1, 2. (1) ʼE tou iloʼi feafeaʼi ʼe feala hatatou kofuʼi ia te ʼulugaaga foʼou? (2) Ko te ʼu kalitate fea ʼo te ʼulugaaga foʼou ʼae ʼe tou maʼu ia Kolose 3:​10-14?

ʼI TATATOU Tohi-Tapu. Fakaliliu ʼo Te Malama Foʼou, ʼe ha tuʼa tolu ai ia te kupusiga palalau ʼaeni: “Te ʼulugaaga foʼou.” ʼE fakaʼuhiga ki te ʼulugaaga ʼae neʼe “fakatupu ʼo mulimuli ki te finegalo ʼo te ʼAtua.” Kaʼe ʼe feala koa ke tou kofuʼi te ʼulugaaga foʼou ʼaia? ʼEi, he neʼe fakatupu tatou e Sehova ʼo mulimuli ki tona pāki. Koia la ʼae ʼe feala ai ke tou faʼifaʼitakiʼi ʼona kalitate taulekaleka.​—Senesi 1:​26, 27; Efeso 5:1.

² ʼI ʼihi temi, ʼuhi ko totatou ʼuhiga agahala, ʼe tou maʼu he ʼu holi ʼe kovi. Pea ʼe malave kia tatou te aga ʼa te hahaʼi ʼae ʼe tou maʼuʼuli tahi. Kaʼe ʼaki te tokoni ʼofa ʼa Sehova, ʼe feala ai ke tou liliu ko te faʼahiga hahaʼi ʼae ʼe ina leleiʼia. Koia, tou vakaʼi age muʼa he ʼu kalitate ʼo te ʼulugaaga foʼou, ʼe tokoni mai anai ke tou fai ia te faʼahi ʼaia. (Lau ia Kolose 3:​10-14.) Pea ʼe tou vakaʼi anai foki pe ʼe feafeaʼi hatatou fakaha te ʼu kalitate ʼaia ʼi tatatou faifakamafola.

3. Kotea te kalitate maʼuhiga ʼo te ʼulugaaga foʼou?

³ Neʼe fakamahino e te apositolo ko Paulo, ko te mole fakapalatahi ʼe ko he kalitate maʼuhiga ia ʼo te ʼulugaaga foʼou. Neʼe ina ui fenei: “ ʼE mole ʼi ai he Keleka peʼe ko he Sutea, he tagata silikosisio peʼe ko he tagata heʼe silikosisio, he matapule peʼe ko he Site, he tagata kaugana peʼe ko he tagata ʼe ʼateaina.” * (Vakaʼi te kiʼi nota.) ʼI te kokelekasio, ʼe mole tonu ke manatu he tahi ʼe maʼuhiga age ia ʼuhi ko tona lanu, peʼe ko tona fenua, peʼe ko hona tuʼulaga. Kotea tona tupuʼaga? Koteʼuhi ko te ʼu tisipulo ʼa Kilisito ʼe natou “logo tahi fuli.”​—Kolose 3:11; Kalate 3:28.

4. (1) ʼE tonu ke feafeaʼi te aga ʼa te ʼu kaugana ʼa Sehova ki ʼihi? (2) Kotea te aluʼaga ʼae ʼe feala ke faigataʼa ai te logo tahi Fakakilisitiano?

⁴ Kapau kua tou kofuʼi ia te ʼulugaaga foʼou, ʼe tou fakaʼapaʼapa anai ki te hahaʼi fuli, tatau aipe pe ʼe kotea tonatou lanu mo tonatou haʼuʼaga. (Loma 2:11) Kaʼe ʼi ʼihi fenua ʼe faigataʼa ʼaupito. Ohage la, ʼi muʼa atu ʼi Afelika Saute, neʼe vaevae e te puleʼaga ia he ʼu koga meʼa ke maʼuʼuli ai te hahaʼi ʼo mulimuli pe ki ʼonatou lanu. Pea ko te tokolahi ʼi te fenua ʼaia, ʼo kau ai mo te kau Fakamoʼoni ʼa Sehova, ʼe kei natou maʼuʼuli pe nei ʼi te ʼu koga meʼa ʼaia. Kaʼe neʼe fia fakalotomalohiʼi leva e te Kolesi Pule ʼotatou tehina mo tuagaʼane ʼaia ‘ke lahi age tonatou ʼofa.’ Koia ʼi Oketopeli 2013, neʼe natou fai he fakatuʼutuʼu makehe ʼe tokoni anai ki te ʼu Fakamoʼoni ʼaia ʼo te ʼu lanu kehekehe ke natou feiloʼiʼaki lelei age.​—2 Kolonito 6:13.

5, 6. (1) Kotea te fakatuʼutuʼu ʼae neʼe fai moʼo tokoni ki te logo tahi ʼa te hahaʼi ʼa te ʼAtua ʼi Afelika Saute? (Vakaʼi te ʼuluaki pāki.) (2) Neʼe kotea ʼona fua?

⁵ Neʼe fakatuʼutuʼu fenei: ʼI ʼihi fakaʼosi vahaʼa, neʼe tonu ke fakatahitahi ai he ʼu kokelekasio ʼe lua, ʼe lea pea mo lanu kehekehe. Ko te ʼu tehina mo tuagaʼane ʼo te ʼu kokelekasio ʼaia ʼe lua, neʼe natou faifakamafola fakatahi, mo fono fakatahi pea mo natou fefakaafeʼaki. Neʼe ko te ʼu kokelekasio ʼe lauʼi teau ʼae neʼe kau ki te fakatuʼutuʼu makehe ʼaia. Pea neʼe lahi te ʼu logo lelei neʼe maʼu e te Petele ʼo ʼuhiga mo te fakatuʼutuʼu ʼaia, maʼia mo te hahaʼi ʼae ʼe mole tauhi kia Sehova. Ohage la, neʼe ui fenei e te takitaki lotu: “ ʼE mole ko au ko he Fakamoʼoni ʼa Sehova, kaʼe ʼe au fia talanoa pe ki te fakatuʼutuʼu lelei ʼo takotou gaue faifakamafola, pea ʼe logo tahi te ʼu lanu ʼi takotou kautahi.” Kaʼe neʼe malave feafeaʼi te fakatuʼutuʼu ʼaia ki te ʼu tehina mo tuagaʼane?

⁶ Tou vakaʼi te faʼifaʼitaki ʼo te tuagaʼane ʼe palalau ʼi te lea Xhosa ʼe higoa ko Noma. ʼI te kamata, neʼe tuʼania ʼi te fakaafe ʼo te ʼu tehina mo tuagaʼane papalagi ʼe lea Fakapilitania ki tona kiʼi ʼapi masiva. Kaʼe ʼi te ʼosi faifakamafola ʼa Noma mo natou pea mo tona ʼosi fakaafe ki ʼonatou ʼapi, neʼe fimalie ai leva tona loto. He neʼe ina ui fenei: “ ʼE natou hage pe ko matou.” Koia ʼae neʼe fakaafe ai leva e Noma ʼihi tehina mo tuagaʼane ʼo te kokelekasio lea Fakapilitania ki tona ʼapi, ʼi te temi ʼae neʼe natou ʼomai ai ʼo faifakamafola  mo tona kokelekasio ʼi te lea Xhosa. ʼI te temi ʼo te kai, neʼe punamaʼuli he neʼe ina fakatokagaʼi ia he tagata ʼafeā papalagi neʼe fiafia pe ia ʼi te heka ʼi te kiʼi foʼi kesi palasitike. Koia, ʼuhi ko te fakatuʼutuʼu ʼaia, tokolahi te kau Fakamoʼoni ʼe natou maʼu honatou ʼu kaumeʼa foʼou. Pea ʼe kei hoko atu pe ia tanatou fia feiloʼiʼaki mo natou ʼae ʼe mole tatau ʼonatou haʼuʼaga.

7. He koʼe ʼe ʼaoga ke tou fakaha tuʼumaʼu ia te manavaʼofa?

⁷ ʼE tau pe anai te hahaʼi ʼa Sehova mo te ʼu ʼahiʼahi ʼo kaku ki te pulihi ʼo te malama ʼa Satana. Ohage la, ko te mahaki, te fakataga, te ʼu tuʼutamaki fakanatula, te mole kei ʼi ai he gaue, te puli ʼo ʼotatou koloa ʼuhi ko te agamalohi, pea mo ʼihi atu aluʼaga ʼe feala ke tou maʼuʼuli mamahi ai. Koia ʼae ʼe ʼaoga ai ke tou maʼu ia te manavaʼofa moʼoni ke feala hatatou fetokoniʼaki. Koteʼuhi, ka tou fonu ʼi te manavaʼofa, ʼe uga ai anai tatou ke tou femaʼuʼaki te agaʼofa. (Efeso 4:32) Pea ʼe tokoni mai te ʼu kalitate ʼaia ʼo te ʼulugaaga foʼou ke tou faʼifaʼitakiʼi ia te ʼAtua pea ke tou fakalotofimalieʼi ai ʼihi.​—2 Kolonito 1:​3, 4.

8. Kotea ʼae ʼe feala ke hoko moka tou lotomanavaʼofa mo agaʼofa ki te kokelekasio katoa? Kotou tuku mai he faʼifaʼitaki.

⁸ ʼE feafeaʼi anai hatatou fakaha ia he agaʼofa ʼe lahi age ki te kau matapule pea mo te kau masisiva ʼo totatou kokelekasio? ʼE tonu ke tou fakatalitali leleiʼi natou pea mo tou fakakaumeʼa mo natou, mo tokoni kia natou ke natou logoʼi ʼe natou maʼuhiga ʼi te loto kokelekasio. (1 Kolonito 12:​22, 25) Tou vakaʼi te faʼifaʼitaki ʼo Dannykarl neʼe mavae mai Philippines ʼo alu ki Saponia. Neʼe mole agalelei ʼona kaugā gaue kia ia, koteʼuhi neʼe mole ko he Saponia. Pea ʼi te tahi ʼaho leva, neʼe kau ki he fono ʼa te kau Fakamoʼoni ʼa Sehova. Neʼe ui fenei e Dannykarl: “Neʼe hahaʼi pe te nofoʼaki ko te kau Saponia, kaʼe neʼe natou fakatalitali leleiʼi au, ohage pe neʼe kua matou feiloʼiʼaki.” Neʼe fakaha tuʼumaʼu pe e te ʼu tehina mo tuagaʼane tanatou agaʼofa kia Dannykarl. Pea neʼe tokoni te aluʼaga ʼaia kia ia ke fakaovi ai kia Sehova. ʼAki te temi, neʼe papitema ia Dannykarl pea ʼi te temi nei kua tagata ʼafeā. ʼE fiafia te ʼu tagata ʼafeā ʼuhi ko te kau ʼa Dannykarl mo tona ʼohoana ko Jennifer ʼi te kokelekasio. ʼE natou ui fenei: “Ko te ʼu pionie ʼe nā maʼuʼuli fakafeʼauga pea ʼe nā tuku he faʼifaʼitaki lelei he ʼe nā fakamuʼamuʼa ia te puleʼaga.”​—Luka 12:31.

9, 10. Kotou tuku mai he ʼu faʼifaʼitaki, ʼe ha ai te ʼu fua lelei ʼo tatatou fakaha ia te manavaʼofa ʼi te faifakamafola.

⁹ Ka tou fakamafola ia te logo lelei ʼo te Puleʼaga, ʼe ko he faigamalie ʼaia ke tou fai “te meʼa ʼae ʼe lelei ki te hahaʼi fuli.” (Kalate 6:10) ʼUhi ko tonatou manavaʼofa ki te kau matapule, tokolahi te kau Fakamoʼoni ʼe natou ako ia tanatou lea. (1 Kolonito 9:23) Pea ʼe fua lelei ʼanatou faiga ʼaia. Ohage la, ko te tuagaʼane mai ʼOsitalalia ʼe higoa ko Tiffany neʼe ina ako ia te lea Swahili ke feala hana tokoni ki te kokelekasio ʼo te lea ʼaia ʼi te kolo ko Brisbane. Logo la neʼe faigataʼa ia tana ako te lea ʼaia, kaʼe neʼe fua lelei ki tona maʼuli. ʼE ui fenei e Tiffany: ‘ ʼE ko he meʼa fakafiafia ia moka tou kau ki he kokelekasio lea matapule. ʼE hage pe ia ʼe tou fefaifolauʼaki ʼi totatou kolo. He ʼe tou sisio ai ki totatou ʼofa fakatautehina fakamalamanei pea ʼe tou toe mamata ai foki ki tatatou logo tahi, ʼae ʼe ko he milakulo ia.’

 ¹⁰ Tou vakaʼi mo te faʼifaʼitaki ʼo te kiʼi famili mai Saponia, ʼo Sakiko mo ʼana matuʼā. ʼE ui fenei e te taʼahine, ia Sakiko: “ ʼI te faifakamafola, neʼe matou felaveʼi tuʼumaʼu mo he hahaʼi matapule neʼe ʼomai mai Pelesile. Pea ka matou fakaha age kia natou ia he ʼu vaega ʼi tanatou Tohi-Tapu lea Portugais, ohage la ko Fakaha 21:​3, 4 peʼe ko Pesalemo 37:​10, 11, 29, ʼe natou fakalogo lelei pea ʼi ʼihi temi, ʼe natou fetagihi.” Neʼe manavaʼofa ia te kiʼi famili ki te kau matapule ʼaia, pea neʼe natou fia tokoni ke natou ako ia te moʼoni. Ko te tupuʼaga la ʼaia ʼo tanatou ako fakafamili ia te lea Portugais. Ki muli age, neʼe tokoni te kiʼi famili ʼaia ki te fakatuʼu ʼo te kokelekasio lea Portugais. Pea ʼaki te temi, neʼe natou tokoni ki he kau matapule ʼe kaugā malie ke natou tauhi kia Sehova. ʼE ui fenei e Sakiko: “Neʼe ʼaoga he ʼu faiga ke matou ako ia te lea Portugais. Kaʼe ko te ʼu tapuakina ʼae neʼe matou maʼu, neʼe lahi maumau age ia. ʼE matou lotofakafetaʼi lahi kia Sehova.”​—Lau ia Gaue 10:​34, 35.

11, 12. (1) Kotea ʼae ʼe tonu ke ina uga tatou ke tou kofuʼi ia te ʼulugaaga foʼou, pea kotea tona tupuʼaga? (2) Kotea ʼae ka tokoni mai anai ke tou agavaivai ai?

¹¹ ʼE tou fia kofuʼi ia te ʼulugaaga foʼou, he ʼe tou fia fakakololiaʼi ia Sehova, kaʼe mole tou loto ke vikiʼi tatou e te hahaʼi. Tou manatuʼi, neʼe agahala ia te ʼaselo haohaoa ʼuhi ko tona fialahi. (Vakaʼi ia Esekiele 28:17.) Koia ʼae ʼe faigataʼa ai kia tatou kau agahala hatatou tekeʼi ia te fiatuʼu. Kaʼe, logo la te aluʼaga ʼaia, ʼe feala hatatou kofuʼi te agavaivai. Kotea ʼae ka tokoni mai anai ke tou fai te faʼahi ʼaia?

¹² Ke tou agavaivai, ʼe tonu ke tou lau ia te Folafola ʼa te ʼAtua ʼi te ʼaho fuli pea mo tou metitasio ki ai. (Tetelonome 17:​18-20) ʼE lelei ke tou fakakaukauʼi tafito ia te ʼu akonaki ʼa Sesu pea mo tana maʼuliʼi ia te agavaivai. (Mateo 20:28) Neʼe agavaivai ia Sesu he neʼe ina fufulu ia te ʼu vaʼe ʼo ʼana apositolo. (Soane 13:​12-17) ʼE tonu foki ke tou kole ia te laumalie maʼoniʼoni ʼa Sehova. He ʼe tokoni mai anai ke tou tekeʼi ia te manatu ʼae ʼe tou maʼoluga age ʼi ʼihi.​—Kalate 6:​3, 4; Filipe 2:3.

13. Kotea te ʼu fua lelei ʼe tou maʼu moka ʼe tou agavaivai?

¹³ Lau ia Taaga Lea 22:4. ʼE loto e Sehova ke tou agavaivai. Pea ʼe lahi te ʼu fua lelei ʼe tou maʼu moka tou agavaivai. ʼE moʼoni, ka tou agavaivai ʼe tou lagolago ki te tokalelei pea mo te logo tahi ʼi te kokelekasio. ʼE tou toe maʼu ai foki mo te ʼofa makehe ʼa Sehova.  Neʼe ui fenei e te apositolo ko Petelo: “Ko koutou fuli, kotou kofuʼi mo fefakahaʼaki ia te agavaivai, koteʼuhi ʼe mole leleiʼia e te ʼAtua te kau fialahi, kaʼe ʼe ina fakaha tona ʼofa makehe ki te kau agavaivai.”​—1 Petelo 5:5.

14. Ko ai ia te faʼifaʼitaki lelei tukupau ʼo te agamalū mo te kataki fualoa?

¹⁴ ʼE ui e te hahaʼi, ko he tahi ʼe agamalū pea mo kataki fualoa ʼe ko he tahi ia ʼe vaivai. Kaʼe ʼe hala te manatu ʼaia. Koteʼuhi ko te ʼu kalitate ʼaia ʼe haʼu mai ia Sehova, ia te mafimafi ʼo te ʼatulaulau. Pea ko ia tokotahi pe ia te faʼifaʼitaki lelei tukupau ʼo te agamalū mo te kataki fualoa. (2 Petelo 3:9) Ohage la, tou fakakaukauʼi pe neʼe feafeaʼi te kataki fualoa ʼa Sehova kia Apalahamo pea mo Lote, ʼaki tana fakaʼaogaʼi ʼAna ʼaselo. (Senesi 18:​22-33; 19:​18-21) Pea tou toe fakakaukauʼi age muʼa ia te katakiʼi e Sehova ia te talagataʼa ʼo te puleʼaga ʼo Iselaele lolotoga taʼu ʼe 1 500 tupu.​—Esekiele 33:11.

15. Kotea te faʼifaʼitaki neʼe tuku e Sesu ʼo ʼuhiga mo te agamalū mo te kataki fualoa?

¹⁵ Neʼe “agamalū” ia Sesu. (Mateo 11:29) Neʼe kataki fualoa ʼaupito, he neʼe ina katakiʼi te ʼu vaivaiʼaga ʼo ʼana tisipulo. Lolotoga tana minisitelio ʼi te kele, neʼe fatufatuʼi mo tukugakoviʼi tuʼumaʼu kaʼe neʼe mole ina fai he meʼa ʼe kovi. Logo la te aluʼaga ʼaia, kaʼe neʼe agamalū mo kataki fualoa ʼo kaku ki tana mate. ʼI tana tau tugaki ʼi te pou fakamamahi, neʼe kole e Sesu ki tana Tamai ke ina fakamolemole ki te ʼu tagata ʼae neʼe natou fakapogi ia ia. Neʼe ina ui fenei: “ ʼE mole natou iloʼi te meʼa ʼae ʼe natou fai.” (Luka 23:34) Tatau aipe pe neʼe tau ia Sesu mo he ʼu aluʼaga faigataʼa ʼaupito, kaʼe neʼe ina taupau ia tana agamalū mo tana kataki fualoa.​—Lau ia 1 Petelo 2:​21-23.

16. ʼE feafeaʼi hatatou fakaha ia te agamalū mo te kataki fualoa?

¹⁶ ʼE feafeaʼi hatatou fakaha ia te agamalū mo te kataki fualoa? Neʼe tohi fenei e Paulo: “Kotou haga fekatakiʼaki, pea mo fefakamolemoleʼaki ʼaki he lotolelei, tatau aipe pe ʼe ʼi ai hokotou fihifihia mo he tahi. Ohage pe ko te lotolelei ʼa Sehova ke fakamolemole kia koutou, ʼe tonu ke kotou toe fai feia mo koutou.” (Kolose 3:13) Koia, ʼe tonu ke tou maʼu ia te agamalū mo te kataki fualoa ke tou lotofakamolemole. He ʼe tou lagolago mo tou taupau ai anai ia te logo tahi ʼi te kokelekasio.

17. He koʼe ʼe maʼuhiga ia te agamalū mo te kataki fualoa?

¹⁷ ʼE loto e Sehova ke tou agamalū pea mo kataki fualoa. ʼE maʼuhiga ke tou maʼu te ʼu kalitate ʼaia mo kapau ʼe tou fia maʼuʼuli ʼi te malama foʼou. (Mateo 5:5; Sakopo 1:21) Pea ka tou agamalū mo kataki fualoa, ʼe tou fakamaʼuhigaʼi ai ia Sehova pea ʼe tou tokoni ai ki ʼihi ke natou fai feia.​—Kalate 6:1; 2 Timoteo 2:​24, 25.

18. Kotea te pikipikiga ʼo te mole fakapalatahi mo te ʼofa?

¹⁸ Ko te ʼu kalitate ʼae neʼe tou talanoa ki ai  ʼe pipiki fuli ki te ʼofa. Ohage la, neʼe tonu ke tokoniʼi e te tisipulo ko Sakopo ʼona tehina, koteʼuhi neʼe natou fakamaʼuhigaʼi age ia te hahaʼi maʼu koloa ʼi te hahaʼi masisiva. Neʼe ina fakamahino, ko tanatou aga ʼaia neʼe fakafeagai ki te fakatotonu ʼaeni ʼa te ʼAtua: “Ke ke ʼofa ki tou tatau ohage pe ko koe totonu.” Pea neʼe ina toe ui fenei: “Kapau ʼe hoko atu takotou aga fakapalatahi, ʼe kotou agahala ai.” (Sakopo 2:​8, 9) Kapau ʼe tou ʼoʼofa ki te hahaʼi, ʼe mole tou fakapalatahi anai ki he tahi ʼuhi ko tona lanu, tona tuʼulaga peʼe ko te ako ʼae neʼe ina maʼu. ʼAua naʼa tou malualoi mo kapau ʼe tou fakaha te mole fakapalatahi. ʼE tonu ke tou maʼuliʼi moʼoni ia te kalitate ʼaia.

19. He koʼe ʼe maʼuhiga ke tou kofuʼi ia te ʼofa?

¹⁹ Ko te ʼofa ʼe toe “kataki fualoa . . . pea mo agalelei,” kaʼe “ ʼe mole fiameʼalahi.” (1 Kolonito 13:4) ʼE maʼuhiga ke tou kataki fualoa, mo agalelei pea mo agavaivai ke hoko atu ia tatatou fakamafola ia te logo lelei ki ʼotatou tatau. (Mateo 28:19) Pea tahi, ko te ʼu kalitate ʼaia ʼe tokoni mai ke tou felogoʼi lelei mo ʼotatou tehina mo tuagaʼane fuli ʼi te kokelekasio. Ka tou fakaha ia te taʼi ʼofa ʼaia, ʼe logo tahi ai anai ʼotatou kokelekasio pea ʼe tou fakamaʼuhigaʼi ai ia Sehova. Pea ka sisio te hahaʼi ki tatatou logo tahi ʼaia, ʼe natou fia ako anai ia te moʼoni. Koia ʼe lelei ia te fakaʼosi ʼo te fakamatala ʼo te ʼulugaaga foʼou ʼi te Tohi-Tapu ʼaki te ʼu palalau ʼaeni: “ ʼO hilifaki ki te ʼu meʼa fuli ʼaia, kotou kofuʼi te ʼofa, he ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.”​—Kolose 3:14.

20. (1) Kotea te ʼu fehuʼi ʼae ʼe tonu ke tou fai? Pea kotea tona tupuʼaga? (2) Ko te ka haʼu fea ʼae ʼe tou fakaʼamu lahi ki ai?

²⁰ ʼE tonu ke tou tahi fai te fehuʼi ʼaeni: ‘Kotea he tahi ʼu fetogi ʼe ʼaoga ke au fai ke au liakī ʼosi ia te ʼulugaaga ʼafeā?’ ʼE tonu ke tou faikole mo tagi mamahi kia Sehova ke tokoni mai. ʼE tonu ke tou faiga malohi ʼo tou liakī ʼatatou manatu peʼe ko ʼatatou aga ʼae ʼe kovi ke feala ai hatatou “maʼu . . . te Puleʼaga ʼo te ʼAtua.” (Kalate 5:​19-21) Tou toe fai mo te fehuʼi ʼaeni: ‘ ʼE kei hoko atu koa te fetogi ʼo taku faʼahiga fakakaukau ke leleiʼia au e Sehova?’ (Efeso 4:​23, 24) ʼE tou agahala, koia ʼae ʼe tonu ai ke tou faiga malohi ʼo kofuʼi pea mo taupau ia te ʼulugaaga foʼou. Pea ʼe ko he faʼahi ʼe tonu ke fai ʼo kaku ki te temi ʼae ka tou maʼuʼuli haohaoa ai. Ko he aluʼaga fakaofoofo anai moka kofuʼi e te hahaʼi fuli ia te ʼulugaaga foʼou pea mo natou faʼifaʼitakiʼi ia te ʼu kalitate matalelei ʼa Sehova.