ʼE FAKAʼAMU te hahaʼi ke natou fiafia. Kae ʼi te ʼu ʼaho fakamuli ʼaeni, ʼe tau te malamanei katoa mo te ʼu faigataʼaʼia. (2 Timoteo 3:1) Kua puli te fiafia ʼo ʼihi ʼuhi ko te heʼe faitotonu, te mahaki, mo te hala mo gaue peʼe kua mate he tahi neʼe natou ʼoʼofa mamahi ai. Pea ko ʼihi ʼe mole kei natou fiafia he neʼe hoko kia natou he ʼu aluʼaga fakatupu lotohoha peʼe fakalotomamahi. Maʼia mo te kau atolasio ʼa Sehova ʼe feala ke natou lotovaivai ʼo puli mamalie ai tonatou fiafia. Kapau ʼe ke tau nei mo te ʼu aluʼaga ʼaia, ʼe feala hau toe maʼu feafeaʼi tou fiafia?

Ke feala hatatou tali ki te fehuʼi ʼaia, ʼe tonu muʼa ke tou mahino pe ʼe kotea ia te fiafia moʼoni. ʼE tonu foki ke tou vakaʼi pe neʼe taupau feafeaʼi e ʼihi tonatou fiafia logo la te ʼu ʼahiʼahi. Hili ia, ʼe tou vakaʼi anai pe ʼe feafeaʼi hatatou taupau pea mo fakatuputupu totatou fiafia.

Ko he tahi ʼe fiafia, ʼe mole tatau ia mo he tahi ʼe mata malimali. Tou toʼo he faʼifaʼitaki: Ko he tahi kua konahia, ʼe lagi mata malimali pe anai ia. Kae ka toe malama mai te tagata ʼaia, ʼe mole kei malimali leva ia. ʼE lagi toe felaveʼi anai mo ʼona faigataʼaʼia. Neʼe fakatemi pe tana mata malimali pea neʼe mole fiafia moʼoni ia.—Taaga Lea 14:13.

ʼI tona fakahagatonu, ʼe tou logoʼi te fiafia ʼi totatou loto moka tou maʼu he meʼa peʼe tou fakaatalitali ki he aluʼaga ʼe lelei. Maʼia pe ʼe ko he temi ʼe lelei peʼe kovi kae ʼe tou lotofiafia pe. (1 Tesalonika 1:6) ʼE feala ki he tahi ke tau mo he aluʼaga faigataʼa, kae ʼe fiafia aipe ia. Ohage la ko te kau apositolo, neʼe ta natou he neʼe natou faifakamafola ʼo ʼuhiga mo Sesu. Kae, “neʼe natou mavae . . . ʼi te Sanetualio, ʼo natou fakafiafia he neʼe ko he pilivilesio kia natou tonatou fakalainoaʼi ʼuhi ko te huafa ʼo Sesu.” (Gaue 5:41) Neʼe mole natou fiafia ʼi tonatou ta, kae neʼe natou fiafia he neʼe natou nonofo agatonu ki te ʼAtua.

Ko te fiafia ʼe mole ko he kalitate neʼe tou tutupu mai mo ia. Kotea tona fakaʼuhiga? Koteʼuhi ko te fiafia moʼoni ʼe kau ki te fua ʼo te laumalie maʼoniʼoni ʼo te ʼAtua. ʼE tokoni mai te laumalie ʼo te ʼAtua ke tou kofuʼi ia “te ʼulugaaga foʼou,” ʼae ʼe kau ki ai te fiafia. (Efeso 4:24; Kalate 5:22) Pea ka tou maʼu ia te fiafia, ʼe faigafua age anai te tauʼi ʼo ʼotatou faigataʼaʼia.

Neʼe loto e Sehova ke lelei te maʼuli ʼae ʼi te kele, kae neʼe mole loto ia ke hoko te ʼu aluʼaga ʼae ʼe tou sisio ki ai ia ʼaho nei. Kae logo la te agakovi ʼa te hahaʼi ʼe kei ina taupau pe tona fiafia. ʼE ui fenei ʼi te Tohi-Tapu: “E nofo te malohi mo te fiafia i tona fale.” (1 Koloniko 16:27) Pea tahi, ʼe fiafia ia Sehova ʼi te ʼu gaue lelei ʼae ʼe fai e ʼana kaugana.—Taaga Lea 27:11.

ʼE feala ke tou faʼifaʼitakiʼi ia Sehova ʼo tou faigaʼi ke mole puli totatou fiafia logo la ʼe mole hoko te meʼa ʼae neʼe tou loto ki ai. ʼE mole tonu ke tou lotohoha, kae ʼe tonu ke tou tokaga tafito ki te ʼu meʼa lelei ʼae kua tou maʼu ʼi te temi nei. Pea tou fakaatalitali ʼaki he kataki fualoa ki te ʼu aluʼaga lelei tukupau ʼae ka hoko ʼi te ka haʼu. *—Vakaʼi te kiʼi nota.

 ʼE lahi te ʼu faʼifaʼitaki ʼi te Tohi-Tapu ʼo he hahaʼi neʼe natou taupau tonatou fiafia logo la ʼonatou faigataʼaʼia. Ko Apalahamo maʼia pe neʼe tuʼutamakiʼia tona maʼuli kae neʼe ina taupau pe tona fiafia. ʼO toe feia pe ʼi te temi ʼae neʼe fakatupu mamahi ai ʼihi ki ai. (Senesi 12:10-20; 14:8-16;16:4, 5; 20:1-18; 21:8, 9) Kae neʼe feafeaʼi hana lava taupau tona fiafia? ʼAki tana fakakaukauʼi te ʼamanaki ʼae ke maʼuli ʼi te malama foʼou ʼae ʼe takitaki e te Mesia. (Senesi 22:15-18; Hepeleo 11:10) Neʼe ui fenei e Sesu: “Ko Apalahamo takotou tamai neʼe fakafiafia lahi ʼi tana ʼamanaki ʼae ke sio ki te ʼu meʼa ʼae ka au fai.” (Soane 8:56) ʼE feala hatatou faʼifaʼitakiʼi ia Apalahamo mo kapau ʼe tou fakakaukauʼi te ʼu aluʼaga fakafiafia ʼae ka hoko ʼi te ka haʼu.—Loma 8:21.

Neʼe toe malohi te tui ʼa Paulo mo Silasi. Pea neʼe nā taupau tonā fiafia logo la te ʼu aluʼaga fakalotomamahi ʼae neʼe tau mo naua. Ohage la, hili te ta ʼo naua pea mo tonā tuku ki te fale pilisoni, ‘neʼe nā faikole pea mo nā hiva fakavikiviki ki te ʼAtua.’ (Gaue 16:23-25) Neʼe feala hanā katakiʼi ʼonā mamahi he neʼe nā fakakaukauʼi tuʼumaʼu te ʼu fakapapau ʼa te ʼAtua ki te ka haʼu. Pea neʼe nā fiafia he neʼe nā iloʼi neʼe fakamamahiʼi naua ʼuhi ko te huafa ʼo Kilisito. ʼE feala ke tou faʼifaʼitakiʼi ia Paulo mo Silasi mo kapau ʼe tou manatuʼi te ʼu fua lelei ʼo tatatou tauhi agatonu ki te ʼAtua.—Filipe 1:12-14.

ʼE toe feia pe ia ʼaho nei, ʼe lahi te ʼu faʼifaʼitaki ʼo he ʼu tehina mo tuagaʼane neʼe natou taupau tonatou fiafia logo la te ʼu faigataʼaʼia. Ohage la ʼi Philippines, ʼi Novepeli 2013, ko te Afā Lahi ko Haiyan neʼe ina maumauʼi te ʼu ʼapi ʼe 1 000 tupu ʼa te ʼu famili ʼe fakamoʼoni kia Sehova. Ko George ʼae neʼe maumau katoa tona ʼapi ʼi te kolo ko Tacloban, neʼe ina ui fenei: “Logo la te ʼu aluʼaga ʼae neʼe hoko, kae ʼe fiafia pe te ʼu tehina mo tuagaʼane. Pea ʼe mole au maʼu he kupu feʼauga ke au fakaha tomatou fiafia.” Kapau ʼe tou fakakaukauʼi te ʼu meʼa ʼae neʼe fai e Sehova maʼa tatou pea mo tou lotofakafetaʼi ki ai, ʼe tou taupau anai totatou fiafia ʼi te ʼu faigataʼaʼia. Kotea ʼihi aluʼaga ʼe foaki mai e Sehova ʼe fakatupu fiafia?

Ko te tupuʼaga lahi tokotahi ʼo totatou fiafia, ʼe ko ʼatatou felogoi ʼae mo Sehova. ʼE tou iloʼi ia te Tuʼi ʼo te ʼatulaulau. Ko tatatou Tamai, ko totatou ʼAtua pea ko totatou Kaumeʼa.—Pesalemo 71:17, 18.

ʼE tou toe lotofakafetaʼi foki ki te foaki mai e Sehova te maʼuli pea ke tou maʼu te fealagia ʼae ke tou fiafia ai. (Ekelesiasi 3:12, 13) Mai tona aluʼaga ʼae neʼe taki tatou e Sehova kia te ia, ʼe feala ai ke tou mahino ki tona finegalo pea ʼe tou iloʼi pe ʼe tonu ke feafeaʼi totatou faʼahiga maʼuli. (Kolose 1:9, 10) Kae ko te tokolahi ʼe mole natou iloʼi pe kotea te ʼuhiga ʼo te maʼuli. Neʼe fakaha e te apositolo ko Paulo ia te kehekehe ʼaia ʼaki ʼana palalau ʼaeni: “ ‘Neʼe mole sisio te ʼu mata, pea neʼe mole logo te ʼu taliga, pea neʼe mole fakakaukauʼi e te tagata ʼi tona loto te ʼu meʼa ʼae neʼe teuteuʼi e te ʼAtua maʼa natou ʼae ʼe ʼoʼofa kia te ia.’ Koteʼuhi neʼe fakaha mai e te ʼAtua kia tatou te ʼu faʼahi ʼaia ʼaki tona laumalie.” (1 Kolonito 2:9, 10) ʼE tou lotofiafia he ʼe tou mahino ki te finegalo mo te fakatuʼutuʼu ʼa Sehova ʼo ʼuhiga mo tatou.

Neʼe toe foaki mai e Sehova te tahi ʼu aluʼaga fakafiafia. Neʼe ina fakafealagia ke fakamolemole ʼatatou agahala. (1 Soane 2:12) Neʼe ina foaki mai ia te ʼamanaki ʼae ke tou maʼuʼuli ʼi te malama foʼou, pea kua vave hoko mai pe te aluʼaga ʼaia. (Loma 12:12) Maʼia ʼi te temi nei, ʼe ina foaki mai ia he foʼi fale tau tehina pea ʼe feala ke tou tauhi fakatahi kia te ia. (Pesalemo 133:1) Pea ʼe ina puipui tatou mai ia Satana mo ʼana temonio. (Pesalemo 91:11) Kapau ʼe tou haga fakakaukauʼi te ʼu aluʼaga fakaofoofo ʼaia ʼae neʼe foaki mai e Sehova, ʼe toe lahi age anai totatou fiafia.—Filipe 4:4.

ʼE feala koa ke toe lahi age te fiafia ʼo he Kilisitiano? Neʼe ui fenei e Sesu: “Neʼe au fakaha atu te ’u meʼa ʼaia ke feala ke nofo toku fiafia mo koutou pea ke katoa mo tokotou fiafia.” (Soane 15:11) ʼE ha mai ʼi te ʼu palalau ʼaia, ʼe feala ke toe lahi age  totatou fiafia. ʼE feala ke tou fakatatau totatou fiafia ki he afi. Kapau ʼe tou loto ke ulo lahi ia he afi ʼe tonu ke tou hokohokoʼi. Tou manatuʼi te aluʼaga ʼaeni: ʼE tokoni mai te laumalie maʼoniʼoni ke tou maʼu ia te fiafia. Koia kapau ʼe tou loto ke toe lahi age totatou fiafia, ʼe tonu ke tou kole tuʼumaʼu ia te laumalie ʼo te ʼAtua ʼaki te faikole. ʼE tonu foki ke tou metitasio ki te Tohi-Tapu, he neʼe takitaki ia tona tohi e te laumalie maʼoniʼoni.—Pesalemo 1:1, 2; Luka 11:13.

ʼE toe lahi anai totatou fiafia moka ʼe tou maʼumaʼua ʼi te fai ʼo te meʼa ʼae ʼe leleiʼia e Sehova. (Pesalemo 35:27; 112:1) Kotea tona tupuʼaga? ʼE ui ʼi te Tohi-Tapu neʼe fakatupu tatou ke tou manavasiʼi ki “te Atua, pea ke [tou] tauhi ana folafola. Ko te mea aia e tonu ke fai e te tagata fuli.” (Ekelesiasi 12:15) Neʼe fakatupu tatou ke tou fai te finegalo ʼo te ʼAtua. Koia moka ʼe tou tauhi kia Sehova, ʼe tou leleiʼia moʼoni anai totatou maʼuli. *—Vakaʼi te kiʼi nota.

Ka tou fakatuputupu totatou fiafia, ʼe lahi anai te ʼu fua lelei ʼe tou maʼu. Ohage la, ʼe toe lahi age anai te fiafia ʼo Sehova mo kapau ʼe tou tauhi fakafiafia kia te ia logo la ʼotatou faigataʼaʼia. (Tetelonome 16:15; 1 Tesalonika 5:16-18) Pea moka ʼe tou maʼu te fiafia moʼoni, ʼe mole tou fakamuʼamuʼa anai te ʼu koloa ʼi totatou maʼuli. Kae, ʼe tou faiga anai ke tou fai he ʼu sakilifisio maʼa te Puleʼaga ʼo te ʼAtua. (Mateo 13:44) Pea ka tou sisio ki te ʼu fua lelei ʼo ʼatatou gaue ʼae maʼa Sehova, ʼe tou fiafia lahi anai, ʼe toe lelei age takita manatu ʼo ʼuhiga mo kita pea ʼe toe fiafia ai anai mo ʼihi.—Gaue 20:35; Filipe 1:3-5.

Pea tahi, kapau ʼe tou fiafia ʼe mahino ia, ʼe lelei anai totatou maʼuli malolo. ʼE ui fenei ʼi te Tohi-Tapu: “Ko te loto ae e fiafia ko he faitoo lelei.” (Taaga Lea 17:22) Neʼe toe manatu feia pe la te tagata faifekumi ʼe ina ako te maʼuli malolo ʼi te Univelesite, ʼi Nebraska, ʼi Amelika. ʼE ina ui fenei: “Mo kapau ʼe tou maʼuli fiafia ia ʼaho nei, ʼe mahino ia ʼe lelei anai totatou maʼuli malolo ʼi te ka haʼu.”

Koia, tatau aipe pe ʼe tou maʼuʼuli ʼi he ʼu temi faigataʼa, kae ʼe feala hatatou maʼu te fiafia moʼoni moka tou maʼu te laumalie maʼoniʼoni ʼaki te faikole, te ako ʼo te Folafola ʼa te ʼAtua pea mo tona metitasioʼi. ʼE toe lahi age anai totatou fiafia moka ʼe tou fakakaukauʼi te ʼu meʼa lelei ʼae ʼe foaki mai e Sehova ʼi te temi nei, moka ʼe tou faʼifaʼitakiʼi te tui ʼa ʼihi pea moka ʼe tou faigaʼi ke tou fai te finegalo ʼo te ʼAtua. Pea ʼe hoko anai te ʼu palalau ʼaeni ia Pesalemo 64:11 ʼi totatou maʼuli: “E fiafia te tagata agatonu [ia Sehova], pea e ina kumi ia ia tona holaaga.”