Te ʼOfa—Ko He Kalitate Maʼuhiga
ʼAKI te takitaki ʼa Sehova, neʼe talanoa ai te apositolo ko Paulo ki te ʼu kalitate ʼe hiva. (Kalate 5:22, 23) Pea ka fakatahiʼi te ʼu kalitate matalelei ʼaia, ʼe fakahigoaʼi ko “te fua ʼo te laumalie.” * (Vakaʼi te kiʼi nota.) ʼE kau te fua ʼaia ki “te ʼulugaaga foʼou” ʼae ʼe tonu ke kofuʼi e te kau Kilisitiano. (Kolose 3:10) Ka fakavai lelei ia he fuʼu ʼakau, pea ʼe ʼi ai anai ʼona fua. ʼO toe feia pe, ka fakagafua e he tagata ke gaue te laumalie maʼoniʼoni ʼi tona maʼuli, ʼe ina maʼu anai te ʼu kalitate matalelei ʼaia.—Pesalemo 1:1-3.
Ko te ʼuluaki kalitate ʼae neʼe talanoa ki ai ia Paulo, ko te ʼofa. He koʼe ʼe maʼuhiga ia te kalitate ʼaia? Neʼe ui e Paulo, kapau ʼe mole ina maʼu te ʼofa, “ ʼe mole he ʼaoga ʼo te meʼa ʼae ʼe [ina] fai.” (1 Kolonito 13:2) Kaʼe kotea koa ia te ʼofa, pea ʼe feafeaʼi hatatou gaueʼi pea mo fakaha ia te kalitate ʼaia ʼi te ʼaho fuli?
KOTEA IA TE ʼOFA?
ʼE mole faigafua te fakamahino ʼo te ʼofa, kaʼe ʼe fakaha ʼi te Tohi-Tapu pe ʼe feafeaʼi ia te faʼahiga manatu pea mo te faʼahiga aga ʼa he tahi ʼe ʼofa. Ohage la, ko he tahi ʼe ʼofa “ ʼe kataki fualoa ia pea mo agalelei” pea “ ʼe fakafiafia ia ʼi te moʼoni.” Ka maʼu e he tahi ia te ʼofa, “ ʼe ina ʼutakiʼi ia meʼa fuli, ʼe tui ia kia meʼa fuli, ʼe falala kia meʼa fuli pea ʼe ina katakiʼi ia meʼa fuli.” ʼE ʼofa mamahi ia ki ʼona tatau, ʼe tokaga moʼoni ia kia natou pea ʼe ko he kaumeʼa ia ʼe agatonu. Kaʼe ko he tahi ʼae ʼe mole ʼofa, ʼe maheka, ʼe fiameʼalahi, ʼe ina fai te aga ʼae ʼe kovi, ʼe manatu pe kia ia totonu pea ʼe mole lotofakamolemole. ʼE mole tou fia maʼu anai te ʼu agaaga ʼaia ʼe kovi, kaʼe ʼe tou fia fakaha ia te ʼofa moʼoni ki ʼihi, pea mo te taʼi ʼofa ʼae “ ʼe mole ina kumi [pe] te ʼu meʼa ʼae ʼe lelei kia ia.”—1 Kolonito 13:4-8.
KO SEHOVA MO SESU KO HE ʼU FAʼIFAʼITAKI HAOHAOA ʼO TE ʼOFA
“Ko te ʼAtua ʼe ko te ʼofa.” (1 Soane 4:8) ʼE ha te faʼahi ʼaia ʼi ʼana gaue fuli. Neʼe ina fakaha ia tona ʼofa mamahi ia tatou, ʼi tana fekauʼi mai ia Sesu ki te kele ke haʼu ʼo mate maʼa tatou. Neʼe tohi fenei e te apositolo ko Soane: “Neʼe fakaha mai e te ʼAtua tona ʼofa kia tatou ʼi te aluʼaga ʼaeni: Neʼe ina fekauʼi mai tona ʼAlo ʼulu tokotahi ki te malamanei ke feala ai hatatou maʼu te maʼuli ʼaki ia ia. Ko te fakaʼuhiga ʼaeni ʼo te ʼofa: Neʼe mole ko tatou ʼae neʼe ʼoʼofa ki te ʼAtua, kaʼe neʼe ko ia ʼae neʼe ʼofa kia tatou pea neʼe ina fekauʼi mai tona ʼAlo ko he sakilifisio faifakalelei maʼa ʼatatou agahala.” (1 Soane 4:9, 10) ʼUhi ko te ʼofa ʼa te ʼAtua, ʼe feala ai ke fakamolemole ʼatatou agahala pea ke tou maʼu ia he ʼamanaki pea mo te maʼuli.
Neʼe fakaha e Sesu ia tona ʼofa ki te malamanei ʼaki ia tana sakilifisioʼi tona maʼuli moʼo fai ia te finegalo ʼo te ʼAtua. ʼE ui fenei mai e te apositolo ko Paulo: “ ʼAki te ‘finegalo’ ʼaia kua fakamaʼoniʼoniʼi tatou ʼaki te molaga ʼo te sino ʼo Sesu Kilisito tuʼa tahi ʼo talu ai.” (Hepeleo 10:9, 10) ʼE mole feala ki he tahi ke ina fakaha ia he ʼofa lahi feia. Neʼe ui fenei e Sesu: “ ʼE mole he tahi ʼe lahi age tona ʼofa ʼi te ʼofa ʼa he tahi ʼe ina foaki tona maʼuli ʼo ʼuhiga mo ʼona kaumeʼa.” (Soane 15:13) ʼE feala koa ki he hahaʼi agahala ke natou faʼifaʼitakiʼi te ʼofa ʼae neʼe fakaha e Sehova pea mo Sesu? ʼEi. Tou vakaʼi pe ʼe feafeaʼi hatatou fai te faʼahi ʼaia.
“KE HOKO ATU TAKOTOU MAʼUʼULI ʼI TE ʼOFA”
ʼE fakalotomalohiʼi fenei tatou e Paulo: “Kotou faʼifaʼitakiʼi ia te ʼAtua, pea ke hoko atu takotou maʼuʼuli ʼi te ʼofa, ohage pe foki ko te ʼofa ʼa Kilisito kia tatou pea mo ina foaki ia ia totonu maʼa tatou.” (Efeso 5:1, 2) Kotea te fakaʼuhiga ʼo te ui ʼae “ke hoko atu takotou maʼuʼuli ʼi te ʼofa”? Ko tona fakaʼuhiga, ke tou fakaha ia te ʼofa ʼi te temi fuli. ʼE mole tou lau pe, ʼe tou ʼoʼofa ki te hahaʼi. Kaʼe ʼe tou fakaha anai ia te ʼofa ʼaki ʼatatou gaue. Neʼe tohi fenei e Soane: “ ʼU fanau, ʼe mole tonu ke tou fakaha totatou ʼofa ʼaki pe he ʼu palalau, kaʼe ʼaki he ʼu gaue pea mo te moʼoni.” (1 Soane 3:18) Ohage la, ʼe tou fakamafola ia “te logo lelei . . . ʼo te Puleʼaga,” he ʼe tou ʼoʼofa ia Sehova pea mo ʼotatou tatau. (Mateo 24:14; Luka 10:27) ʼE toe hoko atu foki ia tatatou “maʼuʼuli ʼi te ʼofa,” moka tou kataki fualoa, mo agalelei pea mo lotofakamolemole. Pea ʼe tou maʼuliʼi te tokoni Fakatohi-tapu ʼaeni: “Ohage pe ko te lotolelei ʼa Sehova ke fakamolemole kia koutou, ʼe tonu ke kotou toe fai feia mo koutou.”—Kolose 3:13.
Kaʼe kapau ʼe tou tokoniʼi peʼe tou fakatonutonuʼi he tahi, ʼe mole fakaʼuhiga leva ʼe mole tou ʼofa. Tou toʼo he faʼifaʼitaki. Ko ʼihi matuʼā, ka natou loto ke tuku la te tagi ʼo tanatou tamasiʼi, ʼe natou fai pe te meʼa ʼae ʼe loto ki ai te tamasiʼi. Kaʼe ko te tamai peʼe ko te faʼe ʼae ʼe ʼofa moʼoni ki tana tamasiʼi, ʼe mole ina fai anai ki te loto ʼo te tamasiʼi. ʼO toe feia pe, logo la ko te ʼAtua ʼe ko te ʼofa, kaʼe ʼe ina “akonakiʼi . . . ia natou ʼae ʼe ʼofa ai.” (Hepeleo 12:6) Ka tou haʼele ʼi te ʼofa, ʼe feala anai ke tou foaki te fakatonutonu ʼae ʼe tuha mo he tahi. (Taaga Lea 3:11, 12) Kaʼe, tou manatuʼi, ʼe tou agahala fuli pea ʼe mole tou maʼu tuʼumaʼu ia te ʼofa. Koia ʼe ʼi ai te ʼu faʼahi ʼe feala ke toe lahi age ai tatatou fakaha ia te ʼofa. ʼO feafeaʼi? Tou vakaʼi te ʼu aluʼaga ʼe tolu.
ʼE FEAFEAʼI HATATOU GAUEʼI TE ʼOFA?
ʼUluaki, tou kole ki te ʼAtua ke ina foaki mai ia tona laumalie maʼoniʼoni. He ʼe ko te ʼofa ʼe kau ki te ʼu agaaga kehekehe ʼo te fua ʼo te laumalie maʼoniʼoni. Neʼe ui e Sesu ʼe foaki e Sehova ia “te laumalie maʼoniʼoni kia natou ʼae ʼe natou kole age.” (Luka 11:13) Koia ʼae ʼe tou tui papau ai, kapau ʼe tou kole ia te laumalie maʼoniʼoni mo tou tuku ke tokoni mai, pea ʼe lahi age anai tatatou fakaha ia te ʼofa. (Kalate 5:16) Ohage la, kapau ko koe ko he tagata ʼafeā, ʼe feala ke ke kole ke tokoni atu ia te laumalie maʼoniʼoni ke feala hau tokoniʼi he tahi ʼaki ia te Tohi-Tapu ʼi te ʼofa. Peʼe kapau ko koe ko he tamai peʼe ko he faʼe, ʼe feala ke ke kole ke tokoni atu ia te laumalie maʼoniʼoni ke feala hau akoʼi tau fanau ʼaki te ʼofa kaʼe mole ʼaki te ita.
Lua, tou fakakaukauʼi ia te ʼofa ʼae neʼe fakaha e Sesu ʼi te ʼu temi ʼae neʼe fakamamahiʼi ai e ʼihi. (1 Petelo 2:21, 23) Ka fakamamahiʼi tatou e he tahi peʼe tou tau mo he aluʼaga heʼe faitotonu, tou fai ia te fehuʼi ʼaeni: ‘Ka na pau la ko Sesu, kotea anai ʼae ka ina fai?’ Ko te fai ʼo te fehuʼi ʼaia neʼe tokoni ki te tuagaʼane ʼe higoa ko Leigh ke fakakaukau ʼi muʼa ʼo hana fai he meʼa. ʼE ina ui fenei: “ ʼI te tahi ʼaho, neʼe faitohi toku kaugā gaue ki ʼihi kaugā gaue ʼi te Neti, ʼo fatufatuʼi atu ia au pea mo taku faʼahiga gaue. Neʼe au lotomamahi ʼaupito ai. Kaʼe neʼe au fai leva te fehuʼi ʼaeni: ‘ ʼE au faʼifaʼitakiʼi feafeaʼi anai ia Sesu ʼi te aluʼaga ʼaeni?’ Hili taku fakakaukauʼi pe ʼe kotea anai ka fai e Sesu, neʼe au fakatotonu ai leva ke mole au tokagaʼi te aluʼaga ʼaia. Ki muli age, neʼe au iloʼi ai neʼe tau toku kaugā gaue mo te mahaki kovi pea neʼe lotohoha ʼaupito. Pea ʼi taku manatu, neʼe lagi mole ina fakakaukauʼi te ʼu palalau ʼae neʼe ina tohi. Ko taku fakakaukauʼi ia te ʼofa ʼae neʼe fakaha e Sesu ʼi te ʼu temi ʼae neʼe fakamamahiʼi ai, neʼe au toe fakaha mo au ia te ʼofa ʼaia ki toku kaugā gaue.” Kapau ʼe tou faʼifaʼitakiʼi ia Sesu, ʼe tou ʼoʼofa tuʼumaʼu pe anai ki ʼotatou tatau.
Tolu, tou gaueʼi ia te ʼofa ʼae ʼe ina uga tatou ke tou fai he ʼu sakilifisio maʼa ʼihi. Pea ko te ʼofa ʼaia ʼe maʼu e te ʼu tisipulo moʼoni ʼa Sesu. (Soane 13:34, 35) Neʼe maʼu e Sesu ia te ʼofa ʼaia, pea neʼe ina tuku mai kia tatou ia he faʼifaʼitaki lelei. ʼO feafeaʼi? ʼI tana mavae mai te lagi, “neʼe ina tuku ia meʼa fuli ʼae neʼe ina maʼu” kaʼe haʼu ʼo mate maʼa tatou. (Fili) Ka tou faʼifaʼitakiʼi ia te ʼofa ʼaia ʼo Sesu, ʼe tou maʼu anai ia tana faʼahiga manatu mo te ʼu meʼa ʼae ʼe ina logoʼi. Pea tahi, ʼe tou fakamuʼamuʼa anai ʼotatou tatau ʼo tou kumi te ʼu meʼa ʼae ʼe lelei kia natou. pe 2:5-8
TE ʼU FUA LELEI
ʼE lahi te ʼu fua lelei ʼe tou maʼu moka ʼe tou fakaha ia te ʼofa. Tou vakaʼi ia te ʼu fua lelei ʼe lua:
Kotea te ʼu fua lelei ʼe tou maʼu moka ʼe tou fakaha ia te ʼofa?
-
HE FAMILI FAKAMALAMANEI: ʼE tou iloʼi, ʼi te ʼu kokelekasio fuli ʼo te malamanei, ʼe fakatalitali leleiʼi anai tatou e te ʼu tehina mo tuagaʼane, ʼuhi ko te ʼofa ʼae ʼe tou femaʼuʼaki. ʼE ko he toe pilivilesio hatatou logoʼi ia te ʼofa ʼo ʼotatou “tehina fuli ʼi te malamanei.” (1 Petelo 5:9) Pea ʼe feala ke tou maʼu ia te taʼi ʼofa ʼaia ʼi te lotolotoiga pe ʼo te hahaʼi ʼa te ʼAtua.
-
TE TOKALELEI: ʼAki tatatou “fekatakiʼaki ʼi te ʼofa,” ʼe tou taupau ai ia tatatou “logo tahi.” (Efeso 4:2, 3) ʼE tou logoʼi ia te tokalelei ʼaia ʼi ʼatatou fono pea mo te ʼu fakatahi lalahi. ʼE mole koa la fakaofoofo ia te maʼuli tokalelei ʼaia ʼi te malama maveuveu ʼaeni? (Pesalemo 119:165; Esaia 54:13) Ka tou kumi ia te tokalelei, ʼe tou fakaha ai totatou ʼofa moʼoni ki ʼihi, pea ʼe tou fakafiafiaʼi ai ia tatatou Tamai ʼae ʼe ʼi selo.—Pesalemo 133:1-3; Mateo 5:9.
“KO ʼAE ʼE ʼOFA ʼE ʼAʼASILI MALOHI IA”
Neʼe tohi fenei e te apositolo ko Paulo: “Ko ʼae ʼe ʼofa ʼe ʼaʼasili malohi ia.” (1 Kolonito 8:1) Kotea tona fakaʼuhiga? ʼE fakamahino e Paulo ʼi te kapite 13 ʼo 1 Kolonito pe ʼe fakamalohiʼi feafeaʼi e te ʼofa ia he tahi. Pea ʼe fakahigoaʼi e ʼihi ia te kapite 13 ʼaia ko te “Pesalemo ʼo Te ʼOfa.” Ko ʼae ʼe ʼofa ʼe ina kumi te meʼa ʼae ʼe lelei ki ʼihi. ʼE tokaga ia ki te ʼu meʼa ʼae ʼe ʼaoga ki ʼihi. (1 Kolonito 10:24; 13:5) Pea mai tona aluʼaga ʼae ko he tahi ʼe ʼofa ʼe lototokaga, mo kataki fualoa pea mo agalelei, ʼe tokoni ia ke ʼaʼasili malohi ia te ʼofa ʼi te ʼu famili pea mo te logo tahi ʼi te ʼu kokelekasio.—Kolose 3:14.
ʼE lahi te ʼu aluʼaga ʼe feala ke tou fakaha ai totatou ʼofa ki ʼihi. Kaʼe ʼe maʼuhiga ʼaupito age totatou ʼofa ki te ʼAtua. Kotea tona tupuʼaga? Koteʼuhi ko totatou ʼofa ʼae kia Sehova, ʼe ina fakatahiʼi ai te hahaʼi ʼo te ʼu lanu mo te ʼu lea kehekehe ke natou tauhi fakatahi kia Sehova, “i he loto e tahi.” (Sofoni 3:9) Koia, tou fakatotonu ke tou fakaha ʼi te ʼaho fuli, ia te kalitate maʼuhiga ʼaia ʼo te fua ʼo te laumalie maʼoniʼoni ʼo te ʼAtua..
^ pal. 2 ʼE tou vakaʼi anai te ʼu alatike ʼe hiva ʼe talanoa anai ki te ʼu kalitate takitahi ʼo te fua ʼo te laumalie. Pea ko te ʼuluaki alatike ʼaeni.