ALATIKE AKO 45
KATIKO 138 Te Matalelei ʼo Te ʼu ʼUlu Hina
Te ʼu Ako Mai Te ʼu Palalau Fakaʼosi ʼa He ʼu Tagata Tui
“ ʼE mole maʼu koa la te poto ʼi te kau matuʼa, mo te ʼatamai ia natou ʼae ʼe maʼuʼuli fualoa?”—SOPO 12:12.
TE MANATU TAFITO
Ka tou fakalogo kia Sehova, pea ʼe tou maʼu he ʼu tapuakina ʼi te temi nei, ʼo feia mo te maʼuli heʼe gata ʼi te ka haʼu.
1. He koʼe ʼe lahi te ʼu ako ʼe tou maʼu mai te ʼu hahaʼi ʼae kua matuʼa?
KA TOU toʼo he ʼu tonu maʼuhiga ʼi totatou maʼuli, ʼe ʼaoga kia tatou fuli he ʼu tokoni. ʼE feala ke tou maʼu te ʼu tokoni ʼaia mai te kau tagata ʼafeā, peʼe ko ʼihi atu ʼu tehina mo tuagaʼane kua fakapotopoto. Logo la ʼe kua matutuʼa age te ʼu tehina mo tuagaʼane ʼaia ia tatou, kae ʼe mole fakaʼuhiga leva, ʼe tonu ke tou liʼaki ʼanatou tokoni, he ʼe mole kei hona ia ʼaoga kia tatou. Kae ʼe loto e Sehova ke tou ako mai te hahaʼi ʼae kua matuʼa. Kotea tona tupuʼaga? Koteʼuhi kua iloʼi lelei age ia e natou ia te maʼuli, pea kua fakapotopoto age natou ia tatou.—Sopo 12:12.
2. Kotea ʼae ka tou vakaʼi ʼi te alatike ʼaeni?
2 ʼI te temi muʼa, neʼe fakaʼaogaʼi e Sehova te kau matuʼa moʼo fakalotomalohiʼi pea mo takitaki ʼana kaugana. Tou vakaʼi te faʼifaʼitaki ʼo Moisese, mo Tavite, pea mo te apositolo ko Soane. Neʼe maʼuʼuli te ʼu tagata ʼaia ʼi he ʼu temi kehekehe pea neʼe mole tatau ʼonatou aluʼaga. ʼI tanatou vave mamate, neʼe natou foaki he ʼu tokoni fakapotopoto ki he ʼu hahaʼi ʼe kei malolohi age ia natou. Pea ʼi tanatou fai ʼaia, neʼe natou tahi fakamaʼuhigaʼi ia te fakalogo ʼae ki te ʼAtua. Neʼe tokaga ia Sehova ke tohi ʼanatou tokoni fakapotopoto ʼaia ʼi te Tohi-Tapu, ke tou toe maʼu ai he ʼu ako mai ia natou. Koia, pe ʼe tou tupulaga peʼe kua tou matutuʼa, ka tou toe vakaʼi te ʼu tokoni ʼaia, pea ʼe fua lelei anai kia tatou. (Loma 15:4; 2 Tim. 3:16) ʼI te alatike ʼaeni, ʼe tou vakaʼi anai te ʼu palalau fakaʼosi ʼa te ʼu tagata ʼaia ʼe tolu kua matutuʼa, pea mo te ʼu ako ʼe feala ke tou maʼu mai ai.
‘ ʼE TOLOGA ANAI TOU MAʼULI’
3. Kotea te ʼu gaue neʼe fai e Moisese?
3 Neʼe gaue malohi ia Moisese ʼi tana tauhi kia Sehova. Neʼe polofeta, mo tuʼi fakamau, mo takitaki pea mo tagata faitohi. Koia, neʼe lahi te ʼu fealagia neʼe ina maʼu. Neʼe ina fakamavae te puleʼaga ʼo Iselaele ʼi tanatou maʼuli popula ʼi Esipito. Pea neʼe lahi te ʼu milakulo neʼe sio ki ai. Neʼe takitaki e Sehova ia ia ʼi tana tohi te ʼu ʼuluaki tohi ʼe nima ʼo te Tohi-Tapu, mo te Pesalemo 90, pea lagi mo te Pesalemo 91. Neʼe lagi toe tohi e Moisese te tohi ʼo Sopo.
4. Ko ai ʼae neʼe fakalotomalohiʼi e Moisese? Pea kotea tona tupuʼaga?
4 ʼI muʼa pe ʼo tona mate, ʼi tona taʼu 120, neʼe pauʼi e Moisese te kau Iselaele fuli moʼo fakamanatuʼi age te ʼu meʼa neʼe natou sio ki ai pea mo hoko kia natou. ʼI muʼa atu, neʼe sisio te kau Iselaele ki ni milakulo neʼe fakahoko e Sehova ʼi Esipito pea ʼi tana tauteaʼi natou. (Eke. 7:3, 4) Neʼe natou haʼele ʼi te Tai Kula ʼae neʼe vaeluaʼi pea neʼe natou sisio ki te tauteaʼi ʼo te kautau ʼa Falaone. (Eke. 14:29-31) Neʼe natou sisio ki te puipui mo te tokaga ʼa Sehova kia natou ʼi te toafa. (Tet. 8:3, 4) ʼI te kua vave ulu ʼa te hahaʼi ki te Kele ʼo te Fakapapau, neʼe toe fia fakalotomalohiʼi natou e Moisese. a
5. Kotea ʼae neʼe fakamanatuʼi age e Moisese ki te kau Iselaele ʼi te ʼu palalau ʼae ia Tetelonome 30:19, 20?
5 Kotea ʼae neʼe ui e Moisese? (Lau ia Tetelonome 30:19, 20.) Neʼe ina fakamanatuʼi age ki te kau Iselaele ʼe natou maʼu anai honatou ka haʼu taulekaleka. ʼE feala ke natou maʼuʼuli ʼo fualoa ʼi te fenua ʼae neʼe fakapapauʼi age e Sehova, ʼuhi ko tana tapuakina fakaʼatua. Pea neʼe ko he fenua matalelei mo kele maʼuli. Neʼe fakamatalatala age fenei e Moisese te agaaga ʼo te fenua: “Ko he fenua ʼe tuʼu ai he ʼu kolo ʼe lalahi mo matalelei neʼe mole kotou laga, mo he ʼu ʼapi ʼe fonu ai ko ni meʼa lelei kehekehe neʼe mole kotou tanaki, mo he ʼu vai keli neʼe mole kotou keli, pea mo he ʼu gaueʼaga vite mo he ʼu fuʼu oliveto neʼe mole kotou to.”—Tet. 6:10, 11.
6. He koʼe neʼe fakagafua e te ʼAtua ki he ʼu puleʼaga ke natou tauʼi ia Iselaele?
6 Neʼe toe fai e Moisese he fakatokaga ki te hahaʼi ʼo Iselaele. Kapau ʼe natou fia nonofo ʼi te fenua ʼaia ʼe kele maʼuli, neʼe tonu ke natou fakalogo ki te ʼu fakatotonu ʼa Sehova. Neʼe fakatotonu age e Moisese ke natou “filifili te maʼuli.” ʼO feafeaʼi? ʼAki hanatou fakalogo kia Sehova pea mo “pipiki kia te ia.” Kae meʼa fakaʼofaʼofa foki, he neʼe mole fakalogo ia te kau Iselaele. Koia, ʼaki te temi neʼe fakagafua e te ʼAtua ki te kau Asilia, pea ki muli age ki te kau Papiloni ke natou tauʼi ia natou ʼo ʼave popula ai.—2 Hau 17:6-8, 13, 14; 2 Klk. 36:15-17, 20.
7. Kotea te ako ʼe tou maʼu mai ʼi te ʼu palalau ʼa Moisese? (Vakaʼi mo te pāki.)
7 Kotea te ako ʼe feala ke tou maʼu mai ai? Ka tou fakalogo pea ʼe haofaki ai totatou maʼuli. Ohage pe ko te ʼamanaki hu ʼa te kau Iselaele ki te Kele ʼo Te Fakapapau, ʼe toe feia pe mo tatou kua tou vave hu ki te malama foʼou ʼae ʼe fakapapauʼi mai e te ʼAtua, ʼe tou sisio anai ki te liliu ʼo te kele ko he palatiso. (Esa. 35:1; Luka 23:43) ʼE pulihi anai te Tevolo mo ʼana temonio. (Fkha. 20:2, 3) ʼE toe pulihi anai mo te ʼu lotu hala ʼae ʼe natou fakamafola he ʼu loi ʼo ʼuhiga mo Sehova. (Fkha. 17:16) ʼE fakaʼauha anai ia te ʼu puleʼaga fakatagata ʼae ʼe natou fakamamahiʼi tanatou hahaʼi. (Fkha. 19:19, 20) ʼE toe pulihi anai ʼi te palatiso ia te kau agatuʼu. (Pes. 37:10, 11) ʼI te kele katoa, ʼe fakalogo anai te hahaʼi ki te ʼu lao faitotonu ʼa Sehova, ʼo natou logo tahi ai pea mo tokalelei. Koia, ʼe natou feʼofaʼofani anai pea mo fefalalaʼaki. (Esa. 11:9) ʼI ka haʼu taulekaleka leva! Kae ʼe mole gata ai. Kapau ʼe tou fakalogo kia Sehova, ʼe tou maʼuʼuli anai ʼi te kele ʼaia kua liliu ko he palatiso ʼo mole ʼi ni sekulo pe, kae ʼo talu ai.—Pes. 37:29; Soa. 3:16.
8. Neʼe tokoni feafeaʼi te fakapapau ʼae ke tou maʼuli ʼo heʼe gata ki he tehina neʼe kua fualoa tana gaue misionea? (Suta 20, 21)
8 Kapau ʼe tou manatuʼi tuʼumaʼu te fakapapau ʼae ke tou maʼuʼuli ʼo heʼe gata, pea ʼe tou fakatotonu anai ke tou fakalogo kia Sehova, tatau aipe pe kotea te ʼu ʼahiʼahi ʼe tou tau anai mo ia. (Lau ia Suta 20, 21.) Ka tou manatuʼi tuʼumaʼu te fakapapau ʼaia, pea ʼe toe tokoni mai ke tou lava tauʼi ʼotatou vaivaiʼaga. Neʼe ʼi ai te tehina neʼe kua fualoa tana gaue misionea ʼi Afelika. Neʼe ina tauʼi tuʼumaʼu pe hona vaivaiʼaga. Neʼe ina ui fenei: “Neʼe au iloʼi kapau mole au fakalogo kia Sehova, pea mole au maʼu anai te maʼuli heʼe gata. Koia, neʼe au faiga malohi ai ke au tauʼi toku vaivaiʼaga ʼaia, pea mo au toe kole mamahi kia Sehova ke tokoni mai. Neʼe au lava tauʼi toku vaivaiʼaga ʼaia, ʼuhi ko tana tokoni.”
‘ ʼE FUA LELEI ANAI KIA KOE’
9. Kotea te ʼu ʼahiʼahi neʼe felaveʼi mo Tavite?
9 Ko Tavite neʼe ko he hau neʼe nofo agatonu ki te ʼAtua. Neʼe ko he tagata faimaholo, mo he tahi neʼe ina tohi he ʼu palalau fakatuketuke, mo he tagata tau pea mo he polofeta. Pea tahi, neʼe lahi te ʼu ʼahiʼahi neʼe fakalaka ai. Neʼe maheka te Hau ko Saulo ki ai, ʼo ina fia matehi ia ia. Koia, neʼe maʼuli feholaki ai ia Tavite lolotoga ni taʼu. ʼI te hau leva ʼa Tavite, neʼe faiga tona foha ko Apesalone ke ina faʼao tona tuʼulaga. Koia, neʼe tonu ke toe hola ai moʼo haofaki tona maʼuli. Logo la te ʼu faigataʼaʼia ʼo Tavite mo ʼana lakahala, kae neʼe nofo agatonu pe ki te ʼAtua ʼo kaku ki tona mate. Neʼe ui e Sehova ʼo ʼuhiga mo ia, neʼe ko “he tagata neʼe mulimuli ki [Tona] finegalo.” Koia, ʼe tonu ke tou fakalogo ki te ʼu tokoni ʼa Tavite!—Gaue 13:22; 1 Hau 15:5.
10. He koʼe neʼe foaki e Tavite he ʼu tokoni kia Salomone, tona foha ʼae ka ina fetogi ia ia?
10 Ohage la, tou vakaʼi te tokoni ʼae neʼe foaki e Tavite kia Salomone, tona foha ʼae ka ina fetogi ia ia. Neʼe filifili e Sehova te tupulaga ʼaia ke ina taupau maʼu te tauhi maʼa pea mo laga he fale lotu ke fakakololiaʼi ai te ʼAtua. (1 Klk. 22:5) Kae neʼe tonu ke ina tauʼi he ʼu faigataʼaʼia. Koia, kotea ʼae ka ui age e Tavite ki ai? Tou vakaʼi te faʼahi ʼaia.
11. Ka tou lau ia 1 Hau 2:2, 3, kotea te tokoni neʼe foaki e Tavite kia Salomone? Pea kotea ʼae neʼe hoko ʼi te fakalogo ʼa Salomone ki te tokoni ʼaia? (Vakaʼi mo te pāki.)
11 Kotea ʼae neʼe ui e Tavite? (Lau ia 1 Hau 2:2, 3.) Neʼe ui e Tavite ki tona foha, kapau ʼe fakalogo kia Sehova, ʼe fua lelei anai te ʼu meʼa ʼae ka ina fai. Koia, lolotoga ni taʼu, neʼe fua manuʼia tana pule fakahau ʼuhi ko Sehova. (1 Klk. 29:23-25) Neʼe ina laga he fale lotu taulekaleka. Neʼe ina tohi he ʼu tohi ʼo te Tohi-Tapu pea neʼe ina tohi he ʼu palalau ʼi he tahi atu ʼu tohi. Neʼe iloa ia ia ʼuhi ko tona poto mo tona koloaʼia. (1 Hau 4:34) Kae ohage ko tona fakamahino age e tana tamai, ʼe lava lelei tuʼumaʼu anai te ʼu meʼa ʼae ka ina fai mo kapau ʼe fakalogo kia Sehova. Kae meʼa fakaʼofaʼofa foki, he ʼe ʼi tona kua matuʼa neʼe tauhi leva ia Salomone ki he tahi atu ʼu ʼatua. Koia, neʼe mole leleiʼia e Sehova te meʼa ʼae neʼe ina fai, ʼo ina toʼo ai ia ia te poto ʼae neʼe ʼaoga ki ai ke pule ʼi te faitotonu.—1 Hau 11:9, 10; 12:4.
12. Kotea te ako ʼe tou maʼu mai te ʼu palalau ʼa Tavite?
12 Kotea te ako ʼe tou maʼu mai te ʼu palalau ʼa Tavite? Ka tou fakalogo pea ʼe lava lelei anai te ʼu meʼa ʼae ka tou fai. (Pes. 1:1-3) ʼE mahino ia, ʼe mole fakapapauʼi mai e Sehova ke tou koloaʼia pea mo iloa ohage ko Salomone. Kae kapau ʼe tou fakalogo kia te ia, ʼe ina foaki mai anai te poto ʼae ʼe ʼaoga moʼo toʼo he ʼu tonu ʼe lelei. (Taag. 2:6, 7; Sakp. 1:5) ʼE tokoni mai ʼana pelesepeto ia aluʼaga kehekehe ʼo totatou maʼuli. Ohage la, moka kita filifili hakita gaue, peʼe ko te hoko atu ʼo takita ako, peʼe ko te ʼu fakafiafia, peʼe ko te falā. (Taag. 2:10, 11) Ka tou fakalogo ki ʼana tokoni, ʼe tou puipui ai anai ʼatatou felogoi mo ia, pea mo tou maʼu anai te maʼuli heʼe gata. ʼE tou maʼu anai hotatou kaumeʼa lelei pea ʼe maʼuli fiafia anai totatou kiʼi famili.
13. Kotea ʼae neʼe fai e Carmen ke fua lelei te ʼu meʼa ʼae ʼe ina fai?
13 Ko Carmen ʼae ʼe maʼuli ʼi Mozambique, neʼe manatu ʼe hoki fua lelei te ʼu meʼa ʼae ʼe ina fai moka ʼe ina hoko atu tana ako ʼi he ʼu fale ako maʼoluga. Koia, neʼe ina fakatuʼutuʼu ai ke hu ki he fale ako maʼoluga, ʼo ako ai ia te faʼahiga faʼu ʼo te ʼu ʼapi. Neʼe ina ui fenei: “Neʼe au leleiʼia ʼosi te ʼu meʼa ʼae neʼe au ako. Kae neʼe lahi fau toku temi mo toku malohi ʼae neʼe au fakaʼaoga ki ai. Neʼe au kamata ʼi te hola 7 vaelua ʼuhu ʼo ʼau ki te hola 6 afiafi. Neʼe faigataʼa kia au taku kau tuʼumaʼu ki te ʼu fono, ʼo au vaivai ai ʼi te faʼahi fakalaumalie. Neʼe au iloʼi lelei ʼosi pe au neʼe au faiga ke au kaugana kia pule ʼe lua ʼaia.” (Mat. 6:24) Neʼe faikole ia Carmen ʼo ʼuhiga mo tona aluʼaga, pea neʼe ina fai he ʼu fekumi ʼi ʼatatou tohi. ʼE ina toe ui fenei: “Neʼe foaki mai e he ʼu tagata ʼafeā ʼo feia mo taku faʼe ia he ʼu tokoni fakapotopoto. Koia neʼe au fakatuʼutuʼu ai ke au mavae ʼi te fale ako maʼoluga ʼaia ʼo tauhi temi katoa maʼa Sehova. Neʼe ko he tonu lelei ʼaia neʼe au toʼo, he neʼe mole au fakahemala ki ʼamuli.”
14. Neʼe kotea te tokoni tafito ʼae neʼe foaki e Moisese pea mo Tavite?
14 Neʼe ʼoʼofa ia Moisese mo Tavite ia Sehova, pea neʼe maʼuhiga ʼaupito kia naua tanā fakalogo kia te ia. ʼI ʼanā palalau fakaʼosi, neʼe nā tahi fakalotomalohiʼi tana hahaʼi, ke natou pipiki maʼu ki tonatou ʼAtua ko Sehova, ohage pe ko naua. Neʼe nā fakatokaga age ko natou ʼae ʼe fia mavae mai ia Sehova, mole natou toe maʼu anai tona ʼofa pea mo te ʼu tapuakina neʼe ina fakapapauʼi age. ʼE toe ʼaoga kia tatou ʼanā tokoni. ʼI ni sekulo ki muli age, neʼe ʼi ai te tahi kaugana ʼa Sehova, neʼe ina toe fakamaʼuhigaʼi ia te nofo agatonu ki te ʼAtua.
“ ʼE LAHI ʼAUPITO TOKU FIAFIA”
15. He koʼe ʼe ui ko te apositolo ko Soane neʼe ko he tahi kua fotufotuʼa?
15 Ko Soane, neʼe ko he kaumeʼa lelei pea mo he apositolo ʼa Sesu Kilisito. (Mat. 10:2; Soa. 19:26) Neʼe kauga olo mo ia ʼi tana faifakamafola, pea neʼe sio mata ki ʼana milakulo. Neʼe nofo mo Sesu ʼi te ʼu temi faigataʼa. Neʼe mamata ki tona matehi pea neʼe sio ki ai hili tona fakatuʼuake. Neʼe toe sio ia Soane ki te tuputupu ʼo te kokelekasio ʼi te ʼuluaki sekulo ʼo kaku ki te “fakamafola ʼo te logo lelei ki te hahaʼi fuli ʼae ʼi te lalo lagi.”—Kol. 1:23.
16. ʼI te temi muʼa, ko ai ʼae neʼe fua lelei ki ai te ʼu tohi ʼa Soane? Pea ʼe toe fua lelei kia ai ʼi te temi nei?
16 ʼI tana kua vave mate, neʼe maʼu e Soane te pilivilesio ʼae ke ina tohi te tohi fakaofoofo ko Fakaha. (Fkha. 1:1) Neʼe ina toe tohi he Evaselio, feia mo tohi ʼe tolu. ʼE fakahagahaga tana tolu tohi kia Kaiusi, ko he tehina neʼe hage kia Soane ko hana fanau ʼofaina ʼi te faʼahi fakalaumalie. (3 Soa. 1) Neʼe mole gata pe kia Kaiusi, kae neʼe ʼi ai ʼihi tehina, neʼe hage ki te apositolo ko hana ʼu fanau fakalaumalie. Ia ʼaho nei, ʼe kei fakalotomalohi pe te ʼu tohi ʼa te tagata ʼaia kua matuʼa ki te ʼu tisipulo ʼa Sesu.
17. Ka tou lau ia 3 Soane 4, kotea ʼae ʼe tupu ai he toe fiafia lahi?
17 Kotea ʼae neʼe tohi e Soane? (Lau ia 3 Soane 4.) Neʼe tohi e Soane ka tou fakalogo ki te ʼAtua pea ʼe tou fiafia. ʼI te temi ʼae neʼe ina tohi ai tana tolu tohi, neʼe fakamafola e te hahaʼi he ʼu akonaki loi ʼo tupu ai he ʼu mavetevete. Kae, neʼe hoko atu pe e te ʼu tehina mo tuagaʼane tanatou ‘mulimuli ki te ala ʼo te moʼoni.’ Neʼe natou fakalogo kia Sehova pea mo “mulimuli ki ʼana fakatotonu.” (2 Soa. 4, 6) ʼE lahi ʼaupito te fiafia ʼa Soane ʼuhi ko tanatou nofo agatonu. Pea neʼe natou toe fakafiafiaʼi foki mo te loto ʼa Sehova—Taag. 27:11.
18. Kotea te ako ʼe tou maʼu mai te meʼa ʼae neʼe tohi e Soane?
18 Kotea te ako ʼe tou maʼu mai te meʼa ʼae neʼe tohi e Soane? Ka tou agatonu pea ʼe tou fiafia. (1 Soa. 5:3) Ohage la, ʼe tou fiafia ʼi tatatou iloʼi ʼae ʼe tou fakafiafiaʼi ia Sehova. Pea ʼe fiafia ʼaupito ia Sehova ʼi tana sio mai ʼae, ʼe tou tekeʼi te ʼu fakahala ʼo te malama ʼaeni, pea mo tali tona ʼu moʼoni. (Taag. 23:15) Pea ʼe toe fiafia mo te kau ʼaselo ʼi selo. (Luka 15:10) ʼO toe feia pe, ʼe tou toe fiafia ka tou sio ʼe nofo agatonu ʼotatou tehina mo tuagaʼane, tafito la moka natou tau mo he ʼu ʼahiʼahi, pea mo he ʼu fakahala. (2 Tes. 1:4) Pea hili te tau ʼo Alamaketone, ʼe tou fiafia anai ʼi te fakaha, neʼe tou nofo agatonu kia Sehova ʼi he malama neʼe puleʼi e Satana.
19. Kotea ʼae ʼe logoʼi e Rachel ʼi tana akoʼi te moʼoni ki ʼihi? (Vakaʼi mo te pāki.)
19 ʼE tou fiafia ʼaupito moka tou akoʼi ki te hahaʼi ia te moʼoni. ʼE ui e Rachel, ko he tuagaʼane ʼe maʼuli ʼi République Dominicaine. Ka palalau ki totatou ʼAtua mafimafi, ʼe ko he toe pilivilesio lahi ia kia ia. Neʼe lahi te ʼu hahaʼi neʼe tokoni ki ai ke natou kamata tauhi kia Sehova. ʼE ina ui fenei: “ ʼE mole he fakatatau ʼo te toe fiafia ʼae ʼe au logoʼi, ʼi taku sio ʼae ki te kamata ʼoʼofa ʼo ʼaku ako ia Sehova, mo tanatou tuku tanatou falala katoa kia te ia, pea mo fai he ʼu fetogi moʼo fakafiafiaʼi tona loto. Ko te fiafia ʼae neʼe au logoʼi, ʼe lahi age ia ʼi te ʼu faiga mo te ʼu sakilifisio neʼe au fai moʼo akoʼi ʼo natou.”
TE ʼU AKO MAI ʼANATOU PALALAU FAKAʼOSI
20. Kotea ʼae ʼe tou hage ai ko Moisese, mo Tavite pea mo Soane?
20 Logo la neʼe maʼuʼuli ia Moisese, mo Tavite pea mo Soane ʼi he ʼu temi kehekehe, pea neʼe mole tatau ʼonatou aluʼaga mo ʼae ʼa tatou, kae, neʼe lahi te ʼu aluʼaga ʼe tou hage ai ko natou. Neʼe natou tauhi ki te ʼAtua moʼoni pea ʼe tou toe fai feia ia ʼaho nei. Ohage ko natou, ʼe tou faikole kia Sehova, mo falala kia te ia, pea mo kumi tana takitaki. Pea ohage pe ko te ʼu tagata ʼaia ʼo te temi muʼa, ʼe tou tui papau ʼe tapuakiʼi lahi e Sehova ia natou ʼae ʼe fakalogo kia te ia.
21. Kotea ia te ʼu tapuakina moka maʼu e natou ʼae ʼe natou fakalogo ki te ʼu tokoni ʼa te ʼu tagata agatonu mo matuʼa ʼaeni ko Moisese, mo Tavite pea mo Soane?
21 Koia, tou fakalogo ki te ʼu palalau fakaʼosi ʼa te ʼu tagata ʼaia kua matuʼa. Tou fakalogo ki te ʼu fakatotonu ʼa Sehova. Koia, ʼe fua lelei anai ia meʼa fuli ʼe tou fai. ʼE ‘tologa anai ʼotatou maʼuli,’ ʼei, ʼe tou maʼuʼuli anai ʼo heʼe gata! (Tet. 30:20) Pea ʼe tou fiafia anai ʼi tatatou fakafiafiaʼi tatatou Tamai ʼae ʼi selo, ʼae ʼe fonu ʼi te ʼofa. ʼEi, ʼe ina tapuakinaʼi anai tatou ʼo lahi age ʼi te ʼu meʼa ʼae neʼe tou ʼamanaki ki ai.—Efe. 3:20.
KATIKO 129 Tou Haga Faʼa Kataki
a Tokolahi ʼo te kau Iselaele, neʼe natou sisio ki te ʼu milakulo ʼa Sehova ʼi te Tai Kula. Kae neʼe mole natou maʼuʼuli fualoa ke natou sisio ai ki te Kele ʼo Te Fakapapau. (Num. 14:22, 23) Neʼe ui e Sehova ko natou fuli ʼae ʼe taʼu 20 ʼo fai ki ʼoluga ʼe mamate anai ʼi te toafa. (Num. 14:29) Kae, neʼe hao ia Sosue mo Kalepo pea mo te tokolahi ʼo te telepi ʼo te kau Levi. Koia, neʼe natou sisio ki te fakahoko moʼoni e Sehova ʼana fakapapau ʼi te fakalaka ʼa te kau Iselaele ʼi te Solotane, ʼo hu ki Kanaane.—Tet. 1:24-40.
b FAKAMATALA ʼO TE ʼU PĀKI: Faʼahi Hema: ʼI tana kua vave mate, neʼe foaki e Tavite ki tona foha ko Salomone hana ʼu tokoni fakaʼosi. Faʼahi Mataʼu: Ko Te Ako ʼo Te Kau Pionie, ʼe maʼu ai e te kau ako he ʼu tokoni mai ia Sehova.