui e ʼihi kapau ʼe tou katakiʼi te tau ʼaia, pea neʼe ko “he akoako ʼaia ʼo tatou ki te mamahi lahi.” Neʼe lototoʼa he kau tagata ʼafeā mo he ʼu tehina tupulaga, he neʼe ʼomai ʼo tokoni ki ʼonatou tehina mo tuagaʼane. Ko te ʼu tehina mo tuagaʼane ʼae neʼe feholaki ki ʼihi atu ʼu koga meʼa neʼe natou fetokoniʼaki, pea neʼe natou kamata faifakamafola ʼi te ʼu koga meʼa ʼaia. Neʼe natou fakaʼaogaʼi ia meʼa fuli pe ʼe natou maʼu ʼi te vao matuʼa, moʼo faʼu ʼaki he ʼu Fale Fono kehe pe ke natou malumalu ai, pea mo lava fai ai ʼanatou fono. ʼI te ʼu temi fakamataku ʼaia, ka olo te ʼu tehina mo tuagaʼane ʼo fono pea mo faifakamafola, neʼe natou logoʼi ai te tokalelei mo te fimalie, pea neʼe ko he fakalotomalohi ʼosi kia natou. Ka matou tufa te meʼa kai mo te mutuʼi meʼa pea mo ʼihi atu meʼa, tokolahi ʼomatou tehina mo tuagaʼane neʼe natou kole mai he ʼu kato ki te faifakamafola, kae mole ko he ʼu mutuʼi meʼa. Neʼe malave ʼosi  kia matou. Neʼe lotomamahi ʼosi te hahaʼi pea mo matataku, kae tokolahi neʼe natou fagono ki te logo lelei. Neʼe malave kia natou tanatou sio ʼae te kehekehe ʼo natou mo te kau Fakamoʼoni, he neʼe natou fakaha tonatou ʼofa moʼoni pea mo tonatou fiafia logo la te ʼu aluʼaga fakamataku neʼe hoko ʼi te fenua. Neʼe hage te ʼu tehina mo tuagaʼane ko he malama ʼi te fakapoʼuli gaogao. (Mat. 5:​14-​16) ʼI tanatou faʼafai ʼaia, neʼe liliu ai ʼihi kau agakovi ko homatou ʼu tehina.

Paul: ʼI ʼihi temi, neʼe tonu ke mā mavae mai Libéria. Neʼe tuʼa tolu tamā mavae kae neʼe mole fualoa. Pea tuʼa lua leva tamā olo ʼo fualoa leva ʼo lau pe ki te taʼu katoa. Neʼe fakamahino lelei mai e he misionea te ʼu meʼa ʼe ka kita logoʼi moka kita mavae ʼi he fenua. Ohage ko tatatou vakaʼi ʼi te Ako ʼo Kileate, neʼe tou toʼo fakamalotoloto tatatou gaue ʼi te koga meʼa ʼae neʼe hinoʼi ki ai tatou. Koia, ka tou mavae ʼo olo kae tuku ʼotatou tehina mo tuagaʼane ʼi he ʼu aluʼaga feia, ʼe ko he aluʼaga ia ʼe fakalotomamahi ʼosi. Kae meʼa lelei, neʼe feala pe hamā lagolago ki te gaue faifakamafola ʼae ʼi Libéria mai te ʼu fenua ʼae ʼe ovi mai pe.

Anne: ʼI Maio 1996, ko te foʼi toko fa ia matou neʼe olo mo te motoka ʼo te Petele, pea neʼe natou ave ai he ʼu pepa maʼuhiga ʼo te Filiale ʼo ʼuhiga mo te gaue ʼae ʼe fai ʼi Libéria. Neʼe matou fia olo ki he koga meʼa ʼe mole hoko ai he meʼa kia matou, ʼe tuʼu ʼi te tahi faʼahi ʼo te kolo, neʼe vaha ia kilometa ʼe 16. Kae ʼi tamatou olo ʼaia, neʼe matou to lotoā ʼi he maveuveu neʼe hoko. Neʼe ʼi ai he ʼu tagata itaita neʼe pā fana, neʼe natou puke matou pea mo tohoʼi ki tuʼa he foʼi toko tolu ia matou ʼo ʼave, kae neʼe nofo pe ia Paul ʼi te motoka. Neʼe matou nonofo feia pe mo punamaʼuli pea mo kovi ʼosi tomatou matataku. Fokifa pe, neʼe matou siosio ki te haʼu ʼo Paul kia matou. Neʼe tototoʼia tona ʼulu. Neʼe matou punamaʼuli. Neʼe matou ui neʼe fanahi ia ia. Pea kapau la ko ia, neʼe mole feala hana haʼele. ʼI tona tohoʼi mai ʼae ki tuʼa mai te motoka, neʼe lavea ai ʼuhi ko he tahi ʼo te ʼu tagata. Pea meʼa lelei, neʼe mole kovi ʼosi. Neʼe matou sisio ki he motoka solia neʼe meʼa ke alu. Kae neʼe fonu te motoka, pea ko te hahaʼi ʼae neʼe ʼi loto neʼe natou matataku ʼosi. Neʼe matou faiga ke matou kake ki te motoka kae neʼe mole kei hao. Koia, neʼe matou tapiki pe ki ai. Kae neʼe mole ai pe la he meʼa ke matou tapiki lelei ki ai. Neʼe lele gaholo te motoka ʼo meʼa pe ke matou fetōki. Neʼe matou kole mamahi ki te sofea ke tuʼu, kae ʼi te lahi fau ʼo tona mataku, neʼe faigataʼa tana alu mamalie. Neʼe matou lava tapiki maʼu, kae ʼi tamatou tau ki te koga meʼa, neʼe kovi ʼosi tomatou gaʼegagaʼe pea neʼe mamahiʼia ʼomatou kakano.

Paul: Neʼe mole kei he meʼa ia matou. Neʼe ko ʼomatou mutuʼi meʼa uli pe mo makahaehae. Neʼe matou fesioʼaki mo feuiʼaki pe koʼe ʼe kei matou maʼuʼuli. Neʼe tau ovi mai he pupu, pea neʼe kua ʼi ai ʼihi koga ʼo te pupu ʼaia, kua maumau ʼuhi ko te ʼu faifana, pea neʼe hage kua vave mate. Kae neʼe feala pe ke ʼave matou ki Sierra Léone ʼi te ʼala uhu ake. Koia neʼe matou momoe ʼi he gaueʼaga ʼe ovi pe ki ai. Logo la neʼe matou fiafia ʼi tamatou kei maʼuʼuli, kae neʼe kei matou tuʼania ki ʼomatou tehina mo tuagaʼane.

Anne: ʼI tamatou tau atu ki te Petele ʼo Freetown, ʼi Sierra Leone, neʼe matou logoʼi homatou fimalie pea neʼe gaohi leleiʼi matou. Kae neʼe au kamata manatuʼi leva te ʼu aluʼaga fakamataku ʼae neʼe hoko ʼi Libéria. ʼI te ʼaho fuli, neʼe au mataku tuʼumaʼu naʼa hoko he aluʼaga fakamataku pea neʼe mole au manofo. Pea kia au neʼe mole au tui ki te aluʼaga ʼaeni ʼe au nofo ai. ʼI te poʼuli, ʼe au tau ʼala ʼo tete mo mataku, ʼo au tuʼania naʼa hoko he aluʼaga fakamataku. Neʼe faigataʼa kia au taku manava, neʼe faʼofua mai ia Paul pea mo faikole mo au. Neʼe mā hiva he ʼu katiko ʼo kaku ki te puli ʼo taku tete. Neʼe hage kia au kua au ʼulu vale pea ʼe mole kei feala haku misionea.

Neʼe mole galo kia au te aluʼaga ʼae neʼe hoko ki ʼamuli. ʼI te vahaʼa pe ʼae neʼe hoa mai ki ai, neʼe mā maʼu he ʼu nusipepa ʼe lua. ʼUluaki, ko te Réveillez-vous ! ʼo te ʼaho 8 ʼo Sunio 1996, ʼae neʼe maʼu ai te alatike ʼaeni “Comment venir à bout des crises de panique.” Neʼe au mahino leva ki te aluʼaga ʼae neʼe au tau mo ia. Lua, ko Te Tule Leʼo ʼaho 15 ʼo Maio 1996, ʼae neʼe maʼu ai te alatike ʼaeni “ ʼE Nātou Maʼu Tonatou Mālohi Maifea?” Neʼe fakaha ai he kiʼi pepe neʼe lavea. ʼE talanoa ai ki he kiʼi pepe ʼe feala hana haga kai mo lele logo la te kua maumau ʼo ʼona kiʼi pakakau. ʼO toe feia pe, ʼaki te laumalie ʼo Sehova ʼe feala ke tou haga tokoni ki ʼihi logo la totatou lotomamahi. ʼAki te meʼa kai fakalaumalie ʼaia, neʼe fakalotomalohiʼi au e Sehova ʼi tona temi totonu. (Mat. 24:45) Neʼe au tanaki he ʼu alatike feia neʼe tokoni lahi mai kia au. ʼAki te temi, neʼe puli mamalie taku lotohoha ʼae neʼe tupu mai te ʼu aluʼaga fakamataku ʼae neʼe hoko.

Paul: Ka feala hamā toe liliu ki Libéria, ʼe ko he aluʼaga fakafiafia ia kia maua. ʼI te fakaʼosi ʼo te taʼu 2004, neʼe teitei taʼu 20 leva tamā gaue ʼi te koga meʼa ʼae neʼe  hinoʼi maua ki ai. Neʼe gata leva te tau. Neʼe tonu ke fai he ʼu gaue ʼi te Petele. Neʼe kole mai leva ke mā olo ʼo gaue ʼi he tahi koga meʼa.

Ko he aluʼaga ia neʼe faigataʼa kia maua. ʼE feafeaʼi hamā mavae ʼi he famili fakalaumalie neʼe kua matou faifaitahi mo mahani mo ia? Kae neʼe mā sio ʼi muʼa atu pe neʼe tapuakinaʼi feafeaʼi maua e Sehova ʼi tamā mavae ʼae mai ʼomā famili ʼo ʼolo ki Kileate. Koia, neʼe mā tali ai te fetogi foʼou ʼaia. Neʼe mā olo leva ki Ghana ko he fenua neʼe ovi mai pe.

Anne: ʼI te ʼaho ʼae neʼe mā olo ai, neʼe mā tagi mamahi ʼosi. Neʼe mā punamaʼuli ʼi te ʼu palalau neʼe fai mai e he tuagaʼane kua matuʼa mo fakapotopoto ʼe higoa ko Frank: “Ka kolua olo pea tuku takolua manatu mai!” Pea neʼe ina fakamahino fenei mai: “ ʼE matou iloʼi ʼe mole kolua galoʼi anai matou, kae ʼe tonu leva ke kolua tokakaga tafito ki takolua gaue ʼi te koga meʼa ʼae kua hinoʼi koulua ki ai. Ko Sehova ʼae neʼe ina ʼave koulua ki ai, koia kolua ʼoʼofa ki te ʼu tehina motuagaʼane ʼae ʼi ai.” ʼE fakalotomalohi ʼosi ʼana palalau he neʼe tokoni mai ke mā tokalelei ʼo ʼolo ki he fenua ʼe mole hahaʼi natou ʼe natou iloʼi maua pea ʼe ko he fenua ʼe mole mā iloʼi lelei.

Paul: Neʼe mole ʼaoga pe la he temi fualoa ke mā ʼoʼofa ki tomā famili fakalaumalie foʼou ʼaia. ʼI te fenua ʼaia, neʼe kauga malie ʼosi te kau Fakamoʼoni. Neʼe lahi te ʼu ako neʼe mā maʼu mai tanatou nofo agatonu mo te malohi ʼae ʼo tanatou tui. Hili taʼuʼe 13 ki tamā ʼi Ghana, neʼe hinoʼi leva maua ki te filiale ʼo Afelika Esite, ʼi Kenya. ʼE moʼoni, neʼe mā manatuʼi ʼosi ʼomā kaumeʼa ʼae neʼe mā maʼu ʼi te ʼu koga meʼa ʼae neʼe hinoʼi maua ki ai ʼi muʼa atu. Kae neʼe mā toe maʼu vave homā tahi ʼu kaumeʼa. Pea ohage ko Ghana pea mo Libéria, neʼe toe lahi te gaue ʼi Kenya.

Anne: ʼI toku maʼuli katoa, neʼe au iloʼi tuʼumaʼu pe te mataku. ʼE feala ki te ʼu aluʼaga fakatupu tuʼutamaki peʼe fakatupu hoha ke ʼi ai hona ʼu fua kovi ʼi te faʼahi fakasino pea mo te faʼahi ʼo te loto. ʼE mole puipui fakamilakulo tatou e Sehova. ʼI te temi nei, ka au logo ki he ʼu pā fana ʼe au mamahi fatu mo fia lua pea ʼe mole kei au logoʼi ʼoku nima. Kae neʼe au fakaʼaogaʼi ia faʼahiga tokoni fuli pe neʼe foaki mai e Sehova, ʼae ʼe kau ai te tokoni ʼo ʼomā tehina mo tuagaʼane. Pea neʼe au tokagaʼi ka mā maʼu he ʼu agamahani fakalaumalie, ʼe feala ke tokoni mai ia Sehova ke mā faʼa kataki ʼo fakahoko tamā gaue ʼi te koga meʼa ʼae neʼe hinoʼi maua ki ai.

Paul: ʼI ʼihi temi ʼe fehuʼi mai, pe ʼe mā leleiʼia te gaue ʼe mā fai ʼi te koga meʼa ʼae neʼe hinoʼi maua ki ai. Logo la te matalelei ʼo te fenua, kae ʼe feala ke hoko ai he ʼu tokakovi ʼo tou matataku ai naʼa tou mamate. Koia, kotea ʼae ʼe tou leleiʼia age ʼi te fenua? ʼE ko ʼotatou tehina mo tuagaʼane ʼofaina, ia totatou famili. Logo la te kehekehe ʼo ʼotatou hauʼaga, kae ʼe tou logo tahi ʼuhi ko totatou ʼofa kia Sehova. Neʼe mā manatu neʼe ʼave maua ke mā fakalotomlaohiʼi natou kae ʼi tona ia fakahagatonu ko natou ʼae neʼe natou fakalotomalohiʼi maua.

ʼE ko he milakulo mai ia Sehova totatou foʼi famili fale tautehina ʼi te malamanei. Ko he faʼahi pe ʼe tou olo ki ai, ʼe tou maʼu hotatou famili fakalaumalie. Ka tou kau ki he kokelekasio, ʼe tou maʼu ai hotatou famili pea mo logoʼi ai hotatou fimalie. Koia, ʼe tou tui papau kapau ʼe tou falala kia Sehova, pea ʼe ina foaki mai anai te malohi ke tou katakiʼi ia he aluʼaga pe.​—Flp. 4:​13.