1, 2. Kotea ʼae ʼe fakatokagaʼi e te hahaʼi ʼo ʼuhiga mo te kau Fakamoʼoni ʼa Sehova?

TOKOLAHI ʼe natou fakatokagaʼi te ʼu kalitate ʼae ʼe maʼu e te kau Fakamoʼoni ʼa Sehova. Ohage la, ko te tagata faitohi ʼe higoa ko Anton Gill neʼe ina vikiʼi te ʼu kalitate ʼo te kau Fakamoʼoni ʼi te temi ʼae neʼe takitaki ai ia Siamani e te kau Nasi. Neʼe ina tohi fenei: “Neʼe fehihiʼa te kau Nasi ki te kau Fakamoʼoni ʼa Sehova. . . . Pea ʼi te taʼu 1939, neʼe ko te toko 6 000 ʼo natou neʼe nonofo ʼi te [ʼu lotoʼa fakamamahi].” Neʼe ina toe ui foki, logo la te ʼu fakataga fakamataku ʼae neʼe hoko kia natou, kaʼe neʼe natou tuha aipe mo te falala, mo natou maʼu te tokalelei pea neʼe natou nonofo agatonu aipe ki te ʼAtua mo natou maʼu te logo tahi.

² ʼE mole faʼa fualoa ki ai, ʼi Afelika Saute, neʼe toe fakatokagaʼi foki e te hahaʼi ia te makehe ʼo te kau Fakamoʼoni ʼa Sehova. ʼI te tahi temi, ko te kau Fakamoʼoni ʼae neʼe mole lanu tahi neʼe mole fakagafua ke natou fakatahi. Kaʼe, ʼi te ʼAhotapu ʼaho 18 ʼo Tesepeli 2011, neʼe ko te toko 78 000 tupu kau Fakamoʼoni mai te ʼu  lanu kehekehe ʼo Afelika Saute mo te ʼu fenua ʼae ʼe ovi mai, neʼe natou kau ki he fakatahi lahi ʼe makehe ʼi te malaʼe faigaoʼi ʼe lahi tokotahi ʼi Johannesbourg. Neʼe ui fenei e te tahi pule ʼo te malaʼe faigaoʼi: “Ko taku hoki sio ʼae ki he hahaʼi aga fakaʼapaʼapa feia ʼi te malaʼe ʼaeni. ʼE natou teu lelei fuli. Pea neʼe kotou fakamaʼa lelei ia te malaʼe. Kaʼe ko te faʼahi tafito ʼae neʼe au fakatokagaʼi, ʼe maʼu te ʼu lanu kehekehe ʼi takotou kautahi.”

3. Kotea ʼae ʼe makehe ai totatou famili fakamalamanei?

³ Maʼia pe la mo te hahaʼi ʼae ʼe mole tauhi kia Sehova, ʼe natou fakatokagaʼi lelei te makehe ʼo totatou famili fakamalamanei. (1 Petelo 5:9) Kaʼe he koʼe koa ʼe tou makehe mai ʼihi kautahi? He ʼe ʼaki te tokoni ʼa te Tohi-Tapu pea mo te laumalie maʼoniʼoni ʼa te ʼAtua, ʼe tou faigaʼi malohi ʼo fetogi ia meʼa fuli ʼae ʼe mole leleiʼia e Sehova. Ko tona fakaʼuhiga, ʼe tou “liakī ia te ʼulugaaga ʼafeā,” kaʼe tou kofuʼi ia “te ʼulugaaga foʼou.”​—Kolose 3:​9, 10.

4. Kotea ʼae ka tou vakaʼi anai ʼi te alatike ʼaeni? Pea kotea tona tupuʼaga?

⁴ Kapau kua tou liakī ia te ʼulugaaga ʼafeā, pea ʼe tonu foki ke tou pulihi ʼosi. ʼUluaki, ʼi te alatike ʼaeni, ʼe tou ako ai anai pe ʼe feafeaʼi hatatou liakī ia te ʼulugaaga ʼafeā pea he koʼe ʼe maʼuhiga ke tou fai te faʼahi ʼaia. Lua, ʼe tou vakaʼi ai anai, ko he tahi ʼe ko hana agamahani te fai ʼo he ʼu aga ʼe kovi, ʼe feala pe ke ina fai he ʼu toe fetogi ʼi tona maʼuli. Pea tolu leva, ʼe tou vakaʼi anai pe kotea ʼae neʼe fai e ʼihi kua papitema talu mai fualoa moʼo pulihi ʼosi ia tonatou ʼulugaaga ʼafeā. He koʼe ʼe tonu ke tou talanoa ki te ʼu faʼahi ʼaia? Koteʼuhi ko te tokolahi ʼi te kau Fakamoʼoni ʼa Sehova neʼe mole kei natou nonofo tokaga. Pea neʼe natou toe kamata maʼu te ʼu fakakaukau pea mo fai te ʼu aga ʼae neʼe natou fai ʼi muʼa ʼo tanatou iloʼi ia Sehova. Koia ʼae ʼe ʼaoga ai ke tou manatuʼi fuli ia te fakatokaga ʼaeni: “Ko ʼae ʼe manatu ʼe tuʼu, ke tokaga ia naʼa higa.”​—1 Kolonito 10:12.

5. (1) Kotea te faʼifaʼitaki ʼe ha ai ia te maʼuhiga ʼae ke tou liakī ia te ʼulugaaga ʼafeā? (Vakaʼi te ʼuluaki pāki.) (2) Kotea te ʼu aga ʼae ʼe kau ki te ʼulugaaga ʼafeā ia Kolose 3:​5-9?

⁵ Kotea anai ka tou fai mo kapau ʼe ʼuli pea mo mamanu ʼotatou mutuʼi meʼa? ʼE tou foimo huʼi anai. ʼO toe feia pe, kapau ʼe tou lolotoga fai he aga ʼe fehiʼa ki ai ia Sehova, tou foimo fai he ʼu fetogi. ʼO ʼuhiga mo te ʼu aga ʼae ʼe kovi, neʼe ui fenei e te apositolo ko Paulo: “ ʼE tonu ke kotou fakamamaʼo mai ia koutou.” Koia tou vakaʼi te ʼu aga ʼe lua ʼi te ʼu aga ʼaia ʼe kovi, ia te ʼu felaveʼi fakasino heʼe ʼaoga pea mo te ʼu aga heʼe maʼa.​—Lau ia Kolose 3:​5-9.

6, 7. (1) ʼE fakaha feafeaʼi e Paulo ʼe tonu ke tou faiga malohi ʼo liakī ia te ʼulugaaga ʼafeā? (2) Neʼe feafeaʼi ia te maʼuli ʼo Sakura? Kotea ʼae neʼe tokoni ki ai ke ina fai he ʼu fetogi ʼi tona maʼuli?

⁶ Te ʼu felaveʼi fakasino heʼe ʼaoga. ʼI te Tohi-Tapu, ʼe kau ki “te ʼu felaveʼi fakasino heʼe ʼaoga” ia te momoe ʼa he tagata mo he fafine kaʼe heʼeki nā ʼohoana. Neʼe ui e Paulo ʼe tonu ki te kau Kilisitiano ke natou “tamateʼi” ʼonatou “koga sino,” ia te ʼu holi ʼae ki te ʼu felaveʼi fakasino heʼe ʼaoga. Ko tona fakaʼuhiga,  ʼe tonu ke tou faiga malohi ʼo taʼaki ʼotatou holi ʼae ʼe kovi. ʼE moʼoni, ʼe mole faigafua te fai ʼo te faʼahi ʼaia, kaʼe ʼe feala ke tou fai.

⁷ Tou vakaʼi te faʼifaʼitaki ʼo te tuagaʼane mai Saponia ʼe higoa ko Sakura. * (Vakaʼi te kiʼi nota.) ʼI tana kei veliveli pea ʼi tana kua lahilahi ake neʼe logoʼi tuʼumaʼu pe e Sakura ia tana lotomamahi pea mo tana nofo tokotahi. Kaʼe neʼe mole kei ina fia logoʼi ia tana nofo tokotahi, koia ʼi tona taʼu 15, neʼe ina kamata fai ai he ʼu felaveʼi fakasino mo ni hahaʼi kehekehe. Pea neʼe tuʼa tolu ia tana fakato fatu. Neʼe ina ui fenei: “ ʼI te kamata, neʼe au logoʼi toku fimalie ʼi taku fai te ʼu felaveʼi fakasino heʼe ʼaoga, he neʼe au manatu ʼe ʼofainaʼi au. Kaʼe ʼi te lahi ʼo taku fai te ʼu felaveʼi fakasino, neʼe toe lahi ai mo taku lotohoha.” Neʼe maʼuli feia pe ia Sakura ʼo kaku ki tona taʼu 23. Pea neʼe ina ako leva ia te Tohi-Tapu mo te kau Fakamoʼoni ʼa Sehova, ʼo ina leleiʼia te ʼu faʼahi ʼae neʼe ina ako. Neʼe tokoni ia Sehova kia ia ke ina liakī ʼosi te ʼu aga heʼe ʼaoga pea ke tuku tana tukugakoviʼi ia ia mo tana ufiufi. Ia ʼaho nei, kua pionie katoa ia Sakura, pea ʼe mole kei ina logoʼi tana nofo tokotahi. ʼE ina ui fenei: “ ʼE au fiafia ʼaupito he ʼe au logoʼi ia te ʼofa ʼo Sehova ʼi te ʼaho fuli.”

8. Kotea ʼihi aga ʼae ʼe feala ai ke tou heʼe maʼa kia mata ʼo Sehova?

⁸ Te ʼu aga heʼe maʼa. ʼI te Tohi-Tapu, ʼe mole fakaʼuhiga pe te ʼu aga heʼe maʼa ki te ʼu felaveʼi fakasino heʼe ʼaoga. Kaʼe ʼe toe kau ai foki te suluka peʼe ko te ʼu fakahuahua kovi. (2 Kolonito 7:1; Efeso 5:​3, 4) ʼE toe feala pe foki ke fakaʼuhiga ki te ʼu aga ʼae ʼe kovi ʼe fai fakafufu e he tahi, ohage la ko te lau he ʼu tohi ʼe ina fakatupu ai he ʼu holi kovi. Peʼe ko te sioʼi he ʼu pāki peʼe ko he ʼu ʼata kovi. Pea ko te ʼu faʼahi ʼaia, ʼe feala ke ina ʼaumai he tahi ke ina fai he tahi age aga heʼe maʼa ʼae ko te alaala ʼona koga tapu. (Kolose 3:5) *​—Vakaʼi te kiʼi nota.

9. Kotea ʼae ʼe feala ke hoko ki he tahi kua ‘holi fakavale pe ki te ʼu felaveʼi fakasino’?

⁹ Ko he tahi kua ‘holi fakavale pe ki te ʼu felaveʼi fakasino,’ ʼuhi ʼae ko tana agamahani ia te sioʼi ʼo he ʼu pāki peʼe ko he ʼu ʼata kovi pea ʼe feala ia ke popula ki ai. Neʼe fai te ʼu fekumi pea neʼe tokagaʼi ai e te kau popoto, ʼe hage pe te popula ki te ʼu felaveʼi fakasino heʼe ʼaoga ko te popula ki te kava mo te toloke. Koia ʼae ʼe mole tou punamaʼuli ai ki te ʼu nunuʼa kovi ʼo te agamahani ʼae ko te sioʼi ʼo he ʼu pāki peʼe ko he ʼu ʼata kovi. ʼE feala ke iku ki te lainoa, te mole kei lelei ʼo te gaue, te fakaʼofaʼofa ʼo te maʼuli fakafamili, te mavete pea mo te fakamate. Ko te tagata neʼe mole kei ina sioʼi he ʼu pāki peʼe ko he ʼu ʼata kovi lolotoga te taʼu katoa, neʼe ina ui, kua toe feala ʼi te ʼaho nei ke ina logoʼi ʼe tuha ia mo te fakaʼapaʼapa.

10. Neʼe tauʼi feafeaʼi ia Ribeiro ʼi tana popula ki te sioʼi ʼo te ʼu pāki mo te ʼu ʼata kovi?

¹⁰ Maʼa te tokolahi, ʼe faigataʼa ʼaupito hanatou tuku ia te sioʼi ʼo he ʼu pāki peʼe ko he ʼu ʼata ʼe kovi. Kaʼe ʼe feala hanatou liakī. Tou vakaʼi te faʼifaʼitaki ʼa Ribeiro mai Pelesile. ʼI tana kei tupulaga, neʼe mavae ʼi tona famili ʼo alu ʼo gaue ʼi he matani gaue ʼe toe gaueʼi ai te pepa. ʼI ai, neʼe sio tuʼumaʼu ki te ʼu tohi ʼe ʼasi ai te ʼu pāki ʼo te ʼu felaveʼi fakasino heʼe ʼaoga. Neʼe ui fenei e Ribeiro: “ ʼAki te temi, neʼe au popula leva ki ai. Pea ʼi fale, neʼe au ʼamusia age ke foimo puli la te fafine ʼae neʼe ma nonofo ʼi te lahi fau ʼo taku fia sioʼi te ʼu ʼata  kovi.” Kaʼe ʼi te tahi ʼaho leva, neʼe tokagaʼi e Ribeiro ia te tohi Te Kalavi ʼo Te Manuʼia Faka Famili, neʼe tuku fakatahi mo te ʼu tohi ʼae neʼe tonu ke toe gaueʼi. Neʼe ina toʼo ai ʼo lau. Neʼe malave kia ia te ʼu manatu ʼae neʼe ina lau, ʼo ina kamata ako ai te Tohi-Tapu mo te kau Fakamoʼoni ʼa Sehova. Kaʼe neʼe ʼaoga kia Ribeiro ia he temi loaloaga ke ina liakī ʼosi ia tana agamahani ʼae ʼe kovi. Kotea ʼae neʼe tokoni kia ia? Neʼe ina fakamahino fenei: “ ʼAki te faikole, mo taku ako ia te Tohi-Tapu pea mo taku metitasio ki te ʼu meʼa ʼae neʼe au ako, neʼe tuputupu ai taku leleiʼia ia te ʼu kalitate ʼa te ʼAtua. Pea neʼe toe lahi age mo toku ʼofa ʼae ia Sehova ʼi taku fia sioʼi te ʼu pāki mo te ʼu ʼata kovi.” ʼAki te tokoni ʼo te Tohi-Tapu pea mo te laumalie maʼoniʼoni ʼo te ʼAtua, neʼe liakī e Ribeiro ia tona ʼulugaaga ʼafeā pea neʼe papitema. ʼI te temi nei, kua tagata ʼafeā.

11. Kotea ʼae ka tokoni anai ki he tahi ke ina tuku te sioʼi ʼo te ʼu pāki mo te ʼu ʼata kovi?

¹¹ ʼE tou fakatokagaʼi, neʼe mole gata ʼaki pe te ako e Ribeiro ia te Tohi-Tapu ke ina tuku tana sioʼi te ʼu tohi peʼe ko te ʼu ʼata kovi. Kaʼe neʼe tonu foki ke loloto age ia tana fakakaukauʼi te ʼu manatu ʼae ʼe ina lau ʼi te Tohi-Tapu ke malave ki tona loto. Pea neʼe tonu ke faikole kia Sehova ʼo kole mamahi ia tana tokoni. Ko te ʼu faʼahi fuli ʼaia, neʼe tokoni kia Ribeiro ke malohi ia tona ʼofa ki te ʼAtua pea ke ina tauʼi ʼona holi fakavale ki te ʼu felaveʼi fakasino heʼe ʼaoga. ʼO toe feia pe, ʼe tonu ke tou ʼoʼofa mamahi ia Sehova kaʼe tou fehihiʼa ki te ʼu meʼa ʼae ʼe kovi, ke feala ai hatatou tuku te sioʼi ʼo te ʼu pāki mo te ʼu ʼata kovi.​—Lau ia Pesalemo 97:10.

12. Kotea ʼae neʼe tokoni kia Stephen ke fakamamaʼo mai te ita pea ke mole toe tauvele?

¹² Ko te hahaʼi ʼae ʼe iita vave, ʼe natou fai he ʼu palalau fakalotomamahi pea natou laukovi ki ʼihi. Pea ka hoko he aluʼaga feia, ʼe lotomamahi ai ʼonatou famili katoa. Ko te tamai mai ʼOsitalalia ʼe higoa ko Stephen, neʼe ko tana agamahani te tauvele pea hoko ita ki he ʼu kiʼi meʼa laulaunoa. ʼE ina ui fenei: “Neʼe kua tuʼa tolu tamā tahi nofo mo toku ʼohoana, pea neʼe kua tonu ke ma mavete.” Kaʼe neʼe nā ako leva ia te Tohi-Tapu mo te kau Fakamoʼoni ʼa Sehova. Neʼe faigaʼi e Stephen ke ina maʼuliʼi te ʼu manatu ʼae neʼe ina ako. ʼE ina ui, ʼi muʼa ʼo tana iloʼi ia Sehova, neʼe hage pe ia ko he foʼi pulu ʼe meʼa ke paʼulu ʼuhi ko tona hoko ita. Kaʼe ʼaki tana mulimuli ki te ʼu tokoni Fakatohi-tapu, neʼe haʼuhaʼu mamalie pe te lelei ʼo tona maʼuli fakafamili. He ʼe ina ui fenei: “Neʼe fakaofoofo ia te fetogi ʼo tomatou maʼuli fakafamili. ʼAki te tokoni ʼa Sehova, kua au logoʼi ia he tokalelei lahi ʼi te temi nei.” Ia ʼaho nei, ko Stephen ko te tagata faifekau fakaminisitelio pea ʼe pionie katoa tona ʼohoana talu mai ni taʼu. Neʼe ui fenei e te ʼu tagata ʼafeā ʼo tona kokelekasio: “Ko Stephen, ko he tehina ʼe aga fakatokatoka, mo faʼa gaue pea mo agavaivai.” Neʼe natou toe ui foki, ʼe mole heʼeki natou sisio kua ita ia Stephen. Kaʼe neʼe manatu koa ia Stephen neʼe ko ia pe ʼae neʼe ina fetogi tona maʼuli? ʼE ina ui fenei:  “Ka na pau la neʼe mole au tali ia te tokoni ʼa Sehova ke fetogi katoa toku ʼulugaaga, ʼe mahino ia, neʼe mole feala ke au maʼu te ʼu tapuakina taulekaleka ʼaia.”

13. He koʼe ʼe fakatupu tuʼutamaki ia te ita? Kotea ʼae ʼe fakatotonu mai ʼi te Tohi-Tapu ke tou fai?

¹³ ʼE fakatotonu mai ʼi te Tohi-Tapu ke tou liakī ia te ita, te laukovi pea mo te kalaga. (Efeso 4:31) Ko te ʼu aga ʼaia ʼe iku tuʼumaʼu ki te ʼu agamalohi. Ia ʼaho nei, kua meʼa noaʼi e te tokolahi ia te ita pea mo te agamalohi. Kaʼe ʼi tona fakahagatonu, ko te ʼu aga ʼaia ʼe ina fakalainoaʼi totatou Tupuʼaga. Tokolahi ʼotatou tehina mo tuagaʼane neʼe tonu ke natou fetogi ʼonatou ʼulugaaga ʼafeā kaʼe natou kofuʼi te ʼulugaaga foʼou.​—Lau ia Pesalemo 37:​8-11.

14. ʼE feala koa ki he tahi ʼe agamalohi ke fetogi ʼo agamalū?

¹⁴ Tou vakaʼi te faʼifaʼitaki ʼo te tagata ʼafeā mai Autriche ʼe higoa ko Hans. Ko te kootinatea ʼo te kolesi ʼo te kau tagata ʼafeā ʼae ʼe kau ai ia Hans, neʼe ina ui fenei ʼo ʼuhiga mo ia: “ ʼE tou fakaʼamu ke tou felaveʼi mo he tehina ʼe agamalū feia.” Kaʼe neʼe mole agamalū tuʼumaʼu ia Hans. ʼI tana kei tupulaga, neʼe agamalohi ʼuhi ko tana inu kava fakavale. ʼI te tahi ʼaho neʼe konahia ai, pea ina matehi te taʼahine ʼae neʼe fakatahi mo ia ʼuhi pe ko te lahi ʼo tona ita. Neʼe pilisoniʼi ai ia Hans lolotoga taʼu ʼe 20, kaʼe neʼe hoko atu pe tana agamalohi. Pea neʼe kole leva e tana faʼe ki he tagata ʼafeā ke alu ʼo ʼaʼahi ia Hans. Neʼe ina kamata ako ai ia te Tohi-Tapu. Neʼe ina ui fenei: “Neʼe tonu ke au faiga malohi ke au liakī toku ʼulugaaga ʼafeā. Pea ko te ʼu vaega ʼae neʼe ina fakalotomalohiʼi au ko Esaia 55:​7, ʼae ʼe ui fenei ai: ‘Ke siaki e te tagata agahala tona ala,’ mo 1 Kolonito 6:​11, ʼae ʼe ui fenei ai: ‘Pea neʼe feia ʼihi ia koutou.’ Lolotoga he ʼu taʼu,  neʼe tokoni mai ia Sehova ʼaki te kataki fualoa pea mo tona laumalie maʼoniʼoni ke au kofuʼi ia te ʼulugaaga foʼou.” Neʼe papitema leva ia Hans ʼi te fale pilisoni pea neʼe fakaʼateainaʼi hili taʼu ʼe 17 vaelua. Neʼe ina ui fenei: “ ʼE au lotofakafetaʼi kia Sehova ʼuhi ko tona manavaʼofa lahi pea mo te lahi ʼo tona lotofakamolemole.”

15. Kotea ʼae ʼe toe kau ki te ʼulugaaga ʼafeā? Kotea ʼae ʼe ui ʼi te Tohi-Tapu ʼo ʼuhiga mo te faʼahi ʼaia?

¹⁵ ʼE toe kau foki ia te loi ki te ʼulugaaga ʼafeā. Ohage la, tokolahi ʼe natou loi ke mole totogi ʼanatou tukuhau peʼe mole natou fia fakamoʼoni ki ʼanatou hala. Kaʼe ko Sehova ko te “Atua o te mooni.” (Pesalemo 31:6) Ko te tupuʼaga la ʼaia ʼo te loto ʼe Sehova ke “fakaha ia te moʼoni” e ʼana kaugana fuli kaʼe ke mole natou “feloiʼaki.” (Efeso 4:25; Kolose 3:9) ʼE ha lelei mai, ʼe tonu ke tou fakaha ia te moʼoni tatau aipe pe ʼe faigataʼa peʼe tou ufiufi ai.​—Taaga Lea 6:​16-19.

16. Kotea ka tokoni mai anai ke tou liakī totatou ʼulugaaga ʼafeā?

¹⁶ ʼE mole feala ke tou fetogi ʼotatou ʼulugaaga ʼafeā ʼaki pe totatou malohi. Ko Sakura, mo Ribeiro, mo Stephen, pea mo Hans, neʼe tonu ke natou faiga malohi ke fetogi ʼonatou maʼuli ʼafeā. Pea neʼe tokoni kia natou ia te malohi ʼo te Folafola ʼa te ʼAtua pea mo tona laumalie maʼoniʼoni. (Luka 11:13; Hepeleo 4:12) Ke feala hatatou maʼu ia te malohi ʼaia, ʼe tonu ke tou lau ia te Tohi-Tapu ʼi te ʼaho fuli, mo tou metitasio ki ai. Pea ʼe tonu ke tou kole tuʼumaʼu kia Sehova ke ina foaki mai ia te poto mo te malohi ke tou maʼuliʼi te ʼu pelesepeto Fakatohi-tapu. (Sosue 1:8; Pesalemo 119:97; 1 Tesalonika 5:17) ʼE toe fua lelei foki kia tatou ia te Folafola ʼa te ʼAtua pea mo tona laumalie maʼoniʼoni moka ʼe tou teuteuʼi ʼatatou fono pea mo tou kau ki ai. (Hepeleo 10:​24, 25) Pea tahi, ʼe tou fia fakaʼaogaʼi lelei anai te ʼu meʼa kai fakalaumalie ʼae ʼe foaki mai e te kautahi ʼa Sehova, ia te ʼu tohi, te JW Télédiffusion, te JW Library pea mo te jw.org.​—Luka 12:42.

17. Kotea ʼae ka tou vakaʼi anai ʼi te alatike ka hoa mai?

¹⁷ Neʼe tou vakaʼi ʼe tonu ki te kau Kilisitiano ke natou liakī ʼosi ʼihi aga ʼe kovi. Kaʼe ko te meʼa pe koa ʼaia ʼe tonu ke tou fai ke leleiʼia tatou e Sehova? Kailoa ia. ʼE tonu foki ke tou kofuʼi tuʼumaʼu ia te ʼulugaaga foʼou. ʼI te alatike ʼae ka hoa mai, ʼe tou vakaʼi anai pe ʼe feafeaʼi hatatou fai te faʼahi ʼaia.