1, 2. Kotea ʼae neʼe hoko kia Paulo pea mo Silasi ʼi te kolo ko Filipe? (Vakaʼi te ʼuluaki pāki.)

TOU fakakaukauʼi age muʼa te aluʼaga ʼaeni. Kua vave pe te maʼupo. Pea ko te ʼu misionea ʼae ko Paulo mo Silasi ʼe nā nonofo nei ʼi te koga fale fakapoʼuli gaogao ʼo te fale pilisoni ʼo te kolo ko Filipe. ʼE mole kei feala hanā gaugaue koteʼuhi neʼe fakamaʼu ʼonā vaʼe ʼaki he ʼu koga papa. Pea ʼe kei mamahi pe ʼonā tuʼa ʼuhi ko tonā ta. (Gaue 16:​23, 24) ʼI muʼa atu ʼi te ʼaho pe ʼaia, neʼe toho loloa ia Paulo mo Silasi e he hahaʼi itaita ki te fakatauʼaga koloa. Pea ʼi ai, neʼe vave pe te fakatahitahiʼi ʼo te telepinale ke fakamauʼi naua. Hili ia, neʼe natou huʼi fakamalohi ʼonā mutuʼi meʼa pea neʼe natou ta naua ʼaki he ʼu kauʼi ʼakau. (Gaue 16:​16-22) Neʼe nā felaveʼi mo te aluʼaga heʼe faitotonu. He neʼe tuha mo Paulo ke fakamauʼi ʼi he fakamauʼaga, koteʼuhi neʼe ko te tagata Loma. *​—Vakaʼi te kiʼi nota.

² ʼI te fale pilisoni, ʼe toe fakakaukauʼi e Paulo ia te ʼu aluʼaga  ʼae neʼe hoko ʼi te ʼaho pe ʼaia. Pea ʼe manatu ia ki te hahaʼi ʼo te kolo ko Filipe ki te mole ʼi ai honatou sinakoka. He ʼe ko te ʼu kolo ʼae neʼe fakalaka ai, kua ʼi ai tonatou sinakoka. Koia ʼae ʼe tonu ai ke olo ia te kau Sutea ʼo fai tanatou tauhi ʼi te tuʼa kolo ʼe ovi ki te vai tafe. (Gaue 16:​13, 14) ʼE tupu koa te aluʼaga ʼaia, he ʼe tonu muʼa ke ʼi ai he toko hogofulu tagata Sutea ʼi te kolo pea hoki feala ai leva ke fakatuʼu honatou sinakoka? Tahi ʼae faʼahi, ko te hahaʼi ʼo te kolo ko Filipe ʼe natou fiameʼameʼa he ʼe ko natou ko te kau Loma. Pea neʼe lagi natou manatu, ko Paulo pea mo Silasi neʼe ko he ʼu tagata Sutea pe ia. (Gaue 16:21) ʼE lagi ko te tupuʼaga ʼaia ʼo tanatou mole iloʼi ko Paulo mo Silasi, neʼe ko he ʼu tagata Loma. Tatau aipe pe ʼe kotea te tupuʼaga ʼo te pilisoniʼi ʼo Paulo mo Silasi, kaʼe neʼe mole nā fai he meʼa ʼe kovi.

3. Kotea ʼae neʼe lagi feʼekeʼaki e Paulo ʼo ʼuhiga mo tona pilisoniʼi? Kaʼe kotea ʼae neʼe ina fai?

³ ʼE lagi toe fakakaukauʼi e Paulo ia te ʼu aluʼaga ʼae neʼe hoko ʼi te ʼu mahina ki muʼa atu ʼi tana tau mai ki te kolo ko Filipe. Neʼe nofo ia Paulo ʼi Asia Veliveli, ʼi te tahi faʼahi ʼo te Tai Égée. ʼI ai, neʼe tuʼa lahi tona taʼofi e te laumalie maʼoniʼoni ke mole faifakamafola ʼi ʼihi telituale. Neʼe hage pe neʼe uga ia ia e te laumalie maʼoniʼoni ke alu ʼo faifakamafola ʼi he tahi age koga meʼa. (Gaue 16:​6, 7) Kaʼe kofea te koga meʼa ʼaia? ʼE tou maʼu tona tali ʼi te meʼa ʼae neʼe ha age ki ai ʼi Toloasi, ʼae neʼe ui fenei age ai ki ai: “Haʼu ki Masetonia.” Neʼe mahino lelei leva kia ia ʼe ko te finegalo ʼaia ʼo Sehova, pea neʼe ina tali atu aipe ke alu ki Masetonia. (Lau ia Gaue 16:​8-10.) Kaʼe kotea leva ʼae neʼe hoko? ʼI tana tau atu pe ki Masetonia, neʼe pilisoniʼi. He koʼe neʼe fakagafua e Sehova ke hoko te aluʼaga ʼaia kia Paulo? ʼE fualoa anai koa tana nofo ʼi te pilisoni? Tatau aipe pe ʼe mole mahino ia Paulo ki te ʼu aluʼaga ʼaia, kaʼe ʼe malohi aipe ia tana tui mo tona fiafia. Ko Silasi pea mo ia, ʼe nā kamata faikole ai pea nā hiva fakavikiviki ki te ʼAtua. (Gaue 16:25) Pea ʼi te lakaga ʼaia, ko te tokalelei ʼo te ʼAtua ʼe ina fakafimalieʼi ʼonā loto pea mo ʼanā fakakaukau.

4, 5. (1) ʼE feala ke hoko feafeaʼi kia tatou te aluʼaga ʼae neʼe hoko kia Paulo? (2) Neʼe fetogi feafeaʼi te aluʼaga ʼo Paulo ʼi hona aluʼaga fakaofoofo?

⁴ Neʼe lagi kua ke felaveʼi pe mo te aluʼaga ʼae neʼe hoko kia Paulo. ʼE lagi ʼi ʼihi temi, neʼe ke faikole ʼo kole tokoni ki te ʼAtua ʼi muʼa ʼo hau toʼo he tonu, pea neʼe ke mulimuli ki te takitaki ʼa te laumalie maʼoniʼoni. Kaʼe neʼe ke tau leva mo te ʼu ʼahiʼahi, ʼo tonu ai ke ke fai he ʼu toe fetogi ʼi tou maʼuli. (Ekelesiasi 9:11) Pea moka ke fakakaukau ki ai, ʼe lagi ke feʼekeʼaki pe koʼe neʼe tuku e Sehova ke hoko ʼihi aluʼaga. Kotea ʼae ka tokoni atu anai ke ke haga ʼutakiʼi ʼou ʼahiʼahi pea mo ke falala katoa kia Sehova? ʼE tou maʼu anai tona tali ʼi te hoko atu ʼo te fakamatala ʼa Paulo pea mo Silasi.

⁵ Lolotoga te hiva fakavikiviki ʼa Paulo pea mo Silasi, neʼe kamata hoko ai leva ia he ʼu aluʼaga ʼe fakaofoofo. Neʼe hoko te mafuike lahi, pea neʼe ava atu aipe ia te ʼu matapa. ʼOsi ʼaia, pea neʼe mavete te ʼu seini ʼo te kau pilisoni. Neʼe fia fakamate ai ia te tagata leʼo, kaʼe neʼe taʼofi ia ia e Paulo. Pea ko te tagata leʼo ʼaia mo tona kiʼi famili katoa neʼe natou papitema. ʼI te ʼaho ake, neʼe fekauʼi e te ʼu pule ʼo te kolo he ʼu ofisie moʼo fakaʼateainaʼi ia Paulo mo Silasi mai te pilisoni. Pea neʼe natou kole age kia naua ke nā mavae ʼi te kolo ʼi te tokalelei. He ʼe ʼi te temi ʼae neʼe natou iloʼi ai leva ko Paulo mo Silasi neʼe ko he  ʼu tagata Loma, neʼe natou mahino ai ki te hala mamafa ʼae neʼe natou fai. Pea ko natou pe ʼaia neʼe olo ʼo fakamavae ia Paulo mo Silasi. Kaʼe ʼi muʼa ʼo tanā mavae ʼi te kolo, neʼe nā fia tauʼine muʼa mo tonā tuagaʼane ʼae neʼe hoki papitema, ia Litia. Pea neʼe nā fakaʼaogaʼi te faigamalie ʼaia moʼo fakalotomalohiʼi te ʼu tehina ʼo te kolo ko Filipe. (Gaue 16:​26-40) Neʼe vave ʼosi te fetogi ʼo te ʼu aluʼaga ʼaia.

6. Kotea ʼae ka tou vakaʼi fakatahi anai?

⁶ Kotea ʼae ʼe tou ako mai te fakamatala ʼaia? Ko Sehova ʼe feala ke ina fakahoko he ʼu aluʼaga ʼe mole tou ʼamanaki ki ai. Koia ʼae ʼe mole ʼaoga ai ke tou tuʼania moka tou felaveʼi mo he ʼu ʼahiʼahi. ʼE tou iloʼi neʼe malave ʼaupito ia te ako ʼaia kia Paulo, ʼuhi ko te ʼu manatu ʼae neʼe ina tohi ki muli age ki te ʼu tehina ʼo te kolo ko Filipe ʼo ʼuhiga mo te tuʼania pea mo te tokalelei ʼo te ʼAtua. ʼI te alatike ʼaeni, ʼe tou vakaʼi anai te ʼu palalau ʼa Paulo ia Filipe 4:​6, 7. (Lau.) ʼE tou toe vakaʼi anai foki mo ʼihi fakamatala Fakatohi-tapu neʼe fakahoko ai e Sehova he ʼu aluʼaga fakapunamaʼuli. Pea ʼe tou talanoa ai leva, pe ʼe lava tokoni feafeaʼi mai ia “te tokalelei ʼo te ʼAtua” ke tou ʼutakiʼi ʼotatou ʼahiʼahi, ʼo tou falala katoa kia te ia.

7. Kotea te ako ʼae neʼe loto e Paulo ke taʼofi e te kau Filipe? Pea ʼe tou lava maʼuliʼi feafeaʼi te ako ʼaia?

⁷ Kotea ʼae neʼe manatuʼi e te kau Filipe ʼi tanatou lau ia te tohi ʼa Paulo kia natou? Neʼe lagi natou manatuʼi te ʼu aluʼaga ʼae neʼe hoko kia Paulo mo Silasi pea mo te tokoni fakaofoofo ʼa Sehova kia naua. Kotea te ako ʼae neʼe loto e Paulo ke natou taʼofi? Ke ʼaua tanatou tuʼania, kaʼe ke natou faikole pea ʼe natou maʼu anai “te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli.” Kotea te fakaʼuhiga ʼo te ʼu palalau ʼaia? ʼI ʼihi Tohi-Tapu ʼe fakaliliu fenei: “ ʼE fakalaka age ʼi ʼatatou fakaʼamu fuli,” peʼe “ ʼe fakalaka age ʼi te ʼu fakatuʼutuʼu fuli ʼa te tagata.” ʼE hage pe ia neʼe ui e Paulo ko “te tokalelei ʼo te ʼAtua” ʼe fakaofoofo age ia ʼi te ʼu meʼa fuli ʼae ʼe feala ke tou fakakaukauʼi. Koia, tatau aipe pe ʼe mole tou maʼu he puleʼaki ki ʼotatou faigataʼaʼia, kaʼe kua iloʼi ia e Sehova. Pea ʼe feala ke ina fakahoko he aluʼaga ʼe mole pe la tou ʼamanaki ki ai.​—Lau ia 2 Petelo 2:9.

8, 9. (1) Kotea neʼe hoko ʼuhi ko te aluʼaga heʼe faitotonu ʼae neʼe tau mo Paulo? (2) He koʼe neʼe feala ke falala te ʼu tehina ʼae ʼi Filipe ki te ʼu palalau ʼae neʼe tohi e Paulo?

⁸ ʼI te lau e te ʼu tehina ʼo Filipe ia te tohi ʼa Paulo pea mo tanatou fakakaukauʼi te ʼu taʼu ʼe hogofulu ʼae neʼe hoa atu ki te ʼu aluʼaga ʼae neʼe hoko, ʼe mahino ia neʼe ko he fakalotomalohi ʼaia kia natou. Logo la neʼe fakagafua e Sehova ke hoko he aluʼaga heʼe faitotonu kia Paulo mo Silasi, kaʼe neʼe ko he faigamalie ʼaia ke “haofaki ia te logo lelei” pea “ke fakamoʼoni ki ai ia te lao.” (Filipe 1:7) Neʼe mole kei fakatagaʼi ai e te ʼu pule kolo ʼo Filipe ia te kokelekasio foʼou. Pea neʼe lagi fakaha e Paulo ko ia ko te tagata Loma, ʼo feala ai ki te tisipulo ko Luka ke nofo ʼi Filipe ʼi te  ʼosi mavae ʼa Paulo mo Silasi. Neʼe feala ai kia Luka ke hoko atu ia tana tokoni ki te kau Kilisitiano foʼou ʼi Filipe.

⁹ ʼI tanatou lau te tohi ʼa Paulo, neʼe mahino ki te ʼu tehina ʼo Filipe, neʼe mole ko ʼana manatu ʼae neʼe ina tohi. Neʼe tau ia Paulo mo te ʼu ʼahiʼahi fakamataku. Pea tahi, ʼi te temi ʼae neʼe faitohi ai ki ʼona tehina ʼi Filipe, neʼe lolotoga pilisoniʼi ʼi tona ʼapi ʼi Loma. Kaʼe ʼe toe ha mai ʼi te aluʼaga ʼaia, neʼe ina logoʼi tuʼumaʼu pe ia “te tokalelei ʼo te ʼAtua.”​—Filipe 1:​12-14; 4:​7, 11, 22.

10, 11. Kotea ʼae ʼe tonu ke tou fai moka tou tuʼania ʼo ʼuhiga mo ʼotatou faigataʼaʼia? Kotea ʼae ʼe tou fakaʼamu ki ai ʼo ʼuhiga mo Sehova?

¹⁰ Kotea ʼae ʼe feala ke tokoni mai ke ʼaua tatatou “tuʼania ki he meʼa,” kaʼe tou maʼu “te tokalelei ʼo te ʼAtua”? ʼE fakaha e Paulo ʼi tana tohi ki te kau Filipe, ko te faitoʼo ki te tuʼania, ʼe ko te faikole. Koia ka tou tuʼania ʼo ʼuhiga mo ʼotatou faigataʼaʼia, ʼe tonu ke tou fetogi ʼotatou tuʼania ʼaia ʼaki te ʼu faikole. (Lau ia 1 Petelo 5:​6, 7.) Ka tou faikole kia Sehova, ʼe feala ke tou tui papau ʼe tokaga mai anai kia tatou. Tou fakafetaʼi tuʼumaʼu kia te ia ki te ʼu tapuakina ʼae ʼe tou maʼu. Pea tou manatuʼi tuʼumaʼu, ʼe feala kia Sehova “ke ina fakahoko ʼo lahi maumau age ʼi te ʼu meʼa ʼae ʼe tou kole peʼe tou manatu ki ai, ʼo mulimuli ki tona malohi ʼae ʼe gaue ia tatou.”​—Efeso 3:20.

¹¹ ʼE feala ke tou punamaʼuli ki te faʼahiga tokoni mai ʼa Sehova kia tatou, ohage pe ko tana fai kia Paulo mo Silasi. ʼE lagi mole ina fakahoko anai he aluʼaga fakaofoofo, kaʼe ko te tokoni pe ʼae ʼe ʼaoga tuʼumaʼu kia tatou ʼae ka ina foaki mai. (1 Kolonito 10:13) ʼE mole fakaʼuhiga leva ke tou nonofo pe tatou ʼo atalitali ke hoki puleʼakiʼi e Sehova ʼotatou faigataʼaʼia. Kaʼe ʼe tonu ke tou mulimuli ki ʼatatou faikole. (Loma 12:11) ʼE tou fakaha ʼaki ʼatatou faiga ʼe tou fakamalotoloto pea ʼe tou foaki ai kia Sehova he faigamalie ke ina tapuakinaʼi tatou. ʼAua naʼa galo kia tatou, ʼe feala kia Sehova ke ina fakahoko ʼo lahi age ia te ʼu meʼa ʼae ʼe tou kole age peʼe tou fakaʼamu ki ai. ʼI ʼihi temi ʼe tou punamaʼuli ai, he ʼe ina fakahoko he aluʼaga ʼe mole pe la tou ʼamanaki ki ai. Koia tou vakaʼi he ʼu faʼifaʼitaki fakalotomalohi. He ʼe tou toe falala malohi ai anai ki te fealagia ʼae ʼa Sehova ke ina fakahoko maʼa tatou he aluʼaga fakapunamaʼuli.

12. (1) Kotea ʼae neʼe fai e te Hau ko Esekiasi ʼi te temi ʼae neʼe fakamatakuʼi ai ia ia e te Hau ko Sanekelipe? (2) Kotea te ako ʼe tou maʼu mai te puleʼaki ʼae neʼe fai e Sehova ki te aluʼaga ʼaia?

¹² ʼI te Tohi-Tapu, ʼe lahi te ʼu fakamatala ʼe ha ai neʼe fakahoko e Sehova ia he ʼu aluʼaga fakapunamaʼuli. Tou vakaʼi te faʼifaʼitaki ʼo Esekiasi, ia te hau ʼo Suta. Ko te hau ʼo Asilia, ia Sanekelipe, neʼe ina ulufi ia Suta pea neʼe ina maʼu ʼona kolo fuli, kaʼe gata pe ki Selusalemi. (2 Hau 18:​1-3, 13) ʼOsi ʼaia, pea neʼe ʼamanaki ʼohofi leva e Sanekelipe ia Selusalemi. Kotea ʼae neʼe fai e te Hau ko Esekiasi? ʼUluaki, neʼe ina kole te tokoni ʼa Sehova pea neʼe toe kole tokoni ki te polofeta ʼa Sehova ʼae ko Esaia. (2 Hau 19:​5, 15-20) Lua, neʼe aga fakapotopoto, he neʼe ina totogi te tuʼā ʼae neʼe fakamaʼua age e Sanekelipe. (2 Hau 18:​14, 15) Pea tolu leva, neʼe fakamalohiʼi e Esekiasi ia te kolo ke feala hana matali moka hoko hona ʼa takai. (2 Koloniko 32:​2-4) Neʼe feafeaʼi te ikuʼaga ʼo te aluʼaga ʼaia? Neʼe fekauʼi ifo e Sehova ia he ʼaselo ke ina matehi  ia te toko 185 000 kau solia ʼa Sanekelipe ʼi te po pe ʼe tahi. Neʼe mole pe la ʼamanaki ia Esekiasi, ʼe hoko anai he aluʼaga feia.​—2 Hau 19:35.

13. (1) Kotea te ako ʼe tou taʼofi mai te aluʼaga ʼae neʼe hoko kia Sosefo? (2) Kotea te aluʼaga fakapunamaʼuli ʼae neʼe hoko kia Sala?

¹³ Tou vakaʼi age muʼa pe kotea ʼae neʼe hoko kia Sosefo. Lolotoga tona pilisoniʼi ʼi Esipito, neʼe mole he temi neʼe manatu ai ia Sosefo ʼe liliu anai ʼo tuʼulaga lua ʼi Esipito. Peʼe fakaʼaogaʼi anai ia ia e Sehova moʼo haofaki ia tona famili mai te hoge. (Senesi 40:15; 41:​39-​43; 50:20) ʼE mahino ia, ko te ʼu aluʼaga ʼae neʼe fakahoko e Sehova neʼe fakalaka maumau age ia ʼi te ʼu meʼa ʼae neʼe fakaʼamu ki ai ia Sosefo. Kaʼe ʼe feafeaʼi kia Sala, te kui fafine ʼo te faʼe ʼa Sosefo. ʼI tana kua finematuʼa, neʼe ʼamanaki koa ia Sala ʼe fakagafua age anai e Sehova ke ina fanauʼi hana kiʼi tama, kaʼe mole gata ʼaki pe te tamasiʼi ʼae neʼe fanauʼi e tana fafine kaugana? ʼE mahino ia, ʼi tana fanauʼi ia Isaake neʼe fakalaka age ia ʼi te ʼu meʼa ʼae neʼe fakaʼamu ki ai.​—Senesi 21:​1-3, 6, 7.

14. Kotea ʼae ʼe tou tui papau ki ai ʼo ʼuhiga mo Sehova?

¹⁴ ʼE mole tou fakaʼamu anai ke pulihi fakamilakulo e Sehova ʼotatou faigataʼaʼia ʼi muʼa ʼo te fakatuʼu ʼo te malama foʼou. Pea ʼe mole  tou atalitali anai ke fakahoko e Sehova he ʼu aluʼaga fakaofoofo ʼi ʼotatou maʼuli. Kaʼe ʼe tou iloʼi ko totatou ʼAtua ia Sehova, neʼe tokoni ki ʼana kaugana agatonu ʼo te temi muʼa ʼi hona aluʼaga fakaofoofo. Pea ʼe mole fetogi anai ia. (Lau ia Esaia 43:​10-13.) Koia ʼae ʼe tou falala ai kia te ia. Pea ʼe tou tui papau ʼe ina foaki mai anai te malohi ke tou fakahoko katoa ia tona finegalo. (2 Kolonito 4:​7-9) Kotea te ʼu ako ʼe feala ke tou taʼofi mai te faʼifaʼitaki ʼo Esekiasi, mo Sosefo pea mo Sala? Tatau aipe pe ʼe kotea ʼotatou faigataʼaʼia, kaʼe ʼe feala ke tokoni mai ia Sehova mo kapau ʼe tou nonofo agatonu kia te ia.

15. Kotea ʼae ka tokoni mai anai ke tou taupau “te tokalelei ʼo te ʼAtua”? Pea he koʼe ʼe tou lava fakahoko te faʼahi ʼaia?

¹⁵ ʼE feafeaʼi hatatou taupau ia “te tokalelei ʼo te ʼAtua” ʼi te ʼu temi faigataʼa? ʼE tonu ke tou taupau ke malohi pea mo lelei ʼatatou felogoʼi mo Sehova. Pea ko te ʼu felogoʼi ʼaia ʼe feala ke tou maʼu, ʼuhi pe ko te sakilifisio faitotogi ʼa Kilisito Sesu. Ko te totogi, ʼe ko he tahi pe ʼaia gaue fakaofoofo ʼa Sehova. He ʼe ʼaki te totogi, ʼe feala ai ke ina fakamolemole ʼatatou agahala, pea ke tou maʼu he leʼo ʼo loto ʼe maʼa pea mo tou fakaovi ai kia te ia.​—Soane 14:6; Sakopo 4:8; 1 Petelo 3:21.

16. Kotea ʼe hoko moka ʼe tou maʼu “te tokalelei ʼo te ʼAtua”? Tuku mai he faʼifaʼitaki.

¹⁶ Kotea ʼe hoko moka ʼe tou maʼu “te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli”? ʼE ui ʼi te Tohi-Tapu, ʼe ina “taupau” anai ʼotatou loto mo ʼotatou ʼatamai. (Filipe 4:7) Ko te kupu Fakakeleka ʼae neʼe fakaliliu ʼaki te kupu “taupau,” neʼe fakaʼuhiga ki he kutuga solia neʼe hinoʼi ke natou puipui he kolo. Neʼe natou leʼoleʼo te hahaʼi ʼae neʼe maʼuʼuli ʼi te kolo ko Filipe. Pea neʼe feala hanatou momoe lelei ʼi te poʼuli he neʼe natou iloʼi neʼe puipui tonatou kolo. ʼO toe feia pe, ka tou maʼu ia “te tokalelei ʼo te ʼAtua,” ʼe mole tou tuʼania pea ʼe fimalie ʼotatou loto mo ʼotatou ʼatamai. ʼE tou iloʼi ʼe tokaga mai ia Sehova kia tatou pea ʼe ina loto ke tou maʼuʼuli fimalie. (1 Petelo 5:10) Pea ʼi tatatou iloʼi te faʼahi ʼaia, ʼe mole tou tuʼania fau anai pea ʼe mole tou lotovaivai anai.

17. Kotea ʼae ka tokoni mai anai ke tou falala kia Sehova lolotoga te mamahi lahi?

¹⁷ Kua vave hoko mai pe te mamahi lahi ki te malamanei katoa. (Mateo 24:​21, 22) ʼE mole tou iloʼi pe ʼe kotea anai ʼae ka hoko kia tatou takitokotahi. Kaʼe ʼe mole ʼaoga ke tou tuʼania fau ʼo ʼuhiga mo te temi ʼaia. He ʼe logo la ʼe mole tou iloʼi ia te ʼu meʼa fuli ʼae ka fakahoko anai e Sehova, kaʼe ʼe tou iloʼi ia totatou ʼAtua. ʼE tou iloʼi ia te ʼu aluʼaga ʼae neʼe ina fai ʼi te temi muʼa maʼa ʼana kaugana. Neʼe tou ako ai, pe ʼe kotea pe he meʼa ʼe feala ke hoko, kaʼe ʼe ina fakahoko tuʼumaʼu pe ʼana fakapapau. Pea ʼi ʼihi temi ʼe ina fakahoko he ʼu aluʼaga fakapunamaʼuli. Koia, ʼi te temi fuli pe ʼae ʼe tokoni mai ai Sehova, ʼe tou logoʼi tona “tokalelei ʼae ʼe maʼoluga age ʼi te ʼu ʼatamai fuli” ʼo mulimuli pe ki te aluʼaga ʼae ʼe hoko kia tatou.